TBP Balochi

روکپتی بلوچستان ءِ دمگ دزاپ (زاھدان) ءَ داں انگت ھم زھرشانی برجاہ اَنت، آدینگ ءِ روچ ءَ بندات بیتگیں زھرشانی مروچی ھم برجاہ اَنت۔

چاگردی رسانکدراں چہ سربیتگیں ھالانی رد ءَ روکپتی بلوچستان ءِ دمگ دزاپ (زاھدان) ءَ بندات بیتگیں ترندیں پُرشت ءُ پروش، میڑ ءُ زھرشانی داں انگت برجاہ اَنت۔ مھلوک انگت دگانی سر ءَ اوشتوک اَنت ءُ ایرانی لشکریانی بگیری ءَ ترندیں زھرشانی کنگ ءَ اَنت۔

دومی نیمگ ءَ ایرانی سرکار ءِ واکدار ءُ ایرانی لشکر ءِ جارکش ءِ رد ءَ زھرشانی ءُ میڑانی بگیر ءَ گام زیرگ بیتگ ءُ جاورھال انی وتی دست ءَ زرتگ اَنت ءُ سرجم ءَ جاورھال دست ءَ اَنت۔

چہ روکپتی بلوچستان ءَ سیادی داروکیں سیاسی ءُ چاگردی جھدکار سوشل میڈیا کارمرز کنان ءَ گُشگ ءَ اَنت کہ ھما دمگانی تہ ءَ کہ جاور ھال نگیگ اَنت اود ءَ انٹرنیٹ چہ سرکار ءِ نیمگ ءَ بند کنگ بیتگ، دانکہ راستیں ھال مھلوک ءَ سر مہ بیت۔

دومی نیمگ ءَ روکپتی بلوچستان ءِ نیکراھی رھشون مولوی عبدالحمید ءَ چہ مھلوک ءَ دزبندی کُتگ کہ آ وت ءَ پرایمن بہ دار اَنت ءُ باور بہ کن اَنت کہ چابھار وئیل درگت ءَ پَٹ ءُ پول بئیگ ءَ اِنت۔ مولوی عبدالحمید ءِ درشان ءَ پد آئی سر ءَ ھم ترندی ءَ ایراد گرگ بئیگ ءَ اِنت ءُ آئی ءَ گُشگ بئیگ ءَ اِنت کہ بائد اِنت آ ھم زھرشانی ءَ بھر بہ زیر اِیت۔

زانگ بہ بیت روکپتی بلوچستان ءَ ھوار ایران ءِ جتاھیں شھرانی تہءَ اے دمان ءَ ایرانی سرکار ءُ مُلا رجیم ءِ بگیر ءَ ترندیں زھرشانی بیگ ءَ اَنت، کہ آودہ مھلوک وتی پئیم ءَ آجوئیں زندمان ءِ گوازینگ ءُ زالبولانی بگیر ءَ ترندیں قانودانی ھلاس کنگ ءُ مھسا امینی ءِ پولیس ءِ دست ءَ کوش ءِ بگیر ءَ گوستگیں بازیں روچاں چہ برجاہ اِنت، کہ اِشی درگت ءَ سرجمیں جھان ءِ مھلوک توار چِست کنگ ءَ اَنت۔

اسلامک روولیوشنری گارڈ ءِ انٹیلی جنس چیف علی موسوی روکپتی بلوچستان ءِ دمگ زاھدان ءَ تیر جنگ ءُ کُشگ بیتگ، ایرانی واکداراں آئی مرگ ءِ ھال راست کُتگ۔

شنگکاری ادارھانی ردءَ زھرشانیانی نیام ءَ سیستان ءُ بلوچستان پرگینگ ءِ انٹیلی جنس کمانڈر سید علی موسوی سینگ ءَ تیر ورگ ءِ سوب ءَ ٹپی بیتگ کہ آ ھما دمان ءَ نادراھجاہ ءَ برگ بیتگ بلے آئی ءَ ٹپانی دور نہ سگیتگ اَنت ءُ مُرتگ۔

زانگ بہ بیت مروچی جمعہ ءِ نماز ءَ پد ھندی مردماں زاھد ان ءِ بنجاھی جیل ءِ دیما زھرشانی کُتگ، کہ اِشی تہءَ مزنیں کساس ءَ مردماں بھر زرتگ اھوالانی ردءَ زھرشانی ایرانی پوج ءِ یک اپسرے ءِ بگیر ءَ بیگ ءَ بیتگ کہ آئی ءَ روکپتی بلوچستان ءِ زرباری شھر چابھار ءَ یک بلوچ جنکے جنسی زوراکی ءِ آماچ کُتگ بیتگ۔

ھندی اھوالانی ردءَ ایرانی لشکریانی تیر گواری ءِ سوب ءَ درزنانی کساس ءَ زھرشانی کنوک بیران ءُ ٹپی بیتگ اَنت، وھدیکہ واکداراں دو مردمانی بیرانی ءِ گپ راست کُتگ۔

واکداراں ٹاہ داتگ کہ زھرشانی کنوک سلاہ بند بیتگ اَنت کہ آیاں زھرشانی ءِ نیام ءَ زاھدان ءَ سئے پولیس تھانہ آنی سرءَ اُرش کُتگ زاھدان ءِ دگہ جتاھیں شانزدہ تھانہ آنی سرءَ زھرشانی کنوکانی نیمگ ءَ تیر گواری کنگ بیتگ۔ شھر ءِ لھتیں ھنداں زھرشانی کنوکاں ٹائر ءُ کچھراھانی ڈبہ سوتکگ ءُ ناشرکاری کنان ءَ یک فائر انجن، یک ایمرجنسی اسٹیشن ءُ دگہ بازیں جاہ مان داشتگ اَنت۔

اسلامک کارڈز ءِ جارکش ءَ رسانکدر ءَ گُشتگ کہ ترندیں زھرشانی ءُ نگیگیں جاواراں پد پھازگی لشکریاں جاورھال گیگ کُتگ اَنت ءُ دمگ وتی دست ءَ زُرتگ وھدیکہ وئیلاں ھواریں مردمانی بگیر ءَ کاروائی برجاہ اِنت۔

بلوچستان ءِ دمگ کیچ ءِ بُنجاھی شھر تربت ءَ ناشناسیں مردماں پاکستانی پوج سر ءَ دزبمب اُرشے بوتگ-

سربوتگیں ھالانی رِد ءَ ایف سی ھیڈکوارٹرءِ بُنجاھی گیٹ ءِ سر ءَ ساڑی ئیں ایف سی کارندھانی سر ءَ ناشناسیں مردماں دزبمب اُرشے کتگ-

اِھوالکارانی رِد ءَ اُرش ءَ پوج ءَ تاوان رستگ، بلے داں انگت واکدارانی نیمگ ءَ اے درگت ءَ ھچ وڑیں گپ دیم ءَ نیتکگ-

زانگ بہ بیت تربت ءَ بلوچ آجوئی لوٹوکیں گل پرکار اَنت، بلے مروچی بوتگیں اُرش زمہ واری انگت ھچ گل ءَ نہ زرتگ-

سر بیتگیں ھالانی رد ءَ ھالانی رد ءَ روکپتی بلوچستان ءِ بنجاھی شھر زاھدان ءَ زھرشانی ءِ سر ءَ ایرانی لشکر ءِ تیرگواری ءَ بیران بیتگیں مردمانی کچ پنجاہ ءُ ھشت ءَ سر بیتگ اَنت-

دمگی ھالانی رد ءَ ایرانی لشکر ءَ زاھدان ءَ آدینگ ءِ نماز ءَ پد ایرانی لشکر ءَ زھرشانی کنوکانی سر ءَ بیڑ برتگ ءُ چریشی ءَ تیرگواری کنان ءَ پنجاہ ءُ ھشت مردم بیران بیتگ اَنت ءُ دوسد ءُ ھپتاد مردم زدگ بیتگ ءُ چریشی ءَ چہ بیران بیتگیں مردمانی کچ گیش بوت کن اَنت –

روکپتی بلوچستان ءَ زھرشانی ءَ پد دامگی ھال ھم بند کنگ بیتگ اَنت ءُ انٹرنیٹ سروس بند اَنت ءُ چریشی ءَ چہ راستیں ھالانی گرگ ءَ جیڑہ ءُ جنجالانی دیمپانی اِنت –

زھرشانی ءَ پد زھرشانی کنوکان زھرشانی گیش کنان ءَ سرکاری پولیس تھانہ ءُ گاڑی ءُ دگہ ساز ءُ سامان سوتکگ اَنت-

نوکتریں ھالانی تہ ءَ یک سرکاری بینکے ھم آس دیگ بیتگ ءُ چریشی ءَ بینک ءَ آس کپتگ ءُ ستکگ –

بلوچستان ءِ بنجاھی شھر شال ءَ پریس کلب ءِ دیم ءَ بلوچ راجداریں باسکانی زورانسری آوار جنی ءِ بگیری ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ ھپسد ءُ ھپتاد ءُ شش روچ سرجم بوتگ انت- مروچی سیاسی ءُ چاگردی باسک علی بخش بگٹی، عبدالغنی سیلاچی ءُ دگہ ءَ مردماں بنجل ءَ اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ ریاست ءِ چیریں ادارھانی کارمند یک شوربندی ءِ رِد ءَ لھتے مردماں برزی تبک ءِ واکداری ءَ دئینت ءُ آھاں وتی لوٹانی ھاتر ءَ کارمرز کنگ لوٹ انت، ریاست ءِ داشتگیں کُشندہ ٹولی وتی کار ءَ کنگ انت، بلوچ راجدار، چاگردی ءُ انسانی ھکانی باسکانی زورانسری آوار جنی ءُ آھانی کُشت کوش ءَ ھمے مردم کنگ انت –

آئی گوشتگ کہ ریاستی کمکار وتی کار ءِ سرجم کنگ ءُ وادھے پورا کنگے بدل ءَ بے کساس ءَ بلوچ پرزنداں کُشگ ءُ آھانی جوناں چگل دیگ انت یا یکجاھیں کبرانی تہ ءَ کل کنگ ءَ انت –

آئی ءَ گوشتگ کہ زورانسری آوار جنی ءُ زوراکیاں چہ ما پدکنز نہ بہ ایں ءُ مئے پُرایمنیں جھد وتی ھکانی گرگ ءَ تاں برجاہ مان ایت – بلوچستان ءَ زورانسری آوارجنی ءِ گرءُدار ءِ ھاتر ءَ مھکمیں توارے ءِ چست کنگ المی انت، اقوام متحدہ ءُ میان استمان پاکستان ءَ پہ جوابدھی ءَ بہ لوٹائین انت –

روکپتی بلوچستان ءِ بنجاھی شھر زاھدان ءَ آدینگ ءِ نماز ءَ سکیورٹی پورسز ءِ تیرگواری ءَ سَے کس تنی وھدی بیران بیتگ اَنت ءُ بازیں کچے ءَ مردم زدگ بیتگ اَنت-

گیشیں ھالانی رد ءَ زاھدان ءَ مکی مسیت ءِ گور ءَ ایرانی پورسز ءَ زھرشانی کنوکانی سر ءَ تیرگواری کرتگ ءُ چریشی ءَ بازیں کچے ءَ مردم ءُ بیران بیتگ اَنت-

زھرشانی چھبار ءَ پانزدہ سالی ئیں جنکو ءِ گون ءَ جنسی زوراکی ءِ ھلاپ ءَ کنگ بیتگ ءُ چریشی ءِ پژدر ءَ مھلوک برانز گپتگ ءُ زھرشانی اش بندات کرتگ –

اے زھرشانی گوستگیں بازیں روچاں چہ روکپتی بلوچستان ءِ جتاجتائیں جاھاں برجاہ اَنت ءُ بازیں مردمے گرگ ءُ بیگواہ کنگ ھم بیتگ اَنت-

مروچی یے زھرشانی ءَ سَے کس بیران بیتگ اَنت کہ آیانی پجار محمود براھوئی، امین ءُ رافع ناروئی ءِ ناماں زانگ بیتگ اَنت –

زاھدان ءَ بیتگیں زھرشانی ءِ سر ءَ تیرگواری ءِ پژدر ءَ پھرہ، چھبار، ھاش، سراوان، سرباز، راسک، مہ گس، سوران،زابل، پنوج ءُ دگہ شھراں ھم مھلوک برانز گپتگ ءُ زھرشانی کنگ ءِ جار پرینگ بیتگ اَنت-

زھرشانی ءَ پد مھلوک ءَ وتی زھرشانی گیش کنان ءَ زاھدان ءَ یک پولیس ءِ پوسٹے ءَ ھوار بکتر بند ءُ دگہ ساز ءُ سامان ھم مانداشتگ اَنت –

زھرشانی ءَ پد پولیس ءُ دگہ ادارھاں جاورانی گر ءُ دار ءَ وتی کچ ءُ کساس ھم گیش کتگ اَنت ءُ چھبار ءُ دگہ شھراں ھم سیکیورٹی پورسز ءِ سر ءُ مانسرانی تہ ءَ گیشی اتکگ –