TBP Balochi

بلوچستان ءِ دمگ نصیر آباد ءَ کاؤنٹر ازم ڈپارٹمنٹ (سی ٹی ڈی) ءَ گمانی میڑ ئے تہءَ چار مردمانی کُشگ ءِ ٹاہ داتگ۔

سی ٹی ڈی ءَ ٹاہ داتگ کہ نصیر آباد ءِ ھند نوتال ءَ ناشناسیں سلاہ بندیں مردماں سی ٹی ڈی ءِ گاڑی ءِ سرءَ تیر گواری کُتگ پسھی تیرگواری ءِ سوب ءَ چار مردم بیران بیتگ ءُ دو سی ٹی ڈی کارندہ ٹپی بیتگ اَنت۔

سی ٹی ڈی ءِ ردءَ کُشگ بیتگیں مردمانی سیادی گوں بلوچ آجوئی لوٹوکیں گل بلوچ ریپبلکن گارڈز ءَ گون اِنت کہ اشانی تہءَ کماندار غلامی ھم ھوار اِنت وھدیکہ دگہ مردمانی پجار دیما آرگ نہ بیتگ۔

سی ٹی ڈی ءَ ٹاہ داتگ کہ جنگ بیتگیں مردمانی قوضہ ءَ چہ 3 دستی بمب، ریموٹ کنٹرول ڈیوائس، کلاشنکوف ءُ تراکناکیں شورو ھم دزگرگ بیتگ اَنت۔

زانگ بہ بیت کہ سی ٹی ڈی ءَ گوست ءَ ھم انچیں میڑانی ٹاہ داتگ کہ رندترءَ جنگ بیتگیں مردمانی پجار پیسر ءَ بیگواھیں مردمانی پئیم ءَ بیتگ۔

بلوچستان ءَ سی ٹی ڈی ءِ کاروائیانی درگت ءَ راجدوستیں پاٹی ءُ انسانی اگبالانی گل مدام دروگیں میڑ نامین اَنت۔ راجدوستیں تکانی ردءَ سی ٹی ڈی ھم پاکستانی چیریں ادارگانی ردءَ مردمانی ابید آمید گِس دزگیری ءَ ھوار کُشگ ءِ تہءَ گون اِنت۔

گوستگیں لھتیں وھد ءَ چہ بلوچ راجدوست تک، انسانی اگبالانی گل سی ٹی ڈی ءِ سرءَ اے بھتام ءَ جنگ ءَ اَنت کہ گوست ءَ ھما کار کہ بلوچستان ءَ پاکستانی چیریں ترامگیجاں کُتگ انی ھما کاراں سی ٹی ڈی کنگ ءَ اِنت۔

بلوچستان نیشنل پارٹی ( بی این پی) ءِ سروک اختر مینگل ءَ وتی یک درشانے ءِ تہءَ گُشتگ کہ بلوچستان ءِ ورناھانی بیگواہ کنگ آیانی جون دور دیگ بیتگ اَنت کہ آئی بھتام پھازگی لشکریانی سرءَ جنگ بیتگ نی تھنا نام مٹ کنگ بیتگ پیسرءَ پوج ھوار بیتگ انی سی ٹی ڈی ءِ نام دیگ بیتگ۔

ھمے سال ءَ زیارت نزیک ءَ پوج ءِ دست ءَ کُشگ بیتگیں قلات ءِ جھمنندیں شھزاد بلوچ ءِ مات ءَ وپات بیتگ-

رسانکدر ءَ سربیتگیں ھال ءُ آئی ءِ کھول ءِ ردءَ شھزاد بلوچ ءِ مات چُک ءِ دردناکیں کُوش ءِ گم اوپار نہ کتگ مروچی قلات ءَ کوڑھیں امروز یل داتگ- آئی ءِ نماز جنازہ باندا آئی ءِ بُنکی ھنکین ءَ وانینگ بیت-

زانگ بہ بیت ھمے سال ءِ جولائی ءَ پاکستانی پوج ءَ زیارت ءِ نزیک ءَ یک میڑے ءَ بلوچ لبریشن آرمی ءَ گوں سیادی داروکیں نُھ مردم میڑ ءَ کُشگ ءِ ٹاہ جتگ اَت بلے اشی ءَ پد اشانی تہ ءَ ھپت مردم ءِ پجّار پیسر ءَ بندیگ جاہ ءَ بند بوتگیں مردمانی ردءَ بیتگ اَنت-

زیارت وئیل ءَ کُشگ بیتگینانی تہ ءَ یکے ءِ پجّار قلات ءِ جھمنندیں شھزاد ء ریٹائرڈ ڈی ایس پی خدا بخش دھوار جھمنند قلات ءِ نام ءَ چہ بیتگ آ پاکستانی پوج ءَ چار جون 2022 چہ شال ءَ آوار جتگ ءُ بیگواہ کتگ اَت-

زیارت وئیل ءَ پد شھزاد بلوچ ءِ کھول ءَ شال پریس کلب ءَ تران کنان ءَ گْوشتگ کہ زیارت وئیل ءَ شھزاد ءِ نمیرانی ءَ پد آیانی ایندگہ سیاداں دلسیاہ کنگ ءَ اَنت- آیاں ھکومت ءَ چہ پھازگی دیگ ءِ لوٹ کتگ اَت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ ضلع کیچ ءَ پوج ءِ کاربوجانی شرکت ایف ڈبلیو او ءِ مشنیریز ءِ ماندارگ ءِ زمہ واری منّ اِتگ-

میجر گْوھرام بلوچ ءَ گْوشتگ کہ بلوچستان ءِ ضلع کیچ ءِ دمگ ڈنک ءَ 25 ستمبر ءَ سرمچاراں یک بیڑے ءَ پاکستانی پوج ءِ کاربوجانی شرکت فرنٹئیر ورکس آرگنائزیشن ( ایف ڈبلیو او) ءِ مشینریز مانداشتگ ءُ سرجم ءَ تباہ کتگ-

جارکش ءَ دیمتر ءَ گْوشتگ کہ ما دُژمن پوج ءُ سرکاری شرکت ءَ گوں ھمگرنچیں مردم ءُ ٹھیکیداراں مکن کن ایں آ پاکستان ءِ پوجی ءُ سرکاری شرکتاں چہ وتی ھمگرنچی ءَ یک کش بہ بنت اگاں ناں آ وتی تاوان زمہ وار وت بنت-

بلوچستان ءِ ضلع نوشکی ءِ جھمنندیں دگہ یک ورنایے زورانسری آوار جنگ بیتگ-

اِھوالکار ٹی بی پی رِد ءَ نوشکی کلی قادر آباد ءِ جھمنندیں فرید ء میر عبدالرزاق بادینی 28 ستمبر 2022 ءَ چہ شال ءَ زورانسری آوار جنگ ءُ بیگواہ کنگ بیتگ چریشی ءَ پد آئی ءِ درگت ءَ ھچ وڑیں سرپدی نہ رس اِتگ-

دمگی اِھوالکار رِد ءَ فرید بادینی ایران ءَ پوریاگری ءَ پد چیزے روچ بیت واتر اَتکگ بیتگ وھدے کہ وتی کار ءِ درگت ءَ شال ءَ شتگ اود آ پاکستانی پوج ءَ زورانسری آوار جنگ بیتگ-

گوستگیں یک ھپتگے ءِ میان ءَ شال، ھُزدار ءُ نوشکی ءَ شش مردم زورانسری آوار جنگ بیتگ اَنت- واکدار تنی وھدے اے درگت ءَ ھچ وڑ درشان شنگ نہ کتگ-

بلوچستان ءِ دمگ کیچ ءِ بنجاھی شھر تربت سری کہن ءَ یک مردمے ءِ جون ءِ دست کپتگ –

پولیس ءِ گوشگ انت کہ جون پنچ روچ ساریگین اِنت –

اھوالکار ءِ رِد ءَ آتاری کور سری کہن ءَ پجار نبوتگیں جون ءِ دست کپتگ کہ آئی ءَ کساس چار یا پنچ روچ بیت – جون پجار ءِ ھاتر ءَ ٹیچنگ نادراھجاہ تربت ءَ برگ بوتگ –

زانگ بہ بیت اے وڈیں جون کہ گیشتر کوھی ءُ کور ءُ شیپاں دست کپ انت گیشتر ژانگول انت ءُ آھانی سر ءَ لٹ شاپ بوتگ ءُ آھانی پجار کنگ باز مشکل انت –

بلوچ راجدوست ءُ انسانی ھکانی گلانی گوشگ انت کہ ژانگولیں جوناں پاکستان ءِ چیریں ادارہ ءُ پھازگی لشکر چگل دیگ انت –

زانگ بہ بیت گوستگیں دوازدہ سال انت کہ بلوچستان جتا جتائیں ھند ءُ دمگاں سدانی کچ ءَ جون دست کپتگ انت کہ ناشناس گوشگ بوتگ ءُ کل کنگ بوتگ انت –

اے وڈیں جون پجار کنگ نہ بنت ءُ بلوچستان ءَ ڈی این اے ءِ ھچ وڈیں آسراتی نیست چریشی ءَ زورانسری آوار جنگ بوتگیں مردمانی کھول ھم ترس آماچ انت –

بلوچستان شھدربرجاہ ءَ بے رھبندیانی بگیری ءَ نودربرگلاں زھرشانی کتگ ءُ زھرشانی ءِ میان ءَ پولیس ءَ نودربرانی سر ءَ لٹ شاپ کتگ وھدیکہ بازیں نودربرے دزگیر کتگ ءُ گوں وت برتگ انت –

نودربر بلوچستان شھدربرجاہ ءَ داخلہ ٹیسٹانی بے رھبندی ءِ بگیری ءَ وتی زھرشانی ءَ کنگ ءَ بوتگ انت کہ واکداراں پولیس ءُ ایف سی شھدربرجاہ ءِ تہ ءَ لوٹارینتگ انت ءُ نودربرانی سر ءَ زوراکی کتگ –

درنگاز کنوکانی گوشگ ات کہ شھدربرجاہ ءِ تہ ءَ پروفیشنل ءُ نان پروفیشنل ڈیپارٹمنٹ یک انٹری ٹیسٹ ءِ کنگ بوتگ یکے ءَ گیش ڈیپارٹمنٹاں داخلہ زوروکیں نودربر نوکیں پالیسی ءِ رِد ءَ بس یکیں ڈیپارٹمنٹ ءَ داخلہ زرت کن انت –

بلوچستان شھدربرجاہ ءِ تہ ءَ نودربرانی سر ءَ بوتگیں لٹ شاپی ءِ بگیری ءَ نودربراں سریاب دگ ءِ سر ءَ نندانک جتگ – نودربرانی گوشگ انت کہ پولیس ءَ بازیں نودربرے دزگیر کتگ انت –

درنگاز کنوکیں نودربرانی گوشگ انت کہ شھدربرجاہ ءِ چانسلر ءِ گوشگ ءِ پد ءَ نودربرانی سر ءَ لٹ شاپی بوگ ءَ انت اگاں مئے سنگت یل کنگ نہ بوتاں گڈا نودربر وتی نندانک ءَ برجاہ دار انت –

آھانی گوشگ انت کہ وائس چانسلر بلوچستان شھدبرجاہ ءِ جیڑھاں سنجیدگ نہ انت نودربر لاچار بوتگ انت کہ سریاب دگ ءِ بند کتگ اے جاورانی پژدر ءَ بلوچستان شھدربر جاہ ءَ مزنین کچے ءَ ایف سی آرگ بوتگ –

بلوچستان ءِ ضلع نوشکی ءَ زورانسری بیگواہ کنگ بیتگیں ورنایے یل کنگ بیتگ وھدے کہ بُنجاھی شھر شال ءَ پاکستانی پوج ءَ یک مردمے آوار جتگ ءُ ناشناسیں جاھے ءَ برتگ-

ٹی بی پی اِھوالکارے ءِ رِد ءَ چہ نوشکی ءَ 24 ستمبر 2020 ءَ زورانسری آوار جنگ بیتگیں شاھد ء حاجی شریف بادینی آجو بیتگ – شاھد بادینی فرنٹیر کور ءُ سادھیں پُچّانی تہ ءِ کارندھاں نوشکی ءِ دمگ کیشنگی ءَ زورانسری بیگواہ کنگ بیتگ-

ھمے وڑ گوستگیں روچ ءَ مگرب نماز ءَ پد پاکستانی پوج ءَ ولی جیٹ کلی سردہ سریاب شال ءِ ھند ءَ یک مردمے آوار جتگ ءُ ناشناسیں جاھے ءَ برتگ- آوار جنگ ءَ پد بیگواہ بیتگیں مردم ءِ پجّار محمد یاسر نام ءَ چہ بوتگ-

اِھوالکارانی رِد ءَ پوج ءَ اے مرد لوگ دیم ءَ پرچون دکان ءَ چہ آوار جتگ-

زانگ بہ بیت بلوچستان ءَ زورانسری آوار جنی ءِ وئیل ھمکروچ دیم ءَ آھگ اَنت، ھمے ھپتگ ءَ بلوچستان ءِ جتائیں دمگاں زورانسری آوار جنی ءِ وئیل نکش کنگ بیتگ اَنت-

چہ روکپتی بلوچستان ءَ سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ گوستگیں روچ ءَ چہ بندات بیتگیں زھرشانیانی درچ یکشل ءَ برجاہ اَنت ءُ زھرشانی کنوکاں زاھدان ءَ ھواریں دمگانی راہ ءُ دگانی سر ءَ ٹائر مانداشتگ ءُ روگ ءُ آیگی مھتل کتگ اَنت-

گوستگیں روچ ءَ بندات بیتگیں زھرشانی پژدر ءَ زھرشانی کنوک ءُ پھازگی لشکر ءِ میان ءَ بیتگیں جنگ ءُ چوپاں دگہ سَے سرکاری اپسر کُشگ بیتگ اَنت –

کُشگ بیتگیں اپسر چیریں ادارھانی کارمنداں ھوار پولیس ءِ اپسر ھوار اِنت –

کُشگ بیتگینانی پجار سید حمید رضا ھاشمی، محمد امین آذشکر ءُ پولیس آفیسر محمد امین عارفی ءِ ناماں پجار بیتگ اَنت-

اے گوستگیں روچ ءَ بیتگیں جنگ ءُ چوپاں زدگ بیتگ اَنت ءُ مروچی اشاں وتی ساہ داتگ اَنت-

ھمے وڑ گوستگیں روچ ءَ زاھدان ءِ چیریں ادارھانی سروک سید علی موسوی ھم زدگ بیتگ ات ءُ پد ءَ آ ھم مُرتگ اَت ءُ تنی وھدی سرکاری اپسرانی مرگانی کچ چار ءَ سر بیتگ اَنت-

زاھدان ءَ زھرشانی ھما وھد ءَ بندات بیتگ اَنت کہ گوستگیں روچاں چھبار ءَ یک پانزدہ سالی ئین جنک زھگے ءِ گون ءَ پولیس ءِ کارمندے ءِ زوراکی ءِ گپ دیم ءَ اتکگ اَت-

زھرشانی ءَ گوستگیں روچ ءَ ایرانی پوج ءِ تیرگواری ءَ پنجاہ ءَ گیش مردم بیران بیتگ ات اَنت ءُ دو سد ءَ گیش زدگ ءُ زدگ بیتگینانی تہ ءَ بازیں کچے ءَ مردمانی جاور ناگیگ گوشگ بیتگ اَنت-

ھالانی تہ ءَ گوشگ بیتگ کہ سرکار زدگ بیتگیناں نادراہ جاہ ءَ ایمبولینساں مکن کنگ اِنت ءُ چریشی ءَ بیرانی کچ گیشتر بوتگ اَنت-

مروچی ھم زھرشانیانی ترندیں درچ برجاہ اَنت بازیں جھاں سرکاری جاہ ءُ پولیس اسٹیشن ءُ بینک سوچگ بیتگ اَنت-

لاھور ءِ گدافی پَٹ ءَ آدینگ ءِ روچ ءَ انگلینڈ ءُ پاکستان دیم پہ دیم بیتگ اَنت، انگلینڈ ءَ ٹاس کُٹ اِتگ ءُ پیسر ءَ بالنگ ءِ پیسلہ کُتگ۔ پاکستان ءَ اول سرءَ بیٹنگ کنان ءَ بیست اورزانی آسر ءَ شش وکٹانی تاوان ءَ 169 رنز اڈ کُتگ۔

پاکستان ءِ نیمگ ءَ بابر اعظم ءَ جوانیں لیب کنان ءَ 87 رنز اڈ داتگ ءُ داں گُڈ سرءَ وتی وکٹ ءِ سرءَ اوشتوک بیتگ۔ انگلینڈ ءِ باولرزانی نیمگ ءَ ڈیوڈ ویلی ءُ سیم کیرن ءَ دو دو وکٹ زُرتگ۔

انگلینڈ ءَ پاکستان ءِ اڈ کُتگیں رنزانی رندگیری کنان ءَ دو وکٹانی تاوان ءَ چاردمی اورءَ لیب وتی نام ءَ کُتگ ءُ سیریز سئے پہ سئے ءَ برابر کُتگ۔ چہ انگلینڈ ءِ جوانیں بیٹنگ کنان ءَ پھِل سالٹ ءَ 88 رنز اڈ کُتگ ءُ وتی وکٹ ءِ سر ءَ داں گُڈ سرءَ اوشتوک بیتگ۔ وھدیکہ پاکستانی بالرز شاداب خان ءَ دو وکٹ زرتگ۔

پاکستان ءُ انگلینڈ ءِ نیام ءَ گُڈی ءُ ھپتمی ٹی ٹوئینٹی گوازی باندہ بزاں دو اکتوبر لیب کنگ بیت اِنت، بانداتگیں گوازی ءَ باج بر بیوکیں ٹیم ٹورنامنٹ ءَ وتی نام ءَ کنت۔

بلوچستان ءِ دمگ کیچ ءِ بنجاھی شھر تربت ءَ پاکستانی پوج ءِ بنجاھی بنجل ءِ سرءَ بیتگیں بمب اُرش ءِ زمہ واری بلوچ سلاہ بندیں آجوئی لوٹوکیں گل بلوچ لبریشن آرمی ءَ من اِتگ۔

بلوچ لبریشن آرمی ءِ جارکش جیئند بلوچ ءَ وتی شنگ کتگیں درشانے تہءَ گُشتگ کہ گوستگیں روچ ءَ کیچ دمگ ءِ بنجاھی شھر تُربت ءَ زورگریں پاکستانی پوجءِ بنجاھی کیمپ ءِ گیٹ ءِ سرءَ ساڑی ایں کارندہ یک دز بمب اُرشے تہءَ نشانگ کُتگ اَنت، اُرش ءِ آسر ءَ دژمن ءِ یک کارندہ ءِ ٹپی بیتگ۔

جیئند بلوچ ءَ دیمتر ءَ گشتگ کہ بی ایل اے، اے اُرش ءِ زمہ واری ءَ من اِیت۔