TBP Balochi

بلوچ سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ پاکستانی پوج ءَ راشن سرکنوکیں گاڑی ءِ سر ءَ بوتگیں بمب اُرش ءِ زمہ واری منّ اِتگ ءُ وتی افیشل سائٹ ءَ اُرش ءِ تامر شنگ کتگ –

جارکش جیئند بلوچ ءَ وتی درشان ءِ تہ ءَ گوشتگ کہ بی ایل اے ءِ سرمچاراں گوستگیں شپ ءَ کلات ءِ دمگ جوہان ءَ زورگیریں پاکستانی پوج ءِ ھاتر ءَ راشن سر کنوکیں گاڑی سر ءَ ھما وھد ءَ گوں تراکناکیں شورواں اُرش کتگ وھدیکہ آئی دژمن ءِ پانگسے ءَ راشن سر کتگ ءُ واتر آھگ ءَ بوتگ – اُرش ءَ اے گاڑی سرجمی ءَ تباہ بوتگ ءُ آئی ءَ سواریں دو ریاستی کمک کار مُرتگ انت –

جارکش جیئند بلوچ ءَ گوشتگ کہ اے اُرش ءِ زمہ واری ءَ بلوچ لبریشن آرمی منّیت ءُ آئی ءَ دیمتر ءَ گوشتگ کہ ما پیش ءَ اے گپ گشین اِتگ کہ زورگیریں پوج ءُ ایندگہ ریاستی ادارھاں ھچ وڈیں آسراتی سر کنگ مہ بیت – بلوچ لبریشن آرمی یکرندے پدا مکن کنت کہ دژمن ءِ ھچ وڈیں کمک کاری کنگ مہ بیت اگاں ناں اے مردماں وتی جان ءُ مال تاوانانی دیمپانی کنگ کپیت –

بلوچستان ءِ بنجاھی شھر شال ءَ بلوچ اسٹوڈنٹس ایکشن کمیٹی شال ھنکین ءِ نیمگ ءَ ھیلکاری سرکلے “نوشت تاک” ءِ سر ءَ ھنکینی کارمستر اُزیر بلوچ ءِ پاگواجھی ءَ برجم دارگ بُوتگ-

دیوان ءِ گچینی مھمان بُنجاہی کُمک کار گشادکماش شبیر بلوچ ءُ بُنجاہی کارگُشاد آصف بلوچ ءُ بُنجاہی کمیٹی ءِ باسک محمد جان بلوچ بُوتگ اَنت-

دیوان ءَ کُرد راجدوستی، بُنپد ءُ دیمروئی سرھال ءِ سر ءَ بُنجاہی کمیٹی ءِ باسک سنگت محمد جان بلوچ تران کتگ –

دیوان ءِ بِندات ءَ بنجاھی سنگت ءَ راجدوستی ءِ سہ بُنکی تھیوریانی سر ءَ گپ کنان ءَ گُشت کہ اولی “ماڈرن اپروچ” اِنت کہ ایشی ھساب ءَ راجدوستی ءِ لیکہ انڈسٹریل دور ءِ جوڑ بُوتگیں لیکہ یے ءُ چہ درستاں مُہکم تریں تھیوری ھم گُشگ بیت- دُومی “پری۔ مورڈئیل اپروچ” اِنت کہ ایشی ھساب ءَ راجدوستی ءِ بُنپد کوھنیں ھونی سیادی ءُ کُٹمی نزیکی ءِ سر ءَ ایر اِنت ءُ ایشی ءَ نوکیں دور ءِ لیکہ یے گُشگ سرجم ءَ رد اِنت۔ سئیمی “الٹرنیٹیو اپروچ” گُشگ بیت کہ آ اے دوئیں لیکہاں یکجاہ کنت ءُ راجی جوڑشت ءَ گِیشین اِیت، کُرد راجدوستی ءِ سر ءَ کار کنوکیں زانتکارانی رِد ءَ الٹرنیٹیو اپروچ ءِ لیکہ چہ دُرستیں لیکھاں مُھکم تر اِنت-

دیمتر ءَ سنگت ءَ دِگہ دو اپروچ گِیشینت اَنت، یک ءِ “کنسٹر کٹیوزم اپروچ” ایشی ھساب ءَ ٹکّی ءُ کُٹمی نزیکیاں باز بَراں زورآور ءُ مالداریں تَبک پہ وتی نپ ءُ پائدگ ءِ ھاتر ءَ کارمرز کن اَنت ءُ ھمے بنیادانی سر ءَ راجے ءِ جوڑشت ءِ ٹھینگ ءِ جُہد ءَ کن اَنت- دومی “انسٹرومنٹل اپروچ” اے ھماھاں گُش اِیت کہ وتی سیاسی ءُ مالی نپ ءِ ھاتر ءَ مذہب ءُ راجدوستی ءَ یک اوزار یے ءِ رنگ ءَ کارمرز کن اَنت –

آئی ءَ وتی تران تہ ءَ گُشت کہ اگاں ھُورتی ءَ بہ چاریں داں اے پدّر بیت کہ اتمان سلطنت ءِ وھد ءَ لہتیں زرداریں کُٹمانی سروکانی نیمگ ءَ کُردستان ءُ کُردش راجدوستی ءِ بُنپد ایر کنگ بنت۔ ترکی، ایران، عراق، شام، ارمینیا ءُ اناتولیا ءِ ھنداں بھر ءُ بانگیں اے زمین روچ ءِ مروچی ءَ کُردستان گُشگ بیت بلئے ھژدہ سد ءُ ھشتاد ءِ دھک ءَ اولی بَراں کُردانی ھاتر ءَ جِتائیں استانے ءِ لوٹ گْوَستانکی رنگ ءَ کُرد راجدوستی ءَ یک گچینی راہ یے ءِ شون ءَ دنت –

تُرکی، ایران، عراق ءُ شام ءَ کُردانی سیاسی جاورھال ءِ سر ءَ سنگت ءَ تران کنان ءَ گُشت، کُرد میانی رودرآتک ءِ گوریچانی نیمگ ءِ ھندانی تہ ءَ جاھمنند اَنت ءُ میسوپوٹیمیا ءِ کوھن تریں مردمانی تہ ءَ شُمار کنگ بنت، اے وت ماں وت ءَ گْوَستانکی، دود ءُ ربیدگی ءَ ھوار زبان ءُ سیاست ءُ مذہب ءِ بُنیات ءَ ایشانی تہ ءَ دگری گندگ بیت۔ چوشکہ کُرمانجی کُردی، زوانی کُردی ءُ سورانی کُردی مستریں گالوار اَنت ءُ زازا ءُ گورانی کُردی ءَ ابید مستریں زبان زانگ بنت، ایشی ھمراھی ءَ مذہب ءِ ھساب ءَ کُردانی مستریں بھر مسلمان ءُ شیعہ اَنت بلئے ایشی ھمراھی ءَ یزیدی، مسیھی، زُرتشت، یھودیاں ھوار اِھل ءِ ھکّانیانی کسانیں کچے ھم است- کُرد دُگنیا ءِ مستریں ھما گُروپانی تہ ءَ ھوار اَنت کہ انگت ایشاں وتی استان ءُ سرکارے نیست، کُرد اے وھدی تُرکی، عراق، ایران، شام، ارمینیا ءُ اناتولیا ءِ میان ءِ کوھی دمگاں جھمنند اَنت کہ ایشانی تہ ءَ کُردانی مستریں آبادی تُرکی ءَ اِنت بلئے راجداری ءِ درگت ءَ دُرستاں گیش عراق ءَ مُھکم اَنت ءُ اے ھنداں ابید کُردانی بلاھیں کچے یورپ ءُ روایرکپت ءِ جتا جتائیں مُلکاں جھمنند اَنت-

آئی ءَ ھامدی رجمنٹ ءِ سر ءَ تران کنان ءَ گُشت کہ اے رجمنٹ اُتمان سلطنت ءِ پوجی رجمنٹے بیت کہ ایشی تہ ءَ کُرد ھوار کنگ بنت، ہمے وھد ءَ رشین ءُ ارمینینانی اُرش گیشا گیش بُوتگ اَنت، رابرٹ اوسلون ءِ ھساب ءَ ھامدی رجمنٹ کُرد راجدوستی ءِ دیمروئی ءَ بلاھیں ارزشتے داراِیت کہ ایشانی بھر ءُ بانگیں کُرداناں ھژدہ سد ءُ چِل ءُ ھپت ءَ رند دوبر یک مُچّی تاگتے داتگ، رودرآتکی اناتولیا ءَ کساس پنجاہ ہزار کُرد سلاھبند بیت ءُ ھمے رجمنٹ ءِ بھر بنت ءُ چہ ایشی ءَ کُرداں پد ءَ اُتمان ءِ سرکاری ءُ راجمانی چاگرد ءَ شْرَپے رس اِیت ءُ کُرد راجدوستی ءِ سئیمی تبک ءَ ھمے رجمنٹ ءِ مردمانی چُک دیم ءَ بر اَنت اے ھمیشانی چُک بنت کہ ھامدی رجمنٹ ءَ بنت ءُ وتی چُکاں پہ وانگ ءَ تُرکی ءَ دیم دئینت۔ گوں ھامدی رجمنٹ ءِ جوڑ کنگ ءَ سلطان حامد لوٹ اِیت کہ یکے وَ ھژدہ سد ءُ ھپتاد ءُ ھشت ءَ پد رشین ءُ ارمینیانی سُر ءُ پُر گیش بنت ءُ آ اسلام ءِ نام ءَ کار مرز کنان ءَ ھمے رجمنٹ ءَ جوڑ کنت دانکہ کُرداں پہ ارمینی ءُ روسیانی دیم ءَ مِکّ بہ کنت ءُ ایشی ءَ چہ سرکار ھم مُھکم بیت ءُ کُرد ھم ایر دست بنت- سلطان حامد لوٹ اِیت کہ عبداللہ ءَ پروش ورگ ءَ رند کہ ھمے ارمینیا ءِ کُرد کہ چہ سرکار ءَ دور بُوتگ اَنت چہ ھمیشی ءَ نزیک بیا اَنت ءُ دگہ جنگ ءِ موہ کمے کم بہ بیت ءُ ایشی ھاتر ءَ کُرد کُٹم ءَ گوں گیش ءَ چہ گیش نزیک کنگی اَنت ءُ اے دراھیں پالیسیانی سر ءَ کار بُوان ءَ اسلامی ھم سنتی یے ھم پیداک بیت کہ سلطان ءِ ھساب ءَ کُرد ءُ حامدی ھمے پالیسی ءِ بھر بُوتگ اَنت-

بنجاھی سنگت ءَ ینگ تُرک آشوب ءِ درگت ءَ وتی تران برجاہ داشت ءُ گُشت کہ سئیمی تبک ھمیش اِنت کہ ینگ تُرک آشوب ءَ گوں استانبول ءَ ” کُرد راجدوستی لیکہ” ءِ بُنیات ءَ وتی اولی سیاسی گلّاں اَڈ دئینت ءُ اے پہ کُرد راجدوستی ءِ دیمروئی ءَ سکیں پُر ارزشت داریں وھدے زانگ بیت۔ ایشانی تہ ءَ اولی گَل ” کے ٹی ٹی سی” اِنت کہ آ وتی دگہ یک ذیلی ادارھے ( Society for the propagation of Kurdish Education) جوڑ کن اَنت کہ ایش “کُردستان” ءِ نام ءَ یک تاکے چاپ کن اَنت کہ اے تاک ایشی ءَ پیسر کائرہ ءَ سال ھژدہ سد ءُ نود ءُ ھشت ءَ بیگ بدر خان کھول ءِ چیردستی ءَ چاپ بیت ءُ پد ءَ بند بیت، ایشی ءِ دوبر چاپ ءَ ابید ھمے زمانگ ءَ دگہ تاک ءُ مھتاک چہ استانبول ءَ چاپ کنگ بنت، اے سوسائیٹی آنی تہ ءَ کُرد راج ءِ نامداریں کھولانی ءُ نامداریں مردمانی چُک گون بنت، چوشکہ بدر خان کھول ءِ بَچ امیر ایمن، شیخ عبداللہ ءِ چُک شیخ عبدالقادر ءُ جنرل محمد شریف پاشا بنداتی مردمانی تہ ءَ ھوار بَنت –

سال نوزدہ سد ءُ ھشت ءَ ایشانی جوڑ کُتگیں وانگجاھے ءَ مردمانی کچ سِی ھزار ءَ سر بیت ءُ سال نوزدہ سد ءُ نُھ ءَ تُرک کُردانی جاہ دئیگ ءُ پہ وتی لیکہ ءِ نزور بُوگ ءِ تُرس ءَ اے سوسائٹی ءَ بند کن اَنت ءُ دیمتر ءَ سال نوزدہ سد ءُ دوازدہ ءَ دگہ گلّے ( Society Kurdish Hope) نام ءَ جوڑ کنگ بیت کہ اے ماں استانبول ءَ کُرد ءُ تُرکانی میان ءَ دگری ءِ پیداک بُوگ ءِ پد کردے زانگ بیت۔ ھیوی نامیں اے گلّ ءِ گیشتر مردم اُتمان زدگیں چاگرد ءِ کُرد ” ایلیٹ ” بنت کہ چو ینگ تُرکانی وڈ ءَ ایشانی میان ءَ ھم راجدوستی ءِ جزبگ وھد ءِ ھمراھی ءَ ودّ اِیت ءُ بازیں نبشتہ کار ھمے زمانگ ءَ کُرد راجدوستی ءِ بنداتی وھد گُش اَنت ءُ اے گَپ ءَ چو کمے شک ءِ نِگاہ ءَ چار اَنت کہ ایشی ءَ پیش ءِ کسان کسانیں واکیات کُرد راجدوستی ءِ لیکہ ءِ بُنیات ءَ بُوتگ اَنت-

بنجاھی سنگت محمد جان بلوچ ءَ کُرد آجوئی ءِ جُنز ءُ PKK ءِ سر ءَ تران کنان ءَ گُشت کہ اد ءَ یات دارگی گپ ایش اِنت ما کہ پی کے کے ءِ گپ ءَ کن اِیں گُڈا بِزانکہ ما تُرکی ءَ کُردانی گپ ءَ ایں ءُ چہ ھمد ءَ ما وتی باوست ءَ ھمے نیمگ ءَ ترین اِیں کہ اے بلائیں ارزشت داریں پگلو یے کہ اے زمانگ ءَ پد کُرد راجی سْیاست ءِ رنگ ءُ چہر سرجمی ءَ مَٹ بیت – نوزدہ سد ءُ ھپتاد دھک ءَ پی کے کے ءِ دہک ءِ میانجی ءَ جوڑ بیت ءُ نوزدہ سد ءُ ھشتاد ءُ چار ءَ تُرکی ءِ بگیر ءَ کُرد راجدوستی ءِ لیکہ ءِ بُنیات ءَ سلاھبندیں جُنز ءَ بِندات کنت ءُ داں روچ ءِ مروچی تُرک ریاست ءِ تہ ءَ مزنیں سلاھبندیں تاگتے ءِ ھمراھی ءَ ماں تُرکی ءِ کُردانی میان ءَ بلاھیں ارزشتے دار اِیت-

آئی ءَ گُشت کہ کُردانی سلاھبندیں جُنز ءُ (پی کے کے) ھپتاد ءِ دہک ءَ کُرد راجدوستی ءِ جُنز ءِ یکبرے پد ءَ تُرندی ءَ گوں دیم ءَ آئیگ ءُ ھمے وھد ءُ جاوراں کُردانی سْیاسی جاورھالاں چاگرد کنت- “عبداللہ اوژلان” ءُ آئی ءِ یونیورسٹی ءُ دگہ کش ءُ گور ءِ سنگت نوزدہ سد ءُ ھپتاد ءُ ھشت ءَ ھما وھد ءَ کہ پی کے کے ءَ جوڑ کن اَنت آ زمانگ ءَ کُردستان ءَ کساس دھ ءَ گِیش راجی گل بنت کہ ایشانی کارانی تہ ءَ گیشتر کتاب ءَ روتاک کش اَنت، دھکان کاراں یکجاہ کن اَنت ءُ زمینانی گِرگ ءَ بِندات کن اَنت ءُ ورناھانی ایسوسیشن جوڑ کن اَنت-

میان اُستمانی کالونئیل لیکہ ءِ سر ءَ تران کنان ءَ آئی ءِ گوشگ ات کہ کُردانی درگت ءَ میان اُستمانی کالونی ءِ لیکہ اولی رَند ءَ تُرکی ءِ جھمنِندیں زانتکار، سوشیولوجسٹ، کُردلوجسٹ ءُ کُرد ءُ میان رودرآتکی سیاست ءَ بَلد “Ismail BeSikci” ءَ دیم ءَ آؤرتگ، آ کُرد کیس ءِ درگت ءَ گُشیت چوشکہ کُردستان ءَ کالونائزیشن ءِ کیس چہ آ دگہ ھَنداں جُتا اِنت ءُ یک گِیشینتگیں سیمسرے ءِ اندر ءَ نہ بُوگ اِنت بلکیں چار مُلکانی میان ءَ بہر ءُ بانگیں یک مھلوکے ءِ کالونائزیشن چہ گْوَستگیں کالونیاں (چوشکہ افریکہ ءُ لاتینی امریکہ ءَ ھوار ایشیا ءِ گِیشینتگیں کالونی بُوتگ اَنت) چہ جتا چارگ بہ بیت کہ یک مھدودیں سیمسرے ءِ اندر ءَ بُوتگ اَنت-

دیوان ءِ گُڈسر ءَ جُست کنگ بُوت ءُ جُستانی پَسّو دئیگ بُوت اَنت ءُ دیوان آسر کنگ بُوت –

براھوئی زبان ءِ نامی ئیں گشندہ رمضان زیدی مروچی بیران بوتگ –

ھزدار زیدی ءِ جاھمنند رمضان کہ چہ رمضان زیدی والا ءِ نام ءَ زانگ بوتگ، بازیں وھدے بیت کہ نادراھ بوتگ ءُ مروچی آئی اے کوڈھیں دنیا یل داتگ –

زانگ بہ بیت رمضان زیدی سیادی چہ بزگریں کھولے ءَ بوتگ کہ آئی ءَ بازیں وھدے ءَ ماتی زبان ءَ پُرلزتیں توارے داتگ ءُ آئی ءِ شاتمانیں توار ءَ زبان آشکار کرتگ-

آ مرچی وتی بنکی ھنکین ءَ کل ءُ کسارت کنگ بیت اِنت –

زانگ بہ بیت بلوچستان ءَ گشندھی پڑاں ھوار زبان ءِ دگہ تک ءُ پھناتاں بندوکیں مردمانی نادراھیانی بارو ءَ چاگردی مردمانی گوشگ اِنت کہ چوشیں جاوراں کہ ھما مردماں زبان ءُ آئی ءِ ھزمت گزاریں مردماں پہ وھد جانسلامتی ءِ نہ بوگ ءَ آ چہ وتی زند ءَ زبھر بیگ ءَ اَنت-

آیانی گوشگ اِنت کہ اگاں گشندھاں ھوار ھوار دگہ لبزانکاراں شریں ادارگ ءُ چیز بہ بنت گڑا پہ زبان ھزمت گزاراں اے جاور ناگیگ بوت نہ کن اَنت-

بلوچستان ءِ بنجاھی شھر شال ءَ پریس کلب ءِ دیم ءَ بلوچ راجداریں باسکانی زورانسری آوار جنی ءِ بگیری ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ ھپسد ءُ ھشتاد ءُ شش روچ سرجم بوتگ انت – مروچی جوڈیشل کمیشن ءِ باسک اختر حسین، ایڈوکیٹ احمد فاروق خٹک، سید جعفر طاہر بخاری، پنجاپ بار کونسل ءِ کمک سرکماش سید قمر حسین، اسلام آباد بار کونسل ءِ راحب بلیدی، منیر کاکڑ، کمک سرکماش محمد علی جدون، خیبر پختون خواہ بار کونسل ءُ باسکاں بنجل ءَ اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچستان ءَ ریاستی زلم ءُ زوراکیانی بگیری ءَ وکیلاں ھوار ھر تک ءُ پھناتاں سیادی داروکیں مردم توار چست بہ کنت ءُ وتی کرد ءَ پیلو بہ کن انت –

آئی ءَ گوشتگ کہ مروچی پاکستان ءَ بلوچستان ءِ تہ وتی زلم زورکیانی سرجمیں سیمسر سرگوز کُتگ انت مئے کش ءُ گوراں ھاموشی انت –

ماما قدیر بلوچ ءَ گوشتگ کہ وھدیکہ بیست ءُ یکمی کرن بندات بوتگ گڈا دیمروئی کتگیں جھان ءَ سیمی جھان پشت ءَ یل داتگ ھر نیمگ ءَ تھاری ءَ مانشان اِتگ بلوچستان ھم ھمے جاوراں گوں دچار بوتگ – بلے اے رندی راج اے درسیں چیزاں اوپار نہ کنت آئی ءَ وتی گوست ءِ کتگیں ردیاں چہ باز دربرتگ – ھما وھد ءَ کہ بلوچ ءَ دوبر وتی سر چست کتگ دژمن ھم ترس ءِ آماچ بوتگ ءُ بلوچ پرزنداں پہ ترس ءُ بیھار وتی دور کنگ لوٹ اِتگ –

آئی ءَ گوشتگ کہ پاکستان پہ زلم زوراکی کنگ ترس ءِ ودی کنگ ءَ بے سوب بوتگ بلوچ ءِ راجی جھد ءَ ھلاس کنگ ءَ تاکت ءِ کارمرز بوگ ءَ انت بلے بلوچ وتی ھک ءِ راہ ءَ سرانی دیمھونی دیگ ءَ پدکنز نہ بیت اِنت –

آئی ءَ گوشتگ کہ مروچی وکیلاں ھوار ھر تک ءُ پھناتاں سیادی داروکیں مردم دیم ءَ بیا انت ءُ بلوچستان ءَ بؤکیں زلم زوراکیانی بگیری ءَ جھد ءِ تہ ءَ وتی بھر ءَ مان بہ کن انت –

میرجاوہ ءَ ایرانی لشکر ءَ چار کس دزگیر کنگ ءَ پد بیگواہ کرتگ اَنت-

روکپتی بلوچستان ءِ دمگ میر جاوہ ءَ ایرانی لشکر ءَ چار کس دزگیر کنگ ءَ پد بیگواہ کرتگ اَنت-

دزگیر کنگ بیتگیں مردمانی پجار آصف ء عبدل، جاود کرد ے یونس، راشد ریگی ءُ دیدگ ریگی ءِ شھریار ءِ ناماں زانگ بیتگ اَنت-

اے مردم گوستگیں سَے شمبے ءُ دوشمبے ءِ روچ ءَ میر جاوہ ءَ ایرانی لشکر ءَ دزگیر کنگ ءَ پد ناشناسیں زنداناں برتگ اَنت-

اشانی توک ءَ آصف ءُ جاوید دوشمبے ءَ گرگ بیتگ اَنت آ دویں سَے شمبے ءَ گرگ بیتگ اَنت-

زانگ بہ بیت گوستگیں سی ستمبر ءَ روکپتی بلوچستان ءَ زھرشانی ءَ پد مردمانی گرگ ءُ بیگواہ کنگ ءِ درچ گیش بیتگ اَنت-

اود ءَ نیکراھی رھشون ءُ دگہ پھناتاں سیادی داروکیں مردمانی گوشگ اِنت باید سرکار لس مردماں مہ گپت ءُ بیگواہ مہ کنت کہ چریشی ءَ چہ ڈیھ ءِ جاورگیشتر ناگیگ بوت کن اَنت-

بلوچستان ءِ ضلع قلات ءَ پاکستانی پوج ءَ راشن پُجّارینوکیں گاڑی بمب اُرش ءِ نشانگ کنگ بیت چریشی ءِ آسر ءَ دو مردم بیران بیتگ اَنت-

بمب تراک کلات ءِ دمگ جوھان ھند ءَ گوستگیں روچ ءَ بیتگ-

زانگ بہ بیت گوستگیں روچ ءَ ھال رس اِتگ اَت کہ ناشناسیں مردماں پوج گاڑی ءِ سر ءَ بمب اُرش کتگ بلے مروچی پدر بیتگ کہ بمب اُرش پوج ءَ پُجّارینوکیں شیزور گاڑی نشانگ کنگ بیتگ-

تراک ءَ بیران بیتگیں مردمانی پجّار ڈرائیور نادر خان ءُ ھمراہ محمد اصغر ناماں چہ بیتگ اَنت-

اِھوالکارانی رِد ءَ گاڑی ھما وھد ءَ نشانگ کتگ اَنت کہ وھدے آ پاکستانی پوج ءَ راشن پُجّارینتگ ءُ واتر روگ ءَ بیتگ-

تنی وھدے اُرش زمہ واری ھچ گل ءَ نہ زرتگ-

بلوچستان ءِ تیادپی شھر گوادر ءَ مروچی نودربراں زھرشانی کنان ءَ دگ بند کتگ ءُ وائس پرنسپل جی ڈی اے اسکول گوادر ءِ نودربرانی گون ءَ ناوشیں رویش ءُ انتزامیہ ءِ نادلگوشی ءِ ھلاپ ءَ گوادر ڈیولپمنٹ اتھارٹی آفس ءِ دیم ءَ نندانک جتگ-

نندانک ءِ درگت ءَ یک نودربرے ءَ دی بلوچستان پوسٹ ءَ گوں گپ کنان ءَ گوشتگ ئِے کہ وھدیکہ وائس پرنسپل اسٹوڈنٹ ءَ دل ءِ گون ءَ نپرت ءِ آس ءَ روک کنت گڑا بس نپرت ودی بنت-

آئی ءَ بھتام جتگ کہ پرنسپل ھروھد ءَ آیاں ترسین ایت کہ شمئے سیادی بلوچ آجوئی لوٹوکیں سلاہ بندیں گلان انت-

آئی ءَ گوشتگ پرنسپل ءَ بلوچانی زھنی مازگی ءَ سرپد نہ اِنت ھمک روچ نودربرانی ازت ءَ پادمال کنت ما ھر وڑ ءَ اے وڑیں چیزاں اوپار کت نہ کن ایں ما لوٹ کن ایں اے پرنسپل کشگ بہ بیت اِنت ءُ یک کابل ءُ شریں پرنسپلے دارگ بہ بیت دانکہ مئے آوکیں باندات جوان بہ بیت –

بلوچستان ءِ جتاجتائیں دمگاں تیرگواری ءُ دگہ وئیلانی آسر ءَ نُھ مردم بیران ءُ بیست ءُ یک ٹپی بیتگ اَنت-

اے وئیل شال، نوشکی، سورابط دکی ءُ ژوب ءَ بیتگ اَنت-

شال تفتان ھائی وے سر ءَ شیخ واصل ءِ نزیک ءَ گاڑی ءُ پک اپ میان ءَ ڈک ورگ ءِ آسر ءَ یک زالبولے بیران وھدے کہ یک جنکوے ءِ ھوار دو مردم بیران بیتگ اَنت وھدے کہ یک پک اپ دیم ءِ آؤکیں گاڑی ءَ گوں ڈِک وارتگ چریشی ءِ آسر ءَ پنچپائی ءِ جھمنندیں یک زالبولے ھما دمان ءَ مرتگ وھدے کہ یک جنکوے ءُ عبدالقیوم نامیں مردمے سک ٹپی بیتگ اَنت-

سوراب ءَ ٹماٹراں پُریں مزدا ٹرک پیماز ءَ چہ پُریں دس ویلر ٹرکے ءَ گوں ڈِک وارتگ- وئیل ءَ دو برات بیران وھدے کہ سے مردم ٹپی بیتگ اَنت- بیران بیتگیں براتانی سیادی چہ قلعہ عبداللہ ءَ اِنت-

لورالائی ءَ زمین ءِ جیڑہ ءِ سر ءَ دو ٹولیانی تیرگواری ءِ آسر ءَ رحمت اللہ ء عبداللہ جان ھما دمان ءَ مرتگ-

نوشکی آر سی ڈی شھدگ سر ءَ کیشنگی ءِ نزیک ءَ گوستگیں روچ ءَ بیگاہ ءَ بروبکس گاڑی دیم ءَ آؤکیں ویگو گاڑی ءَ گوں ڈِک وارتگ چریشی ءِ آسر ءَ ڈرائیور بیران وھدے کہ شانزدہ مردم ٹپی بیتگ اَنت، آیانی تہ ءَ زالبول ءُ چُک ھوار اَنت-

ٹپی ٹیچنگ نادُراھجاہ ءَ برتگ اَنت بیران بیتگیں ڈرائیور ءِ سیادی چہ چاغی ءَ اِنت-
.
مروچی دکی ءِ دمگ زرباری بائی پاس سر ءَ کول مائنز جاہ ءَ یک مردمے ءِ پجّار نہ بیتگیں لاشے دزکپتگ-

پولیس رِد ءَ یازدہ سال ءَ چہ بندیں چات ءِ کار دوبر کار بندات کنگ ءِ وھد ءَ نُھ سد پُٹ جُھلانکی ءَ چہ یک مردمے ءِ پجّار نہ بیتگیں لاشے دزکپتگ کہ آئی ءِ پجّار ھاتر ءَ ڈی این اے ٹیسٹ ءِ واستا جان ٹکرانی زیرگ ءَ پد لاش مائنز کبرستان ءَ کل ءُ کسارت کنگ بیتگ-

بلوچستان ءِ ضلع ژوب ءَ پکنک ءِ وھد ءَ آپ ءِ تہ ءَ یک ورنایے بُک اِتگ ءُ بیران بیتگ-

اِھوالکارانی رِد ءَ ژوب ءِ دمگ قبرووند ءَ پکنک ءِ وھد ءَ سمیع اللہ نامیں ورنایے آپ تہ ءَ بُک اِتگ بیران بیتگ کہ آئی ءِ لاش سول نادُراھجاہ ژوب ءَ پہ گیشیں چار ءُ ٹپاس ءَ پد کھول ءَ داتگ-

بلوچستان ءِ مزن شھر شال ءَ گوستگیں اوگان پولیس کماندار ناشناسیں مردمانی تیرگواری ءَ چہ بیران بیتگ-

پولیس رِد ءَ عبدالصمد اچکزئی گوریچی بائی پاس ءِ دمگ پرکانی گلی ءَ یکشمبے ءِ سُھب ءَ کُشگ بیتگ-

پولیس ءِ ڈیوٹی اپسر محمد اسحاق ءَ گْوشتگ کہ عبدالصمد ءُ آئی ءِ برات لوگ نزیک ءَ ھما وھد ءَ ناشناسیں مردماں تیرگواری ءِ نشانگ کتگ اَنت وھدے آ پرپٹ سر ءَ روگ ءَ بیتگ اَنت-

پولیس اپسر محمد اسحاق رِد ءَ تیرگواری ءَ عبدالصمد ءِ برات رکّ اِتگ وھدے کہ تیرگواری ءِ نشانگ ءَ اَتکگیں یک راھگوزے ٹپی بیتگ- لاش ءُ ٹپی نادُراھجاہ ءَ برگ بیتگ اَنت-

دمگ ءِ ایس ایچ او منظور ءَ پدر کتگ گْوشتگ کہ کُشکارانی سیادی چہ اوگانستان ءِ استان قندھار ءَ بیتگ اَنت ءُ آ گوستگیں اوگان ھکومت ءَ پولیس کماندار بیتگ-

آئی ءِ گْوشگ اِنت کہ کُوش ءِ سوب اوگانستان ءَ دُژمنی بیت کنت بلے کُشگ بیتگیں کھول مردماں انگت کس نام دپ نہ کتگ ءُ ناشناسیں مردمانی بگیر ءَ ایف آئی آر نکش کنگ ءَ ارزبندی داتگ-

روس ءَ دوشمبے ءِ سھب ءَ یوکرین ءِ بازیں شھرانی سر ءَ اُرش کرتگ چریشی ءَ لس شھریانی بیرانیانی ھم ھال اِنت اے اُرشاں پھل ءِ پروشگ ءِ پژدر گوشگ بیگ ءَ اَنت-

ھبر رساں ادارہ ایسوسی اینڈ پریس ءِ رد ءَ روس ءَ کریمیا ءَ ھوار کنوکیں پُھل شمبے ءِ روچ ءَ تراک ءَ گوں پروشگ بیتگ ءُ آئل ٹینکر ءَ آس لگ اتگ اَت-

یک شمبے ءَ روسی مھتر پوتن ءَ وئیل ’ناشرکاری ‘ گشتگ ات ءُ یوکرین اشی ءِ زمہ وار کتگ ات-

روس ءَ یوکرین ءِ بنجاھی شھر کیئف ءَ بے کساس ءَ میزائل آس داتگ چریشی ءَ جنگ ءِ مستریں درور گوشگ بیگ ءَ اِنت-

ھمے وڑ ءَ روکپتی دمگ لائوف، ترنوپل ءَ زائتومائر ءِ شھراں ھم تراکانی توار اش کنگ بیتگ اَنت ھمے وڑ روکپتی شھر دنیرپو، کریمنچوک، زیپوریزھیا ءُ ھرکیف ءَ ھم اُرش کنگ بیتگ اَنت-

ھمے وڑ ءَ روس ءِ سیمسراں ھم تراکانی توار اشکنگ بیتگ اَنت ءُ کیئف ءِ سٹی سینٹر ھم نشانگ کنگ بیتگ-

اُرشاں پد دیم ءَ اتکگیں تامراں گندگ بیت اِنت سوتکگیں گاڑیانہ نزیک ءَ جینز ءُ شرٹ ءَ یک مردمے ءِ لاش کپتگ ھمے وڑ ءَ سیکورٹی کارمند جھل ءَ کپتگیں یک زالبولے ءِ کمک ءَ کنگ ءَ اِنت-

ھمے وڑ ءَ دگہ یک زالبولے جاڑیگ اِنت آئی ءِ ٹپانی ھوناں بند کنگ اِنت-

پولیس ءِ رد ءَ اُرش ءَ کم چہ کم پنچ مردم بیران ءُ دوزادہ زدگ بیتگ اَنت- کیئف ءَ چلڈرن پارک ءِ نزیک ءَ یک گڈے گندگ بیت اِنت ءُ نزیک ءَ میزائلانی ٹکر گندگ بیگ ءَ اَنت-

ھمے وڑ ءَ وھد وھد ءِ سر ءَ پد کیئف ءَ میزائل آس دیگ بیتگ اَنت چریشی ءَ ترس ءُ بیم ودی بیتگ اَنت –

اُرشاں پد یوکرینی سروک ولادیمیر زیلنسکی ءَ ٹیلیگرام ءَ یک کلوھے ءَ گشتگ کہ آ مارا ھلاس کنگ لوٹ ایت-

ایرانی سکیورٹی لشکر ءَ وانگ جاہ ءَ بیڑ برتگ ءُ نودربر دزگیر کرتگ اَنت، ھمے وڑ انسانی ھکانی گل ءِ گوشگ اِنت داں انگت ءَ ناوشیں زھرشانیاں بیران بیتگیں مردمانی کچ یک سد ءُ ھشتاد ءُ پنچ ءَ سر بیتگ اَنت کہ اشانی نوزدہ زھگ ھوار اَنت-

عرب نیوز ءَ برطانوی روتاک گارڈین ءِ نیمگ ءَ شنگ بیتگیں ھال ءِ درگت ءَ درور دیان ءَ گوشتگ کہ سکیورٹی کارمندانی ھنچیں اکس دیم ءَ اتکگ اَنت آیانی تہ ءَ گندگ بیت اِنت آ ابید نمبر پلیٹ گاڑیاں وانگ جاہ ءَ مانرتگ اَنت-

گارڈین ءِ رد ءَ ایران ءِ وزیر تعلیم مھمد مھدی کاظم ءِ گوشگ اِنت ’ زھرشانی ءَ ھواریں مردم وانگجاھاں چہ کشگ نہ بیتگ اَنت ءُ آیانی کھولاں گوں رھوت بیگ ءَ اِنت‘-

ھمے وڑ ءَ کردستان ءِ وانگی پھناتاں وانگی ادارھانی بند کنگ ءِ جار پرینگ بیتگ –

دومی نیمگ ءَ ھبررساں ادارہ روئٹرز ءَ انسانی ھکانی ٹولی ءِ گپانی درور دیان ءَ گوشتگ کہ یکشمبے ءَ ھم بازیں شھراں بازیں کچے ءَ زھرشانی گندگ ءَ اتکگ اَنت-

سرکار ءِ بگیر داریں زھرشانی درچ ھبدہ ستمبر ءَ ھما وھد ءَ بندات بیتگ ات اَنت بُرکہ ءِ نہ کنگ ءِ سر ءَ دزگیر کنگ بیتگیں زالبول پولیس ءِ دزگیری ءَ بیران بیتگ ات-

زھرشانی درچ سرکار ءِ واستا یک مزنیں چیلنچے جوڑ بیتگ چریشی ءَ سپرپم لیڈر آیت اللہ خامنہ ای ءِ دزکشی ءِ لوٹ ءَ کنگ ءَ اَنت-

ناروے ءَ انسانی ھکانی واستا کار کنوکیں ٹولی ءِ گوشگ اِنت ’داں انگت ءَ ڈیھ ءِ جتا جتائیں پھناتاں بیتگیں زھرشانیاں یکسد ءُ ھشتاد ءُ پنچ مردم بیران بیتگ اَنت ءُ چریشانی تہ ءَ نوزدہ زھگ ھوار اَنت-

اشانی توک ءَ کم چہ کم نیم کچ ءَ بیرانیانی کچ روکپتی بلوچستان ءَ بیتگ اَنت –

چاگردی رسانکجاھاں شنگ بیتگیں تامر بنداں گندگ بیت اِنت یکشمبے ءِ سھب ءَ بازیں کچے ءَ مھلوک دگانی سر ءَ زھرشانی کنگ ءَ اَنت کہ اشانی توک ءَ کالجز ءُ یونیورسٹیانی نودربر ھوار اَنت ءُ پولیس ءِ نیمگ ءَ لٹ ءُ کُٹ ءُ آنسو گیس آس دیگ بیگ ءَ اَنت-

انسانی ھکانی گل ءِ ٹولی ءَ گشتگ بازیں جاھاں سیکورٹی پورسز ءَ تچک ءَ تیرگواری ھم کرتگ بلے ایرانی سرکار ءَ اے گپ رد کرتگ اَنت-

زانگ بہ بیت شمبے ءِ روچ ءَ تھران ءَ الزاھرا یونیورسٹی ءَ ھما وھد ءَ جاور ناگیگ بیتگ اَنت سروک ابراھیم نفیسی اود ءَ مراگش ءَ بھر زورگ ءَ روگ ءَ بیتگ ءُ آئی ءِ تران ءِ وھد ءَ نودربراں زھرشانی بندات ءُ روگ ءِ اوگام جتگ-

زانگ بہ بیت سیزدہ ستمبر ءَ بیست ءُ دو سالی ئیں جنک مھسا امینی برکہ ءِ نہ کنگ ءِ سبب ءَ پولیس ءَ دزگیر کرتگ ءُ پد ءَ آئی ءِ جاور ناگیگ بیتگ ءُ نادراہ جاہ ءَ برگ بیتگ اَت پد ءَ آ ھمود ءَ بیران بیتگ –

مھلوک ءِ بھتام اِنت کہ مھسا امینی ایرانی پولیس ءَ بے کساس ءَ جتگ ءُ چریشی ءَ چہ آئی ءَ وتی درد نہ سگ اتگ ءُ بیران بیتگ-

گوستگیں روچاں مھسا امینی ءِ کھول ءَ ھم گوشتگ ات کہ مھسا امینی جان سلامتیں مردمے بیتگ ءُ آئی ءَ ھچ نادراھی نہ بیتگ-

مھسا امینی ایرانی کردستان ءِ جھنندیں جنکے کہ آ تھران ءَ پولیس ءَ برکہ ءِ نہ کنگ ءِ سر ءَ دزگیر کرتگ ات-