TBP Balochi

نبشتانک: ازیم دوست ءِ ودار

نبشتہ کار: زھیر بلوچ

دی بلوچستان پوسٹ

بلوچستان ھستیں وھد ءَ ارسانی دوار جوڑ بوتگ۔ ھمک گورا کہ چماں شانک دے گُڑا ترا بس ارسیگیں چم گندگ ءَ کئیت بلوچ گُلزمین زوراکیانی ارجان اِنت اے زوراکاں بلوچ ءِ زندمان ھزاب کتگ بلوچ مات، گُوھار ءُ کسانیں زھگ ، پیر ءُ کماش دُرس اے زورگریں زوراک ءَ ارسیگ کتگ انت بلوچستان ءِ ھمک دگ ءُ کشک بلوچ مات ءُ گُوھارانی ارساں میچلینتگ انت شال ءِ برپیں بالاد بہ بیت یا کیچ ءُ گوادر ءِ چار راہ بہ بنت ھمک روچ بلوچ مات ءُ گْوھار گوں ارسیگیں چماں وتی زندانیگیں مھروانانی ودار ءَ نشتگ انت۔

“چم پہ تئی دیدارے اُمیت ءَ”
“آپ بواناں سھت ءُ دمان “

بلوچستان ءَ ھزارانی کساس ءَ زورگریں زوراک ءَ بلوچ ورناہ ءُ نودربر ھوار جتگ ءُ وتی زندان ءَ بندیگ کتگ انت سالانی سال گوز انت بلے آھانی ھچ ھال نیست اے بندیگیں بلوچ بچانی واستا آھانی مات گْوھار سک باز درد ءُ دورانی آماچ انت ءُ ودارے آس ءَ ھمک روچ سُچان انت چہ ھمے بندیگیں ورنایاں یکے ازیم دوست انت ازیم دوست 3 جولائی 2015 ءَ زورگریں استانی لشکر ءَ چہ گوادر ءَ زورآنسری آوار جتگ ءُ بیگواہ کتگ کہ روچے مروچی ھچ ھالے نیست۔

ازیم دوست ءِ گْوھار ماھین بلوچ ءُ رُکسانہ بلوچ پہ آئی ءِ زندان ءَ چہ آجو کنگ ءِ واستا ھمک وڑیں جھد کنگ ءَ انت ھمک روچ زھرشانی کنگ ءَ انت ءُ کشک ءُ دگانی سر ءَ گوں ازیم دوست ءِ اکس ءَ نشتگ انت بلے اے زورگریں زوراک ءِ گوش ءَ مورے ھم نہ وارت۔

ازیم دوست ءِ گُوھارانی پریات ءُ زاراں بگندے آزمان سر ءَ زُرتگ ماھین بلوچ ءِ ارسیگیں چم چنچو درد ءُ تورشت درانگاز کن انت اے درد گوں لبزاں درشان کنگ نہ بنت ازیم دوست ءِ بیگواھی ءَ پد آئی ءِ کھول ءِ مردماں ھچ وڑیں وشی ندیستگ زندے دُراھیں وشیں ساھت گوں ارسیگیں چماں گوز انت۔

ازیم دوست ءِ گْوھار گُش ایت کہ من مجگی نادُراہ جوڑ بوتگ اوں من نزاناں چے بکناں ءُ کجا بُرواں وتئی برات ءَ شوھاز بکناں اے تھنا ازیم دوست ءِ گِس ءِ کسہ نہ انت بلکیں بلوچستان ءِ ھمک گِس ھمے بزگی ءُ بیوسی ئےآماچ انت۔

کس نزانت مئے بندیگیں برات زورگریں استانی لشکر ءِ زندان ءَ چے ھال ءَ انت-

ازیم دوست ءِ پیریں مات ءَ وتی چم دروازگ ءَ سک داتگ انت نشتگ ھمے امیت ءَ کہ ازیم جان واتر کنت ءُ من امبازے کناں اے کرنی ئیں ودارے آس ءَ توساں بلے ھشت سال گوستگ انگت اے مات ءِ ودار آسر نہ انت ءُ انگت اے مات ءِ چم راھسراں ایر انت۔
نزاناں کدی اے زوراکیں وھد بلوچ گُلزمین ءِ سر ءَ آسر بیت ءُ بلوچ راج یک وش ءُ ایمنیں ساھے وتی گُلزمین ءِ سر ءَ کش ایت۔

دُوا انت کہ ازیم دوست ءَ ھوار دُرسیں زندانیگیں برات چہ زندان ءَ آجو باتاں پہ سلامتی واتر باتاں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کلانیں بلوچ رھشون سردار عطاء اللہ مینگل ءِ کستریں برات میر مھراللہ مینگل بیران بوتگ-

اھوالکار ءِ رِد ءَ آ نادراہ بوتگ کہ مرچی سھب ءَ بیران بوتگ –

میر مھر اللہ مینگل بلوچ زرمبشت ءَ ھم ھمگرنچ بوتگ ءُ آ زندانی ھم بوتگ مھر اللہ مینگل ھزدار ءِ دمگی سرکماش ھم بوتگ –

کھول ءِ رِد ءَ آئی ءِ نماز جنازہ ءَ باندہ سَے شمبے ءِ روچ ءَ بیلہ وانگ بیت اِنت – آئی ءِ پُرس ءَ سردار اختر جان مینگل ءُ سردار اسد اللہ مینگل ءُ ایندگہ کھول مردم وڈھ ءَ دار انت –

زانگ بہ بیت وھدیکہ زوالفقار علی بھٹو ءَ بلوچستان ءِ اولی گچین بوتگیں سرکار یکر کتگ ات کہ آئی ءِ سروزیر سردار عطاء اللہ مینگل ءُ گورنر میر غوث بخش اِتنت ھمے یکّر کنگ ءَ سلاہ بندیں دیمروی بوتگ ءُ مری دمگاں پد مینگل ءِ دمگاں ھم سلاہ بندیں جنگ ءِ تہ ءَ گیشی اتکگ کہ آئی ءِ سروکی ءَ مہر اللہ مینگل کنگ ءَ بوتگ –

پاکستان پیپلز پاٹی ءِ سروک بلاول بھٹو ءُ دگہ راجداراں گوں اختر مینگل ءَ آئی ءِ ناکو ءِ بیرانی ءَ دلپدردی درشان اِتگ ءُ گوشتگ کہ مھر اللہ مینگل راجکاری مدامی یات کنگ بیت انت –

بلوچ راجدوستیں رھشون رحیم ایڈوکٹ ءَ ھم مھراللہ ءِ بیرانی ءَ دلپدردی درشان اِتگ ءُ گوشتگ کہ میر مھراللہ بیرانی سد باز پدرد بوتگاں – سردار رسول بخش مینگل ءِ پرزند ءُ عطاء اللہ مینگل ءِ براتی ءَ ھوار پاکستانی زُلم ءُ زوراکیانی ھلاپ ءَ ھدامرزی ءِ جد ءُ جھد مدام یاتگیری کنگ بنت-

بلوچستان ءِ دمگ کلات ءَ ناشناسیں مردماں پاکستانی پوج ءِ گاڑی ءِ سر ءَ بمب اُرش ءِ کتگ –

پوج ءِ گاڑی ءِ سر ءَ کلات ءِ دمگ جوہان ءَ اُرش کنگ بوتگ – اھوالکار ءِ رِد ءَ بمب اُرش ءَ پوج ءَ جانی ءُ مالی تاوان ءِ دیمپانی بوتگ – بلے تنی وھدی واکدارنی نیمگ ءَ اے درگت ءَ ھچ وڈیں ھال شنگ نہ کتگ –

زانگ بہ بیت اے دمگاں چدوپیش پاکستانی پوج ءِ سر ءَ بلوچ آجوئی لوٹوکیں سلاہ بندیں گلاں اُرش کتگ، چوش کہ گوستگیں روچ ءَ کلات ءِ دمگ شئے مردان ءَ پاکستانی پوج ءِ پانگس ءِ سر ءَ راکٹ ءُ دگہ مزنیں سلاھاں گوں اُرش کنگ بوتگ ات کہ آئی ءِ زمہ واری بلوچ لبریشن آرمی ءَ منّ اِتگ ات – بلے مروچی بوتگیں اُرش ءِ زمّہ واری ھچ گل ءَ نہ منّ اِتگ –

روانک کمیٹی ءِ کمک سرکماش داد جان کریم ، خلیل الفت، ڈاکٹر فضل کریم، عبداللہ میر ءُ صغیر رند ءِ چیردستی ءَ کنگ بوتگ –

مروچی یکشمبے ءِ روچ ءَ چہ تربت پریس کلب ءَ پاک ایران بارڈر ٹریڈ کمیٹی ءِ چیردستی ءَ ایرانی بارڈر ءِ درگت ءَ کیچ ءِ دمگی واکدارانی پلامرزی ءَ روانکے کشگ بوتگ کہ بارڈر ءَ ھمگرنچیں باپاری مردم ھوار بوتگ انت –

روانک شھید فدا بلوچ چار راہ ءَ تاں واتر پریس کلب اتکگ انت، درنگاز کنوکام پلے کارڈ دست ءَ بوتگ انت کہ آھانی سر ءَ نارہ نبشتہ بوتگ ءُ آھاں کیچ ءِ دمگی واکدارانی سروک ءُ کیچ ءِ ڈپٹی کمشنر بشیر احمد بڑیچ ءِ ھک ءَ ءُ حق دو تحریک ءِ بگیری ءَ نارہ جتگ –

تربت پریس کلب ءَ اھوالکاراں گوں تران کنان ءَ داد جان کریم، خلیل الفت ءُ دگہ مردماں گوشتگ کہ کیچ ءِ ڈپٹی کمشنر بارڈر ءِ درگت ءَ سنجیدگ انت جالگی ءُ کپکپار ءِ بارڈر پچ کنگ دیریگیں جیڑھے بوتگ کہ ڈی سی بشیر ءَ پچ کنگ ءِ جار جتگ کہ ستا کرزیت، اے ھردو کراسنگ پونٹاں کیچ مھلوک ءَ مزنیں آسراتی ءِ رسیت ءُ اے مئے لوٹانی تہ ءَ ھم بوتگ –

آھاں گوشتگ کہ کیچ ءَ ھر وھد ءَ کہ باڈر جیڑہ کم بنت دمگی واکدار مھلوک ءَ آسراتی دیگ ءِ ھاتر ءَ گامگیج چست کنت گڑا حق دو تحریک مدامی کئیت وتی سیاست ءَ آشکار کنت جیڑھاں ھراب کنت –

آھانی گوشگ ات کہ حق دو تحریک ءِ وتی یک بنگپے آئی ءَ گوں ادے باپاری کنوکاں واستا نیست ءُ ناکہ ما ملا ہدایت الرحمان یاکہ حق دو تحریک ءَ موکل دئیں کہ کیچ ءِ جیڑھانی تہ ءَ دزمانجنی بہ کنت –

مُلا ہدایت الرحمان لھتے مردمانی دست ءَ کارمرز بوگ ءُ ھماھانی مپادانی ھاتر ءَ کار کنگ ءَ انت آئی ءِ مول واکدارانی بلیک میل کنگ انت بلے ما واکدارانی پشت ءَ اوشتاتگیں –

آھانی گوشگ ات کہ حق دو تحریک کیچ ءِ بزگریں باپاری کنوکیں مھلوک ءِ سر ءَ رھم بہ کنت دگہ جاھے وتی سیاست ءَ بہ چمکائین ایت نوں ما آئی ءِ درسیں ھُنر ءُ ھیلاں سرپدیں ایں –

نبشتانک: ھیالانی جُمب

نبشتہ کار: لتیپ سکی

دی بلوچستان پوسٹ

مردم وتی زند ءِ توک ءَ باز پُرمھر ءُ وابانی لزت اِنت کہ آئی ءِ دل ءَ من اے زند ءِ دامنیں پیچاں کشک کشان ءُ آسرا تیلانک گراں ،برے برے مردم وتی تھرانی ساز کہ دل ءِ تہ ءَ جمب بنت مردم سمار اِیت بالاد ءَ کہ من اجب کجام داب ءُ بستار ءَ انت ،کدی مردم وتی زرد ءِ ھما پیشگاہ ءَ ودار ءِ کشک ءَ چار ایت کہ من چنچو آس ءِ چکاساں زند وتی کش اِتگ ،برے گوں موجانی درُوشم ءَ نند ایت دل ءِ دریگاں سْیاھگ کنت ۔

اے گران بھائیں زندمانی مردم اجب دابیں آدمے وت ءَ لیک اِیت کدی کلانٹیں دلبندے ءَ وداراں گوں آسر بیت کدی وت ءَ گوں جستاں پیر بیت برے واھگانی مچی بے ھال بیت، کدی چو ستریں جنک ءَ جند ءَ چہ چوریگاں اندیم کنت بلے ! اے رنگراھی ءُ چیری ءَ پد اے زند ءِ کسہ کتاب جوڑ بنت مردماں سما کپ ایت اے نبشتہ انت نز ء جیڑگانی جھلانکیں گماں ۔ کدی اے ھیال سُبک وابیں دروشم ءَ ترا مان ریچان ءُ شپانی دراجیں پاساں ترس ءُ بیم ءِ بازارے بیت تو ھمے مچی ءِ توک ءَ دست جنان ءُ اڑان بے مردمانی تہ ءَ بلے کس تئی زندمان ءِ رکینگ ءَ ترا نہ گیت بانزلاں۔

اے راستی یے کہ تو ھیپ ءُ ھزار ارمان گوں دل ءِ واھشاں تر ءُ تاب کنگ ءِ جھد کن ئے ھمے نیام ءَ ترا وتی گوست ءُ داشتگیں ارمان یات بنت تو دل ءَ ھمے کار ئے بس اے یات انت ءُ یاتانی سرشماں من بوتگ آں، منی کرد ھما کہ گڈی ءَ من ءَ را نمیران کن انت ،اے زندمان ءِ دوریں کشک ءَ ترا سما بیت من درست گار کتگ اَنت ابید ء جند ءِ داشتگیں نیت ءُ اے واب کہ منی نز ءَ ھیالانی جمب بوتگ انت من اے جمب ءِ نگھبان آں بس وت ءَ چہ بید کس منی دیم ءَ درا نہ بیت من جیڑگانی بوجیگ ءَ سپر کنان ءُ روان آں باریں داں کدی۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ اسٹوڈنٹس آرگنائزیشن ءِ نیمگ ءَ منشیات ءِ گیش بوھگے بگیری ءَ مروچی مستونگ ءَ روانک ءِ کشگ بوتگ کہ روانک ءَ بازیں چاگردی پاٹی ءُ نودربرگلاں بھر زرتگ –

روانک ساروان پریس کلب ءَ بندات بوتگ تاں سلطان چار راہ ءَ ھمودا زھرشانی ہنگ بوتگ –

زھرشانی ءَ بلوچ اسٹوڈنٹس آرگنائزیشن کے بنجاھی سرکماش جہانگیر منظور بلوچ،سیکرٹری جنرل ماماعظیم بلوچ، سنٹرل کمیٹی ءِ باسک صمدبلوچ،گوستگیں جوائنٹ سیکریٹری شوکت بلوچ ،بی این پی کے تحصیل سرکماش ظہور لہڑی، بی این پی ءِ دمگی سرکماش حاجی نذرجان ابابکی، نیشنل پارٹی ءِ دمگی سرکماش حاجی نزیراحمد سرپرہ، بی ایس او پجار ءِ ھنکینی سرکماش نصیب بلوچ، پی ایس ایف ءِ سرکماش سجاد حسین، گرینڈ الائنس ءِ سرکماش مولوی ذکریا، آغا دین محمد شاہ ءُ دیگہ مردماں تران کتگ –

ترانکارانی گوشگ ات کہ نشہ ایردستیں راجانی مال ءُ مڈیانی لٹ پُل ءِ ھاتر ءَ یک سلاھے دروشم ءَ کارمرز بیت سامراجی زورگیریں تاکت شوربندی ءِ رِد ءَ ایردستیں راجانی سرڈگار ءِ سر ءَ وتی ھنڈالانی مھکم کن انت وتی زورگیری ءُ لٹ پُل برجم دار انت – آھانی گوشگ ات کہ بلوچستان ءَ ھر ھمک دمگانی مھلوک وتی بنکی آسراتیاں زبھر انت ، پھازگ ءِ نام ءَ ھر جاہ ءَ مھلوک کم شرپ کنگ بیت بلے دومی نیمگ ءَ ھر دمگ ءِ تہ ءَ نشہ باپاری سربازار بوگ ءَ انت – سدانی کچ ءَ پھازگی پانگساں ابید نشہ ءِ باپاری بوگ ءَ انت –

آھانی گوشگ ات کہ بلوچستان ڈرگ ٹریفکنگ روٹ ءِ وڈا کارمرز بوگ ءَ انت کہ سرکار ءِ چیردستی ءَ باپاری بوگ ءَ انت ھمیشاں چہ پائدگ چست کن انت ءُ منشیات پروش سیاست ءُ اسمبلیانی تہ ءَ ارگ بنت –

آھاں تران کنان ءَ گوشت کہ پہ زانت بلوچ ورنا نشہ آس ءَ دور دیگ بوگ انت ھمے جھد بوگ انت کہ آ چہ وتی راجی ھکاں بیھال بہ بنت – بی ایس او ءَ ھر دور ءَ منشیات ءِ وڈیں سلکاریانی بگیری ءَ جھد کتگ – مستونگ ءَ ھوار سرجمیں بلوچستان ءَڈرگ ری ہیبلٹیشن سنٹر نیست اِنت – منشیات ءِ بگیری ءَ سرجمیں بلوچستان ءَ مھکمیں راجکاری زرمبشت ءِ جار جن ایں درسیں ورنا ءُ نودربراں یکجاہ کن ایں ءُ اے ناسور ءِ بگیری ءَ املی جھد کن ایں –

آپسر ءُ تربت ءِ میان ءِ دوکرم پھل ءِ پُرشگ ءَ پد آئی ءِ شرکنگ ءِ ھاتر ءَ مروچی یکشمبے ءِ روچ ءَ کیچ ءِ ڈپٹی کمشنر بشیر احمد بڑیچ ءِ گوشگ ءِ پد ءَ ایکسیئن بی آینڈ آر، تربت ءِ اسسٹنٹ کمشنر ءَ ھوار ایندگے اپسراں شُتگ ءُ پھل چار اِتگ ءُ آئی ءِ سر ءَ کار بندات کتگ –

کیچ ءِ ڈپٹی کمشنر ءِ رِد ءَ دوکرم پھل شرکنگ ءِ ھاتر ءَ ھمے زوتاں کار بندات کنگ بنت – دانکہ پھل سرجمی ءَ ھڈ نہ بیت ءُ آئی ءِ پرشتگیں بھر شر کنگ نہ بنت روگ ءُ آھگے ھاتر ءَ دگہ راھے پٹ ایں –

زانگ بہ بیت بلوچستان ءَ گوستگیں توپانی ھوراں بازیں کچے ءَ پُھلاں ھوار دگاں ھم تاوانباری بیتگ ات کہ چریشی ءِ سبب ءَ داں انگت ءَ بازیں جاھاں دگ نیستی ءِ آماچ اَنت-

بلوچستان ءِ سرکار ءِ نابودی ءَ چہ بازیں جاھاں دگ ھم پروشت ءُ پروش اَنت چریشی ءَ چہ یک شھرے ءَ دومی شھراں روکیں مردماں بازیں کچے ءَ جنجالانی دیمپانی اِنت-

ایران ءِ اُستان مشھد ءَ چار بندیگیں بلوچ یک ھپتگے ءَ پیسر پاھو دیگ بیتگ اَنت-

سر بیتگیں ھالانی رد ءَ ایران ءِ اُستان مشھد ءَ وکیل آباد ءِ زاندان ءَ ایرانی آمیدگس ءِ پرمان ءَ چار بندیگیں بلوچ پاھو دیگ بیتگ اَنت-

پاھو دیگ بیتگیں مردمانی سیادی سیستان ءُ بلوچستان ءَ اِنت کہ ھرچ چاریں نشہ باپاری ءِ بھتام ءَ پاھو دیگ بیتگ اَنت-

پاھو دیگ بیتگیں مردمانی پجار آصف شیبک، سعید شیبک، اُمر بیست سال، رمضان مزارزئی ءُ عوض بیلرانی ءِ ناماں زان بیتگ اَنت-

اشانی پاھو ایرانی آمیدگس ءَ چیرکائی داتگ انت ءُ اشانی کھول ھچ ھال دیگ نہ بیتگ اَنت چریشی ءَ ھرچاریں مردمانی پاھو ءَ یک ھپتگے ءَ پد نی اے دیم ءَ اتکگ –

ایران ءِ اُستان کرمان ءَ یک بلوچ زالبولے ایرانی پولیس ءَ تیرگواری کرتگ ءُ کشتگ-

گیشیں ھالانی رد ءَ ایران ءِ اُستان کرمان ءِ ھند گنج ءَ ایرانی پولیس ءَ تیرگواری کرتگ ءُ یک زالبولے کشتگ-

زالبول ستجردی ءِ ٹک ءَ سیادی دار ایت کہ گنج سیستان ءُ بلوچستان ءِ سیمسری دمگاں چہ یکے کہ اود ءَ گیشتر بلوچ آباد اَنت-

گنج ءَ سربیتگیں اھوالانی رد ءَ ایرانی پولیس ءِ یک کارمندے ءَ ھمے زالبول ءَ چہ وتی لوگ واجہ ءَ سونانی گرگ ءِ کڈنی کرتگ ءُ چریشی ءَ زالبول ءَ اے گپ نہ من اتگ-

ھالانی تہ ءَ گوشگ بیتگ کہ زالبول ءَ بازیں گھگیری کتگ ءُ وتی پھازگ ءِ جھد کتگ اَنت بلے ھمے میان ءَ پولیس ءِ یک کارمندے ءَ آئی ءِ سر ءَ تیرگواری کرتگ ءُ کُشتگ-

گنج آباد سیستان ءُ بلوچستان ءَ چہ شش سد کلو میٹر ءِ دوری ءَ اِنت کہ کوھن ترین ھنداں چہ یکے اود ءَ کدمی چیز ھم گندگ ءَ کاینت کہ اود ءَ گیشتر بلوچ چہ کوھن ءَ آباد اَنت-

گنج آباد ءِ مھلوک ءَ زھرشانی کرتگ ءُ اود ءَ چہ اے زالبول ءَ را انساپ ءِ لوٹ کرتگ-

زرباری کوریا ءِ لشکر ءَ ٹاہ داتگ کہ گوریچانی کوریا ءَ یکشمبے ءِ سھب ءَ دو بیلسٹک میزائل آس داتگ اَنت کہ چریشی ءَ ٹوکیو ءُ سیوئل ءَ واشنگٹن ءُ آئی ءِ ھمسنتانی جاناں لرزگ ودینتگ اَنت-

برطانوی ھبر رساں ایجنسی روئٹرز ءِ رد ءَ زرباتی کوریا ءِ واکداراں گوشتگ کہ گوریچانی کوریا ءِ میزائلانی چکاسانی تہ ءَ گیشی اتکگ ءُ آئی ءَ سٹک جتگ کہ اے سال دوھزار ءُ ھبدہ ءَ پد اے اولی رند ءَ جوھری سلاھانی چکاس بندات بیگ نزیک اِنت-

گوستگیں ھپتگ ءَ داں انیگ ءَ گوریچانی کوریا ءِ نیمگ ءَ اے ھپتمی میزائل دیم ءَ اتکگ اَنت-

اے درگت ءَ جاپان ءِ وزیر ءَ چی گشتگ؟ –

جاپان ءِ وزیر مملکت برائے دفاع توشیرو انو ءَ اھوالکاراں گوں گہ کنان ءَ یکشمبے ءِ روچ ءَ دویں میزائل 100 کلو میٹر (60 میل) ءِ برزی ءَ سر بیتگ ءُ 350 کلومیٹر (218 میل) ءِ جتائی ءَ بیتگ –

آئی ءَ دیمتر ءَ گوشتگ کہ ھردوکیں میزائل جاپان ءِ گچینی آبنداں ڈن کپتگ اَنت واکدار ٹپاس کنگ ءَ اَنت اے چونیں میزائل اَنت بلے داں ھمے گمان بیت اِنت آ آبدوز ءَ چہ لانچ کنگ بیتگیں بیلسٹک میزائل اَنت-

اے درگت ءَ امریکی پوج ءَ چی گشتگ؟ –

امریکی پوج ءِ گوشگ اِنت آ اے میزائلانی لانچ کنگ ءَ پد وتی ھمسنت ءُ شریدارانی گون ءَ گپ کنگ اِنت چریشی ءَ چہ اے چکاس ءَ گوریچانی کوریا ءِ جوھری سلاہ ءُ بیلسٹک میزائلانی مراگش ناوشیں جیڑگ پاد کتگ-

ایشی ءَ ابید آئی ءَ گشتگ اَت نوکترین چکاساں چہ امریکی کارمند یا امریکی ھمسنتاں ھچ ترس نیست اِنت-

زرباری کوریا ءَ اے درگت ءَ گیش چی گشتگ؟ –

زرباری کوریا ءِ واکداراں گوشتگ کہ ’ گوریچانی کوریا ءَ رودراتکی زر ءَ منچیون ءِ ھند ءَ نوکتریں میزائکابی لانچ کنگ یک ناوشیں جاورے کہ چریشی ءَ چہ ایمنی ءَ تاوان بیت کنت-

گوستگیں سَے شمبے ءَ گوریچانی کوریا ءَ پیسریگین ءَ چہ گیش دور روکیں بیلسٹک میزائل ءِ چکاس کتگ ات کہ جاپان ءِ سر ءَ گوزان ءُ ترسی جاوراں یل کنان بیتگ-

جاپان ءِ کلانیں نائب وزیر دفاع توشیرو انو ءَ گوشتگ ات کہ ٹوکیو گوریچانی کوریا ءِ ھمک وھدی شیتانیاں اوپار کرت نہ کنت-

دومی نیمگ ءَ جاپانی وزارت ھارجہ ءَ گوشتگ کہ امریکہ، زرباری کوریا ءُ جاپان ءِ جوھری سفیراں گوں رھوت بیتگ آئی ءَ اے درشان کتگ کہ گوریچانی کوریا ءِ نیمگ ءَ بیلسٹک میزائلانی آس دیگ ءَ دمگ ءُ میانی اُستانی برادری ءِ ایمنی ءُ سلامتی ءِ واستا ترس اَنت-

کوریچانی کوریا ءَ ھما کہ میان اُستمانی باپندیانی لگتمالی کنگ ءُ میزائل ءُ جوھری چکاس ءَ کنگ اِنت دوشمبے ءَ گوشگ بیتگ ات کہ آئی ءِ میزائلانی چکاس تچک ءَ امریکی پوج ءِ بیھارانی ھلاپ ءَ وتی پھریزگ ءُ وتی ھمساھیگانی تاوان ءَ نہ اَنت-