TBP Balochi

بلوچستان ءِ دمگ کیچ ءَ ناشناسیں سلاہ بندیں مردماں ٹیل بروکیں گاڑی ءِ سر ءَ اُرش کتگ-

گاڑی ءِ سر ءَ اُرش تربت ءِ دمگ ڈنک ءَ بنجاھی شھدگ ءِ سر ءَ کنگ بوتگ – بنداتی ھالانی رِد ءَ اُرش ءَ ٹینکر ءَ تاوان رستگ وھدیکہ ڈرائیور ھم زدگ بوتگ –

دمگی اھوالکارانی رِد ءَ اے ٹینکر پاکستانی نیوی ءِ ھاتر ءَ ٹیل سر کنگ ءَ بوتگ بلے تنی وھدی واکدارانی نیمگ ءَ اے درگت ءَ ھچ وڈیں ھال شنگ کنگ نہ بوتگ –

گوست ءَ تربت ءُ کش ءُ گوری دمگاں بوتگیں اے دابیں اُرشانی زمّہ واری بلوچ آجوئی لوٹوکیں سلاہ بندیں گلاں منّ اِتگ انت بلے اے اُرش ءِ زمّہ واری تنی وھدی ھچ گل ءَ نہ منّ اِتگ –

نوشکی ءَ پولیس ءِ تیرگواری ءَ بیران بوتگیں ورنایے کھول ءَ جون ھمراھی ءَ زھرشانی کتگ –

ورنایے کوش ءِ بگیری ءَ شال تاں تفتان ءَ رؤکیں شھدگ بند کنگ بوتگ، درنگاز کنوکاں چیف جسٹس بلوچستان  ءِ کاروان ھم داشتگ – 

درنگاز کنوکانی گوشگ انت کہ گوستگیں روچ ءَ نوشکی ءِ دمگ گزنلی ءَ لیویز فورس ءِ تیرگواری ءَ سعید احمد نامی مردمے بیران بوتگ ءُ سھرابزدگ بوتگ –

وھدیکہ دمگی واکدارانی گوشگ انت کہ وھدے پوج ھمے دمگ ءَ سر بوتگ گڈا پولیس ٹولی ءِ سر ءَ تیرگواری کنگ بوتگ کہ پسوئی تیرگواری ءَ اےمرد بیران بوتگ – 

درنگاز کنوک جون ءِ ھمراھی ءَ تفتان شھدگ ءِ سر ءَ زھرشانی کنگ بوتگ انت ءُ انساپ لوٹگ ءَ بوتگ انت کہ پدا رند ءَ واکداراں گوں گند ءُ نند ءَ پدزھرشانی ھلاس کنگ بوتگ – 

زانگ بہ بیت اے دمگ ءَ گوستگیں روچ ءَ ھم تیرگواری ءِ وئیل ءِ بوتگ ات کہ یک مردمے بیران ءُ دو زدگ بوتگ اِت انت –

منگچر ءِ بازار ءَ گیس ءِ بازیں وھداں بند بوگ ءِ بگیری ءَ زالبولاں زھرشانی کنان ءَ شال تاں کراچی ءَ رؤکیں شھدگ سر ءَ نندانک جتگ ءُ چریشی ءَ دگ سرجمی ءَ بند بوتگ ءُ سدانی کچ ءَ گاڑی ءُ مساپر کشیں کوچ اوشتاتگ انت –

درنگاز کنوکانی گوشگ ات کہ سالے ءَ گیش انت کہ منگچر ءَ گیس بند کنگ بوتگ چریشی ءَ زالبول ءُ دگہ مردم بازیں دلسیاھیانی آماچ انت، ترندی سارتی ھم پیداک انت بلے تنی وھدی گیس پائپانی تہ ءَ جھندم پہ گیس ءَ گیس ءِ بوہ ھم آیگ ءَ نہ انت –

آھانی گوشگ ات کہ سارتی روچ پہ روچ گیش بوان انت، گیس ءِ بندی ءَ بزگریں مھلوک بازیں اڈوجنجالانی دیمپان انت، ایندھن ابید ایل پی جی گیس، اشکر ءُ دار ءِ بھا زورگ گریبانی وس ءَ در انت زالبول کیچن ءِ تہ ءَ بازیں جنجالانی دیمپان انت، چہ سارتی ءَ زھگ ءُ کماش نادراہ بوان انت، گیس ھمک روچی زند گوازینگے ھاتر ءَ المی انت کہ چریشی ءَ مردم زبھر کنگ بوتگ انت – زالبول لاچار انت کہ دگانی سر ءَ بیا انت ءُ زھرشانی بہ کن انت – آھانی گوشگ ات تانکہ گیس دیگ نہ بیت زھرشانی ھمے وڈ برجاہ مانیت –

ھردیکہ پاکستان ءِ کجام ھم بھرے ءَ یک بے وارسیں پجار نہ بیتگیں لاشے دزکپ ایت گُڑا چریشی ءَ ترندی بلوچستان ءَ الم مارگ بیت اِنت۔ اے ھیالانی درشانی بلوچ یکجھتی کمیٹی شال ءِ نیمگ ءَ چہ نشتر نادراھجاہ ءَ پجار نہ بیتگیں کا انی درکپگ ءِ سرءَ شال ءَ برجاہ داشتگیں پریس کانفرنس ءِ نیام ءَ کنگ بیتگ اَنت۔

بلوچ یکجہتی کمیٹی ءِ رھشوناں گُشتگ کہ گوستگیں روچاں چہ رسانکدراں یک ھال ءِ ترگ ءَ اِنت کہ ملتان ءِ نشتر نادراھجاہ ءَ چہ بازیں لاش دزکپتگ اَنت۔ کہ اِشانی درگت ءَ نادراھجاہ ءِ واکدار ءُ پنجاب سرکار بے باوریں گپ کنان ءَ جیڑہ ءَ گار کنگ ءِ جھد کنگ ءَ اَنت۔ اے لاشانی درگت ءَ نادراھجاہ ءِ واکدارانی ءُ سر وزیر پنجاب ءِ یک جارکش ءِ لیکہ ءِ تہءَ پدریں دگری ءَ اے جیڑہ گیشتر ترسناک جوڑکتگ۔ سر وزیر پنجاب ءِ نمائندگ ءِ ردءَ لاش مزنیں کساس ءَ اَنت وھدیکہ نادراھجاہ واکدارانی ردءَ لاشانی کساس تھنا چار اِنت۔ ما اے سرپد بئیں کہ لاشانی کساس چار بہ بیت اگاں چار سد بہ بیت بلے اے جاورانی تہءَ لاشانی درکپگ بازیں جُست ودی کنت ءُ سنگینیں انسانی اگبالانی بگیری اِنت۔ وھدیکہ پرگینگی تک ءَ اڈ بیتگیں کمیٹی تھنا یک مسکرہ ءَ ابید دگہ ھچ نہ اِنت۔ چُش مردمانی لاشانی درکپگ ءَ چہ سرکار ءَ زیت کاروائی کنگ ءَ ابید سئے روچانی تہءَ نادراھجاہ واکداراں وتی رپورٹ پیش کنگ ءِ گُشتگ کہ یک شرمناکیں گام اِنت۔

آیاں گُشتگ کہ ھردیکہ پاکستان ءِ کجام ھم بھرے ءَ یک بے وارثیں اگں پجار نہ بیتگیں لاش ءِ دزکپیت گُڑءَ اِشی ترندی بلوچستان ءَ الم مارگ بیت اِنت پرچہ کہ بلوچستان ءَ ھمک وھدءَ انچیں ژانگولیں لاش دشت، کئور، ءُ گیاباناں چہ دزکپ اَنت کہ بیگواھیں مردمانی بنت ءُ مدام ءُ گیشتر اے مردم پجار نہ بیتگیں نامینگ بنت ءُ ھاموشی ءَ گوں کل کنگ بنت۔

بلوچستان ءَ گیشتریں بیگوائیں مردمانی کُشگ ءُ پدءَ آیانی جسمانی بُرگ ءُ آیانی جسماں چہ بھر کشگ بنت ءُ لاش انچیں جاھاں دور دیگ بنت کہ کس مہ گندیت اِیش وھدیکہ بلوچستان ءَ بازیں ھواریں قبر ھم درکپتگ اَنت کہ آیانی پیسرءَ چہ بیگواھیں مردم کُشگ ءُ ھواریں پئیم ءَ کل کنگ بنت اِنت۔ 2018 ءَ پنجگور ءُ 2013 ءَ توتک ءَ چہ انچیں قبریں گندگ بیتگ اَنت کہ آیانی تہ ءَ درزنانی کساس ءَ زورانسری بیگواھیں مردم کُشگ ءُ کل کنگ بیتگ اَنت پمیشکہ اَے نوکیں وئیل ءَ بلوچستان ءِ بیگواھیں مردمانی کھول درد ءُ اندوھانی تہءَ مان کُتگ اَنت۔

آیانی گیشتر گُشگ اَت کہ اے سنگینیں جیڑہ ءِ مانگیشینگ ءِ ھاترءَ رسانکدر ءَ بازیں لیکہ دیما آرگ بئیگ ءَ اَنت۔ ما ادا اے گپ ءَ پدر کنگ لوٹیں کہ لاش چار بہ بنت کہ چار سد بلے ھمے پئیم ءَ کہ کُشگ ءُ پدا آیانی جسمانی بھر کُشگ ءُ پدا ناشناس نامینگ ءُ نادراھجاہ ءِ چھت ءَ دور دیگ بیتگ اَنت اے انسانیت ءِ بگیر ءَ سنگینیں جرم اِنت، کہ اِشی زیت ءَ زیت پَٹ ءُ پول المی اِنت۔ ما اے پریس کانفرنس ءَ گوں سپریم کورٹ آف پاکستان ءُ انسانی حقانی گلاں چہ دزبندی کنیں کہ نشتر نادراھجاہ ءَ چہ دزکپتگیں لاشانی پلگاریں پئیم ءَ ڈی این اے ٹیسٹ کنگ بہ بیت ءُ اے گپ پدر کنگ بہ بیت کہ اے لاش چہ کجءَ ءُ چون آرگ بیتگ اَنت۔ وھدیکہ اے وئیل ءَ ھواریں مردم قانود ءِ ردءَ آمید گِس ءِ دیما آرگ بہ بنت۔ اگں اے جیڑہ ءَ سرد مھری ءِ آماچ کنگ ءِ جھد کنگ بہ بیت یا اگں دلجم ءُ پلگاریں پَٹ ءُ پول کنگ مہ بیت گُڑءَ اِشی بگیر ءَ سرجمیں بلوچستان ءَ زھرشانیانی یکشلی برجاہ بیت۔

امریکہ ءِ سروک جوبائیڈن ءَ ڈیموکریٹک کانگریشنل کمپین کمیٹی ءَ تران کنان ءَ پاکستان ترسناکتریں ڈیھہ گوشتگ –

امریکی سروک جوبائیڈن ءِ گوشگ اَت کہ پاکستان جھان ءِ ترسناکتریں ایٹمی ڈیھاں چہ یکے، پاکستان ءِ ایٹمی سلاہ ھچ وڑ ٹپاسگ نہ بیتگ ءُ پھازیتگ نہ اَنت –

امریکہ ءِ سروک ءِ گوشگ ات کہ چین ءِ سروک سرپد انت کہ آئی ءَ چی لوٹیت بلے آئی ءِ گوم ءَ بازیں جیڑو ھست اَنت – روس ءِ تہ ءَ چی بوگ ءَ اِنت ءُ جھان ءِ ترسناکتریں ایٹمی ڈیھانی تہ ءَ یکے پاکستان اِنت اودا چی بوگ ءَ اِنت ءُ گپ اش اِنت امریکہ ءَ کجام وڑ ءَ ءُ ڈول ءَ اے چارگی اِنت ءُ گیوار کنگی اِنت –

آئی ءَ گُوشتگ کہ بازیں چیزے بوگ ءَ اِنت بلے اشی ءِ ھاتر ءَ پہ امریکہءَ موہ ھم ھست اِنت کہ جاورھالاں بدل بہ کنت –

نبشتانک: نادراھجاہ ءَ کپتگیں جون ھبر کنگ لوٹ آں

نبشتہ کار: میرو مری

دی بلوچستان پوسٹ

ملتان ءِ نشتر نادراھجاہ ءِ جونانی گندگ ءَ پد سما بیت کہ اے جون آں وتی اندر ءَ بازیں کِسّہ گوں ءُ ھبر کنگ لوٹ انت-

اے جون باز ھبر کنگ لوٹ انت، ھبر گوں وتی چاگرد ءَ، وتی زمین ءَ، او ھما مردماں گوں تران کنگ لوٹ انت کہ، آ نشتگ انت تماشائی انت ءُ بس تماشاہ کن انت-

بلوچی مزنیں شلوار ءُ بڈ ئے چادراں چہ ھمے پدّر بیت کہ اے بلوچ انت، ھو— بلوچ انت، ھما بلوچ کہ وھدے ءَ مئے ھلک ءُ دمگاں نندوک بوتگ انت ءُ نوں بس سرپتگیں جون انت کہ درامدانی ھلک ءَ بے تواری ءَ کپتگ انت-

گوستانک ءَ اگاں ما چمشانکے بدے آں داں مارا ھمے گندگ ءَ کیت ھردیں اِنچو کساس ءَ وھدے جون دست کپتگ اَنت گڑا آ گیش بلوچ ءِ جون بوتگ انت، ھما بندیگانی جون کہ سالاں چہ بندیگ جاھاں بندیگ کنگ بوتگ انت چوش کہ خضدار ءَ کساس سدانی ھساب ءَ جون دست کپتگ اَنت آ سائنسی چار ءُ تپّاس کنگ نہ بوت اَنت پمیشکا کس ءَ سما نہ بوت کہ کئے اَت انت ءُ کجام ھند ءُ دمگ ءِ نندوک ات اَنت، بس اے الم زانگ بوت کہ بلوچ انت ءُ زوراکی ءِ آماچ بوتگ اِت انت-

پمیشکا گش انت کہ زوراکی ءَ پد بے ترک ءُ تواری ھم یک زوراکی یے مارا گپ جنگ لوٹ ایت، ھما جونانی واستا کہ وھدے آ ھست بوتگ انت آواں پہ بلوچاں توار چست کتگ، مارا ھم یک مشت ءُ یک توار بوگی انت ءُ ھبر کنگی انت ـ پرچاکہ اے جون ھم ھبر کنگ لوٹ انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ زھرشانی کنوک ناھک ءَ کشگ بیتگ اَنت دنیا ءِ ھچ سرکار ءَ اے ھک نیست اِنت کہ آ وتی مردماں بہ کُش ایت ءُ بہ جنت اے گپانی درشانی روکپتی بلوچستان ءِ بنجاھی شھر دزاپ ءِ جمعہ مسیت ءِ پیش امام مولوی عبدالحمید اسماعیل زئی ءَ ما گوستگیں روچ ءَ دزاپ ءَ آدینگ ءِ نماز خطبعہ ءِ وھد ءَ کتگ اَنت-

مولوی عبدالحمید ءَ سرجمیں ڈیھ ءَ زھرشانیانی درور دیان ءَ گوشتگ کہ ’ ڈیھی ءُ ڈنی پالیسانی بے سُدی ءِ سبب ءَ اے وڑیں جاور ودی بیتگ اَنت ‘ ڈیھ ءِ سروک ءُ مزنیں واکداں مھلوک ءِ توار اشکنگ لوٹ ایت ءُ آیانی ھک ءِ لوٹ منگ لوٹ اَنت-

دزاپ ءِ آدینگ ءِ نماز ءِ وھد ءَ آئی ءَ تران کنان ءَ گوشتگ کہ گوستگیں آدینگاں اد ءَ بے کساس ءَ زُلم ءُ زوراکی بیتگ ءُ من اے کسم ءَ وراں ھدا چوشیں زُلم ءُ زوراکیاں ناوش اِنت –

آئی ءَ گوشتگ کہ ما درست ھمد ءَ بیتگ اِنت ءُ ما درستاں دیستگ کہ بلوچانی ھون چون ریچگ بیتگ اَنت ءُ ما ھروھد ءَ دیستگ کہ زیردستانی گون ءَ بیوکیں زُلم الم پُرشتگ اَنت اے زُلم یک روچے پُرش اَنت ءُ ھدا گواہ اِنت اے مردم بے گناہ ءَ کُشگ بیتگ اَنت-

آئی ءَ گوشتگ کہ مئے ڈیھ ءَ ما گندگ ءَ بازیں راج آباد اَنت ءُ بازیں دین ھست اَنت ءُ اے مارا منگ لوٹ ایت ھر ھما دین ءِ اھترام کنگی اِنت ءُ ھر ھما ٹکانی شرپ کنگی اِنت ءُ درساں وتی تاھت کنگ ءِ ھک دیگ بہ بیت-

آئی ءَ گشتگ کہ آپسراں اے چارگ نہ لوٹ ایت کہ اے کجام پیرکاریں اشی ءِ پادانی گڈگ کنگ نہ لوٹ ایت ما دیستگ مئے ڈیھ ءَ اد ءُ کماش ءُ نیکیں مردمانی چی ھال بیت اِنت اگاں ملنگانی راہ رد اِنت گڑا آیاں وتی اللہ ءَ پسو دیگی اِنت ءُ اے وڑ نہ اِنت کہ آئی ءِ آجوئی ءَ پچگر ءُ آئی ءَ پون بہ کن ءُ آئی ءَ بیھار بہ دے-

آئی ءَ گوشتگ کہ مئے ڈیھ ءَ دگہ مردمانی توار اشکنگ بیت اِنت بلے مئے توار ءَ کس گوش نہ دار ایت، باید اے گیر تلبداری ءَ گوں بہ بیت ھما وڑ ءَ آ دگہ زھرشانی کنوک چارگ بنت ھما وڑ ءَ مئے مردم ھم چارگ بہ بنت-

آئی ءَ زھرشانی کنوکانی درور دیان ءَ گوشتگ کہ زھرشانی کنوکانی سر ءَ لٹ ءُ کُٹ کنگ ءُ زھرشانی کنوکاں دشمن سرپد بیگ اے جوان نہ اِنت دنیا ءِ کجام ھم سرکار ءَ اے ھک نیست اِنت کہ آ وتی مردمان بہ جنت ءُ بہ کش ایت اگاں مھلوک ءِ سرکار ءِ ھمراہ مہ بیت گڑا کے آئی ءِ ھمراہ بیت اِنت؟ آئی ءَ گشتگ اگاں من واک ءَ بوتیناں گڑا الم وتی مھلوک ءِ ھمرداری کتگ ات-

آئی ءَ گوشتگ کہ ھرچی ڈیھ ءَ بیتگ الم شری ءِ کیت اِنت ءُ سرکار ءُ آئی ءِ واکداراں سرپد بیگ لوٹ ایت مھلوک ءَ گوش بہ دار اَنت ءُ آیانی لوٹاں سرجم بہ کن اَنت-

سر بیتگیں ھالانی رد ءَ سلاہ بندیں مردماں ایرانی پولیس ءِ سر ءَ اُرش کرتگ –

گیشیں ھالانی رد ءَ روکپتی بلوچستان ءِ دمگ سوران ءَ ایرانی پولیس ءِ سر ءَ سلاہ بندین مردماں اُرش کرتگ –

اُرش پولیس ءِ سر ءَ ھما وھد ءَ کنگ بیتگ کہ آ راہ ءَ روگ ءَ بیتگ اَنت ءُ اود ءَ سلاہ بندیں مردماں اُرش کرتگ-

دمگی مردمانی رد ءَ سلاہ بندیں مردماں پرپٹ ءَ سواریں پولیس کارمندانی سر ءَ ناگتی اُرش کرتگ ءُ پشت اھشتگ ءُ شتگ اَنت-

دمگی مردمانی رد ءَ سلاہ بندانی اُرش ءَ پولیس ءِ دویں کارمند زدگ بیتگ اَنت-

سر بیتگیں ھالانی رد ءَ روکپتی بلوچستان ءِ جتا جتائیں جاھاں ایرانی سرکار خامنہ ای ءِ ھلاپ ءَ دیوالانی سر ءَ نبشتہ کرتگ-

گیشیں ھالانی رد ءَ روکپتی بلوچستان ءِ دمگ نصرت آباد ءَ گوستگیں شپ ءَ ناشناسیں مردماں ایرانی رھشون خامنہ ای ءِ ھلاپ ءَ دیوالانی سر ءَ نبشتگ کرتگ –

دیوالانی سر ءَ آیاں بازیں جاھاں ’خامنہ ای مرگ بر ‘ نبشتہ کرتگ ءُ اے کلوہ داتگ کہ آئی ءِ زوراکی منّگ نہ بنت ءُ آ زوت چہ سرکار ءَ دزکش بہ بیت-

زانگ بہ بیت روکپتی بلوچستان ءَ زاھدان ءَ سِی ستمبر ءَ پیش اتکگیں وئیل ءَ پد یکشلی ءَ مردمانی برانز برجاہ اَنت-

ھمے وڑ ءَ گوستگیں روچ ءَ ھم بازیں جاھاں دیوالانی سر ءَ نبشتہ کنگ بیتگ ءُ دیوالانی سر ءَ اے چیز ھم گندگ ءَ اتکگ چھبار دختر ءِ ھیش ٹیگ کامرد بیتگ-

روکپتی بلوچستان ءَ زاھدان ءَ کشگ بیتگیں مردمانی واستا انساپ ءَ بندیگ کنگ بیتگیں مردمانی یل کنگ ءَ یکشلی ءَ مھلوک ءِ برانزی برجاہ اَنت-

گوستگیں روچ ءَ زاھدان ءَ مکی مسیت ءَ در اتکگیں روانک ءَ ھزارانی کچ ءَ مردماں بھر زرتگ ات ءُ ھما پولیس ءِ کارگس ءِ دیم ءَ داں ھدے ءَ زھرشانی کتگ ات کہ سی ستمبر ءَ پولیس ءَ ھمود ءَ لس مردمانی سر ءَ تیرگواری کتگ ات ءُ چریشی ءَ چہ بے کساس ءَ مردم کُشگ بیتگ ات اَنت-

زاھدان ءِ مھلوک ءِ گوشگ اِنت کہ سِی ستمبر ءِ روچ ھما روچاں گوں شمار کنگ بیت اِنت سیاہ ءُ تھار ءُ ھونریچی یے روچے ءِ بستار ءَ بیتگ اَنت-

زانگ بہ بیت سی ستمبر ءِ آدینگ ءِ روچ ءِ نماز ءَ پد یک اناگہ ءَ یک ھنچیں جاورے گندگ ءَ اتک کہ اود ءَ مردمانی ھون ءُ کپتگیں جون ءُ زدگ بیتگیں مردمانی چیھانٹ اشکنگ ءَ اتک کنت –