TBP Balochi

گوستگیں شپ ءَ بلوچستان ءِ بنجاھی شھر شال ءَ ریڈزون ءَ زھرشانی نندانک ءَ نشتگین فزیوتھراپسٹ ءِ ڈاکٹر پولیس ءَ لَٹ ءُ کُٹ کنگ ءَ پد دزگیر کتگ اَنت-

زھرشانی کنوکانی رد ءَ پولیس ءَ نا ایوک ءَ مردین دزگیر کتگ اَنت بلکیں زھرشانی نندانک ءَ جاڑیگیں زالبول ھم پولیس ءَ لَٹ شاپ کتگ اَنت-

ھمے وھد ءَ شال ءِ پولیس ءِ لٹ ءُ کُٹ ءَ فزیوتھراپی ایسوسی ایشن کمیٹی ءِ یک زالبولین باسکے تُستگ ءُ نادراہ جاہ ءَ برگ بیتگ-

مروچی فزیو تھراپی ءِ نودربرانی سر ءَ پولیس ءِ لٹ ءُ کُٹانی ھلاپ ءَ جامعہ بلوچستان ءِ دیم ءَ نودربراں دگ بند کتگ ءُ زھرشانی یاداشت کتگ ءُ دگہ نودربرانی یل کنگ ءِ لوٹ کتگ-

زانگ بہ بیت فزیوتھرایسٹ ءِ ڈاکٹر گوستگیں بازیں ماھاں شال ءَ ماں وتی ھکانی واستا نشتگ اَنت گوستگیں پنچ روچاں آ شال ءَ ریڈزون ءَ زھرشانی نندانک ءَ نشتگ بیتگ اَنت-

فزیوتھرایسٹ ءِ ڈاکٹر یک سد ءُ بیست ءُ ھپت روچاں شال ءِ پریس کلب ءِ دیم ءَ نندوک بیتگ اَنت – چریشی ءَ پد آ وتی ھکانی واستا گورنر ھاؤس ءِ دیم ءَ شتگ اَنت کہ اود ءَ مردین ءُ زالبول فزیوتھراپیسٹ ءِ بازیں کچے ءَ ھوار بیتگ اَنت-

ڈاکٹرانی گوشگ اِنت دگہ اُستانی رنگ ءَ بلوچستان ءِ نادراھجاھاں جاندراھی ءَ زمین ءُ آسمان پرک اِنت- بلوچستان ءِ کنڈ کنڈاں نندوکیں مردم گونڈیں نادراھی ءِ سبب ءَ دگہ اُستاناں رو اَنت گڑا اشی ءَ چہ زانگ بیت اِنت اد ءَ جاندراھی ءِ شریں آسراتی نیست اِنت ءُ چریشی ءَ جانسلامتی ءِ واستا پروفیشنل ءِ واستا فزیو تھراپیسٹ ءِ باسک جوانیں کرد پیلو کن اَنت بلے بلوچستان ءِ ھرچ پھناتاں بندوکیں کارداراں سرکار یکشل ءَ ڈالچار کنگ ءَ اِنت-

بلوچستان ءِ دمگ کلات ءَ ناشناسیں سلاہ بندیں مردماں سنگ بروکیں ٹرک نشانگ کتگ اَنت – ھمے وڑ ھزدار ءُ ڈھاڈر ءَ بمب تراک بیتگ اَنت-

گیشیں ھالانی رد ءَ کلات ءِ دمگ ریج ءَ ناشناسیں مردماں گوستگیں شپ ءَ گران نھادیں سنگ بروکیں ٹرک نشانگ کتگ اَنت-

دمگی مردمانی گوشگ اِنت اُرشکاراں گاڑی تاوانبار کتگ اَنت ءُ وت پشت اھشتگ ءُ شتگ اَنت-

دومی نیمگ ءَ ھزدار ءَ پوج ءَ چاندنی ھند ءَ بمبے دزکپتگ ءُ ناکارہ کتگ-

ھمے وڑ بولان ءِ دمگ ڈھاڈر ءَ ناشناسیں مردماں ھوٹل ءِ نزیک ءَ نشہ باپاری بنجل ءَ بمبے چگل داتگ ءُ تتکگ اَنت ءُ اُرش ءَ ھچ وڑیں جانی تاوان نہ بیتگ-

چریشی ءَ پیسر گوستگیں شپ ءَ تربت ءِ شھر ءَ ڈی بلوچ ءِ ھند ءَ ناشناسیں مردماں پاکستانی نیوی ءِ تیل بروکیں گاڑی نشانگ کتگ ات ءُ تکگ ات اَنت-

اُرشکاراں تیرگواری ءُ گاڑی ءِ سر ءَ دزبمب ھم چگل داتگ ات بلے گاڑی ءَ تاوان نہ بیتگ اَت-

ایران ءَ انٹرنیٹ ءِ بندش ءَ ابید ایران ءَ ھواریں زھرشانی کنوک دگانی سر ءَ سرکار ءِ ھلاپ ءَ یکشل ءَ زھرشانی کنگ ءَ اَنت-

فرانسیسی ھبررساں ادارہ اے ایف پی ءِ رد ءَ پولیس ءِ دزگیری ءَ بیست ءُ دو سالی مھسا امینی ءِ مرگ ءَ پد زھرشانی زرمبشت پنچمی ھپتگ ءَ سر بیتگ-

ایران ءَ زھرشانی کنوکانی اوگام مٹ بیتگ ءُ آ دگانی سر ءَ یکشل ءَ اے اوگام ءَ جنگ ءَ اَنت ’ ملا واک ءَ یل بہ کنت‘-

مھسا امینی برکہ ءِ سر ءَ نہ کنگ ءِ پژدر ءَ پولیس ءَ دزگیر کتگ ات ءُ سَے روچ ءَ نادراہ جاہ ءَ تھتیگ بیگ ءَ پد شانزدہ ستمبر ءَ آئی ءَ ساہ داتگ ات اَنت چریشی ءَ پد سرجمیں ڈیھ ءَ زھرشانیانی یک درچے بندات بیت –

شمبے ءِ روچ ءَ ھجکیں جنکاں ابید برکہ ءَ زھرشانی کتگ ءُ سرکار ءِ ھلاپ ءَ اوگام جتگ، زھرشانی کنوک تھران ءِ شریعتی ٹیکنیکل اینڈ ووکیشنل کالج ءَ مچ بیتگ اَنت-

آیاں زھرشانی کنان ءَ اے اوگام جتگ ’ توپک، ٹینک ءُ آس منگ نہ بیتگ، ملا واک ءَ یلو بہ کنت‘ اے زھرشانی کنوکانی تامر بند انٹرنیٹ ءَ ھم تالان بوتگ-

زھرشانی کنوک ءُ پولیس ءِ رھبندانی سر ءَ نگاہ ایر کنوکیں یک سوشل میڈیا چینلے ءِ رد ءَ مھسا امینی ءِ بنکی میتگ سقز ءَ مھا آباد ءَ دکانداراں ھم ھرتال کتگ-

شمبے ءِ روچ ءَ انسانی ھکانی باسکانی نیمگ ءَ سرجمیں ڈیھ ءَ ڈیھ ءَ زھرشانیانی جار جنگ بیتگ ات-

زھرشانی کنوکانی پسو ءَ ایران ءِ یک نامی ئیں ادارہ تبلیغات اسلامی ءَ مھلوک ءَ زور داتگ کہ آ ناشر ءُ ناشری ءِ تالان کنوکانی ھلاپ ءَ توار چست بہ کن اَنت-

زالبولانی چیردستی ءَ بیوکیں زھرشانی امریکی سروک ءَ ھم ساڑاتگ اَنت-

اوسلو ءَ انسانی ھکانی واستا کار کنوکیں یک گلے ءَ ایران ءَ داں انگت ءَ زھرشانیانی میان ءَ بیران بیتگیں مردمانی کچ یک سد ءُ ھشت ءُ سسیستان و بلوچستان ءَ جنگ ءُ چوپانی وھد ءَ نود ءُ سَے مردم بیران بیران بیتگ اَنت-

ایرانی سپریم لیڈر ءَ ’ امریکہ ءُ اسرائیل ءَ ھوار ڈیھ دشمنانی ناشری ءِ تالان کنگ ءِ بھتام ‘ جتگ اَنت-

ایرانی سکیورٹی پورسز بازیں کچے ءَ ازمکار، بگیردار، اھوالکار ءُ گوازی کنوکاں گرگ اِنت –

ایرانی تامرساز مانی حقیقی ءَ گشتگ کہ زھرشانی کنوکانی پلامرزی کنگ ءِ سر ءَ آ لندن تامرباسکوپ ءَ دارگ بیتگ-

بلوچستان ءِ دمگ کیچ ءَ ناشناساں یک وانگ جاھے مانداشتگ، چریشی ءَ وانگجاہ سرجم ءَ ستکگ ءُ پُر بوتگ-

گیشیں ھالانی رد ءَ کیچ ءِ دمگ بلیدہ ءِ ھند الندور ءَ گوستگیں شپ ءِ ساھت سَے ءَ ناشناسیں مردماں پرائیویٹ انگلش گرائمر اسکول مانداشتگ –

ھالانی تہ ءَ گوشگ بیتگ کہ گوستگیں شپ ءِ ساھت سَے ناشناساں کلکشان انگلش گرائمر اسکول مانداشتگ ءُ چریشی ءَ چہ اسکول ءَ تاوان رس اتگ ءُ اسکول ءِ سرجمیں ریکاڈر ستکگ ءُ پُر بیتگ اَنت-

زانگ بہ بیت گوست ءَ ھم ھمے وڑی ءَ کیچ ءَ ھواریں دمگانء وانگ جاہ ماندارگ بیتگ اَنت –

نودربر سیاسی پھناتانی گوشگ اِنت کہ بلوچاں چہ وانگ ءُ زانگ ءِ دور کنگ ءِ ھاتر ءَ اے وڑیں درپیش بیگ ءَ اَنت ءُ چریشی ءَ پد کار ھرابکاریں مردم وانگجاھاں ماندار اَنت ءُ پد ءَ آیانی پشتگیری ءَ کس نہ کنت-

کیچ ءِ بنجاھی شھر تربت ءَ قندیل وانگ جاہ ءَ نودربرانی ھمک سالی ترانکاری مراگش ءِ برجم دارگ بوتگ، جنک ءُ بچکیں نودربراں بازیں بنگپانی سر ءَ انگریزی ءُ دگہ زبانی سر ءَ وتی ھیال درشان اِتگ انت ءُ چہ گچینی مھماناں داد گپتگ –

مراگش ءَ ڈاکٹرنذر الرحمن دشتی، محکمہ سوشل ویلفیئر ءِ عبدالعزیز دشتی، پی آئی اے ءِ گوستگیں اپسر محمدجان بلوچ، تربت سول سوسائٹی ءِ ڈپٹی کنوینر جمیل عمر دشتی، سلیم حامد، جمال گچکی، بہادربلوچ، شاکر دشتی دگہ مردماں ھوار نودربرانی مات ءُ پت آں بھر زرتگ –

نودربراں مراگش ءَ اتکگیں مھمان وش اتک کتگ انت ءُ مراگش ءِ تلو ءِ زمہ واری حمزہ علی ءُ ریحان عزیز گون بوتگ ، ترانکاری ءِ مکابلہ ءِ بندات عبدالحئی ءَ گوں کُران پاک ءِ وانگ ءَ کتگ ءُ آئی ءَ پد کسانسالیں جنک ءُ بچکیں زھگاں وش آتکی سوت جتگ –

مراگش ءَسیمی تبک ءِ نودربر کلثوم بہار، شاری خلیل، محمد داد، گنجان سلیم، عبدالجلیل، نازجان عزیز ءَ چارمی تبک ءِ نودربر ثناء اسحاق، سیمی تبک ءِ شے مرید جمیل، دومی تبک شاہ بی بی جاڑین دشتی ، دومی تبک ءِ حانی منیر، افیرہ اکرام، شازیہ، لکی خلیل، جویریہ غنی، مہرام جام ساکا، زینب ناصر، سمعیہ رمضان، اسماء علی، اولی تبک ءِ مہلب طاہر، صدف راجد علی، ولید ارشاد ءَ ھوار جاڑین سلیم، عومر خلیل، ماہ دیم مقبول، امل بہادر، ریحان عبدالعزیز، شاہ بخش غنی، انعم،شوبین سہیل، شازیہ، شمسہ شاہد علی، رابعہ محمد جان، مرسلین ءُ دگہ جنک ءُ بچکیں نودربراں بھر زرتگ –

نودربرانی ترانانی بنگپ ماسٹرانی شرپ بکشگ، ساپ سپائی، زانت شری، قندیل وانگجاہ، جوانتریں ماسٹر ءُ چاگردی بنگپانی سر ءَ بوتگ انت – مراگش ءَ وانگجاہ ءِ ماسٹر زبیر، محمد عالم، جھانزیب ءَ ھوار دگہ ھم گون بوتگ انت –

مراگش ءِ گڈسر ءَ قندیل وانگ جاہ تربت ءِ پرنسپل بالاچ دشتی ءَ تران کنان ءَ گوشتگ کہ مئے جھد انت کہ نودربراں زانت ءَ ابید چشین مراگش ھم برجم بہ داریں وھد وھد سر ءَ ترانکاری ءِ مکابلہ ءُ سائنسی دروشم ءِ مراگش ھم برجم کن ایں اے وڈیں مراگشاں مات ءُ پتانی بھر زورگ کسانیں نودربرانی دلبڈی بیت اِنت – آئی ءَ گوشتگ کہ مات ءُ پتانی گوم ءَ ما وتی کوآرڈینیشن ءَ برجاہ داریں پرچاکہ مات ءُ پت، نودبر ءُ ماسٹرانی یکجاھی زانت ءَ دیمروئی دات کنت – زانت زھگانی بنکی ھک انت مات ءُ پتاں لوٹیت کہ زھگانی وانگ ءِ سر ءَ دلگوش بہ دئینت، آھانی اولی پرز انت کہ زھگاں بہ وانین انت بید زانت ءَ زند ھچ تک ءُ پھناتاں دیم ءَ شت نہ کنت – آئی ءَ دیم.سال ءَ دھمی تبک ءَ کلاسانی بندات کنگ ءِ جار جتگ –

گڈسر ءَ پرنسپل بالاچ دشتی، ڈاکٹرنذر دشتی، عبدالعزیز دشتی، محمدجان، سلیم حامد، شاکر دشتی، جمال گچکی، جمیل عمر دشتی، مقبول ناصر، محمد قاسم، پھلان خان، اسدبلوچ، بہادر، طاہر حسن، اکرام اقبال، سرمحمد عالم، سرجہانزیب، سرزبیر ءَ جنک ءُ بچکیں نودربراں داد داتگ انت – مراگش ءَ بھر زوریگیں مردماں مراگش ءِ ستا کتگ ونگجاہ ءِ پرنسپل ءُ ماسٹرانی دلبڈی داتگ انت –

بلوچستان ءِ دمگ کیچ ءَ ناشناسیں سلاہ بندیں مردماں ٹیل بروکیں گاڑی ءِ سر ءَ اُرش کتگ-

گاڑی ءِ سر ءَ اُرش تربت ءِ دمگ ڈنک ءَ بنجاھی شھدگ ءِ سر ءَ کنگ بوتگ – بنداتی ھالانی رِد ءَ اُرش ءَ ٹینکر ءَ تاوان رستگ وھدیکہ ڈرائیور ھم زدگ بوتگ –

دمگی اھوالکارانی رِد ءَ اے ٹینکر پاکستانی نیوی ءِ ھاتر ءَ ٹیل سر کنگ ءَ بوتگ بلے تنی وھدی واکدارانی نیمگ ءَ اے درگت ءَ ھچ وڈیں ھال شنگ کنگ نہ بوتگ –

گوست ءَ تربت ءُ کش ءُ گوری دمگاں بوتگیں اے دابیں اُرشانی زمّہ واری بلوچ آجوئی لوٹوکیں سلاہ بندیں گلاں منّ اِتگ انت بلے اے اُرش ءِ زمّہ واری تنی وھدی ھچ گل ءَ نہ منّ اِتگ –

نوشکی ءَ پولیس ءِ تیرگواری ءَ بیران بوتگیں ورنایے کھول ءَ جون ھمراھی ءَ زھرشانی کتگ –

ورنایے کوش ءِ بگیری ءَ شال تاں تفتان ءَ رؤکیں شھدگ بند کنگ بوتگ، درنگاز کنوکاں چیف جسٹس بلوچستان  ءِ کاروان ھم داشتگ – 

درنگاز کنوکانی گوشگ انت کہ گوستگیں روچ ءَ نوشکی ءِ دمگ گزنلی ءَ لیویز فورس ءِ تیرگواری ءَ سعید احمد نامی مردمے بیران بوتگ ءُ سھرابزدگ بوتگ –

وھدیکہ دمگی واکدارانی گوشگ انت کہ وھدے پوج ھمے دمگ ءَ سر بوتگ گڈا پولیس ٹولی ءِ سر ءَ تیرگواری کنگ بوتگ کہ پسوئی تیرگواری ءَ اےمرد بیران بوتگ – 

درنگاز کنوک جون ءِ ھمراھی ءَ تفتان شھدگ ءِ سر ءَ زھرشانی کنگ بوتگ انت ءُ انساپ لوٹگ ءَ بوتگ انت کہ پدا رند ءَ واکداراں گوں گند ءُ نند ءَ پدزھرشانی ھلاس کنگ بوتگ – 

زانگ بہ بیت اے دمگ ءَ گوستگیں روچ ءَ ھم تیرگواری ءِ وئیل ءِ بوتگ ات کہ یک مردمے بیران ءُ دو زدگ بوتگ اِت انت –

منگچر ءِ بازار ءَ گیس ءِ بازیں وھداں بند بوگ ءِ بگیری ءَ زالبولاں زھرشانی کنان ءَ شال تاں کراچی ءَ رؤکیں شھدگ سر ءَ نندانک جتگ ءُ چریشی ءَ دگ سرجمی ءَ بند بوتگ ءُ سدانی کچ ءَ گاڑی ءُ مساپر کشیں کوچ اوشتاتگ انت –

درنگاز کنوکانی گوشگ ات کہ سالے ءَ گیش انت کہ منگچر ءَ گیس بند کنگ بوتگ چریشی ءَ زالبول ءُ دگہ مردم بازیں دلسیاھیانی آماچ انت، ترندی سارتی ھم پیداک انت بلے تنی وھدی گیس پائپانی تہ ءَ جھندم پہ گیس ءَ گیس ءِ بوہ ھم آیگ ءَ نہ انت –

آھانی گوشگ ات کہ سارتی روچ پہ روچ گیش بوان انت، گیس ءِ بندی ءَ بزگریں مھلوک بازیں اڈوجنجالانی دیمپان انت، ایندھن ابید ایل پی جی گیس، اشکر ءُ دار ءِ بھا زورگ گریبانی وس ءَ در انت زالبول کیچن ءِ تہ ءَ بازیں جنجالانی دیمپان انت، چہ سارتی ءَ زھگ ءُ کماش نادراہ بوان انت، گیس ھمک روچی زند گوازینگے ھاتر ءَ المی انت کہ چریشی ءَ مردم زبھر کنگ بوتگ انت – زالبول لاچار انت کہ دگانی سر ءَ بیا انت ءُ زھرشانی بہ کن انت – آھانی گوشگ ات تانکہ گیس دیگ نہ بیت زھرشانی ھمے وڈ برجاہ مانیت –

ھردیکہ پاکستان ءِ کجام ھم بھرے ءَ یک بے وارسیں پجار نہ بیتگیں لاشے دزکپ ایت گُڑا چریشی ءَ ترندی بلوچستان ءَ الم مارگ بیت اِنت۔ اے ھیالانی درشانی بلوچ یکجھتی کمیٹی شال ءِ نیمگ ءَ چہ نشتر نادراھجاہ ءَ پجار نہ بیتگیں کا انی درکپگ ءِ سرءَ شال ءَ برجاہ داشتگیں پریس کانفرنس ءِ نیام ءَ کنگ بیتگ اَنت۔

بلوچ یکجہتی کمیٹی ءِ رھشوناں گُشتگ کہ گوستگیں روچاں چہ رسانکدراں یک ھال ءِ ترگ ءَ اِنت کہ ملتان ءِ نشتر نادراھجاہ ءَ چہ بازیں لاش دزکپتگ اَنت۔ کہ اِشانی درگت ءَ نادراھجاہ ءِ واکدار ءُ پنجاب سرکار بے باوریں گپ کنان ءَ جیڑہ ءَ گار کنگ ءِ جھد کنگ ءَ اَنت۔ اے لاشانی درگت ءَ نادراھجاہ ءِ واکدارانی ءُ سر وزیر پنجاب ءِ یک جارکش ءِ لیکہ ءِ تہءَ پدریں دگری ءَ اے جیڑہ گیشتر ترسناک جوڑکتگ۔ سر وزیر پنجاب ءِ نمائندگ ءِ ردءَ لاش مزنیں کساس ءَ اَنت وھدیکہ نادراھجاہ واکدارانی ردءَ لاشانی کساس تھنا چار اِنت۔ ما اے سرپد بئیں کہ لاشانی کساس چار بہ بیت اگاں چار سد بہ بیت بلے اے جاورانی تہءَ لاشانی درکپگ بازیں جُست ودی کنت ءُ سنگینیں انسانی اگبالانی بگیری اِنت۔ وھدیکہ پرگینگی تک ءَ اڈ بیتگیں کمیٹی تھنا یک مسکرہ ءَ ابید دگہ ھچ نہ اِنت۔ چُش مردمانی لاشانی درکپگ ءَ چہ سرکار ءَ زیت کاروائی کنگ ءَ ابید سئے روچانی تہءَ نادراھجاہ واکداراں وتی رپورٹ پیش کنگ ءِ گُشتگ کہ یک شرمناکیں گام اِنت۔

آیاں گُشتگ کہ ھردیکہ پاکستان ءِ کجام ھم بھرے ءَ یک بے وارثیں اگں پجار نہ بیتگیں لاش ءِ دزکپیت گُڑءَ اِشی ترندی بلوچستان ءَ الم مارگ بیت اِنت پرچہ کہ بلوچستان ءَ ھمک وھدءَ انچیں ژانگولیں لاش دشت، کئور، ءُ گیاباناں چہ دزکپ اَنت کہ بیگواھیں مردمانی بنت ءُ مدام ءُ گیشتر اے مردم پجار نہ بیتگیں نامینگ بنت ءُ ھاموشی ءَ گوں کل کنگ بنت۔

بلوچستان ءَ گیشتریں بیگوائیں مردمانی کُشگ ءُ پدءَ آیانی جسمانی بُرگ ءُ آیانی جسماں چہ بھر کشگ بنت ءُ لاش انچیں جاھاں دور دیگ بنت کہ کس مہ گندیت اِیش وھدیکہ بلوچستان ءَ بازیں ھواریں قبر ھم درکپتگ اَنت کہ آیانی پیسرءَ چہ بیگواھیں مردم کُشگ ءُ ھواریں پئیم ءَ کل کنگ بنت اِنت۔ 2018 ءَ پنجگور ءُ 2013 ءَ توتک ءَ چہ انچیں قبریں گندگ بیتگ اَنت کہ آیانی تہ ءَ درزنانی کساس ءَ زورانسری بیگواھیں مردم کُشگ ءُ کل کنگ بیتگ اَنت پمیشکہ اَے نوکیں وئیل ءَ بلوچستان ءِ بیگواھیں مردمانی کھول درد ءُ اندوھانی تہءَ مان کُتگ اَنت۔

آیانی گیشتر گُشگ اَت کہ اے سنگینیں جیڑہ ءِ مانگیشینگ ءِ ھاترءَ رسانکدر ءَ بازیں لیکہ دیما آرگ بئیگ ءَ اَنت۔ ما ادا اے گپ ءَ پدر کنگ لوٹیں کہ لاش چار بہ بنت کہ چار سد بلے ھمے پئیم ءَ کہ کُشگ ءُ پدا آیانی جسمانی بھر کُشگ ءُ پدا ناشناس نامینگ ءُ نادراھجاہ ءِ چھت ءَ دور دیگ بیتگ اَنت اے انسانیت ءِ بگیر ءَ سنگینیں جرم اِنت، کہ اِشی زیت ءَ زیت پَٹ ءُ پول المی اِنت۔ ما اے پریس کانفرنس ءَ گوں سپریم کورٹ آف پاکستان ءُ انسانی حقانی گلاں چہ دزبندی کنیں کہ نشتر نادراھجاہ ءَ چہ دزکپتگیں لاشانی پلگاریں پئیم ءَ ڈی این اے ٹیسٹ کنگ بہ بیت ءُ اے گپ پدر کنگ بہ بیت کہ اے لاش چہ کجءَ ءُ چون آرگ بیتگ اَنت۔ وھدیکہ اے وئیل ءَ ھواریں مردم قانود ءِ ردءَ آمید گِس ءِ دیما آرگ بہ بنت۔ اگں اے جیڑہ ءَ سرد مھری ءِ آماچ کنگ ءِ جھد کنگ بہ بیت یا اگں دلجم ءُ پلگاریں پَٹ ءُ پول کنگ مہ بیت گُڑءَ اِشی بگیر ءَ سرجمیں بلوچستان ءَ زھرشانیانی یکشلی برجاہ بیت۔

امریکہ ءِ سروک جوبائیڈن ءَ ڈیموکریٹک کانگریشنل کمپین کمیٹی ءَ تران کنان ءَ پاکستان ترسناکتریں ڈیھہ گوشتگ –

امریکی سروک جوبائیڈن ءِ گوشگ اَت کہ پاکستان جھان ءِ ترسناکتریں ایٹمی ڈیھاں چہ یکے، پاکستان ءِ ایٹمی سلاہ ھچ وڑ ٹپاسگ نہ بیتگ ءُ پھازیتگ نہ اَنت –

امریکہ ءِ سروک ءِ گوشگ ات کہ چین ءِ سروک سرپد انت کہ آئی ءَ چی لوٹیت بلے آئی ءِ گوم ءَ بازیں جیڑو ھست اَنت – روس ءِ تہ ءَ چی بوگ ءَ اِنت ءُ جھان ءِ ترسناکتریں ایٹمی ڈیھانی تہ ءَ یکے پاکستان اِنت اودا چی بوگ ءَ اِنت ءُ گپ اش اِنت امریکہ ءَ کجام وڑ ءَ ءُ ڈول ءَ اے چارگی اِنت ءُ گیوار کنگی اِنت –

آئی ءَ گُوشتگ کہ بازیں چیزے بوگ ءَ اِنت بلے اشی ءِ ھاتر ءَ پہ امریکہءَ موہ ھم ھست اِنت کہ جاورھالاں بدل بہ کنت –