TBP Balochi

بلوچستان ءِ بُنجاھی شھر شال ءَ یک زالبولے ءِ لاش دزکپتگ-

سربوتگیں ھالانی رِد ءَ یکشمبے ءِ روچ ءَ شال ءَ پولیس دمگی وانگجاہ ءَ چہ یک زالبولے ءِ لاش دستیگ کتگ-

سیٹلائٹ ٹاؤن ءَ برجاھیں جنکانی ھائی وانگجاہ ءَ چہ پولیس ءَ یک زالبولے ءِ لاش دستیگ کتگ ءُ نادُراھجاہ ءَ برتگ کہ آئی ءِ پجّار رقیہ نام ءَ چہ بیتگ آ وانگجاہ ءِ کشیئر گْوشگ بیگ ءَ اِنت لاش دو ءَ روچ کوھنیں-

پولیس ءَ لاش گیشں چار ءُ ٹپاس ءَ پد کھول ءَ داتگ ایف آئی آر نکش کتگ ءُ گیشیں پٹ ءُ پول برجاہ کتگ-

کوش سوب انگت زانگ نہ بیتگ-

بلوچستان ءِ دمگ مستونگ ءَ کاؤنٹر ٹررازم ڈپارٹمنٹ (سی ٹی ڈی) دیم پہ دیمی میڑے ءَ پنچ مردمانی جنگ ءِ ٹاہ داتگ –

سی ٹی ڈی ءِ جارکش ءِ رِد ءَ گوستگیں روچ ءَ مستونگ ءَ یک مردمے ءِ کوش ءَ پد آئی ءِ جون ءَ بروکیں مردمانی سر ءَ بمب تراک کنوکانی بگیری ءَ سی ٹی ڈی ءِ کارمنداں مستونگ ءِ دمگ قابو ءَ پٹ پولی آپریشن ءِ کُتگ –

سی ٹی ڈی ءِ جارکش ءِ رِد ءَ آپریشن ءِ میان ءَ پوج ءُ کتکارانی میان ءَ تیرگواری بنا بوتگ ھردو نیمگاں تیرگواری ءَ پنچ کتکار جنگ بوتگ انت وھدیکہ چار پھازگی کارمند زدگ بوتگ انت –

سی ٹی ڈی ءَ ٹاہ داتگ کہ جنگ بوتگیں مردمانی گور ءَ تراکناکیں شورہ ھم دست کپتگ انت بلے تنی وھدی پھازگی واکدارانی نیمگ ءَ جنگ بوتگیں مردمانی پجار کنگ نہ بوتگ –

اھوالکار ءِ رِد ءَ اے میڑ ءِ میان ءَ دمگی مردماں تراک ءُ تیرانی توار ھم اشکتگ انت، اے درگت ءَ تنی وھدی سرجمیں ھال دیم ءَ نہ اتکگ انت –

زانگ بہ بیت سی ٹی ڈی ءَ گوست ءَ ھم چشیں میڑانی ٹاہ داتگ بلے پدا رند ءَ زانگ بوتگ کہ دروگیں میڑ ءَ جنگ بوتگیں مردم زورانسری آوار جنگ بوتگیں مردم بوتگ انت بلے مروچیگیں میڑ ءَ جنگ بوتگیں مردمانی پجار تنی وھدی نہ بوتگ –

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہءَ جتائیں اُرشانی زمہ واری منّ اِتگ ءُ گْوشتگ کہ گوستگیں شپ ءِ ساھت ھشت ءُ دہ ملٹ ءَ سرمچاراں تربت ءِ دمگ ڈنک ءَ پاکستانی نیوی ءُ ائیرپورٹ ءَ تیل سرکنوکیں ٹینکر ءِ سرءَ گرینیڈ ءُ وتکاریں سلاھاں گوں نشانگ کتگ –

جارکش ءِ رِد ءَ اُرش ءَ ٹینکر ءَ تاوان رس اِتگ ءُ آئی ءِ آپریٹر مرتگ-

گْوھرام بلوچ ءَ گْوشتگ اے ٹینکر کراچی ءَ چہ تربت ءَ نیوی ءُ ائیرپورٹ ءَ تیل سرکنگ ءَ بیتگ- تربت نیوی بُنجل ءَ چہ دگہ پُرکاری ءَ اَبید ڈرون ءُ جنگی بالگرد ھم چہ ھمد ءَ چست بنت- دشت ءَ انوگیں لشکر کشی ءَ بُنجاہ ھم تربت نیوی بُنجل بیتگ-

جارکش ءَ گْوشتگ کہ دہ اکتوبر ءَ شال ءِ سریاب دگ سر ءَ پی ٹی سی ایل کارگس ءِ نزیک ءَ پاکستانی پوج ءِ سرءَ دزبمب ءَ گوں اُرش کتگ چریشی ءَ دُژمن فورسزاں ءَ تاوان رس اِتگ-

جارکش ءَ گُڈی ءَ گْوشتگ کہ اے اُرش بلوچستان ءِ وتواجھی ءَ برجاہ بنت-

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں کلات ءِ دمگ شیخڑی ءَ یوفونکمپنی ءِ ٹاور گوں تراکناکیں شورواں تباہ کتگ- 

جارکش ءَ گوشتگ کہ اے ٹاور سرمچارانی چاریگری ءَ پہ کارمرز بوگ ءَ بوتگ، چدوپیش ھم اشی ءِ سر ءَ اُرش کنگ بوتگ کہ زورگیریں پوج ءِگوشگ ءِ پد ءَ دوبر اشی ءَ شرکنگ ءَ بوتگ اَنت- 

جارکش ءَ گڈسر ءَ گوشتگ کہ بلوچ لبریشن آرمی اے اُرش ءِ زمّہ واری ءَ منّیت –

بلوچستان ءِ دمگ بلیدہ ءَ انسداد بدامنی کمیٹی ءِ نیمگ ءَ زھرشانی کنگ بوتگ ءُ چارٹر آف ڈیمانڈ پیش کنگ بوتگ –

اگاں منّگ نہ بوت گڈا دو ھپتگ ءَ پد تربت ءَ کمشنر آفس ءِ دیم ءَ بازیں وھدی ءَ نندانک ءَ نندگ ءِ جار جنگ بوتگ –

گیشیں ھالانی رِد ءَ انسداد بدامنی کمیٹی بلیدہ زامران ءِ چیر دستی ءَ دزی ءُ ڈنگی ءِ وئیلانی بگیری ءَ مروچی بلیدہ ءَ زھرشانی روانک ءِ کشگ بوتگ –

روانک ءَ بھر زوروکیں مردمانی نیمگ ءَ دمگی واکدارانی دیم ءَ چارٹر آف ڈیمانڈ ءِ پیش کتگ ھمے لوٹ کنگ ءَ بوتگ کہ بلیدہ زامران ءَ چپ ءُ چاگرد ءِ وتگڑیں سلاہ بندیں ٹولیانی سلاہ پچ گرگ بہ بنت آھانی سر ءَ گامگیج زورگ بہ بیت –

بلیدہ زامران ءِ دزی ءُ ڈنگی وئیلانی بگیری ءَ ترندیں گامگیج زورگ بہ بیت ءُ کتکارانیانی تہ ءَ ھواریں کتکار دزگیر کنگ بہ بنت –
وھدیکہ واکدارانی اپسر اسسٹنٹ کمشنر، تحصیلدار، کمک تحصیلدار ءُ پولیس اپسر بلیدہ ءِ تہ ءَ ساڑی بہ بنت ءُ بلیدہ زامران مردم بہ زان انت کہ ما پھریز انت، بلیدہ زامران ءِ منشیات پروش ءُ منشیات ءِ اڈھانی بگیری ءَ گامگیج زورگ بہ بیت ءُ دمگ چہ نشہ ءَ پاک کنگ بہ بیت، لیویز ءُ پولیس ءِ تہ ءَ ھستیں سیاھیں روباھانی بگیری ءَ ترندیں گامگیج زورگ بہ بیت –

آھانی گوشگ ات کہ لیویز ءُ پولیس ءِ کارمند گیش کنگ بہ بنت ءُ ھمک وھد ءَ تر ءُ گرد بہ کن انت – اگاں مئے اے لوٹ دو ھپتگ ءِ تہ ءَ منّگ نہ بوتاں گڈا وتی زھرشانی ءِ تہ ءَ گیشی کاریں ءُ بلیدہ ءُ زامران ءَ سیادی داروکیں ھزارانی کچ ءَ مھلوک ءِ ھمراھانی ءَ دیم پہ تربت ءَ رویں ھمودا ڈپٹی کمشنر ءُ کمشنر کارگس ءِ دیم ءَ نندانک ءَ نندیں –

آھانی گوشگ ات کہ ریاست ءِ چیر دستی ءَ ادا بدامنی پیداک کنگ بوگ ءَ انت، چاگرد دژمنانی دست ءَ ریاست ءِ توپک انت درس سر پد انت کہ اے کئے انت –

ٹی 20 ورلڈکپ ءِ بندات بیتگ، کہ اِشی بنداتی گوازی ءَ نمیبیا ءَ ایشیاء ءِ چیمپئن سری لنکا پروش داتگ۔

آئی سی سی مردینانی ٹی 20 ورلڈ کپ ءِ بنداتی لیب ءِ تہءَ سری لنکا ءَ نمیبیا ءِ ھلاپءَ ٹاس کَٹگ ءَ پد فیلڈنگ کنگ ءِ پیسلہ کُتگ اَنت۔

نمیبیا ءَ سرجمیں 20 اوورزانی تہءَ 7 وکٹانی تاوان ءِ سرءَ 163 رنز اڈ کُتگ اَت ءُ پہ کَٹگ ءَ 164 رنزانی ٹارگٹ داتگ اَت۔

ٹارگٹ ءَ رسگ ءِ جھد ءَ سری لنکا ءِ سرجمیں ٹیم 19می اوور ءَ 108 رنزانی سرءَ آؤٹ بیتگ۔

چُشی ءَ اے لیب نیمیبیا ءَ 55 رنزاں چہ کٹ اِتگ۔

وائس فار بلوچ مِسنگ پرسنز ءِ شدھڑتالی زھرشانی بُنجل ءَ 4792 روچ سرجم بیتگ اَنت، بلوچ یکجہتی کمیٹی ءِ نیمگ ءَ ماہ رنگ بلوچ، سعدیہ بلوچ، ماجبین بانڑی بلوچ، سائرہ بلوچ ءُ دگہ مردماں بُنجل ءَ اتکگ ءُ یکجاھی درشان اِتگ۔

وی بی ایم پی ءِ وائس چیئرمین ماماقدیر بلوچ ءَ گُشتگ کہ بلوچ راج نازرکیں اھداں چہ گوزگ ءَ اِنت مارا وتی درستیں آسراتی ءُ بودناکی کارمرز کنگی اَنت، زالبول لوگ پہ لوگ بہ رؤانت ءُ راجی کلہوہ ءَ سر بہ کن اَنت ءُ آھاں وتی اگبال ءُ ڈبہ آنی سرپد بیگ ءَ کمک کنگ لوٹیت اِنت، زھرشانی ءُ مچیانی تہءَ ھم بھر زرت کن اَنت ءُ دژمن ءِ سرءَ چم ایر کُت کنت اَنت۔

آئی ءَ دیمتر ءَ گُشتگ کہ مئے گیدی کلاسیکل شائری انچیں زالبولانی درگت ءَ گپ کن اَنت کہ آیاں ماتیں سرڈگار ءِ ننگ ءُ ناموس ءِ رکگ ءِ ھاترءَ مردینانی ھمراھداری کُتگ روایت ھچ بر آیانی راھانی ڈنگر جوڑ نہ بیتگ اَنت ءُ انیگیں تنگ نظریں مردین زالبولانی سرءَ وتگڑیں بلوچ روایتاں بلوچ زالبولانی سرءَ زورانسری لڈگ ءِ جھد کنگ ءَ اَنت۔

بلوچستان ءِ دمگ کلات ءِ ھند شیخڑی ءِ ھند ءَ یوفون کمپنی ءِ ٹاور ناشناسیں مردماں تراک ناکیں شورواں گوں تراکینتگ ءُ دور داتگ-

دمگی مردمانی رد ءَ سلاہ بندیں مردماں ٹاور دور داتگ ء چریشی ءُ پد پشت مانداتگ ءُ شتگ اَنت- واکدارانی نیمگ ءَ تنی وھدی اے درگت ءَ ھچ ھال دیم ءَ نیتکگ اَنت-

زانگ بہ بیت اے ٹاور لھتے ماہ ءَ پیش ھم نشانگ کنگ ءُ دور دیگ بیتگ اَت-

بلوچ سلاہ بندیں گلانی گوشگ اِنت پاکستانی پوج اے موبائل ٹیٹورکانی زور ءَ بلوچ سلاہ بندیں گلانی چاریگری ءَ کنگ ءَ اِنت ءُ مروچی بیتگیں اے تراک ءِ زمہ واری کس ءَ پہ وت ءَ نہ زرتگ-

زانگ بہ بیت کلات ءَ ھوار بلوچستان ءِ دگہ جاھاں ھم یکشل ءَ موبائلانی ٹاور نشانگ کنگ بیتگ اَنت ءُ بازیں جاھاں ٹاور دور دیگ بیتگ اَنت اشانی توک ءَ گیشتر کیچ ءِ دمگ ءَ چوشیں وئیل دیم ءَ اتکگ اَنت-

روکپتی بلوچستان ءَ ھبدہ سالی ئیں ورنایے چیریں ادرھانی دست ءَ دزگیری ءَ پد بیگواہ-

گیشیں ھالانی رد ءَ روکپتی بلوچستان ءِ دمگ ھاش ءَ ایرانی چیریں ادارھاں یک ورنایے دزگیر کنگ ءَ پد ناشناسیں زنداناں برتگ –

آوار جنگ بیتگیں ورنا ءِ پجار متین ریگی جھمنند ھاش ءِ نام ءَ زانگ بیتگ-

ھالانی رد ءَ گوشگ بیتگ کہ متین دوازدہ روچ ءَ پیسر ایرانی چیریں ادارھاں آوار جتگ ءُ برتگ ءُ چریشی ءَ پد آئی ءِ درگت ءَ ھچ ھال نیست اِنت-

آئی ءِ کھول ءَ چیریں ادارھانی واکداراں گوں رھوت کرتگ ءُ وتی زھگ ءِ جست کرتگ بلے آئی ءِ درگت ءَ آیاں گوشتگ کہ ما ھچ ءَ سرپد نہ اِنت ءُ متین مئے گور ءَ نہ اِنت-

سر بیتگیں اھوالاں گوشگ بیتگ کہ متین ءِ مات وتی زھگ ءِ بیگواھی ءَ پد سک ءَ نادراھی ءِ آماچ اِنت ءُ چریشی ءَ چہ آئی ءِ جاور روچ پہ روچ ناگیگ بیان اَنت-

زانگ بہ بیت سی ستمبر ءَ زاھدان ءَ پیش اتکگیں ھون ریچی وئیل ءَ پد روکپتی بلوچستان ءَ بازیں کساسے ءَ ورنا دزگیر کنگ ءُ گار کنگ بیتگ اَنت کہ چریشانی توک ءَ گیشتریں مردمانی اُمر بیست سال ءَ جھل ءُ پانزدہ سال ءَ برز گوشگ بیگ ءَ اِنت-