TBP Balochi

گوستگیں روچ ءَ مستونگ ءَ کاؤنٹر ٹیرر ازم ڈیپارٹمنٹ (سی ٹی ڈی ) ءِ دروگیں میڑ ءَ جنگ بوتگیں مردمانی تہ ءَ یکے ءَ پجار بوتگ کہ آ پیش ءَ زورانسری آوار جنگ ءُ بیگواہ کنگ بوتگ –

بیگواھیں مردمانی پانکجنیں گل وائس فار بلوچ مسنگ پرسنز ءِ رِد ءَ مستونگ ءِ دمگ کابو ءَ پھازگی لشکر ءَ شش مردمانی کہ دیم پہ دیمی میڑ ءَ جنگ ءِ ٹاہ داتگ آھانی تہ ءَ یکے ءِ پجار چار سالاں پیسر زورانسری آوار جنگ ءُ بیگواہ کنگ بوتگیں عبیداللہ ساتکزئی ء سلطان محمد جھمنند کلی سردار ساتکزئی زڑخو شال ءِ نام ءَ چہ بوتگ کہ آئی ءِ کھول ءَ پجار کُتگ –

زانگ بہ بیت گوستگیں روچ ءَ سی ٹی ڈی ءَ ٹاہ داتگ ات کہ مستونگ ءِ دمگ کابو ءَ دیم پہ دیمی میڑے ءَ پنچ مردم جتگ انت – سی ٹی ڈی ءِ گوشگ ات کہ آھانی سیادی چہ مزھبی سلاہ بندیں گلان انت –

وی بی ایم پی ءِ رِد ءَ میڑ ءَ جنگ بوتگیں مردمانی پجار ‏مشتاق ء عبدالرشید، علی احمد ء تاج محمد، حبیب الرحمن ء عبد الصمد، عبیداللہ ساتکزئی، محمد داود ء شیر محمد، نیاز محمد ء عبدالباری ناماں بوتگ انت –

گل ءِ رِد ءَ عبید اللہ ءُ محمد داؤد ءِ درگت ءَ ھمے گپ مارا سر بوتگ کہ پیش ءَ زورانسری آوار جنگ بوتگ انت بلے آھانی کھولانی نیمگ ءَ تنی وھدی اے ھبر راست کنگ نہ بوتگ –

زانگ بہ بیت سی ٹی ڈی ءَ چدوپیسر ھم بلوچستان ءِ تہ ءَ زورانسری آوار جنگ بوتگیں مردم دروگیں میڑ ءِ نام ءَ کُشتگ انت، چیزے وھد انت بلوچ راجدوست ءُ انسانی ھکانی گل سی ٹی ڈی ءِ سر ءَ ھمے الزام ءَ جنگ ءَ انت کہ گوست ءَ بلوچستان ءِ تہ ءَ ھما کار پاکستان ءِ چیریں ادارھاں کتگ انت مروچاں سی ٹی ڈی کنگ ءَ انت –

چدوپیش ھمے سال ءِ جولائی ماہ ءَ پاکستانی پوج ءَ زیارت ءِ نزیک ءَ بلوچ لبریشن آرمی ءَ سیادی داروکیں نُھ مردمانی دروگیں میڑ ءَ جنگ ءِ ٹاہ داتگ ات بلے پدا رند ءَ آھانی پجار کنگ بوت کہ پیش ءَ زورانسری آوار جنگ بیگواھیں مردم بوتگ انت –

وئیل ءِ بگیری ءَ بیگواھیں مردمانی کھولاں پنجاہ روچاں تاں گورنر کارگس ءِ دیم ءَ نندانک جتگ ءُ نشتگ انت بلے پدا رند ءَ وفاقی وزیر رانا ثناء اللہ ءِ باور کنائینگ ءَ پد آھاں شال ریڈ زون ءَ وتی زھرشانی ھلاس کتگ – کہ کمیٹی ءَ زھرشانی نشتگیں مردم باور کنائینتگ انت کہ زورانسری آوار جنیانی گر ءُ دار ءِ ھاتر ءَ گامگیج زورگ بیت اِنت ءُ بیگواھیں مردم دروگیں میڑ ءَ جنگ نہ بنت –

چہ خلیجی ریاست سلطنت عمان مسقط ءَ ساجد بلوچ نامیں مردمے دزگیر کنگ بیتگ-

سربوتگیں ھالانی رِد ءَ کانود برجم داروکیں ادارھاں چہ مسقط ءَ بیڑبرتگ ءُ لیاری گینگ وار ءِ کُتکار ساجد بلوچ دزگیر کتگ کہ آ کراچی ءَ مزن مزنیں جرم ءُ منشیات باپاری ءِ بھتام ءَ پولیس گور ءَ نامدپ بیتگ-

اِھوالکارانی رِد ءَ کُتکار گْوستگیں روچ ءَ کراچی ءَ آرگ بیتگ ءُ کُتکار ءِ دزگیری کراچی ائیرپورٹ ءَ چہ پدر کنگ بوگ ءَ اِنت- دزگیریں کُتکار ساجد بلوچ سر ءَ کوھنیں گولیمار منشیات ءِ مزنیں اڈہ ءِ باپاری ءُ شھر ءَ کُشتکُشار ءَ دزمانجی ءِ بھتام ھست-

نبشتانک: سرڈگار ءِ زھیراں زُرتگ

نبشتہ کار : شیردل بلوچ

دی بلوچستان پوسٹ

اے ھبر راستی یے شھید نہ مرتگ ءُ زندگ اَنت، آیانی زند چہ مرگ ءَ پد بِنا بیت، دراھیں کارست اِش جھان ءَ گندگ ءَ کاینت نام اِش گرگ بنت، آیاں پُشتپد ءُ ھمراہ پھر ءُ شان کن اَنت، راجدپتر ءَ مُدام ءَ گیر آرگ بنت، مرتگ اَنت، ھما کس چہ وتی سرڈگار ءَ ءُ راج ءِ ایردستی ءَ پھک ءَ شموشکار بوتگ اَنت، دنیا ءِ پُشت ءَ کپتگ اَنت لالچی بوتگ ءُ وتی جند ءِ زات ءَ را چہ سرڈگار ءُ راج ءَ بالاتر لیک اِتگ وتی پایدگاں پہ جُنز اِتگ اَنت، انچیں کارستانی واھند مرتگ ءُ گار ءُ بیگواہ بنت، پہ وتن سر دیوکیں پرزند مُدامی گیر کاینت ءُ نمیران اَنت، چہ ھمے زمین زادگاں یکے” شیھد ھاسل جان پنام اکبر بلوچ لیکگ بیت، باگی پھلان ھان ءِ لوگ ءَ ماں پاھو سھی آواران ءَ ودی بوتگ، دَرکسانی وتی دلوتاں گوں بوتگ، پھلوال ءُ شپانکی، زند ئِے گوازینتگ ءُ انچیں مھنتی ءُ جپا کشے بوتگ، وھدے ورنا بیت گڑا پہ زورگار ءِ ھاتر ءَ باز تَگ ءُ تاچ کنت، دو رند ءَ پہ زورگار ءِ واستا امارات ءَ روت، بلے۔! ایردستی ءِ مارشتاں نندگ ءَ نیشتگ پد وتی سرڈگار ءِ زھیراں زُرتگ واتر وتی ھند ءَ اتکگ، زند ءِ روچ ئِے تیلانک داتگ اَنت ۔

زمین چنڈ ءَ پد آواران ءِ جاور روچ پہ روچ گیش نگیگ بنت، زندمان ءِ ھمک پڑ ءِ مردماں پوجیگ ھروچ وتی بُنجلاں لوٹائین اَنت، لالچ دینت، دمگ ءِ ھرچ مردم ءِ بابت ءَ سرجمیں پٹ ءُ پول ءِ کنگ ءِ کاراں گوں دلجمی ءَ دیم ءَ بارت اَنت، آجوئی ءِ جُھد ءِ نزور کنگ ءِ گوں تیزی ءَ پُشت ءَ کپْ اَنت، آجوئی ءِ ھمک جھدکار ءِ ءُ سرمچارانی دراھیں سرپدیاں وتی دست کن اَنت، پہ کمُک ءَ اتکگیں لشکر ھرچ ھما بلوچ ءِ لوگ ءُ جاھانی ماندارگ ءَ بندات کن اَنت کہ آیاں سیادی گوں آجوئی لوٹوکیں گلاں بنت، کھولانی چست کنگ ءُ لٹ دیگ ءِ دِرچ ءَ بندات کن اَنت، آواران ءِ دمگ ءِ ھر سئیں تھسیلاں وتی پوجی بُنجلاں گیش کنت کوہ ءُ کوچگاں یک ھساب ءَ تیوگیں میتگ پوجی بنجلانی ھسار ءَ کنت، کسے ءَ را شپ ءَ تر ءُ تاب ءَ ءُ وتی کشاورزی ، ڈگارانی سر ءَ روگ ءَ نیل اِیت، انچو شپ ءَ نادراہ ءِ پہ الاج ءُ درمانجاہ ءَ درمان ءِ گرگ موکل نہ دنت، چہ وتی میتگ دَرآیگ سپر ءَ روگ ءِ موکل ءُ پوج ءِ رازمَنْدی ءَ چہ بیت۔

شھید ھاسل وتی ھنکیں ءَ گوں کٹم ءَ ھوار یلہ دنت جاہ آھو ءِ کوھی دمگ ءَ کیت ھنکیں بیت، جاہ آھو (جھاؤ) ءَ زمیندارے ءِ گور ءَ بزگر بیت ھمے میانجی وتی نزدیکی ءَ گوں سرمچاراں کنت، ھمے وڑ ءَ وھد جُنز بیت آئی ءِ ھمراھداری مھکم بیت سلاہ بند بیت، پہ دلساپی پند بُر اِیت ھمراہ بوتگ اَنت، وھدیکہ “شھید مھیم جان پنام راھمین ، گوں چار سنگتاں لشکر ءِ انگر ءَ کاینت دیم پہ دیمی میڑ دے اَنت شھید بنت ، اے میڑ ءَ ھاسل جان ءُ دگہ سنگتے گوں بنت ءُ تیر ور اَنت ءُ زدگ بنت ۔

ھاسل جان پہ ھمراھی ءَ دلساپیں ءُ تچکیں سنگتے اَت، آجوئی ءِ جُنز ءَ پہ دلجمی پند ئِے بُر ات، دژمناں پہ سرینڈر کنائینگ ءَ باز جھد کرت لالچ ءِ دیگ ءِ ٹاپار جنگ، آئی ءَ ھر وھد ءَ نہ منّ اِت، پندل سازانی گپّاں وتی گل ءِ زمہ دار ئِے ھال داتگ اَنت، چانیگ وار بے آبرو کرتگ اَنت، گڈسر ءَ لگوریں لشکر ءِ دلاراں پہ نامردی ءُ چیرکانی پانزدہ سارتان دوھزار بیست ءُیک(15/10/2021) ءَ سر ءَ ئِے اُرش کن اَنت” ھاسل جان ءِ جتا کنگ ءَ سوب کن اَنت، شھید ھاسل جان پنام اکبر بلوچ نمیران بیت ءُ من سھرچکیں دروت ئِے ندر کناں آجوئی زندگ بات –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

اسکاٹ لینڈ ءِ ٹیم ءَ دو رند ءَ چمپیئن بیتگیں ویسٹ انڈیز ءِ ٹیم 42 رنز ءَ چہ پروش داتگ-

ھوبارٹ ءَ لیب کتگیں ورلڈ کپ کوالیفائر ءِ ٹیم بی ءِ ویسٹ انڈیز ءَ ٹاس کٹ اِتگ ءُ پیسر ءَ بیٹنگ شور کتگ-

اسکاٹ لینڈ ءَ سرجمیں اوورز ءَ پنچ وکٹانی تاوان سر ءَ 160 رنز جوڑ کتگ- مُنسے ءَ 9 چارانی کُمک ءَ چہ بے سوب نہ بوتگ ءُ 62 رنز جوڑ کتگ وھدے کہ کلم میک لوئیڈ ءَ 23 رنز جوڑ کتگ-

ویسٹ انڈیز ءِ نیمگ ءَ چہ الزاری جوزف ءُ ھولڈر ءَ دو دو وکٹ گپتگ-

ٹارگ رسگ ءَ ویسٹ انڑیز ٹیم ءَ 118 رنز جوڑ کتگ ءُ ھلاس بیتگ ءُ اسکاٹ لینڈ ءَ میچ ءَ 42 رنز ءَ چہ سوبمند بیتگ-

میر جاوہ ءَ ایرانی چیریں ادارہ اطلاعات ءَ پنچ ورنا آوار جنگ ءَ پد بیگواہ کرتگ اَنت-

سر بیتگیں ھالانی رد ءَ روکپتی بلوچستان ءِ دمگ میرجاوہ ءَ ایرانی چیریں ادارھاں پنچ کس دزگیر کنگ ءَ پد ناشناسیں زنداناں برتگ اَنت-

آوار جنگ بیتگیں مردمانی پجار عارف شاہ بخش ء عبدل، جاوید کرد ء یونس، عاشق اللہ براھوئی، یاسین براھوئی ء ھاجی رشید ءُ عبدالصمد ریگی ء خداداد ءِ ناماں زانگ بیتگ اَنت-

ھالانی تہ ءَ گوشگ بیتگ کہ اشانی توک ءَ جاوید ءُ عاشق ھژدہ سال ءَ کم اُمری اَنت کہ آ وتی لوگ ءِ واستا وردنی گرگ ءَ شتگ بیتگ اَنت کہ چمود ءَ چیریں ادارھاں آوار جتگ اَنت-

آئی سئیں کس جتا گرگ بیتگ اَنت ءُ اشانی توک ءَ عبدالصمد سی ستمبر ءَ آدینگ ءِ نماز ءَ پد زدگ بیتگ ءُ نادراہ جاہ ءَ تھتیگ بیتگ-

ھالانی تہ ءَ گوشگ بیتگ کہ عبدالصمد ءَ وتی ٹپانی درمانی ھلاس کتگ ءُ نادراہ جاہ ءَ دراتکگ ءُ پد آ دزگیر کنگ ءُ برگ بیتگ-

پنچیں مردمانی بارو ءَ دگہ ھچ ھال نہ بیتگ اَنت ءُ نانکہ واکداراں دگہ گپ دیم ءَ آوارتگ اَنت-

روکپتی بلوچستان ءَ زھرشانی درچاں پد بازیں کچے ءَ مردم گرگ ءُ بیگواہ کنگ بیتگ اَنت کہ بازین مردمانی نام انگت ءَ دیم ءَ نیتکگ اَنت –

بلوچ نیشنل مومنٹ ءِ جرمنی تک ءِ کمک سرکماش سمل ءَ ھم سنتیں راج ءِ مردمی اگبالانی کونسل ءِ 51می پتر ءِ میان ءَ ’ اڑاندیں جاوراں جنین آدمانی ناگیگیں جاور‘ ءِ بنگپ ءَ ھمرِدیں مراگشے ءَ بھر زرتگ ءُ بلوچستان ءِ جاورانی سر ءَ گپ جتگ۔

آئی ءَ گْوشتگ بلوچستان ءُ دگہ دمگانی جنینانی جیڑہ دگر اَنت۔اد ءَ جنین پہ وت گھتریں آسراتی لوٹ اَنت بلے آ اود ءَ جنین ءِ لوٹ ایوک ءَ ھمیش اِنت کہ آئی ءَ آئی ءِ گلزمین ءِ سر ءَ زندگ بیگ ءِ اگبال بہ رس ایت۔

سمل بلوچ ءَ ءَ گْوشتگ بلوچستان سئے ڈیھ پاکستان، اوگانستان ءُ ایران ءِ میان ءَ بھر اِنت ءُ بلوچ چیردست کنگ بیتگ اَنت۔بلوچ نودربراں وانگ ءِ آسراتی نیست۔بلوچستان ءَ گْوستگیں باز روچ اِنت کہ نودربر پہ وتی اگبالاں زھرشانی کنگ ءَ اَنت۔

آئی ءَ گْوشتگ بلوچستان ءَ وانگ ءِ آسراتی نیست، جاھے اگاں ماڑی مک اَنت گڑا وانینوک نیست۔بلوچ زھگ وانگ لوٹ اَنت بلے پاکستانی مھترند آیاں وانگ ءِ اگبال ءِ دیگ ءَ بے سوب اِنت۔پمیشکا بلوچ وانگ ءَ پاکستانی پنجاپ ءُ سند ءَ رو اَنت آنگو وانگجاھاں آیاں جاہ ء ایش کہ آیانی وانگ ءِ باندات ءَ جست کنگ بہ بیت آیاں اے جست کنگ بہ اَنت کہ توپک چون آس دیگ بیت ءُ آ گوں کجام سیاسی گل ءَ بندوک اَنت۔ منی ھیال ءَ اے چوشیں جست نہ اَنت کہ چہ نودربرے ءَ کنگ بہ بہ اَنت۔

’ آنگْور ءِ جیڑھانی تہ ءَ جیڑھے ایش اِنت ھم کہ کھولانی مردین زور بیگواہ کنگ بیتگ اَنت ءُ پشت ءَ گساں جنین منتگ اَنت۔ پاکستانی لشکر لوگانی تہ ءَ دور کنت ءُ آیانی چکانی دیم ءَ گوں آیاں ’جنسی زوراکی‘ کنت بلوچستان ءَ جنین انچیں جاورے ءِ دیمپان اَنت کہ آ گوں گپ ءُ دانکاں درشان بیت نہ کنت۔ داں اینچک کہ درانڈیھ ءَ ھم بلوچ جنین چہ پاکستان ءِ ناشریاں پھریز نہ اَنت ما کریما ءَ زان ایں کہ پمیشکا کشگ بیتگ کہ آئی ءَ پہ بلوچ ءِ اگبالاں گپ جتگ اَت۔‘

آئی ءَ گْوشتگ ھم سنتیں راج ءِ گزارش ءِ رد ءَ بلوچستان نیزگاریں دمگے بلے من اے وڑ سرپد نہ بہ آں پرچا کہ بلوچستان چہ مڈیاں سرچکار اِنت۔بلوچستان ءِ گْور ءَ تیاب ھست کہ آئی ءَ چین پہ وتی سیتاں کارمرد کنگ ءَ اِنت۔من چہ ھم سنتیں راج ءَ لوٹ کن آں کہ آ چہ چین ءَ جست بہ کنت آ بلوچستان ءَ چی کنگ ءَ اِنت۔سی پیک دگ ءِ سر ءَ چین ءِ بند ءُ ساچی شوربندیانی پد ءَ مردم پہ لڈگ ءَ لاچار کنگ بیگ ءَ اَنت ھما کہ نہ لڈ اَنت آ زور بیگواھی ءِ نشانگ کنگ بیگ ءَ اَنت۔

آئی ءَ بلوچستان ءَ انیگیں ھار ءَ پد ءِ جاوراں جنینانی جیڑھانی سر ءَ ھم گپ جتگ آئی ءَ گْوشتگ بلوچستان ءِ ھار آماچیں دمگاں 60 ھزار لاپ پری ئیں جنین ھست کہ چہ ھار ءَ سانمند بیتگ اَنت۔باز جنین ھار ءِ میان ءَ ھم چلگ بیتگ۔پاکستانی مھترند آیانی آسراتی دیگ ءَ بے سوب بیتگ ءُ میان استمانی رسانک آیانی جیڑھانی دیم ءَ آرگ ءَ بے سوب بیتگ۔من ءَ باور اِنت کہ پاکستان ءَ پہ ھار آماچیں مردماں رس اتگیں پوڑی گوچلیانی وڈال ءَ رو اَنت۔

میان اُستمان ءِ زھگانی گھبودی ادارہ یونیسف ءَ گوشتگ کہ یوکرین ءِ سر ءَ روس ءِ اُرش ءُ آئی ءِ آسراتاں رودراتکی یورپ ءُ ایشاء ءِ ھواریں دمگاں چِل لک زھگ شد ءِ آماچ بیتگ اَنت-

فرانسیسی ھبررساں ادارہ اے ایف پی ءِ رد ءَ دوشمبے ءِ روچ ءَ یونیسف ءَ بیست ءُ دو ڈیھانی کچ ءُ کساسی رپورٹ شنگ کرتگ ءُ گوشتگ کہ یوکرین ءِ جنگ ءِ سبب ءَ ودی بیتگیں زرکاری ءِ نہ بوگ ءِ گران ترین بوج زھگاں چست کنگ بیتگ-

یونیسف ءَ گوشتگ کہ ’جنگ ءَ بیوکیں گرانھادء ءَ رودراتکی یورپ ءُ ایشاء ءِ جھلی جاھاں دگہ چل لَک زھگ شد ءِ آماچ بیتگ اَنت سال دوھزار ءُ بیست ءُ یک ءِ کساساں نوزدہ درسد گیش اِنت ‘-

رپورٹ ءِ رد ءَ فروری ءِ ماہ ءَ ھمساھگیں ڈیھ روس ءُ یوکرین ءِ وت ما وتی جنگ ءَ درستاں گیش زھگ آسرمند بیتگ اَنت –

یوکرین ءِ جنگ ءِ سبب ءَ دمگ دگہ گیش زھگ شدکشیں ڈکال ءِ آماچ بیتگ اَنت ءُ اشانی زمہ وار روس اِنت اشی ءَ ابید بیست ءُ ھشت لَک زھگ وتی لوگاں ھم نیزگاری ءِ زند ءِ گوازینگ ءَ لاچار اَنت-

یونیسف ءَ دیمتر ءَ گوشتگ کہ نصف ملین گیش زھگ شد ءِ زند ءَ گوازینگ ءَ اَنت ءُ رومانیہ ءِ اے کچ ءُ کساسانی نزیک اِنت اود ءَ دگہ یک لَک ءُ دَہ ھزار زھگ شد ءِ آماچ اَنت-

یورپ ءُ وسطی ایشیا ءِ واستا یونیسف ءِ ریجنک ڈائریکٹر افشان خان ءَ گوشتگ اگاں ما اے زھگ ءُ آیانی کھولانی کمک نہ کت گڑا چریشی ءَ شدکشیں زھگانی کساس گیش بیت ءُ آیانی زندگی ھم آسر بیت اِنت ءُ آیانی وانگ ءُ زانگ ءِ پھنات ھم آوکیں باندات ءَ زبھر بنت اِنت-

رپورٹ ءَ گوشگ بیتگ کہ یونیسف اشی ءَ تچک کنت کہ یک کھولے کجام کساس نیزگار بہ بیت آئی ءِ متلب اے نہ اِنت گڑا کٹ ءُ کمائی وردنی ءُ دگہ آسراتی ءُ مہ لگ ایت گڑا تھنا وتی زھگانی وانگ ءُ کم ھرچ کنگ ءَ بہ بنت-

زھگانی شد ڈالچاری ءُ نا مناسبی ءُ آماچ کتگ – آئی ءَ گوشتگ کہ ھمے روکیں سال ءُ چار ھزار ءُ پنچ سد زھگ وتی ودی بیگ ءِ روچ ءِ دارگ ءَ پیسر مرتگ اَنت یک لک ءُ ھبدہ ھزار زھگاں وانگجاہ یل کتگ اَنت-