TBP Balochi

گوستگیں شپ ءَ ناشناسیں مردماں کلات ءِ ھند منگچر ےَ پاکستانی پوج ءِ بنجل دزبمباں گوں نشانگ کتگ ءُ پشت مانداتگ ءُ شتگ اَنت-

واکدار ءِ رد ءَ اُرشکار پرپٹاں سوار بیتگ اَنت کہ آیاں کارندھانی سر ءَ دزبمب چگل داتگ ءُ تیرگواری کتگ ءُ پد ءَ پوج ءَ راہ ءُ در بستگ اَنت ءُ اُرشکارانی پَٹ ءُ پول بندات کتگ-

دومی نیمگ ءَ بلوچستان ءِ آجوئی لوٹوکیں سلاہ بندیں گل بلوچ لبریشن آرمی ءَ رسانکدراں شنگ کرتگیں یک درشانے ءَ اے اُرش ءِ زمہ واری من اتگ –

جیئند بلوچ ءَ گشتگ کہ گوستگیں شپ ءَ مئے سرمچاراں کلات منگچر ءَ زورگریں پاکستانی پوج ءِ بنجاھی بنجل ءِ دو چوکی دزبمبانی نشانگ کتگ اَنت ءُ چریشی ءَ دشمنیں پوج ءِ یک کارندے مرتگ ءُ چار زدگ بیتگ اَنت ءُ ھردوکیں پھریزی چوکی تباہ بیتگ اَنت-

جارکش ءَ گشتگ بلوچ لبریشن آرمی اے اُرش ءِ زمہ واری ءَ من ات ءُ آجوئیں ڈیھ ءِ آجوئی ءِ ردھبندانی رد ءَ جنگ برجاہ بیت اِنت-

انٹرنیشنل کرکٹ کونسل (آئی سی سی) ءَ دنیا ءِ درستاں مستریں تیل ءِ کمپنی سعودی آرامکو ءِ گون ءَ شریداری ءِ جار جتگ داں سال دوھزار ءُ بیست ءُ سَے ءِ گڈسراں برجاہ بیت اِنت-

عرب نیوز ءِ رد ءَ اے مسام ءَ آسٹریلیا ءَ ھمے بیتگیں آئی سی سی مینز ٹی ٹونٹی ورلڈ کپ، زرباری افریقہ ءَ بیوکیں آئی سی سی ویمنز ٹی ٹونٹی ورلڈکپ، برطانیہ ءَ آئی سی سی ورلڈ ٹیسٹ چیمپئن شپ ءِ فائنل ءُ انڈیا ءَ آئی سی سی مینز کرکٹ ورلڈ کپ سال دوھزار ءُ بیست ھوار اَنت-

انٹرنیشنل نیشنل کرکٹ کونسل ءِ چیف ایگزیکٹو آفیسر جیوف ایلارڈائس ءَ گوشتگ ’ ما آرامکو ءَ آئی سی سی ءِ میان اُستمانی شریداری ءَ وش آھت گش ایں ءُ یکدم وش اِنت ‘-

آئی ءَ گوشتگ کہ ’ مئے ھمسنتں شریداری ءِ بنپد اِنت ءُ ما آرامکو ءِ گون ءَ 2023 ءِ گڈسر ءَ داں مینز ءُ ویمنز ءِ مزنیں ایونٹس ءِ سر ءَ کار کنگ ءِ وداریگ اِنت‘-

آرامکو ءَ انٹرنیشنل کرکٹ کونسل پلیئر آف دی میچ ایوارڈز ءِ نام ءَ ھک دیگ بیتگ-

مسام ءِ تک ءَ آرامکو آسٹریلیا ءَ برجاھیں آئی سی سی مینز ٹی ٹونٹی ورلڈ کپ دوھزار ءُ بیست ءِ واستا ھپت جاھاں ری سائیکلنگ مشین کنگ بنت-

آرامکو ءِ میان اُستمانی راجمان ءِ باسک جنرل منیجر طلال المری ءَ گوشتگ ’ اے مئے میان اُستمانی شریداری سیادی یک جوانیں کردے پیلو کنت مارا آئی سی سی ءِ گون ءَ ھوار بیگ باز وشی بوگ ءَ اِنت-

آئی ءَ گوشتگ ’ پلگاری مئے بنکی لوٹاں چہ یکے ءُ اے مزنیں تکانی سر ءَ کرکٹ مئے پلامرزی ءَ پدر کنت‘-

طلال المری ءَ گوشتگ ’ کرکٹ یک ھنچیں گوازی ءِ مزنیں تکاں دلگوش کنگ بیت اِنت ایمانداری ءُ سوبمندی درچاں گندگ بیت اِنت ءُ اے ھما درستیں تک اَنت ما آرامکو ءِ نھاد ءَ زانت اِنت-

سندھ ءِ بُنجاھی شھر چہ کراچی ءَ پاکستانی پوج ءُ چیریں ادارھاں سے ورناہ زورانسری آوار جتگ ءُ بیگواہ کتگ اَنت –

سر بوتگیں ھالانی رِد ءَ کراچی ءِ دمگ چہ لیاری چھیل چوک ءَ گوستگیں شپ ءَ پاکستانی پوج ءُ چیریں ادارھانی کارندھاں بیڑ برتگ ءُ بلوچستان ءِ دمگ کیچ ءِ جھمنندیں سے ورناہ زورانسری آوار جتگ ءُ ناشناسیں جاھے ءَ برتگ اَنت-

آوار جنگ بیتگیں ورنایانی پجّار زوھیر ء عزیز، چاکر ء قیوم ءُ سراج ء امام جھمنند کیچ ءِ ناماں چہ بیتگ اَنت –

زانگ بہ بیت بلوچستان ءَ یک نیمگے زورانسری آوار جنی ءُ دومی نیمگ ءَ بیگواھیں مردماں دروگیں میڑ ءَ کُشگ ءِ دْرچ یکشل ءَ برجاہ ءَ اَنت-

بلوچستان ءِ دو جتاجتائیں دمگاں بیست ءُ چار کلاکانی تہ ءَ سی ٹی ڈی ءَ نُھ بیگواھیں مردم دروگیں میڑ ءَ کُشتگ اَنت-

اشانی تہ ءَ سے مردم پجّار فرید ء میر عبدالرزاق بادینی ، سلال حاجی عبدالباقی بادینی ءُ تابش وسیم ناماں چہ بیتگ اَنت ھر سئیں جتاجتائیں دمگ ءُ وھداں زورانسری آوار جنی ءِ نشانگ کنگ بیتگ اَنت-

چاگردی رسانکدراں سی ٹی ڈی ءِ بگیری ءَ بلوچ سیاسی ءُ انسانی ھکانی گلانی نیمگ ءَ ایراد گرگ ءُ گوشگ ءَ اَنت سی ٹی ڈی ءِ بلوچستان ءَ لس بیگواھیں مردماں جنگ بیگ ءَ اَنت-

آیانی گوشگ اِنت سی ٹی ڈی ءِ ناشری بلوچستان ءِ کنڈ کنڈ ءَ بیگ ءَ اَنت ءُ چریشی ءِ ھلاپ ءَ گوست ءَ زھرشانی نندانک داں پنجاہ روچاں برجاہ بیتگ اَنت ءُ چریشی ءِ سر ءَ کھول سدکی دیگ بیتگ اَنت بیگواھیں مردم جنگ نہ بنت بلے اشی ءَ ابید ھم اے وئیل دارگ نہ بوتگ اَنت-

دومی نیمگ ءَ بی ایس او ءَ ھم شال ءِ پریس کلب ءِ دیم ءَ زھرشانی کنگ ءِ جار جنگ بیتگ –

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ نُھ سد ءُ نود ءُ چار روچ سرجم بوتگ انت – مروچی چہ سوراب ءَ راجداریں باسک علی محمد بلوچ ءُ علی اکبر بلوچ ءَ بنجل ءَ اتکگ ءُ دلپدردی درشان اتگ –

گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچستان ءَ زورانسری آوار جنگ بوتگیں مردمانی کوش ءِ وئیل گیش بوان انت –

آئی ءَ گوشتگ کہ سرکار، اپوزیشن ءَ ھوار جوڈ کنگ بوتگیں انسانی ھکانی کمیٹی، پارلیمانی کیمٹی سنیٹ ءِ کمیشن ایندگر بس کول کن انت بلے پوج ءِ دیم ءَ بے وس انت –

آئی ءَ گوشتگ کہ گوستگیں شپ ءَ نوشکی ءَ دورگیں میڑے ءَ زورانسری آوار جنگ بوتگیں مردم کشگ بوتگ انت –

ماما قدیر بلوچ ءَ بلوچ راجداریں پاٹیاں ھوار نودربر گلاں گوں لوٹ کتگ کہ اگان ما ھچ مہ گوش ایں گڈا پاکستان زورانسری آوار جنگ بوتگیں بلوچاں دروگیں میڑ ءِ نام ءَ کشان کنت –

گوستگیں روچ ءَ نودربر اسرار خان ءِ کوش ءِ بگیری ءَ آئی ءِ کھول ءُ دمگی مردمانی نیمگ ءَ زھرشانی کنگ بوتگ –

اے دلپدردیں وئیلے بگیری ءَ لورلائی ءِ مھلوک ءَ وتی دکان مرچی بند کتگ انت –

بازار ءَ ھرتال ءِ سوب ءَ درسیں شاپنگ سنٹر، مارکیٹ ءُ دکان بند بوتگ انت – ورنایے کھول ءَ چہ پولیس ءَ لوٹ کتگ کہ کُشندھان زوت دزگیر بہ کنت –

کُشگ بوتگیں نودربر ءِ کھول ءِ رِد ءَ کُشندھاں ھمے میان ءَ چار نودربر گپتگ انت گڈا گِر ءُ چِل ءِ میان ءَ کتکاراں تیرگواری کتگ چریشی ءَ اسرار بیران بوتگ وھدیکہ آئی ءِ سئیں ھمراہ زدگ بوتگ انت –

وئیل ءَ ھواریں یک کتکار ءِ برات ءُ پت پولیس ءَ دزگیر کتگ انت –

پولیس ءِ رِد ءَ وئیل ءَ کُشگ بوتگیں نودربر ءِ چار ٹپاس ءِ وھد ءَ کشندہ ءِ پرپٹ دگہ چیز دست کپتگ انت ءُ چریشی ءَ پد پولیس ءَ گامگیج زرتگ ءُ آئی ءِ برات ءُ پت دزگیر کتگ انت – پولیس کتکارانی دزگیری ءِ ھاتر ءَ چاپہ جنگ ءَ انت -.

واکدارانی رِد ءَ اے کتکار ءِ دزگیری ءَ چہ مارا آئی ءِ اے وڈیں کاراں ھواریں دگہ ھمراھانی بابت ءَ ھم سرپدی رسگ ءِ گمان انت –

روکپتی بلوچستان ءِ بنجاھی شھر زاھدان ءَ ایرانی چیریں ادارھاں یک جنکے آوار جنگ ءَ پد ناشناسیں زنداناں برتگ-

گوستگیں روچ ءَ بزانکہ دوشمبے ءَ ایرانی چیریں ادارھاں چہ زاھدان ءَ یک بلوچ جنکے آوار جنگ ءَ پد بیگواہ کرتگ-

آوار جنگ بیتگیں جنک ءِ پجار بیست ءُ سَے سالی ئیں فائزہ براھوئی ءِ نام ءَ زانگ بیتگ-

آئی ءِ کھول ءِ گوشگ اِنت کہ مئے زھگ چیریں ادارھاں آوار جتگ ءُ برتگ ءُ چریشی ءَ پد آئی ءِ ھچ ھال نیست اِنت-

روکپتی بلوچستان ءَ بلوچ جنکانی آوار جنی چیزے روچانی توک ءَ باز ترندی ءَ گندگ آیگ ءَ اَنت-

اے آوار جنی کدی ترند بیتگ اَنت؟ –

گوستگیں ماہ ءَ روکپتی بلوچستان ءِ تیابدپی شھر چھبار ءَ ایرانی پولیس آفیسر ابراھیم کوچکزئی ءِ دست ءَ پانزدہ سالی ئیں بلوچ جنک ءِ گون ءَ جنسی زوراکی ءَ پد گیش بیتگ اَنت-

چریشی ءَ پیسر زاھدان ءَ ھم سَے جنک آوار جنگ بیتگ اَنت کہ آیانی بیگواہ بیگ ءَ پد آیانی درگت ءَ دگہ ھچ ھال نہ بیتگ –

اشی ءَ پیسر چھبار ءَ ھم پنچ جنک آوار جنگ بیتگ ات اَنت – ایرانی پولیس ءُ دگہ ادارھانی بھتام اِنت کہ اے جنکاں سرکار ءِ ھلاپ ءَ توار چست کرتگ –

بلے لس مھلوک ءِ گوشگ اِنت کہ ایرانی پولیس ءَ بلوچ جنکانی گون ءَ جنسی زیادتی ءَ پد انساپ ءِ واستا توار چست کنوکیں جنک گرگ ءُ بیگواہ کنگ بیگ ءَ اَنت-

بلوچستان ءِ دمگ نوشکی ءَ کاونٹر ٹیررازم ڈیپارٹمنٹ (سی ٹی ڈی) ءِ یک دگہ بیڑے دروگانی تہ ءَ پدر بیتگ – چریشانی تہ ءَ دو مردمانی پجار پیسر ءَ بیگواھی ءِ نام ءَ زانگ بیتگ اَنت-

سی ٹی ڈی ءِ نیمگ ءَ شنگ کنگ بیتگیں یک درشانے ءِ رد ءَ گوستگیں شپ ءَ نوشکی ءِ دمگ زرین جنگل ءَ سلاہ بندانی ھلاپ ءَ بیڑ برتگ ءُ ھمے میان ءَ چار بلوچ سلاہ بند جنگ بیتگ اَنت – سی ٹی ڈی ءِ گوشگ اِنت اے مردم کُشت ءُ کوش، بمب تراک ءُ دو فروری ءَ نوشکی ءَ ایف سی ءِ ھیڈ کوارٹر ءِ اُرش ءَ ھوار بیتگ اَنت-

سی ٹی ڈی ءِ واکداراں ٹاہ داتگ کہ بیڑ ءِ وھد ءَ سلاہ ءُ تراکناکیں شورو دزکپتگ اَنت- ءُ کُشتگیں مردمانی لاش ھاران ءِ نادراہ جاہ ءَ برگ بیتگ اَنت-

ٹی بی پی ءِ پٹ ءُ پول ءَ سرپدی بیتگ کہ اے مردمانی تہ ءَ دو مردمانی سیادی نوشکی ءَ اِنت کہ جتا جتائیں وھداں زورانسری آوار جنگ بیتگ اَنت اے گپ ءِ راستی لاشانی تہ ءَ ھم بیت (مود، چمپل ءُ جسم ءَ روچ کہ نہ لگ اتگ ءُ چریشی ءَ آیانی جسم اسپیت اِنت) چریشی ءَ چہ زانگ بیت اِنت اے مردم زندانی بیتگ اَنت-

کشگ بیتگین مردمانی توک ءَ یکے ءِ پجار فرید ء میر عبدالرزاق بادینی جھمنند نوشکی ءِ نام ءَ بیتگ مہ آ بیست ءُ ھشت ستمبر دوھزار ءُ بیست ءُ دو ءَ شال ءَ زورانسری آوار جنگ بیتگ ءُ دومی ءِ پجار سلال ء ھاجی عبدالباقی بادینی جھمنند نوشکی کہ شش اکتوبر دوھزار ءُ بیست ءُ دو ءَ شال ءِ دمگ بروری دگ ءَ ریلوے کالونی ءَ چہ لوگ ءَ بیڑ ءِ وھد ءَ دزگیر کنگ ءُ بیگواہ کنگ بیتگ –

زانگ بہ بیت سلال بادینی چریشی ءَ پیسر پنچ مارچ دوھزار ءُ بیست ءُ دو ءَ آوار جنگ بیتگ ءُ پد ءَ اگست ءِ ماہ ءَ یل بیتگ ءُ دومی رند ءَ آوار جنی ءَ پد سلال زندگی ءَ واتر نہ بوت ءُ آئی ءِ لاش دیم پہ دیمی دروگیں جنگ ءَ کشگ بوت – اے ورنا ءِ ھمراھی ءَ یک دگہ ورنایے ھارون بادینی ء شاھنواز بادینی ھم بیگواہ کنگ بیتگ اَت کہ داں انگت ءَ بیگواہ اِنت-

سی ٹی ڈی ءِ دروگیں جنگ:

بلوچستان ءَ سی ٹی ڈی ءِ بیڑاں ھروھد ءَ شکی گوش اَنت ھمے وڑ بازیں بیڑاں رسانکدراں کھولاں دروگ کتگ اَنت بلے سرکار ءُ سرکاری نمائندگ اے بیڑانی پشتگیری ءَ کنان ءُ پیداک اَنت-

ھمے لھتے زوتیں وھداں بلوچ راجدوستیں پھنات، انسانی ھکانی گل سی ٹی ڈی ءِ سر ءَ بھتام جنگ ءَ اَنت گوست ءَ ھما وڑ ءَ پاکستانی چیریں ادارھ ءُ پوج ءَ کتگ ھما کار ءَ نی سی ٹی ڈی کنگ ءَ اِنت اے گپ ءِ پدردی ءِ درشان بلوچستان نیشنل پاٹی ءِ رھشون ءُ اسمبلی ءِ باسک سردار اختر مینگل ءَ کتگ –

دو روچ ءَ پیسر سی ٹی ڈی ءَ مستونگ ءِ دمگ کابو ء بیڑے ءِ وھد ءَ چار مردمانی کُشگ ءِ ٹاہ داتگ ات کہ اشانی پجار ھم بیگواھیں مردمانی ناماں بیتگ اَنت کہ پیسر ءَ بیگواہ کنگ بیتگ اَنت ءُ اے گپ ءِ راستی وائس فار بلوچ مسنگ پرسنز ءَ راست کتگ-

اشی ءَ پیسر اکتوبر دوھزار ءُ بیست ءُ دو ءَ سی ٹی ڈی ءَ نصیر آباد ءَ بیڑ ءِ وھد ءَ چار بلوچ آجوئی دوستیں مردمانی کشگ ءِ ٹاہ داتگ ات اے مردمانی پجار ھم پیسر ءَ بیگواہ کنگ بیتگیں مردمانی ناماں بیتگ اَنت جتا جتائیں وھداں آوار جنگ بیتگ اَنت-

اشی ءَ پیسر ھمے سال ءَ جولائی ءَ پاکستانی پوج ءَ زیارت ءِ نزیک ءَ یک دروگیں میڑے ءَ بلوچ لبریشن آرمی ءَ بندوکیں نُھ مردمانی دیم پہ دیمی جنگ ءِ ٹاہ داتگ اَت پد ءَ اشانی پجار ھم پیسر ءَ دزگیری ءِ وھد ءَ زانگ بیتگ ات اَنت-

زیارت وئیل ءِ ھلاپ ءَ بیگواھیں بلوچانی کھولاں پنجاہ روچ ءَ گورنر ھاؤس ءِ دیم ءَ زھرشانی نندانک جتگ ات پد ءَ وفاقی وزیر رانا ثناء اللہ ءِ سدکی ءَ پد شال ءَ ریڈزون ءِ زھرشانی ھلاس کنگ بیتگ ات اود ءَ بیگواھیں مردمانی کھول سدکی دیگ بیتگ اَنت زورانسری آوار جنی بند کنگ ءُ دزگیریں مردماں دروگیں میڑانی نام ءَ نہ کشگ ءِ گپ بیتگ ات-

اے وئیلاں بیگواھیں مردمانی کھولانی ترس گیش بیتگ ءُ ھمے وڑ انسانی ھکانی گل ءُ سیاسی پاٹی سرکار ءِ سر ءَ ایراد گرگ ءَ اَنت-

روکپتی بلوچستان ءِ بنجاھی شھر زاھدان ءَ ایرانی چیریں ادارھاں سَے زالبول آوار جنگ ءَ پد بیگواہ کرتگ اَنت-

گیشیں ھالانی رد ءَ گوستگیں روچ ءَ حضرت مریم وانگجاہ ءَ ایرانی چیریں ادارھاں سَے جنکیں نودربر آوار جتگ ءُ برتگ اَنت-

آوار جنگ بیتگیں جنکانی پجار مریم سالارزئی، معصومہ علیزئی ءُ سیمی گورگیج ءِ ٹک ءَ سیادی بیتگ اَنت-

زانگ بہ بیت گوستگیں روچاں حضرت مریم وانگجاہ ءَ زاھدان ءَ آدینگ ءِ روچ ءَ جنگ بیتگیں مردمانی یات ءَ یک مراگشے برجم دارگ بیتگ چرے مراگش ءَ ایرانی چیریں ادارھانی سر ءَ ایراد گرگ بیتگ-

دمگی مردمانی رد ءَ چریشی ءَ اود ءَ چیریں ادارھانی درگت ءَ آیانی زوراکی ءِ سر ءَ درشانداب دیگ بیتگ اَنت چریشی ءِ پژدر ءَ گوستگیں روچ ءَ سَے جنکیں نودربر آوار جنگ ءُ بیگواہ کنگ بیتگ اَنت-

زانگ بہ بیت روکپتی بلوچستان ءَ آدینگ ءِ روچ ءَ بیتگیں مردمانی کوش ءَ پد روکپتی بلوچستان ءَ بازیں کچے ءَ مردم آوار جنگ بیتگ اَنت کہ آیانی تہ ءَ ورناہ ھوار اَنت –

زانگ بہ بیت چد ءَ پیسر ھم چھبار ءَ پنچ زالبول آوار جنگ بیتگ ات اَنت ءُ پد ءَ آیانی تہ ءَ یکے یل بیتگ ات ءُ آدگہ بندیگ اَنت-

روس ءِ پوجی یک بالیگے کپتگ چریشی ءَ سَے زھگاں ھوار کم چہ کم سیزدہ مردم بیران بیتگ اَنت-

ھبررساں ایجنسی اے ایف پی ءِ رد ءَ سَے شمبے ءِ روچ ءَ روس ءِ وزارت ءَ اژدری ناگتی گشتگ کہ وئیل زربار روکپتی دمگ یاسک ءَ پیش اتکگ-

وزارت ءَ گشتگ کہ’ ریسکیوورکرز وئیل جاہ ءَ سر بیتگ اَنت پٹ ءُ پول سرجم کرتگ سیزدہ مردم بیران ءُ نوزدہ زدگ بیتگ اَنت ‘-

یاسک ءِ اے دمگ یوکرین ءِ ھما دمگانی توک ءَ اِنت سیمسر ءَ گوں بندوک اِنت کہ اود ءَ نندوکیں مردم پیسر ءَ بالیگ ءِ ڈاھوراں ترس آماچ بیتگ اَنت

دمگ ءِ گورنر وینیمین کونڈراتیف ءَ ٹیلی گرام ءَ گوشتگ کہ وئیل ءَ نُھ تبکی ماڑی آس ءَ گپتگ ءُ چریشی ءَ آس رند ءَ توسگ بیتگ –

دمگ ءَ یک مردمے ءَ اے ایف پی ءَ گوں وتی نام نہ گشتگ ءُ ھال داتگ اَنت وئیل ءَ پد دمگ انگیر ءَ کنگ بیتگ ءُ تراکاں ھم توار کتگ ءُ تہ ءَ درست سچگ ءَ بیتگ اَنت ءُ دوت چست بیتگ اَنت-

آئی ءَ گشتگ ات کہ ھال ءِ اشکنگ ءَ ما دگ ءَ رش ءُ کشانی توک ءَ گٹ بیتگ اِنت چریشی ءَ چہ مئے پریشانی گیش بیتگ اَنت منی زھگ ایوک بیتگ اَنت ءُ ما پیسر ءَ یوکرین ءِ شھر ماریوپول ءَ چہ اتکگ اِنت-

مھتری کارگس کریملن ءَ سرکاری نیوز ایجنسی ءَ گوں گوشتگ کہ روسی سروک ولادیمیر پوتن ءَ آس کپگ ءِ ھال داتگ ءُ آئی ءَ ھکم داتگ کہ بالیگ ءِ کپگ ءَ تاوان بیتگیں کھولانی کمک کنگ بہ بیت-