TBP Balochi

سیکرٹری لوکل گورنمنٹ ءَ چیف آفیسر میونسپل کارپوریشن تربت کھدہ عبدالستار دشتی بدل کتگ-

ھالانی تہ ءَ گوشگ بیتگ کھدہ عبدلستار ءَ اسٹیشن ءِ سمبالگ ءَ یک ماھے سرجم نہ بیتگ ءُ آ کشگ بیتگ –

عبدلستار پہ تربت ءِ شھر ءُ کشاں سپائی، درچکانی شوک ءُ سلو کنگ ءَ یک جوانیں آفیسرے لیکگ بیتگ –

تربت ءِ سیاسی ءُ چاگردی پھناتاں یک ایمانداریں آفیسرے ءِ جوانیں کارانی بدل کنگ ایر جتگ ءُ یک سیاسی دلرنجی یے گشتگ-

پہ چاگرد ءَ یک پلگار ءُ ایمانداریں کار کنوکیں آفیسرے چنکس درکار اِنت کہ ھنچش پہ چاگرد ءَ گھبودی ءُ دگہ تکاں کار بہ کنت-

چرے ھاتر ءَ یک ایمانداریں آفیسرے ءِ کشگ ءُ آئی ءَ چہ چاگرد ءِ گھبودی کار ءُ سپائی ءُ دگہ تکاں دور کنگ چاگرد ءِ گندگی ءُ گسڑاں گیش کنگ ءُ پہ چاگرد ءَ یک لیگاری دروشمے ءَ پدر کنت-

ھندوستان ءِ گوستگیں کرکٹر سچن تنڈولکر ءَ وتی پیش گمانی ءَ گوشتگ کہ آسٹریلیا ءَ برجاھیں ٹی ٹونٹی ورلڈکپ ءِ سیمی فائنل ءَ سر بیوکیں ٹیمانی توک ءَ پاکستان ءِ ٹیم ھوار اِنت-

برطانوی روتاک ٹیلی گراف ءِ رد ءَ ھندوستان ءِ گوستگیں کپتان ءِ گوشگ اِنت’ من ھمے لوٹ آں ھندوستان ٹی ٹونٹی چیمپیئن ءِ جوڑ بہ بیت بلے سیمی فائنل ءَ منی چارٹیم اَنت ھندوستان، پاکستان، اسٹریلیا ءُ انگلینڈ ءَ اَنت‘-

آئی ءَ گوشتگ کہ اے ھم زانگ لوٹ ایت نیوزی لینڈ ءُ زرباری افریقہ ءِ ٹیم میگا ایونٹ ءَ ڈالچار کنگ نہ بنت-

سچن تنڈولکر ءِ رد ءَ ’ آسٹریلیا ءَ ھستیں پلینگ کنڈیشنز تچک ءَ ھما رنگ اِنت ھما وڑ ءَ کہ ستمبر ءُ اکتوبر ءَ زرباری افریقہ ءَ بیت اِنت ھمے واستا زرباری افریقہ ءِ کھلھاڑیاں اے وڑیں کنڈیشنز ءِ ھادت اِنت‘-

زانگ بہ بیت پاکستان ءُ ھندوستان ءِ ٹی ٹونٹی ورلڈکپ بیست ءُ سَے اکتوبر ءَ میلبورن کرکٹ گراؤنڈ ءَ دیم پہ دیمی ءَ کاینت-

ھندوستانی کرکٹ ٹیم ءِ درگت ءَ تنڈولکر ءَ گوشتگ کہ مئے ٹیم متوازن ءَ کومبینشن ءِ درچاں شر اِنت من ءَ امیت اِنت کہ مئے ٹیم دیم ءَ روت اِنت-

پاکستان ءُ ھندوستان ءِ ٹیماں ھمے سال ءِ اگست ءَ ایشیا کپ ءَ دو رند ءَ دیم پہ دیمی بیتگ اولی میچ ھندوستان ءَ پنچ وکٹاں کٹ اتگ ءُ دومی میچ پاکستان ءَ پنچ وکٹاں کٹ اتگ –

درانڈیھاں نشتگیں ایرانی سرکار ءِ بگیر داروکیں ٹولیاں روکپتی ڈیھاں لوٹ کتگ کہ آ تھران ءَ زور بہ دنت ءُ سرکار ءِ پروشگ ءَ مھلوک ءِ کمک ءَ بہ کنت-

عرب نیوز ءِ رد ءَ سرکار بگیر داروکیں پاٹیانی ھمسنتین گل (نیشنل کونسل آف ریزسٹنس آف ایران) ءِ باسکاں امریکہ ء بنجاھی شھر واشنگٹن ءَ یک گپ ءُ ترانے ءِ وھد ءَ وتی لیکھ درشان کنان ءَ گوشتگ کہ روکپتی ڈیھ ایرانی سپارت ھانھاں بند کنگ ءِ ھال ءَ شنگ بہ کن اَنت ءُ سرکار ءِ سر ءَ بندش بہ جن اَنت-

ایران ءَ زھرشانیانی درچ کساس ھشت ھپتگاں پیسر برکہ ءِ سر ءَ نہ کنگ ءِ سر ءَ مھسا امینی پولیس ءِ دزگیر جاہ ءَ بیران بیگ ءَ پد بندات بیتگ ات اَنت-

زالبول ءِ مرگ ءَ چہ ھمے پدر بیت اِنت کہ پولیس ءِ لٹ ءُ کُٹ ءَ بیران بیتگ بلے داں انگت ءَ ایرانی سرکار یکشل ءَ منگ ءَ نہ اِنت –

زانگ بہ بیت ایران ءِ سر ءَ سال نوزدہ سد ءُ ھپتاد ءُ نُھ ءَ آشوب ءَ پد نیکراھی اسٹیبلشمنٹ ءِ سرکار یکشل ءَ کنان ءُ پیداک اِنت چریشی ءَ پد زالبولانی سر ءَ بندش جنگ بیتگ ءُ سرکار ءِ نیمگ ءَ زالبول برکہ ءُ وتی دیم ءَ پردگ بہ کن اَنت-

نیشنل کونسل آف ریزسٹنس ایران (این سی آر آئی) ءَ امریکہ ءِ نمائندگ سونا سامسائی ءَ گوں گپ کنان ءَ گوشتگ کہ گوست ءِ زھرشانیاں چہ اے زھرشانی جتا اِنت کہ اشی ءِ سروکی ءَ ھجگیں جنک کنگ ءُ سرکار ءِ پروشگ ءِ لوٹ ءَ کنگ ءَ اَنت- ’ایران ءَ اے وھد ءَ ھرچی بیگ ءَ اِنت کہ اشی ءِ توک ءَ یک آشوبے گندگ ءَ ایگ اِنت-

آئی ءَ امریکہ ءُ یورپی یونین ءَ چہ لوٹ کتگ کہ آ ایران ءِ جمھوری آشوب ءِ پلامرزی ءَ بہ کنت-

زانگ بہ بیت ھمے ماہ ءَ امریکہ ءِ سروک جوبائیڈن ءَ چہ ایران ءَ انسانی ھکانی شرپ ءُ امریکہ ایران ءِ مھلوک ءُ زالبولانی گون ءَ اوشتوک اِنت-

مھتر جوبائیڈن ءَ گوشتگ کہ ’دھکے ءَ چہ ایران ءِ سرکار بنکی آجوئی ءَ نہ منگ ءُ لٹ ءُ کُٹانی سر ءَ مھلوک ءَ ایرموش کنگ لوٹگ اِنت-

دومی نیمگ ءَ ایرانی سروک ابراھیم رئیسی ءَ امریکہ ءِ سر ءَ بھتام جتگ ءُ گوشتگ کہ آ انسانی ھکانی بھانگ ءَ ایرانی سرکار ءِ ھلاپ ءَ شیتانی ءُ ایرانی چاگرد ءَ بھر ءُ بانگ کنگ ءِ جھد ءَ اِنت-

دومی نیمگ ءَ این سی آر آئی ءِ ڈپٹی ڈائریکٹر علی رضا جعفر زادہ ءَ گوشتگ کہ ایران ءِ پاسداران انکلاب اے وھد ءَ جھد ءَ اِنت زھرشانیاں کجام نا کجام رنگ ءَ بہ دار ایت ءُ شنگ ءُ شانگی ءَ داشت بہ کنت-

آئی ءَ گوشتگ کہ مارا ھال سر بیتگ کہ لس پوشاکی گداں پاسداران انکلاب ءِ کارندہ زھرشانی کنوکاں لٹ ءُ کٹ کنف ءَ اَنت-

آئی ءَ دیمتر ءَ گشتگ آ زھرشانی کنوکانی سراں نشانگ کنت آیانی دگہ جاھاں جنت دانکہ آ زھرشانیاں بھر مہ زور اَنت-

علی رضا جعفرزادہ ءَ گوشتگ کہ ایرانی کارندھاں بدنام زمانہ اوین جیل ءَ سرکار ءِ ھلاپ ءَ زھرشانی کنوکانی ھلاپ ءَ بازیں کیدی کشتگ انت-

زانگ بہ بیت پانزدہ اکتوبر دوھزار ءُ بیست ءُ دو ءَ سپریم لیڈر ءِ سیکورٹی ءِ پاسداران انکلاب ءِ گچنیانی جیل ءِ سر ءَ اُرش کتگ چل کیدی کشگ بیتگ اَنت ءُ لھتے کیدی چھت ءَ دور دیگ بیتگ اَنت-

دومی نیمگ ءَ یک ھالے ءِ رد ءَ ایرانی سرکار ءِ باسکے ءَ گشتگ جیل ءَ آس ءِ لگگ ءِ سبب ءَ جیلی دوتاں دمتوس کتگ اَنت-

بلوچستان ءِ ضلع کیچ ءَ ناشناسیں سلاہ بندیں مردماں کنسٹریکشن شرکت سر ءَ اُرش کتگ ءُ سرجمیں مشینری ءُ گاڑی مانداشتگ اَنت- وھدے کہ تربت ءَ ناشناسیں مردماں پوج سر ءَ دستبمب اُرشے کتگ-

کنسٹریکش شرکت سر ءَ اُرش ضلع کیچ ءِ دمگ دشت پیرانی بست ھند ءَ بیتگ-

دمگی اِھوالکارانی رِد ءَ اُرش ھما وھد ءَ کنگ بیتگ وھدے کہ اے شرکت دگ جوڑ کنگ ءَ بیتگ-

زانگ بہ بیت اے دمگ ءَ آجوئی لوٹوکیں گل پُرکار اَنت اشی ءَ ساری ھم آجوئی لوٹوکاں کنسٹریکشن شرکتانی سر ءَ اُرش کتگ بلے مرچگیں اُرش زمہ واری انگت ھچ گل ءَ نہ زرتگ-

دومی نیمگ ءَ تربت ءَ ھال سر بیتگ کہ ناشناسیں مردماں پاکستانی پوج دستبمب ءَ گوں نشانگ کتگ-

اِھوالکارانی رِد ءَ اے اُرش ءَ پوج ءَ جانی تاوان چست کنگ کپتگ بلے واکدار ءِ اے درگت ءَ درشان دیم ءَ نیتکگ-

بلوچ لبریشن آرمی ءِ جارکش جیئندبلوچ ءَ رسانکدراں شنگ کُتگیں درشانے تہءَ گُشتگ کہ مئے سرمچاراں زامران ءِ دمگ تگران ءَ پاچن کوْر ءِ ھند ءَ قوضہ گیریں پاکستانی پوجءِ یک پوسٹ ءِ مزنیں سلاھاں گوں نشانگ کُتگ۔

جارکش ءَ گُشتگ کہ اُرش ءِ آسر ءَ یک کارمند ءِ ھما دمان ءَ مُرتگ وھدیکہ بازیں ٹپی بیتگ اَنت۔ جیئند بلوچ ءَ گُشتگ کہ بلوچ لبریشن آرمی اے اُرش ءِ زمہ واری ءَ من اِیت۔

بلوچ اسٹوڈنٹس پجار ءِ چیردستی ءَ سی ٹی ڈی ءِ دست ءَ زورانسری آوار جنگ بوتگیں ورنایانی کوش ءِ بگیری ءَ بلوچستان ءِ بنجاھی شھر شال ءَ پریس کلب ءِ دیم ءَ زھرشانی کنگ بوتگ –

درنگاز کنوکاں گوستگیں روچ ءَ کاؤنٹر ٹیررازم ڈپارٹمنٹ نیمگ ءَ دورگیں میڑ ءَ کشگ بوتگیں براہوئی زبان ءِ شائر تابش وسیم ء شریف زہری، فرید ء میر عبدالرزاق بادینی، سلال ء حاجی عبدالباقی بادینی، ءُ ھاران ءَ سی ٹی ڈی ءِ دست ءَ کُشگ بوتگیں مردمانی بگیری ءَ وتی زھرشانی نبشتہ کنائینتگ –

زھرشانی ءَ وائس فار بلوچ مسنگ پرسنز ءِ رھشون ءُ دگہ سیاسی نودربر گلانی باسک ھوار بوتگ انت –

زھرشانی تران کنان ءَ آھانی گوشگ ات کہ ریاست ءِ ناشرکاری برجاہ انت بلوچستان ءَ ھمک روچ مردمانی کشت ءُ.کوش ءِ درچ یکشل ءَ برجاہ انت – بلوچستان ءِ تہ ءَ کانود ءُ آمیدگس بے سوب بوتگ انت بلوچ ءِ چکچینی ءَ ریاستی مشینری تیزی ءَ گوں کار کنگ ءَ انت –

آھانی گوشگ ات کہ گوستگیں روچ ءَ سی ٹی ڈی دروگیں میڑ ءَ ھما مردمانی کوش ءِ ٹاہ داتگ کہ آھانی تہ فرید ء میر عبدالرزاق نوشکی بیست ءُ ھشت ستمبر ءَ چہ شال ءَ زورانسری آوار جنگ بوتگ سلال ء عبدالباقی کہ نوشکی ءِ جھمنند انت ھمے سال ءِ شش اکتوبر ءَ چہ شال بروری دگ ءَ ریلوے کالونی ءَ چہ جندے گس ءَ آوار جنگ بوتگ ھمے وڈ زھری ھزدار ءِ جھمنند تابش وسیم نُھ جون دوھزار بیست ءُ یک ءَ آوار جنگ بوتگ –

پوج ءَ اے ورنا بازیں وھدے ءَ وتی بندیگ جاھاں بند کتگ ءُ بازیں ازیت دیگ ءَ پد کُشتگ ءُ جون چگل داتگ انت نوں ٹاپار جنگ ءَ انت کہ آھاں سلاہ بندیں گلانی باسک جتگ انت کہ سرا سر دروگ انت –

بی ایس او پجار ءِ رھشونانی گوشگ ات کہ ورنائیں شائر وسیم تابس آھانی پاٹی ءِ باسک ءِ بوتگ آئی ءَ اُتل ءَ گل ءِ زمہ واری پیلو کتگ انت – تابش وسیم ءُ ایندگہ ورنایانی کوش بلوچ نودربرانی جھد ءِ بگیری ءَ ریاستی شوربندیانی درچ یے گل ءِ سنگتانی دیمھونی شموشکار نہ بنت –

ھمے وھد ءَ بی ایس او پجار ءِ سرکماش زبیر بلوچ ءِ گوشگ ات کہ تابش وسیم وتی پت ءِ دیم ءَ روچ رھمانی آوار جنگ بوتگ ءُ تابش وسیم ءِ آوار جنی ءِ بگیری ءَ سرجمیں بلوچستان ءَ زھرشانی کنگ بوتگ بلے ھبدہ سالاں پد آئی ءَ کشگ ءُ چگل دیگ ءُ دیم پہ دیمی میڑے نام دیگ مسکراہ ءَ کمتر نہ انت – ما پہ کشگ ھلاس نہ بئیں مئے گپ اشکنگی انت –

دومی نیمگ ءَ بلوچ یکجھتی کمیٹی ءَ وتی شنگ کرتگیں جار ءِ تہ ءَ گوشتگ کہ نشتر نادراھجاہ ءَ دست کپتگیں ژانگولیں جون، نوشکی ءُ مستونگ ءِ دروگیں میڑے بگیری ءَ شال بروری دگ بی ایم سی ءَ بگر تاں ہاکی چار راہ ءَ روانک ءِ کشگ بیت – جار ءِ تہ ءَ مردماں گوں بھر زورگ ءِ دزبندی کنگ بوتگ ءُ ھمے گوشتگ کہ اے زوراکیانی بگیری ءَ راجی مزاھمت ءِ ھمراہ داری ءَ بہ کن انت ءُ روانک ءَ بھر بہ زور انت –

سر بیتگیں ھالانی رد ءَ میناب ءَ ھواریں دمگ کوھستک ءِ زر ءَ ایرانی زری لشکر یک تیل بروکیں کاھکے ءِ رند ءَ کپتگ ءُ چریشی ءَ چہ یک مردمے بیران بیتگ-

بیران بیتگیں مردم ءِ پجار میرزا ملائی ء جمایت جھمنند کرگان بندزرک میناب ءِ نام ءَ زانگ بیتگ-

ھالانی تہ ءَ گوشگ بیتگ کہ آئی ءِ کاھک ءِ سر ءَ زری لشکر رند ءَ کپتگ ءُ چریشی ءَ آئی ءَ وتی رکینگ ءِ جھد کتگ بلے ھمے میان ءَ کاھک ءَ چولاں گوں ٹکر وارتگ ءُ چریشی ءَ چہ آ بیران بیتگ-

ھالانی تہ ءَ گوشگ بیتگ کہ چریشی ءَ پیسر ھم چوشیں وئیل پیش اتکگ اَنت ءُ چریشی ءَ چہ یک مردمے بیران بیتگ –

ھالانی رد ءَ اد ءَ مھلوک پہ لاپ ءَ تیل کشی کنت ءُ وتی لاپ ءِ گزران ءَ کنت بلے اے وڑین گزرانی زند ءَ آسری ءَ نیلگ ءَ اَنت-

بلوچستان ءِ ضلع کیچ ءِ دمگ زامران ، تگران ءَ پاکستانی پوج ءَ یک پوسٹے نشانگ کتگ-

دمگی اِھوالکارانی رِد ءَ ناشناسیں مردماں پوج ءِ پانگس سر ءَ پچین کور ءِ ھند ءَ نشانگ کنگ بیتگ- ھمے وھد ءَ تاں دیراں تیرگواری ءِ توار اش کنگ بیتگ وھدے کہ اُرش ءَ پد اُرشکار تتکگ اَنت-

اُرش ءَ پد پوج ءِ گیشیں کارندہ دمگ ءَ سر بیتگ اَنت بلے واکدار ءَ تاوانانی درگت ءَ درشان دیم ءَ نیتکگ-

اے دمگ ءَ بلوچ آجوئی لوٹوک پُرکار اَنت- اشی ءَ ساری ھم پوج سر ءَ ٹوھیں اُرش بیتگ اَنت ءُ جانی تاوان چست کنگ ھم کپتگ – اے اُرش زمہ واری انگت ھچ گل ءَ نہ زرتگ-

نبشتانک: کوٹی نمبر 04

نبشتہ کار: سراج بلوچ

دی بلوچستان پوسٹ

ماہ ءِ رژنائی ءَ داں تیوگیں میتگ سر ءَ زُرتگ اَت، شپ سک ءَ باز رژنا اَت پرچا کہ ماہ ءَ را شپ دوازدہ اَت آزمان ءِ دیم ءَ جمبر اَنچو سپر کنان اَت انت کہ برے ماہ چیر تَرگ ءَ اَت ءُ برے بْراھدار بوگ ءَ اَت اے میتگ ءَ ھر کس ءَ را زندے جاورانی جیڑہ ءُ جنجالاں سک باز اَڑینتگ اَت ھر کس ءَ را جیڑہ ھست اَت، کسے پہ ھستی ءَ جیڑگ ءَ اَت کسے پہ نیستی ءَ جیڑگ ءَ اَت بلے نیستی پہ ھستی ءَ بہ سیر نہ بوت ھمے پیم ءَ کوٹی نمبر چارے مردم ھم ھمے جاورانی آماچ اَت انت۔

اے وشیں ساچانی شپ ءَ اسلم گوں وتی کماش ءَ ڈن ءَ وپتگ اَت، داں اسلم ءَ ڈن ءَ چِڑکّہ ءِ توار اِش کت اسلم دلترک بوت، نہ زانتے چے بہ کناں ۔ وھدے گیٹے دپ ءَ چڑکہ گیش بوت انت گڑا اسلم ءَ پہ گنوکی وتی پِت توار جت، “اَبا او اَبا پادا گیٹ ءَ یکے ٹُکگ ءَ انت”۔ تھت ءِ سرے وپتگیں مردے رش اِسپیت اَت اَنت سرین ئِے چوٹ اَت چم اے کنڈ ءَ شُتگ ءَ داں عمرے کساس ھپتاد سال اَت گوات ریشانی لُڈینگ ءَ اَت ءُ ماہ ءِ روژنائی پہ آئی ءَ مھربان اَت ءُ زمین ءِ وش بوئی آئی ءِ روہ ءَ گوں ھوار اَت انچو گُمان بوت کہ کرنے بیت واب اِنت۔

ھمے گپانی تھ ءَ تیراں توار کُت ءُ پت چہ واب ءَ گُڈ اِت، اسلم ءَ وتی پِت ءَ را گُشت “ابا لھتے مردم گیٹ ءِ دپ ءَ اُشتاتگ ءُ تیر گواری کنگ ءَ اَنت”۔ پیریں پت ءَ وتی لٹ چست کُت ءُ شُت کوٹی نمبر چار ءِ دیم ءَ اُشتات ءُ اسلم ءَ گشت ءِ “منی چُک تو برو سئیں کوٹیاں کُبل کن ءُ پد ءَ برو کوٹی نمبر چار ءِ تھ ءَ دپ ءَ تھ ءَ بند کن” اسلم تَچان ءَ شُت سئیں کوٹی کُبل کُت اَنت ءُ شُت کوٹی نمبر چار ءِ تھ ءَ ساھتے نہ گواست کہ تیر چو ھور ءَ گوارگ ءَ لگ اِت اَنت، ڈن ءَ کُکّار اَت کہ “کوٹی نمبر چار ءَ پٹ ءِ”۔ اسلم کوٹی اے کُنڈے ءَ زوکُڈیتگ اَت سر ءِ ھید گردن ءَ اتکگ ءَ ات انت۔ چمے دروازگ ءَ سک ات انت انچو گُمان بوت کَہ کوٹی تنک اَت پہ اسلم ءَ اسلم جیڑگ ءَ اَت کہ اے چونیں مردماں چہ کُجاہ اتکگ اَنت ءُ پرچا منی کوٹی ءِ دُمب ءَ کپتگ اَنت گون ھمے ھیالاں اسلم اے گوشاں یک آوازے کپت، یک مردمے گُشگ ءَ اَت کہ “اسلم کوٹی نمبر چار ءِ تھ ءَ اِنت ءُ آ کوٹی رودراتکی نیمگ ءَ اِنت”۔ گوں ھمے گپ ءَ تیرانی آواز بند بوت چٹ ءَ ھاموشی بوت۔

استال کپتُوکی ءِ پانگّی ءَ شُت اَنت ماہ گوں جمبر ءَ سر ءُ لینڈ اَت ءُ گوات پہ کاسدی گوست ءُ شُت اے برمشناکین کوٹی سرجم ءَ تھار بوت، اسلم ایوک ءَ کوٹی ءِ تھ ءَ اَت، کوٹی ءِ تھاری ءَ اسلم گیشتر بیم ءِ آماچ بوگ ءَ اَت اسلم اے گپ ءَ ھم شر زانگ ءَ اَت کہ پت دُشمن ءَ جتگ ءُ کوٹی گیرہ کُتگ دیر نہ گوست کہ مردے کُکّار ءَ لگّ ایت ءُ گْوَشت ئِے “اسلم ما زاناں تو کوٹی نمبر چار ءِ تہ ئِے ءُ تو ایوک ءِ”۔ ھمے لشکر ءَ کوٹی گیرا کُتگ ءُ سنگر بستگ اَنت تئی نپے گپ اِش اِنت کے دستگیر بو ءُ کوٹی ءَ ھالیگ کن تو بکشگے اگاں وشین دل ءَ ھالیگ نہ کُت گُڑا تو جَنگ بہ ئے ءُ اے کوٹی کَے تئی پت ءُ پیروکاں چون سنبائنتگ ایشی ءِ وجود ھم گار بیت”۔ اسلم دلترک اَت نہ زانگ ءَ ات چے بکناں، یک نیمگے ءَ ھزاراں واھشت ءَ گون ھڈ داتگین کوٹی دومی نیمگ ءَ زند اسلم نوں زند ءُ کوٹی ءِ نیام ءَ پسسیتگ اَت۔

وھد گوزان اَت لشکر سنگراں گیش کنان اَت توپ ءُ ٹینکانی دیم گون کوٹی نمبر چار ءَ ات اسلم ءَ زوت گُڈّی پیسلہ زورگی اَت کوٹی یا زند، بلے اے تھاریں کوٹی ءَ اسلم مایوس کُتّگ اَت ءُ دستگیرے ءِ گیشتر ھک ءَ اَت اسلم ءَ ایوک ءَ اے گپ ءَ داشتگ اَت کے منی پُشت ءَ اے کوٹی ھم روت گوں دُشمن اے کوٹی ءِ سر ءَ راج کنت ھما کوٹی کہ آئی ءَ تھ ءَ منی پِت ءُ پیروک رُستگ ءُ مزن بوتگ اَنت من زندگی کُتگ ھزاراں سال ما اِد ءَ زندگی کُتگ مرچی کے درامدے بیت ءُ کوٹی ءَ دستگیر بکن من وتی مزنیناں چے دیم پیش بیداراں منی پِت ءُ پیروکاں اے کوٹی ءِ رکینگ ءِ واست ءَ وتی ھون ریتکگ اَنت چو چوں من دُشمن ءَ وشیں دل ءَ وتی کوٹی ءَ دات کناں گون ھمے جیڑگ ءَ اسلم کُکّار ءَ لگ ایت ءُ گُشت ئِے “من لگورے نیاں من جنگ کناں وتی کوٹی ءَ نہ دیاں” اسلم اے گپ دُشمن ءِ گوشاں کپتاں ءُ پد ءَ تیرانی آواز بِندات بوت سرجمین سنگر سلاہ بند ءَ ات انت تیر چو ھور ءَ گوارگ ءَ ات انت۔

تھاریں کوٹی ءِ بیم ءُ تیرانی توار ءَ اسلم ءِ دل جت زندے وشی آئی ءِ دیم ءَ زاھر بوت اَنت اسلم ءَ نوں گُمان بوت کے من نوں درامداں اے کوٹی ءِ تھ ءَ بلے اسلم ءَ ھچ ھکل نہ کُت کے ات من برواں دُشمن ءَ بُگُشاں اے منی کوٹی اِنت تو کہ اے کُجا چے اتکگے تئی پجار چے اِنت من چہ کرناں اِد ءَ آباداں، بلے اسلم زندگیں واھشتانی دیم ءَ یک مُرتگین مردے اَت اسلم ءَ گُڈّی پیسلہ زُرت کہ من دستگیر باں کوٹی ءِ تھ ءَ ننداں ءُ دُشمن ءِ گلام باں۔ اسلم دروازگ دیم پہ دیم کُتگ اَت ءُ اُشتاتگ اَت وھد روان اَت تیر ءُ توپاں کوٹی نِزور کُتگ اَت ماہ چہ جمبر ءَ درایگ ءَ اَت ءُ آئی ءِ روژن کوٹی ءِ تہ ءَ کپگ ءَ اَت ءُ کوٹی برمشگ ءَ لگ ایت آ اولی رند اَت کہ اتک تھاریں کوٹی ءِ تھ ءَ اسلم وتارا دیست ءُ پد ءَ آئی ءِ چم سنگراں کپت اَنت۔ سنگر لگور ءَ پُر ءَ ات انت ءُ ٹینک ءُ توپ اسلم ءِ چم ءَ لیبو ءَ ات انت اسلم بچکندگ ءَ لگ ایت ءُ پد ءَ چمے ماہ ءَ سک دات اَنت ماہ وت ءَ آزاد کنگ ءَ ات چہ جمبراں ءُ پد ءَ اسلم ءَ گلگ کت شپ انچو نیاتک کے ات تو منی چم جت اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچی زبان ءِ ورنائیں رجانکار ھلیل بلوچ ءِ رجانک کتگیں ریزمانکانی کتاب “سریچگ “چہ عنقا پبلیکیشنز شال ءِ نیمگ ءَ شنگ ءُ تالان بیتگ-

اے کتاب براھوئی زبان ءَ ماں بلوچی ءَ ھلیل بلوچ ءَ ترینتگ ءُ پہ وانوکاں سوگات کتگ-

اے کتاب غموار حیات ءَ براھوئی زبان ءَ زند ءُ ھیالانی سر ءَ نبشتگ کرتگ ءُ پد ءَ آئی ءِ گچین کنگ ءَ پد ھلیل بلوچ ءَ پہ بلوچی زبان ءِ وانوکاں ترینتگ-

بلوچ لبزانکارانی تکانی گوشگ اِنت کہ اگاں رجانک ءِ سر ءَ کار بہ بیت گڑا دری لبزانک ءُ زبان ءَ بلوچ پھناتاں بازیں سرپدی رس اَنت-