بلوچستان ءِ بُنجاھی شَھر چہ شال ءَ چار ورناہ ءِ زورانسری بیگواھی ءِ ھال دیم اتکگ انت۔
سربیتگیں ھالانی رد ءَ سریاب مل عوامی پمپ شال ءِ جھمنندیں 23 سالی ئیں مھمد اِمران ء ابدُالگپور کہ یک عدالتی کلرکے 12 نومبر 2026 ءِ بیگاہ پنچ بج ءَ چہ سریاب روڈ کوئٹہ ءَ آئی ایس آئی ءُ پولیس ءِ کارمنداں دزگیر کنگ ءَ پَد زورانسری بیگواہ کتگ۔
ھمے وڑ 23 سالی ایں مھاز بلوچ ء ھاجی ابدالجبار کہ قمبرانی روڈ شال ءِ جھمنند ءُ سکیورٹی گارڈ ءِ کار ءَ اِنت کہ 9 نومبر 2026 ءِ نیم روچ سئے بج ءَ شال بازار ءَ چہ آئی ایس آئی ءُ سی ٹی ڈی ءِ کارمنداں دزگیر کتگ ءُ چیریں جاھاں بُرتگ۔
کلی جیو، شاہ جی چوک شال ءِ جھمنندیں 18 سالی ئیں نودربر دینار بلوچ ء علی نواز سینزدہ نومبر 2026 ءِ بیگاہ ساھت چار بج ءَ چہ جند ءِ گِس ءَ ایم آئی ءُ سی ٹی ڈی کارمنداں دزگیر کنگ ءَ پد زورانسری بیگواہ کتگ۔
ھمے داب ءَ ضلع کچھی (بولان) ءِ ھند مَچ ءِ جھمنندیں 29سالی ئیں کبیر بلوچ ء عبدالغنی شانزدہ اکتوبر 2026 ءِ سُھب ءِ پنچ بج ءَ چہ کلی پیر صاحب، کسٹم سریاب روڈ کوئٹہ ءَ آئی ایس آئی ءُ ایم آئی ءِ کارمنداں دزگیر کنگ ءَ پد چیریں جاھاں بُرتگ۔
چاریں ورناھانی بابت ءَ انگت ءَ آیانی کھولاں آیانی ھست ءُ سلامتی ءِ ھچ وڑیں سرپدی دیگ نہ بیتگ انت، چریشی آسر ءَکھول سک ءَ گم ءُ رنجانی دیمپان انت۔