TBP Balochi

اپزل جان ءُ مِکتیار مرید گیرکاینت

نبشتہ کار: شیردل بلوچ

دی بلوچستان پوسٹ

وتن ءُ راج ءِ آجو کنگ ءَ ھون رِیچگ لوٹ اِیت، دگنیا ءِ تہ ءَ ھچ چُشیں راجے نیست کہ ھون رِیچگ ءَ ابید وتی وتواجھی گپتگ، ایوک ءَ یک ڈیھے ھست وابے ءِ پُشت ءَ ٹھینگ بوتگ، پاکستان ءِ نام ءَ زانگ بیت، ھپتاد ءُ پنچ سالے گْوَستگ انگت وتی دستور ءِ سما ئِے نیست، نیکہ جھان ءِ دوداں سرپد اِنت، آئی ءِ ھاکم بے راھبندی ءِ آماچ اَنت، اد ءَ ھمے گپّ پدر بیت، اے ناشریں ڈیھ ءِ ٹھینگ ءِ واستا کربانی دیگ نہ بوتگ، بلکیں پندلے بوتگ ، پمیشکا چُشیں وتگڑیں کارپد گندگ ءَ کاینت، دومی ماوزے تنگ ءِ راج بزان کہ چینز اَنت کہ وتی ڈیھ ءِ ھزاراں شھیدانی رِتکگیں ھوناں لگت داتگ اَنت، چہ وتی گْوَست ءَ شموشکار اَنت، پمیشکا ایردستیں راجاں گوں زوارکی ءَ کنگ ءَ اَنت، زوراک ءِ ھمکار اَنت۔

وھدیکہ ھبر ھون ریچی ءِ بوگ ءَ اِنت، گڑا بلوچاناں ھون نبیس اِتگیں راجدپترے ھست، ھزاراں تمردیں شھیدانی کسھاں سرکیل اِنت کہ پہ لج ءُ ننگ ءُ سرڈگار ءِ رکینگ ءَ راج ءِ آجوئی ءَ وتی کیمتی سراں بکشاتگ اَنت، اگاں ما وتی سرڈگار ءِ شھیدانی شھید بوگ ءِ روچاں بچار ایں سال ءِ دوازدھیں ماھاں ھمُک ماہ ءِ سی ئیں روچاں بازیں شھیدے ءِ یکجاہ شھید بوگ ءِ روچ ھست انت، چہ سرڈگار ءِ نمیرانیں پُسگانی نامانی لڑاں شھید اپزل جان ءُ شھید مُکیتار مرید ءِ نام ھوار اَنت،، دوئیں جاہ آھو (جھاؤ) لنجار ءِ جاہ مَنْند اَنت، اپزل جان BNM جھل جھاؤ ھنکین ءِ ڈپٹی آرگنائزر بوتگ ءُ شھید مُکیتارمرید (BSO ( Azad ءِ باسکے اَت، مُدام ءَ دوئیں گلانی کاراں گیشتر ھوار گَشتگ اِت اَنت، تنزیم سازی بوتگ یا وانگیانی(کتابانی) بھر ءُ بانگ، پنتاک (پمفلٹ) کنگ ءُ دیوال نبیسی ءَ ھوار تر ءُ تاب کرتگ اِش۔

اپزل جان ءِ سر ءَ ھرّوچ پوج ءُ آئی ءِ چانیگواراں پاتراپ راہ داتگ اَت، چہ گل ءِ کاراں دست کش بہ بیت، آئی ءِ پِت ءُ بْرات ءَ پوج ءَ گپتگ ءُ پد ءَ ویل کرتگ اَنت، پد ءَ ھمے پرمان کرتگ شما ” اپزل ءَ بْیار اِت بزان کہ دست ءُ گوش بہ بیت ما آئی ءَ ھچی نہ کن اِیں، بلے! اپزل جان ءَ ھرچ رند ءَ نہ منّ اِتگ، پد ءَ سنگتانی کر ءَ اتکگ دراھیں گپّ جَتگ اَنت، مسکرا ئِے کرتگ، گوشت ءَ پوجیگ نو شَرّ گنوک اَنت من ءَ گوشگ ءَ اَنت بیا من پسہ پہ آیاں راہ داتگ آں، دل ءَ ایکیم بہ کن اِت، من نیایاں، پہ آئی ءِ ٹگلینگ ءَ چہ بی این ایم ءَ گِسر کنگ ءَ ھرچ وڑیں پندل ساز اِتگ اَنت، گس ءِ تہ ءِ مردماں پَرماتگ، چانیگ واراں وتی جُھد باز کرتگ اَت ھر وھد ءَ نامراد بوتگ اَنت۔

شھید اپزل جان ءُ مُکتیار مرید ءِ سر ءَ چنچو وتی ھیالاں دَرشان بہ کنان ءُ آیانی سر ءَ بہ نبیساں منی ھیال ءَ ھچی نہ کرتگوں ، راستی وَ انچش اِنت، تچکیں جُھدکارے ءِ کارست ءِ کسہ ءِ آرگ پہ لبز ءُ گالاں کیل بوت نہ کن اَنت، بے مُلّیں سرانی ساڑایگ ارزان نہ اِنت، ھما ھون پہ آجوئی ءَ رِتکگ اَنت، مُسک ءُ زاپران ءِ بوہ ءَ کن اَنت، وتی راج ءَ زند بکشاینت، وت ابدمان ءُ نمیرانیں اَنت، زندمان ءِ ھرچ ساھتاں گیر آرگ بنت۔

تومشان ءِ روچانی گرمیں برانز چوناھا جان درد ءُ نادراھی دینت، ھمے روچاں شھید اپزل جان ءُ شھید مُکیتار مرید ءِ گستا کنگ بوتگ،اَنت راجی شھیدانی مولم گیشتر نادراہ کن اَنت” دہ سارتان دوھزار پانزدہ (10/10/2015) ءَ شھید اپزل جان ءُ شھید مُکیتار مرید ءِ شھید بوگ ءِ ھپتمی سالروچ اِنت، آیانی یاتگیری ءِ روچ دارگ بیت گیرکاینت۔

شھید اپزل جان ءُ شھید مُکتیار مرید ءَ ھوار سارتان ءُ سرڈگار ءِ دراھیں شھیداناں سھرچکیں دروت ندر کناں ۔

” آجوئی زندگ بات “

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءِ بنجاھی شھر زاھدان ءَ مروچی آدینگ ءِ نماز ءَ پد یک پُرمچیں روانکے کشگ بیتگ، روانک مکی میست ءَ بندات بیتگ ءُ شھر ءِ جتا جتائیں جاھاں تران بیتگ ءُ پولیس ءِ کارگس ءِ دیم ءَ شتگ-

روانک ءَ بازیں کچے ءَ مردماں بھر زرتگ ءُ سرکار ءِ ھلاپ ءَ اوگام جتگ –

روانک ءَ ایرانی سرکار ءِ ھلاپ ءَ اوگام جنان جنان ءَ گوشتگ ’ ھنچش مئے برات کشتگ اَنت مارا ھم بہ کش ات ایرانی بسیج مردگ بات ‘ جتا جتائیں اوگام جتگ اَنت-

زھرشانی کنوکاں آدینگ ءِ روچ یک ھونریچی ءُ سیاھیں روچے ءِ دروشم ءَ نامینگ ءُ آیاں گوشتگ کہ اے روچ پہ ما یک سیاہ ءُ ھونی ئیں روچے کہ ھمے روچ ءَ بازیں کچے ءَ مردم کشگ ءُ زدگ کنگ بیتگ اَنت-

ھمے وڑ ءَ گوستگیں شپ ءَ زاھدان ءِ ھواریں دمگ میرجاوہ ءَ ھم زاھدان ءَ کشگ بیتگیں مردمانی ھلاپ ءَ زھرشانی بیتگ –

زانگ بہ بیت گوستگیں سِی ستمبر ءَ آدینگ ءِ روچ ءَ ایرانی پولیس ءَ زاھرشانی کنوکانی سر ءَ تیرگواری کرتگ ات ءُ چریشی ءَ بازیں کچے ءَ مردم بیران ءُ زدگ بیتگ ات اَنت-

ایرانی سرکار ءَ بیرانی بیتگیں مردمانی کچ نوزد گشتگ ات ءُ زدگ بیتگیں مردمانی کچ سی گشتگ ات بلے سرکاری رپورٹاں پد زاھدان ءَ سر بیتگیں ھالانی رد ءَ بنداتی ءَ پنجاہ ءُ ھشت مردم بیران بیتگ ات ءُ سَے سد ءِ کچ ءَ زدگ بیتگ ات اَنت-

چریشی ءَ پد زدگ بیتگیں مردمانی جاورانی ناگیگی ءَ پد داں انگت ءَ بیران بیتگیں مردمانی کچ نود ءُ ھشت ءَ سر بیتگ اَنت ءُ انگت ءَ بازیں کچے ءَ مردم نادراہ جاہ ءَ تھتیگ اَنت-

زاھدان ءِ وئیل ءَ پد زاھدان ءَ یک ھپتگے ءَ گیش دامگی ھال سرجم ءَ بند کنگ بیتگ ات اَنت ءُ دگہ سیاسی ءُ نیکراھی رھشوناں ھم زاھدان ءِ وئیل ایر جتگ ءُ تچکی ءَ پٹ ءُ پول ءِ لوٹ کتگ-

بلوچستان ءِ جتائیں دمگاں تیرگواری ءُ دگءِ وئیلانی تہءَ دو مردم بیران ءُ بیست ٹپی بیتگ اَنت –

گیشیں ھالانی رِد ءَ نوشکی گزنلی ءَ زمینی جیڑہ ءِ سر ءَ دو ٹولیانی میان ءَ میڑ ءَ تُرندیں تیرگواری ءِ آسر ءَ یک مردمے بیران ءُ دو ٹپی بیتگ اَنت-

ھمے وڑ نوکنڈی ءَ کلی زور آباد ءَ ناشناسیں مردمانی تیرگواری ءَ چہ حاجی سھراب خان نامیں مردمے بیران بیتگ- پولیس ءُ انتزامیہ ءَ لاش نادُراھجاہ ءَ برتگ پہ گیشیں چار ءُ ٹپاس ءَ پد لاش کھول ءَ داتگ، وئیل درگت ءَ انتزامیہ پٹ ءُ پول کنگ ءَ اِنت-

دومی نیمگ ءَ دمگ لسبیلہ ءَ دگ ءِ دو جتائیں وئیلاں نُھ مردم ٹپی بیتگ اَنت –

لسبیلہ ءِ ھنکین کنراج ءِ دمگ گجرو پھٹ ءِ ھند سر ءَ مساپر بس چپ بیتگ چریشی ءِ آسر ءَ ھپت مردم ٹپی بیتگ اَنت کہ آ دھدر پروجیکٹ کنراج ءُ وندر ڈیم گاڑیاں رورل ھیلتھ سینٹر وندر ءَ برتگ اَنت دو سک ٹپی کراچی ءَ برتگ اَنت-

دگہ یک وئیلے وندرءِ نزیک ءَ ناکہ کھارڑی ءِ ھندءَ دیما کہ پرپٹ ءَ دو مردم کپتگ ءُ ٹپی بیتگ اَنت پہ دوا درمان کنگ ھاتر ءَ نادُراھجاہ ءَ برتگ اَنت –

سربوتگیں ھالانی رِد ءَ مروچی آدینگ ءِ روچ ءَ بلوچستان ءِ دمگ مستونگ ءَ بمب تراکے ءَ سَے مردم بیران ءُ شش زدگ بوتگ انت –

گیشیں ھالانی رِد ءَ تراک مستونگ کابو ءَ دمگے ٹکی کاروان ءِ سر ءَ بوتگ ءُ کہ ریموٹ کنٹرول تراکناکیں شورواں گوں کاروان نشانگ کنگ بوتگ چریشی ءَ سَے مردم بیران ءُ شش زدگ بوتگ انت –

بنداتی ھالانی ردءَ مستونگ ءِ ھند کابو ءَ دمگی ٹکی مردم شاہنواز بنگلزئی ءِ کاروان ءِ سر ءَ بمب تراک ءِ بوتگ، چریشی ءَ سَے مردم بیران ءُ شش زدگ بوتگ انت – زدگ ءُ بیران بوتگیں مردم ھما دمان ءَ نزیکیں نادراھجاہ ءَ سر کنگ بوتگ انت –

پوج ءَ وت ءَ وئیل جاہ ءَ سر کتگ ءُ پٹ پول بندات کتگ – ھالانی رِد ءَ گوستگیں شپ ءَ ھمے دمگ ءَ ھمے ٹک ءَ سیادی داروکیں یک مردمے کُشگ بوتگ، دمگی مردم کبرستان ءَ کل ءُ کسارت ءَ پد واتر بوتگ انت کہ نیم راہ ءَ آھانی سر ءَ ریموٹ کنٹرول بمب تراک ءِ کنگ بوتگ –

پھازگی ادارھاں ٹاہ داتگ کہ آھاں بیست ءُ ھشت ستمبر ءَ دنتان کلینک ءِ سرءَ تیرگواری کنوکیں یک مردمے دزگیر کتگ –

ھالانی رِد ءَ تیرگواری ءَ کارمرز بؤکیں پسٹل ھم دستیگ کنگ بوتگ، اھوالکارانی گوشگ انت کہ دزگیر کنگ بوتگیں مردمے سیادی چہ سلاہ بندیں گلے ءَ انت –

آھانی رِد ءَ ایس آر اے ءِ گوشگ ءِ پد ءَ اے کار کنگ بوتگ –

زانگ بہ بیت بیست ءُ ھشت ستمبر ءَ سندھ ءِ مزن شھر کراچی ءَ چہ تیرگواری ءَ یک چینی جھمنند ءِ مُرتگ ءُ دو زدگ بوتگ انت –

مرتگیں چینی جاھمنند ءِ پجار سِی ءُ دو سالی رونلڈ رائمنڈ چاؤ ء جارج چاؤ ءِ نام ءَ چہ بوتگ، وھدیکہ زدگ بوتگیں مردمانی تہ ءَ ریچڈ ءُ مارگریڈ نامیں زالبول ءِ ھوار انت –

اُرش ءِ زمّہ واری نوکیں سندھی سلاہ بندیں گل سندھو دیش پیپلز آرمی ءَ منّ اِتگ ات –

وئیل ءِ درگت ءَ ھما ٹیم ءَ پولیس ءِ گوشگ ات کہ

کہ یک مردمے دنتان ءِ کلینک ءِ اتکگ ءُ نشتگ ءُ بیست ملٹ ءَ تاں آئی ءَ وتی باریگ ءِ ودار کتگ ھنچوش کہ آئی ءِ باریگ اتکگ آئی ءَ ھما دمان تیرگواری کتگ چریشی ءَ یک مردمے مرتگ ءُ دو زدگ بوتگ انت –

اھوالکارانی رِد ءَ تیرگواری ءَ پد اُرشکار پیادگ ءَ تتکگ ءُ دیم پہ جھانگیر پارک ءِ گیٹ نیمگ ءَ کہ اودا آئی ءِ سنگت پیسر ءَ گوں پرپٹ ساڑی بوتگ کہ ھردو تچگ ءُ رؤگ ءَ سوبمند بوتگ انت –

بلوچستان ءِ بُنجاھی شھر شال ءَ وائس فار بلوچ مسنگ پرسنز ءِ زورانسری آوار جنی ءِ بگیری ءَ پریس کلب دیم ءَ زھرشانی ئیں بُنجل ءَ 4790 روچ سرجم بیتگ- مرچی بی ایس او ءِ چیئرمین جھانگیر بلوچ ، وائس چیئرمین عبدالصمد بلوچ ، بالاچ قادر بلوچ ءُ دگہ رھشون اَتکگ ءُ کھول ءَ گوں یکجھتی درشان ءِ کتگ-

گل ءِ وائس چیئرمین ماما قدیر بلوچ ءَ گْوشتگ کہ بے کانودی ءُ کانودی زورانسری آوار جنی وئیل تہ ءَ گیشی آتکگ، وتگڑیں کمیٹی بیگواہ کنگ بیتگیں مردمانی یل کنائینگ ءَ باور کنائینگ ءَ اَبید ھم لاش دزکپگ اَنت –

آئی ءَ گْوشتگ کہ سیاسی مول مراد ھاتر ءَ بلوچستان ءِ نام کارمرز کنگ سیاست کنگ ءَ اَنت مرچی ھم بلوچ ڈیھ ءِ سر ءَ انسانی ھکانی یک ٹوھیں پادمالی یے بوگ ءَ اِنت، ھمکروچ بلوچ راج ءَ لاش دیگ بیگ ءَ اِنت بلوچ پُسگانی دیمونی بے بیھال کنگ نہ بنت ءُ اے درست بلوچ شھیدانی داتگیں دیمونیانی مُز اَنت چریشی ءِ سبب ءَ مروچی جھانی ستہ ءَ بلوچ راج بیوکیں ریاستی زُلم زوراکی ءِ دلپدردی درشان کنگ بیگ ءَ اِنت-

آئی ءَ گْوشتگ کہ زورانسری آوار جنی سرجمیں بلوچستان ءِ یک بلاھیں جیڑھے، گوستگیں روچ ءَ نشتر ھسپتال ءَ دزکپتگیں بے کساس لاشانی برزی ستہ ءَ پٹ ءُ پول کنگ لوٹ اِیت، مارا تُرس اِنت اے بیگواھیں مردمانی لاش اَنت-

بلوچستان ءِ ضلع کیچ ءِ دمگ کولواہ ءَ پاکستانی پوج ءِ نیمگ ءَ چہ لشکر کشی بندات کنگ بیتگ – پیادگ پوجی کارندھانی مزنیں کچے ءَ جتائیں دمگاں پیشگامی کنگ ءَ اَنت-

پوجی لشکر کشی کولواہ ءِ جتائیں دمگاں شاپکول ، کنری ، پارگ، ڈنڈار ءُ دگہ دمگاں کنگ بیگ ءَ اِنت-

دمگی اِھوالکارانی رِد ءَ گوستگیں روچ ءَ چہ جتائیں دمگاں پاکستانی پوج پیشگامی کنگ ءَ اِنت – بلے واکداراں تنی وھدے اے درگت ءَ گیشیں ھال دیم ءَ نیاورتگ-

زانگ بہ بیت بلوچستان ءِ جتائیں دمگاں پوجی لشکر کشی ءِ ھال ھمکروچ دیم ءَ آھگ ءَ اَنت- سیاسی ءُ چاگردی باسک پوج سر ءَ اے لشکر کشی ءَ اُلس میتگاں نشانگ کنگ ءِ بھتام جنگ ءَ اَنت-

ھیومین رائٹس کمیشن آف بلوچستان رپورٹ رِد ءَ پاکستانی پوج ءَ ستمبر ءَ بلوچستان نُھ دمگاں سی ءُ ھشت مردم زورانسری آوار جتگ اَنت – بلے دوازدہ مردم لٹ ءُ کُٹ کتگ اَنت ءُ یل کتگ اَنت وھدے کہ بیست ءُ شش مردم ءِ درگت ءَ انگت ھچ ھال دز نہ کپتگ-

تربت یونیورسٹی ءِ دو نودربر زورانسری آوار جتگ اَنت دگہ چار مردم چی ضلع کیچ ءَ پاکستانی پوج آوار جتگ ءُ بیگواہ کتگ اَنت-

ٹی بی پی ھال پتر ءَ رس اتگیں ھالانی رِد ءَ گوستگیں روچ ءَ پاکستانی پوج ءَ ضلع کیچ ءِ دمگ چہ تربت ءَ یونیورسٹی ءِ دو نودربر آوار جتگ ءُ ناشناسیں جاھے ءَ برتگ اَنت وھدے کہ آ پرپٹ سر ءَ یونیورسٹی ءَ روگ ءَ بیتگ اَنت-

زورانسری آوار جنگ بیتگیں نودربرانی پجّار ستار ء رحیم بخش ءُ حیات ء اسلم جھمنند آبسر تربت ناماں چہ بیتگ اَنت-

ھمے وڑ مرچی چہ ضلع کیچ ءَ چار مردم قمبر ء امید، عزیر ء مولا بخش، اسد ء موسیٰ ءُ انس ء ملابرکت پاکستانی پوج ءَ آوار جتگ ءُ ناشناسیں جاھے ءَ برتگ اَنت-

اے مردمانی درگت ءَ انگت ھچ وڑیں سرپدی نہ رس اِتگ وھدے کہ دمگی واکداراں ھم ھچ وڑیں درشان شنگ نہ کتگ-

پاکستان ءِ پرگینگ پنجاب ءِ شھر ملتان ءِ نشتر نادراھجاہ ءِ چھت ءِ سرءَ بازیں جون دزکپتگ اَنت، جون چہ نشتر نادراھجاہ ءِ ڈیڈ ہاؤس ءِ چھت ءَ دزکپتگ اَنت۔

چاگردی رسانکدراں شنگ بیتگیں عکسانی تہءَ گندگ بیت کہ جون کپتگ اَنت۔ مردمانی گُشگ اِنت کہ دزکپتگیں جونانی کساس پنچ سدءَ گیشتر اِنت وھدیکہ نادراھجاہ ءِ واکداراں اے کساس رد کُتگ۔

دومی نیمگ ءَ بلوچ سیاسی ءُ چاگردی تکانی نیمگ ءَ اے گمان دیما پیداک اِنت کہ اے جون بیگواھیں مردمانی بیت کن اَنت۔

چاگردی رسانکدرانی تندجاہ ٹوئٹر ءِ سرءَ بلوچ اھوالکار کیّا بلوچ ءَ نبشتگ کہ پنچ شمبے ءَ ملتان ءِ نشتر نادراھجاہ ءِ چھت ءِ سرءَ بازیں بے وارثیں جون دزکپتگ اَنت۔ پَٹ ءُ پولی ٹیم پولکاری کنگ ءَ اِنت بلے اے کچ ءَ جون کئے ءَ نادراھجاہ ءَ سرکُتگ اَنت، زاناں ھچ کس ءَ نہ دستگ اَنت؟ نادراھجاہ ءَ زاناں CCTV کیمرہ نیست اَنت؟ بازیں جونانی پُچاں چہ گندگ بیت کہ چُشیں پُچ بلوچ گورءَ کن اَنت۔

وھدیکہ نادراھجاہ ءِ واکدار اے گپاں رد کنگ ءَ اَنت۔ نشتر نادراھجاہ ءِ جارکش ڈاکٹر سجاد ءِ گُشگ اِنت کہ نادراھجاہ ءِ چھت ءِ سرءَ بے وارثیں جونانی کساس چار بیتگ۔ جارکش ءِ ردءَ قدرتی پئیم ءَ ھشک کُتگیں جون نودربرانی وانگ ءِ ھاترءَ بنت۔

دومی نیمگ ءَ بے وارثیں جونانی دزکپگ ءِ سرءَ نادراھجاہ ءِ اناٹومی تک ءِ سروک ءِ لیکہ دیما اتکگ کہ بے وارثیں مردمانی جون پیوری فیکیشن ءِ عمل ءَ چہ گوازینگ بنت ھمے ھاترءَ آ چھتانی سرءَ ایر کنگ بنت۔

پنجاب ءِ سر وزیر ءِ نوٹس گرگ ءَ پد نشتر میڈیکل یونیورسٹی ءِ وائس چانسلر پروفیسر ڈاکٹر مہناز خاکوانی ءَ ھم سئے مردمی پَٹ ءُ پولی کمیٹی ءِ اڈ داتگ کہ اِشی تہءَ ڈاکٹر غلام مصطفیٰ، ڈاکٹر طارق پیرزادہ ءُ پروفیسر ڈاکٹر عباس نقوی ھوار اَنت۔

نشترمیڈیکل یونیورسٹی ءِ جارکش ءِ ردءَ بے وارثیں مردمانی جوناں بندیں کوٹیانی تہءَ چھت ءَ ایر کنگ بیت وھدیکہ وانینگ ءِ لوٹانی ھاترءَ دزگپتگیں ھڈ ھم قانودی کاروائیاں پد زیرگ بنت ءُ جونانی گور کنگ ھما پولیس اسٹیشن ءِ ردءَ کنگ بیت اِنت۔

دومی نیمگ ءَ اَے درشانانی سرءَ ھم بازیں مردم جُست چِست کنگ ءَ اَنت، مردمانی گُشگ اِنت کہ پہ وانینگ ءِ ھاترءَ ھما جون کہ آرگ بنت آیانی تہءَ مردین ءُ جنین دوھینانی جون ھوار بنت بلے ادا تھنا مردینانی جون اَنت۔

زانگ بہ بیت چدو پیسر ھم لاھور ءَ چہ پنجاہ ءَ گیشتر بے وارثیں جون آرگ بیتگ اَنت کہ آیانی پجار نہ بیتگ اَت، چُشیں وئیلانی درگت ءَ بلوچانی لیکہ اِش اِنت کہ اے پئیمیں گیشتریں جون بیگواھیں بلوچانی بنت کہ اشاں پاکستانی لشکر وتی ٹارچر سیلانی تہءَ کُشگ ءَ پد بلوچستان ءَ دیر دور دنت دانکہ آیانی پجار کنگ باوری مہ بیت۔