TBP Balochi

روکپتی بلوچستان ءِ بنجاھی شھر زاھدان ءَ مروچی آدینگ ءِ نماز ءِ وھد ءَ مولوی عبدلحمید بلوچ ءِ دزبندی ءَ مزنیں مھلوکے ءَ بھر زرتگ-

مھلوک زاھدان ءَ ھواریں دمگاں جتا جتائیں جاھاں چہ اتکگ بیتگ اَنت ءُ آیاں بازیں کچے ءَ بھر زرتگ-

آدینگ ءِ نماز ءِ وھد ءَ سی ستمبر ءَ جنگ بیتگیں مردمانی کوش ءِ ھلاپ ءَ اوگام جنگ بیتگ ءُ اھد کنگ بیتگ کہ آ اے کھولانی گون ءَ تچک ءَ ھوار اَنت-

نماز ءَ پد مھلوک روانک ءِ دروشم ءَ مکی مسیت ءَ دیم پہ شھر ءِ دمک ءُ دراں روانک ءِ دروشم ءَ دراتکگ اوگام جنان ءَ شتگ اَنت-

ھمے میان ءَ سکیورٹی پورسز ءَ مھلوک ءِ شنگ ءُ شانگ کنگ ءَ تیرگواری ھم کتگ یک مردمے ءِ زدگ بوگ ءِ ھال اتکگ –

اشی ءَ ھوار ھوار روکپتی بلوچستان ءِ دگہ ھند ءُ دمگاں ھم آدینگ ءِ روچ ءَ نمازانی وھد ءَ زاھدان ءَ جنگ بیتگیں مردمانی ھلاپ ءَ اوگام ءُ انساپ ءِ لوٹ کتگ-

چہ گوستگیں روچ ءَ مولوی عبدالحمید ءِ گوشگ ءِ پد ءَ سرجمیں روکپتی بلوچستان ءِ علما دیناں اے گپ ءِ پلامرزی ءُ روانک ءَ بھر زیرگ ءِ جار جتگ –

چریشی ءِ پژدر ءَ چہ روکپتی بلوچستان ءِ بنجاھی شھر زاھدان ءَ بازیں کچے ءَ پوجی سر ءُ مانسر گیش بیتگ اَنت-

زانگ بہ بیت سی ستمبر ءَ یک ھونریچیں زھرشانی ءَ چہ بازیں کچے ءَ مردم کشگ بیتگ ات اَنت ءُ چریشی ءَ چہ پد ھمک آدینگ ھونریچیں روچے ءِ ھساب ءَ دارگ بوگ ءَ اِنت-

میان اُستمان ءَ گشتگ فلسطینی سرڈگار ءِ سر ءَ اسرائیل ءِ زورگر ’گیر کانونی یے ءُ فلسطینانی ھک ءُ آجوئی ءَ پیش گمان ھلاس بوگی اِنت‘-

عرب نیوز ءِ رد ءَ پشمبے ءَ شنگ بیتگیں میان اُستمان ءِ یک رپورٹے ءِ رد ءَ فلسطین ءِ سرڈگار ءَ یک آبادکاری کالونیلے ازم ءَ چہ جتا گشت نہ کن ایں –

رپورٹ ءِ رد ءَ 1967 ءَ زیردستیں فلسطینی دمگاں انسانی ھکانی جاورھالانی سر ءَ میان اُستمان ءِ گچینی نمائندگ فرانسکا البانی ءَ اسرائیلی زورگری ءِ بارو ءَ گپ کنان ءَ گوشتگ کہ اگاں تچک ءَ بہ چاریں گڑا فلسطینی ھنداں آجوئی ءِ بستار ھست ءُ آئی ءَ فلسطینی مھلوک ءِ پلامرزی کتگ-

نیویارک ءَ فارن پریس ایسوسی ایشن ءَ درشانے ءِ میان ءَ گشتگ کہ کانونی اسکالر ءُ انسانی ھکانی زانتکاریں البانی ءَ گوشتگ کہ اے رپورٹ تچک اِنت ءُ میان اُستمانی کانون ءِ توک ءَ یک گچینی رنگے ءَ چارگ بیت اِنت-

اے رپورٹ ءَ ’یک پیرا ڈائم شفٹ ‘ ءَ لوٹ کنگ بیتگ کہ چریشی ءَ اسرائیل ءُ فلسطین ءِ میان ءَ جیڑہ ھست اَنت گڑا اسرائیل ءِ سر ءَ زورانسری اے گپ منگ کتگ کہ اے جاھاں بہ گپت-

البانی ءَ فلسطین ءِ جیڑہ ءِ سر ءَ میان اُستمانی برادری ءِ سر ءَ ایراد گپتگ-

آئی ءَ گوشتگ کہ مردمانی واستا گندگ مشکل اِنت اے جاھاں پنجاہ ءُ پنچ سال ءِ زورگری ءُ پوج ءِ جاڑیگی ھست اِنت –

فرانسسکا البانی ءَ گوشتگ ’استشنیٰ ‘ کہ اسرائیل ءِ واکداراں دیگ بیتگ گڑا گیشتر روکپتی ڈیھاں داتگ آئی ءَ میان اُستمانی تاکت ءِ نیزور کنگ ءُ آئی ءَ بے سنچیں کردے پیلو کتگ ءُ آوکیں وھداں میان اُستمانی کانون ءِ لگتمالی ءِ پژدر اِنت-

البانی ءَ فلسطینانی زندگی ءِ راستی ءِ منگ ءِ انکاری ءَ روکپتی ڈیھانی سر ءَ ایراد گپتگ-

آئی ءَ گوشتگ کہ اسرائیل ءِ زورگری ءُ گامگیجی پلامرزی ءَ روکپتی ڈیھانی رویش ھما براتویے وڑ ءَ بیتگ ءُ وتمانی دوستی یے گشتگ-

داں انگت ءَ آ تاکت ور اِنت ءُ زورگری ءَ گیش ھونریچی کت کنت البانی ءَ گشتگ کہ اے ھروھدی ءَ سوبمند بوت نہ کنت ءُ من ءَ یکین اِنت یک روچے ھلاس بیت اِنت-

سر بیتگیں ھالانی رد ءَ بلوچستان ءِ دمگ کیچ ءِ بنجاھی شھر تربت ءَ گورنمنٹ گرلز ماڈل اسکول تربت ءِ نودربراں زھرشانی کنان ءَ دگ بند کتگ-

زھرشانی ءَ آیاں گوشتگ کہ بس ءَ تیل ءِ نہ بوگ ءِ سر ءَ بس اوشتارینگ بیتگ ءُ چریشی ءَ چہ مارا دور دور ءَ سپر کنگ کپ ایت –

آیاں گوشتگ کہ ما ھمک ما زر دیگ ءَ اِنت ءُ اشی ءَ ھم اسکول ءِ انتزامیہ گوشگ اِنت بس ءَ تیل نیست اِنت ءُ چریشی ءِ سر ءَ ما وتی وانگجاہ ءَ سر بوت نہ کن ایں-

آیاں گوشتگ کہ اد ءَ مزن مزنیں وزیر ءُ گزیر ھست اَنت بلے آیاں مئے وانگ جاہ ءُ مئے وانگ ھچ گندگ ءَ آیگ ءَ نہ اَنت ءُ ما پہ دلسیاھی اد ءَ وتی وانگ ءَ تیلانک دیگ ءَ اِنت-

آیاں چہ وزیر تعلیم ءُ دگہ واکداراں لوٹ کتگ ءُ گوشتگ کہ آ مئے اے آسراتی لوٹاں سرجم بہ کن اَنت-

زھرشانی کنوکاں دگ بند کتگ ءُ زھرشانی ءَ نشتگ اَنت کہ اے زھرشانی ءَ جنکیں نودربر کنگ ءَ اَنت-

ھمے وڑ گوستگیں روچ ءَ ھم آیاں زھرشانی کنان ءَ دگ بند کتگ ءُ پد ءَ انتزامیہ ءَ گپ ءُ تران کتگ ات ءُ دگ پچ کنگ بیتگ اَت بلے مروچی دوبر آ اتکگ اَنت ءُ زھرشانی کنگ ءَ اَنت-

روکپتی بلوچستان ءِ بنجاھی شھع دزاپ ءَ شھدربرجاہ ءِ دیم ءَ گوستگیں بیگاہ ءَ ایرانی لشکر ءَ یک نودربرے آوار جتگ ءُ برتگ-

شنگ بیتگیں تامر بند ءَ گندگ بیت اِنت میڈیکل آف سائنسز ءِ یونیورسٹی ءِ گیٹ ءِ دپ ءَ ایرانی پولیس یک جنکیں نودربرے ءَ دزگیر کنگ ءَ اَنت-

تامر بند ءَ گندگ بیت اِنت آئی ءَ کشان کنگ ءُ گاڑی ءَ سوار کنگ ءَ اَنت چریشی ءَ پد آئی ءَ گون وت بر اَنت-

گرگ بیتگیں نودربر ءِ نام انگت ءَ دیم ءَ نیتکگ بلے گوستگیں سَے روچانی توک ءَ دوازدہ جنک ءُ بچکیں نودربر گرگ بیتگ اَنت ءُ اشانی توک ءَ لھتے یل بیتگ ءُ لھتے انگت بندیگ اَنت-

زانگ بہ بیت زاھدان ءَ سی ستمبر ءَ بیتگیں زھرشانی ءَ لس مردمانی بیرانی ءُ دزگیری بیتگ ات اَنت ءَ چریشی ءَ پد اود ءَ مھلوک ءِ گرگ ءُ بند کنگ ءِ وئیل روچ پہ روچ گیش گندگ ءَ آیگ ءَ اَنت-

ھمے وڑ گوستگیں روچ ءَ مولوی عبدالغفار نقشدبندی ءَ ھم لس مھلوک ءِ دیم ءَ تران کتگ ءُ گوشتگ کہ زاھدان ءِ وئیل ءَ اگاں کسے سرپد بیت ءُ انگت اے ھوناں لگتمال کنت گڑا بزانکہ اے ھونانی کمشرپی ءَ کنگ اِنت-

آئی ءَ گوشتگ کہ ھونانی کمشرپی ءَ چہ مئے دل ءُ لاپاں گیشتر دوری ود اَنت باید اے ھونانء ھساب کنگ بہ بیت اِنت ءُ آیاں زھرشانی ءِ ھک ءَ وتی ھمسنتی ءِ لیکہ درشان کتگ اَنت-

ھمے وڑ گوستگیں روچ ءَ مکی میست ءَ ھم مروچی بزانکہ آدینگ ءِ نماز ءَ پد سرجمیں روکپتی بلوچستان ءِ مردم گوشگ بیتگ اَنت اگاں کجام نیمگ ءَ اَنت زھدان ءِ مردماں گون اَنت یا کشندھاں-

دومی نیمگ ءَ زاھدان ءَ ھم پوجی سر ءُ مانسر گیش بیتگ اَنت اود ءَ گیشیں پوجی شتگ اَنت گوستگیں روچاں شنگ بیتگیں تامراں گندگ بیت اِنت کہ بے کساس ءَ پوجی گاڑی گوں بستگیں سلاھاں زاھدان ءَ سر بوگ ءَ اَنت-

دومی نیمگ ءَ ٹی بی پی ءَ سر بیتگیں ھالانی رد ءَ زاھدان ءِ بازیں راہ ءُ در بندگ بیتگ اَنت گمان ھمے بیگ ءَ اِنت کہ مھلوک زاھدان ءَ ھمددری کنوکاں بھر مہ زور اَنت-

ورنا ءِ زورانسری آوار جنی ءَ ھواریں کشندہ ٹولی ءِ کارمندانی پجار کنائینگ ءَ پد پولیس ءَ دو گوھار دزگیر کتگ انت –

سر بیتگیں ھالانی رد ءَ بلوچستان ءِ دمگ مچ ءَ گوستگیں پانزدہ روچ ءَ پیسر بیگواھیں ودود ساتکزئی ءِ گوھار گلزادی ساتکزئی ءُ آئی ءِ گوھار پولیس ءَ دزگیر کتگ ءُ برتگ اَنت-

ھالانی تہ ءُ گوشگ بیتگ کہ آئی ءِ گوھار ءِ سر ءَ ڈیتھ اسکواڈ ءِ گوشگ ءِ پد ءَ پولیس ءَ کوش ءِ بھتام جتگ ءُ دزگیر کتگ ءُ مچ ءِ جیل ءَ بندیگ کتگ –

ٹی بی پی ءَ سر بیتگیں ھالانی رد ءَ آ گوستگیں پانزدہ روچ ءَ پیسر بلوچستان ءِ دمگ مچ ءَ پولیس ءَ دزگیر کتگ ءُ برتگ ءُ اشی ءَ ھوار ھوار آئی ءِ گوھار ھم دزگیر کنگ ءُ برگ بیتگ-

چہ دمگ ءَ سر یک مردمے ءَ نام ءِ پدر نہ کنگ ءَ گوشتگ کہ ’گلزادی گوں وتی گوھار ءَ بندیگ جاہ ءَ بند اِنت ءُ آئی ءِ گوھار “لاپر “اِنت ءُ اگاں چوشیں وئیلانی سر ءَ زوت ءَ زوت گامگیج زورگ نہ بیت گڑا اے وڑیں وئیل پہ مھلوک ءُ چاگرد ءَ مزنیں اسر دور دات کن اَنت‘-

گلزادی ءِ دزگیری ءِ ھال گوستگیں شپ ءَ ماں چاگردی رسانکجاھاں یک اناگہ ءَ دیم ءُ اتکگ ءُ چریشی ءَ چہ پد گلزادی ءِ دزگیری ءَ ایر جنگ ءُ آئی ءِ یل کنگ ءِ لوٹ ءَ کنگ ءَ اَنت-

زانگ بہ بیت گل زادی ءَ گوستگیں سال ءِ دوازدہ اگست سال دوھزار بیست ءُ یک ءَ زورانسری آوار جنگ بوتگیں وتی برات ودود ساتکزئی ءِ آوار جنی ءَ چیریں ادارھانی ھمراھی ءَ دمگی کشندہ ٹولیانی نام ھم گپتگ ات –

ھما وھد ءَ چہ وائس فار بلوچ مسنگ پرسنز ءِ بنجل ءَ گل زادی ءَ وتی تامری درشان ءِ تہ ءَ گوشتگ ات کہ آئی ءِ برات محمد ودود مچھ کچھی ءَ پوج ءُ چیریں ادارھانی کارمنداں ھما وھد ءَ آوار جتگ ءُ بیگواہ کتگ کہ آ گس ءَ در اتکگ ءُ مسیت ءَ پہ نماز ءِ وانگ ءَ روگ ءَ بوتگ –

ودود ساتکزئی ءِ گھار ءَ گوشتگ کہ دوازدہ اگست دوھزار بیست ءُ یک ءَ منی برات گس ءَ مگرب ءِ نماز ءِ تیاری ءَ بوتگ کہ آئی ءِ سنگت نثار ء اسمائیل شاہ ءَ گِس ءَ چہ لوٹائینتگ ءُ گوں وت برتگ – کمے ھماپُشتر ایف سی ءِ دو گاڑی اوشتوک بوتگ انت ءُ یک ٹوڈی گاڑی ءِ کہ کانچ سیاہ بوتگ ءُ نمبر پلیٹ پر نبوتگ – نثار ءَ گپ گپ ءَ منی برات بُرتگ ءُ ھماھانی گور ءَ سر کُتگ وھدیکہ آ ھماھانی نزیک ءَ شتگ ءُ سر بوتگ انت گڑا لس مردمی پوشاک گوریں کارمنداں منی برات ءِ دیم ءَ پُچ ءِ داتگ ءُ گاڑی تہ ءَ دور داتگ-

ودود ساتکزئی ءِ گھار ءَ گوشتگ ات کہ چوشکہ بلوچستان یک ٹکی دمگ ءِ کس پہ شاہدی دیگ ءِ ھاتر ءَ دیم ءَ نہ ایت ءُ ھمے گوش انت کہ مئے نام ءَ مگر تانکہ باندا چیریں ادارھانی کارمند مارا دلسیاہ مکن انت وھدیکہ ھما وھد وی بی ایم پی ءِ بنجل ءَ ھم نامانی دیگ ءِ ھاتر ءَ آئی ءِ سر ءَ زور دیگ بوتگ ات –

اھوالکار ءِ رِد ءَ گل زادی ءُ آئی ءِ گھار نام ءَ کشندہ ٹولی ءِ کارمندانی گوشگ ءِ پدا ارزی نبشتہ کنگ بوتگ، بلے تنی وھدی اے گپ پدر نہ بوتگ کہ آھانی سر ءَ دگہ چی چی الزام جنگ بوتگ –

زورانسری آوار جنی بگیری ءَ مروچی وڈھ بیگواھیں مردمانی کھولانی نیمگ ءَ چہ یک روانکے کشگ بیتگ کہ آئی ءِ تہ ءَ نودربراں اَبید سیاسی ءُ چاگردی راھشون ءُ جتائیں پڑ مردماں بھر زرتگ-

زھرشانی کنوکاں زھرشانی میان ءَ دست ءَ پلے کارڈ چست کتگ ءُ بیگواھیں مردمانی یل کنائینگ ھاتر ءَ تُرندیں ناراہ جتگ-

زھرشانی ءِ جار ضلع ھُزدار ءِ تھسیل وڈھ ءَ چہ پاکستانی پوج ءِ دست ءَ زورانسری آوار جنی ءِ نشانگ بیتگیں محمد انور مینگل، محمد عالم لھڑی ءُ عبدالحق ءِ کھول نیمگ ءَ چہ بیتگ وھدے کہ اے درگت ءَ ھُزدار ءَ چہ بیگواھیں ثاقب زھری ء مات بیگواھیں آصف ءُ رشید ءِ گھار ءَ ھوار سرجمیں بیگواھیں مردمانی کھول ھوار بیتگ اَنت-

زھرشانی کنوکاں وڈھ انٹر کالج ءَ چہ پریس کلب ءَ تاں روانک کشگ بیتگ اود ءَ آیاں وتی زھرشانی نکش کنائینتگ-

ھمے درگت ءَ تران کنان ءَ زھرشانی کنوکانی گْوشگ اِنت بلوچستان ءَ دْراجیں مدتے ءَ زورانسری آوار جنی ءِ دْرچ اِنت ھُزدار ءِ دمگ مدام اشی ءَ چہ اسرمند اِنت، ھمکروچ مئے مردماں جتائیں جاھاں بیگواہ کنگ ءَ اَنت وھدے کہ اے میان ءَ وڈھ ءِ کش ءُ گوراں چہ بازیں مردمے بیگواہ کنگ بیتگ وھدے کہ اشی ءَ ساری ھم درزنانی ھساب ءَ مردم بیگواہ کنگ بیتگ اَنت-

زھرشانی ءَ ھوار وڈھ ءِ نندوکیں بیگواھیں محمد عالم لھڑی ءِ کھول ءَ گْوشتگ کہ محمد عالم لھڑی چہ اوتھل زیروپوائنٹ ءَ ھپت اکتوبر 2011 ءَ یک مزدا ٹرکے ءَ چہ ایرگپتگ ءُ بیگواہ کتگ- بیگواہ کنگ بیتگیں سنگت ءِ گْوشگ رِد ءَ چست کنوک یک سرف گاڑی یے سر ءَ اَتکگ اَنت ءُ سرکاری پوشاکانی تہ ءَ بیتگ اَنت-

آئی ءَ گْوشتگ کہ محمد عالم ءِ بیگواھی ءِ سبب ءَ لوگ ءِ سرجمیں مردم نپسیاتی نادُراہ جوڑ بوتگ اَنت وھدے کہ بیگواہ کنگ بوتگین ءِ گھار ءُ مات ءَ ھوار کھول ءِ سے مردم کراچی ءِ نادُراھجاہ ءَ الاج کنگ ءَ اَنت بیگواھیں محمد عالم ءِ پت ءِ گْوشگ اِنت کہ ھشت سال ءَ دراجیں مدتے ءِ گْوزگ ءَ پد ھم وتی بچّ ءِ جاور ءَ سرپد نہ ئے در پہ دریں ٹوک ورگ ءَ لاچاراں-

زھرشانی ءَ چہ نوشکی ءَ سے سال ءَ ساری زورانسری آوار جنگ بیتگیں آصف ءُ رشید ءِ گْھار سائرہ ھم ھوار بیتگ کہ آئی ءَ زھرشانی ءِ سروکی کتگ-

سائرہ بلوچ ءَ زھرشانی ءَ تران کنان ءَ گْوشتگ کہ ما ھر ھما کجا جاہ وتی دوستناکانی یل کنائینگ ءِ ھاتر ءَ رو ایں زھرشانی کن ایں کہ اود یک اُمیتے بہ بیت بلے تاں مروچی ھچ وڑیں اُمیت گندگ نئیت وھدے کہ مئے بیگواھیں مردمانی یل کنائینگ وتی جاہ گیش مردم بیگواہ کنگ ءَ اَنت-

زھرشانی مزنیں واکدار ءُ انسانی ھکانی باسکاں چہ بلوچستان ءَ زورانسری آوار جنی ءِ گر ءُ دار بیگواھیں مردمانی یل کنائینگ ءِ لوٹ کتگ-

زھرشانی کنوکاں دیمتر ءَ گْوشتگ کہ اشی ءَ ساری بیگواھیں مردمانی کھولاں شال ءَ گورنر گس دیم ءَ ریڈزون ءَ پنجاہ روچ ءَ تاں وتی دوستناکانی یل کنائینگ ءِ ھاتر ءَ پرایمنی زھرشانی ئیں نندانک جتگ، ما وتی زھرشانی ئیں نندانک ھکومتی وفاقی کمیٹی ءِ باوری ءَ چہ ھلاس کُتگ مئے مردماں یل کنائین اَنت، مروچی اے مُھادہ یک ماھے ءَ چہ گیش اِنت سرجم بیتگ بلے تنی وھدے مئے مردمانی ھچ وڑیں ھال پُرسان نہ رس اِتگ-

بلوچ آجوئی لوٹوکیں رھشون ءُ سلاہ بندیں گل بلوچستان لبریشن فرنٹ ءِ سرکماش ڈاکٹر اللہ نذر بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ کہ پاکستان ءَ بلوچستان ءِ تہ ءَ زوراکی ءُ زورانسری آوار جنیانی تہ ءَ گیشی آرتگ – آئی ءَ گوشتگ کہ پاکستان ءَ بلوچ سرڈگار کوش جاھے ءِ تہ ءَ مَٹ کُتگ، ھمک روچ پوج لشکرکشی ءُ بیڑ برگ انت ءُ بلوچ ورنا تیزی ءَ گوں زورانسری آوار جنگ بوگ ءَ اَنت – چین ءِ وڑیں زوراکیں ڈیھے ءِ کمک ءَ اے برجاھیں چکچینی تیز کنگ بوتگ – وتی بلوچ کُش شوربندی ءِ سرجم کنگ ءَ پاکستان ءَ دولک ءَ گیش پوجی کارمند آرتگ انت کہ بلوچستان ءِ کنڈ کنڈ ءَ ناشرکاری ءَ دلگوش اَنت-

بلوج رھشون ءَ گوشتگ کہ پہ بلوچ راج ءَ نوآبادکاری وانگ ءُ زانگ ءِ در ھم بند کنگ بوگ ءَ اِنت۔ پنجاب ءِ زانشجاھانی تہ ءَ بلوچانی پروفائلنگ ءُ زورانسری آوار جنیانی سوب ءَ نودربر ماژگی دلسیاھی ءِ آماچ اَنت- اے کارانی بوگ ءَ ابید وانگ جاہ ءُ زانشجاھانی واکدارانی بے تواری ءَ مئے گپ راست کُرتگ کہ بلوچ راج سر ءَ بؤکیں زوراکی ءَ پاکستان سول سوسائٹی، رسانکدر ءُ آمیدگساں ھوار دُرسیں ادارہ ھمکوپگ انت –

ڈاکٹر اللہ نذر بلوچ ءَ گوشتگ کہ بلوچ چُکچینی ءُ زوراکی ءَ پارلیمانی پاٹی ھم کمک کنگ ءَ اَنت – پہ بلوچ راج ءَ پارلیمنٹ یک تریاکے جوڑ بوتگ ءُ اے سیاست زانت چہ وتی راجی ھستی ءَ پراموش کُرتگ اَنت کہ پاکستان ءِ نزام ءِ سر ءَ اوست دار انت ءُ اشی ءِ بھر جوڈ بوگ ءَ اَنت – پاکستان چہ ھمیشی ءَ پائدگ زورگ ءَ انت ءُ میان استمان ءَ بلوچ چُکچینی ءُ زورگری ءِ برجاہ دارگ ءَ ھمے نیمون ءَ دیم ءَ ایر کنگ انت – ھمے ھاتر ءَ پہ بلوچ راج ءَ ابید گھگیری ءَ دگہ ھچ راہ نیست، پمشکا بلوچ پُسگ ھر وڑ ءَ گھگیری ءِ بھر جوڑ بہ بنت – اگاں ناں گڑا ما وتی راجی پجار ءَ پھریز اِت نہ کن ایں ءُ چین ءِ کمک ءَ ادا دگہ یک راجے آباد بیت ءُ ما وتی سرڈگار ءِ سر ءَ کمتر پشت کپ ایں-

آئی ءَ گوشتگ کہ اِد ءَ ھمک روچ مردمانی جون دزکپگ ءَ اَنت- لھتیں دمگاں زھرناکیں سلاہ کارمرد کنگ بوگ ءَ اِنت ،بازیں جاھاں چمگانی آپاں زھر مان کنگ بوتگ کہ چریشی ءَ مرگ ءُ نادراھی کپتگ اَنت – ھمے وڑ ءَ سھدار ءُ جنگلی زندمان ءَ ھم تاوان بوتگ – دشت، مند، مشکے، جاؤ ءُ بولان ءَ ھوار بازیں دمگاں پاکستانی پوج ءَ جنگل مانداشتگ انت – جھان ءَ موسُمی مٹی یک مزنیں جیڑھے جوڑ بیتگ ءُ درچک کشگ ءُ جنگلانی آباد کنگ ءِ شوندات ءِ سر ءَ کار کنگ بوگ ءَ اِنت ءُ پاکستان ءِ وڑیں بےسریں ڈیھ جنگلاں ماندارگ ءُ جھان ءِ موسُمی زوال کنگ ءِ کِرد ءَ پیلو کنگ ءَ اِنت –

ڈاکٹر اللہ نزر بلوچ ءَ چہ آجوئی دوستاں دزبندی کناں گوشتگ کہ آ اے ڈیجیٹل ءُ اسٹیلائیٹ دور ءَ آسراتیانی سر ءَ نپ بہ زور اَنت ءُ دُژمن ءِ ڈنڈور کُرتگیں گپانی ھلاس کنگ ءَ بلوچ راجی آجوئی ءِ لیکہ ءَ مُھکم بہ کن اَنت – آجوئی لوٹوک کہ آ ھر کُجام گلے ءَ گوں سیادی دار انت یکے دومی ءِ شرپ ءَ بہ کن اَنت پرچا ءَ کہ مئے منزل یک اِنت – مارا گوں مُھکمی ءَ یکے دومی ءِ ھمراھداری کنگی اِنت ءُ یک بوگی اِنت ءُ پاکستان پسو دیگی اِنت۔ پاکستان ءَ یزیدی پوج ءِ زوراکی ھم گوازینتگ – مارا آ ھمائی ءِ زُبان ءَ پسو دیگی اِنت – مارا بلوچ راج ءِ سر ءَ بیسہ اِنت ءُ راج ءِ کمک ءَ ما وتی پچ گِپتگیں آجوئی ءَ پچ گِریں۔

بلوچستان ءِ بنجاھی شھر شال ءِ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ ھشت سد ءُ سَے روچ سرجم بوتگ انت – مروچی بلوچ وومن فورم ءِ بنجاھی رھشون سلطانہ بلوچ، صبا ایڈوکیٹ ءُ دگہ مردماں بنجل ءِ ترءُتاب کتگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ گوشتگ کہ بلوچ راج ءِ سرڈگار بلوچستان ءَ بیست ھزار ءَ گیچ ژانگولیں جون دست کپتگ انت –

آئی ءَ گوشتگ کہ سپریم کورٹ گوستگیں چیف جسٹس ءَ وتی گوزانکی ھکم ءِ تہ ءَ تچکی ءَ پاکستان ءِ چیریں ادارہ، ڈیت اسکواڈ، ایف سی، بلوچستان ءِ سرکار ءُ وفاقی سرکار گوشتگ انت کہ آ بلوچستان ءَ بلوچانی آوار جنگ ءُ آھانی ژانگولیں جونانی چگل دیگ، ٹارگٹ کلنگ ءِ زمہ وار انت – ھر وڈیں جھمنندے ءِ جان ءُ مال ءِ پھازگ ءِ زمہ واری سرکار ءُ ریاست انت –

ماما قدیر ءَ گوشتگ کہ پاکستان انسانی ھکانی کمیشن بلوچستان ءِ تہ ءَ پھازگی، چیریں ایجنسیانی دست ءَ آوار جنگ بوتگیں ءُ آھانی سر ءَ زوراکی ، انسانی ھکانی لگتمالی ءُ بلوچستان ءِ جاور ھالانی تہ ءَ چدوگیشتر ھرابی پیدا کنگ انت –

آئی ءَ گوشتگ کہ بلوچستان ءِ جیڑو سیاسی جیڑوے آئی ءَ پہ تاکت ءِ زور ءَ چیر ترینگ ءَ ریاست سوبمند نہ بیت اِنت – پاکستان سیاسی باسکانی زورانسری آوار جنی ءَ بند بہ کنت –

بلوچستان ءَ دو روچانی تہءَ پولیو ءِ درمان وارینوکیں ٹیم ءِ سرءَ دو اُرش بیتگ اَنت مروچیگیں اُرش ءَ یک پھازگی لشکرءِ کارندہ ءِ کُشگ بیتگ۔ دومی نیمگ ءَ بلوچستان ءِ دمگ کیچ ءَ پوجی کاروان ءِ سرءَ اُرش ءِ بیتگ۔ ھمے پئیم شال ءَ سیشن کورٹ ءِ دیما تیرگواری ءَ چہ دو مردم بیران بیتگ اَنت وھدیکہ ھشت ٹپی بیتگ اَنت۔

پولیو ءِ درمان وارینوکیں ٹیم ءِ سرءَ مروچیگیں اُرش بلوچستان ءُ اوگانستان ءِ سیمسری شھر چمن ءَ کنگ بیتگ کہ اُرش ءِ آسر ءَ پھازگی ءَ اوشتوکیں لیویز کارندہ حبیب الرحمان ء گل زمان کُشگ بیتگ۔

وئیل ءَ پد پھازگی لشکر وئیل جاہ ءَ سربیتگ اَنت ءُ وئیل درگت ءَ پَٹ ءُ پول اِش بندات کُتگ۔

زانگ بہ بیت کہ دو روچ پیسر ھم پولیو مھم ءِ نیان ءَ پشین ءَ پولیس کانسٹبل تیر گواری ءَ کُشگ بیتگ اَت۔ آ اُرش ءِ زمہ واری تحریک طالبان پاکستان ءَ زرتگ اَت۔

دومی نیمگ ءَ بلوچستان ءِ کیچ دمگ ءَ مروچی سھب ءَ ادار نھ ءَ سلاہ بندیں مردماں پاکستانی لشکریانی کاروان ءِ سرءَ اُرش کُتگ۔

لشکریانی کاروان ناشناسیں مردماں کیچ ءِ ھند بل کوالوہ ءِ ھند ءَ نشانگ کُتگ۔

اھوالانی ردءَ اُرش ءِ تہءَ لشکریاں جانی تاوان ءِ دیمپانی کنگ کپتگ، وھدیکہ اُرش ءَ پد اُرش جاہ ءَ ھیلی کاپٹر ھم گندگ بیتگ اَنت۔

اُرش ءِ درگت ءَ داں انگت ھچ پئیمیں سرکاری لیکہ دیما نئیتکگ، وھدیکہ ھندی اھوالانی ردءَ اَے نیام ءَ ترندیں تراک ءُ تیر گواریانی توار اِش کنگ بیتگ۔

زانگ بہ بیت کہ اے ھندانی تہءَ بلوچ آجوئی لوٹوکیں گل مدام پاکستانی لشکریانی سرءَ اُرشانی زمہ واریاں زیر اَنت وھدیکہ مروچیگیں اُرش ءِ زمہ واری ھچ گل ءَ نہ زرتگ۔

دگہ یک وئیل ءِ شال ءَ سیشن کورٹ ءِ ڈن ءَ دیما اَتکگ کہ تیر گواری ءِ آسر ءَ دو مردم بیران بیتگ اَنت وھدیکہ ھشت ٹپی بیتگ اَنت۔

سربیتگیں ھالانی ردءَ بلوچستان ءِ بنجاھی شھر شال ءَ سیشن کورٹ ءِ دیما تیر گواری ءِ آسر ءَ سردار نسیم ترین گوں ھمراھاں ٹپی بیتگ۔

اھوالانی ردءَ سردار نسیم انچش چہ پیشی ءَ واتر سیشن کورٹ ءَ درکپگ ءَ بیتگ گُڑءَ آئی سرءَ کرولا گاڑی ءَ سواریں سلاہ بندیں مردماں تیر گواری کُتگ۔ پولیس ءِ ردءَ تیر گواری ءِ آسر ءِ دو مردم ھما دمان ءَ بیران بیتگ اَنت، وھدیکہ تیرانی زد ءَ اتکگ ءُ دگہ 8 مردم ٹپی ھم بیتگ اَنت۔

پولیس ءِ ردءَ تیر گواری ءِ وئیل دو ٹولیانی پیشی ءِ وھدءَ بیتگ، تیر گواری ءِ ھند ءَ چہ پستول ءُ تیرانی خول ھم دست کپتگ اَنت۔

پاکستانی لشکریاں سئے روچ پیسر مشکے ءَ یک مردمے دزگیر کنگ ءَ پد ناشناسیں ھنداں بُرتگ۔

سر بیتگیں ھالانی ردءَ بیگواہ بیتگیں مردمے پجار عمر ء غلام قادر ءِ نام ءَ بیتگ، کہ آ چہ مشکے ءِ ھند نوکجو ءَ دزگیر کنگ بیتگ۔

کھول ءَ بیگواھی ءِ ھال راست کنان ءَ گُشتگ کہ آ سئے روچ پیسر لشکریاں رندک کیمپ ءَ توار کُتگ بیتگ، وھدے آ لشکریانی پرمان ءِ ردءَ کیمپ ءَ شُتگ گُڑءَ آ دزگیر کنگ بیتگ ءُ پدءَ ناشناسیں جاھی ءَ بندیگ کُتگ۔

زانگ بہ بیت کہ بلوچستان ءَ چہ ھمک روچی ردءَ زورانسری بیگواھیانی کیس نبشہ کنگ بنت۔ ھمے ھپتگ ءِ تہءَ پاکستانی لشکریانی دست ءَ کراچی، خاران، شال، خضدار ءَ ھوار جتاھیں دمگاں چہ مردمانی زورانسری آوار جنی ءِ کیس دیما اتکگ اَنت۔