TBP Balochi

بلوچستان ءِ دمگ کیچ ءَ گرلز ماڈل اسکول تربت ءِ نودربراں وانگ جاہ ءَ سواری آسراتی ءِ نہ بوگ ءِ پژدر ءَ زھرشانی کنان ءَ وتی بیگ دگ ءِ سر ءَ ایر کرتگ ءُ زھرشانی بندات کتگ-

ھالانی تہ ءَ گوشگ بیتگ کہ کیچ ءِ بنجاھی شھر تربت ءَ ڈپٹی کمشنر کیچ ءِ کارگس ءِ دیم ءَ نندانک جتگ ءُ وتی بیگ دگ ءِ سر ءَ ایر کرتگ اَنت-

نودربرانی گوشگ اِنت گرلز ماڈل اسکول تربت ءِ فیول ھمک وھد ءَ وتی کرتگیں زبان ءَ ورگ اِنت –

آیانی گوشگ اِنت پرنسپل ءُ انتزامیہ ءَ داں دوشمبے ءَ مئے گون ءَ سروس ءِ بندات کنگ ءِ زبان کتگ ءُ آیانی زبان سرجم نہ بیتگ ءُ مروچی مارا پد ءَ پادانی ءَ آیگ کپتگ-

نودربرانی گوشگ اِنت کہ آ دوریں جاھاں کاینت چریشی ءَ چہ آیاں پادانی آیگ ءَ بازیں جیڑھانی دیمپانی اِنت –

زھرشانی ءَ ھواریں بی ایس او پجار ءِ دمگی رھشون ءِ رد ءَ انتزامیہ ھر وھد ءَ وتی زبان ءَ پروشگ اِنت ءُ چریشی ءَ چہ گرلز ماڈل اسکول ءِ وانگ ءِ سر ءَ آسر کپگ اِنت-

بی ایس او پجار ءِ رھشون ءِ رد ءَ اشی ءَ دردیگیں گپ کجام اِنت کہ کیچ ءَ سوبھی ءُ سنیٹ ءِ نمائندگ دگہ جاھانی ئیگ ءَ گیشتر اَنت درستاں ھوار ھشت سوبھائی، وفاقی وزیر ءُ دو سنیٹر مئے رھشونی ءِ ٹاہ ءَ دے اَنت بلے گرلز اسکول ءَ سواری ءِ واستا بسے گندگ نہ بیت اِنت-

آیانی گوشگ ات کہ وھدیکہ بلوچستان ءَ ڈاکٹر مالک ءُ نیشنل پاٹی ءِ وھد ءِ سرکار ءَ ایجوکیشن سسٹم شریں رنگے ءَ بیتگ ھمک کالج ءُ ماڈل اسکولاں گیشیں بس ءُ گیشین بجٹ دیگ بیتگ اَنت بلے انیگیں نمائندگ وانگ ءِ تکاں پھک ءَ بے دلگوش اَنت-

سر بیتگیں ھالانی رد ءَ گوستگیں شپ ءَ سلاہ بندیں مردماں ایرانی لشکر ءِ سر ءَ اُرش کرتگ-

گیشیں ھالانی رد ءَ گوستگیں شپ ءَ ناشناسیں مردماں روکپتی بلوچستان ءِ دمگ ایرانشھر ءَ سلاہ بندیں مردماں ایرانی لشکر ءِ سر ءَ اُرش کرتگ –

ھالانی تہ ءَ گوشگ بیتگ کہ اُرش ءَ ایرانی لشکر ءَ جانی تاوانانی دیمپانی کنگ کپتگ-

ایرانی لشکر ءِ نیمگ ءَ تنی وھدی اے گپ ءِ راستی نہ بیتگ اَنت، بلے گوستگیں شپ ءَ شنگ بیتگیں تامر بنداں گندگ بیت اِنت پوجی چیک پوسٹانی نیمگ ءَ تیرگواریانی توار اش کنگ بوگ ءَ اَنت-

زانگ بہ بیت گوستگیں سی ستمبر ءَ چہ روکپتی بلوچستان ءَ بندات بیتگیں شورشاں پوجی کارمندانی سر ءَ ارش بوگ ءَ اَنت ’ لس مھلوک ءِ نیمگ ءَ اے وئیلاں ایرانی لشکر ءِ بگیری ءَ زھر ء درشان گوشگ بوگ ءَ اَنت ‘

سربوتگیں ھالانی رِد ءَ گوستگیں روچ ءَ بزاں 29 اکتوبر ءَ شمبے ءَ بیرجند چیریں ادارہ ءِ سادھیں پوشاک گوریں کارندھاں یک نیکراھی ملایے (عالم دین) ءِ لوگ ءَ بیڑبرتگ ءُ آ دزگیر کتگ ءُ ناشناسیں جاھی ءَ برتگ-

بیگواہ بیتگیں مردمے پجّار “علی ضا اصغری درمیان” ءِ نام ءَ بیتگ آ کہ یک سنی عالم ءِ دین ءُ مدرسہ ءِ اُستاد اِنت- اھوالانی رِد ءَ چیریں ادارہ ءِ کارندھاں آمیدگسی پرمان ءَ پیشدارگ ءَ ابید علی رضا لوگ ءَ پُترتگ اَنت ءُ لوگ ءِ درستیں مردمانی موباھل ءُ لیب ٹاپ پچ گپتگ اَنت ءُ آ دزگیر کتگ-

بیگواہ بیتگیں نیکراھی ملا ءَ بلوچستان ءِ دمگ لادیز ءَ ھم بازیں سالاں تاں وانگ ءُ وانینگ ءِ تکءَ کار کُتگ-

لشکریاں دزگیری ءِ درگت ءَ داں انگت ءَ ھچ وڑیں گپ پدر نہ کتگ وھدے کہ بیگواہ بیتگیں مردم ءِ دل ءِ نادُراھی ءِ سبب ءَ آئی ءِ کھول پریشان اِنت-

زانگ بہ بیت اے شھری ءِ کھول بیرجند شھر ءَ مھکمہ سرپدی “اطلاعات ” دیم ءَ بیست ءُ چار اداراں گیش نندانک ءَ نشتگ اَنت تنی وھدے واکدارانی نیمگ ءَ ھچ وڑیں پسّہ نہ رس اِتگ-

سر بیتگیں ھالانی رد ءَ روکپتی بلوچستان ءِ دمگ پھرہ ءَ ایرانی لشکر ءِ لٹ ءُ کُٹانی سبب ءَ یک زدگیں نودربرے بیران بیتگ-

گیشیں ھالانی رد ءَ گوستگیں روچاں روکپتی بلوچستان ءِ دمگ پھرہ ءَ پروین اعتصامی وانگجاہ ءِ سر ءَ ایرانی لشکر ءَ بیڑ برتگ ءُ اود ءَ نودربرانی پٹ ءُ پول کنگ ءَ پد یک نودربرے لٹ ءُ کٹ کتگ-

ھالانی تہ ءَ گوشگ بیتگ کہ ھمے وھد ءَ نودربر یکدم زدگ بیتگ ءُ آئی ءِ پونز ءَ ھون اتکگ ءُ آ نادراہ جاہ ءَ برگ بیتگ ءُ چریشی ءَ پد آئی ءَ مروچی ایرانشھر ءِ نادراہ جاہ ءَ ساہ داتگ ءُ بیران بیتگ-

روکپتی بلوچستان ءَ یک ماھے سرجم اِنت کہ یکشل ءَ زھرشانیانی درچ برجاہ اَنت ءُ اود ءَ بازیں کچے ءَ نودربراں ھوار دگہ مردم گرگ ءُ برگ بیتگ اَنت ءُ زھرشانیانی وھداں بازیں مردمے ھم ایرانی لشکر ءِ تیرگواریاں بیران بیتگ اَنت-

سر بیتگیں ھالانی رد ءَ روکپتی بلوچستان ءِ تیابدپی شھر چھبار یونیورسٹی ءَ نودربر ءِ سر ءَ پولیس ءِ لٹ ءُ کُٹ ءِ ھلاپ ءَ نودربرانی زھرشانی –

گیشیں ھالانی رد ءَ مروچی چھبار یونیورسٹی ءَ پولیس کارمنداں بیڑ برتگ ءُ اود ءَ یک نودربرے شاھمات ماں شاھمات کتگ ءُ چریشی ءَ پد نودربر برانز گپتگ اَنت-

ھالانی تہ ءَ گوشگ بیتگ چھبار یونیورسٹی ءَ پولیس ءَ شبنم ولی زادہ نامیں یک نودربرے لَٹ ءُ کٹ کتگ ءُ آئی ءَ را بیھار داتگ-

ھالانی تہ ءَ گوشگ بیتگ کہ اے پولیس کارمند لس پوشاکیاں بیتگ ءُ اتکگ اَنت ءُ چریشی ءَ چہ آ یونیورسٹی ءِ توک ءَ مانرتگ ءُ نودربرے ابید ء وجہ جتگ –

چریشی ءَ پد نودربر یونیورسٹی ءِ گیٹ ءِ دیم ءَ مُچ بیتگ ءُ آیاں زھرشانی کتگ-

زھرشانی کنوکاں گشتگ کہ اے یک نا انساپی یے کہ ھنچش بیا ءُ نودربراں کمشرپ کنگ ءُ آیاں جنگ ءُ ژانبلینگ جوانیں کارے نہ اِنت-

آیاں لوٹ کتگ کہ دوبر چوشیں وئیل مہ بنت ءُ نودربراں وانگ ءَ بل اَنت –

ترکی ءِ وزیر خزانہ ءَ گوشتگ کہ یورپ ءِ واستا توانائی ءِ بنجل ءِ ایر کنگ ءِ گرز ءَ سعودی عرب ءُ دگہ ڈیھانی گون ءَ شریداری کنگ لوٹ آں –

وزیر خزانہ نورالدین نباتی ءَ عرب نیوز ءَ یک گلگدارے ءِ وھد ءَ گشتگ کہ ترکی وتی جغرافیائی پوزیشن ءِ سبب ءَ روس، ایران ءُ سعودی عرب ءَ چہ دراتکگیں تیل ءُ گیس ءِ انرجی ءِ کوریڈور اِنت-

آئی ءَ گوشتگ کہ ترکی ءِ راہ ءَ ابرمی گیس ءُ تیل ءِ رھگوزی ءَ کم نھاد ءُ شریں رنگے ءَ سر بیت کن اَنت-

ریاض ءَ ششمی فیوچر انویسٹمنٹ انیشیٹو فورم ءِ وھد ءَ گپ کنان ءَ وزیر خزانہ ءَ گوشتگ کہ ترکی ءُ سعودی عرب یک دومی ءَ چارگ ءَ اَنت چریشی ءَ دمگ ءِ توک ءَ ایمنی ھم اتک کنت امن ءَ چہ گیس ءُ توانائی نھاداں کمی کنگ ءُ ھردوکیں ڈیھانی دیم ءِ باندات ءَ شریں شوربندی اَنت-

سعودی عرب دنیا ءِ توک ءَ تیل ءِ درکنگ ءَ درستاں چہ مستریں ڈیھ اِنت ھمے وڑ گیس ءِ درگت ءَ پنچمی ملک اِنت ءُ سعودی عرب ءَ گیس ءِ درایگ سَے سد کھرب کیوطک فٹ اِنت ءُ چریشی ءَ چہ دگہ ڈیھاں گیس نہ لوٹ ایت تیل ءِ کم کنگ ءِ ھرچ ءَ گیس ءِ پیداوار ءِ گیش ءِ سوڑگ ءَ کنگ اِنت-

ترک وزیر خزانہ ءَ اے گپانی درشانی سروک رجب طیب اردوغان ءِ درشان ءَ پد کتگ اَنت- ءُ آئی ءَ گشتگ کہ ترکی ءَ گیس ءِ بنجل ءِ جوڑ کنگ ءَ روسی ھم منصب ءِ گون ءَ تپاک کتگ-

وزیر خزانہ نورالدین نباتی ءَ گوشتگ کہ یورپ ءَ روکیں روسی گیس ءَ اِنت اشاں سارتیانی وھد ءَ بازیں جیڑھانی دیمپانی کنگ کپ اَنت اے وھد ءَ گامگیج زورگ المی اِنت-

آئی ءَ گوشتگ کہ ھمے واستا مئے سروک ءَ گشتگ کہ ترکی ھما بنجل جوڑ بیگ ءَ اِنت اشی ءَ ایران یا روس ءَ گیس ءِ بھر ءُ بانگ کنگ ءِ المی اِنت- اے دمگ ءَ یک ھنچیں امنے ودی بیت اِنت چریشی ءَ مھلوک آسانی ءَ شاتمانی کت کنت-

انویسٹمنٹ انیشیٹو فورم ءِ وھد ءَ سعودی وزیر توانائی شھزادہ عبدالعزیز بن سلمان ءَ گوشتگ سعودی عرب یورپ ءَ تیل ءِ پجارینگ ءَ گیش کنگ اِنت ستمبر ءِ ماہ ءَ تیل ءِ شپمنٹ گوستگیں ماھانی کچ ءَ دو کساس گیش بیتگ کہ یک روچے ءَ نُھ لک ءُ پنجاہ ھزار بیرل ءَ داں سر بیتگ-

ترک ءِ وزیر خزانہ ءَ گوشتگ کہ بحیرہ اسود ءَ ترکی ءَ کدرتی گیس درگپتگ آوکیں ماھاں کدرتی گیس ءِ کارمردی ءَ بندات کنت –

آئی ءَ گوشتگ سعودی عرب ءُ ترکی ءِ وژن دوھزار ءُ بیست ءُ سَے ءُ سرجمی ءَ کیت آوکیں روچاں سعودی عرب ءُ ترکی ءِ میان ءَ نوکتریں مسامبندی بنت –

یک نوکیں کرنے ءَ وتی گاماں ایر کنان بہ ایں ءُ دمگ ءِ توک ءَ وشھال ءُ ایمنی ءِ کرد پیلو کنگ بیت اِنت-

آئی ءَ گوشتگ کہ ترکی ءَ سعودی عرب ءِ نیمگ ءَ ایکسپو سال دوھزار ءُ سِی ءِ مانزمانی ءِ پلامرزی کتگ ءُ ھردوکیں ڈیھ ناشری ءِ ھلاپ ءَ یکجاہ اَنت –

ھمے وڑ ءَ سعودی ءِ وزیر برائے کامرس ماجد القصبی ءَ ترک ٹیلی ویژن چینل ٹی آر ٹی ءَ گون گپ کنان ءَ گوشتگ کہ سعودی عرب ءُ ترکی ءِ کچ ءُ کساس ھژدہ ارب ڈالر ءِ زرکاری اِنت ءُ نوکتریناں سَے ءَ داں پنچ ارب ڈالر ءَ زرکاری ھست اِنت-

بلوچستان ءِ دمگ بولان ءَ مروچی سھب ءَ پاکستانی پوج ءَ بیڑ بُرتگ، جتاھیں ھندانی تہءَ ھیلی کاپٹر آزمان ءَ گردگ ءَ گندگ بیتگ۔

اھوالانی ردءَ بولان ءِ جتاھیں ھنداں بزگر، گمبدی، کمان ءُ کَش ءُ کِراں گن شپ ءُ دگہ ھیلی کاپٹرانی تر گرد برجاہ اِنت وھدیکہ سبی ءَ ھم پوج پیش گامی کنگ ءَ اِنت۔

بلے داں انگت ھچ پئیمیں تاوانانی اھوال سر نہ بیتگ وھدیکہ واکدارانی نیمگ ءَ اے درگت ءَ ھچ پئیمیں لیکہ دیما نئیتکگ۔

یات بہ بیت گوستگیں ماہ ءَ ھرنائی ءِ ھند زردآلو ءِ جاہ ءَ سلاہ بندیں مردماں بنجاھی دگ بستگ اَت ءُ گاڑیانی پَٹ ءُ پول ءِ نیام ءَ دو مردمانی پجار چارگ ءَ پد وتی ھمراہ بُرتگ اِت اَنت، وھدیکہ سلاہ بنداں کوئلہ بروکیں چار ٹرکانی ٹائر ھم تراکینتگ اِت اَنت۔

ھمے وئیل ءَ پد پاکستانی پوج ءَ بیڑ بندات کُتگ اَت کہ آ بیڑءَ بھر زیروکیں دو ھیلی کاپٹراں چہ یکے سلاہ بندیں مردماں نشانگ کُتگ ءُ دور داتگ اَت۔

ھیلی کاپٹر ءِ تباہ بئیگ ءِ سوب ءَ پاکستانی پوج ءِ شش کارمند مُرتگ اِت اَنت۔

ھمے کاروائی ءِ زمہ واری بلوچ لبریشن آرمی ءَ من اِتگ اَت۔ جارکش جیئند بلوچ ءَ گُشتگ اَت کہ اے اُرش چیریں اھوالانی پدءَ بی ایل اے ءِ اسپیشل ٹیکٹیکل آپریشنز اسکواڈ ءَ کُتگ۔

پدءَ گل ءِ جارکش جیئند بلوچ ءَ درشانے شنگ کنان ءَ گُشتگ اَت یک پیشہ ور اور زمہ واریں پوج ءِ پئیمءَ، بلوچ لبریشن آرمی ءِ سینئر کمانڈ کونسل ءَ نی پاکستانی پوج ءَ گوں بندیگانی مٹ ءُ بدل کنگ ءِ پرمان داتگ۔ بی ایل اے میان اُستمانی کنونشنز ءُ جوڑ کُتگیں جنگی رھبنداں من اِیت۔ بلوچ راج ءِ یک زمہ واریں راجی تاگت دروشم ءَ بی ایل اے مھذبیں جھانیں درستیں قانود ءُ رھبندانی سرءَ کاربند بیت اِنت۔

آئی ءَ گُشتگ اَت کہ بی ایل اے بلوچ سیاسی بندیگانی یل کنگ ءِ بدل ءَ دوھیں دزگیریں بندیگانی یل کنگ ءَ ساڑی اِنت۔ بلے، اگں ھمے نیام ءَ پاکستانی پوج کجام ھم پئیمیں زوراکی پیش دارگ ءِ کوشست کنت گُڑءَ اے بندیگاں بلوچ راجی آمید گِس ءِ نیمگ ءَ داتگیں سزا ءِ سرءَ زیت ءَ زیت گام زیرگ بیت۔

جیئند بلوچ ءَ دو روچ پیسر شنگ کُتگیں درشانے ءِ تہءَ گُشتگ کہ بی ایل اَے سینئر کمانڈ کونسل ءَ اے پیسلہ کُتگ کہ پاکستانی پوجیاں دگہ یک ھپتگے ءِ موہ دیگ بیگ ءَ اِنت۔ اے وھد ءِ سرجم بیگ ءَ داں اگں پاکستانی پوج ءَ پدریں ءُ جوانیں گام نہ زرت گُڑءَ 4 نومبر 2022 ءَ بندیگ کلیم اللہ ءُ بندیگ محمد فیصل ءِ سزا ءِ سرءَ گام زیرگ بیت اِنت۔

زرباری کوریا ءِ واکدارانی گوشگ اِنت کہ بنجاھی شھر سیئول ءَ ھیلووین ءِ دودمان ءِ وھد ءَ یک تنکیں دمکے ءِ توک ءَ ناگتی تچ ءُ تاگ بندات بیتگ چریشی ءَ چہ یک سد ءُ پنچاہ ءُ یک مردم بیران ءُ یک سد ءُ پنجاہ مردم زدگ بیتگ اَنت-

ھبر رساں ادارہ روئٹرز ءِ رد ءَ زرباری کوریا ءِ سروک ءَ راجی پھناتاں پرس دارگ ءِ جار کتگ –

نیشنل فائر ایجنسی ءِ یک کارمندے چیونگ بیوم ءَ گوشتگ کہ گیشتت بیرانی تچ ءُ تاگانی وھد ءَ لگت دیوک ءُ کائی ءَ بیتگ اَنت ءُ چریشی ءَ بیرانیانی کچ گیش بوتگ اَنت-

آئی ءَ گوشتگ کہ 76 لاش کش اتگ ءُ نادراہ جاہ ءَ سر کتگ انت ءُ 46 یہ جِمے ءَ ایر کرتگ انت ءُ بیران بیتگیں مردمانی تہ ءَ 19 درانڈیھی اَنت-

اشی ءَ چہ پیسر نیشنل فائر ایجنسی ءِ یک دگہ کارمندے ءَ فرانسیسی ھبر رساں ایجنسی اے ایف پی ءَ گوں گپ کنان ءَ گوشتگ کہ شمبے ءِ شپ ءُ سدانی کچ ءُ مردمانی زدگ بوگ ءِ ھال اِنت ءُ کچ ءُ کساس پنجاہ مردماں دلوارگ بوگ ءِ نادراھی ءَ گپتگ اَنت-

آئی ءَ گوشتگ کہ اے گپ ءِ گمان ھست اِنت ھیملٹن ھوٹل ءِ نزیک ءَ یک تنکیں دمگے ءَ ناگتی مردمانی تچ ءُ تاگ ءَ مردم مرتگ اَنت بلے آئی ءَ بیرانیانی کچ نہ گشتگ –

آئی ءَ گوشتگ کہ گشادکاریانی واستا ڈیھ ءَ چار سد باسک دارگ بیتگ اَنت-

چاگردی رسانکجاھاں شنگ بیتگیں تامربنداں گندگ بیت اِنت مردماں دلوارگی ءِ رکھگ ءَ کمک کنگ ءَ اَنت –

یک دمگی پولیس آفیسرے ءَ گوشتگ کہ آئی ءَ ھم ترس ءِ تچ ءُ تاگی ءِ ھال سر بیتگ بلے آئی ءَ نام پدر نہ کرتگ ءُ وئیل ءِ پٹ ءُ پول کنگ ءِ لوٹ کتگ-

دمگی رسانکدرانی رد ءَ اے ترس ءَ تچ ءُ تاگی ھما وھد ءَ بیتگ اَنت مھلوک یک بارے ءِ نیمگ ءَ تچانی ءَ شتگ اَنت کہ اود ءَ یک مردمے ءِ آیگ ءِ ھال بیتگ-

بلوچستان ءِ بنجاھی شھر شال ءَ بیگواھیں مردمانی یل کنائینگ ءِ ھاتر ءَ وائس فار بلوچ مسنگ پرسنز ءِ زھرشانی بنجل برجاہ، زھرشانی بنجل ءَ مروچی چار ھزار ءُ ھشت سد ءُ پنچ روچ سرجم بوتگ انت – مروچی بی ایس او پجار ءِ رھشوناں اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ زوراک وتی زوراکیاں گوں وھدے درسیں سیمسراں سرگوز کنگ ءَ بیت گڈا ایردستیں راج وتی گھگیری ءَ گیش کنت انت، ایردستیں راج چہ گھگیری ءَ زوراکی ءِ سیاھیں شپاں روچ کت کن انت –

آئی ءِ گوشگ ات کہ ریاست ءِ درسیں ادارہ بلوچ ءِ چکچینی ءُ زورانسری آوار جنی ءَ ھوار انت کہ آ وتگڑیں بلوچ پارلمنٹری ءُ اسمبلی ءَ کانودی جواز داتگ ، پوج ءَ مھار گٹ ءَ داتگ ءُ یل داتگ کہ آ ھر کجا ھرکس ءَ لوٹیت چست بہ کنت، بیگواہ بہ کنت یا بے بنیں الزام بہ جنت ءُ بُکوشیت، یا آئی ءَ لٹ شاپ بہ کنت پہ زور کتکار ءِ بگوشیت –

آئی ءَ گوشتگ کہ بلوچستان ءَ انسانی ھکانی لگتمالی ءِ سر ءَ میان استمانی ادارہ وتی دیواناں مار ءَ گمراہ کنگ ءَ انت – میان استمانی ادارہ وتی لٹ ءُ گزرانی ھاتر ءَ ایردستیں راجانی چکچینی ءَ گامگیج زورگ ءَ نہ انت، مئے گل مدامی آھاں یات دنت کہ بلوچستان جنگ زدگیں دمگے گوشگ بہ بیت ءُ ریاستی زوراکی دارگ بہ بنت –