TBP Balochi

سر بیتگیں ھالانی رد ءَ روکپتی بلوچستان ءِ بنجاھی شھر دزاپ ءَ یک ورنایے وتی کار جاہ ءَ ماڑی ءَ کپتگ ءُ بیران بیتگ-

بیران بیتگیں ورنا ءِ پجار امان اللہ رند ءِ نام ءَ زانگ بیتگ-

ھالانی تہ ءَ گوشگ بیتگ کہ امان ماڑی ءَ لفٹ ءِ سر ءَ کار ءَ بوتگ ءُ چمود ءَ لگوشتگ ءُ کپتگ ءُ چریشی ءِ سبب ءَ آ بیران بیتگ-

اے وئیل دزاپ ءِ دمگ کوسر آباد ءَ پیش اتکگ ءُ اود ءَ آ یک ماڑی ءِ سر ءَ کار ءَ بوتگ –

ھالانی رد ءَ گوشگ بیتگ کہ کار ءِ سر ءَ شریں پھزداری آسراتی نیستی ءِ سبب ءَ اے وئیل پیش اتکگ ءُ اشی ءَ ھوار ھوار دگہ جاھاں ھم چوشین وئیل پیش اتکگ بیتگ اَنت بلے انتزامیہ ءُ گر ءُ دار کنوکاں اے وڑیں وئیل یکشل ءَ ڈالچار کتگ اَنت-

روکپتی بلوچستان ءِ دمگ تفتان ءَ زیر زمین ءَ دراتکگیں سھورانی کھن ءَ کار کنوکیں مزدوراں کار بند کتگ ءُ زھرشانی بندات کتگ-

مزدورانی گوشگ اِنت اد ءَ دراتکگیں سھرانی گیشتری بھر سیستان و بلوچستان ءَ نہ رس ایت چریشی ءَ اے کہ درایگ ءَ انت اشانی موز ایران ءِ دگہ جاھاں روگ ءَ اَنت –

آیانی گوشگ اِنت کہ دراتکگیں مڈیانی واھند سیستان و بلوچستان ءِ مھلوک اِنت بلے ایران ءِ استانانی مھلوک ءُ سرکار ءَ جمب کتگ ءُ آ مئے مڈیاں برگ ءَ اِنت-

آیانی گوشگ اِنت کہ اد ءَ مھلوک پہ مزدوری ءَ دلاپ اَنت بلے اے چیزانی موز مارا بس مزدوری دروشم ءَ رسگ ءَ اِنت –

مزدوراں چرے پژدر ءَ زھرشانی کنان ءَ مروچی وتی کار بند کتگ ءُ کھن ءَ نہ روگ ءِ سوڑگ کتگ-

آیاں گوشتگ کہ سرکار باید دراتکگیں مڈیانی نپاں سیستان و بلوچستان ءَ بہ دنت-

مزدوراں ھوار ھوار دگہ مھلوک ءَ ھم زھرشانی ءَ بھر زرتگ ءُ گاڑی دگانی سر ءَ اوشتارینتگ ءُ دگ بند کتگ-

روکپتی بلوچستان ءِ بنجاھی شھر دزاپ ءَ ایرانی چیریں ادارھانی کارمنداں یک نودربرے آوار جتگ ءُ برتگ-

گیشیں ھالانی رد ءَ دزاپ شھدربرجاہ ءِ نودربر ایرانی چیریں ادارھانی کارمنداں آوار جنگ ءَ پد بیگواہ کرتگ-

آوار جنگ بیتگیں نودربر ءِ پجار جعفر زومکزئی جھمنند پسکوہ سیب ءُ سوران ءِ نام ءَ زانگ بیتگ-

ھالانی تہ ءَ گوشگ بیتگ کہ اے نودربر گوستگیں روچاں ایرانی چیریں ادارھاں زاھدان میڈیکل آف سائنسز نرسنگ یونیورسٹی ءَ آوار جتگ ءُ ناشناسیں جاھاں برتگ –

چریشی ءَ پد آئی ءِ درگت ءَ ھچ ھال نیست اِنت نا نکہ آئی ءِ کھول اے درگت ءَ سرپد کنگ بیتگ اَنت-

سر بیتگیں ھالانی رد ءَ روکپتی بلوچستان ءَ ایرانی سپاہ ءِ تیرگواری ءَ یک عالم دینے بیران بیتگ-

گیشیں ھالانی رد ءَ گوستگیں روچ ءَ اھل سنت ءَ بندوکیں مردمے لاشار ءَ ایرانی سپاہ ءِ سپاہ ءِ تیرگواری ءَ بیران بیتگ-

بیران بیتگیں مردم ءِ پجار یوسف رئیسی ء عبدالرشید امام جماعت ھریدوک لاشار ءِ نام ءَ زانگ بیتگ-

ھالانی تہ ءَ گوشگ بیتگ کہ یوسف رئیسی گوستگیں آدینگ ءَ زھرشانیاں ھواریں مردمے بیتگ ءُ چریشی ءِ پژدر ءَ آ کشگ بیتگ-

زانگ بہ بیت روکپتی بلوچستان ءَ بندات بیتگیں شورشاں مھلوک ءِ برانزینانی پژدر ءَ بازیں مردمے گرگ ءُ کشگ بیتگ اَنت-

اے شورش بنجاھی شھر دزاپ ءَ بندات بیتگ اَنت ءُ اشاں ھوار ھوار دگہ جاھاں مھلوک برانزی بیتگ اَنت-

ایرانی پروسیکیوٹرز زھرشانیاں بھر زیروکیں مردمانی بگیری ءَ ھمے ھپتگ ءَ ارزی نامہ کنگ بیت اِنت-

عرب نیوز ءِ رد ءَ مھسا امینی ءِ کوش ءِ بگیری ءَ کچ ءُ کساس دو ماھاں بیوکیں زھرشانیا سرکار پر پر کتگ –

دو شمبے ءِ روچ ءَ ایرانی چیف جسٹس ءِ جارکش ءَ گوشتگ کہ ارزی نامہ مھلوک ءِ بوت اِنت –

جارکش ءِ رد ءَ زھرشانیاں سکیورٹی فورسز ءِ سر ءَ اُرش، سرکاری جاھانی سوچگ، چیریں کاروائیانی بھتامانی دیمپانی کنگ کپ ایت-

جارکش ءَ گوشتگ کہ لھتے مردماں مرگ ءِ سزا ءِ دیمپانی کنگ ھم کپ ایت-

زانتکارانی گوشگ اِنت سال نوزدہ سد ءُ ھپتاد ءُ نُھ ءَ پد ایران ءِ آشوبی سرکار ءَ مستریں ایلینگانی دیمپانی اِنت –

شانزدہ ستمبر ءَ ایرانی کردستان ءَ سیادی داروکیں بیست ءُ دو سالی ئیں مھسا امجنی پولیس ءِ دزگیری جاہ ءَ بیران بیتگ ات ءُ پد ءَ چریشی ءَ پد ایران ءِ شھراں زھرشانیانی آس روک بوت-

مھسا امینی برکہ ءِ سر ءَ نہ کنگ ءِ ھلاپ ءَ دزگیر کنگ بیتگ اَت-

زند ءِ پھناتاں سیادی داروکیں ایران ءِ دو سد شھراں گیش زھرشانی کنگ بیتگ ات- اے زھرشانیاں نودربر ءُ زالبولاں ھم بھر زرتگ ات – ءُ زالبولاں وتی گشان ھم مانداشتگ انت-

چریشی ءَ پد سیکورٹی پورسز ءَ گامگیج زرتگ ءُ زھرشانی کنوکانی بگیری ءَ پرکار بیتگ ءُ سرکار ءِ بگیر داریں گل خلق ایران ءِ رد ءَ چار سد ءُ پنجاہ مردم کشگ ءُ کم چہ کم بیست ءُ پنچ ھزار دزگیر کنگ بیتگ اَنت-

انسانی ھکانی گلانی گوشگ اِنت کہ زھرشانی کنوکانی ھلاپ ءَ ارزی نامہ بندات بیتگ اَنت ءُ چاگردی ترامجاھاں شنگ بیتگیں یک تامر بندے ءَ سرکار ءِ ھلاپ ءَ زھرشانیاں ھوارین مھمد قبادلو ءِ مات ءَ گشتگ کہ دو روچ ءَ پیسر زھگ ءِ مرگ ءِ سزا دیگ ءِ گپ بیتگ آئی ءَ گشتگ کہ منی زھگ نادراہ اِنت ءُ آمیدگس آئی ءِ وکیل ءَ گندگ ءَ نیلگ اِنت-

بلوچستان ءِ جتائیں دمگ کیچ ، تفتان ءُ دکی ءَ جتاجتائیں وئیلانی آسر ءَ یک پوجی آپیسرے ءَ ھوار پنچ مردم بیران بیتگ اَنت-

سربوتگیں ھالانی رِد ءَ بلوچستان ءِ ضلع دکی ءَ دوشمبے ءِ ھاک ءِ تلمب کپگ ءَ چہ دو جتائیں وئیلاں کم چہ کم دو کھنجن بیران بیتگ اَنت – لیویز رِد ءَ چمالنگ ءِ دمگ کوئلہ ءِ دو جتاجتائیں کھن لُمبگ ءَ چہ بیتگ اَنت-

اشکر کھناں چہ کھجن تہ ءَ اشکر درکنگ ءَ بیتگ اَنت وھدے ھاک ءِ تلمب کپتگ- ریسکیو ٹولی ھما دمان ءَ سر بیتگ اَنت لاش در کتگ اَنت-

دکی وئیل ءَ بیران بیتگیں کھجنانی پجّار شبیر علی ءُ محمد نسیم نام ءَ چہ بیتگ اَنت کہ سوات ءُ لورالائی ءِ نندوک اَنت لاش ڈسٹرکٹ ھیڈ کوارٹر ھسپتال دکی ءَ آرگ بیتگ اَنت-

ھستال انتزامیہ ءَ گیشیں چار ءُ ٹپاس سرجم کنگ لاش کھول ءَ داتگ اَنت-

زانگ بہ بیت بلوچستان ءَ گیشتریں وھداں اشکر کھناں وئیل دیم ءَ کاینت ھمے سال ءَ پانزدہ ءَ گیش کھجن وئیلاں بیران بیتگ اَنت وھدے کہ جتائیں کھناں وئیلانی دروشم ءَ شش ءَ چہ گیش پوریاگر ٹپی بیتگ اَنت-

پوریاگرانی گل اشکر کھناں اے وئیلاں آسراتی ءُ ساز سامان ءِ نہ بوگ ءِ سوب ءَ گوشگ ءَ اَنت وھدے کہ اے وئیلانی آماچ بوتگیں گیشتریں پوریاگرانی سیادی اوگانستان ءُ دمگی دمگ ءَ اَنت-

گلاں شکایت کتگ کہ اشکر کھن وئیلانی دْرچ برجاہ ءَ اِنت وھدے کہ انتزامہ ءُ کھن واھنند نیمگ ءَ اے وئیلانی گر ءُ دار ءِ ھاتر ءَ ھچ وڑیں گامیگج زورگ نہ بیتگ ءُ پوریاگر وئیلانی دروشم ءَ وتی کمک ءَ وت لاچار اَنت-

دومی نیمگ ءَ بلوچستان ضلع کیچ ءَ کسانوکیں دپجاکی ءَ چہ یک مردمے ءَ کارچ سر ءَ اُرش کتگ ءُ دوئیں برات کُشتگ اَنت-

وئیل کیچ ءِ دمگ دشت کنچتی ءِ ھند ءَ یکشمبے ءِ شپ ءَ ساھت دہ ءِ نزیک ءَ بیتگ –

کُشگ بیتگیں براتانی پجّار شاھو ءُ شبیر احمد ء لیاقت ناماں چہ بیتگ اَنت- لیویز رِد ءَ بنداتی پٹ ءُ پول ءَ چہ زانگ بیت کہ وئیل لوگی جیڑھے ءِ سبب ءَ بوتگ –

ھمے وڑ روکپتی ءُ رودرتکی بلوچستان ءِ سیمسری دمگ تفتان ءِ ھند ءَ ناشناسیں سلاہ بندیں مردمانی تیرگواری ءَ چہ یک پوجی آپیسرے بیران بیتگ-

اِھوالکارانی رِد ءَ کُشگ بیتگیں پوجی آپیسر ءِ پجّار محمد ایاز ملازئی نام ءَ چہ بیتگ ءُ آئی ءِ سیادی پاکستان پوج انجینئر کور ءَ چہ بیتگ اے وھد ءَ آپیسر کیپٹن رینک سر ءَ بیتگ-

بلے تنی وھدے وئیل درگت ءَ ھچ سرپدی نہ رس اِتگ وھدے کہ پاکستانی پوج ءِ جارکش نیمگ ءَ اے درگت ءَ ھچ وڑیں درشان دیم ءَ نیتکگ نانکہ اے اُرش زمہ واری گلاں منّ اِتگ-

بلوچستان ءِ دمگ کلات ءَ پاکستانی پوج ءَ دو مردم زورانسری آوار جتگ ءُ بیگواہ کتگ انت کہ آھانی تہ یکے زدگی جاورھالاں آوار جتگ –

گیشیں ھالانی رِد ءَ پاکستانی پوج ءَ کلات ءَ لشکر کشی کنان ءَ مردمانی سر ءَ زوراکی کتگ ءُ مردم لٹ شاپ کتگ انت ءُ دو مردم زورانسری آوار جتگ ءُ بیگواہ کتگ انت –

آوار جنگ بوتگیں مردمانی پجار خالق داد ءُ عبدالحکیم ناماں چہ بوتگ انت –

اھوالکار ءِ رِد ءَ اے مردم دھکانکار بوتگ انت اشاں گلہ ءِ کشت ءُ کشاری کتگ وھدیکہ پوج ءَ لشکر کشی ءِ میان ءَ خالق داد تیر باران کتگ ءُ زدگ کتگ –

اھوالکار ءِ گوشگ انت دمگ ءَ پوجی لشکر کشی ھنگت برجاہ انت وھدیکہ دمگ ءِ تہ ءَ مزنیں کچے ءَ پوج ساڑی انت –

گوستگیں روچ ءَ بندات بوتگیں پوجی لشکر کشی بولان ءِ جتا جتائیں ھند ءُ دمگ کمان، یخو، اوچ کمان، گمبدی، درگ پیرانی، سارو، بزگر ءُ سبی ءِ دمگ سانگان ءَ برجاہ انت وھدیکہ پاکستانی پوج ءِ نیمگ ءَ ھرنائی کوھی دمگاں پوج لشکر کشی کنان ءَ دیم ءَ روان انت –

دومی نیمگ ءَ اے ھم ھال آیگ ءَ انت کہ بولان ءَ لشکر کشی ءَ پوج ءِ گوں سلاہ بنداں جنگ ءُ چوپ ءِ میان ءَ دو پوجی کارمندانی مرگ ءِ ھال انت-

پاکستانی پوج آئی ایس پی آر ءَ پوجی لشکر کشی ءُ میڑ ءِ ھبر راست کتگ-

ھالانی رِد ءَ بلوچ آجوئی لوٹوکیں سلاہ بندیں گل ءُ پوج ءِ میان ءَ جنگ چوپ ءَ دو پاکستانی ایس ایس جی کمانڈو جنگ بوتگ انت کہ آھانی پجار محمد قیصر عباسی ءُ شافی ءِ ناماں چہ بوتگ انت –

آئی ایس پی آر ءَ ھردو کارمندانی مرگ ءِ ھبر راست کتگ ءُ گوشتگ کہ پاکستانی پوج ءَ بلوچستان ءِ دمگ کمان پاس ءَ چیریں ھال ءِ سربوگ ءَ آپریشن کتگ کہ پوج ءُ سلاہ بندانی میان ءَ جنگ چوپ بندات بوتگ –

آئی ایس پی آر ءَ ٹاہ داتگ پوج ءِ تیر گواری چار سلاہ بند جنگ بوتگ انت وھدیکہ تیرگواری ءَ سپاھی شفیع اللہ ءُ سپاھی محمد قیصر مرتگ انت –

گوستگیں روچ ءَ بولان ءُ کشءُ گوراں برجاھیں لشکر کشی ءُ جنگ ءُ چوپ بیران بوتگیں سرجمیں ھال دیم ءَ نہ اتکگ بلے پوجی بالگرد تان گوستگیں شپ ءَ برجاہ بوتگ انت –

ھمے میان ءَ بولان اوچ کمان ءَ پوجی بالگرداں شیلنگ ھم کتگ ءُ تراک توار ھم اشکنگ بوتگ انت ھمے گوشگ بوگ ءَ انت کہ پوج ءِ نیمگ ءَ مھلوک نشانگ کنگ بوتگ –

سربوتگیں ھالانی رِد ءَ گوستگیں روچ ءَ یکشمبے ءَ بلوچستان ءِ دمگ کیچ ءُ شال ءَ ناشناسیں مردماں پاکستانی پوج ءِ پانگسانی سر ءَ دز بمب چگل داتگ ءُ دَر شُتگ –

دزبمب اُرش ءَ پاکستانی پوج ءَ جانی تاوان بوتگ وھدیکہ اُرشکار درآھگ ءُ رؤگ ءَ سوبمند بوتگ انت – ھردو اُرشانی زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءُ بلوچ لبریشن آرمی ءَ منّ اِتگ انت –

بلوچ لبریشن آرمی جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ شال ءَ بوتگیں دز بمب اُرش ءِ زمّہ واری منّ اِتگ گوشتگ کہ بی ایل اے ءِ سرمچاراں گوستگیں شپ ءَ جوائنٹ روڈ بروری کراس ءِ نزیک ءَ برجاھیں زورگیریں پاکستانی پوج فرنٹیئر کور ءُ پولیس ءِ یکجاھیں پانگس ءِ سر ءَ دزبمب ءِ اُرش ءِ کتگ –

جارکش ءَ گوشتگ کہ اُرش ءِ آسر ءَ پوج ءِ پنچ کارمند زدگ بوتگ انت ءُ وھدیکہ آھانی تہ ءَ یکے سک باز زدگ بوتگ –

ھمے وڈ تربت ءَ بوتگیں دزبمب اُرش ءِ زمّہ واری بلوچستان لبریشن فرنٹ ءَ منّ اِتگ – بی ایل ایف ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں گوستگیں روچ ءَ مگرب ءِ وھد ءَ تربت بازار ءَ اسٹار پلس مارکیٹ ءِ نزیک ءَ برجاھیں پاکستانی پوج ءِ پانگس ءِ دز بمب اُرش ءِ کتگ –

جارکش ءَ گوشتگ کہ دزبمب پانگس ءِ تہ ءَ کپتگ ءُ ترک اِتگ چریشی ءَ یل کارمندے مُرتگ ءُ یکے زدگ بوتگ -میجر گوھرام بلوچ ءَ وتی درشان ءِگڈ سر ءَ گوشتگ کہ زورگیریں پوج ءِ بلوچستان ءِ تہ ءَ سرجمی ءَ در آیگ ءَ تاں مئے اُرش برجاہ مان انت –

نمدی یے سیلم جان پنام چراگ بلوچ ءَ

نبشتہ کار: شیردل بلوچ

دی بلوچستان پوسٹ

سیلم جان دروت ءُ درھباتی ءِ جاہ ءَ نہ ئے، سک دور رپتگ ئے، زاناں منی نبیس اِتگیں نمدی ءِ جند پہ تو سر نہ بیت، بلےھما بُزرگ راہ ءَ کہ تو رپتگ ئے مُھکمیں سرانی ھوناں رژنانیں چو شھدگّ ءَ گندگ ءُ زانگ بیت، راج پھازیں بچ پہ دلجمّی آیگ ءَ اَنت، بہ گند ئے کسے ءِ چَمّاں اے نمدی گندگ بیت ءُ منی دراھباتی ءِ کلوھاں ترا رس اِیت، سدّکان ءُ چُشیں واھگے نہ داشتگ پد ءَ منی نمدی ءِ پسّہ بہ دے ئے ۔

ھمبلو جان، تئی ھیال ءَ کپ آں، گڑا الم ءَ جیڑان ءُ ھما روچ انگت ءَ شَرّ گیرکاینت، وھدیکہ ما چہ تئی دُکان ءِ دیم ءِ کِشک ءَ گْوَستگ اِیں، گڑا تو مئے پرپٹانی توار اُشکُت اَنت، پہ مئے چارگ ءَ دُکان ءِ دروازگ ءِ دپّ ءَ اتکگ ءُ اوشتاتگ ئے، وھدیکہ ترا سلام داتگ، تو پہ مھر ءُ بچکند الیک کرتگ ءُ چہ تئی مھراں ھمے پدر بوتگ، تو ھم زوتکانی ءَ ھمے راہ ءِ مساپرے بہ ئے ءُ بُرزگ ءِ اوتاک ءَ بزان کہ پاٹی ءِ کارگس (دپتر) تئی مھرانی چیدگ بیت ءُ ھر وھد ءَ پہ نیاد کا ئے، رُدم زُور ئے جُنز ءَ ھوار بہ ئے ۔

ھمبل جان، تو شَرّ زان ئے ءُ سرپد بہ ئے، دلجمیں سنگت ءِ گستائی سک تور اِیت، تئی مولم مُدامی کاینت، چو بشّی نہ گور اِتگیں جُڑ ءَ سر ءَ اُوشتات اَنت،
” گند ئے۔۔۔۔۔۔ ؟ چُشیں دُوزھی ساھتاں مردم ءَ را ھیال کُج ءَ کُج ءَ بَر اَنت تر ءُ تاب ءَ پرماینت، ” کدی گند ءُ نند ءُ ھمنیاد ئے ،” کدی ھما گَٹ ءُ رُنگراھانی سپراں ھمراہ ئے، ” کدی کنور ءَ یکجاہ ئے ءُ کدی گوں تاش ( پتا ) ءِ لیب ءَ کنگ ءَ ئے تئی داتگیں مھران ءُ سواسان ءُ جیڑگ ءَ پرماینت ۔

ھمبلو جان ، تئی کارست، ھیال ءُ ترانگ، انچُش دارجکش ھست اَنت، پہ نبیسگ ءُ گپتاراں بَھ آسر نہ بنت، تچکیں پگرے ءِ زانگ لوٹ ئے ، دور سَریں راھے ءِ روگ لوٹ ئے ، تُن ءُ گژن ءَ دراجیں پندے ءِ بُرگ ءَ ھید ءُ ھونریچگ ءَ پد ءَ منزل ءِ چیدگاں شون دے ئے،گڑا اُوستانی چراگ بَل اَنت ءُ پدریچ ءِ آکبت ءِ درپشُوک استالے ئے ۔

نمیرانیں کارست، تو ھما وش بھتاں شمار ئے کہ راجدپتر ءِ تاکاں جاگہ کرتگ ءُ تئی نام گوں سرڈگار ءِ ندر بوتگیں بامرداں گِرگ بیت، پہ ماتیں گلزمین ءِ پھازگ ءَ وتی زگریں ھوناں رِتکگ اَنت، تئی نام ءِ سر ءَ تئی راج پھر بند اِیت، پدریچ تئی کارست ءِ کسھاں کار اِیت، مات ءُ گُھار ترا نازین اَنت، تو پہ راج ءِ زندگ بوگ ءَ وتی ھیشّی سر ندر کرتگ ئے۔

چراگ جان ،تو نمیران ئے، تئی کارستاں ترا زندگ کرتگ پہ مُدامی ءَ گیدی ءِ دراھیں کُنڈاں پجارگ بہ ئے ءُ گیرکائے زاناں چوناھا سوچکان ءِ ماہ ءِ آسگواریں تبد پیلوش اِیت ءُ سک ءَ تُنیگ کنت ءُ نُکاں ھُشک کنت ءُ نپس کشگ ھم گران بیت، دوگام ءَ پد ءَ سْیاھگے ءِ شُھاز ءُ سارتیں آپ ءِ تلب بیت، بزان کہ ھمے ماہ ءَ سورگر ءِ اوتاک لشکرکشی ءَ زمینی لشکر ءُ بالیگرابانی میان ءَ میڑ داتگ ئے۔

ھمبلو جان ،بیست سوچکان دو ھزار ھبدہ (20/05/2017) ءِ روچ ءَ تو پہ وتن نمیران بوت ئے ءُ تئی ھمراھی ءَ ھکیم جان ، نسیم جان، دادو جان ھم نمیران بوت اَنت، تئی گوں ھوار سرڈگار ءِ شھیداناں سھرچکیں دروت ندر کناں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

چاگردی ترامجاہ ٹوئٹر ءِ واھند ایلون مسک ءَ اکاؤنٹسانی راست کنگ ءِ راہ ءُ رھبندانی مٹ کنگ ءِ جار جتگ-

ھبررساں ادارے روئٹرز ءِ رد ءَ دنیا ءِ سیرتریں مردم ایلون مسک ءَ ٹوئٹر ءِ بھا زورگ ءَ دو روچ پد ات جار جتگ کہ ویریفکیشین ءِ درستیں راہ ءُ رھبند مٹ کنگ بنت-

بلے اے درگت ءَ ایلون مسک ءَ دگہ گیشیں سرپدی نہ گوشتگ اَنت-

جان کروس نامی یک اکسکارے ءَ ایلون مسک ٹیگ کتگ ءُ گوشتگ کہ بازیں فالوورزانی بیگ ءَ ابید ھم ٹوئٹر ءَ چار یا سَے رند ءَ رند ءَ آئی ءِ اکاونٹ ءِ ویریفکیشن کنگ ءَ انکاری کتگ-

جان کروس ءَ ایلون مسک ءَ گوں جست کتگ کہ ھا تو اکاونٹس ءِ راست کنگ ءَ منی کمک ءَ کت کن ئے چریشی ءَ چہ ایلون مسک ءَ گشتگ آ زوت راہ ءُ رھبنداں مٹ کنگ اِنت-

ٹیکنالوجی ویب سائٹ دی ورج ءَ رپورٹ کرتگ کہ ٹوئٹر انتزامیہ اکاونٹسانی راست کنگ ءُ بلیو ٹک ءِ تالان کنگ ءَ کارمرد کنوکاں زر گر ایت –

رپورٹ ءِ رد ءَ بلیو ٹک ءِ ویریفائیڈ بیجز ءِ واستا ھمک ماہ کارمرد کنوکاں ٹوئٹر بلیو ءَ 4.99 ڈالر سبسکریشن فیس دیگ کپ ایت فیس ءِ سرجم نہ کنگ ءَ کارمرد کنوک ءِ بلیو ٹک دور کنگ بیت اِنت –

ٹوئٹر ءِ سروک ایلون مسک ءَ تنی وھدی اے گپ ءِ راستیں پدراھی نہ کتگ بلے ٹوئٹر انتزامیہ ءِ رد ءَ ویریفکیشن ءِ کار ٹوئٹر بلیو ءَ چہ بیت اِنت-

چریشی ءَ چہ پیسر رپورٹ کنگ بیتگ ٹوئٹر بلیو ءَ سبسکریشن فیس 4.99 ڈالر ءَ گیش کنگ ءُ 19.99 ڈالر ماھینو بنت چریشی ءَ اکاؤنٹس ءِ راست کنگ ھوار اَنت ٹوئٹر بلیو سروس گوستگیں سال ءِ جون ءَ پدر کنگ بیتگ چریشی ءَ کارمرد کنوکاں ٹویٹ ءِ ایڈٹ کنگ ءَ جوانیں فیچرزاں کمک رس ایت-

اپریل ءِ ماہ ءَ ایلون مسک ءَ ٹوئٹر ءِ کارمرد کنوکاں ایڈٹ بٹن ءِ بارو ءَ لیکھانی زورگ ءَ ھپتاد درسد مردماں ھک ءَ وؤٹ داتگ ات –