بلوچستان ءِ مزن شھر شال ءَ یک شمبے ءِ سھب ءَ ترندیں تراکے ءَ لرز اِتگ کہ چہ شال کنٹ ءَ آیوکیں شٹل ٹرین جعفر ایکسپریس ءِ سر ءَ چمن پھاٹک ءِ نزیک ءَ اُرش کنگ بوتگ۔ تراک ءِ آسر ءَ ٹرین ءِ ھر سئیں بوگی ریل ءَ چہ در کپتگ اَنت ءُ دو کوچز چہ ریل ءَ کپتگ اَنت ءُ یک بوگی ءَ آس کپتگ۔
شٹل ٹرین ءَ ائید ءِ موہ ءَ گچینی سَے بوگیانی کانٹ ءَ چہ پاکستانی فوجی کارندہ کوئٹہ ریلوے اسٹیشن ءَ برگ ءَ اتنت کہ اودا آ جعفر ایکسپریس ءَ گوں ہمگرنچ بوہگ ءَ ات۔
واکدارانی رد ءَ ٹرین ءِ تہ ءَ 336 مسافر سوار بوتگ اَنت۔ اے وئیل ءَ کم چہ کم 27 کارندہ بیران بوتگ اَنت ءُ 131 ءَ چہ گیش ٹپیگ بوتگ اَنت۔ لھتے ٹپیانی جاور ھال نگیگ اَنت کہ ایشی ءِ سبب ءَ بیران بوتگیں مردمانی کچ گیش بوھگ ءِ گمان ھست۔ بیران ءُ ٹپیگیں کارندہ شال سی ایم ایچ، ایف سی ھسپتال ءُ سول ھسپتال ءَ سر کنگ بوتگ انت۔
بنداتی پٹ ءُ پول ءَ اے وئیل ءَ را وتکش اُرش گشگ بوھگ ءَ اِنت۔ تراک ءَ پد شنگ بوتگیں تامر بندانی تہ ءَ ریل ءِ ٹریک ءِ کش ءَ اوشتاتگیں گاڑی سوچگ ءَ گندگ بنت وھدے کہ چہ کپگ بوتگیں بوگیاں چہ دوت چست بوھگ ءَ اَنت۔ ریسکیو کارندہ، پولیس ءُ پورسز ءَ زوت دمگ انگیر کتگ ءُ ریسکیو آپریشن بندات کتگ۔
ریل ءِ وفاقی وزیر حنیف عباسی ءَ اے وئیل ءِ راستی کتگ ءُ گشتگ کہ تراک چمن پھاٹک ءِ نزیک ءَ بوتگ وھدے ٹرین شال کنٹ ءَ چہ روگ ءَ پد وتی روٹ ءَ بوتگ۔ آئی ءِ رد ءَ انجن ءَ ھوار سئے کوچز ریل پٹری ءَ چہ کپتگ اَنت وھدے کہ دو بوگی سرجم ءَ چہ ریل ءَ کپتگ اَنت۔
اے ارش ءِ زمہ واری بلوچ سلاہ بندیں گل بلوچ لبریشن آرمی ءَ من اتگ- گل ءِ جارکش جیئند بلوچ ءِ نیمگ ءَ شنگ بوتگیں بیانے ءَ گشگ بوتگ کہ اے اُرش بی ایل اے ءِ فدائین یونٹ ”مجید بریگیڈ“ ءَ کتگ۔ بیان ءِ تہ ءَ گْوشگ بیتگ کہ ”زورگریں پوج ءِ کارندہ “ ٹرین ءِ تہ ءَ سپر کنگ ءَ بیتگ اَنت ءُ آ نشانگ جوڑ کنگ بوتگ اَنت۔
’فوجی بردار‘ ءِ ٹرینانی سر ءَ اُرش:
اے وئیل ءَ بلوچستان ءَ بیوکیں اُرشانی برجاھی گْوشگ بیگ ءَ اِنت۔ بی ایل اے ءَ پیسر ءَ ھم ریل ءِ جاہ ءُ پاکستانی لشکر نشانگ جوڑ کتگ۔ اے ھترناکیں اُرشانی تہ ءَ بلوچ لبریشن آرمی ءَ ھم 9 نومبر 2024 ءَ شال ریل اسٹیشن ءِ سر ءَ اُرش ءِ زمہ واری زرتگ۔اے اُرش ءَ ھما فوجی کارندہ کہ چہ انفنٹری اسکول شال ءَ تربیت سرجم کتگ ات انت آ ’مجید بریگیڈ‘ ءِ نشانگ جوڑ کتگ اَنت۔
ھمے رنگ ءَ 11 مارچ 2025 ءَ جعفر ایکسپریس بولان ءِ دمگ ءَ ھائی جیک کتگ۔ اے آپریشن ءِ تہ ءَ بلوچ لبریشن آرمی ءِ مجید برگیڈ ءَ سداں پاکستانی الگار کتگ ءُ آیانی یلہ کنگ ءِ شرت جوڑ کتگ، بلے رند ءَ سرجمیں الگاریں فوجی کارندہ جنگی آپریشن ءِ آسر ءَ کشگ بوتگ اَنت۔
زانتکارانی رد ءَ بلوچستان ءَ گیش بوھوکیں اُرش ءِ رد ءَ اے گپ ءِ پدر کنگ اِنت کہ آجوئی ءِ گل نوں نہ ایوک ءَ دوریں دمگاں بلکیں ھاسیں شھری بنجل ءُ بنیاتی آسراتیاں ھم نشانگ جوڑ کنگ ءِ وس ءَ دار اَنت۔ ریل ءِ بنیاتی ڈھانچہ ءِ سر ءَ بار باریں اُرشاں پاکستان ءِ سیکورٹی ءِ بابت ءَ نوکیں جُست چست کتگ اَنت۔
مرچیگیں اُرش ءَ پد شال ءُ آئی ءِ کش ءُ گور ءِ دمگاں سیکورٹی ہائی الرٹ کنگ بوتگ ءُ ریل ٹریک، اسٹیشن ءُ گچینی جاھانی سر ءَ نگرانی گیش کنگ بوتگ ءُ نادراھجاہانی تہ ءَ ایمرجنسی ءِ جار جنگ بوتگ۔
بلوچستان کہ دھکاں چہ سلاہ بندیں زرمبشت ءِ گندگ ءَ اِنت، گوستگیں وھداں اے سلاہ بندیں کارروائیانی تہ ءَ گیشی گندگ بوتگ۔ اے گپ بلوچستان ءِ تہ ءَ سلاھبندیں گلانی زور ءُ مھکم ءِ نشانی اِنت۔
