TBP Balochi

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ پانزدہ مئی ءَ چہ بیست ءُ دو مئی ءِ میان ءَ بیست ءُ پنچ کاروائی کتگ انت، اشانی تہ ءَ زورگریں پوج، پولیس ءُ سی ٹی ڈی کارندہ نشانگ کتگ اَنت – سرمچاراں بُنجاھی شھدگ دستیگ یکشل ءَ برجاہ دارگ ءَ زورگریں پوج ءُ پُلپانچیں شرکتاں چہ ھمگرنچیں دو مردم دزگیر کتگ اَنت، وھدے کہ پُلپانچیں شرکتانی سائٹسانی سر ءَ اُرشانی میان ءَ مزنیں کچے ءَ مشینری مانداشتگ اَنت – اے اُرشاں زورگریں پوج ءِ ھژدہ کارندہ کشتگ اَنت ءُ بازینے ٹپی بیتگ اَنت، وھدے کہ میڑانی میان ءَ بی ایل اے ءِ دو سرمچار ھم نمیران بیتگ اَنت-

15 مئی :پنچگور ءِ دمگ گوارگو ءَ سرمچاراں “ڈیتھ اسکواڈ ” ءِ کارندہ سنگر گپتگ اُرش کتگ، چریشی ءَ سے کارندہ مرتگ ءُ پنچ ٹپی بیتگ اَنت- ھمے وڑ نوشکی ءِ دمگ کلی جمالدینی ءَ “ڈیتھ اسکواڈ ” ءِ کارندہ سائرس جمالدینی ءِ اوتاک سر ءَ بیڑبرتگ، بلے بے دلیں کارندہ ءَ وتی اوتاک یل داتگ ءُ تتکگ، سرمچاراں آئی ءِ اوتاک سرجمی ءَ مانداشتگ ءُ تباہ کتگ-

17 مئی : مستونگ ءِ دمگ دشت ءَ سرمچاراں زورگریں پوج ءِ واستا راشن برؤکیں یک گاڑی یے مانداشتگ – بسیمہ ءِ ھند سر ءَ سرمچاراں زورگریں پوج ءِ واستا راشن برؤکیں دگہ یک گاڑی یے گپتگ-

جارکش ءَ گوشتگ کہ زامران ءِ دمگ جابشان ءَ سرمچاراں زورگریں پوج ءِ پیادگ کارندہ یک آئی ای ڈی اُرش ءَ نشانگ کتگ اَنت، چریشی ءَ یک کارندھے جاہ پہ جاھی مرتگ ءُ یک ٹپی بیتگ-

جارکش ءَ گوشتگ کہ تربت ءِ دمگ للین ءَ سرمچاراں پاکستانی پوج ءِ شرکت ایف ڈبلیو او ءِ بُنجل ءِ سر ءَ اُرش کتگ، وھدے کہ اود ءَ ساڑی مزنیں مشینری ءُ دگہ گاڑی مانداشتگ اَنت- اے میان ءَ سرمچارانی دگہ یک ٹولی ءَ پیشگامی کنوکیں زورگریں پوج ءِ کاروان سنگر گپتگ ءُ نشانگ کتگ- اے اُرشاں زورگریں پوج ءِ سے کارندہ مرتگ ءُ بازین ئِے ٹپی بیتگ اَنت-

18 مئی : شال ءَ ڈگری کالج ءِ نزیک ءَ سرمچاراں زورگریں پوج ءِ یک پوسٹے ءِ سر ءَ گرینیڈ لانچر ءَ چہ بازیں گولھے آس داتگ سک تاوان رس اِتگ-

جارکش ءَ گوشتگ کہ سوراب ءَ سرمچاراں بُنجاھی شھدگ دستیگ کتگ پٹ ءُ پول کتگ، اود ءَ مڈی بروکیں یک گاڑی یے نشانگ کتگ، وھدے کہ پیشگامی کنوکیں زورگریں پوج ءِ یک کاروانے ءِ سر ءَ ھم اُرش کتگ، ھمے وڑ رودینجو ءِ ھند سر ءَ زورگریں پوج ءُ “ڈیتھ اسکواڈ” ءِ کارندہ سرمچاراں اُرش ءِ نشانگ کتگ اَنت، اے تُرندیں میڑانی میان ءَ بی ایل اے ءِ دو سرمچاراں سلمان پنّام ءِ فرزند ءُ آئی ءِ دگہ ھمراھے نمیران بیتگ-

جارکش ءَ گوشتگ کہ ھاران ریڈزون ءَ سرمچاراں ” سی ٹی ڈی ” ءِ کارگس سر ءَ اُرش کتگ، اود ءَ آیاں یکیں وھد ءَ پھازوکی چوکی ءُ کارگس گرینیڈ لانچر ءَ چہ نشانگ کنان ءَ بازیں گولھے آس داتگ-

19 مئی : تربت ءَ سرمچاراں ” سی ٹی ڈی ءِ کارندہ شبیر آسکانی اُرش ءِ نشانگ کتگ کشتگ ءُ آئی ءِ سلاہ برتگ – اے کارندہ دروگیں میڑاں بے میاریں ورنایانی کوش ءَ ھوار ٹارگٹ کلنگ ءِ بازیں وئیلاں تچکی ءَ ھوار بیتگ، وھدے کہ آ کسان سالی ئیں ورنایانی چمپروشی کنگ ءُ دگہ چاگردی سلّکاریاں ھم ھمگرنچ بیتگ-

جارکش ءَ گوشتگ کہ نوشکی ءَ مَل ءِ ھند سر ءَ سرمچاراں شال _ تفتان بُنجاھی شھدگ دستیگ کتگ پٹ ءُ پول کتگ، اے میان ءَ ریکوڈک پروجیکٹ ءَ ھمگرنچ ھپدہ مردم دزگیر کتگ اَنت- اشی ءَ پد اے مردم یکجاھی گل ایس آر اے کماندار انچیف سید اصغر شاہ ءِ گوشگ پد ءَ یل داتگ اَنت-

20 مئی : مستونگ ءِ دمگ کردگاپ ءِ ھند سر ءَ سرمچاراں شال _تفتان بُنجاھی شھدگ دستیگ کتگ دہ گاڑی گپتگ، آیانی تہ ءَ سرکاری ادارھانی واستا سامان بروکیں پنچ گاڑی مانداشتگ اَنت-

جارکش ءَ گوشتگ کہ کیچ ءِ دمگ بلنگور ءِ نزیک ءَ جتانی بازار ءِ ھند سر ءَ سرمچاراں زورگریں پوج ءِ دو گاڑی سنگر گپتگ نشانگ کتگ اَنت، اے اُرش ءَ زورگریں پوج ءِ کم چہ کم دو کارندہ مرتگ ءُ بازین ئِے ٹپی بیتگ اَنت، وھدے کہ یک گاڑی ءَ سک تاوان رس اِتگ-

جارکش ءَ گوشتگ کہ ھاران ءَ شال _ھاران بُنجاھی شھدگ سر ءَ بی بی آزاد گز ءِ ھند سر ءَ سرمچاراں زورگریں پوج ءِ بمب ڈسپوزل اسکواڈ ءِ کارندہ یک ریموٹ کنٹرول آئی ای ڈی اُرش ءِ نشانگ کتگ، چریشی ءَ یک کارندھے جاہ پہ جاھی مرتگ-

جارکش ءَ گوشتگ ھمے روچ ءَ مستونگ ءِ دمگ دشت پھنگو ءِ ھند سر ءَ سرمچاراں زورگریں پوج ءِ پیادگ کارندہ آئی ای ڈی اُرش ءِ نشانگ کتگ ، چریشی ءِ آسر ءَ دو کارندہ مرتگ اَنت-

جارکش ءَ گْوشتگ کہ پاکستان ءِ وزارت دپا ءِ کارکنوکیں ایئرپورٹ سیکیورٹی فورس ءِ ڈپٹی ڈائریکٹر ءُ کمانڈنگ افسر وسیم احمد سرمچاراں کلات ءِ بُنجاھی شھدگ سر ءَ یک انٹیلی جنس بیسڈ آپرشینے ءِ میان ءَ پجّار کنگ ءَ پد دزگیر کتگ- اے کاروائی بی ایل اے ءِ انٹیلی جنس ونگ ‘زراب’ ءِ داتگیں چیریں ھالانی بُنیاد ءَ کتگ-

جارکش ءَ گوشتگ کہ اے ایس ایف ءِ ڈپٹی ڈائریکٹر وسیم احمد ھما وھد ءَ دزگیر کتگ وھدے آ شال ءَ چہ کراچی نیمگ ءَ سپر ءَ بیتگ- مئے انٹیلی جنس ونگ زراب ءَ اے افسر ءِ سر ءَ بازیں ماھاں چی نگاہ داشتگ ءُ ژوب، شال ءُ کراچی ءَ آئی ءِ سر ھمکروچ چارتگ اَنت- اے افسر اشی ءَ ساری بلوچستان ءِ دمگ پنجگور ءَ ھم ساڑی بیتگ ءُ گیشیں جست ءُ پُرس برجاہ ءَ اِنت-

21 مئی : ھُزدار ءِ دمگ ونگو ءَ سی پیک دگ (M-8) دستیگ کتگ چیک پوائنٹس برجاہ داشتگ ، اود ءَ دو کلاکاں چہ گیش پٹ ءُ پول برجاہ داشتگ- اے میان ءَ پیشگامی کنوکیں زورگریں پوج سرمچاراں اُرش ءِ نشانگ کتگ، چریشی ءَ دُژمن ءِ بازیں کارندھے مرتگ ءُ ٹپی بیتگ اَنت، وھدے سرمچاراں دُژمن ءِ یک کواڈ کاپٹر (ڈرون) ھم جتگ ءُ دور داتگ-

جارکش ءَ گوشتگ کہ جھل مگسی ،کوٹرہ ءُ گندواہ ءَ بلوچ لبریشن آرمی ءُ یونائیٹڈ بلوچ آرمی ءِ سرمچاراں یکجاھی اُرشاں زورگریں پوج ءُ پولیس نشانگ کتگ- سرمچاراں کوٹڑہ تھانہ سر ءَ ھما وھد ءَ اُرش کتگ وھدے اود ءَ پولیس ءِ ھمراھی ءَ زورگریں پوج ءِ کارندہ ھم ساڑی بوتگ اَنت وھدے کہ گنداوہ ءَ سرمچاراں پولیس چوکی ءِ سر دستیگ کتگ ءُ آ مانداشتگ ءُ اود ءَ ھستیں سلاھاں ھوار یک کارندھے دزگیر کتگ،بلے اے کارندہ پد ءَ گل ءِ پالیسی ءِ رِد ءَ یل کتگ-

جارکش ءَ گوشتگ کہ زامران ءِ دمگ تگران ءَ وقائی ءِ ھند ءَ سرمچاراں زورگریں پوج ءِ پیادگ کارندہ آئی ای ڈی اُرش ءَ نشانگ کتگ سک جانی ءُ مالی تاوان داتگ اَنت-

جارکش ءَ گوشتگ پنجگور ءَ چیدگی دگ سر ءَ سرمچاراں دستیگ کتگ زورگریں سرکار ءَ سامان دیگ ءَ ھمگرنچ مزنیں گاڑی تاوان داتگ اَنت-

جارکش ءَ گوشتگ کہ دالبندین، چھتر ءِ ھند سر ءَ سرمچاراں شال _ تفتان بُنجاھی شھدگ دستیگ کتگ سیندک پروجیکٹ ءِ واستا تیل بروکیں گاڑیاں ھوات سامان برگ ءَ ھمگرنچ دگہ گاڑی مانداشتگ اَنت-

22 مئی : مستونگ ءِ دمگ دشت ءَ کلی شاھوانی ءِ ھند سر ءَ سرمچاراں زورگریں پوج ءِ بمب ڈسپوزل اسکواڈ ءِ کارندہ آئی ای ڈی اُرش ءَ نشانگ کتگ اَنت، چریشی ءَ دو کارندہ جاہ پہ جاھی مرتگ اَنت-

جارکش ءَ گوشتگ ھُزدار ءِ دمگ اورناچ ءَ سرمچاراں بُنجاھی شھدگ ءِ دستیگ کتگ سے کلاکاں تاں پٹ ءُ پول برجاہ داشتگ، اے میان ءَ دروشم مٹ کتگ سپر کنوکیں پاکستانی پوج ءِ یک کارندھے ءُ دگہ۔یک شکی ئیں مردمے ءِ وتی ھمراھی ءَ برتگ-

جارکش ءَ گوشتگ کہ ھُزدار ءِ دمگ وڈھ ءَ سونارو ءِ ھند سر ءَ سرمچاراں پاکستانی پوج ءِ بند ساچی شرکت ایف ڈبلیو او ءِ بُنجل ءِ سر ءَ اُرش کتگ اود ءَ ساڑی دہ ءَ چہ گیش گاڑی تباہ کتگ اَنت، وھدے کہ اے میان ءَ زورگریں پوج ءِ یک کاروانے سنگر گپتگ ءُ نشانگ کتگ چریشی ءَ سے کارندہ جاہ پہ جاھی مرتگ اَنت-

1. اے ھمگرنچیں کاروائیاں بی ایل اے ءِ گیش بوتگیں لشکری ءُ سیاسی پھتوئی ءِ تچکی ءَ دنت – یک نیمگے ریکوڈک پروجیکٹ ءِ ھبدہ ملازم ھواریں گل ایس آر اے ءِ سپارش ءُ گنداوہ ءَ دزگیریں کارندہ گل ءِ پالیسانی تک ءَ یل کنگ مئے گل ءِ شرپ ءُ سوبمندیں رھبند ءِ منانک انت – ایشی ءَ پدر کنت مئے جد ءُ جھد کورین لٹ شاپی ءَ ابید تچکیں منانکاں گوں بندوک انت دومی نیمگ ءَ مئے انٹیلی جنس ونگ ‘ زراب’ ءِ ھواریں آپریشن ءَ اے ایس ایف ءِ ڈپٹی ڈائریکٹر وسیم احمد ءِ دزگیری دشمن ءِ سرجمیں پھریزی نیٹورک ءِ واستا سکا ٹوھیں پروشی یے- چریشی ءَ گل ءِ پٹ ءُ پول برجاہ انت – شرپ ءُ شانی رھبندانی دارگ ءُ راجی مجرمانی گٹگیری ءِ تک ءَ املی گامگیجی کنگ انت – بی ایل اے نی بلوچستان ءِ سرزمین ءِ سر ءَ کانون سازگاری ءَ سرجمی ءِ زور ءَ داروکیں سرجم ءَ یک راجی لشکرے جوڑ بیتگ-

بلوچستان ءِ جتاجتائیں دمگاں چہ دگہ سے مردم زورانسری آوار جنگ بیتگ اَنت وھدے کہ یک مردمے ءِ یل کنگ بیتگ-

گیشیں ھالانی رِد ءَ کیچ ءِ دمگ چہ سید آباد کیلکور ءَ سیادی داروکیں نورالدین کریم ء کریم بخش ، کہ لسبیلہ یونیورسٹی آف ایگریکلچر، واٹر اینڈ میرین سائنسز (LUAWMS) اوتھل ءَ ڈی وی ایم ءِ نودربرے، چاردہ اپریل 2026 ءِ شپ ءِ کساس دو ءَ شال ءِ میست دگ ءَ چہ ایم آئی ءُ سی ٹی ڈی کارندھاں آوار جتگ ءُ بیگواہ کتگ-

دومی نیمگ ءَ ھُزدار ءِ دمگ نورگامہ زھری ءِ جھمنند 32 سالی ئیں عمران ء محمد بخش کہ مزدورے، پنچ اکتوبر 2026 ءِ چہ نورگامہ زھری ءَ پاکستانی پوج ءِ کارندھانی دست ءَ زورانسری آوار جنی ءِ نشانگ کنگ بیتگ-

ھمے وڑ ھرنائی ءِ دمگ جلال آباد سیادی داروکیں 23 سالی ئیں میر چاکر مری ء الٰھی بخش کہ یک درزی یے، چاردہ مئی 2026 ءِ شپ یازدہ ءَ ھرنائی بُنجاھی بازار ءَ چہ سی ٹی ڈی کارندھاں آوار جتگ ءُ بیگواہ کتگ-

ھُزدار ءِ دمگ چہ زھری ءَ سیادی داروکیں کمبیر خان ء علی محمد، کہ 16 مئی 2026 ءَ زورانسری بیگواہ کنگ بیتگ اَنت 19 مئی 2026 ءَ اسلام آباد ءَ وتی لوگ ءَ سر بیتگ اَنت-

بلوچ آجوئی لوٹوکیں سلاہ بندیں گل بلوچ لبریشن آرمی ءَ وتی آفیشل چینل ھکل ءَ بی ایل اے ءِ زالبولیں کماندار شھناز ءِ تامری کلوہ شنگ کتگ. اے اولی رند انت کہ بلوچ آجوئی لوٹوکیں زالبولیں سرمچارے میڈیایے دیم ءَ اتکگ ۔

تامر ءِ تہ ءَ کماندار شھناز بلوچ دگہ بازیں بلوچ سرمچارانی ھمراھی ءَ گندگ بیت کہ آ جنگی ھیلکاری کنگ ءَ انت ۔ تامر بلوچستان ءِ ناشناسیں جاھے ءَ کشگ بوتگ ءُ اود ءَ بلوچ سرمچارانی سواری ھم گندگ بنت ۔

بی ایل اے ءِ زالبولیں کماندار شھناز بلوچ وتی تامری کلوہ ءِ تہ ءَ گوش ایت کہ منی گلیں راجدپتر ءَ اے سابت کنت ، اے شاھدی ءَ دنت کہ دنیا ءِ تہ ءَ ھاسکر ارب ملکاں یا یورپ ءِ تہ ءَ زالبولانی چشیں شرپ ءُ کدرے نہ بوتگ بلے بلوچ چاگرد ءِ تہ ءَ ھما وھد ءَ زالبولانی شرپ ءُ کدر ازت بوتگ ءُ زالبول وتی مردینانی ھمراھی ءَ ھوار وتی ھمراہ زانتگ انت ، اشی ءِ پدریں درور مئے چاگرد ءِ تہ ءَ میر چاکر خان ءِ گھار بانڑی بلوچ انت کہ مرچیگ ءَ پنچ سد سال پیش آ بلوچ جنگ ءَ ھوار بوتگ ءُ وتی مردین سنگت کمان کتگ انت ءُچشین یکے ناں بازیں درور مئے چاگرد ءِ تہ ءَ ھست انت بلے اشی ءَ مئے بدبھتی گش ئے ، مئے نزوری گش ئے کہ ھما وھد ءَ انگریز کئیت ءُ سنڈیمن ءِ پرسودھیں نزام کئیت ءُ آئی ءَ چہ رند پاکستان پنجاپی ءِ پرسودھیں نزام کئیت آ مئے جنین ءُ مردین ءِ تہ ءَ پرک ءُ درک پیداک کنت ۔ آ مارا مئے دمگی زبان کلچر ، کلاں بھر کنت ۔

بلے مرچی منی راج ، بی ایل اے ءِ انکلابی اپروچ ءُ شاری ءِ وڑیں سنگتانی کربانی ءُایدگہ سنگتانی مھنت ءُ بلوچ راج ءِ دیمروئی کنوکیں سوچ ءِ بدولت ءَ مرچی ما بلوچ زالبول مردیں یک پرنٹ ءُ یکیں اوتاک ءَ انکلابی زندگی کنگ ءَ ایں ۔ مرچی من ءَ ھپت سال ءَ گیش ایں کہ من بی ایل اے ءَ گوں بندوکاں سپاھی ءَ بگر تاں کماندار ءُ اے سروکی ءَ سر بوتگاں من ءَ گل ءِ سنگتانی نیام ءَ کمو ھم جینڈر ڈیپرنسی مھسوس نہ بوتگ ءُ ناکہ منی سنگتاں من ءَ اے مھسوس کنائینتگ ۔ مرچی بی ایل اے ءِ انکلابی اپروچ ءَ مارا اے موہ داتگ کہ ما بیائیں وتی ریاست ءُ آزاتی ءِ جھد ءِ تہ ءَ وتی کرد ءَ پیلو بہ کن ایں ۔

آ دیمتر ءَ گوش ایت کہ مروچی اے تپنگ من ءَ تھنا وتی پھازگ ءَ ناں بلکیں شمئے پھازگ ءَ پہ گون ایں ، مروچی من تھنا یک تبکھے ءِ ھاتر ءَ ناں بلکیں سرجمیں بلوچ راج ءِ آجوئی ءَ پہ جھد ءَ آں ۔ اے تپنگ تھنا تیر جنگ ءِ ھاتر ءَ نہ ایں بلکیں اشی ءِ بیرل ءَ چہ در کپتگیں ھمک تیر مئے شمئے کلانی آزاتی ءُ باندات ءِ ھاتر ءَ انت ۔

منی راج شما یک منگھیں راج ئِے ، شما یک دلیر ءُ تمردیں راج ئے ، گڑا نوں ھاموش مہ بہ ئے ، اے ھاموشی شمئے شرپ ءِ بگیرداریں اے ھاموشی شمئے اِزت ءُ گیرت ءِ بگیرداریں ، بیا ات اے جنگ ءَ ھوار بہ ایت ۔ مرچی کہ مئے دژمن مئے سر ءَ ھنچیں منسوبہ بندی سازگ انت کہ آئی ءِ سان مئے نسل در نسل مئے بگیری ءَ کارمرز بنت. اگاں مروچی ما دژمن ءَ یک بے رھم ءُ بے پرواھیں جنگ ءِ نہ دات ما وتی تہ ءَ سستی ءُ کمی آرت ، وتی جنگ ءِ تہ ءَ لاپرواھی کت گڑا اشی ءِ ترسناکیں رزلٹ مئے شمئے دیم ءَ کائنت ۔ اے گپ ءَ یات کن ایت کہ اے بیمناکیں رزلٹ ءِ زمہ وار ما ءُ شما باں ۔

کماندار شھناز دیمتر ءَ وتی کلوہ ءِ تہ ءَ گوش ایت کہ ما وتی گھاراں گشاں ما اے جنگ ما اے جنگ ءَ ھوار بوتگیں مارا انگت ھوار بوگی ایں ۔ مارا جزبات ، شوک ءُ ھیروازم ءِ بنیاد ءَ ھوار بوگی نہ ایں ، مارا الم ءُ زانت ءُ دانائی ءِ پلسپہ ءِ بنیاد ءَ ھوار بوگی انت ۔ پرچاکہ اے جنگ مئے ءُ شمئے سر یَ پرز انت مارا اے جنگ ءَ ھوار بوگی ایں ۔

منی گودیاں مرچی کہ مئے دژمن پاکستان ءُ پنجاپی مئے مال ءُ مڈیانی لٹ ءُ پل ، مئے چکچینی ، مئے تباھی ءُ بربادی ءِ ھاتر ءَ ءُ وتی زورگیریں استان ءِ رکینگ ءِ ھاتر ءَ پوج ءَ بگر وتی جتا جتائیں ادارھاں زالبولاں ھوار کنت ءُ دومی نیمگ ءَ وتی مالی پائدگ ، بلیک میلنگ ءُ در انسانی رویشت ءِ لس زالبولاں مئے جھدے بگیری ءَ کارمرز کنت وھدیکہ ما وتی پھازگ ءِ ھاتر ءَ ، ما وتی سرزمین ءِ آزاتی ءِ ھاتر ءَ وتی راجی پوج بی ایل اے ءَ ھوار باں گڑا ادبءَ پنجاپی ءِ ٹسل ءَ بہ چار کہ اد ءَ ناجائز ، برین واش ءُ کارمرزی ءِ نام ءَ دنت پرچا ؟

زالبولیں کماندار وتی کلوہ ءِ تہ ءَ گوش ایت کہ منی گھار ءُ براتاں مرچی کہ گل ءَ اے زمہ واری منی کوپگاں داتگ ما اے زمہ واری ءَ پرز ءِ سرپد باں ءُ مارا کلاں ھمے وڑ سرپد بوگی ایں ۔ پرچاکہ مئے ازت ، مئے شھرت ، مئے کدر کل گوں آزات بلوچستان ءَ گوں بندوک انت ۔ وھدیکہ ما وتی سرزمیں آزات نہ کت گڑا مئے شرپ ءُ ازت تھنا یک گلامی ءِ بستار ءَ بیت ءُ گلام ءَ چہ ابید دگہ ھچ ارزتشت نہ بیت مارا اے پوہ بوگی ایں سرپد بوگی ایں ۔

کمانداریں شھناز دژمن ءَ دلگوش گور کنائین ایت ءُ گوش ایت کہ مروچی من دژمن ءَ گشاں ، من ءَ چہ پیش ھم ترا سنگتاں گوشتگ کہ مئے بلوچستان ءَ چہ در بیا ، وتی اے تاکت ءِ گمنڈ ءَ چہ درا ءُ زمین ءِ راستی ءَ سرپد بہ بو کہ ما وتی سرزمین ءِ آجوئی ءِ ھاتر ءَ آکری ھد ءَ تاں رویں ۔

تو مدام بلوچ جنین یک سوفٹ ٹارگٹ ءِ پھم اتگ بلے نوں چوش نہ ایں ، نوں ھمے جنین اے زمین ءِ سر ءَ وتی گڈی سپاھی ءَ تاں گوں تو جنگ کنت ۔ تو ھمے پھم اتگ کہ تو مارا بیگواہ کن ئے ، بندیگ کن ئے ، مارا کش ئے ما ھاموش بہ ایں گڑا بچار مرچی کہ بلوچستان ءِ جنک چوں تئی سرا کھر آماچ انت ۔ ما گوں اے تپنگ ءَ وتی سرزمین ءِ سر ءَ تئی ھاکمی ءِ ھلاسی ءِ جار ءَ جن ایں ۔ گوستگیں سال ءَ ما تئی درسیں ھنر ءُ تاکت دیستگ انت بلے ھنگت منی توکل چہ اے کوھاں برزتر انت ۔

آ گوش ایت کہ یاد کن نوں مئے جنگ تھنا رکینگ ءِ جنگ نہ ایں نوں ما وت ءَ تئی ھما جاہ ءَ سر کن ایں کہ تئی گمان ءَ نہ بوتگ ۔ وھدیکہ منی یک سرمچارے تئی سر ءَ آس گوار ایت گڑا بہ زان اے جنگ ءِ نقشہ ھمے بلوچ جنک ءَ تیار کہ تو نزور ءُ کمزور ءِ زانتگ ۔

او لگوریں دژمن وتی چماں پچ کن بچار مرچی اے ورنا ، کماش ، زالبول ھر بلوچ وتی سرزمین ءِ آزاتی ءِ ھاتر ءَ مرگ ءَ تیار انت ، تئی اے بزدل ءُ زر زیریں پوج وھدیکہ منی سرمچارانی دیم ءَ کپ انت گڑا وتی زندگی ءِ ھاتر ءَ گریو انت ۔

اے جنگ داں تئی ھلاسی ءَ برجاہ انت ، تو گوں وقتی پروش وارتگیں پوج ءَ بیا ما زمین پھاز پرتو نشتگ ایں ۔ اے جنگ نوں ھما جاہ ءَ سر ایں کہ گوں تو دارگ نہ بیت تئی ھاتر ءَ شرتر ھمیش انت کہ مئے زمین ءَ یل کن وتی جان ءَ کش اگاں ناں ادا پرتو زندگی ھرام انت ۔

او ما گوں تو دیم پہ دیم باں ترا گشاں تو لگورے ءِ ، تو بزدل ئے ، تو کاتل ئے ، تو زالم ئے ، تو زوراک ئے ۔ ناں ترا تاریک ھست ، نا ترا تھزیب ھست تو بدتھزیب ایں راج ئے ۔ ما وتی سرزمین ءِ پھازوکاں ، ما وتی سرزمین ءِ رکینوکاں ، مارا راجدپتر ھست ، مارا دودمان ھست ءُ ما وتی کرتناں چہ ، کربانیاں چہ ، پدر کنیں کہ اے راج ریاست چون بنت ۔ سوبمندی مئیگ ایں ءُ سوبمندی دژمن ءِ باندات ایں ۔

 ویڈیو

ھزدار ءِ نندوکیں جنینے ءَ پریس کانفرنس کنان ءَ انساپ ءِ لوٹ کتگ۔

شال پریس کلب ءَ پریس کانفرنسے کنان ءَ ھزدار ءِ نندوکیں زالبولے ءَ گشتگ کہ عبدالمالک پنام ءِ مالو ءَ آئی ءِ یک زھگے خضدار ءَ کُشتگ ءُ دومی تھتیگ کتگ ءُ آھانی زمینانی سر ءَ دستیگ کتگ۔

زالبول ءِ گشگ ءِ رد ءَ گْوشگ بیتگیں مردم کہ بلوچستان ءِ پیسریگیں سر وزیر ثنا اللہ زھری ءِ سرپرست اِنت ءُ آئی ءِ نائب اِنت آئی ءَ منی چکانی سر ءَ اُرش کنگ ءَ پد من ءَ چہ دمگ ءَ درکُتگ۔

زالبول ءَ بھتام جتگ کہ آئی ءِ لوگ ھم دست گپتگ اَنت بلے دمگی انتزامیہ ءُ پولیس ثنا اللہ زہری ءِ سان ءِ چیر ءَ اَنت ءُ آئی ءَ را انساپ دیگ ءَ بے سوب اَنت۔

جنین ءَ لوٹ کتگ کہ بلوچستان سرکار آئی ءِ دزبندی ءَ گوش بہ دار ایت ءُ وئیل ءَ ھواریں ڈپٹی عبدالمالک ءُ آئی ءِ ھمراھانی ھلاپ ءَ کارروائی بہ کنت ءُ آیاں انساپ بہ دنت۔

بلوچستان ءِ دمگ کیچ مند ءَ پاکستانی پورسز ءِ بنجل ءِ سر ءَ گوستگیں روچ ءَ سلاہ بندیں مردمانی اُرش کتگ۔

پورسز ءِ بنجل مند سورو دمگ ءَ نشانگ جوڑ کنگ بوتگ۔

ھالانی رد ءَ اے اُرش ءَ لشکر ءَ تاوان رس اتگ بلے انگت ءَ واکدارانی ھال ءُ اھوال پدر نہ بوتگ۔

زانگ بہ بیت گْوشگ بیتگیں دمگ ءَ بلوچ آجوئی لوٹوکیں سلاھبند پرکار اَنت بلے اُرش ءِ زمہ واری انگت ءَ کس ءَ نہ زرتگ۔

بلوچستان ءِ بُنجاھی شھدگانی سر ءَ بلوچ آجوئی لوٹوکانی دستیگ ،مڈیانی بروکیں گاڑیانی سر ءَ اُرش، اسنیپ چیکنگ، پاکستانی فوجی کارندھے دزگیر-

ھُزدار ءِ دمگ چہ اورناچ ءَ پاکستانی پوج (ایف سی) ءِ یک کارندھے سلاہ بندیں مردماں پجّار کنگ ءَ پد دزگیر کتگ- اِھوالکار ءِ رِد ءَ پشمبے ءِ روچ ءَ اورناچ ءِ ھند سر ءَ بلوچستان سندھ ءَ چہ ھمگرنچ کنوکیں بُنجاھی شھدگ این – 25 سر ءَ سلاہ بندیں مردماں مزنیں کچے ءَ شھدگ دستیگ کنگ ءُ اسنیپ چیکنگ بندات کتگ-

اِھوالکار ءَ ٹی بی پی ءَ گْوشتگ کہ میان ءَ پٹ ءُ پول ءَ سلاہ بندیں مردماں یک مسافر بس ءَ چہ پاکستانی پوج ءِ کارندہ ءِ پجّار کنگ ءَ پد دزگیر کتگ وھدے اے میان ءَ سلاہ بنداں دگہ یک مردمے ھم وتی ھمراھی ءَ برتگ-

ھمے وڑ وڈھ ءَ سونارو ءِ ھند سر ءَ سلاہ بندیں مردماں شھدگ سر ءَ ناکہ بندی کتگ ءُ پوجی بند ساچی شرکت (ایف ڈبلیو او) ءِ سائٹ اُرش ءِ نشانگ کتگ اود ءَ شرکت ءِ کرش پلانٹ ءَ ھوار اود ءَ اوشتوکیں بازیں گاڑی یے مانداشتگ-

چہ اورناچ ءَ پوجی کارندہ دزگیری انچیں وھدے ءَ بیتگ وھدے کلات ءَ بُنجاھی شھدگ سر ءَ بلوچ لبریشن آرمی ءَ اسنیپ چیکنگ ءِ میان ءَ ایئرپورسٹ سیکورٹی فورس (اے ایس ایف) ءِ ڈپٹی ڈائریکٹر آوار جتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ زورگریں پاکستان پوج ءِ وزرات دپا ایئرپورٹ سیکورٹی فورس(اے ایس ایف) ڈپٹی ڈائریکٹر ءُ کمانڈنگ افسر وسیم احمد مئے دستیگ اِنت-

جارکش ءَ گوشتگ کہ اے کاروائی بی ایل اے ءِ انٹیلی جنس ونگ زراب ءَ داتگیں چیریں ھالانی بُنیاد ءَ کتگ-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ زورگریں پاکستان ءِ وزرات دفاع “پھاز” ایئرپورٹ سیکورٹی فورس (اے ایس ایف) ءِ ڈپٹی ڈائریکٹر ءُ کمانڈنگ افسر وسیم احمد مئے دستیگ اِنت – بی ایل اے ءِ سرمچاراں آ کلات ءِ بُنجاھی شھدگ ءِ سر ءَ پجّار ءَ پد دزگیر کتگ- اے کاروائی بی ایل اے ءِ انٹیلی جنس ونگ زراب ءَ داتگیں چیریں ھالانی بُنیاد ءَ کتگ – گیشیں ھالاں زوت رسانکدر ءَ شنگ کن ایں-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءَ گْوشتگ کہ اے پالیسی بیان ءِ درشان ءَ بی ایل اے تچکی ءَ بلوچ راج ، دراھیں سیادی داروکیں تک ءُ پھنات ءُ سرجمیں دگنیا ءَ پہ تاوان ءِ ھاتر ءَ آوار جنگ ءِ جیڑہ ءِ سر ءَ وتی ھاسیں ءُ ھروھدی گل ءِ پالیسی ءِ بابت ءَ سرپد کنت، دانکہ بلوچ راج اے گپ ءَ سرجمی ءَ سرپد بہ بیت کہ بی ایل اے ءِ گل ءِ نزریات چی انت – گل وتی راج ءِ پھریزگ ءِ ھاتر ءَ اوشتاتگ۔

آئی ءَ گوشتگ بی ایل اے بلوچستان ءِ راجی آجوئی ءُ وت واجھی ءِ جنگ ءَ کنگ ءَ انت ۔ ما اے گپ ءَ پدر کنگ لوٹیں کہ بی ایل اے وتی مالی وسیلگ پیداک کنگ ءِ ھاتر ءَ تاوان ءِ ھاتر ءَ آوار جنگ ءِ وڑیں درکانودی ءُ چاگردی ھلاپیں پندل وڑیں جاوراں جائز نہ لیک ایت۔ ھل ءِ یک بے مٹیں پالیسی یے کہ بی ایل اے ھچبر تاوان ءِ ھاتر ءَ آوار جنگ ءِ تہ ءَ ھوار نہ بیت۔ مئے لشکری ​​پھنات کار ایوک ءَ زورگیریں ریاست ءِ لشکر ءُ آئی ءِ لُٹ ءُ پُلی ادارھانی ھلاپ ءَ اِنت نہ کہ بے گناھیں شھری، تاجر یا دمگی مردمانی ھلاپ ءَ نہ انت۔

جارکش ءَ گوشت کہ جتا جتائیں دمگانی نیمگ ءَ چہ ھال اتکگ کہ لھتے جرمکار بے گناھیں مردمانی آوار جنگ ءَ پد بی ایل اے ءِ نام ءَ تاوان ءِ لوٹ ءَ کنگ ءَ اَنت۔ ما اے گپ ءِ پدر کنگ ءَ المی لیکیں کہ اے وڑیں درستیں ٹولی گوں بی ایل اے ءِ گل ءِ بنچک، نیٹ ورک یا کجام ھم سرمچار ءَ ھچ وڑیں سیادی نیست۔

دیمتر ءَ جارکش ءَ گْوشتگ: بی ایل اے بلوچ راج ءَ کڈن کنت کہ گل ءِ نام ءَ لوٹ اتگیں ھرچ وڑیں تاوان ءَ مہ دئے اَنت۔ اگاں کسے یا گلے بی ایل اے ءِ نام ءَ تاوان ءِ لوٹ ءَ کنت گڑا زوت چہ گل ءِ نزیکیں ءُ آفیشلاں نزیکی بہ کنت۔ بی ایل اے شکایت کنوک ءِ پجار ءَ سرجم ءَ رازداری ءَ دارگ ءِ وھد ءَ اے وڑیں ٹولیانی ھلاپ ءَ سکیں کارروائی کنت۔ بی ایل اے نہ ایوک ءَ زانشتی سنچ ءِ درچ ءَ بلکیں املی تَک ءَ تاوان ءِ ھاتر ءَ آوار جنگ ءَ ھواریں مھلوک ءِ ھلاپ ءَ جنگ ءَ برجاہ دار ایت۔

كوه ءِ ماران ءَ اوشتاتگ اِت آں مئے پاد ءُ سَواساں سپر کُتگ

نبشتہ کار: ھیال بلوچ

دی بلوچستان پوسٹ

من چوناھا نبشتہ کنگ نزاناں بلے وھدے کہ منی ھمبل چہ زمین کُربان بوت گڑا من وتی دردانی كِسہ نبشتہ کنگ بندات كُت، بلے من زانگ ءَ ￴نہ آں کہ من چے نبشتہ کنگ ءَ ￴آں پرچا کہ منی ارس رِچگ ءَ اَنت۔

آئی ءِ ￵جنگ ءِ ￵تہ ءَ كُبار بيت ءُ بھار بيت ءُ سنگت روان بنت گو سِنگ ءُ جلاں، لھتیں مھروان همراہ بنت، سنگت بنت کہ مئے میان ءَ نشتگ بوتگ اَنت بلے انگت ھمے مھروان مئے میان ءَ چے پاد کاینت پہ گُلزمین ءَ وت ءَ كُربان كن اَنت،
ءُ پد ءَ واتر نہ بنت۔ گڑا یک روچے بیت کہ مھروان ءِ اکس شِنگ بنت، پد ءَ مردُم ءِ ساہ ھاموش بیت ءُ ھیران بيت۔

آئی ءِ کسہ شاکو ءُ گوھرو ءِ گِنت۔۔۔

منى کوہ ءِ ماران : من نزانتگ كہ شُمئے کِسہ ھمے وڑ ءَ بيت كہ يکیں سال ءِ ￵تہ ءَ ماتیں بندر ءِ كنٹ ءَ کربان بہ اِت ۔ بلے من جزماں کہ شُمئے رتکگیں ھون پہ زمین ءَ الم رنگ کار اِيت۔ جوناها منزل هر وڑ ءَ ￴زیبدار بیت بلے یات ءُ سپر ھمراہ بنت همے هاتر ءَ ￴اگاں سپر بيت گُڑا شوکیں مساپر بنت۔من آئی ءِ ￵درد نزانتگ كہ یک سنگتے وھدے شهيد بيت مردُم چو بيت!من هر كسے نبشتہ کہ ديستگ ءُ دربُرتگ بلے انگت من ءَ ￴سما نہ بوتگ كہ کجام پیم ءَ ￴بیت۔ وهدے کہ شاكو ءُ کوهرو رَپت اَنت من سرپد بوتاں كہ اے درد چون اِنت۔ ءُ من گوشاں آئی ءِ درد ءَ چم مکپات کہ وهدے مهروان ءِ همبل لڑاں چہ زمين گڑا زِند سک بے تام بيت، ءُ زمین ءِ ھر کنڈ ءِ چارگ ءَ انسان نا اُمیت بيت،
پرچا کہ ھر چیز ھمشانی يات ءَ دنت۔

مهروانىں شهيد سلمان ھمل وتی نِبشتانک ءِ تھ ءَ همے درور كنت کہ ” ما بايدیں وتی شهيدانى سر ءَ ￴بوان ءُ ￶بزان ایں ۔ ما پرچا کہ، (نلسن منڈيلا و ميكيڤلى) ءُ ديگر سر ءَ ￴وانگ ءَ ایں وھدے کہ مئے جِند چہ سرڈگار كارستاں پُر اِنت”۔ همے كارست انت كہ وتی ساه ءُ ￶جان ءِ ندر كُتگ پہ بلوچ هستانک واستا۔
ھبر ءِ جِند تھنا اے نہ اِنت کہ ما توکل ھُدا بہ کن انت چوناھا ھبر کار ءِ ￵جند ءِ کنگی ئیگ اِنت۔ ءُ منى چم ءَ آئی ءِ كارست آئی کار كنوک مردم شاكو ءُ گوهرو انت۔ كہ کادو چے وتی ڈيگرى زورگ بدل ءَ وتی جان داتک پہ زمین ءَ۔ ايشاں زانتک کہ بلوچ نودربراں هستیں وھد ءِ تہ ءَ ڈيگری زلورت نہ اِنت بلکے ھمے زمين زلورت اِنت، وهدے کہ زمین بيت گڑا درُست بيت۔

من یک نبشتھے ونتگ انت ءُ من ءَ ￴سک دوست بوت۔اے نِبشتہ ءِ تہ ءَ ￴نبشتہ ات “ما درُست سرپدیں کہ اے وهد ءَ گیشتریں نودربر سرکاری نوکری ديم ءُ دست انت۔ بلے آ نودربر ءَ ھمے سرپد بوگی اِنت كہ سركارى نوكرى يک اِستانے ءِ جوڑ کُتگیں پروپیگنڈایے ءِ وڑ ءَ ￴اِنت کہ ما بلوچ رد بوریں”۔ من ءَ انگت ياد اِنت شهيد گوهرام ھمے ھبر ءِ سر ءَ اِستان ءَ كلاگ بند ایت۔۔ کہ اے چیز نوں یک بیماری ءِ رنگ ءَ مئے چاگرد تہ ءَ تالان اِنت، اے اِستان لوٹ هميش اِنت كہ مئے نودربر پہ اے آئی ءِ کارا بہ کن اَنت ءُ آئی ءَ ھر وھد ءَ پائندگ بہ دے اَنت ءُ دوھمی نیمگ ءَ اِستان آھاں وش ھال ءِ زند ءِ لالچ ءَ دنت۔ بلے سِتک ھبر ايشى اِنت كہ استان بلوچ ءَ وش هالی ءِ تھا گيندگ نہ لوٹ ایت۔

اِد ءَ پد ءَ انچو کہ شھید سلمان ھمل ءَ وتی کتاب ءَ نبشتہ کُتگ “وتارا چہ استان ءِ پروپیگنڈا رکینگ ءِ راہ اِیش اِنت کہ ما ءُ شُما ھما چیز ءِ شِنگ بہ کن ایں کہ مئے جھد ءِ گون بندوک اَنت۔ آ چیز ءَ شِنگ مہ کن ایں کہ گون استان ءِ بندوک اَنت”۔ ھمے وڑ ءَ ￴سركارى نوكرى جِند گو اِستان ءَ بندوک اَنت، ما پہ اے سی ءُ دی سی جوڑ کنگ ءِ بدل ءَ اگاں وت ءَ ￴يک شریں بلوچے جوڑ بكن ایں ءُ سِتک بِزان ایں کہ اے سی ءُ ڈی سی بلوچ آسل ءَ نپ نہ دنت ءُ بلوچ اگاں چِیزی نپ دنت آ جنگ ءِ جِند اِنت، همے جنگ کہ بلوچ ءَ رکین ایت ءُ سوبمندى ءِ نيمگ ءَ ￴بارت۔ مروچيگیں نودوبراں سرپد بوگی اِنت كہ سركارى نوكرى زورگ بہ زان وت ءَ ￴اِستان ءِ كِرا بھا كنگ اِنت.

بہ گندے اے سرزمین جیڑہ آجوئی نہ اِنت بلے هميش اِنت کہ گُلزمین وتی پسگانى کُٹ ءَ مھر انت۔۔۔! شاکو جان ءُ ميچر پُل وهدے شُمئے يات منى دِل ءَ كاینت من تچان پہ پرچاکہ من نہ لوٹاں من ارس بہ رِچ اَنت ، من لوٹاں من مُھكم بہ باں، بلے اسل ءَ بوت كنک ءَ نہ انت ءُ۔۔ من زاناں کہ هزار سر پہ جنگ ءَ كُربان بوتگ انت ءُ هزار انگت بيت۔ اے مزنیں جنگے، ءُ آئی ءِ جنگ ءِ تھ ءَ ماں ھُدا ءَ نزاناں بلے وھدے کہ شھیدانی کُربانیانی گِنداں گڑا مارا ھُدا دوست بيت، ءُ مارا چہ ھُدا ءِ ندیستگیں بھشت ءِ ندارگاں ءَ زمين گيش دوستر بيت۔

كوه ماران هما دو مُھكمیں كوه انت كہ يک كش انت ءُ آئی ءِ جھل ءَ يک گونڈیں ساهِگے۔ آئی ءِ دویں تچكى كوه شاكو ءُ گُوهرو انت ءُ ساهِگ ما انت كہ مئی واستا وتی ساه اش كُربان كُتگ۔

او پُل ءُ گُلاب! او گُلزمين ءِ رنگ! شُمے ديوان ءُ مهر يات انت۔! شُمئے گل بوھگ وھدے کہ شُما زانتگ كہ پہ زمين ءَ وتَ ءَ ￴کربان كن ایں بلے پد ءَ ￴هم شُما بچکند اتگ، ءُ اسل ءَ جنگ ءِ زیبائیں جِند هميش اِنت كہ ما گو بيچکندگاں گُلزمين ءِ واستا وت ءَ ￴كُربان بہ کن ایں۔ ھمے وڑ ءَ ￴گوهرو ءُ شاكو پہ اے ڈولداریں بزيں جنگل ءِ ￵اے ساپ ءُ پلگاریں تياب ءِ اے گُلزمين ءِ واستا وت ءَ ￴كُربان کُت۔ شاکو ءُ گوھرو جان ءَ مارا ھمے سرپدی داتگ کہ وتى راج ءِ وش هالى یے مارا وتى جِند ءِ جهد ءَ چى آرگ ءِ اِنت، ءُ جھد ءِ جِند جنگ اِنت۔

شاكو جان ءَ مُدامى ھمے گپ كُتک کہ ما اے هاتر ءَ ￴تُپنگ چست نہ کتگ کہ مارا زوراکی کنگ دوست بیت بلکیں ما همے هاتر ءَ ￴چست کُتگ کہ ما یک انچیں بدواهے ءَ گوں دیم پہ دیم انت کہ آ پاکستان اِنت ءُ آئی ءِ گپ ءُ هبر ءِ سرجمیں دروازگ بند کُتگ انت ءُ تھنا تُپنگ ءِ زبان ءِ سرپد بیت۔ پمیشکا جنگ گوں تُپنگ المی اِنت پہ بلوچ راج ءَ۔ شاكو جان مُدامى نزرياتى سنگت بوتگ کہ آئی ءِ ￵ وتی كُتگیں گپانی سر ءَ ￴امل كُتگ ءُ ایمان داشتگ کہ سرزمین الم آجو بيت ءِ۔

گوهرو مات ءَ هر وهد ءَ ￴گوشتگ کہ “گوهرام جان تئی سالونکی ءِ مُراداں گيندگ لوٹ آں” بلے گوهرو ءِ بانور زمين بوتگ کہ در كبت ءُ شُت بولان ءِ كوه ءَ پہ شان ءُ وت ءَ ￴ مُهكمى کت۔ پرچاکہ جنگ ءِ ءُ هون تہ ءَ ￴وشیانی کِسّہ بوت نہ کنت گوھرو ءَ مُدام مئے وڑیں نابود مردُم سرپد کُتگ اَنت، آئی ءِ ￵گور ءَ ما مُدام بلوچ راجدپتر ءِ هیل کنگ ءَ ￴ ات ایں بلے ما نہ زانت کہ گوهرو ھم وت ءَ ھما بامردانی سرپ ءِ نگاه کنگ ءَ ￴اِنت۔

شاكو ءُ گوهرو پُل! كُربان!

اے کوه ء ماران چی ما سِکتگ کہ مارا تھنا وتی جند ءِ هيالداركى نہ اِنت نا کہ وتی لوگ ءِ مردُمانى، مارا درچک ءُ دار ءُ كوهانى تہ ءِ ساهدار ھست انت کہ ايشانى هيالدارگ مئے زمہ وارى اِنت۔ چوناها انسان ءَ چی ابيد هما توم اِنت كم زمين ء جير ءَ كل اِنت آ هم هاكانی چيرا
بند بوهگ نہ لوٹ ايت آ ڈن ءَ درایگ لوٹ ايت ءُ رواج ءَ گوات ورگ لوٹ ايت پرچاكہ آجوئى هركس لوٹ ايت انسان بہ بيت يا جَناور يا درچک ءُ دار۔

گوھرو ءُ شاہ ءِ مستریں مَن ءُ مراد همیش بوتگ کہ بلوچ اے سکی وهد ءَ ھمراہ بہ انت ءُ زمین آجو بہ بيت۔ هميش اِنت گُلزمين! هميش انت بلے بچ کہ وت واجھی شُتگ انت ءُ وتارا واجھے لیک اتگ ءُ رپت انت ۔

شُمئے وشبو گُلزمین ءِ ھمُک دمگ ءُ پٹاں تالان اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-