TBP Balochi

روکپتی بلوچستان ءِ بنجاھی شھر زاھدان ءَ سیادی داروک ملا چھبار ءَ ایرانی چیریں ادارھاں آوار جتگ ءُ برتگ-

سنی آنلاین تندجاہ ءِ رد ءَ ایرانی چیریں ادارھاں یک نیکراھی وانگجاھے ءِ استادے آوار جنگ ءَ پد بیگواہ کرتگ-

آوار جنگ بیتگیں مولوی ءِ پجار امان اللہ سعدی ءِ نام ءَ زانگ بیتگ ءُ آ دارلعلوم زاھدان ءِ مستریں استاداں چہ یکے آ پھازگی واکداراں گپتگ ءُ برتگ-

مولوی امان اللہ سعدی دینی وانگجاھانی موکلانی وھد ءَ چھبار ءَ شتگ ءُ اود ءَ آ دزگیر کنگ بیتگ ءُ پد ءُ بیگواہ کنگ بیتگ-

آئی ءِ کھول ءَ آئی ءِ بیگواھی ءِ پد جنگ ءَ بازیں جاھاں پٹ ءُ پولی کتگ بلے داں انگت ءَ آئی ءِ بارو ءَ ھچ سرپدی نیست اِنت-

سنی آنلائن ءَ ھالانی درور دیان ءَ گوشتگ چہ ایشی ءَ پیش مولانا عبدالمجید مراد زئی، مفتی رضا رخشانی ءُ مولوی عبدالرؤف رخشانی کہ ایرانی واکداراں آوار جتگ ءُ بیگواہ کتگ اَنت –

سنی آنلائن ءَ ھالانی دمگی ھالانی درور دیان ءَ گوشتگ کہ زاھدان ءَ نیکراھی مردمانی دزگیری ءِ سبب مولانا عبدالحمید سیاسی دیدانکانی دیمپانی ءِ سبب ءَ بوگ ءَ اَنت –

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں ھرنائی ءِ دمگ شاھرگ زورگریں پاکستانی پوج ءِ توژگ دیوکیں کارندہ دو جتائیں بمب اُرشاں نشانگ کتگ اَنت، چریشی ءَ یک کارندھے مرتگ ءُ چار ٹپی بیتگ اَنت-

جارکش ءَ گْوشتگ کہ بی ایل اے ءِ سرمچاراں مروچی سھب ءَ شاھرگ ءِ دمگ کھوسٹ ءَ زورگریں پاکستانی پوج ءِ یک نوکیں بُنجلے ءِ جوڑ کنوکیں کارندہ ھما وھد ءَ بمب تراکے ءَ نشانگ کتگ اَنت وھدے کہ آ بُنجل نیمگ ءَ روگ ءَ بیتگ اَنت، گاڑی ءِ راہ ساپکنوکیں کارندہ تراک ءِ نشانگ ءَ آھگ ءَ چہ ھما دمان ءَ مرتگ وھدے کہ گاڑی ءَ سوار دو کارندہ ٹپی بیتگ اَنت-

جیئند بلوچ ءَ گْوشتگ کہ سرمچاراں اے کارندہ ٹریپ کنگ ءِ ھاتر ءَ اے ھند ءِ سر ءَ دگہ یک بمبے چیرکتگ چریشی ءِ نشانگ ءِ آھگ ءَ چہ دگہ دو کارندہ سک ٹپی بیتگ اَنت-

جیئند بلوچ ءَ دیمتر ءَ گْوشتگ کہ بلوچ لبریشن آرمی اے اُرشانی زمہ واری ءَ منّ اِیت- آجوئی ءِ ڈیھ ءِ مول مراد ءَ تاں زورگریں پاکستانی پوج ءُ آئی ءِ کمکارانی سر ءَ اُرش ءَ برجاہ بنت-

بلوچستان ءُ ایرانی سیمسر ءِ نزیک ءَ جیرک کلگ کور ءَ پاکستانی پوج ءِ تیرگواری ءَ تیل باپاری کنوک مسلم ء شھسوار جھمنند گومازی دز پروم زدگ بوتگ –

وھدیکہ تیرگواری ءَ بازیں گاڑیانی ٹیل ءِ مشک ترک اِتگ انت ءُ مردماں لکّانی کلدار ءِ تاوان بوتگ –

پروم بارڈر کمیٹی ءِ عابد اشرف ءِ رِد ءَ تیل کشیں ھما گاڑیانی سر ءَ تیرگواری کنگ بوتگ کہ واکدارانی داتگیں لڑ آھانی نام ھست انت کہ آھانی تہ ءَ فدا احمد جائین غریب آباد پروم، اللہ بخش جائین غریب آباد پروم، بہادین جائین غریب آباد پروم، شاکر جائین غریب آباد پروم، ساکم جائین غریب آباد پروم، ءُ نواب اللہ بخش گومازی دز پروم ءِ گاڑی ءُ ٹیلاں تاوان رستگ –

آئی ءَ گوشتگ کہ مروچی سھب ءِ ادار ھپت ءَ پروم ءِ دمگ کلگ کور ءَ کہ چہ جیرک بارڈر ءَ بیست دو کلومیٹر دور میتگ یے، پوج ءِ بے سوب ءَ تیرگواری ءَ پانزدہ ءَ گیش مشک ترک اِتگ انت ءُ لکانی ھساب ءَ کلدار ءِ ڈیزل گوں ھاکاں ھوار بوتگ انت ءُ دمگ ءِ تہ ءَ ترس ءِ ودی بوتگ –

وئیل ءِ بگیری ءَ بارڈر کمیٹی پروم ءَ ریش پیش بنجل ءِ دیم ءَ زھرشانی کتگ ءُ وئیل ایرجتگ – بارڈر کمیٹی پروم ءِ سرکماش عارف مول جان، کمک سرکماش بشیر احمد ءَ دگہ مردمانی ھمراھی ءَ پوج ءِ واکداراں گوں گند ءُ نند کتگ –

گند ءُ نند ءَ آھاں وئیل ءِ درگت ءَ سرجمیں ھال داتگ انت ءُ گوشتگ کہ پھازگی لشکر ءَ بید سوب ءَ جیرک بارڈر ءِ سر ءَ ھما گاڑیانی سر ءَ تیرگواری کتگ کہ آھانی نام لڑ ءِ تہ ءَ ھوار انت کہ چریشی ءَ یک مردمے زدگ ءُ لکانی ھساب ءَ کلدار ٹیل زوال بوتگ انت – ھمے میان ءَ آھاں کمیٹی ءِ دیم ءَ گوشتگ کہ لھتے گاڑی والایاں باڈر ءِ تار بُراِتگ ءُ تہ ءَ رؤگ ءِ جھد کتگ ھمے سوب ءَ آھانی سر ءَ تیرگواری کنگ بوتگ کہ چریشی ءَ اے گاڑی ھم تیرانی زد ءَ اتکگ انت – زدگ بوتگیں مردمے الاج ءُ ایندگہ تاوانانی پُر کنگ ءِ باور کنائینگ ءَ پد زھرشانی ھلاس کنگ بوتگ –

بلوچستان ءِ دمگ چہ ھُزدار ءَ پاکستانی پوج ءَ دو مردم آوار جنگ ءَ پد ناشناسیں جاھے ءَ برتگ اَنت-

گیشیں ھالانی رِد ءَ گوستگیں شپ ءِ ساھت دوازدہ ءِ نزیک ءَ پاکستانی پوج ءَ ھُزدار ءِ دمگ ڈی پی سی کالج ءِ پُٹبال گراؤنڈ ءَ دو مردم آوار جنگ ءَ پد ءَ بیگواہ کتگ اَنت-

آوار جنگ بیتگیں ورناھانی پجّار شھزاد رئیسانی ءُ جلیل نام ءَ چہ بیتگ اَنت-

زانگ بہ بیت ھُزدار ءَ بیست ءُ چار کلاکانی تہ ءَ اے سیمی وئیل اِنت اشی ءَ ساری ھُزدار ءِ دمگ چہ سول کالونی ءَ پاکستانی پوج ءَ یک نودربرے آوار جنگ ءَ پد بیگواہ کتگ اَت- آئی ءِ پجّار ابرار جتک نام ءَ چہ بیتگ اَت-

روکپتی بلوچستان ءِ بنجاھی شھر زاھدان ءَ مکی مسیت ءِ پیش امام مولانا عبدالحمید اسماعیل زئی ءَ آدینگ ءِ نماز ءِ وھد ءَ خطبہ ءَ پیسر تران کنان ءَ گوشتگ کہ بندیگین سیاسی مردم یل کنگ بہ بنت-

آئی ءَ گوشتگ کہ سیستان و بلوچستان ءَ بازیں کچے ءَ سیاسی باسک گرگ ءُ زاندانی کنگ بیتگ اَنت ءُ چریشی ءَ بازیں سیاسی باسک وتی ھکانی ھاتر ءَ بندیگ اَنت کہ باید سرکار ایشاں یل بہ کنت-

مولانا عبدالحمید بلوچ اسماعیل زئی ءَ گوشتگ کہ ڈیھ ءَ مردماں مزھب ءِ نام ءَ بھر ءُ بانگ مہ کن ات ھمک انسان ءَ یک شرپ ءُ کساسے ھست اِنت-

آئی ءَ گوشتگ کہ اے ڈیھ مزھبانی سر ءَ بھر کنگ بیتگ ءُ باید ھمک مزھب ءِ اھترام کنگ بہ بیت ءُ انساناں مزھب ءِ سر ءَ بھر ءُ بانگ مہ کن ات –

آئی ءَ گوشتگ اد ءَ بازیں وھداں نندوکیں مھلوک ٹک ءُ نشان کنگ بوگ ءَ اَنت ءُ چریشی ءَ اود ءَ مردمانی نشان کنگ ءُ ٹک چنگ ءُ پد ءَ گلینگ ءَ مردم بازیں جیڑہ ءُ جنجالانی دیمپان اَنت باید سرکار اے گامگیجانی زیرگ ءَ پیسر بہ جیڑ ات ءُ مھلوک ءَ اے داب ءَ مہ گلین ایت-

آئی ءَ گوشتگ کہ سیستان و بلوچستان ءَ پرچا زالبول زھرشانی کنگ ءَ اَنت؟ گڑا ھتم آیانی سر ءَ زُلمے بیتگ ابید ءِ زُلم کس وت ءَ دگانی سر ءَ زلیل ءُ وار نہ کنت-

آئی ءَ گوشتگ ڈیھ ءَ روزگار نہ بیت مھلوک ءَ وردن نہ رس ایت گڑا مھلوک برانز گپت اِنت باید ایران ءِ سرکار مھلوک ءِ چوشیں جیڑھانی گیش ءُ گیوار ءَ مھلہ بہ کنت –

روکپتی بلوچستان ءَ ایرانی چیریں ادارھانہ دست ءَ آوار جنگ بیتگیں یک مردمے یل کنگ بیتگ ءُ وتی لوگ ءَ سر بیتگ-

گیشین ھالانی رد ءَ 110 دَہ روچ ءَ پیش روکپتی بلوچستان ءِ دمگ راسک ءَ ایرانی چیریں ادارھانی دست ءَ آوار جنگ بیتگیں یک مردمے یل کنگ بیتگ ءُ وتی لوگ ءَ سر بیتگ-

یل بیتگیں مردم ءِ پجار عارف دھقانی ءِ نام ءَ زانگ بیتگ کہ راسک ءِ جھمنند گوشگ بوگ ءَ اِنت-

عارف دھقانی گوستگیں سَے ماہ ءُ بیست روچ پیش ماں راسک ءَ چہ لوگ ءَ روگ ءِ وھد ءَ دزگیر کنگ بیتگ ءُ گوستگیں روچ ءَ روکپتی بلوچستان ءِ تیابدپی شھر چھبار ءَ یل کنگ بیتگ –

ھالانی رد ءَ گوشگ بیتگ کہ عارف دھقانی روکپتی بلوچستان ءِ نامی ئیں عالم دین مولانا عبدالغفار نقشبندی ءِ نزیکیں مردمے، مولانا عبدالغفار نقشبندی گوستگیں لھتے ماھاں پیش دزگیر کنگ بیتگ ءُ پد ءَ آئی ءِ درگت ءَ ھچ ھال نیست ءُ چریشی ءَ پد آئی ءِ سیاد ءُ وارس ھم گرگ ءُ بیگواہ کنگ بیتگ اَنت-

روکپتی بلوچستان ءَ بندوکیں مردمانی گوشگ اِنت کہ اود ءَ مولانا عبدالغفار ءِ دزگیری ءِ گیشتر سبب کہ گوستگیں سال ءِ ستمبر ءِ ماہ ءَ ماں چھبار ءَ ایرانی پولیس ءِ آفیسر ابراھیم کوچکزئی ءَ یک پانزدہ سالیگیں جنکو ماھو بلوچ ءِ گون ءَ جنسی زوراکی کتگ ءُ چریشی ءَ پد روکپتی بلوچستان ءَ یک برانزے چست بیتگ چرے برانز ءِ پلامرزی روکپتی بلوچستان ءِ عالم دیناں پلامرزی کتگ ءُ چرے سبب ءَ آیاں گرگ ءُ بندیگ کنگ ءَ اَنت-

پاکستانی پوج ءِ جارکش ءِ رد ءَ سکیورٹی پورسز ءَ چیریں ھالے ءِ رد ءَ پٹ ءُ پول کتگ ءُ ھائی ویلیو ٹارگٹ گلزار امان پنام ءِ شمبے دزگیر کتگ، گلزار امام بلوچ سلاہ بندیں گل بلوچ نیشنل آرمی ءِ کلانیں رھشون اِنت-

آئی ایس پی آر ءِ رد ءَ بی این اے، بلوچ ریپبلکن آرمی ءُ یونائیٹڈ بلوچ آرمی ءِ یکجاہ بیگ ءَ پد دیم ءَ اتکگ بیتگ، بلوچ نیشنل آرمی پنجگور ءُ نوشکی ءَ کانوندارانی سر ءَ اُرشاں دزمانجن بیتگ-

آئی ایس پی آر ءِ رد ءَ بلوچ نیشنل آرمی پاکستان ءَ بازیں کساسیں ناشریانی زمہ وار اِنت – گلزار امام دوھزار ءُ ھژدہ ءَ داں بلوچ ریپبلکن آرمی ءَ براھمدگ بگٹی ءِ نائب بیتگ-

آئی ایس پی آر ءِ رد ءَ گلزار امام ءَ بلوچ راجی آجوئی سنگر (براس) ءِ جوڑ کنگ ءَ مزنین کردے پیلو کتگ، آ بلوچ راجی آجوئی سنگر ءِ آپریشنل سروک ھم بیتگ، گلزار امام اوگانستان ءُ ھندوستان ءَ تر ءُ تاب ءِ ریکاڈ ھم ھست اَنت-

آئی ایس پی آر ءِ رد ءَ گلزار امام سرجم ءَ شوربندی ءِ گون ءَ یک سوبمندیں آپریشنے ءَ پد دزگیر کتگ، آئی ءِ دزگیری بی این اے ءُ دگہ سلاہ بندانی واستا مزنیں تاوانے ءِ دیمپانی اِنت، آئی ءِ دشمنیں انٹیلی جنسانی گون ءُ رھوتانی بارو ءَ پٹ ءُ پول برجاہ اِنت –

آئی پی ایل شانزدھمی سیزن ءِ نھمی گوازی رائل چیلنجر بنگلور ءُ کولکاتہ نائٹ رائیڈر ءِ میان ءَ کنگ بوتگ اے گوازی ءَ بولی ووڈ ءِ اداکار ءُ کے کے آر ءَ ھواریں سروک شاہ رخ خان ھم ساڑی بوتگ کہ کے کے آر جوانیں گوازی پیش داشتگ – کے کے آر ءِ گوازی ایڈن گارڈن پٹ ءَ آر سی بی ءِ دیم ءَ بوتگ کہ کے کے آر ءَ آ بے سوب کتگ ءُ اے سیزن ءِ تہ ءَ اولی سوبمندی وتی نام ءَ کتگ –

بنگلور ءِ کپٹن ءَ ٹاس کٹ اِتگ ءُ اولسر ءَ بالنگ کنگ ءِ پیسلہ کتگ، کولکاتہ ءِ بندات جوان نہ بوتگ پرچا کہ پد ماں پد وکٹ کپان بوتگ انت ءُ 11.3 اوور ءَ پد اسکور ھشتاد ءُ نُھ بوتگ ءُ پنچ وکٹ کپتگ بلے چدو پد گوازی مٹ اِتگ پرچاکہ رنکو سنگھ ءُ شاردل ٹھاکر ءَ یکسد ءُ سَے رن ھواری ءَ.جوڈ کتگ ـ اشاں ھوار رحمن اللہ گرباز ءِ گوازی ھم ستا کرزیت پرچاکہ یک نیمگ ءِ وکٹ کپان بوتگ انت ءُ دومی نیمگ ءَ آئی چِل ءُ چار بالاں پنجاہ ءُ ھپت رن جوڈ کتگ – رنکو سنگھ ءَ سِی ءُ سَے بالاں چِل ءُ شش ءُ شاردل ءَ بیست ءُ نُھ بالاں شست ءُ ھشت رن جوڈ کتگ انت ـ ایندگہ لیبیاں چوشیں ھاسیں رن جوڈ نہ کتگ بلے پدا ھم کولکاتہ ءَ بیست اوورانی تہ ءَ ھپت وکٹانی تاوان ءَ دوسد ءُ چار رنانی آرگ ءَ سوبمند بوتگ –

بنگلور ءِ نیمگ ءَ ڈیوڈ ولی ءِ بالنگ ستا کرزیت کہ آئی ءَ جوانی ءَ بالنگ کتگ ءُ چار اووراں بس شانزدہ رن داتگ ءُ دو جوانیں لیبی ونکٹیش ایر، مندیپ سنگھ آؤٹ کتگ انت- دو وکٹ کرن شرما ءَ ھم گپتگ کہ آئی ءَ سَے اووراں بیست ءُ شش رن داتگ – محمد سراج ءَ چار اووراں چِل ءُ چار، مائیکل بریسویل ءَ سَے اووراں سِی ءُ چار ءُ ہرشل پٹیل ءَ سَے اووراں سِی ءُ ھشت رن داتگ یک یک وکٹ ءِ گپتگ –

دوسد ءُ پنچ رنانی ٹارگٹ پروشگ ءِ ھاتر ءَ پہ وھدیکہ آر سی بی لیبی کوہلی ءُ کپٹن فاف ڈوپلیسس پٹ ءَ ایر کپتگ انت گڈا آھاں بندات جوانی ءَ کتگ ھردو لیبیاں تیزی ءَ گوں رنانی آرگ بندات کتگ ءُ 4.4 اووراں ٹیم ءَ بید تاوان ءَ چِل ءُ چار رن جوڈ کتگ بلے پنچمی اوور ءِ پنچمی بال کوہلی ءَ گران ءَ کپتگ کہ سنیل نارئن کلین بولڈ کتگ ءُ دومی اوور ءَ ڈوپلیسس ورون چکروتی ءَ بولڈ کتگ – ورون چکروتی ءَ وتی دومی اوور گلین میکسویل ءُ ہرشل پٹیل ھم واتر دیم داتگ انت ءُ کولکاتہ ءِ ٹیم مھکم کتگ پدا رند ءَ وکٹ کم کم ءَ کپان بوتگ انت –

گوازی کہ دیم ءَ شتگ گڈا سنیل نارئن شہباز احمد پنچ بالاں یک رن ءِ داتگ ءُ پدا شیردل ءَ مائیکل بریسویل ھژدہ بالاں نوزدہ رن داتگ ءُ آؤٹ کتگ – دیمتر ءَ سویش شرما کہ اے آئی ءِ اولی میچ بوتگ آئی ءَ دنیش کارتک ھشت بالاں نُھ رن، انوج راوت پنچ بالاں یک رن ءُ کرن شرما سَے بالاں یک رن ءِ داتگ ءُ آؤٹ کتگ انت – بلے گوازی کٹارینتگ ورون چکرورتی ءَ کہ آئی ءَ آکری بیٹس مین آکاش دیپ ھشت بالاں ھبدہ رن داتگ ءُ پدا وتی بال ءَ کیچ کتگ ءُ آؤٹ کتگ – ڈیوڈ ویلی ءَ بیست نالاں بیست رن آؤرتگ ءُ ناٹ آؤٹ بوتگ –

کولکاتہ ءِ ھر سئیں اسپنر آں ھوار بوتگ ءُ نُھیں وکٹ بھر کتگ انت – چکرورتی ءَ 3.4 اووراں پانزدہ رن داتگ ءُ چار وکٹ ، سویش ءَ چار اووراں سِی رن داتگ ءُ سَے وکٹ ءُ سنیل نارائن ءَ چار اووراں شانزدہ رن داتگ ءُ دو وکٹ گپتگ – یک وکٹ ءِ شیر دل ٹھاکر ءَ رستگ کہ آئی ءَ دو اووراں پانزدہ رن داتگ –