TBP Balochi

سربوتگیں ھالانی رِد ءَ بلوچستان ءِ تیاب دپی دمگ گوادر ءُ پنجگور ءَ پاکستانی پوج ءَ دو مردم زورانسری آوار جتگ ءُ بیگواہ کتگ انت –

چہ گوادر ءَ زورانسری آوار جنگ بوتگیں مردمے پجار نثار ء کریم بخش جھمنند تمپ کلاھو وھدیکہ چہ پنجگور ءَ زورانسری آوار جنگ بوتگیں مردمے پجار اشرف ء حاجی اسمائیل ءِ نام ءَ بوتگ انت –

نثار ءِ کھول ءِ مردماں آئی ءِ زورانسری آوار جنی ءِ ھبر راست کتگ ءُ گوں دی بلوچستان پوسٹ ءِ اھوالکار ءِ گوم ءَ تران کنان ءَ گوشتگ کہ نثار سِی ءُ یک جولائی ءَ گوادر ءِ ھند رو ہوٹل ءِ نزیک ءَ پوج ءَ زورانسری آوار جتگ ءُ بیگواہ کتگ کہ ھنگت بیگواہ انت –

کھول ءَ چہ انسانی ھکانی ادارھاں گوں لوٹ کتگ ءُ گوشتگ کہ نثار ءِ وش ءُ سلامتی یل کنائینگ ءَ وتی کرد ءَ پیلو بہ کن انت –

دومی نیمگ ءَ چہ پنجگور ءَ چہ بیگواھیں اشرف ءِ درگت ءَ گوشگ بوگ ءَ انت کہ آ مشکے ءِ دمگ نوکجو ءِ جھمنند انت کہ پوج ءَ سَے اگست ءَ پنجگور ءِ بازار ءِ نیمگ ءَ روگے وھد ءَ آوار جنگ بوتگ –

زانگ بہ بیت اشرف چدوپیسر سال دوھزار ءُ بیست ءَ ھم آوار جنگ بوتگ کہ سالے ءَ بیگواہ بوگ ءَ پد یل کنگ بوتگ کہ ھنو دوبر آوار جنگ بوتگ –

سربوتگیں ھالانی رِد ءَ کیچ ءَ گمانی رنگ ءَ دین ءِ ھلاپ ءَ کنگ ءِ وتگڑیں بھتام ءَ وانگجاہ ءِ ماسٹرے کُشگ بوتگ –

کُشگ بوتگیں ماسٹر ءِ پجار عبدالرؤف ء برکت انت کہ دشت ءِ جھمنند انت بولان گرائمر وانگجاہ ءَ وانینگ ءَ بوتگ –

اھوالکار ءِ رِد ءَ اے مرد ءِ سر ءَ لھتے روچ ساری رسول ءِ توھین کنگ ءِ بھتام جنگ بوتگ ءُ اے مرد ھما وھد ءَ تیر آماچ کنگ ءُ کُشگ بوتگ وھدیکہ آ ملک آباد ءَ برجم دارگ بوتگیں جرگہ ءَ وتی بیگناھی ءِ منانک دیگ ءَ رؤگ ءَ بوتگ کہ جرگہ ءَ کمے دور آ کُشگ بوتگ –

پولیس ءَ عبدالرؤف ءِ کوش ءِ ھبر راست کُتگ، بلے تنی وھدی آئی ءِ کوش ءِ پکائیں سوب زانگ نہ بوتگ –

دومی نیمگ ءَ کیچ ءِ ملایانی نیمگ ءَ رد کنگ ءِ درشان ءِ تہ ءَ گوشگ بوتگ کہ گوستگیں روچ ءَ ملایاں ھمے ھال رس اتگ کہ بولان وانگجاہ ءِ ماسٹر عبدالرؤف ء برکت جھمنند جت بلنگور ءَ رسول ءِ توھین کتگ، گڑا ملایاں اے جیڑو ءِ تک ءُ پھناتانی چارگ ءَ پد ادارہ ءِ سرکماش پرسنپل سدیر احمد ءَ گوں ھال اھوال کتگ ھمے میان ءَ دیوان ءَ چہ عبدالرؤف ءَ ھم وتی گپانی جنگ ءِ موہ داتگ گڑا آئی ءَ ھمے گوشتگ من پہ زانت ھچ وڑ ءَ رسول ءِ توھین نہ کتگ اگاں چیزے بوتگ من پھلی لوٹاں –

اے گند ءُ نند چار اگست ءَ آدینگ ءِ روچ ءَ ادار یازدہ ءَ بوتگ – چوشکہ کہ آدینگ ءِ روچ بوتگ گڑا اے جیڑو شمبے ء روچ ءَ گیش ءُ گیوار کنگی بوتگ تانکہ درسیں ملا ساڑی بہ بنت اے جیڑو ءِ گیش ءُ گیوار کنگ بہ بیت تانکہ جاور نگیگ مہ بنت دگہ کسے اے جاوراں ردیں گامگیج ءِ مہ زوریت –

مروچی شمبے ءِ روچ ءَ پنچ اگست ءَ درسیں ملا اشاعت التوحید والسنہ ملک آباد مدرسہ ءَ نندوک بوتگ انت دومی مردم ءِ ودار ءَ بوتگ انت کہ کساس یازدہ ءُ نیم ءَ مارا ھمے ھال سر بوتگ کہ ناشناسیں سلاہ بنداں عبدالرؤف ءِ سر ءَ تیرگواری کتگ ءُ آ کُشتگ –

گڑا یکجاہ بوتگیں ملایاں وئیل ءِ سر ءَ دلپدردی درشان اِتگ ءُ پولیس اے درگت ءَ سرپدی داتگ ءُ وئیل جاہ ءَ دیم داتگ –

آیانی گوشگ ات کہ کیچ ءَ پیش ءَ ھم دو اے دابیں بزاں رسول توھین کنگ ءِ وئیل بوتگ انت بلے مُلایاں جرگہ کتگ ءُ جیڑہ ایمنی ءَ گوں گشینتگ انت –

چد ءُ پیسر ھم رسول ءِ توھین کنوکاں چہ ھاوند ءَ پھلی لوٹ اِتگ ءُ ملایاں درسانی دیم ءَ اے گپ پدر کتگ کہ پھلی لوٹگ ءَ پد ھچ کس آیاں دلسیاہ مہ کنت –

ملایانی مدامی ھمے جھد ءُ کوشست انت کہ دمگ ءِ تہ ءَ اے وڑیں وئیلاں جوانی ءَ گوں گیش ءُ گیوار کنگ تانکہ ھچ وڑیں آیانی ھرابیں برورد دیم ءَ مہ ایت –

درشان ءِ تہ ءَ گوشگ بوتگ لھتے مردم اے کوش ءَ ملایانی سر ءَ دیگ انت ءُ پروپکنڈہ کنگ ءَ انت تانکہ ملا بدنام بہ بنت –

توشہ خانہ ءِ پیسلہ ءَ پد چیئرمین تھریک انسان عمران خان زمان پارک لاھور ءَ دزگیر کنگ بیتگ، وزیر اطلاعات پنجاپ عامر میر ءَ گوشتگ کہ پولیس ءَ چیئرمین پی ٹی آئی زرتگ ءُ بالی پٹ ءَ رھادگ بیتگ-

توشہ خانہ کیس ءَ سزا ءِ بندگ ءَ پد پولیس ءِ بازیں کارندہ لاھور ءَ عمران خان ءِ گس ءَ زمان پارک ءَ سر بیتگ اَنت-

دمگء اھوالانی رد ءَ عمران دزگیر کنگ بیتگ ءُ بنداتی ءَ کوٹ لکپھت جیل ءَ بندیگ کنگ بیت اِنت، آئی ءَ کوٹ لکھپت جیل ءَ ھوالات ءَ داشت کن اَنت ءُ چریشی ءَ پد آئی ءَ اسلام آباد پولیس ءِ دست ءَ دے اَنت-

چیئرمین تھریک انساپ عمران خان ءِ دزگیری ءَ پد بنجاھی سرکار اسلام آباد ءَ پھزداری ترند کتگ اَنت-

اسلام آباد سیشن آمیدگس ءِ نیمگ ءَ توشہ خان فوجداری کیس ءَ عمران خان سَے سال ءِ بندیگی کتگ چریشی ءَ پد بنجاھی سرکار ءَ اسلام آباد ءَ پولیس ترند کتگ-

دمگی مردمانی رد ءَ پولیس ءِ نیمگ ءَ جتا جتائیں رھسری بنجلاں گیش کارندہ دارگ بیتگ اَنت-

ایف سی ءُ رینجرز ءَ مزنیں شھدگانی سر ءَ تر ءُ تاب بندات کتگ-

دمگی اھوالانی گوشگ اِنت پولیس ءِ نیمگ ءَ شھر ءَ پرکاریں باسکانی نام یکجاہ کتگ ءُ شھر ءَ گمانی رنگ ءَ زھرشانی کنگ ءَ باسکانی ھلاپ ءَ ترندیں گامگیج زیرگ بیت اِنت-

پنجاب ءَ بلوچ نودربر ءُ گوادر شھدربرجاہ لاھور

ٹی بی پی شونگال

پاکستان ءِ راجی پتر ءَ نوکیں شھدربرجاھانی جوڑ کنگ ءِ بیست بِل یکجاہ ءَ منگ بیتگ اَنت، کہ ایشانی تہ ءَ پاک-چین گوادر شھدربرجاہ ھم ھوار اَنت، کہ لاھور ءَ اڈ کنگ بیت اِنت۔ بلوچستان ءَ اے وھد ءَ ھژدہ شھدربرجاہ ھست اَنت، کہ آ تھنا لاھور ءِ شھدربرجاھاں چہ ھم کمتر اَنت، درستاں چہ کوھنتریں بلوچستان شھدربرجاہ مزنیں مالی تَنگی ءِ آماچ اِنت ءُ دگہ شھدربرجاہ ھم مالی ءُ واکدارانی جنجالانی آماچ اَنت۔

بلوچستان ءِ نودربر یکشلی ءَ گوں زھرشانی کنگ ءَ اَنت کہ بلوچستان ءَ نوکیں شھدربرجاہ جوڑ کنگ بہ بنت بلے بلوچستان ءَ شھدربرجاہ ءِ اَڈ بئیگ ءَ ابید پاک-چین گوادر شھدربرجاہ ھم لاھور ءَ اڈ کنگ بئیگ ءَ اِنت ءُ دومی نیمگ ءَ ھما کہ لھتے گچینتگیں بلوچ نودربر پنجاب ءِ شھدربرجاھانی تہ ءَ وانگ ءَ اَنت، آیانی تہ ءَ فیصل آباد، بھاولپور، ملتان ءُ لاھور ءِ شھدربرجاھانی تہ ءَ پروفائلنگ ءُ زورانسری بیگواھی ءِ وئیلانی تہ ءَ گیشی پِیداک اِنت۔

گوستگیں روچاں قائد اعظم شھدربرجاہ ءِ دو بلوچ نودربر چہ اسلام آباد ءَ زورانسری بیگواھی ءِ آماچ کنگ بیتگ اَنت، پنجاب شھدربرجاہ لاھور ءِ نودربر سالم بلوچ چہ تربت ءَ زورانسری بیگواہ کنگ بیتگ اَت ءُ ایرڈ ایگریکلچر شھدربرجاہ چہ راولپنڈی ءَ ھبدہ سالی نودربر فیروز بلوچ ءِ زورانسری بیگواھی ءَ یک سالے گوستگ اَت ءُ آمید گسی پرمان ءَ ابید داں انگت یل کنگ نہ بیتگ ۔ اسلام آباد ھائی کورٹ ءَ پرمان داتگ اَت کہ پنجاب ءِ شھدربرجاھانی تہ ءَ بلوچ نودربرانی پروفائلنگ ءُ زورانسری بیگواھی بند کنگ بہ بنت بلے اِیشی ءَ ابید ھم نودربرانی زورانسری بیگواھی انگت برجاہ اَنت۔

بلوچ راجدوست پاکستان ءِ سر ءَ بھتام جن اَنت کہ پُل ءُ پانچی شوربندی چین پاکستان روزیگی راھداری ءِ سوب ءِ بلوچ راج ءِ نسل کشی ءُ آبادی ءِ مٹ بیگ ءِ دیمپانی اِنت ءُ اِیشی ءِ مَٹ پنجاب ءَ رسگ ءَ اَنت، بلوچستان ءَ پوجی بیڑ برجاہ اَنت ءُ پنجاب ءَ میٹرو ءُ شھدربرجاہ جوڑ کنگ بئیگ ءَ اَنت۔

پاکستان ءِ تاکتوریں واکدار بلوچستان ءَ گوں یک ایردستی ءِ پئیم ءِ رویش ءَ بند بہ کن اَنت ءُ بلوچ زمین ءَ گوں بندوکیں شوربندی ھم بلوچستان ءَ اڈ کنگ بہ بنت۔ تھنا ٹاہ ءَ گوں بلوچستان ءِ مھلوک رد دیگ بیت نہ کن اَنت، بلوچ راج یکشل ءَ اے شوربندیانی درگت ءَ وتی تُرس ءُ بے باوری ءِ درشان ءَ کنان اَنت ءُ داں وھد یکہ بلوچ سرڈگار ءِ سر ءَ شوربندیانی مُز بلوچ ءَ نہ رس اتگ ھما وھد ءَ داں بلوچستان ءِ تہ ءَ اے شوربندیانی سرجم بئیگ بے باوری اِنت۔

روکپتی بلوچستان ءِ دمگ کنارک ءَ زر ءَ بڈ اتگیں ورناہ ءِ لاش بیست ءُ چار اداراں پد درگیجگ بیتگ-

سر بیتگیں ھالانی رد ءَ گوستگیں روچ ءَ کنارک ءِ زر ءَ یک ورنایے ناگتی آپ ءَ بڈ اتگ بیتگ-

بڈ اتگیں ورنا ءِ پجار شھریار شکرزئی ء پرویز جھمنند سرباز ءُ کنارک ءِ نام ءَ زانگ بیتگ-

اھوالانی رد ءَ شھریار گوستگیں روچ ءِ ساھت پنچ ءَ ماں زر ءَ بڈ اتگ بیتگ ءُ پد آئی ءِ لاش مروچی سھب ءِ ساھت پنچ ءَ شوھازکاراں دزکپتگ-

بلوچستان ءِ دمگ جھل مگسی ءَ زمین ءِ جیڑہ ءِ سر ءَ گواری ءَ امداد جویو کشگ بیتگ ءُ وئیل ءَ پد زھرشانی ءُ دزگیری –

باریجہ مھسی ءُ جویو ءِ ٹک ءَ زمین ءِ جیڑہ ءِ سر ءَ تیرگواری کتگ ءُ چریشی ءَ امداد جویو تیرانی نشانگ ءَ اتکگ ءُ ھما جاہ ءَ بیران بیتگ – ھال ءِ سر بوگ ءَ لیویز کارندہ وئیل جاہ ءَ سر بیتگ ءُ لاش اش چست کتگ ءُ پوسٹ مارٹم کنگ ءَ پد لاش کھول ءِ ھوالگ ءَ دیگ بیتگ ءُ لاش لوگ ءَ سر بیتگ ءُ کھر ءِ آس گوارگ ءَ لگ اتگ-

وئیل ءِ ھلاپ ءَ کھول ءُ دگہ مردماں اوستہ مھمد پولیس کارگس ءِ دیم ءَ لاش ءِ ھمراھی ءَ زھرشانی کتگ-

کشگ بیتگیں امداد جویو ءِ جنک ارباب جویو ءُ دگہ کھولاں لاش زرتگ ءُ ڈیرہ مراد جمالی ءَ برگ ءَ بیتگ اَنت بلے ھمے میان ءَ راہ ءَ کھول ءُ دگہ مردم پولیس ءَ جتا جتائیں جاھاں داشتگ انت ءُ لٹ ءُ کُٹ کتگ اَنت-

کھول ءَ گوشتگ کہ زوراکیں مردمانی منوکیں پولیس ءُ دگہ انتزامیہ امداد جویو ءِ لاش ءَ برگ ءَ نہ ھیلگ ءَ اَنت-

ھمے وھد ءَ بازیں مردم دزگیر ءُ پولیس ءَ لَٹ ءُ کُٹ کتگ اَنت ءُ مردمانی زدگ بوگ ءِ ھال اِنت –

ایشی ءَ پیش ھژدہ جون دوھزار ءُ بیست ءُ سَے ءَ ارباب جویو ءَ شال ءَ پریس کانفرنس کنان ءَ گوشتگ کہ خالد خان مگسی مئے زمیناں زورگیر بوگ کتگ ءُ مارا ترسینگ ءَ اِنت-

آئی ءَ گوشتگ کہ سردار مگسی ءَ منی پت ءِ سر ءَ سَے رند ءَ جان کُشیں اُرش کتگ ءُ ھمے وڑ ءَ منی یازدہ سالیگیں گوھار خیرالنساء سردار ءِ گوشگ ءِ پژدر ءَ آوار جنگ بیتگ ءُ دانکہ یک سالے ءَ آوار جنوکاں وتی گور ءَ ایر کتگ-

ارباب جویو ءَ گوستگیں پریس کانفرنس یک ھنچیں وھدے ءَ کتگ ات کہ لس سلاہ بندیں مردمانی اُرش ءَ آئی ءِ گوھار ٹپیگ بیتگ ات-

زانگ بہ بیت ایشی ءَ ارباب جویو ءَ سال دوھزار ءُ بیست ءُ یک ءَ زمینانی زوگری ءُ کھول ءِ ترسینگ ءِ ھلاپ ءَ اسلام آباد پریس کلب ءِ دیم ءَ زھرشانی نندانک جتگ ات-

روکپتی بلوچستان ءَ دو جتا جتائیں وئیلاں دو مردم بیران بیتگ اَنت –

روکپتی بلوچستان ءِ تیابدپی شھر چھبار ءَ ناشناسیں مردمانی تیرگواری ءَ یک مردمے بیران بیتگ-

گیشیں اھوالانی رد ءَ بیران بیتگیں مردم ءِ پجار حمید کوسہ ء لقان جھمنند چھبار ءِ نام ءَ زانگ بیتگ-

اھوالانی رد ءَ حمید پیٹرول کیمیکل کمپنی ءِ یک ملازمے بیتگ ءُ آ وتی کار جاہ ءَ واتر دیم پہ لوگ ءَ روگ ءَ بیتگ کہ ناشناسیں مردماں تیرانی نشانگ کتگ ءُ زدگ کتگ-

اھوالانی رد ءَ حمید زدگیں جاوراں امام رلی نادراہ جاہ چھبار ءَ برگ بیتگ ءُ اود ءَ آئی ءَ وتی ساہ داتگ اَنت-

زانگ بہ بیت روکپتی بلوچستان ءَ گیشتر چوشیں وئیل پیش آیگ ءَ اَنت کہ آیاں گیشتر لس مھلوک ایرانی چیریں ادارہ اطلاعات ءِ پشت ءُ پناھی گوشگ ءَ اَنت-

دومی نیمگ ءَ چھبار ءَ بجلی ءِ تارانی کپگ ءَ یک ورنایے بیران بیتگ کہ آئی ءِ پجار اسحاق ثباتیپور ء عبدالشکور ءِ نام ءَ زانگ بیتگ –

ھندوستان ءِ ماہ ءِ سر ءَ روکیں چندریان 3 ءَ ماہ ءِ سر ءَ روگ ءَ دو نیم کساس سپر سرجم کتگ ءُ چریشی ءَ چہ ا مروچی بیگاہ ءِ وھد ءَ ماہ ءِ نزیک ءَ سر بیت اِنت-

ھندوستان ءِ روتاک ھندوستان ٹائمز ءِ رد ءَ انڈین اسپیس ریسرچ آرگنائزیشن اسرو ءَ اے گپ راست کتگ کہ چندریان 3 ءَ ماہ ءِ نزیک ءَ روگ ءَ کساس دو کساس بھرانی سپر ھلاس کتگ ءُ شمبے ءِ بیگاہ ءَ ماہ ءِ نزیک ءَ سر یت اِنت-

چندریان 3 برز بالیں جھاز دومی گیچینی تکاں ماہ ءِ نزیک ءَ سر بیت اِنت ءُ بیست ءُ سَے اگست پہ ھندوستان ءَ یک گچینی روچے بیت اِنت کہ چندریان 3 ماہ ءِ سر ءَ نند ایت اِنت-

اسرو ءِ گوشگ اِنت داں انگت ءَ اے مشن الکاپ ءَ برجاہ اِنت ءُ ایشی ءَ ھچ جیڑھانی دیمپانی نیست اِنت –

اگاں چندریان 3 ءِ مشن سوبمند بوت گڑا بزانکہ ھندوستان دنیا ءِ توک ءَ ماہ ءَ روکیں چارُمی ڈیھ بیت اِنت-

زانگ بہ بیت اے اسرو ءِ سال دوھزار نوزدہ ءِ بے سوب بیتگین مشن چندریان 2 ءَ رند اِنت-

ستمبر دوھزار ءُ نوزدہ ءَ اسرو ءِ مشن چندریان 2 ماہ ءِ نزیک ءَ سر بوگ ءَ 2.1 کلو میٹر ءِ دوری ءَ گراؤنڈ اسٹیشن ءِ نزیک ءَ رھوت گار بیتگ-

چندریان ءِ مانا سنسکرت زبان ءَ (چاند گاڑی) اِنت اے برز بالیں مشن ءِ وھد ءَ دو میٹر دراجیں روور چُشکہ گاڑی ءَ ماہ ءِ زرباری لمب ءِ نزیک ءَ رسینگ بیت اِنت ءُ دو ھپتگاں جتا جتائیں پٹ ءُ پولکاری کنت اِنت-

زانتکارانی گوشگ اِنت ماہ ءِ سر ءَ روور ءِ لانچ کنگ ءَ یک دگہ مول ءُ مرادے ایش بیت اِنت کہ ھندوستان دنیا ءَ کلوہ ءَ دیگ لوٹ ایر کہ آ برز بالی ءَ ڈنی کمپنیانی گون ءَ باپار ءَ تیار اِنت –

زانگ بہ بیت چندریان 3 ھندوستان ءِ ماہ ءِ سر ءَ روکیں سیمی مشن اِنت کہ ایشی ءِ سر ءَ ھپت کروڑ ءُ پنجاہ لک ڈالر ھرچ کنگ بیتگ اَنت –

سر بیتگیں اھوالانی رد ءَ ایران ءِ اُستان کرمان ءَ ناشناسیں مردماں لوگے ءِ سر ءَ تیرگواری کتگ ءُ اود ءَ زھگ کُشتگ ءُ مات ٹپیگ کتگ-

گیشیں اھوالانی رد ءَ کرمان ءِ دمگ رودبار ءِ ھند اسلام آباد ءَ جھمنندیں بلوچے ءِ لوگ ءِ سر ءَ ناشناسیں مردماں اُرش کتگ یک ورنایے کشتگ ءُ آئی ءِ مات زدگ کتگ-

کُشگ بیتگیں ورنا ءِ پجار بیست سالی ئیں مھمد جواد فرامرزی ء ملک مھمد کُشتگ ءُ آئی ءِ مات ماہ بی بی ء شھدادی زدگ کتگ-

دمگی اھوالانی رد ءَ دُزاں آیانی لوگ ءِ سر ءَ اُرش کتگ ءُ اود ءَ زر ءُ مالانی پولگ ءَ بلے اود ءَ ھچ دز نہ کپتگ ءُ چریشی ءَ آیاں تیرگواری کتگ ءُ زھگ کُشتگ ءُ مات ٹپیگ کتگ-

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل ٹیلی گرام چینل ھکل ءَ شنگ کرتگیں درشان ءِ تہ ءَ نوشکی ءُ کولواہ ءَ چاریگی کیمرہ ءُ پوج ءِ سر ءَ بوتگیں اُرشانی زمہ واری منّ اِتگ گوشتگ کہ اے اُرشاں چاریگی کیمرہ تباہ ءُ دو دژمن کارمند زدگ بوتگ انت –

جارکش جیئند بلوچ ءِ رِد ءَ بی ایل اے ءِ سرمچاراں گوستگیں شپ ءَ نوشکی ءَ زرین جنگل ھند ءَ برجاھیں پوجی پانگسے سر ءَ اُرش کتگ، اے اُرش ءَ سرمچاراں پانگسے سر ءَ بازیں گرنیڈ لانچر گولہ آس داتگ ءُ چریشی ءَ کم چہ کم دو دژمن کارمند زدگ بوتگ انت –

جارکش ءِ رِد ءَ سرمچاراں سَے اگست دوھزار ءُ بیست ءُ سَے ءِ شپ ءَ کیچ ءِ دمگ کولواہ، رودکان ءَ گٹ ءِ کور ءَ برجاھیں پوجی پانگس ءِ نزیک ءَ کل کنگ بوتگیں چاریگی کیمرہ ءُ آئی ءِ بیٹری ءُ سولر تباہ کتگ انت –

جارکش ءَ گوشتگ کہ بی ایل اے ھردو ارشانی زمہ واری ءَ منیت سرڈگار ءِ آجوئی ءَ تاں مئے جھد برجاہ مانیت –