TBP Balochi

وائس فار بلوچ مسنگ پرسنز ءِ شال پریس کلب ءِ دیم ءَ زھرشانی برجاہ، زھرشانی بنجل ءَ مروچی پنچ ھزار ءُ چِل ءُ نھ روچ سرجم بوتگ انت – مروچی سیاسی ءُ چاگردی باسک ثنا بلوچ، صلاح بلوچ، ٹکری نیک احمد بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچستان ءِ تہ ءَ ریاستی زوراکی ءُ زورانسری آوار جنیانی تہ ءَ گیشی آرگ بوتگ –

آئی ءَ گوشتگ کہ بیگواھیں مردمانی کھولاں بازیں سال ءِ بیت کہ آمیدگساں رؤنت ءُ کائنت ءُ پریس کلبانی دیم ءَ پرایمنیں زھرشانی ءَ نشتگ انت بلے آھاں انساپ دیگ ءِ بدل گیشتر دلسیاہ کنگ بیت –

آئی ءَ گوشتگ کہ انسانی ھکانی ادارہ ءُ میڈیا پاکستانی زوراکیانی دیم ءَ بے وس گندگ ءَ کائنت –

آئی ءَ گوشتگ کہ وی بی ایم پی ءَ اے کول کتگ کہ اے انسان کوشیں جاور ءُ آئی ءِ بلوچانی توار ءَ جھان ءَ سرکنت- ریاست وڈ وڈا زوراکی کنگ ءُ تواراں ایرموش کنگ ءِ جھد کنگ ءَ انت ءُ وی بی ایم پی ءِ گل زورانسری آوار جنگ ءُ در آمیدگسی شھید کتگیں بلوچانی کھول، لشکر کشی ءُ بمبگواری ءِ آماچ بوتگیں بے آسرائیں بلوچانی توار ءِ بوگ ءِ زمہ واری ءَ پیلو کنگ ءَ انت –

ھالانی رِد ءَ بلوچستان ءِ دمگ کیچ ءِ ھنکین کولواہ ڈانڈار ءَ مارٹر گولہ ءِ لگگ ءَ یک مردمے زدگ بوتگ –

دمگی واکدارانی رِد ءَ مروچی آدینگ ءِ بیگاہ ءَ ناشناسیں نیمگے ءَ آس دیگ بوتگیں مارٹر گولہ ءِ پچکے ءِ لگگ ءَ علی بخش ء احمد نامی شوانگ ءِ زدگ بوتگ کہ پہ الاج ءِ ھاتر ءَ ٹیچنگ نادراھجاہ تربت ءَ آرگ بوتگ کہ آئی ءِ الاج بوگ ءَ انت –

بلے تنی وھدی اے زانگ نہ بوتگ کہ مارٹر چہ کجام نیمگ ءَ اتکگ- زانگ بہ بیت اے ھند ءُ دمگانی مردم پوج ءِ سر ءَ الزام جن انت کہ مدامی آھانی مارٹر گولہ آس دیگ بیت –

زانگ بہ بیت سال دوھزار بیست ءُ یک ءِ دھ اکتوبر ءَ کیچ ءِ دمگ ھوشاپ ءَ ھم چہ نزیکیں پوجی پانگس ءَ مارٹر گولہ آس دیگ بوتگ ات کہ چریشی ءَ ھپت سالی زھگ اللہ بخش ء عبدالواحد ءُ پنچ سالی جنکو شراتون ء عبدالواحد ھما جاہ ءَ بیران بوتگ اِتاں وھدیکہ مارٹر گولہ ءِ پچکانی لگگ ءَ مسکان ء وزیر سک باز زدگ بوتگ ات –

یونائیٹڈ بلوچ آرمی ءِ جارکش مزار بلوچ ءَ گْوشتگ کہ مئے سرمچاراں 17 مئی ءِ بیگاہ ءَ ضلع مستونگ ءِ دمگ تلخکاوی ءَ ریاستی چاریگ عبدالوھاب سختکی ءُ نصیر احمد سختکی ء یار محمد سختکی سر ءَ تیرگواری کتگ چریشی ءِ آسر ءَ عبدالوھاب سختکی ھما دمان ءَ مرتگ وھدے کہ نصیر احمد سختکی سک ٹپی بیتگ-

آئی ءَ گْوشتگ کہ اے مردم بازیں سالاں چہ پاکستانی چیریں ادارھانی ھاتر ءَ کار کنگ ءَ بیتگ اَنت- اے درگت ءَ پیسر ءَ ھم بلوچ سرمچارانی نیمگ ءَ چہ عبدالوھاب ءُ نصیر احمد ءُ آیانی پت کڈن کنگ بیتگ اَنت بلے آ وتی نہ سُدر اِتگ اَنت ءُ یکشلہ بلوچ آجوئی لوٹوکیں سرمچارانی چاریگی ءُ آیانی رندگیری ءَ اَبید دمگ ءَ لَس مھلوک ءُ بلوچ ورناھانی دزگیری ءُ ھمگرنچ بیتگ اَنت- عبدالوھاب سختکی ءُ نصیر احمد سختکی ءُ اے وڑیں دگہ کارندہ چاریگی ءِ سبب ءَ چہ پیسر ءَ بازیں بلوچ ورناہ دُژمن ادارھانی دست ءَ داتگ اَنت-

جارکش ءَ گْوشتگ کہ مستونگ ءَ اے وھد ءَ بازیں مردم پاکستانی چیریں ادارھانی ھاتر ءَ کار کنگ ءَ اَنت لھتے زمیر پروش چیزے کلدارانی ھاتر ءَ وتی راج ءَ چہ راجدُّروھی کنگ ءَ اَنت ما اے وڑیں مردم ءَ تُرندی ءَ گوں کڈن کن ایں کہ آ زورگریں ریاست ءِ چاریگی ءُ پوجی چیک پوسٹاں ءُ ریاستی سرجمیں ادارھاں چہ گستا بہ بنت اگاں ناں وتی جان ءُ مال ءِ زمہ وار وت بنت – ما اے وڑیں سرجمیں کارندھانی درگت ءَ سرجمی ءَ سرپدی دار ایں کہ زورگریں ریاست ءِ ھمراھداری کنگ ءَ اَنت کہ آ مئے سرمچارانی نشانگ تہ ءَ بنت راجدُّروھی ءِ ھاتر ءَ ھچ وڑ پھل کنگ نہ بنت-

جارکش ءَ دیمتر ءَ گْوشتگ کہ مئے اُرش آجو بلوچستان ءِ وتواجھی ءَ تاں برجاہ بنت-

روکپتی بلوچستان ءِ بنجاھی شھر زاھدان ءَ ایرانی آمیدگس ءِ ھکم ءَ پاھو دیگ بیتگیں مردمانی پاھو دیگ ءِ ھلاپ ءَ زھرشانی کنگ بیتگ-

زھرشانی مکی میست ءَ نماز ءَ پد بندات بیتگ کہ اود ءَ بازیں کچے ءَ مردماں بھر زرتگ ءُ اوگام جنان ءَ ’ سرکار مئے زھگاں کُش ایت ما سرکار ءَ کش ایں، سرکار مارا پاھو دنت ما آئی ءَ را پاھو دے ایں ‘ زھرشانی کنوکانی دستاں پاھو ءِ درگت ءَ نبشتگیں تاک بیتگ اَنت-

زھرشانی کنوکاں گوشتگ کہ ایرانی آمیدگس لس مردماں گرگ ءُ پد ءَ آیاں ابید وتی سپاھی کنگ ءَ پاھو دیگ اِنت کہ اے یک نا انساپی یے –

دومی نیمگ ءَ آدینگ ءِ نماز ءَ مکی مسیت ءِ مولانا عبدالحمید اسماعیل زئی ءَ وتی تران ءَ گوشتگ ’ سرکار مئے زھگاں پاھو دیگ اِیت اے ھچ دود ءِ کار نہ اِنت کہ مردماں پاھو بہ دے ‘-

آئی ءَ گوشتگ کہ اگاں ایران آجوئیں رنگے ءَ گچینکاری کنگ لوٹ ایت گڑا مھلوک ءِ واھشتاں ءُ لوٹاں بہ چار ایت کہ آ چی لوٹ ایت-

ً ھمے درگت ءَ آئی ءَ ترکی ءِ درور دیان ءَ گوشتگ کہ اود ءَ گچینکاری ءَ ھاسیں جیڑہ نیست اَنت ھمے داب ءَ ھرکس ءَ ووٹ دیگ ءِ ھک ھست اِنت –

عبدالحمید ءَ گوشتگ کہ اگاں کجام ھم ڈیھ ءَ مذھب گچینکاری ءِ دیم ءَ نہ دار ایت ھرکس ءَ اے ھک ھست اِنت کہ آ وتی ووٹ ءَ بہ دنت-

آئی ءَ گوشتگ کہ ھر ھما زیردست ءِ گون ءَ اوشتاتگ اِنت کہ ھرکس انساپ کنت ما آئی ءِ کوپگ ءَ گوں ھم کوپگ اِنت-

سر بیتگیں اھوالانی رد ءَ روکپتی بلوچستان ءِ بنجاھی شھر زاھدان ءَ ھوار ایرانی دگہ زنداناں چار بلوچانی ھواری ءَ دو کرد پاھو دیگ بیتگ اَنت-

پاھو دیگ بیتگیں مردم زاھدان ءِ زندان، کرمان ءُ جیرفت ءِ زنداناں پاھو دیگ بیتگ اَنت، ایران ءَ اے روچانی توک ءَ کرد ءُ پٹھاناں ھوار بازیں بلوچے ماں نشہ ءِ باپاری ءِ بھتام ءَ پاھو دیگ بیتگ اَنت-

گیشیں اھوالانی رد ءَ روکپتی بلوچستان ءِ بنجاھی شھر زاھدان ءِ زندان ءَ بندیگیں یک ورنایے پاھو ءِ جاہ ءَ برگ بیتگ-

پاھو ءِ جاہ ءَ برگ بیتگیں ورناہ ءِ پجار عاطف شاہ بخش زئی ء مھمد عمر جھمنند زاھدان ءِ نام ءَ زانگ بیتگ-

اھوالانی رد ءَ کوش ءِ بھتام ءَ ماں زاھدان ءِ زندان ءَ پاھو ءِ دیگ ءَ جتا یک کوٹی ءَ برگ بیتگ-

ھالانی تہ ءَ گوشگ بیتگ کہ عاطف ایرانی سال نود ءُ نُھ ءَ گرگ بیتگ کہ آ وھد ءَ آئی ءِ ریشانی توک ءَ اسپیت مان نہ بیتگ بلے گیشیں بندیگی ءُ گماں آئی ءِ سیاھیں مود اسپیت ترینتگ اَنت-

ھمے وڑ ءَ جیرفت ءِ زندان ءَ یک بلوچے پاھو دیگ بیتگ –

پاھو دیگ بیتگیں مردم ءِ پجار نادر ریکی جھمنند زاھدان ءِ نام ءَ زانگ بیتگ-

اھوالانی رد ءَ نادر اہعانی سال نود ءُ نُھ ءَ ما نشہ ءِ باپاری ءِ پژدر ءَ بندیگ کنگ بیتگ-

ھمے وڑ ءَ ایران ءِ اُستان کرمان ءَ چار کس پاھو دیگ بیتگ اَنت کہ ایشانی توک ءَ دو بلوچ ءُ دو کرد ھوار اَنت-

گوستگیں روچ ءَ چہ ایران ءَ پاھو دیگ بیتگیں مردمانی کساس دوازدہ مردم ءَ سر بیتگ اَنت کہ آیانی توک ءَ یک پٹھان ءُ کرد ءُ بلوچ ھوار اَنت ایران اسپھان استان ءُ کرمان، زاھدان ءُ جیرف ءِ بندیگ جاھاں پاھو دیگ بیتگ اَنت –

روکپتی بلوچستان ءِ بنجاھی شھر دزاپ ءَ ناشناسیں مردماں تیرگواری کنان ءَ یک مردمے کُشتگ –

گیشیں ھالانی رد ءَ گوستگیں روچ ءَ ناشناسیں مردماں تیرگواری کتگ ءُ رشید کاشانی جھمنند شیر آباد دزاپ زدگ کتگ ات ءُ چریشی ءَ پد آئی ءَ وتی ٹپانی درد نہ سگ اتگ ءُ بیران بیتگ-

اھوالانی رد ءَ رشید کاشانی ھمے زوتاں بندیگ جاہ ءَ چہ یل کنگ بیتگ ءُ وتی ھلک شیر آباد ءَ ماں ناشناسیں مردماں تیرانی آماچ کتگ بیتگ ءُ آئی ءَ پنچ دانگ لگ اتگ بیتگ اَنت ءُ آ نادراہ ءَ برگ بیتگ ءُ مروچی سھب ءَ آئی ءَ وتی ساہ داتگ اَنت-

رشید ءِ دگہ یک سیادے کہ آئی ءِ نام حسین کاشانی اِنت آ ڈیھ ءِ بگیری ءَ بندیگ اِنت –

روکپتی بلوچستان ءَ تیرگواریانی درچ ءَ ھمک سال بازیں مردمے چہ وتی زند ءَ زبھر بوگ ءَ اَنت بلے اے وئیلانی گیشتریں کِسہ ناشناس گوشگ بوگ ءَ اَنت-