TBP Balochi

بلوچستان ءِ دمگ بولان ءَ پوجی بیڑ داں انگت برجاہ اَنت، سلاہ بندیں اُرش ءِ تہءَ لشکری کارندھاں جانی تاوان ءِ دیمپانی ءِ ھال

بولان ءِ جتاھیں ھنکین بزگر، ہلیکسر، چلڑی، مارواڑ، پیر اسماعیل، شامیر لٹ، مارگٹ ءُ شال ءَ بندوکیں زرغون ءِ ھنکینانی تہءَ مروچی دومی روچ ءَ ھم پاکستانی پوج ءِ نیمگ بیڑ برجاہ اِنت۔

بیڑ ءِ تہءَ پوجی کارندھاں گن شپ ءُ جاسوسیں گرابانی کمک گون اِنت۔

اھوالکارءَ ٹی بی پی ءَ گُشتگ کہ بیڑءَ ھواریں پوجی کارندہ سلاہ بندیں مردماں اُرش ءِ تہءَ نشانگ کُتگ اَنت کہ اِشی آسر ءَ آیاں جانی تاوان ءِ دیمپانی کنگ کپتگ البت داں انگت واکدارانی نیمگ ءَ اے درگت ءَ ھچ پئیمیں اھوال شنگ کنگ نہ بیتگ۔

پوجی بیڑ ءِ بندات ھما وھدءَ کنگ بیت وھدیکہ شمبے ءِ شپ ءَ سلاہ بندیں مردماں لشکریانی یک بنجل اُرش ءِ تہءَ نشانگ کُتگ اَت۔

پاکستانی پوج ءِ جارکش آئی ایس پی آر ءَ وئیل راست کنان ءَ رسانکدرءَ گُشتگ کہ شال ءَ بندوکیں زرغون ءِ ھند ءَ پاکستانی لشکریانی پانگس ءِ سرءَ اُرش کنگ بیتگ۔

آئی ایس پی آر ءِ ردءَ تیر گواری ءَ سئے لشکری کارندہ کُشگ بیتگ اَنت وھدیکہ آئی ءَ یک ارشکار ئے جنگ بئیگ ءِ ھم ٹاہ داتگ۔

گوستگیں روچ ءَ بلوچ لبریشن آرمی ءِ جارکش جیئند بلوچ ءَ وتی شنگ کُتگیں درشانے تہءَ گُشتگ کہ بی ایل اے ءِ سرمچاراں زرغون ءُ مارگٹ اُرشانی تہءَ قوضہ گیریں پاکستانی پوج ءِ نُھ کارندہ کُشتگ ءُ ھپت ٹپی کُتگ اَنت۔

جیئند بلوچ ءَ دیمتر ءَ گُشتگ کہ زرغون ءَ ھوار بولان ءُ کُش ءُ گوری دمگانی تہءَ لھتیں اشکر کاریزانی ٹھیکیدار ءُ مزدور تچکی ءَ قوضہ گیریں پاکستانی پوج ءِ ھاترءَ کار کنگ ءَ اَنت کہ آیانی پھازگ ءَ ھاترءَ پاکستانی پوج ءَ دمگانی تہءَ پانگس اڈ کنگ ءَ اِنت ھمے پوسٹ پمے ھاترءَ اڈ بئیگ ءَ بیتگ کہ نشانگ کنگ بیتگ۔

رودراتکی ءُ روکپتی بلوچستان ءِ سیمسری دمگ سراوان ءَ ناشناسین سلاہ بندیں مردمانی اُرش ءَ ایرانی لشکر ءِ شش کارندہ کشگ بیتگ اَنت-

اھوالانی رد ءَ سراوان ءِ ھند مزہ سر ءَ ناشناسیں مردمانی تیرگواری ءَ ایرانی لشکر ءِ شش کارندہ کشگ بیتگ انت-

کشگ بیتگیں کارندھانی پجار حسین بادامکی، علی غنی، رضا برجی، محمد جمالزداہ، یونس سیفی نژاد ءُ ناصر حیدری ءِ ناماں زانگ بیتگ اَنت-

اھوالانی تہ ءَ گوشگ بیتگ کہ ایشانی ھواری ءَ دگہ کارندہ ھم زدگ بوتگ اَنت-

زانگ بہ بیت روکپتی بلوچستان ءَ ایرانی لشکر ءِ سر ءَ وھد وھد ءِ سر ءَ اُرش بوگ ءَ اَنت بلے تنی وھدی اے اُرش ءِ درگت ءَ دگہ سلاہ بندیں گلانی نیمگ ءَ اھوال دیم ءَ نیتکگ اَنت-

سربوتگیں ھالانی رِد ءَ دشت ءِ دمگ کاشاپ ءِ مسیت ءِ پیش امام ءَ شش روچ انت بیگواہ انت ،گمان بیت کہ پوج ءَ آوار جتگ- دومی نیمگ ءَ پاکستانی پوج ءَ چہ بلیدہ ءَ یک ورنایے زورانسری آوار جتگ ءُ بیگواہ کتگ –

گیشیں ھالانی رِد ءَ بلوچستان ءِ دمگ چہ کیچ ءَ پاکستانی پوج ءَ یک ورنایے زورانسری آوار جنگ ءَ پد بیگواہ کتگ- بیگواہ کنگ بیتگیں ورنائے پجّار اختر ء پیر محمد جھمنند کور پُشت بلیدہ نام ءَ چہ بیتگ-

اِھوالکارانی رِد ءَ پوج ءَ گْوستگیں شپ ءَ لوگے ءَ بیِڑبرتگ ءُ ورناہ زورانسری آوار جتگ ءُ ناشناسیں جاھے ءَ برتگ-

ھالانی رِد ءَ کیچ دمگ کاشاپ ءِ مسیت ءِ پیش امام مُلا نزیر ء قادر داد ءَ مروچی شش روچ سرجم انت کہ بیگواہ انت –

دمگی مردمانی رِد ءَ مُلا نزیر ءَ چاردہ مئی ءِ شپ ءَ عشاء ءِ نماز ونتگ ءُ چہ مسیت ءَ در اتکگ کہ ھما انت گار انت –

مُلائے کھول ءِ رِد ءَ مُلا چُشیں مردمے نہ بوتگ کہ کھول ءِ مردماں سرپد مہ کنت ءُ شپ ءَ انگتی در بہ ایت ءُ بروت ـ آھانی گوشگ انت کہ مئے مردم پوج ءَ زورانسری آوار جتگ ءُ بیگواہ کتگ –

کھول ءِ مردماں دمگی واکدار ءُ انسان دوستیں مردماں گوں لوٹ کتگ کہ مُلائے پد جنگ ءَ گوم ءَ ھمراہ داری بہ کن انت –

زانگ بہ بیت کہ بلوچستان ءِ جتا جتائیں ھند ءُ دمگاں چشیں وئیل پیش ءَ ھم دیم ءَ اتکگ انت کہ آھانی آوار جنی ءُ کوش ءَ پاکستانی پوج ءُ دمگی کُشندہ ٹولیانی دست مان بوتگ – گوستگیں سال ءَ دوھزار بیست ءُ دو ءَ کاشاپ ءَ کسانسالیں زھگ عبداللہ ء محمد نامی گونڈلے چہ گِس ءَ در اتکگ ءُ بیگواہ بوتگ ات کہ دومی روچ ءَ آئی ءِ جون دست کپتگ ات ـ گونڈل ءِ کوش ءِ الزام ھم پوج ءُ دمگی ڈیت اسکواڈ سر ءَ جنگ بوتگ ات –

سر بیتگیں اھوالانی رد ءَ روکپتی بلوچستان ءِ دمگ پنوج ءَ ایرانی چیریِا دارھاں چار ورنا دزگیر کنگ ءَ پد لٹ ءُ کُٹ کتگ ءُ گون وت برتگ اَنت-

اھوالانی رد ءَ گوستگیں روچ ءَ ایرانی چیریں ادارھاں چار ورناہ ماں پنوج ءَ دزگیر کنگ ءَ پد گوں وت برتگ اَنت-

آوار جنگ بیتگیں دو ورنایانی پجار بیتگ اَنت کہ آیانی توک ءَ یکے ءِ نام ارمان اربابی ء اھمد ءُ نیما اربابی ء جان مھمد ءِ ناماں زانگ بیتگ اَنت ھردوک ھبدہ سال ءِ اُمرے ورناہ اَنت-

آوار جنگ بیتگیں دو ورنایانی بارو ءُ نامانی درگت ءُ دگہ اھوال دیم ءَ نیتکگ اَنت –

ھمے وڑ ءَ گوستگیں روچ ءَ ھم بازیں ورنایے ماں بنجاھی شھر زاھدان ءَ ھم لٹ ءُ کُٹ ءُ دزگیری ءِ اھوال بیتگ اَنت بلے رندتری دگہ راستگیں اھوال نیتکگ اَنت-

بولان ءَ لشکر ءِ لشکر کشی برجاہ، بیڑ ءِ میان ءَ سلاہ بندانی میان ءَ جنگ ءُ چوپ ءِ اھوال اِنت ءُ شال ءَ سلاہ بندانی اُرش ءَ سَے پوجی کارندہ کُشگ بیتگ اَنت –

سر بیتگیں اھوالانی رد ءَ مروچی سھب ءَ پاکستانی پوج ءَ بولان ءِ جتا جتائیں جاہ بزگر، ھلہکسع، چلڑی، مارواڑ، پیر اسماعیل، شامیر لٹ، مارگٹ ءُ شال ءَ ھواریں دمگ زرغون ءِ ھند ءَ پوجی بیڑ بندات کتگ اَنت-

دمگی مردماں گوں ٹی بی پی ءَ گپ کنان ءَ گوشتگ کہ پوجی بیڑ داں انگت ءَ برجاہ اِنت ءُ ھمے وڑ پاکستانی پوج ءُ سلاہ بندانی میان ءَ جنگ ءُ چوپ ءِ اھوال اِنت بلے داں انگت ءَ ھردوکیں نیمگاں تاوانانی اھوال دیم ءَ نیتکگ اَنت-

پوجی بیڑ ءِ وھد ءَ ھیلی کاپٹراں ھوار چیرین بالیگ ھم برز ءَ یکشل ءَ بال اَنت-

ھمے داب ءَ بنجاھی شھر شال ءَ ھواریں دمگ زرغون ءِ ھند ءَ سلاہ بندانی اُرش ءَ پاکستانی پوج ءِ سَے کارندہ کُشگ بیتگ اَنت-

پاکستانی پوج ءِ جارکش ءَ آئی ایس پی آر ءَ وئیل ءِ راست کنان ءَ گوشتگ کہ رسانکدراں اھوال دیان ءَ گوشتگ بلوچستان ءِ دمگ زرغون ءَ پاکستانی پوج ءِ چیک پوسٹ ءِ سر ءَ اُرش بیتگ –

آئی ایس پی آر ءِ رد ءَ تیرگواری ءِ میان ءَ سَے کارندہ کشگ بیتگ اَنت ءُ آیاں ٹاہ دیان ءَ گوشتگ کہ تیرگواری ءِ میان ءَ یک اُرش کارے ھم کُشگ بیتگ-

آئی ءَ گوشتگ دمگ ءَ سیکورٹی پورسز ءِ پٹ ءُ پول کنگ ءَ اِنت –

اے دمگ ءَ بلوچ سلاہ بندیں گل بلوچ لبریشن آرمی پرکار اِنت بلے داں انگت ءَ اے درگت ءَ گل ءِ نیمگ ءَ ھچ درشان دیم ءَ نیتکگ اِنت –