TBP Balochi

بلوچستان ءِ دمگ بولان ءَ مروچی سیمی روچ ءَ ھم پاکستانی لشکر ءِ لشکر کشی برجاہ –

دمگی مردمانی رد ءَ مروچی سیمی روچ ءَ گن شپ ءُ چیریں بالیگ یکشل ءَ دمگ ءَ برز ءَ بال اَنت ءُ ھمے وڑ بازیں جاھاں ھیلی کاپٹرانی تیرگواری ھم بیتگ اَنت-

زرغون، مارگٹ ءُ کش ءُ گوری دمگاں بیڑ ءِ زد ءَ اَنت، لشکر کشی ءِ وھد ءَ پاکستانی پوج سلاہ بندیں مردماں نشانگ کتگ ات کہ ایشی ءِ زمہ واری بلوچ لبریشن آرمی ءَ پہ وت ءَ زرتگ ات-

دو روچ پیش پوجی لشکر کشی ھما وھد ءَ کنگ بیتگ کہ سلاہ بندیں مردماں پاکستانی پوج ءِ یک پوسٹے ءِ سر ءَ اُرش کتگ ات-

پاکستانی پوج ءِ جارکش آئی ایس پی آر ءَ وئیل ءِ راست کنان ءَ رسانکدراں گشتگ کہ شال ءِ ھند زرغون ءَ پاکستانی پوج ءِ چیک پوسٹ نشانگ کنگ بیتگ-

آئی ایس پی آر ءِ رد ءَ تیرگواری ءِ آسر ءَ پوج ءِ سَے کارندہ کُشگ بیتگ اَنت ءُ آئی ءَ ٹاہ داتگ کہ یک اُرشکارے جنگ بیتگ-

اے اُرش ءِ زمہ واری بلوچ لبریشن آرمی ءَ پہ وت ءَ زرتگ ات ءُ گوشتگ ات کہ گوستگیں روچ ءَ لشکر کشی ءَ دزگٹیں پاکستانی پوج ءِ کارندہ نشانگ کتگ انت – جیئند بلوچ ءَ گوشتگ ات کہ بولان مارگٹ ءَ سرمچارانی اُرش ءَ پاکستانی پوج ءِ سَے ایس ایس جی کمانڈوز کُشتگ اَنت-

کیبرال

نبشتہ کار: لقمان بلوچ

دی بلوچستان پوسٹ

“مئے مردم مئے کوہ اَنت”اے کتاب کیبرال ءِ ساچشتاں چہ یک ساچشتے کہ آشوبی لبزانک ءِ تہ ءَ بلاھیں کَدّ ءُ بستارے ئِے واھُند اِنت، اے کتاب ھما زمانگ ءَ چاپ بوتگ کہ افریقہ ایردست بوتگ، اود ءِ مردم گُلام بوتگ اَنت، آیانی زَمین، زُبان ءُ دود ءُ ربیدگ گار ءُ بیگواھی ءِ نیمگ ءَ سپر کنگ ءَ بوتگ اَنت کیبرال ءِ اے کتاب گنی بساؤ ءُ کیپ وردے ءِ آجوئی جُنز ءُ آئی ءِ ھیال ءُ تجرباتاں پَدر کَنت کہ چوں اود ءِ مھلوک ءَ کبزہ گیر پروش داتگ ءُ چوں وتی وت واجھی ءَ پہ جُھد کُرتگ-

اے کتاب یک شَرین ءُ پراھ ءُ شاھگانیں رَنگی ءَ بازیں سرھالانی سر ءَ باوست کَنت، کبزہ گیری ءِ تاریخی پُشدر ءَ رِیچ ءُ پریچ کَنت، دود ءُ ربیدگانی ارزشت پہ آجوئی زُرمبشتاں چے اِنت؟ ءُ زانت ءِ بستار چی اِنت؟ اے دُراھیں سرھالاں شوکیں رَنگے ءَ پدر کَنت ءُ دیم ءَ کار اِیت-

کبزہ گیر ءُ آجوئی

کیبرال ھما رِپک ءَ پدر کَنت کہ آ پرتگالیاں افریقہ ءِ زمین ءُ مردمانی سر ءَ کارمرد کُرتگ اَنت ءُ گُوْش اِیت کہ مارا ھواری جُھد کَنگی اِنت ءُ یک راجی پجارے جوڑ کَنگی اِنت چی ءَ کہ راجی پجار آجوئی ءِ اولی گام اِنت-

دودءُ ربیدگ ءُ راجی پجار

کیبرال ءِ گُشگ اِیش اِنت کہ راجی آجوئی ءِ جُھد ءَ ربیدگ مزنیں ارزشتے داریت، آ گُوْش اِیت کہ پہ آجوئی ءَ الم اِنت کہ تو وتی دود ءُ ربیدگاں ارزشت بِدے ءُ ایشاں پہ وَت شَرپے بِزان ، چیاکہ اے ھمے دود اَنت کہ ترا یکجاہ کَن اَنت ءُ یک راجے ءِ بستار ءِ بَکش اَنت ءُ ترا گِھگیری ءِ کِشک ءَ پیش دار اَنت-

زَانت ءُ سرپدی

کیبرال وانگ ءِ کِرد ءَ باز ساڑا اِیت چِیاکہ آئی ءِ نِزّ ءَ کبزھ گیری ءِ ھلاس کَنگ ءِ توجیل یَکّیں وانگ اِنت کہ آ ترا زانت ءِ ھمرائی ءَ سرپدی جم دنت، وانگ جیڑگی راھاں بوج اِیت، تنقید ءُ اصلاح ءَ پوہ کَنت، سیاسی سِنچے وَدی کَنت پمیشکا پہ آجوئی ءَ وانگ باز مزنیں ارزشتے دار اِیت-

گوریلہ جنگ ءُ آشوبی حکمت عملی

اے کتاب ھما طریقہ کاراں سَریچ پَریچ کَنت کہ آ کیبرال ءُ آئی ءِ ھمبراھاں کُرتگ اَنت انچوش کہ گوریلہ جنگ بہ بیت، مردمانی موبلائیزڈ کَنگ بہ بیت یا یک مُھکمیں گَلے ءِ جوڑ کنگ بہ بیت کیبرال سیاسی زانت ءِ ھاسیت ءِ سر ءَ ھم شریں رَنگے ءَ گپ ءُ تران کَنت ءُ اے زلورت ءَ ھم مار ات کَنت کہ آجوئی ءِ جنزانانی رِشتگ چوں گوں لَس مھلوک ءَ جوڑ کَنگ بیت اِنت-

مئے ھَبر

کیبرال وَ راستیں کہ افریقنے بوتگ بلے اے کِسّہ ءُ پنت تھنا افریقن نہ اَنت بلکیں اے شاھگانیں زَمین ءِ سر ءَ ھر ھما ایردستیں راجے کہ ھَست اِے آئی ءِ کِسّہ اِنت ءُ آئی ءِ پَنت اِنت چوش کہ بلوچ ءَ ھم مزنیں مُدّتے بیت کہ آئی ءِ آجوئی پچ گِرگ بوتگ، آئی ءِ زمین پُلگ بوتگ، تاریخ لگانڈویں رَنگے ءَ دیم ءَ آرگ بیتگ، دود ءُ ربیدگانی ارزشت گار کُتگ ءُ علم ءُ زانت ءَ چہ دور داشتگ چیا کہ کبزہ گیر چو سادگ نہ اِنت آ زانت کہ کجام چیز اِنت کہ منی کبزھگیری ءِ مَرگ اِنت، کجام چیز اِنت آ من ءَ یکیں روچ ءَ چہ اِے زَمین ءَ در کُرت کَنت پمیشکا آئی ءَ تئی تاریخ ، دود ءُ ربیدگ ءُ وانگ ءُ زانگ دُراھ وتی دست ءِ چیر ءَ کُرتگ اَنت بلے بلوچ ہم چو سادگ نہ بوتگ یک ھَدّے ءَ داں وتی گِھگیری ءِ سوب ءَ بلوچ ءَ وت ءَ داشتگ ءُ دیمتر ءَ ھم دار اِیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ چہ کیچ ءَ پاکستانی پوج ءَ پنچ مردم زورانسری آوار جنی ءِ نشانگ کتگ ءُ ناشناسیں جاھے ءَ برتگ-

گیشیں ھالانی رِد ءَ پاکستانی پوج ءَ بلیدہ ءِ دمگ میناز ڈن سر ءَ بیڑبرتگ ءَ دو براتاں ھوار پنچ مردم زورانسری آوار جنی ءِ نشانگ کتگ ءُ ناشناسیں جاھے ءَ برتگ-

بیگواہ بیتگیانی پجّار وسیم ء حاجی شرف ، یار جان ء منظور ، عزیز ء حکیم ، غفور ء حمید ءُ عبدالباسط ء حمید ناماں چہ بیتگ اَنت-

دمگی مردمانی رِد ءَ اے مردم مروچی مگرب ءَ رند پوج ءَ لوگانی سر ءَ بیڑبرتگ ءُ آوار جنگ ءَ پد بیگواہ کتگ اَنت-

زانگ بہ بیت دو روچ ءَ ساری ھم بلیدہ ءِ دمگ کور پُشت ءَ پاکستانی پوج ءَ یک لوگے ءِ سر ءَ بیڑبرتگ اَت اختر ء پیر محمد نامیں ورنایے زورانسری آوار جنی ءِ نشانگ کتگ اَت-

بلوچستان ءِ جتاجتائیں دمگاں بیتگیں وئیلانی آسر ءَ زالبولے ءَ ھوات شش مردم بیران وھدے کہ دہ ٹپی بیتگ اَنت-

گیشیں ھالانی رِد ءَ پنجگور ءِ دمگ پروم کپ ءَ ٹائر ترکگ ءَ چہ تیل کشیں زمباد گاڑی یے چپی بیتگ، گاڑی چپ بوگ ءَ چہ آس چست بوتگ-

ھالانی رِد ءَ وئیل ءَ گرمکان ءِ جھمنندیں یک ورنایے سُتکگ ءُ بیران بیتگ وھدے کہ یکے سک ٹپی بیتگ-

دومی نیمگ ءَ قلعہ سیف اللہ ءَ گاڑی ءِ چپ بوگ ءِ سبب ءَ گاڑی ءَ سوار یک مردمے بیران ءُ سے ٹپی بیتگ اَنت- ٹپی دوا درمان کنگ ءِ ھاتر ءَ دمگی نادُراھجاہ ءَ برتگ-

ھمے وڑ لسبیلہ ءِ دمگ بیلہ بلوچی گوٹھ ءَ لوگے ءِ دیوال کپگ ءَ چہ زالبولے بیران وھدے کہ دگہ یک زالبولے ٹپی بیتگ- اود ءَ ٹپی بیتگیں زالبول دوا درمان کنگ ءَ پد کراچی ءَ برگ بیتگ وھدے کہ بیران بیتگیں زالبول لاش گیشیں چار ءُ ٹپاس ءَ پد کھول ءَ داتگ-

ھمے وڑ کلات ءِ دمگ منگچر ءَ زرد غلام جان ءَ لانگو ٹَک ءِ دو ٹولیانی میان ءَ ٹَکی جنگ ءُ چوپ ءَ تیرگواری ءِ آسر ءَ دو مردم بیران سے زالبولاں ھوار پنچ مردم ٹپی بیتگ اَنت-

دومی نیمگ ءَ گوستگیں شپ ءَ شال ءِ دمگ سریاب ءَ ناشناسیں مردمانی تیرگواری ءَ چہ میر عابد بادینی نامیں مردمے بیران بیتگ-

کلات ءِ ھند منگچر ءَ یک سالے ءَ پیش زورانسری آوار جنی ءِ آماچیں شاھان بلوچ پنام ءِ شاہ جان ءُ کفایت نیچاری ءِ بیگواھی ءِ ھلاپ ءَ کھول ءَ زھرشانی کنان ءَ کراچی، شال ءِ شھدگ روانی ءِ ھاتر ءَ بازیں اداراں داں بند کتگ-

آئی ءَ گوشتگ کہ زھرشانی کنان ءَ بازیں مردماں لوٹ کتگ کہ بیگواھیں مردماں زوت یل بہ کنت-

زھرشانی ءِ سبب ءَ بنجاھی شھدرگ روانی ءِ ھاتر ءَ بند بیتگ ھردوکیں نیمگاں بازیں کساسے ءَ گاڑیانی کتار ءُ مساپر مھتل کنگ بیتگ اَنت-

آیاں لوٹ کتگ کہ مئے دوستیگیں مردماں دیم ءَ بیار ات ءُ مارا انساپ دیگ بہ بیت اِنت ءُ پد ءَ دمگدار ءِ سدکی دیگ ءَ پد کھولاں وتی زھرشانی ھلاس کتگ –

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءَ کیچ ءِ ھند تمپ کلاگ ءَ پاکستانی پوج ءِ چوکی ءِ سر ءَ بیتگیں اُرش ءِ زمہ واری من اتگ-

جارکش گوشتگ سرمچاراں گوستگیں شپ ءَ پوجی چوکی اے ون مارٹرگولھاں گوں نشانگ کتگ کہ چریشی ءَ چہ اے ون گولہ چوکی ءِ تہ ءَ کپتگ ءُ دشمنیں پوج ءَ بازیں کچے ءَ جانی ءُ مالی تاوانانی دیمپانی کنگ کپتگ-

میجر گوھرام بلوچ ءَ گوشتگ کہ ما یک رندے پد ءَ تمپ ءُ کَش ءُ گوری دمگاں سرکاری پلامرزی ءَ ھستیں ڈیتھ اسکواڈ ءِ ٹولیاں گوں ترندی ءَ سرپد کن ایں آ پاکستانی پوج ءِ گوشگ ءَ مردمانی آوار جنگ، کُشگ، زر گرگ ءُ دارگ ءُ چاگردی سلکاریاں دزکش بہ بنت پرچا آیانی نشان بیتگ اَنت درست مئے نشانگ ءِ توک ءَ اَنت-

جارکش ءَ گوشتگ ما مھلوک ءَ گوں دزبندی کن ایں آ دشمن ءِ پلامرزی کتگین ٹولیاں چہ گستا بہ بنت آیانی گون ءَ ھچ رنگیں سیاد مہ دار اَنت پرچاکہ آ سرمچارانی نشانگ ءِ توک ءَ اَنت-