TBP Balochi

بلوچستان ءِ دمگ بولان ءُ ایندگہ کش ءُ کری ھند ءُ دمگاں پاکستانی پوج ءِ مروچی چارمی روچ ءَ ھم لشکر کشی برجاہ بوتگ، بازیں جاھاں کمانڈو ایرگیجگ بوتگ –

اھوالکار ءَ گوں ٹی بی پی ءَ تران کنان ءَ گوشتگ کہ مروچی چارمی روچ ءَ ھم شال ءِ نزیکیں دمگ زرغون ءُ بولان ءِ بازیں دمگاں پوجی لشکر کشی برجاہ انت اے میان ءَ چاریگیں بالگرداں ھم تر ءُ تاب کتگ –

اھوالکار ءِ رِد ءَ زرغون ءُ کش ءُ گوری کوھی دمگاں چہ بالگردانی سر ءَ پوجی کمانڈو ھم ایرگیجگ بوتگ بلے تنی وھدی چہ واکدارانی نیمگ ءَ اے درگت ءَ ھچ گوشگ نہ بوتگ –

زانگ بہ بیت لشکر کشی ھما وھد ءَ بندات کنگ بوتگ کہ ناشناسیں سلاہ بندیں مردماں پاکستانی پوج ءِ یک پانگسے ءِ سر ءَ اُرش کتگ –

پاکستانی پوج آئی ایس پی آر ءَ اے ھبر راست کتگ ءُ گوشتگ کہ شال ءِ نزیکیں دمگ زرغون ءَ پاکستانی پوج ءِ پانگسے ءِ سر ءَ اُرش کنگ بوتگ –

آئی ایس پی آر ءِ رِد ءَ دو دیمی تیرگواری ءَ سَے پوجی کارمند مُرتگ انت ءُ آئی ءَ اے ھم گوشتگ کہ تیرگواری ءَ یک اُرش کارے ھم جنگ بوتگ –

پاکستانی پوج ءِ پانگس ءُ پدا رند ءَ لشکر کشی ءِ میان ءَ سَے جتا جتائیں جاھاں پاکستانی پوج ءِ سر ءَ اُرش کنگ بوتگ ءُ اے اُرشانی زمّہ واری بلوچ آجوئی لوٹوکیں سلاہ بندیں گل بی ایل اے ءَ منّ اِتگ انت – بی ایل اے ءِ جارکش جیئند بلوچ ءِ رِد ءَ اے سرجمیں اُرشاں دوازدہ پوجی کارمند مُرتگ انت – جارکش ءِ رِد ءَ اُرش ءَ مرتگیں کارمندانی تہ ءَ سَے ایس ایس جی کمانڈو ھم ھوار –

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءِ جھمنند ماں سنندج ءَ آوار جنگ ءَ پد ناشناسیں جاھاں برگ بیتگ-

گیشیں ھالانی رد ءَ زاھدان ءِ جھمنندیں فرامرز براھوئی ایرانی چیریں ادارھانی کارندھاں ماں سنندج ءَ آوار جنگ ءَ پد بیگواہ کنگ بیتگ-

اھوالانی رد ءَ بیست ءُ دو سالیگیں فرامرز ریکی ء ھدا نور ریکی روکپتی بلوچستان ءِ بنجاھی شھر زاھدان ءِ نندوک گوشگ بیتگ-

اھوالانی رد ءَ بیست ءُ دو سالی ئیں ورناہ ایرانی چیریں ادارھاں نشہ ءِ باپاری ءِ پژدر ءَ دزگیر کنگ ءَ پد ناشناسیں زنداناں برتگ بلے لس اھوالاں ایشی ءِ راستی انگت نہ بیتگ-

بلوچ سلاہ بندیں گل بلوچ نیشنلسٹ آرمی ءِ کماندار گلزار امام پنام شمبے پاکستان ءَ وتی رسانکدرانی دیم ءَ پیش کتگ-

شنگ بیتگیں اھوالانی رد ءَ سلاہ بندین گل بلوچ نیشنلسٹ آرمی ءِ سروک کماندار گلزار امام پنام ءِ شمبے شال ءَ رسانکدرانی دیم ءَ پیش کنگ بیتگ ءُ اے وھد ءَ آئی ءِ گور ءَ وزیر داکلہ بلوچ میر ضیاء لانگو ءُ سنیٹر آگاہ عمر جاڑیگ بیتگ اَنت-

پریس کانفرنس ءَ گلزار امام ءَ گوشتگ کہ من ھما راہ گچین کتگ ءُ آ رد بوتگ ءُ ھکانی گرگ ءِ دروم پر ایمنیں رنگ اِنت-

آئی ءَ گوشتگ کہ بلوچستان ءَ ھکانی گرگ بس جنگ ءَ نہ بیت اِنت سیاسی درور ءَ گرگ بیت اِنت ءُ مارا امیت اِنت ریاست مات ءِ کرد ءَ پیلو کنت ءُ مارا وھد دنت-

گلزار بلوچ ءَ گوشتگ کہ ایشی ءِ توک ءَ ھچ شک نیست اِنت ریاستی ادار بلوچستان ءِ جیڑ ءِ سر ءَ اَنت آ ایش کن اَنت جنگ ءَ ھچ وتی وھد ءَ زوال مہ کن ات-

آئی ءَ گوشتگ بلوچستان ءَ ھردوکیں نیمگاں مردم جنگ بیتگ اَنت ایشی ءِ ماپی لوٹ آں –

ھمے وھد ءَ وزیر داکلہ بلوچستان ضیا لانگو ءَ گوشتگ کہ جیڑہ گپ ءُ تران ءَ گشینگ بیت اِنت ریاسی ادارھانی گون ءَ گوازی کنوک ھچ رنگ ءَ پھل کنگ نہ بنت-

پاکستان ءِ گوریچانی روکپت ءِ ھند ءَ سَے شمبے ءِ روچ ءَ سلاہ بندیں مردماں گیس ءُ تیل ءِ شوھاز کنوکیں یک پلانٹے ءِ سر ءَ اُرش کتگ – چریشی ءِ آسر ءَ ایف سی ءِ چار کاندہ ءُ دو لس پوشامی کارندھاں ھوار شش کارندہ مرتگ اَنت-

پولیس ءِ اگدودار عرفان خان ءَ رائٹر ءَ گوں گپ کنان ءَ گوشتگ پنجاہ ناشریں مردماں اوگان ءِ سیمسری ھند ھنگو ءَ ایم او ایل پاکستان آئل اینڈ گیس کمپنی ءِ چیردستی ءَ ھلوکیں پلانٹ ءِ سر ءَ اُرش کتگ –

پولیس ءِ گوشگ اِنت ناشریں مردماں راکٹاں ھلوکیں دزبمباں ھوار مزنیں سلاھانی گون ءَ دو چات ایم 8 ءُ ایم 10 نشانگ کتگ اَنت-

پولیس ءِ رد ءَ ایم 8 ءِ سر ءَ اُرش پھزداراں بے سوب کتگ بلے ایم 10 ءَ مردم کشگ بیتگ اَنت-

آئی ءَ گوشتگ کہ ناشریں مردماں گوریچانی وزیرستان ءَ ھواری دمگاں پشت ماندیگ ءَ پیسر پاور پلانٹ ءِ شمسی ھم تاوان داتگ اَنت-

مرتگیں کارندھانی پجار سپاھی حمزہ علی، سپاھی شریعت اللہ، سپاھی محمد ولید ءُ سپاھی ظفر اعظم ءِ نام ءَ زانگ بیتگ اَنت-

پولیس ءِ رد ءَ سلاہ بندیں مردماں سرکاری سلاہ ءُ دگہ ساز ءُ سامان ھم گون وت برتگ اَنت- سلاھانی توک ءَ چار ایس ایم جی، یک ایل ایم جی گون میگزین ءُ گرنیڈ ءُ آئل کمپنی ءِ پھزدارانج دو رائفل ھم ھوار اَنت-

پولیس ءِ رد ءَ پھزداری لاش کمبائنڈ ملٹری ھسپتال ٹل ءَ سر کتگ انت ءُ پوسٹ مارٹم ءَ پد آیانی لاش ھنکیناں دیم دیگ بنت اِنت-

داں انگت ءَ اے اُرش ءِ زمہ واری کس ءَ پہ وت ءَ نہ زرتگ-

چینی شھریانی سر ءَ فدائی اُرشکار کنوکیں بلوچ زالبول شاری بلوچ ءِ جسد کھول ءِ ھوالگ ءَ دیگ بیتگ ٹ سیزدہ ماہ ءَ پد آئی ءِ نماز جنازہ بنکی ھنکین ءَ وانگ بیتگ-

گوستگیں سال ءِ بیست ءُ شش اپریل ءَ کراچی یونیورسٹی ءِ بنجاھی شھدگ ءَ یک فدائی اُرشے ءَ چینی استاداں نشانگ کنوکیں شاری بلوچ ءِ نماز جنازہ کھول ءِ ھوالگ ءَ دیگ بیتگ – شاری بلوچ ءِ نماز جنازہ مروچی آئی ءِ بنکی ھنکین نزر آباد ءَ سھب ءِ ساھت دہ ءَ وانگ بیتگ-

زانگ بہ بیت کراچی ءَ گوستگیں سال ءِ بیست ءُ شش اپریل ءِ نیمروچ ءَ فدائی اُرش ءَ سَے چین ءِ نندوکاں ھوار چار مردم مرتگ ات اَنت-

کراچی ءَ اُرش ءِ زمہ واری بلوچستان ءَ پرکاریں گل بلوچ لبریشن آرمی ءَ من اتگ ات – جارکش جیئند بلوچ ءَ گوشتگ ات کہ گل ءِ ونگ مجید برگیڈ ءِ ھمراہ شاری بلوچ ءَ اے اُرش کتگ-

امریکہ ءَ سعودی سفیر ریما بنت بندر ءَ راجدپتری سائنسی مشن ءَ سعودی ءِ ماہ ءِ سر ءَ روکیں ریانہ برناوی ءُ علی القرنی ءَ میان اُستمانی خلا-ی اسٹیشن ءَ بیگ ءِ پژدر ءَ شاہ سلمان بن عبدالعزیز، سلہ عھد شھزادہ مھمد بن سلمان ءُ سعودی مھلوک ءِ نیمگ ءَ مراد باتی دیگ بیتگ-

سرکاری ھال سرکنوکیں ادارہ ایس پی اے ءِ رد ءَ شھزادی ریما بنت بندر ءَ گوشتگ کہ سعودی عرب ءِ خلائی نیاد ءَ مروچی راجدپتری سوبمندی بیتگ، اے سوبمندی ءِ پژدر ءَ مھلوک ءَ مراد باتی گوش آں –

آئی ءَ گوشتگ کہ سعودی عرب ءِ خلائی نیاد ءَ سوبمند کنگ ءَ بھر زیروکیں درستیں مردمانی ءُ ادارھانی منت ءَ گراں – مروچی سعودی عرب ءُ مسلمانیں زالبول میان اُستمانی تکاں گام ایر کتگ ءُ مزنیں سوبمندی یے گپتگ-

شھزادی ریما ءَ گوشتگ کپ اے سعودی ءِ زالبولاں وت واک کنگ ءُ سعودی وژن 2030 ءَ سرجم کنگ ءَ دیمروئی، سروکی کنگ ءِ کرد ءَ تالان کنگ ءَ مزنیں گامے – چریشی ءَ چہ زانگ بیت اِنت سعودی عرب زالبولانی وت واک کنگ ءَ جھد ءَ اِنت-

سعودی ءِ سفیر ءَ گوشتگ کہ خلائی مشن ءِ روگ ءِ نیاد ءَ بھر زیرگ پھری یے اے دو راجدپتری تاکاں مزنیں بستارے دار ایت –

عرب ءُ مسلمانیں زالبولانی خلائی مھم ءَ روگ ءُ سعودی ٹیم ءَ میان اُستمانی تکاں خلائی اسٹیشن ءَ روگ ءَ ستاشانیانی سوبمندی یے –

اسرائیل ءَ متھدہ عرب امارات ءَ سپارت ھانہ ءَ دوشمبے ءِ روچ ءَ گوشتگ امارات ءَ اسرائیل ءِ سروک اسھاق ھرزوگ ءُ اسرائیل ءِ سر وزیر بنجمن نیتن یاھو ءَ را اے سال ءِ نومبر ءَ دبئی ءَ بیوکیں جاورانی گر ءُ داری ءِ نیاد کوپ 28 ءَ بھر زورگ ءِ داوت داتگ –

عرب نیوز ءِ رد ءَ اگاں اسرائیل ءِ سر وزیر نیتن یاھو کانفرنس ءَ بھر زیر ایت گڑا سروزیری ءِ دور ءَ اے آئی ءِ اولی رند بیت اِنت متھدہ عرب امارات ءَ آیگ اِنت-

اے سال ءِ بندات ءَ آئی ءِ تر ءُ تاب امارات ءَ واترگ بیتگ آئی ءَ اے سال ءِ بندات ءَ آیگ ءِ گپ واترینتگ-

زانگ بہ بیت متھدہ عرب امارات ءَ اے سال ءِ سِی نومبر ءَ اں دوازدہ دسمبر ءَ دبئی ءُ ایکسیو سینٹر ءَ میان استمان ءِ کلائمنٹ ایونٹ ءِ سروکی ءَ کنگ اِنت-

ایشی ءَ پیش امارات ءَ شام ءِ سروک بشار الاسد کوپ 28 ءَ بھر زیرگ ءِ داوت داتگ بیتگ-

ایران ءَ علی رضا عنایتی ءَ سعودی عرب ءَ وتی سفیر کتگ –

عرب نیوز ءَ ایرانی ھال سرکنوکیں ادارہ میزان ءِ درور دیان ءَ گوشتگ کہ سعودی عرب ءَ سفیری ءَ دارگ بوتگیں علہ رضا عنایتی ایران ءَ وزیر ھارجہ ءِ اسسٹنٹ ءِ اگدو ءَ پیش ءَ کار ءَ بیتگ-

ایران ءِ نیمگ ءَ ڈیھ ءَ سفیر ءِ دارگ ءِ جار اپریل ءِ ماہ ءَ چین ءِ جھداں تھران ءُ ریاض ءِ میان ءَ بیتگیں مسامانی آسری بیتگ-

اے مسام ءَ ایران ءُ سعودی عرب ےِ بازیں سالاں دشمنی ھلاس کتگ – علی رضا ایران ءِ وزارت ھارجہ ءَ عرب خلیج ءَ ڈائریکٹر جنرل ءَ کار ءَ بیتگ-

زانگ بہ بیت سعودی عرب ءَ سال دوھزار ءُ شانزدہ ءَ تھران ءَ وتی سفارت خانہ ءُ مشھد ءَ وتی کونسل ھانہ ءَ سرکاری بگیری زھرشانیاں پد ایران ءِ گون ءَ وتی سیادی ھلاس کتگ ات-

بلوچستان ءِ دمگ ھزدار وڈھ ءَ لسبیلہ شھدربرجاہ وڈھ کیمپس ءِ نودربراں سول سوسائٹی ءُ سیاسی باسکانی ھمراھی ءَ روانک ءِ کش اِتگ ءُ لوٹ کتگ کہ کیمپس ءَ ماڑی دیگ بہ بیت اِنت ءُ جتا شھدربرجاہ ءِ جوڑ کنگ بہ بیت ءُ سردار عطاء اللہ مینگل ءِ نام ءَ کنگ بہ بیت اِنت آھاں اے ھم لوٹ کتگ کہ ایندگہ جیڑہ ھم گیش ءُ گیوار کنگ بہ بنت –

روانک شھدربرجاہ ءِ چار راہ ءَ بندات کنگ بیتگ ءُ وڈھ پریس کلب ءَ تاں شتگ انت ءُ ھمودا مچی کنگ بوتگ – زھرشانی ءَ سول سوسائٹی، باپاری، شھدبرجاہ ءِ لکچراراں ھوار مزنیں کچے ءَ مردماں بھر زرتگ –

درنگاز کنوکاں تران کنان ءَ گوشتگ کہ وڈھ کیمپس ءَ ھپت سال سرجم بوگی انت بلے ھچ نیمگ ءَ دلگوش دیگ بوگ ءَ نہ انت – نصیرآباد شھدربرجاہ ءِ کراداد ءُ ھاراب کمیپس ءِ ھمراھی ءَ وڈھ کیمپس ءَ شھدربرجاھے ءِ جوڑ کنگ ءِ کراداد منگ بوتگ بلے لسبیلہ شھدربرجاہ ءِ وڈھ کیمپس ءَ دلگوش نہ دیگ زانت دژمنی یے –

آھانی گوشگ ات کہ وڈھ کیمپس ءِ درگت ءَ نودربراں گوں بلوچستان گورنر ءَ گند ءُ نند کتگ بلے ھچ گامگیج زورگ نہ بوتگ – آھاں لوٹ کتگ کہ وڈھ کیمپس سردار عطاء اللہ مینگل ءِ نام ءَ یک فل فلیج شھدربرجاہ ءِ جوڑ کنگ بہ بیت ءُ آھاں گوشتگ کہ وڈھ کیمپس ءَ ھمنکس کہ جیڑہ ھست انت گیش ءُ گیوار کنگ بہ بنت –

آھانی گوشگ ات کہ وڈھ کیمپس ءِ کاردار مدامی ءِ ھاتر ءَ بہ بنت پرچا کہ آھاں شش سال انت وتی کرد ءَ پیلو کنگ ءَ انت –

آھانی گوشگ ات کہ وائس چانسلر وڈھ کیمپس ءِ پنڈ اُتل ءَ پرچا ھرچ کنگ بوگ ءَ انت چریشی ءَ چہ ھمے پدر بیت کہ وائس چانسلر ءُ آئی ءِ ٹولی وڈھ شھدربرجاہ ءِ لوٹوک نہ انت وائس چانسلر ءَ اگاں بہ لوٹ اتنت گڈا ڈیرہ مراد جمالی ءِھمراھی ءَ وڈھ کیمپس ھم جوڈ بوتگ ات –

آھاں پہ نودربرانی ھاتر ءَ زوتاں زوت ھاسٹل جوڑ کنگ ءِ لوٹ کتگ اشاں ابید تنخواہ ءِ گیش کنگ، اسٹاف ءِ کمی ءَ درسیں جیڑوانی سر ءَ گامگیج زورگ بہ بیت ءُ ھشت ادار ڈوٹی دیگ بہ بیت – لوئر اسٹاف مدامی بہ بنت ءُ وائس چانسلر لومز ءِ وڈھ کیمپس ءِ گوم ءَ بدنیتی رویش ءِ سر ءَ ترندیں گامگیج زورگ بہ بیت –