TBP Balochi

گیشکور ءِ هنکین

نبشتہ کار: زری نود

دی بلوچستان پوسٹ

گیشکور ءِ هنکین ءِ لهتے پشت کپتگیں یات ءُ گوست، منی اولی رند اَت کہ من کولواه ءَ آیگی اِت آں رزا ءَ گْوشت”روئیں کولواه ءَ کہ گیشکور ءِ زون جوڑ کنگی اِنت،بانک کریمہ اوں آیگی اِنت ” من گوں رزا اتک آں، کولواه ءَ جوپاگ ءِ گڈی سیمسر اَت ءُ کولواه ءِ کوچگاں تریشر ءُ میشنانی تواراں کوچگ سر ءَ زرتگ ات، بیگاہ ءِ تاموریں موسمے ات گوات سک ترندی ءَ گوں کشگ ءَ ات، اے روچ ءَ تیرتیج ءَ جل اتگ ات ءُ بڈ گوں ژندی ءَ ات کہ دیگر ءِ وهد ءَ رزا ءَ دراهینت” روئیں گیشکور ءَ کہ سنگت یکجاه کنگی اَنت بیرک ءُ سنگر مهتاکے کتاب مارا گوں ات، یات نہ بیت چنتمی تاک اَت بلے لهتے کاپی گون ءَ ات ءُ گون ءِ چیر ءَ آزاد ءِ بیرک اِت آنت ما چار پرپٹ چہ تیرتیج ءَ در اتک ایں دز ءُ موج ءُ لوڈے ئِے تہ ءَ دیم پہ گیشکور ءَ روان بیت ایں، ما اتکیں میشود ءَ روڈ ءِ چپی نیمگ ءَ کهور ءَ بیرکے لگ اتگ ات، بلے کوهن تراتگ ات، شئے ءَ کندگے جت ءُ گوشت” زری پہ لِک کپگ ءَ چونیں کهیرے”؟ من دراهینت” یار منی پاداں کوچل بستگ مرچی سیمی روچ انت انچُک ءَ آرام نہ کتگ باریں اے کولواه ءِ گیشکور کجا انت اے ڈل ءُ ڈوکانی تہ ءَ تو هرکجا چگردے گند ئے کہ بیرکے لچنیاں ، هاهاها “-

شئے رزا ءَ سک ءَ کندگے جت ءُ گوشت” یار اے چگرد کهور ڈن ءُ ڈل ءُ ڈوک منی منزل اَنت منی زندمان ءِ مڈی انت ،تو لِک کپ بیرک ءَ بند روئیں روچ بُڈگی انت”- من لِک کپتاں کهور ءَ بیرک بست ءُ ما اتکیں مئے سنگت بزداد ءِ پمپ ءَ اوشتاتگ اِت انت ءُ روچ مگرب بوت ، رزا ءَ پمپ ءِ نیمگ ءَ چارگ ءَ لگ ات ءُ گون ءَ بیرکے کش ات ئِے ءُ من کندگے جت ءُ دراهینت” شئے من پمپ ءَ لِک کپت نہ کن آں منی پاد هشک انت کسم انت یار، تو دگہ سنگتے ءَ بہ گوش، دگہ سنگتے لِک کپت ءُ بیرک ئِے بست، داں ایشا ءِ نماز ءِ وهد ءَ ما بازارے ءَ اتک ایں، من جست کت چہ شئے ءَ” اے بازار ءِ نام چے اِنت”؟ شئے ءَ بازار ءِ نام گپت بلے منی زهن ءَ در اتکگ ، بلے اد ءَ آزاد گل ءِ ادارهے هست ات ساچان ءِ نام ءِ سر ءَ ما اتکیں لهتے دکانانی لین ءَ یک کوٹی یے ات کماشیں مردے نشتگ ات لالٹینیں بتی ءِ روک ات کتاب ءِ وانگ ءَ ات، مئے سنگت پشتگ کپتگ ات اَنت، رزا کوٹی ءَ شت مرد سلام ءُ دروت کت من کمو دگہ نیمگ ءَ اتک آں کہ سنگتاں چاراں کجانگو مان گیش ات انت، داں سنگت اتک اَنت، ما اتکیں کوٹی ءَ مرد دروت ءُ دراهی کت ءُ دگہ لهتے سنگت اتک بلے منی دیم ءَ درست نوک ات انت مارا آپ ءُ چاه اش کت ، من یکوی جیڑگ ءَ ات آں شپی باید اِنت ما اد ءَ بہ جل ایں گوات سک وش کشگ ءَ ات بلے رزا ءَ گوشت” سنگتاں ما چٹ لیٹ ایں مارا جنزگی انت کہ گیشکور ءَ رسگی انت “. کماش ءَ گوشت ” نان کایاں نان ور ات نوں جنز ات”- شئے ءَ کندگے جت ءُ دراهینت” نان ءَ باندا بلکیں اتکیں مرچی اشتاپی ایں کار باز انت”. کماش ءَ کندگے جت ءُ گوشت” ترا سلام انت شئے هرچ وهد تئی مَهری رهت انت بلے برو پہ سلامتی ما سهب ءَ کائیں” ما در شتیں من کپان ءُ نرنڈاں بوت آں یار جل اتگ ات شپی نوں باریں اے دگہ ڈوکانی تہ ءَ گیشکور کدی کیت، چوناها سرجمیں راه ءَ من ءَ یکوی سوج دیان ات کہ اے کجام ءُ کجام میتگ انت بلے نوں زهن ءَ در شتگ انت ،ھمد ءَ من چہ شئے ءَ جست کت” اے کماش کے ات؟ آئی ءَ دراهینت” چیپ اسلم انت تو ایشرا نزانان ئے کهروار ” من گوشت” یار یکے سیاست ءُ دومی وانگ ءَ هنچو زلیل کتگ من ءَ وتی نام یات نہ بیت ، اے مردم ءُ جاگہ من پیسر ءَ نہ دیستگ انت”-

روان اِنت —

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

متھدہ ارب امارات ءِ گولڈ مارکیٹ گوستگیں ھپتگ ءِ گڈسر ءَ سھر ءِ نھادانی توک ءَ سَے چار درھم ءِ گیشی ریکارڈ کتگ بیتگ-

امارات ءَ یکشل ءَ سَے ھپتگاں سھر ءِ نھاد کم بیان بیتگ چریشی ءَ پد گیش بوتگ-

الامارات الیوم ءِ رد ءَ شورومزانی واھندانی گوشگ اِنت کہ سھر ءِ نھادانی توک ءَ سان سھر ءِ ارگ ءَ کپتگ بلے اے باز گیش نہ اِنت بلے تر ءُ تاب کنوکیں مردم دمگی مردماں چہ گیش سھر زورگ ءَ اَنت-

ڈائمنڈ شوروم ءِ سیلز مینجر ءَ گوشتگ کہ سھر ءِ نھاد ءَ گیش بوگ ءَ سھر ءِ زیرگ ءِ سر ءَ مزنیں سان کپتگ اَنتٹ

آئی ءَ گوشتگ کہ تر ءُ تاب کنوکیں مردماں واھگ تلب داتگ- دبئی ءِ شاپنگ سینٹرز ءَ سھر ءِ تلب کپتگ-

دھکان شوروم ءِ مینجر ءَ گوشتگ کہ دبئی ءَ درستاں گیش سھر ءِ زیروک تر ءُ تابی کنوکیں مردم اَنت ءُ چریشی ءَ چہ نھادانی تہ ءَ کمی گیشی اتکگ بیتگ-

ھندوستان ءِ اپوزیشن لیڈر راھول گاندھی ءَ سرکار ءِ ایراد گران ءَ گوشتگ کہ امریکہ ءَ نندوکیں ھندوستانی جمھوریت ءُ ڈیھ ءِ آئین ءِ واستا بہ اوشت اَنت-

فرانس ءِ ھال سرکنوکیں ادارہ اے ایف پی ءِ رد ءَ ھندسستان ءِ سروزیر ءِ سر ءَ ترندیں ایراد داروکیں راھول گاندھی ءُ مودی ءُ آئی ءِ بھارتیا جنتا پاٹی ( بی جے پی) ءِ سر ءَ ڈیھ ءِ بھر ءُ بانگ، بے روزگاری ءُ وانگ ءِ وڑیں گچینی جیڑھانی سر ءَ دلگوش دیگ ءِ بے سوبی ءِ بھتام جتگ –

پنجاہ ءُ دو سالیگیں راھول گاندھی ءَ مین ھٹن جیکب جیوٹس سینٹر ءَ انڈین اوورسیز کانگریس یو ایس اے ءِ نیاد ءَ کساس ھپت سد مردم مُچ بیتگ اَنت ءُ تران کنان ءَ گوشتگ کہ مردمانی واستا بدتمیزی کنگ، مزن بوگ، لٹ ءُ کٹ ءُ کٹ ءِ دارگ، اے ھندوستان ءِ واک ءَ نہ اِنت-

راھول گاندھی امریکہ ءِ سَے شھرانی تر ءُ تاب ءَ بیتگ اے وھداں آ کیلیفورنیا ءِ سٹینفورڈ یونیورسٹی ءُ واشنگٹن ڈی سی ءَ نیشنل پریس کلب ءَ تران کنت اِنت-

ھمے ڈول ءَ امریکہ ءِ کانگریس ءِ رھشون ءَ نریندر مودی ءَ را ھمے ماہ ءِ گڈسر ءَ کانگریس ءَ ھواریں نیاد ءَ تران کنگ ءِ داوت داتگ-

ایوان ءِ اسپیکر کیون میکارتھی، سینیٹ ءِ کٹوکیں رھشون چک شومف ءُ دگہ رھشوناں تراناں ھندوستان ءں دیمروئی ءِ درگت ءَ وتی وژن ءِ پدر کنان ءَ ھردوکیں ڈیھانی میان اُستمانی چیلینجانی درگت ءَ جیڑگی گپ کتگ اَنت-

ھندوستان ءِ گوستگیں سروزیر اندرا گاندھی ءِ نماسک راھول گاندھی انڈین نیشنل کانگریس پاٹی ءِ باسکے-

آ آیوکیں سال دوھزار ءُ بیست ءُ چار ءِ گچینکاری ءَ نریندر مودی ءِ واستا یک مزنیں چیلنجے زانگ بیت اِنت-

آئی ءَ وتی تران ءَ گوشتگ کہ نوکیں ھندوستان مئے آئین ءُ جمھوریت ءَ ابید برجم بیت نہ کنت- آئی ءَ چین ءِ زوراکاری ءِ دور کنگ ءَ ھندوستان ءُ امریکہ ءِ ھمسنت بوگ ءِ کڈنی کتگ-

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی پنچ ھزار ءُ شست ءُ شش روچ سرجم بوتگ انت –

مروچی حق دو تحریک ءِ سروک ءُ جماعت اسلامی ءِ سوبائی جنرل سیکریٹری مُلا ہدایت الرحمن، ڈاکٹر عطاء الرحمن، نوید کلمتی ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ مُلا ہدایت ءَ گوشتگ کہ ماما قدیر بلوچ ءِ سروکی ءَ اے درجکشیں زھرشانی برجاہ انت، بیگواھیں مردمانی ھاتر ءَ پیکج زورگ بوتگ بلے زورانسری آوار جنیانی درچ یکشل ءَ برجاہ انت ءُ ما اے جھد ءَ بیگواھیں مردمانی کھولاں گوں ھمکوپگ انت –

آئی ءَ گوشتگ کہ ادا کمیشن جوڈ بوتگ انت بلے ھچ وڈیں پٹ ءُ پول نہ بوتگ ، ملک ءِ کنڈ کنڈ ءَ دست کپتگیں جون کئی بوتگ انت –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ مئے اے جھد زورانسری آوارجنیانی بگیری ءَ برجاہ بیت اِنت – بلوچستان ءِ تہ ءَ اے درچ سک باز گیش بوتگ ءُ ما مدامی گوشتگ کہ پاکستان لگام دیگ نہ بوتگ گڈا ادا انسان نیستی ودی بوت کنت –

دکی ءَ ناشناسین مردماں مردماں تیرگواری کنان ءَ اشکرانی کھن ءِ مزدورے کشتگ-

پولیس ءِ رد ءَ یکشمبے ءِ روچ ءَ دکی ءِ ھند راگہ کول دمگ ءَ ناشناسیں مردماں اشکرانی کھن ءِ مزدور ءِ سر ءَ تیرگواری کتگ ءُ یک مزدورے کشتگ-

پولیس ءَ لاش چِست کرتگ ءُ ھسپتال ءَ رسینتگ ءُ اود ءَ گیشیں پٹ ءُ پول کنگ ءَ اِنت-