TBP Balochi

بلوچستان لبریشن فرنٹ ءِ جارکش میجر گوھرام بلوچ ءَ ٹیلی گرام چینل ءَ شنگ کرتگیں درشان ءَ پاکستانی لشکر ءِ سر ءَ بیتگیں اُرش ءِ زمہ واری من اتگ-

جارکش ءَ گوشتگ سرمچاراں 16 ستمبر ءَ شمبے ءِ بیگاہ ءِ چار ءُ نیم ءَ زورگریں پاکستانی لشکر ءِ سر ءَ اُرش کُرتگ ءُ یک کارمندے کُشتگ۔

آئی ءَ گوشتگ سرمچاراں آواران ءِ پیراندر ءَ کینرہ ءَ برجاھیں زورگریں پاکستانی لشکر ءِ پانگس ءِ سر ءَ گوں اسنائپر ءَ نشانگ کُرتگ ءُ دُژمنیں لشکر ءِ یک کارمندے کُشتگ ءُ پد ءَ دُژمن ءِ پانگس ءِ سر ءَ گوں گرنیڈ لانچراں اُرش کُرتگ۔اُرش ءَ دُژمنیں لشکر ءِ یک کارمندے مُرتگ ءُ دو ٹپی بیتگ اَنت۔

جارکش ءَ گوشتگ بلوچستان لبریشن فرنٹ اے اُرش ءِ زمہ واری ءَ منّ ایت ءُ داں زورگپتیں بلوچستان ءِ آجوئی ءَ زورگریں دُژمنیں لشکر ءُ آئی ءِ زورگری شوربندیانی سر ءَ بی ایل ایپ ءِ اُرش برجاہ بنت۔

متھدہ عرب امارات ءَ پبلک پراسیکیوشن ءَ دونمبریں زر ءِ سکینڈل ءَ ھواریں ٹولی ءِ دزگیری ءِ پرمان دیگ بیتگ-

الامارات الیوم ءِ رد ءَ امارات ءَ یک ٹولی ءِ سوشل میڈیا ءِ کمک ءَ دونمبریں زراں اسلی زر کنگ ءُ تالان کنگ ءَ اَنت – زر ءِ مٹ کنگ ءَ پنجاہ دراد ھم ریایت دیگ بوگ ءَ اِنت-

پٹ ءُ پول ءَ سرپدی رس اتگ کہ اے پنجاہ درسد ریایت ءِ سر ءَ دونمبریں زر ءِ بھا کنگ ءَ ھواریں ٹولی سوشل میڈیا ءَ نَپ چست کنگ ءَ اَنت-

لس مھلوک ٹَگانی پنجگ ءَ کپ ایت ءُ رد وارت اِنت ءُ ایجنٹ ھم اے دابیں کرداں پیلو کنگ ءَ نپ چست کنگ ءَ اِنت-

پبلک پراسیکیوشن ءَ شھری ءُ درملکیاناں گوشتگ کہ آ زر ءِ مٹ کنگ ءَ پیسر پرمٹ ھولڈز ءَ سرپدی بہ زور اَنت – ءُ سوشل میڈیا ءَ دروگیں ٹگانی باپار ءِ پنجگاں وت ءَ بہ رکین اَنت-

آئی ءِ رد ءَ اے مردم شپ ءِ شپ سیٹ بوگ ءِ لالچ ءَ لس مردماں سبزیں باگ ءَ پیشدار اَنت ءُ آیاں برباد کنگ ءَ اَنت-

بلوچ اسٹوڈنٹس فرنٹ ءِ بنجاھی جارکش ءَ وتی جار ءِ تہ ءَ دل پدردی درشان کنان ءَ گْوشت کہ بلوچی زبان ءِ اَھد سازیں آشوبی ءُ راجدوستیں شائر واجہ مبارک کازی ءِ بیرانی پہ بلوچ راج ءَ یک مزنیں تاوانے، شائری ءُ لبزانک ءِ پِڑ ءَ آئی ءِ ھورکیں جاہ ءِ پُر بوگ ءَ سدانی سال درکار بیت۔ تاں جھان ھست آئی ءِ کْوھیں کِرد سرڈگار ءِ کْوہ ءُ کُوچگ، جنگل ءُ گیابان، شَھر ءُ میتگ، دمگ دمگاں مان اِیت۔ بلوچ راج آئی ءِ کْوھیں کِرد ءَ کدی شموش اِت کرت نہ کنت، ما آئی ءِ کْوھیں کِرد ءَ سِتک شانی ندر کن اَیں۔

آئی ءَ تران کنان ءَ گْوشت کہ مبارک کازی 24 تاکشان ءَ ماں کراچی ءَ ودی بوتگ، آئی ءِ واجھیں پِت ءِ نام کُھدہ امان اللّہ اِنت، نمیرانیں مبارک کازی ءَ وتی بنداتی وانگ وتی ھنکین پسنی ءَ دربرتگ، دیمتر ءِ وانگ ءِ ھاتر ءَ ایس ایم شاھدربرجاہ ءَ داھلہ ئِے زرت، بلے گزرانکی نِزوری ءِ سوب ءَ آ وتی وانگ یلہ کنت ءُ بلوچستان Fisher Harbor کارگس ءَ بستار ئے Lab assistant کار کنت۔ دیمتر ءَ واجہ کازی ساھب وتی وانگ ءِ برجاہ دارگ ءِ ھاتر ءَ پرائیوٹ انٹر کنت ءُ بی اے واست ءَ اردو آرٹس شھدربرجاہ ءَ داخلہ زور اِیت۔ اِے وھد ءَ آ گْوں لبزانک ءَ ھمگرنچ بیت، لبزانکی مراگشاں بھر زور ایت، دیمتر ءَ واجہ بلوچستان مزن شھدربرجاہ ءَ IR ءِ کارگس ءَ داخلہ زور اِیت۔ وانگ ءِ وھداں آ بلوچ ورنا وانندہ گل ءَ ھوار بیت۔ ایم اے سرجم کنگ ءَ پد واتر کیت پسنی ءَ Fisher Harbor کارگس ءَ Assistant Finance جوڑ بیت۔ اِے وھداں واجہ پسنی ءَ گْوں آ دگہ بلوچی ءِ نامداریں شائر منیر مومن، انور ساھب ھان ءَ ھور بیت ءُ لبزانکی شنگکار مجلس ءَ جوڑ کن اَنت واجہ کازی آئی ءِ سروک جوڑ بیت۔ واجہ ءَ بلوچی شائری ءِ پِڑ ءَ بازیں کتاب نبشتہ کنت، آئی ءِ اولی کتاب زِرنوشت اِنت، ھانی منی ماتیں وتن، چولاں دریا یل داتگ، منی اھد ءِ گم ءِ کسّہ، مرگ پہ کودوھاں رپتگ اَنت، جنگل چِنچو زیبا اِنت، شاگ ماں سبزیں ساوڑ ءَ، آپ سماک ءَ جتگ، باریں منی باریگ کجام اِنت ءِ سرھالانی سر ءَ شائری کتاب نبشتہ کرتگ ءُ شنگ بوتگ اَنت۔

آئی ءَ دیمتر ءَ تران کنان ءَ گْوشت کہ واجہ مبارک کازی ءَ را گْوں وتی ایردستیں سرڈگار ءُ لگتمالیں بلوچ راج ءَ بے کساس مِھر بوتگ، آئی ءَ وتی شِئرانی تہ ءَ بلوچ سرڈگار ءِ ایردستی، بلوچ ءِ بزّگی، واری درشان کرتگ اَنت۔ آئی ءَ بلوچستان ءِ کوہ، کوچگ، شَھر ءُ دیار، جنگل ءُ گیابان، میتگ، درمک ءُ در نازینتگ اَنت ءُ بلوچ ءُ بلوچستان ءِ اکس ءَ نبشتانکی ءَ دروشم ءَ لبزانی تہ ءَ کماتگ ءُ درشان کرتگ اَنت، آئی ءِ آشوبی شِئراں بلوچ راجی جُنز ءَ را مھکم کرتگ ءُ ورنایاناں گیش توکل ءُ ھاٹیگ داتگ۔ واجہ کازی ءَ وتی سرجمیں زند ءَ بلوچ ءُ بلوچستان نازینتگ، آ ھر سکّی ءُ سوری ءَ بلوچ راج ءَ گْوں ھمگرنچ بوتگ، آ دو رَند ءَ استان ءِ زندانانی تہ ءَ بندیگ کنگ بوتگ، آئی ءَ وتی ورنائیں پرزند ڈاکٹر کمبر مبارک ءَ را ھم پہ بلوچ سرڈگار ءِ ھاتر ءَ ندر کرتگ۔ کازی ءِ دیمونیانی دِرچ سک مزن اِنت کساس کنگ نہ بنت۔

بلوچ اسٹوڈنٹس فرنٹ ءِ بنجاھی جارکش ءَ وتی دل پدردی درشان ءِ گُڈ سر ءَ واجہ مبارک ءَ را ستک شانی ندر کرت ءُ گْوشت کہ کازی ءِ کِرد کدی شموشگ نہ بیت، تاں جھان ھست آئی ءِ کْوھیں کرد بلوچستان ءِ کْوہ ءُ کوچگ، دمگ دمگاں یات کنگ بیت۔ ما آئی ءِ کْوھیں کرد ءَ گْوں گرانبھائیں لبزاں سِتک شانی ندر کن اَیں۔

بلوچ لبریشن آرمی ءِ جارکشّ جیئند بلوچ ءَ ماں رسانکدر ءَ وتی شِنگ کُتگیں یک درشانے ءِ تہ ءَ گْوشتگ کہ بلوچ لبریشن آرمی ءِ سرمچاراں مرچی شال ءَ زورگریں پاکستانی پوج ءِ جھلی پوج سی ٹی ڈی ءِ یک آفیسرے ءِ سر ءَ تیرگواری کُتگ ءُ کُشتگ ۔

آئی ءَ گْوشتگ کہ بی ایل اے ءِ سرمچاراں جیل روڈ ، ہدّہ ءِ دمگ ءَ سی ٹی ڈی ہیڈ کانسٹیبل سید محمد جھمِنند ء اسپنی روڈ ، مُبارک چوک شال تیرگواری کُتگ ءُ کُشتگ ۔

جارکشّ ءَ گْوشتگ کہ ھمے مردم زورگریں پاکستانی پولیس ءِ ھمگرنچیں پوج سی ٹی ڈی ءَ گوں بندوک بُوتگ-

ھمے پوج بلوچانی لوگانی سر ءَ بیڑ برگ ، مردماں دلسیاہ کنگ ، زورانسری ءَ گار ءُ بیگواہ کنگ ءُ دُروگیں میڑاں مردمانی کوش ءِ وڑیں جرم ءَ ھوار بیتگ۔

آئی ءَ گْوشتگ کہ اے کارندہ میارباری سَوَب ءَ بی ایل اے ءِ نشانگ لِسٹ ءِ تہ ءَ بُوتگ کہ آ مرچی سرمچاراں آئی ءِ گُڈّی مِنزل ءَ رسینتگ ۔

جارکشّ جیئند بلوچ ءَ گْوشتگ کہ بلوچ لبریشن آرمی اے اُرش ءِ زمہ واری ءَ منّ اِیت ءُ اے سوگِند ءِ پیلو ءَ کنت کہ بلوچستان ءَ چہ زورگریں پاکستانی پوج ءِ سرجمی ءَ دراھگ ءَ تاں مئے اُرش برجاہ بنت ۔

پاکستانی فوج نیمگ ءَ چہ ڈیرہ بگٹی ءَ لَس مھلوک سر ءَ لشکر کشی ءُ بازیں مردمانی زورانسری بیگواہ کنگ ءِ بگیری ءَ بلوچستان ءِ بُنجاھی شھر شال ءَ زھرشانی کنگ بیتگ-

گیشیں ھالانی رِد ءَ بلوچ یکجھتی کمیٹی ءِ نیمگ ءَ چہ بلوچستان ءِ دمگ ڈیرہ بگٹی ءَ گوستگیں بازیں روشاں چہ بندات بیتگیں پاکستانی فوج ءِ لشکر کشی ءُ زوراکی ءِ بگیری ءَ شال ءَ روانکے کشگ بیتگ-

زھرشانی کنوکاں ڈیرہ بگٹی ءُ کش گوراں پاکستانی فوج ءِ زُلم ءُ زوراکی لشکر کشی ءِ بگیری ءَ تُرندیں نارا جتگ-

زھرشانی کنوکاں لوٹ کتگ کہ ڈیرہ بگٹی ءَ پاکستانی آرمی زُلم ءُ زوراکی ءَ بند بکنت زورانسری آوار جتگیں مردماں زوت یل بکنت-

زھرشانی کنوکانی تہ ءَ بلوچ یکجھتی کمیٹی، نودبر گلانی باسک، بلوچ وومن فورم ءَ ھوار ھرچ پڑ ءِ مردم ھوار بیتگ اَنت ءُ زھرشانی ئیں روانک ءَ چہ تران کنان ءَ ڈیرہ بگٹی ءَ برجاھیں پاکستانی فوج ءِ زوراکی ایر جتگ ءُ بلوچستان ءَ لشکر کشی ءِ ھلاس کنگ ءِ لوٹ کتگ-

زھرشانی ءَ چہ ترانکارانی گْوشگ اِنت ھمے ھپتگ ءَ ڈیرہ بگٹی ءَ پاکستانی پوج نیمگ ءَ بندات کُتگیں لشکر کشی جتاجتائیں دمگاں برجاہ ءَ اِنت-

‎ھمک ڈیھ ءُ ایردستیں راجانی تہا راجی شاعر ، زانتکار ءُ کواسانی یک جتائیں ارزشتے بیت ءُ زمینی راستیانی بنیات ءَ وتی کرد ءَ پیلو کن اَنت بلے درد واریں زانتکار ھما بیت کہ وتی زمین ءِ سرا نندوک بیت ءُ زوراکیانی دیمپانی ءَ کنت ، لس مھلوک ءِ درد ءَ ماریت ءُ وتی ند ءِ تاگت ءَ زمین ءِ سرا بوھوکیں زلم ءُ زوراکیاں ھر ھند ءُ دمگاں سر کنت ، بلوچ ڈیھ چہ اے وڑیں کواساں سنٹ نہ بوتگ ءُ نہ اِنت ، عطا شاد ، سید ظہور شاہ ہاشمی ،صبا دَشْتیاری ،واجہ مبارک کازی ءُ دگہ بازیں زانتکار ھمے پلسپہ ءِ مُساپر بوتگ اَنت ءُ راجدپتر ءِ تاکانی تہا نمیران اَنت ۔

‎مبارک کازی ءِ بیرانی پہ بلوچ لبزانک ءُ بلوچ راج ءَ مزنیں تاوانے ، بلوچ انچیں دور ءِ تہا گوزگ ءَ اِنت کہ کازی ءِ وڑیں گہگیری شائر ءِ ودی بوھگ ءَ کرنے ءِ پکار اِنت ۔واجہ مبارک کازی شاعری ءَ آوار سْیاسی کارانی تہا مُدام اولی سرپ ءَ اوشتوک اَت ءُ آئی ءَ مُدام بدواہ بیھار داتگ ، کازی ءَ باز دیستگ اَت زلم ءُ زوراکی ،زندانی بلے آ پیر مرد چوں سْیاجھی ءِ کوہ ءَ تمرد اَت او آئی ند ھچبر اوشت ءِ آماچ نہ بوتگ، واجہ ءَ وتی شاعری ءِ تہا ھر ھند ءُ دمگ ءِ گالوار کارمرز کُتگ اَنت آ ایوک ءَ مَکُّران نہ اَت آ سرجمیں بلوچستان ءَ اَت ،کازی ءَ وتی شاعری ءِ تہا بلوچستان ءِ سرجمیں اکس پیش داشتگ ، بلوچ ءِ دود ءُ ربیدگ ، زالبول ءِ کرد ، مھر ءِ ارزشت ، جنگ ءِ ارزشت ، واجہ کازی ءَ مُدام وتی شاعری ءِ تہا بلوچ مات ءُ زالبول ءِ یک مھکمیں کردار ءِ پیش داشتگ ،کازی جاہ ءِ گوشیت کہ من بلوچ ماتے آں پہ بداں شہماتے آں ۔

مبارک کازی بلوچی زبان ءِھما شاعر اِنت بلوچ راج ءَ آئی زند ءَ شرپ ءُ ازت ءِ داتگ واجہ شاعرے ءَ ابید بلوچ راج ءِ گہگیری جہد کار ءِ بوتگ کازی وتی گُڑی وھد ءَ تک پہ بلوچ ءَ آشوبی شعر گُشتگ ءُ وتی سرجمیں زِند پہ بلوچ ءُ بلوچستان ءَ ندر کُتگ اَت۔

واجہ ءَ وتی شعراں وتی راج ءَ را سکین داتگ ءُ بلوچ ماتان ءَ شعری دروشم ءَ دلبڈی داتگ۔ مروچی واجہ مبارک کازی مئے میان ءَ ساڑی نہ اِنت بلے آئی ءِ گُشتگیں شعر تاں ابدی مئے رہشونی ءَ کن اَنت۔

بلوچی زبان ءِ نامداریں مھر ءُ آشوبی شائر مبارکیں کازی ماں پسنی ءَ ہائیر سیکنڈری سکول ءَ نماز جنازہ ءِ وانگ ءَ پد ما مانشجاہ ءَ برگ ءُ کل ءُ کسارت کنگ بوتگ، بلوچ اسٹودنٹس ایکشن کمیٹی ءَ سَے روچ ءَ پُرس دارگ ءِ جار جتگ وھدیکہ بلوچ رھشون ڈاکٹر اللہ نزر بلوچ ، راجکاریں رھشون ءُ نودربراں ھوار ھر تک ءُ پھناتاں سیادی داروکیں مردم ءُ گلاں مبارک کازی ءِ اناگتی بیرانی ءَ دلپدردی درشان اِتگ ءُ آئی ءَ را ستک شانی درشان کتگ –

ھستیں وھدے بلوچی زبان ءِ نامداریں شائر مبارک کازی ءِ نماز جنازہ آئی ءِ بنکی ھنکین پسنی ءَ وانگ بوتگ – آئی ءِ نماز جنازہ ءَ مزنیں کچے ءَ مردماں بھر زرتگ –

مبارک کازی بلوچ بیست ءُ چار دسمبر سال نوزدہ سد ءُ پنجاہ ءُ شش ءَ ماں پسنی گوادر ءَ ودی بوتگ آئی ءِ کماش نام کھدہ امان اللہ بوتگ – آئی ءَ وتی بنداتی وانگ چہ بنکی ھنکین ءَ دربرتگ ءُ پدا سال نوزدہ سد ءُ ھپتاد ءُ شش ءَ کراچی ءَ شتگ ءُ سندھ مسلم لاء کالج ءَ داکلہ زرتگ ـ لھتے وھد ءَ رند وانگ ءِ یلا دیگ پد واتر کراچی ءَ شتگ ءُ پرائیوٹ چکاس داتگ ءُ انترمیڈیٹ پاس کتگ –

کازی ءَ وتی وانگ برجاہ داران ءَ بی اے کتگ ءُ سال نوزدہ سد ءُ ھشتاد ءُ سَے ءَ اردو آرٹس کالج ءِ دگری گپتگ ءُ پدا نوزدہ سد ءُ ھشتاد ءُ شش ءَ شال ءَ بلوچستان شھدربرجاہ ءَ بین الاقوامی تعلقات (آئی آر ) تہ ءَ ایم اے کتگ ـ پدا کازی وتی بنکی ھنکین پسنی ءَ اتکگ ءُ فش ہاربر پسنی ءَ ڈائریکٹر بوتگ ـ کازی ھما بلوچستان ءِ نامداریں مردمانی رم ءَ ھوار انت، آ وتی راجدوستی ءُ لبزانکی کارانی پجارگ بیت ـ آئی آشوبی شئیر نبشتگ کنگ ءَ پد بندیگ ھم کنگ بوتگ پرچا کہ آئی ءَ بلوچ راج ءِ ھک ءَ سرکار ءِ بگیری ءَ آشوبی شئیر نبشتگ –

نامداریں شائر مبارک کازی ءِ اناگتیں بیرانی ءِ درگت ءَ بلوچ اسٹودنٹس ایکشن کمیٹی ءِ بنجاھی جارکش ءَ رسانکدراں وتی شنگ کرتگیں درشانے ءِ تہ ءَ آئی ءِ بیرانی ءَ دلپدردی درشان اِتگ ءُ گوشتگ کہ بلوچ ڈیھ چہ یک ابدمانیں راجی ءُ گھگیریں شائرے ءَ زبھر بوت – اے دلپدردیں ھالءِ گوما گل سئے روچی موتکے ءِ جار ءَ جنت –

جارکش ءَ وتی درشان ءِ تہ ءَ گوشتگ کہ ھرچ ڈیھ ءُ زمینے ءَ راجی شائر، لبزانت ءُ ایدگہ پڈانی زانتکار ءُ کواسانی جتائیں ارزشت ءُ کردے بیت- ھرچ باسمائیں راجی زانتکار ءُ لبزانت وتی چاگرد ءُ ڈیھ ءِ راستیانی بنیاد ءَ وتی زمہ واریاں گیشین ایت ءُ وتی کردے پیلو کنت۔ اے درگت ءَ بلوچ ڈیھ ھم سَنٹ نہ بوتگ ءُ نہ انت – خیربخش مری ءُ صبادشتیاریءِ پلسپہ ءِ چیدگ مبارک کازی اوں ھمے سرپ ءَ نمیران بوت کہ آئی ءِ شائری وت وتی پلسپہءِ درانگازی ءَ کنت –

جارکش ءَ گوشتگ کہ بلوچ ڈیھ ءُ راجی گہگیری ءِ مزن نامیں شاعر ءُ زانتکار مبارک قاضی ءِ ناگتیں بیرانی پہ بلوچ ڈیھ ءُ گہگیری ءِ لبزانکءَ مزنیں تاوانے ۔ مبارک قاضی نہ تہنا بلوچی زبان ءِ مزن بالادیں شاعر ءُ لبزانتے اَت بلکیں بلوچ راج ءِ باسمائیں جہگیرے ات ھم ۔ بلوچ ڈیھءِ جاورالانی سرجمیں توارے ات۔ آئیءِ شاعری سرجم گوں وتی ڈیھ ءُ ڈگارءِ راستیں جاورہالاں پیوست ات۔ ھستیں اھد ءِ ھما کرداراں چہ یکے اَت کہ ھرچ وڑیں زوراکیانی دیم ءَ اوشتوک ات ءُ پہ بدیں دژماناں آئیءِ آشوبیں توار شہمات ءُ زِبرّیں ھکّلے ات۔ آئیءَ مدام وتی شائریءَ تچکیں راستیءِ پدرائی کُت ءُ بلوچستان ءِ جہگیری کت۔بلوچ گہگیری شائری ءُ راجی پِگر ءَ چکاریں راجی بامرد بلوچستان ءِ بن دپتر ءِ تاکاں نمیران بوت –

ھمے درگت ءَ بلوچ نیشنل مومنٹ ءِ بنجاھی جارکش ءَ وتی دلپدردی درشان ءِ تہ ءَ گوشتگ کہ مبارک کازی ءِ بیرانی ءَ سرجمیں راج دلپدرد اِنت۔ مبارک کازی راجی لچہ کارے اَت ، آئی ءَ گوں وتی لچہ کارے ءَ بلوچ راج ءِ مارشتانی جھگیری کرتگ۔ پہ زبان ءُ ندانک ( ادب) آئی ءِ کرد ءُ کارانی سر ءَ بی این ایم پہ آئی ءَ ستک شانی نْدر کنت۔

آئی ءَ گْوشتگ مبارک کازی ءَ گوں وتی لچہ کاری ءَ راج ءِ راھشونی کرتگ۔ آئی ءِ ند دو زھیں زھمے ءِ پیم ءَ اَت ۔ نیمگے آئی ءَ گوں وتی لچہ کاری ءَ زورگریں پاکستان ایر جتگ ءُ راجی زْرمبشت ءِ پلہ مرزی کرتگ ، دومی نیمگ ءَ چاگردی ھرابی ءُ چاگرد ءِ کلپیں سیاسی ءُ دگہ تک ءِ مردمانی بگیری ءَ تچکے ءَ نبشتہ کرتگ۔ آئی ءِ لچہ کاری ءِ سر ءَ آئی ءِ سر ءَ پہ کوش ءَ ارش کنگ بیتگ- آزار دیگ ءُ زندان ءَ بند کنگ بیتگ بلے آ چہ وتی لیکھاں بوگے ھم پد نہ کنز اتگ ءُ ناں کہ آئی ءِ ھاٹیگ ءِ تہ ءَ کمی اتکگ-

جارکش ءَ گْوشتگ آئی ءِ راجدوستیں لیکھانی پد ءَ آئی ءِ چک کمبر کازی بلوچ آجوئی ءِ جھد ءَ سرمچارانی ھمراہ بوت ءُ پندلے ءِ پد ءَ دژمن ءِ چیریں کارداراں شھید کرت۔پہ واجہ مبارک کازی ءَ اے جھلیں ٹپے اَت بلے آئی ءَ پہ راجی آجوئی ءَ وتی چک ءِ دیمونی سگ ات ءُ وتی چک ءِ شھیدی ءَ مدام پھر بستگ اَت –

بلوچی زبان ءِ شائر منیر مومن ءَ دلپدردی درشانتگ ءُ گوشتگ کہ کازی ساب ھمے کساس ءَ زندگیں مردمے اَت کہ آئی ءِ بیران بوگ ھچ باور نہ بوگ ءَ انت –

کازی اے تئی زوراکی اِنت کہ تو جھان بدل کُت- بلئے تئی کِرد ءِ رنگ ھمینچو باز ءُ زندگ اَنت ، دل نہ منّیت کہ تو اچ مئے نیام ءَ در کپتگ ئے –

بلوچ راجی رھشون ڈاکٹر اللہ نزر بلوچ نبشتہ کنت کہ آجوئی ءِ جھد ھر وھد ءَ تازہ انت (مبارک قاضی)
کازی اھد سازیں شائر ءُ راجی جھد ءِ سروک ات –

بلوچ سوشل میڈیا ایکٹوسٹ پیردان بلوچ آئی ءِ شئیرے نبشتہ کنت
“شاریؔ ءِ ارواہ شْدریں شپ چراگے بْرمشؔ دنت،ما اوں کازی یک ءُ دو پُلّ رھگْوزی زرشان کُتیں” کہ وانگ ءِ وھد ءُ زمانگ ءَ جنرل ضیا ءِ ترندیں زوراکیانی روچاں مچ جیل ءَ زند گوازینوک ءُ جنرل مشرف وھد ءَ تربت سنٹرل جیل ءَ بند ءُ ازیت اوپار کنوکیں آشوبی شئر گشوکیں کازی ءَ اے جھان یل داتگ –

سید ہاشمی ریفرنس کتابجاہ ،کراچی ملیر ءَ وتی دلپدردی درشان ءِ تہ ءَ نبشتگ کہ؛ ملکموت مستیں لیڑہے بوتیں برتیں ماں کَور ءَ جور چارینتیں
بلوچی زبان ءِ نامداریں شاعر واجہ مبارک قاضی ءِ بیرانی پہ بلوچی زبان ءُ بلوچ راج ءَ زنڈیں تاوانے ءُ داں صداں سالاں کازی ءِ کَنڈ ءَ کس گپت نہ کنت-

بلوچی میوزک پروموٹرز سوسائٹی دلپدردی درشان اِتگ کہ بلوچی زُبان ءِ مزن نامیں شاعر واجہ مُبارک قاضی بیران بُوت۔ بلوچی لبزانک ءِ پِڑ ءَ مُبارک کازیؔ یک اھدے ءِ نام اَت۔ واجہ مبارک کازی ءِ بیرانی پہ بلوچی زُبان ءُ لبزانک ءَ مزنیں تاوانے۔ ما ، واجہ مُبارک کازی ءِ اے اناگتی مرگ ءَ بژن ءُ ارمانیگ ایں ءُ آئی ءِ کھول ءِ گماں شریدار ایں-

ڈاکٹر مھرنگ بلوچ وتی دلپدری درشان ءِ تہ ءَ نبشتہ کنت کہ نامداریں شائر ءُ بلوچی لبزانت مبارک کازی مار ءَ چہ جتا بوتگ کہ آئی ءَ وتی زند پہ بلوچی زبان، دود ءُ پہ لبزانک ءَ کربان کتگ، آ یک نمیرانیں زھگے ءِ پت ءُ بلوچ زرمبشت ءَ گوں بندوک بوتگ آ یک گوستانکی مردمے نام ءَ یات کنگ بیت –

بی این ایم ءِ رحیم بلوچ نبشتہ کنت کہ ‏بلوچی زبان ءِ نامداریں شائر ھدامرزی واجہ کازی مبارک وتی بے مٹیں شائری، قوم دوست وانسان دوست،سیاسی و چاگردی پگر و ھزمتانی برکت ءَ نمیران انت – پہ بلوچ قوم و بلوچی زبان و لبزانک ءِ دیمروی ءَ آئی ھزمت داں کرنانی کرن شموشگ نہ بنت –

گیشیں سرپدی ءِ ھاتر ءَ اے لنک ءَ پچ بہ کن ات-

پاکستان ءِ ناشرکار کاریں پوج کہ سی ٹی ڈی ءِ نام ءَ زانگ بیت آئی ٹاہ داتگ کہ بلوچستان ءِ دمگ ھزدار ءُ جعفرآباد ءَ دو جتائیں میڑاں چار مردم جنگ بوتگ انت –

سی ٹی ڈی ءَ ٹاہ داتگ کہ ھزدار ءَ سی ٹی ڈی ءُ سلاہ بندانی میان ءَ میڑے بوتگ ، میڑ ءَ سلاہ بندانی دو مردم جنگ بوتگ انت –

ھمے ٹاہ دایگ بوتگ کہ ھزدار ءِ دمگ کھٹان ءَ سی ٹی ڈی ءِ سر ءَ اُرش کنگ بوتگ کہ سی ٹی ڈی ءَ پسوی ءَ دو اُرشکار جتگ انت –

جنگ بوتگیں مردمانی نام امیر بخش ءُ اعجاز احمد گوشگ بوگ ءَ بوگ ءَ انت – اے ھم ٹاہ دیگ بوتگ کہ آیانی گور ءَ سِی تیری ءُ دز بمب دستیگ کتگ انت –

زانگ بہ بیت اعجاز پاکستانی پوج ءَ بیست ءُ سَے اگست ءَ چہ منگچر ءَ زورانسری آوار جتگ ءُ بیگواہ کتگ بوتگ – کُشگ بوتگیں مردمے برات سعید احمد آئی ءِ آوار جنی ءِ وھد ءَ ھمے گوشتگ ات کہ شپ ءِ ادار دو ءِ وھد ءَ پاکستانی پوج ءِ کارمنداں مئے ھند منگچر وتی انگر ءَ کتگ ءُ مئے گس ءَ بیڑ برتگ ءُ منی برات زورانسری آوار جتگ ءُ گوں وت برتگ –

آئی ءَ پولیس ءِ گور ءَ ارزی داتگ ءُ گوشتگ کہ منی برات چدوپیسر ھم زورانسری آوار جنگ بوتگ پدا یل داتگ ھنو دوبر آوار جنگ ءُ بیگواہ کنگ بوتگ –

سی ٹی ڈی ءَ وتی دگہ درشانے ءِ تہ ءَ ٹاہ داتگ کہ جعفرآباد ءَ سلاہ بندیں گلانی دو مردم کُشتگ انت –

سی ٹی ڈی ءِ جارکش ءِ رِد ءَ جعفرآباد ءَ سی ٹی ڈی ءُ شکی ایں مردمانی میان ءَ میڑ بوتگ ءُ چریشی ءَ دو شکی ایں مردم جنگ بوتگ انت –

آئی ءَ گوشتگ کہ پٹ پولی آپریشن ءِ میان ءَ اے مردماں پوج ءِ سر ءَ اُرش کتگ پسوی اُرش ءَ دو مردم جنگ بوتگ انت اشانی گور ءَ سلاہ ءُ گولہ ھم دستیگ کتگ انت –

بلوچستان ءَ سی ٹی ڈی ءِ کاروائی شکی نگاھاں چارگ بنت، گوست ءَ سی ٹی ڈی ءِ دیم پہ دیمی میڑ دروگ بوتگ انت –

اے میڑاں جنگ بوتگیں مردمانی تہ ءَ گیشتر مردم پیسر ءَ چہ زورانسری آوار جنی ءَ پد بیگواھیں بلوچ بوتگ انت- وھدیکہ باز براں مزھبی پاٹیاں سیادی داروکیں ھما مردم کہ پیش آوار جتگ انت ھما جنگ ءُ چگل دیگ بوتگ انت –

ڈیرہ بگٹی ءَ پوجی بیڑ

ٹی بی پی شونگال

ڈیرہ بگٹی بلوچستان ءِ درستاں پدمنتگیں ءُ جنگ زدگیں دمگانی تہ ءَ شمار کنگ بیت اِنت۔ پوجی زورشاھیں جنرل پرویز مشرف بلوچستان ءِ سر ءَ ھونواریں جنگ مُشت کہ چریشی ءَ ڈیرہ بگٹی ءُ کوھلو درستاں گیشتر سانمند بوت اَنت، لکھانی کچ ءَ مھلوک لڈگ ءَ لاچار بوت اَنت، ھزارانی کچ ءَ مردم زورانسری بیگواھیانی آماچ کنگ بیت اَنت ءُ بے کساس مردم کُشگ بوت اَنت۔ پاکستان ءِ تہ ءَ پوجی زورشاھی ءِ آسری ءَ پانزدہ سال گوستگ ءُ پیپلز پارٹی، مسلم لیگ نون ءُ تحریک انصاف ءِ سرکار جوڑ بوتگ اَنت ءُ ھلاس بیتگ اَنت بلے ڈیرہ بگٹی ءِ ناگیگیں جاورانی تہ ءَ ھچ پئیمیں گھتری ءِ نئیتکگ۔

ھمے زیتاں بلوچ لبریشن ٹائیگرز ءَ چہ سوئی ءَ سبی رؤکیں شش فٹبال ءِ لئیبی بیگواہ کُتگ اَنت، چریشی ءَ پد ڈیرہ بگٹی ءِ تہ ءَ مزنیں کچے ءَ پوجی بیڑ بندات کنگ بیتگ۔ پاکستانی پوج ءِ دوازمی کور ءِ کماندار آصف غفور ءُ آئی جی فرنٹیئر کور بلوچستان ڈیرہ بگٹی ءَ شُتگ اَنت ءُ راجدوستیں گل ترس ءِ درشان کنگ ءَ اَنت اے اپسرانی ڈیرہ بگٹی ءَ رؤگ ءُ تَر ءُ گرد پوجی بیڑانی تہ ءَ گیشی آرگ ءِ سوب جوڑ بیت کنت۔

پوجی بیڑ ءَ سوئی ھنکین ءِ جتاجتائیں میتگ ءُ بازارانی لوگانی س رءَ بیڑ بری برجاہ اِنت، بازیں میتگاں لوگ ماندارگ بیتگ اَنت ءُ مردم زورانسری لڈگ ءَ پہ لاچار کنگ ءِ ھم اھوال پیداک اَنت۔ ڈیرہ بگٹی ءِ جتا جتائیں ھنکین پوجی انگر ءِ تہ ءَ اَنت ءُ بازیں مردم زورانسری بیگواھی ءِ آماچ کنگ بیتگ اَنت۔

پاکستان ءِ تھی کارانی سرپانکیں وزیر سرفراز بگٹی ءِ سر ءَ یکشل ءَ وتی بگیر کارانی ھلاپ ءَ بے کساسیں تاکت ءِ کارمرزی ءِ بھتام جنگ بوتگ اَنت ءُ بلوچستان ءَ سرپانکیں سرکار ءِ آیگ ءَ پد زورانسری بیگواھیانی تہ ءَ ھم گیشی اَتکگ۔ پوجی بیڑ ءُ بلوچ راج ءِ سر ءَ زوراکیاں چہ بلوچستان ءِ جاورانی تہ ءَ گھتری ءِ جاہ گنتری کئیت۔ بلوچ جیڑہ ءِ زوراکی ءُ زورشاھی ءَ گوں دارگ ءِ کوشست پیسر ءَ ھم بے سوب بیتگ اَنت ءُ انی ھم تاکت ءِ بے کساسیں کارمرزی ءَ گوں جیڑہ گیش ءُ گیوار نہ بنت بلکیں گیشتر بنت۔

بلوچستان ءِ تیاب دپی شھر گوادر ءُ سندھ ءِ بنجاھی شھر کراچی ءَ چہ پاکستانی لشکریاں دو بلوچ ورناہ دزگیر کنگ ءَ پد بیگواہ کُتگ اَنت۔

سر بیتگیں ھالانی ردءَ بلوچستان ءِ تیاب دپی شھر گوادر ءَ چہ پاکستانی لشکریاں یک ورناھے بیگواہ کُتگ ھمے پئیم ءَ سندھ ءِ بنجاھی شھر کراچی ءَ چہ ھم یک بلوچ ورناھے لشکریاں دزگیری ءَ پد زورانسری بیگواھی ءِ آماچ کُتگ۔

زورانسری بیگواھی ءِ آماچ بیتگیں دوھیں ورناھانی پجار تربت پیدارک ءِ جھمنند دو سیاد میران ء حسین ءُ سمیر ء نعمت ءِ ناماں چہ بیتگ۔

زورانسری بیگواھی ءِ آماچ بیتگینانی تہءَ میران بلوچ دوشیگیں شپ ءَ چہ گوادر ءَ دزگیری ءَ پد بیگواہ کنگ بیتگ وھدیکہ سمیر چہ کراچی ءِ ھند رئیس گوٹھ ءَ پاکستانی لشکریاں دزگیر کنگ ءَ پد بیگواہ کُتگ۔