TBP Balochi

روکپتی بلوچستان ءِ بنجاھی شھر زاھدان ءَ ایرانی لشکر ءَ یک ورنایے آوار جنگ ءَ پد بیگواہ کرتگ –

آوار جنگ بیتگیں مردم ءِ پجار بیست ءُ سَے سالیگیں جمشید بارکزئی ء شیر مھمد جھمنند زاھدان ءِ نام ءَ زانگ بیتگ –

اھوالانی رد ءَ جمشید ھما وھد ءَ گرگ ءُ برگ بیتگ کہ آ وتی کارجاہ ءَ جاڑیگ بیتگ ءُ لس پوشاکی گدانی کارندھاں اتکگ ءُ آ برتگ-

زانگ بہ بیت روکپتی بلوچستان ءَ زھرشانیاں پد بازیں کچے ءَ مردم گرگ ءُ برگ بیتگ اَنت کہ ایانی درگت ءَ تنی وھدی ھچ ھال نیست اِنت-

فارسی ءِ نامداریں گدار نویس مھمود دولت آبادی ءِ گدار “سلوچ ءِ ھورکیں جاہ”کہ مھمد امیری ءَ ماں بلوچی تہ ءَ رجینتگ چاپ ءُ شنگ بوتگ –

مھمد امیری ءِ ماں بلوچی ءِ تہ ءَ اے گدار یک کلگی جنین آدمے ءِ کسہ اِنت –

اے گدار اے وھدی بازیں زبانے ءَ چوش کہ انگریزی، فرانسیسی، آلمانی، ایتالیایی، ھلندی ءُ کردی ءَ رجینگ بوتگ ءُ ھنوں مھمد امیری ماں بلوچی ءِ تہ ءَ رجینتگ کہ ربیدان شنگکاری ءِ نیمگ ءَچاپ ءُ شنگ بوتگ –

وتی رجانک کتگیں کتاب ءِ درگت ءَ مھمد امیری ءَ گوں دی بلوچستان پوسٹ ءِ اھوالکار ءِ گون ءَ تران کنان ءَ گوشتگ کہ سلوچ ءِ ھورکیں جاہ، محمود دولت ءِ آبادی ءِ فارسی گدار “جای خالی سلوچ” ءِ بلوچی رجانک اِنت – اے گدار ایران ءِ اسلامی انقلاب ءَ سالے رند اولی بر ءَ فارسی ءَ چاپ ءُ شنگ بوتگ – دولت آبادی ءِ وتی گوشگ اِنت کہ آ وتی مزنیں کتاب کلیدر ءِ دومی ءُ سیمی جلد ءِ کاراں گوں دزگٹ بیت کہ ھمے نیام ءَ ایران ءِ ساواک شاہ ءِ حکومت ءِ گڈسری سالاں آئی ءَ گر اِیت ءُ زندان ءَ کنت ءُ تنی وھدی ھم دولت آبادی گوش اِیت من نزاناں کہ من ءَ اِش پرچا گپت ءُ زندان ءَ برتگ اش –

رجانکار ءِ رِد ءَ ھمے زندان ءِ وھد ءُ باریگ ءَ سلوچ آئی ءِ زھن ءُ دل ءِ سر ءَ وتی نقش بندی ءَ کنت، دانکہ دولت آبادی چہ زندان ءَ یلہ بیت ءُ اے پنچسد تاکدیمی گدار ءَ ھفتاد روچ ءِ توک ءَ سرجم کنت –

مھمد امیری ءِ رِد ءَ اے گدار رئالیستی گدارے ءُ چو دولت آبادی ءِ آ دگہ گداراں ایشی ءِ واقعہ ءِ پیش آیگ ءِ جاہ خراسان اِنت ءُ وھد ءُ زمان ھم ھمیش اِنت کہ ایران ءَ انقلاب سفید ءُ اصلاحات ارضی وتی زوراں بنت – گدار ءِ بنگپ یک دھاتی لوگمانے ءِ کسہ اِنت کہ یکروچے پگاہ، سھب ءَ، لوگ ءِ مردین بزاں پت، یبر ءَ گار بیت ءُ جنین بزاں مات پشت کپ اِیت گوں سے چک ءَ؛ دو بچک ءُ یک جنکے ءَ اے کسہ ھمے وڑ ءَ روان کنت ءُ دیمتر ءَ پد ءَ ھمے اصلاحات ارضی ءُ انقلاب سفید ءِ اثر اے لوگمان ءِ سر ءَ گندگ بنت – پد ءَ چکانی سر ءَ دگہ کزا ءُ ویل کپ اِیت ءُ یک بچکے پھک لنگ ءُ لُچ بیت ءُ جنک ءَ ھم کسانسالی ءَ سیر دینت گوں دگہ مزن امریں مردینے ءَ کہ پیسر ءَ ھم جنینی ھست ءُ داں گڈسر ءَ مات، توکی بچک ءُ مات ءِ برات ءُ دگہ یکے پہ سلوچ ءِ شوھاز ءَ کہ مردماں انچو گوشتگ جاھے یکے دیستگ اِش ھمائی ءِ رنگیں رواَنت –

رجانکار ءِ رِد ءَ دولت آبادی ایران ءِ ھستین ءُ زندگیں گدارنبیسانی تہ ءَ مستریں نام اِنت ءُ آئی ءَ ملکی ءُ درملکی بازیں دادے ھم دیگ بیتگ –

مھمد امیری ءَ وتی رجینتگیں کتابانی درگت ءَ گوشتگ کہ منی وتی جند ءَ تنی وھدی سے کتاب چہ فارسی ءَ کہ سئیں گدار اَنت بلوچی ءَ ترینتگ بابا سبحان ءِ کسہ محمود دولت آبادی، تھارماہ منصور علیمرادی، سلوچ ءِ ھورکیں جاہ محمود دولت آبادی ءِ کہ منی سیمی رجینتگیں کتاب انت –

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ کیچ ءَ پاکستانی پوج سر ءَ بیتگیں اُرش زمہ واری منّ اِتگ-

رسانکدر ءَ شنگ کتگیں درشان ءِ تہ ءَ بی ایل ایف ءِ جارکش ءِ گْوشگ اِنت کہ بلوچستان لبریشن فرنٹ ءِ سرمچاراں گوستگیں شپ ءِ یازدہ ءَ کیچ ءِ دمگ گورکوپ جمک ءَ پاکستانی پوج ءِ بُنجل مزنیں سلاھاں گوں نشانگ کتگ-

میجر گْوھرام بلوچ ءَ وتی درشان ءِ تہ ءَ گْوشتگ کہ سرمچاراں دُژمنیں پوج ءِ بُنجل سر ءَ وتکاریں سلاھاں چہ اُرش کتگ ءُ اے ون ءِ گولہ آس داتگ کہ بُنجل ءِ تہ ءَ کپتگ گوں تُرندیں تراکے ءَ ترکّ اِتگ اَنت-

جارکش ءَ گْوشتگ کہ اُرش ءِ آسر ءَ دُژمنیں پوج ءِ مزنیں کچے ءَ جانی ءُ مالی تاوان چست کنگ کپتگ-

آئی ءَ دیمتر ءَ گْوشتگ کہ بلوچستان لبریشن فرنٹ اے اُرش زمہ واری ءَ منّ اِیت ءُ بلوچستان ءِ وتواجھی ءَ تاں اے وڑیں اُرش برجاہ بنت-

روکپتی بلوچستان ءِ تیابدپی شھر چھبار ءَ یک لاپریں زالبولے ءَ دو جاڑیگیں زھگ آورتگ اَنت کہ آ وتی وھد ءَ پیش ودی بیتگ اَنت –

اھوالانی رد ءَ زالبول ءَ درد پِر بیتگ ءُ نادراہ جاہ ءُ شتگ گڑا اود ءَ آ چُک ءُ مات بیتگ ءُ آئی ءَ دو زھگ آورتگ اَنت-

گیشیں اھوالانی رد ءَ زرآباد ءَ سیادی داروکیں لاپریں زالبول اود ءَ آسراتی ءِ نہ بوگ ءِ سر ءَ چھبار ءَ امام علی نادراہ جاہ ءَ اتکگ گڑا زالبول ءَ اود ءَ وتی چلگی بیتگ ءُ ڈاکٹرانی گوشگ اِنت تئی زھگ مرتگ اَنت-

اھوالانی رد ءَ مات نادراہ جاہ ءَ داکل اِنت ءُ زھگ ڈسچارج کنگ بیتگ اَنت سے ادار ءَ یک میتگے ءَ ھردوکیں زھگ آرگ بیتگ اَنت ءُ آیانی کل ءُ کسارات ءَ دلمانگ بیتگ اَنت ءُ اود ءَ جاڑیگیں مردمے ءَ دیستگ کہ زھگانی توک ءَ یکے زندگ اِنت –

زانگ بہ بیت ایران ءِ استانانی توک ءَ درستاں کسان سالیں زھگانی جانسلامتی ءِ آسراتی ءِ نہ بوکیں استان سیستان و بلوچستان اِنت کہ اد ءَ گیشتر نادراہ جاھاں چلگی ءِ وھد ءَ گیشتر زھگ مرگ ءِ آماچ بوگ ءَ اَنت –

جوانیں آسراتی ءِ نہ بوگ ءُ آیانی وردنی ءَ نہ بوگ ءَ اود ءَ سِی ءُ پنچ درسد زھگ اے دابیں مرگانی آماچ بوگ ءَ اَنت –

سرھال: رحمان گل

نبشتہ کار: میران

دی بلوچستان پوسٹ

گوستگیں روچ ءَ اناگتی چہ سوشل میڈیا ءِ در ٹویٹر ءَ خراساں ڈائری ءِ اکاؤنٹ ءَ یک ٹویٹے دیگ بوت کہ افغانستان ءِ شھر ہرات ءَ (بی ایل اے ءِ کماندار) رحمان گل ٹپی ئیں جاوراں نادراھجاہ ءَ آرگ بوتگ ءُ پد ءَ کمیں رند ءَ آئی ءَ وت ءَ چہ اود ءَ کش اتگ۔ اے نیوز ءِ شنگ بوگ ءَ چہ کمیں وھد ءَ پد سوشل میڈیا ءَ گوں بندوکیں لھتے آجوئی دوستاں زوت زوت ءَ ھمے نیوز ءَ را دروگ ءُ پروپکینڈہ نام دات ءُ گشت کہ رحمان گل ھست ءُ سلامت انت ءُ لھتے ءَ وَ اے ھم گشت رحمان ہرات ءَ نہ انت۔

چونائی مئے گور ءَ ھمک وھد ءَ ریاست ءِ شنگ بوتگیں نیوزاں بس ریاست ءِ دروگوئی یا پروپکینڈہ ءِ نام ءَ دے اَنت ءُ کسہ ءِ جند ءَ ھلاس کن انت۔ وھدے کہ ھمے نیوز شنگ بوت گڑا یک سکیں پرارزشتداریں جستے ایش ات کہ ریاست ءَ را دروگیں نیوز شنگ کنگ ءِ پرچا زرورت کپتگ؟ ءُ دروگیں نیوز ءَ رحمان ءَ یا کہ آئی ءِ ادارہ ءَ چے تاوان رس ات کنت؟ کسے ءَ ھم اے وڑ چارگ ءِ جھد نہ کت بوت کنت اے نیوز شنگ کنگ ءَ ریاست ءِ مکسدے بہ بیت، اے نیوز ءِ شنگ ءَ بوگ ءَ گوں انچو مارگ بوت کہ ریاست وتی ٹارگٹ ءَ پٹگ ءَ انت، دانکہ سوشل میڈیا ءِ تہ ءَ چست بوتگیں ڈسکیشناں چہ سرپدی زرت کت بہ کنت کہ آئی ءِ ٹارگٹ کجا بوت کنت یا نہ کنت، پمیشکا دوئیں ھساب ءَ ریاست ءَ را پائدگ بوت کنت کہ آئی ءِ ٹارگٹ ھما داتگیں لوکیشن ءَ انت، بزانکہ ریاست ءَ سرجم ءَ پائدگ انت، اگاں نہ انت گڑا آ وتی ٹارگٹاں دگہ ھنداں پٹگ ءِ جھد ءَ کنت۔

راستی ءَ چہ دروگیں نیوزاں ریاست ءَ ھچ پیمیں نپے نہ رس ایت بلے ھمے نیوزانی شنگ کنگ ءَ پد ھما سیادی داروکیں ادارہ، یا آھانی دوزواہ ءُ مردمانی نیمگ ءَ چست بوتگیں لھتے بنیادی املاں چہ ریاست ءَ بلکیں پائدگ بہ رس ایت چوشکہ مردمی ابرم ءِ بھر انت آئی ءِ سیادی داروکیں مردمے یا کجام چیزے ءِ بابت ءَ کسانیں ناوشیں ھالے آئی ءَ ھبکہ کنت ءُ ھمے ھبکھی بنیاد ءَ ری ایکشنری بیت، آئی ءِ ھمے ری ایکشن وتی تہ ءَ وت پراشدار ءُ بامکسد جوڑ بیت، بوت کنت ریاست ھم مارا چہ ھمے ری ایکشن ءِ امیت ءَ دارگ ءَ بوتگ ءُ ھمے ری ایکشناں چہ ریاست ءَ بلکیں پائدگ بہ رس ایت۔

راستی ءَ لھتے بنیادی پھلو انت کہ آھانی چار ءُ بیچار کنگ بلکیں ھژدری بہ بیت، دروگیں نیوز شنگ کنگ چہ سے بنیادی ری ایکشن دیم ءَ آھگ ءِ گنجائش ھست، یکے چہ ھما ادارہ نیمگ ءَ ایرجتیں (مزمتی) بیان شنگ بیت، دومی نزیکیں سنگتانی نیمگ ءَ پوسٹ ءُ کمنٹس ھم دیم ءَ کاینت،سیمی بوت کنت رحمان ءِ ھال پرسی ءِ درگت ءَ رھوت کاری ءُ ھال جست ءُ پرسے بندات بیت۔بنداتی دوئیں املاں، بیان،پوسٹ ءُ کمنٹس آں ریاست ادارہ تجزیہ کنگ ءِ جھد کن انت کہ راستی آئی ءِ ٹارگٹ ھمے جاہ ءَ انت یا اناں، سیمی امل انت رھوت کاری ءِ تہ ءَ کسانیں نزوری یا سکیورٹی برج پروشگ بہ بیت۔ بوت کنت ریاست ءَ را کسانیں راہ ءُ درے دست بہ کپ ایت آئی ءِ بنیاد ءَ وتی ٹارگٹ ءِ جاہ (لوکیشن)ءَ درگیتک کت بہ کنت۔

اگاں دروگیں نیوز ءَ چہ ریاست ءَ را چیزے رس ات کنت گڑا تھنا وتی ٹارگٹ ءِ جاہ(لوکیشن) ءِ بابت ءَ انفارمیشن انت ءُ ھمے کار ءِ تہ ءَ دژمن ءِ مستریں کمکار مئے وتی ادارھاں چہ سیادی داروکیں دوزاھیں سنگت ءُ ھمراہ بوت کن انت کہ آ چہ وتی کمنٹس، پوسٹس ءُ رھوت کاری ءِ تہ ءَ نزوری ءِ سبب ءَ ریاست ءِ کاراں ارزان کت کن انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ایران ءَ سَے شمبے ءِ روچ ءَ ٹاہ دیان ءَ گوشتگ کہ آواز ءِ رواجاں چپ پانزدہ کساس گیش زورمند داروکین ھائپر سونگ بیلسٹک میزائل جوڑ کنگ بیتگ-

امریکہ ءِ نیوز ایجنسی ایسوسی ایٹڈ پریس ءِ رد ءَ تھران ءَ جوھری نیاد ءَ امریکہ ءِ گون ءَ زھرناکی برجاہ اِنت ھمے داب ءَ ایران ءِ ترسناکیں سلاھاں دگہ یک سلاھے ھوار بوگ ءَ اِنت-

ایران ءِ سرکاری ٹیلی وژن ءَ نوکیں میزائل کہ پارسی ءَ آئی ءِ نام فتاح یا فاتح ایر کنگ بیتگ، چیرکائی ءِ رنگ ءَ گچینی دروشم ءَ جوڑ کرتگیں دمگاں پیشدارگ بیتگ –

اے وھد ءَ اے پدر کنگ بیتگ کہ جھد ءِ رنگ ءَ گمان کنگ بیت اِنت تھران ءِ سرکار مشرق وسطیٰ ءَ گیشتر وتی بھراں دشمنانی ھلاپ ءَ سلاہ چیر کت کنت-

اے درگت ءَ جتا جتائیں نیادانی توک ءَ ایرانی سروک ابراھیم رئیسی ءَ تران کنان ءَ گوشتگ کہ مروچی ما سما کنگ ءَ ایں کہ ما داروکیں تاکت جوڑ بیتگ اِت اِنت – اے تاکت دمگی ھمساھگیں ڈیھانی واستا سلامتی ءُ ایمنی ءِ کشک اِنت-

ایران ءِ پیرا ملٹری گارڈز ءَ ایرو اسپیس نیاد ءِ سروک جنرل امیر علی ھاجی زادہ ءَ گوشتگ کہ اے میزائل ءِ ماڈل ءِ نکابی دروشم ءَ گپ کنان ءَ گوشتگ کہ فاتح میزائل ءِ رینج چاردپ سد کلو میٹر اِنت –

آئی ءَ گوشتگ کہ روکپتی بندشاں ایران ءُ نوکیں سلاھانی رسگ ءَ بازیں کچے ءَ داشت کنت بلے اے میزائل گیش بیلسٹک میزائل سلاھے – اے بازیں سالانی توک ءَ جوڑینگ بیتگ-

ھاجی زادہ ءَ اے ٹاہ داتگ ءُ گوشتگ کہ اے دابیں ھچ نزام نیست اِنت کہ اے میزائل ءَ داشت بہ کنت-

کمپنی ءِ سالگشتی ڈویلپر کانفرنس ءِ وھد ءَ آئی او ایس 17 ءِ جار جتگ کہ اے نوکین آپریٹنگ سسٹم ستمبر ءَ جتا جتائیں آئی پون ماڈلزاں دز کپ ایت-

ھمے رنگ ءَ یک نوکیں فیچر نیم ڈراپ ءِ پجار کنگ بوگ ءَ اِنت کہ آئی ءِ کمک ءَ کارمرد کنوک زوت دو آئی پون ءِ ھواری ءُ کانٹیکٹ ءِ سرپدیاں شنگ ءُ تالان کت کن اَنت-

آئی او ایس 17 ءِ ڈیجیٹل اسسٹنٹ سیری ءِ کامرد کنگ ءِ رھبند ھم گھتر کنگ بیتگ اَنت-

نی het siri گوشگ ءِ مٹ ءَ بس siri بہ گوش ات ڈیجیٹل اسسٹنٹ ءِ برجم کنگ ءِ سرجمی بیت کنت-

کمپنی ءِ نیمگ ءَ نوکیں آپریٹنگ سسٹم ءِ آٹو کریکٹ الگورتھم ھم گھتر کنگ بوگ ءَ اِنت کہ ھمے داب ءَ کانٹیکٹ پوسٹر ءِ نام ءَ یک دگہ نوکیں فیچرے پجار کنگ بیتگ چریشی ءِ کمک ءَ پروپائل پکچرز ءُ دگہ چیزانی کمک ءَ کانٹیکٹ پوسٹرزے جوڑ کت کن ئے –

آئی او ایس 17 ءِ اسٹینڈ بائی موڈ ءُ نوکیں جرنل ایپ ھم گیش بوگ ءَ اِنت –

اسٹینڈ بائی موڈ ءَ سرجاہ ءَ ایر کنگ ءُ آئی پون ءِ سر ءَ پوٹو، کیلنڈر، وھد ءُ دگہ دگہ ڈیوائساں دزجنگ ءَ ابید دیست کن ئے –

اے نوکیں آپریٹنگ سسٹم بیٹا ورژن ءِ ڈویلپرزاں بس رس ایت تنی وھدی مھلوک ءَ سر بوگ ءَ ودار کنگ کپ ایت –

بلوچی زبان ءِ شائر سخی بخش عرف سکی ساوڑ چہ تُربت ءَ بیگواہ بیتگ۔

سخی بخش بلوچ ءِ سیادی بلوچستان ءِ دمگ خضدار ءِ نال گریشہ سریج ءَ چہ اِنت۔ اھوالانی ردءَ زیک چہ لوگ ءَ درکپگ ءَ پد آ بیگواہ بیتگ کہ آئی داں انگت آئی درگت ءَ ھچ پئیمیں اھوال نیست اَنت۔

زانگ بہ بیت کہ آ مردماں بلوچی زبان وانین ایت، بازیں کساس ءَ چُشیں نودربر ھست اَنت کہ آیاں بلوچی “سیاھگ راست نبیسگ” چہ سکی ساوڑ ءَ در بُرتگ۔

سخی بخش ءِ کھول ءَ ھال راست کنان ءَ گُشتگ کہ ما سکی ساوڑ ءِبیگواھی ءِ ھال پولیس ءَ داتگ۔

آیاں واکداراں چہ دزبندی کُتگ کہ سکی ساوڑ ءِ یل کنائنگ ءَ پہ وتی کرد ءَ پیلو بہ کن اَنت۔