آجوئی تئی مِھر ءِ نمیرانیں ھَتم
نبشتی کار: نوکاپ
دی بلوچستان پوسٹ
کول ءِ نمیرانیں ساجد ھسین ئیگ ءَ انسان انچیں ساھدارے کہ وتی مانا ءَ زندگ بوگ ءَ رند وت جوڑ کنت انسان پیداک بوگ ءَ رند وتی زندگی ءَ پہ مانا یے شوھاز ایت ءُ ھما مانا ءِ پشت ءَ زندگی کنت۔گلامیں راجمانی ءَ ودی بوگ ءُ زندگی ءَ پہ راھے گِچنگ کہ رژنائیں بانداتے ءِ مانزمان بہ بیت داں آ گھگیری اِنت، جنگ اِنت دژمن ءِ دیم ءِ دارگ اِنت گلامی ءَ پہ زندگی ءِ مانا دگہ چی بوت کنت کہ آئی ءِ ھرچیز گُٹ گیر ءُ ایردست کنگ بیت چُشیں موسمے ءَ اگاں کسے زندگی ءِ مانا ءَ سرپد مہ بیت ءُ پرائی ءَ دست ءُ پاد مہ جنت داں ھچ کہ ھچ نہ مان ایت ءُ گلامی ءِ سانکل روچ پہ روچ مھکمتر بنت۔بلوچ کہ وتی زمین ءَ پنجاپی ءِ ایردستی ءُ گلامی ءِ پنجگان اِنت چریشی ءَ چہ آجو بوگ وتی ایمنیں زند ءِ گوازینگ آئی ءَ وتی زندگی ءِ مانا کتگ اے مانا ءِ پشت ءَ ھزارانی کساس ءَ ورنا، کماش ءُ چک ءُ زالبوالاں لٹ، کُٹ زندانی ءُ ٹارچر سیل،شھادت ءُ مرگ اوپار کتگ ءُ چو کوہ ءَ دژمن ءِ دیم ءَ مک بوتگ اَنت ءُ داں مروچی تمردی ءُ مھکمی ءَ جنزگ ءَ اَنت ءُ دومی نیمگ ءَ دژمن ءَ را وس وسے ءَ مان رُپتگ کہ آئی ءِ جنگ ءُ کشگ برگ ءُ گار کنگ بَسی ءِ نام ءَ نہ زانت بلے کول ءِ اتا ءَ-
“پہ من ءَ روک منی آکبت ءِ کندیل اِنت”
“مرچیگیں دنز نہ کنت واھگ ءَ ساھگیر منی “
بلوچ ءِ اے گھگیری ءِ سپر ءَ ھزاراں چُشیں بامرد ءُ جھدکار پیداک کتگ کہ مروچی بلوچ ءِ بُندپتر ءِ براہ ءُ زینت اَنت آیاں بلوچ جھد ءَ را چو ابادتے ءَ زرتگ ءُ جنز اِتگ اَنت بلوچ ءِ سیاسی لوٹ ءِ سر ءَ ایمان آرتگ زندگی ءِ ھچ دمان چہ جھد ءَ گستا نہ کتگ۔چُشیں سنگتانی بابت ءَ کہ گپ بیت داں اُود ءَ زاکر مجید ءِ نام استالے ءَ چو درپشیت زاکر جان راجی آجوئی ءُ گھگیری ءِ دراجیں سپر ءِ اھدے آئی ءَ پہ زندگی ءِ مانا ءَ وتی شپ ءُ روچ یک کتگ اِت اَنت چہ گلامی ءُ ایردستی ءِ پنجگاں درایگ وتی آزاتیں زمین ءِ پولگ ءَ ناں شپ چار اِتگ نیکہ روچ سرجمیں ءُ کاملیں آشوبی رھشونے ءِ بستارے ءَ وتی سیاسی پروگرام ءَ جنزینگ ءَ بوتگ-
زاکر جان پرایمنیں سیاسی جد ءُ جھد ءِ منوگرے اَت آئی ءَ را ناں توپکے بڈءَ اَت نیکہ پہ دژمن کتار بند اَت آئی ءِ توپک آئی ءِ لیکہ اَت ھما پگر اَت کہ بلوچ ءِ سیاسی ءُ آشوبی ھیلکاری ءَ کنگ ءَ اَت ھما امل اَت کہ چرائی ءَ زندگی ءِ مانا دست کپگ ءَ اَت۔زاکرجان گوں آزاتی ءِ اوگاماں بلوچستان ءِ کنڈ کنڈ ءَ سر اَت بلوچ ورنایانی رھشونی ءَ کنگ ءَ اَت بلوچ ءَ را پہ باندات ءِ مراداں پاد کنگ ءَ اَت ءُ پد ءَ ھشت جون اَتک، زاکر دژمن ءِ سیاہ ءُ تھاریں کوٹیاں بوت بلے آئی ءَ زانتگ اَت کہ من چی ءَ پیداک بوتگان ءُ اے زندگی ءَ را مانا یے ءِ بکشگ ءَ پہ سر کجا کپ ایت پمیشکا وتی لیکہ ءِ سر ءَ تمردی ءَ اوشتات ءُ دژمن ءَ را آئی ءِ ٹارچر سیل ءِ تہ ءَ باور کنائینگ ءَ اَت کہ ”ما مُرت کنیں بلے وتی لیکہ ءَ چہ کدی اوں دزکَش نہ بئیں”-
بلوچستان ءَ دوھزار ءُ دو ءَ رند کہ سرپیس سیاست لوگ لوگ ءَ سر اَت یک نیمگے بی این ایم ءَ واجہ گلام مھمد ءِ سروکی ءَ آجوئی ءِ اوگاماں بلوچستان دو بلوچستان کتگ اَت داں دومی نیمگ ءَ بی ایس او آزاد اَت کہ ورنایانی میان ءَ آشوبی ءُ سیاسی پروگرام ءَ سر کنگ ءَ اَت بلوچستان ءَ ھر دومی ورنا بی ایس او ءِ بھر اَت اے میان ءَ مزنیں کساسے ءَ پہ جنز ءَ کیڈر پیداک بوگ ءَ اَت ءُ راجی جنز ءِ جِتائیں تَکانی بھر بوگ ءَ اِت اَنت ھمے سرپیس سیاست ءِ برود ءَ زاکر جان، زاھد جان ءُ شبیر جان ءِ وڑیں مھکمیں سنگت پیداک بوتگ اَت انت کہ پرآیاں ھرچیز راجی جُنز ءُ جد ءُ جھد اَت۔
زاکرجان 22 اپریل 1983 ءَ ھزدار ءَ مجید بلوچ ءِ گِس ءَ وتی چماں پچ کنت ءُ ھمود ءَ ھزدار ءَ رُد ایت ءُ مزن بیت چہ بی آر سی ھزدار ءَ انٹر کنگ ءَ پد اوتل یونیورسٹی لسبیلہ ءَ انگریزی لبزانک وانگ ءَ بیت۔زاکر جان ھمے زمانگ ءَ سیاست کنگ ءَ اِنت کہ زورگریں پاکستان ءَ بلوچانانی آوار جنگ ءُ کُشگ ءِ درچے بندات کتگ ھمک دو روچ ءَ رند بلوچے آوار جنگ ءُ تھاریں کوٹیانی دیمپان کنگ بوگ ءَ اِنت، بلوچ ءِ ھمک دومی گِس پنجاپی ناپاکیں لشکر ءِ دست ءَ ماندارگ بوگ اِنت ءُ چُشیں جاورے ءَ زاکر جان گوں سنگتاں کار ءَ اِنت، سیاست کنگ ءَ اِنت بلوچ ورنایاں پہ آجوئی ءَ یکمشت ءُ یکراہ کنگ ءَ اِنت۔زاکرجان ءِ سیاسی پُھتگی ءُ بااِلمی ءِ سبب ءَ آ دوھزار ءُ پَنچ ءَ بی ایس او آزاد ءِ بنجاھی باسک گچینگ بیت ءُ پد ءَ دوھزار ءُ شش ءِ کونسل سیشن ءَ گل ءِ مرکزی سنیئر جوائنٹ سیکریٹری گچین کنگ بیت زاکر جان وتی سیاسی ویژن ءُ مھکمی ءِ سوب ءَ دوھزار ءُ ھشت ءِ کونسل سیشن ءَ گل ءِ کمک کماش گچین کنگ بیت بلے سالے ءَ رند 8 جون دوھزار ءُ نھ ءَ سپرے ءِ وھد ءَ ماں مستونگ ءَ گوں وتی ھمراھاں پاکستانی فوج ءِ دست ءَ آوار جنگ بیت۔
زاکرجان ءِ آوار جنگ پہ بی ایس او ءَ کیامتے ءَ چہ کمتر نہ بیت بلے بی ایس او آزاد ءِ کیادت ءَ را سما بیت دژمن ءَ چہ ایوک ءَ ھمے امیت دارگ بیت پمیشکا سنگتانی کوپگ چہ زمہ واریاں پُشت کنز نہ بنت پہ زاکر جان ءَ جتا جتائیں پروگرام ٹھین اَنت شش سال ءِ دراجیں جد ءُ جھد ءُ ودارے ءَ پد بی ایس او آزاد پیسلہ کنت کہ ھشت جون ءَ زونسری آوار جتگیں بلوچانی نام ءَ اِنت ھشت جون راجی جنز ءِ چیدگے ءُ اے روچ زاکرجان ءَ ھوار کل ھما بلوچانی نام ءَ اِنت کہ آیاں گلامی ءَ را پروش دیگ ءُ زندگی ءَ را نوکیں مانا یے بکشگ ءَ پہ واب دیستگ۔
زاکرجان ءِ آوار جنی ءِ ھلاپ ءَ آئی ءِ کھول ءِ مردماں پہ وتی وس ءَ ھرچیز کتگ اَت بلے دژمن پہ وشیں دل چُشیں سراں کجا اوپار کنت کہ پرائی ءَ تباھی ءِ مانزمان اَنت۔زاکر جان ءَ پہ آئی ءِ گوھار پرزانہ مجید ماھانی ماہ دگانی سر ءَ ، روڑانی سر ءَ اے چوک ءُ پَرا چوک بیت پرزانہ کہ نوکی ماسٹر کنت ءُ پہ ایم پل ءَ دلمانگ بیت زاکرجان ءِ آوار جنگ ءَ رند وتی وانگی سپر ءَ پیچ ایت ءُ پہ زاکرجان ءِ آجوئی ءَ شپ جاہ ءُ روچ جاہ بیت۔ ھما روچ ءَ کہ پرزانہ ءَ زاکر ءِ ھمراہ پون کن اَنت ءُ اے بدیں ھال ءَ دینت آ نہ زانت کہ چی بہ کناں ءُ چتور مات ءَ ھال بدیاں کہ زاکر جان دژمناں بُرتگ زاکر ءِ آوار جنگ ءَ دو ھپتگ ءَ رند پرزانہ بلوچستان ھائی کورٹ ءَ writ petition دکل کنت ءُ ھزدار پریس کلب ءَ کانپرنسے کنت بلے چریشاں ھچ نہ گِند ایت ءُ 2010 ءَ گوں ھزاراں ایدگہ بیگواھیں کھولاں کراچی پریس کلب ءَ زھرشانی نندانکے جنت اے اولی بَر اِنت کہ آ کراچی ءَ بیت وتی اے کسان اُمری ءِ روچاں در پہ دری دگانی سر ءَ گوازینگ ءَ بیت برے لیاری ءُ برے گلشن اکبال ھمے وڑ ءَ وتی شپاں پہ زاکر جان واتری ءِ امیتاں روچ کنگ ءَ بیت۔
ھمے میان ءَ پاکستانی پوج ءُ ایدگہ ادراھاں آوار جتگیں بلوچانی ژانگولیں لاشانی دور دیگ ءِ درچے بندات کتگ اَت کہ چریشی ءَ زاکرجان ءِ مات ءُ گوھاراں ھوار ھرکسی مردمے کہ آوار جنگ بوتگ اَت آیانی دل لاپ ءَ نہ اَت کہ کجام اوں روچ ءَ آیانی تاسُکیں چُک ءُ براتانی جون کور ءُ کوچگے ءَ دز کَپ اَنت۔پرزانہ گوں مات ءَ ھمے لپرزگی ءُ دلترْکی ءِ دیمپان اَت چہ کراچی ءِ زھرشانی ءَ نا امیت بوگ ءَ رند وت گوں ماما کدیر ءَ دیم پہ اسلام آباد ءَ سپر کنت اِنت اُود ءَ زھر شانی کیمپے جن اَنت کہ بہ گِندئے رسانکدری دلگوشے بہ رس ایت ءُ کَسے مارا گوش بِدار ایت بلے زورگر پہ ایردست ءَ کدی اوں مھروان بوت نہ کنت کہ آئی ءَ را انساپ ءُ سلامتی ءِ امیت بہ بیت پرزانہ اوں نا امیتی ءَ کیت ھزدار ءَ وتی لوگ ءَ اے میان ءَ سرکار ءِ نیمگ ءَ آئی ءَ را دنیا ءُ جھان ءِ پون کاینت ءُ دمکی ءُ پادتراپ دیگ بیت کہ ھاموش بئے اگاں ناں گڑا شمارا زاکر ءِ لاش دست کپ ایت بلے پہ پرزانہ ءُ مات ءَ زندگی جھدے ءِ نام اَت پہ گاریں چُکے ءُ بیگواھیں براتے ءَ۔ھمے جھد اَت کہ آیاں امیت دیگ ءَ اَت ءُ آ دست ءُ پاد جنگ ءَ اِت اَنت برے شھرے ءَ زھرشانی ءُ شدکشی کیمپاں بہ گر داں لونگ مارچ ءَ درا ھمے درد اِت اَنت کہ پرزانہ ءَ چہ وتی زمین ءَ دور درآمدانی پادوناں دور دات اِش ءُ مات انگت ءَ اے چوک ءُ پرا سڑک اَت برے کراچی پریس کلب ءَ پریات ءَ اَت برے ڈی چوک ءَ دستے برزاد اِت اَنت پہ زاکر جان ءَ دوا لوٹگ ءَ اَت ءُ برے شال ءِ روڈانی سر ءَ اَت بلے آسر ایوک ءَ نا امیتی ءُ لاچاری اَت پمیشکا چہ چوک ءُ دگاں سوکی بوت داں زاکرجان ءِ اکس ئِے زرت ءُ کوہ دیمے ءَ اوشتات، کوھاں آئی ءِ گم پر اَت، کوہ اِت اَنت کہ آئی ءَ را زاکرجان ءِ وابانی کِسھاں گُشگ ءَ اِت اَنت آئی ءَ را ھال دیگ ءَ اِت اَنت کہ-
“آجوئی تئی مھر ءِ نیمرانیں ھتم”
“چیھالاں گُٹگیراں کہ زند اِنت ایردست”
“ایمن گری تئی واھگانی مُجتی ئیں موسم اِنت”
“آشوب تو”
“آشوب من”
“آشوب تئی زوراکیں ھیروپ ءِ ابدمانیں کِشار(اتا شاد)”
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
