روکپتی بلوچستان ءِ بنجاھی شھر زاھدان ءَ اروسی مراگشے ءَ تیرگواری ءَ یک زھگے بیران بیتگ-
گیشیں اھوالانی رد ءَ زاھدان ءَ آروسی دیوانے ءَ یک مردمے ءَ کورکائی تیرگواری کتگ ءُ چریشی ءَ چہ یک سَے سالی زھگے بیران بیتگ-
بیران بیتگیں زھگ ءِ پجار یاشار کمالزئی ء جانشاہ جھمنند زاھدان ءِ نام ءَ زانگ بیتگ-
اھوالانی رد ءَ آروسی دیوان ءَ یک مردمے ءَ توپک ءِ دپ جھل کتگ ءُ تیرگواری کتگ ءُ چریشی ءَ چہ اوشتوکیں زھگانی توک ءَ یک زھگے ءَ تیر لگ اتگ ءُ بیران بیتگ-
نبشتانک: درد ءِ سفر: نور ءُ قاضی
نبشتہ کار: جواد بلوچ
دی بلوچستان پوسٹ
ھردیں کہ من وتی یاتانی گرنچ ءَ بوجاں گڑا ھما زمانگ یات گیئت کہ ما تھنا “ قاضی “ ءِ نام ءَ چے آشنا بوتگ ایں، اے نام ناں کتابے ءِ تاکانی سر ءَ نبشتہ ئے صورت ءَ ونتگ نا کہ مُلّا ءُ عالمانی وازانی تہ ءَ اش کُتگ بلکیں اے نام اولی بر ءَ نورخان ءِ سوتانی تہ ءَ آئی ءِ شیرکنیں توار ءَ چے مئے گوشاں کپتگ ۔
ما گوں وھد ءَ گوکو کنان اتیں ءُ دیم ءَ جُنزگ ءَ اتیں ، لبزانی چِست ءُ ایری ءَ سرپد نئیت ایں ،شئیر چی یے شاعر کئے ءَ گوش انت ، بس موسیکی ءِ ءُ نور ءِ شیدائی اتیں ، ایم پی ۳ ، ٹیپ ءُ کیسٹ ءِ زمانگ ات ما نورخان ءِ توار ءَ گوں وت ءَ گُلائیش کُتگ ات ، گڑا ھمے میان ءَ بس لبز قاضی مئے گوشاں کپتگ ات-
تو قاضی ستر گندہ کارے بہ بئے
تئی پَنت ءُ وازاں دل ءَ جاگہ انت
من قاضی وتی عھد ءِ درامد
باریں منی باریگ کُجام انت
چہ زند ءِ گماں قاضی آسودگ ءُ آزات انت
نہ تُرس گناھانی نہ پِگر سوابانی
قاضی انچیں گال کتاراں من پہ گُل ءَ
پیغمبر ھم شئیر چوشیں پِر بست نہ کنت
من ءَ قاضی شِگانی چو مہ کن پہ شیشگ ءِ آپ ءَ
اگاں تئی موڑ انت شش پیک ءَ نہ انت سرجم دگہ باز انت
روچ ءَ ھم استالاں ھساب ءَ انت
تو گوش ئے قاضی انگت ءَ سار انت
الھان کنت شئیرے پد ءَ گوں زھیر واریں زیملاں
قاضی چو ناکو فیضک ءَ درد ءِ سروز ءَ ساز کنت
سوت پر بندیت یا گزل قاضی
لال ءُ مُروارداں شُماراں انت
پِر بستگ قاضی شئیر پہ دوست ءَ دل ءِ تب ءَ
روچے بشیر روچے عطا شاد بیتگ اں
وھد جُنزان ات ما ھم گوں وھد ءِ ھمراہی ءَ نوں گام جنئگ ءَ اتیں ءُ شئیرانی میان ءَ وت ءَ شوھاز کنگ ءَ اتیں ، اے نور ات کہ وھد ءِ ھمراہی ءَ مارا گون ات ءُ مئے زندگی ءِ ھمسپر بوت، نور ءَ گوں روچ پہ روچ نزیک تر بوھان اتیں کہ گوشاں کپت ۔
“ ھر چیز مبارکؔ رست پد ءَ
ساھے من پہ وت درگیتک نہ کُت “
نورخان ءَ پد ءَ اےانسان مئے دیم ءَ سرجم کُت ءُ قاضی ءَ را “مبارک” پِرے کُت انچوش گڑا ما مبارک قاضی ءَ چہ آشنا بوت ایں ،
مبارک قاضی ءَ کہ ما نوں نور ءِ توار ءَ اش کنگ ءَ اتیں اے میان ءَ مئے کِرا مھر ءُ آشکی ءِ موسم ات، بس گڑا نور ءَ قاضی ءِ لبزانی امبار گون ات ما وتی جند ءَ مُلما کنگ ءَ اتیں ۔
گوں خدا ءَ ھمے واھگ انت بس منی
درد ءُ گم پہ من ءَ شات ءُ گل پہ ترا
تو ستر گوں من ءَ بے وپائی بہ کن
مھر ءِ زنگ ءَ نیاراں ازل پہ ترا
گُل ءِ رکّانی سوغاتاں گِراں من
چو شیر ءُ بینگ ءَ بل ات من ءَ را
شُما مھراں بہ گندات ئے جھان ءَ
پہ کَسّ ءُ کینگ ءَ بل ات من ءَ را
ھُدا زانت ئے کہ کئی نام ءَ گِراں من
گُل ءِ نازینگ ءَ بل ات من ءَ را
زانت بکشاتگ من ءَ انچیں تئی مھر ءِ لذت ءَ
کہ توار ءَ چم گِنداں ءُ بھار گوشاں کپ ایت
یکرندے من پد ءَ تئی نام ءَ “فِدا” کُتیں
گندے بہ رستیں دل دوبر ءَ یار زندگی
زندگ آں پر تو شئیر پِر بنداں
تئی گنوکاں شُمار باں بلکیں
تئی کاگدیں دیم ءَ کدی گرمیں ھوا یے اوں مہ جنت
داں زندگ ئے بات ئے مُدام آباد ماں لُنجیں شپاں
بس یک نزوریں عادتے گون انت منی گُل ءَ
رازاں دل ءِ مُدام گوشیت بے تواری ءَ
ھزار رنگءِ تھا تو وتءَ بہ کَن اندیم
ھزار جنکءِ تھا من ترا نشان کناں
مئے چماں اے کُلیں دنیا تئی رنگ انت
ما کہ ھمک بالاد تئی بالاد کُتگ
داں زندگ آں زِبھر نہ باں مھر ءِ لذت ءَ
بس یکرندے من گوں ترا ھم نیاد بیتگ آں
وھد ھر چیز ءَ گوں وتی ھمراہی ءَ بدل کنت ، آ انسانی مارشت بہ بنت یا کہ دگہ ، کس نہ زانت کئے کُج ءَ کئے ءَ دروہیت ، مھر ءِ موسم وتی رنگ مٹ کُت ءُ دیم جُنز ات اے بر ءَ کہ موسمے اتکگ ات اشی ءِ تہ ءَ درد ، رنج ءُ ابتیکی مان ات ، انچوش سما بوت کہ اے موسم نوں بدل بوھگ ئے نام ءَ نہ زانت بلکیں مئے آتراپ ءَ چکریت ، اے سھتاں نور ءُ قاضی پد ءَ ھمراہ اتاں ءُ پد ءَ ما اے درد ءُ رنج ءِ سپر بندات کُت-
ماں زندمان ءِ مُشکل ءُ گرانیں مسافتاں
دروہیت من ءَ را ھمسپر ءَ یار زندگی
امروز ءَ ھرکس جند ءِ گماں گار انت
من یک ءُ تھنا تئی گم من ءَ نئیل انت
گوں کئے اندوہاں گالاں کن ئے قاضی
جیڑے کئی دیم ءَ تئی گم من ءَ نئیل انت ؟
من ءَ انچو زُرتگ گماں آئی ءِ
نہ جند ءِ سماہ انت نہ دنیائی ئے
قاضی دائم درد بِہ سگّ آں تئی
چوش نہ لوٹ آں مثلِ عطا من شات بہ باں
گوں وتی جنڈیں کبا ءُ درتگیں شال ءَ
یک پکیرے دردے کوہ ءَ سر کنگ لوٹیت
درد ءُ رنج ھم نوں مئے زند ءِ ھمراہ بوت آں گوں ما سپر کنگ ءَ اتاں ، ما گوں یک دومی ءَ انچو پیوست ات اِنت کہ گوں یک دگری ءَ سھت ئے ھم جُتا بوھگ ئے نام نہ زانت، نور ءَ کازی ءِ شئیرانی تہ ءَ مئے زندگی مھدود کُتگ ات ، ھر لبزے ءَ نوکیں دردے گون ات ءُ نوکیں کِسہ ئے ، اے دوئیں ھما کارست اتاں کہ بیدے اشاں پورا مئے درداں معنا نیست ات، ما کہ ابیتکی ءِ سھتاں وت ءَ کمو مُھکم کنگ ئے کُوشست کُتگ بس گُڑا نور کازی ءِ لبزاں گوں مئے دیم لیب کنگ ءَ ات-
اوئے شُمّیں دل بہ بات
آہ ءُ اُفّار ءَ نہ زانت
چونیں آ سواداگرے
درد ءِ بیپار ءَ نہ زانت
16 ستمبر انت بہ گندے مر چی نور سک گل ءَ بال انت کہ قاضی آئیگ ءَ انت ، نور وتی باجا ءِ دنزاں ساپ کنگ ءَ بیت یکبرے پد ءَ گوں قاضی ءَ یکجاہ بیت تِنگ نوشی ءِ دیوان بیت “زیمر زیمر چاپ جنکاں” ۔
تو کدی باریں یکبرے کائے
بیا ترا اللہ سد بر ءَ بیار ایت
منزل منزل بیا تئی گم من ءَ نئیل انت
ساچان ایں بیگاہ ءَ تئی گم من ءَ نئیل انت
بے تو ابیتک انت تئی لوٹوکانی مجلس
بیا کہ ترا تئی مھر ءِ پکیراں یات کُتگ
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
رندانی الف ءِ شعر
شائر: شَے شولان
زُبانی جنوک : اکلاک مھراب
پولکار : امجد بیکس
دی بلوچستان پوسٹ
( اے رندانی الف ءِ شعر اِنت کہ رند اَچ الف ءَ در آھت اَنت ، الف یعنی اراک ءَ یک جاگاھے ءِ را گوش اَنت ۔)
ھوتی بیل منی شاھی ئیں
گُفتاراں منی جاھی ئیں
سوار بو وش روکیں باد ءَ
بیا گوں مَلّگی بالاد ءَ
بالاد تئی گماں زیندانیں
سوگندین گُل ءِ چوٹیلاں
نوکیں کِسّھاں من زیر آں
اے پِس ءُ فیروکاں تَاں فیراں
سلطان شَے یزید سر زورت ءَ
سُلطان شَے حُسین ءِ کُشتگ
خون ءِ پہ شھیدی رِھت اَنت
رِنداں اَچ الف زھر کُرتگ
نوکبندگ سر ءَ سر کپتگ
شیھک کہ پد ءَ گوں کپتگ
نوک بندگ سخی سالار اِنت
اے کوہ تاں بندن ءَ لاشار اِنت
چندی گُژنگ ءِ لاف سیر اِنت
رِند چہ الف سر سَست اَنت
آخُرد ءُ نَسیب ءَ زورت اَنت
درباری ڈیھاں درکپت اَنت
آپ ءُ اَبرھاں داراں اَنت
کور ءُ کوچیگاں چاراں اَنت
بُن پور گپتگ ءِ گوں کوٹاں
ھنچو سر نتابیں چوٹاں
گوشت ئے بُن پور مئے پِت ءِ میرات اِنت
پوجے پاد آھت چہ ایران ءَ
جاگاہ ءَ نہ بوت شیراں ءَ
رِند ءُ بارگیں بوراں ءَ
درباری ڈیھاں دریر کپتاں
شیھک پُرسِتگ رنداں ءَ
جنگ دوستیں سلاہ سِنداں ءَ
بیا کیچ پَسُند ءَ نہ بیت رنداں ءَ
کاچارے ءَ نہ ھَت مالاں ءَ
کولواہ ءَ گیابیں آھت اَنت
چاکر بوت ءَ ماں آ شال ءَ
پِیش چہ بانڑی سَے سال ءَ
پاد آھت ساھبُ ءِ اکبال ءَ
ڈور ءَ تاں گڑّیں ڈنڈار ءَ
پِیش ءُ چَنبر ءُ مالار ءَ
ھور گوں کَدھی بازار ءَ
نِگْوَرتیں جمبر ءَ اِش بَستگ
نہ گوارنت ءُ نہ بورّنت ھچبر
رنداں نوں چَمد کوچ کُرتگ
ڈاھی ءَ پد ءَ ھال داتگ
سردار رخشانی پَد ءَ پشکپت ءَ
سِرّا گْواتگرے ءِ بَست ءَ
گوشت ءِ من گوں چِل ھزاری پوجاں
لاشار وت گونا پنجاہ ءَ
سوْب ءَ بیت من ءَ ھرجاہ ءَ
نِے من ءَ پَرواہ چوشیں ھمراہ ءَ
رِند ماں مولاواں اِیرکپتاں
آپ ماں چَشمکاں ھُشک بوتاں
سَرسند ءَ گُبار ءَ گِتگ
کچی گِتگ ءِ گوں مالاں
جَت ءِ کُشت اَنت گوں جگدالاں
ھنچو ھم تِپاکیں سیالاں
مُلک ءِ گِتگاں آسان ءَ
بھر ءِ دات وتی براساں ءَ
راج ءَ کو خُدا آرو کَھر
لَھڑّی گوھراں کُرتیں زَھر
سردار آھتگوں باھوٹی
من مالاں ءَ چَرّاگے لوٹین
بَگاں ءَ منند ءِ پیشدار
گوشت ءِ بی بی چے ھَنوں پچار جاگاھے
گوھرام ءَ مکن تو ھچ راھے
سردار ءَ کُتیں یکرو کوچ
ائیدی ءِ مُبارکیں روچ
بی بی ءِ گِدان ءِ دیم ءَ
بی بی ڈاچی پرچیگی ءَ گور اَنت
بی بی ءَ ھبر بازی دات
سردار ڈاچیگاں جَکی اومان اِنت
دُراسکی بَندن ءُ اورماڑہ
بَٹی کوہ تنا میانی ءَ
بلانی کَھور گوں لمب ءَ
منی بَگانی چَرّاگ ءِ جاہ اِنت
بَگ ءُ ھارّیں گورُمانی جاہ اِنت
(باگ ءَ چراگجاہ ءَ زھیر کُرت اَت )
گوشت ءِ بی بی ءَ ڈاچی پرچیگی ءَ گورّنت
شیر ماں ماھگاں شنزاں اَنت
بی بی ءَ ھبر بازی دات
سردار ھِرّاں وتمرے گوں کپت ءَ
بَگانی چراگ ءِ جاہ ءَ
جَتّاں پہ گِلّگ گال داتیں
کّرواں گِلگ شونداتیں
سردار منند کہ کِسّھاں من کارین
پیری آھتگاں لاشاری
چانگو آھتگاں کَستی ءَ
گِنداں چاکر ءَ سُستی ءَ
ھِرّ اِش گُڈّات اَنت جُپتیگ ءَ
ٹیکاں پکِت اَنت سَجی ءَ
ٹیھاں پر وتی لاپ شود ءَ
ھِرّ ماں گوھری ھرجان اَنت
شومیں چاکری سَے شام اَنت
ھر چار چوڑگ اِش بورینتن
سی لوک ءِ ھمِد بار کُرتگ
یکدم شہ پی ءُ ڈنڈو ءَ
بَگاں چہ جوکجاھاں پاد کُرت اَنت
گورُم چہ نلی یاں جَھل ءَ
بی بی مَنْد ماں کَچڑاں باگیں ءَ
کچی دور سریں جاگاھے
گامیش ءُ پٹیں گوچانی
تئی بَگانی چَرّاگ ءِ جاہ اِنت
رند ماں بولان ءِ تڑّاں شِنگ بوتاں
بَگ اِش جم جَتاں گوھرامی
باسک اِش بُرّت اَنت جَتانی
شُما مَٹ اِت گوھری ھِرّانی
شومیں مُرشد ءُ شِرّانی
چُٹ ءَ بھتریں نام کپت ءَ
گوشت ءِ گوھر جان لجان مُھکمیں گَٹے کن
آپاں ماں مَلّندر جو کن
اے رند کہ پُٹڑّے مان آین
اے نئیلن مولا ءَ آباد ءَ
مولو ھررو گوں دَزّاں اِنت
اے بوری ھُکھیں نالاں اِنت
گوھرجان مَھتریں زَھر گِتگ
چُٹائی جواب ءِ داتگ
کوہ ماں رفتناں دور بوتگ
تھار ماھیں شَپے دیم ءَ دَئین
مالاں اِش ھمِد ءَ بیاریں
روچ ءِ روشنیں گوں ٹِکاں
آپ ماں آ دپاں جور بوت اَنت
چاکر فتنھیں فٹے گِت
داں پہ ٹوبواں ٹلارت اَنت
شاگیں تُرّگاں اِش گِھت اَنت
ھُمبوئیں بیھاناں وارت اَنت
دست ماں سومریگاں رِھت اَنت
بانانی گِلیم اِش بُرت
بینگ چہ شَپجاہ ءَ درنگ بوت اَنت
بَگ چہ جوکجاھاں پاد کُرت اَنت
گورُم چہ نلی یاں جَھل ءَ
چاکر گوانک جَتگ بر بیلاں
بوج ئِے مَرکبانی جیلاں
ورنا رِھتگاں گوں سلاھاں
اِسپر ماں گور ءَ پالوشیں
رنداں ءَ گَلّے بھر بوت ءَ
ریک ءِ مُژدہ اِش گوں بوتگ
سی ھزار کُنگر اِش گاڑینتگ
گوھر جان مَھتریں پَش کپتگ
چَترو اومر ءَ میریں ءَ
سردار ءَ اول گیریں ءَ
زانین چاکری گُھار زَھک ئے
مھمان اوں تئی پتر ئے
شاگیں گوانزگ ءَ چَنڈینیں
نُھ سد گندم ءُ نُھ سد میش
نُھ سد گندم اوں ھورتیں دان
آھتگ پیر زادگ ولی نامانی
سردار ماں سر ءَ جُمبانیں
پاگ ءَ را دو پیچ بندانیں
بیبگر مِھتریں ایر کپتگ
گِت ءِ سردار ءِ واگاں ءَ
سردار راستیں ءَ گوشیں جنگ ءَ بیت
دُروگ ءِ بندگ ءَ من ءَ ننگ ءَ بیت
اومر خان تئی گوھار زَھک اِنت
نوھانی ھزار مرد ءَ بیت
پیش کنز ئے ترا نُکس ءَ بیت
پش کنز ئے ترا ائیب ءَ بیت
منند کہ منزلے دور ءَ بیت
دُژمن ءَ فُٹے دور ءَ بیت
گوشت ءِ بیبگر تو خالی زال تمامیں بچے
ترا زی ئیں گونڈلاں ترسینت ءَ
ترا ھندیاں مَدرسے دات ءَ
ھردیں من بُرائین داوا یا
اود ءَ تیر دوری ترا دور دارین
بیبگر مِھتریں بِرگَشتگ
گاجان ءِ گیابیں دَشْت ءَ
نُھ سد کُنگر ءَ بِرگشتیں
ھپ بیست آلمیں مُلایاں
دبلاں چو دو دیمی گورتیں
کارچ ءُ کاردپیں کاٹاراں
اوم جان مادر ءَ نیاد کُرتگ
گوشت ءِ بچو نیلت ماں بروتاں مُشتگ
گوشت ءِ ارمان پرمن ءَ وتی تُرو زھک ءَ
میرجان زھم جنین سوغات ءَ
دُژمن من وتی گَل داتن
راستیں باسک اوں بورینتاں
مَلّیں موجر ءَ زین کُرتگ
چاکر خان پد ءَ دیم داتگ
سردار پیتنھاں بِل وتی جند ءَ کَش
چاکر بِر وت ءَ خار گِتیں
خامگیریں تپے ءَ گِتیں
میرانی گماں لھڑیناں
شَیھک پُرستگ چاکر ءَ
میران گون نہ اِنت گوں وتی سْیاہ گْوات ءَ
پھلوان گون نہ اَنت
گوشت ءِ من گوھرام ءَ جت ءَ پِرینتہ
گوھر جان مِھتریں پِیشکپتگ
زونوری شاہ ءَ چو رپتگ
سی لوکے ءِ ھمد بار کُرتگ
یکدم اشْرَپی ءِ سُھر ءَ
گوشت ءِ سال پہ سال کائین مالی ءَ
ھنچو چو ڈومب جنیں سوالی ءَ
من ءَ بیزار چہ چاکری سْیالی ءَ
گوشت ءِ آسمان ءَ ھرے ءَ سَرّاِیت
چاکر خان نوں پد ءَ یا تَر اِیت
گوشت ءِ مرد کہ چاکر ءِ شیھک اِنت
بخت ءِ بُلُند ءُ یک ڈک اِنت
رند ءِ تیگ جنیں سالونک اِنت
ھپ پُشت ءَ بلوچ ءِ خان اِنت
شیر ءَ گوں اول شھمات ءَ
پیل ءِ گوں کرو ءِ مَنْدر ءَ
تازی کُرّگاں بے زین ءَ
ھسپاں بے لگام ءَ تاچیت
چابوک ءِ سر ءِ شنگینتگ
شاہ ءَ را سلام ءِ داتگ
گوشت ءِ بِدئے زونوری کَھاریں پوج ءَ
چُکچین پہ کن لاشار ءَ
گوھر جان مادر ءَ نیاد کُرتگ
گوشت ءِ بچو ھرو من وپتگ اوں واب ءَ دی
آپ چہ کور دپاں جَھل ءَ رو
من دوشی وپتگ اوں واب ءَ دی
آپ چہ کور دپاں بالا کئیت
گوشت ءِ ماسی سَے روچ ءَ نہ بیت مالاں ءَ
شاہ ءِ گوشتگیں گالاں ءَ
جِنے ءَ ترا ریپینت ءَ
لوگ ءَ روپ وتی ءِ دیم ءَ مِند
آسمان ءَ ھرے ءَ سَرّ اِیت
چاکر خان نوں پد ءَ یا تر اِیت
گوشت ءِ مرد کہ چاکر ءِ شیھک اِنت
بخت بُلُند ءُ یک ڈَک اِنت
رِند ءِ تیگ جنیں سالونک اِنت
ھپ پُشت ءَ بلوچ ءِ خان اِنت
روچ ءِ روشنیں گوں ٹِکاں
آپ ماں آ دپاں جور بوت اَنت
دبلاں چو دو دیمی گورتگ
کارچ ءُ کار دپیں کاٹاراں
کوھیں کوٹڑو را بَستیں
مَلّیں موجر ءَ زین کُرتیں
چِل کوٹ ءِ سر ءَ ترڈینتیں
پاتھا من ھَمُد ءَ ونتیں
میرانی گماں لھڑیناں
بلوچستان ءِ بنجاھی شھر شال ءَ یک مردمے ءَ ساد گُٹ ءَ کتگ ءُ وتکشی کتگ-
وتکشی کنوکیں مردم ءِ پجار اقبال ء حسن شاہ ءِ نام ءَ زانگ بیتگ ءُ آ پیر مھمد قلندرانی میتگ ءَ نچاری دگ ءِ نندوک اِنت-
دمگی مردمانی رد ءَ اے مرد ریڑھی ءِ گون ءَ چھولا بھا کنگ ءَ بیتگ، وتکشی ءِ سبب نیزگاری گوشگ بوگ ءَ اِنت – لاش سول ھسپتال ءَ سر کنگ بیتگے
زانگ بہ بیت بلوچستان ءَ وتکشی ءِ وئیلانی اھوال ھمک روچ پیداک اَنت-
گوستگیں سَے ھپتگانی توک ءَ وتکشی ءِ اے ھپتمی وئیل اِنت کہ ایشی ءَ پیش گوادر، ھزدار، آواران، ھب چوکی ءُ شال ءَ وتکشی ءِ اھوال دی بلوچستان پوسٹ ءَ سر بیتگ اَنت-
نیویارک ءَ عرب وزرائے ھارجہ ءَ دوشمبے ءِ روچ ءَ میانجی ءِ ڈیھانی ایمنی ءِ ھاتر ءَ گپ کنگ ءِ جھد کتگ ءُ چریشی ءَ گچینی مراگشے ٹاھینگ بیتگ-
ھال سر کنوکیں ادارہ ایس پی اے ءِ رد ءَ نیاد ءَ عرب لیگ ءِ سیکریٹری جنرل ابوالغیط ، اردن ءِ نائب وزیر اعظم ءُ وزیر ھارجہ.ایمن الصفدی، مسر ءِ وزیر ھارجہ سامح شکری،.یورپی یونین ءِ گچینی مردم ھوار بیتگ اَنت-
عرب وزرائے ھارجہ ءَ میان اُستمان ءِ جنرل اسمبلی ءِ ھپتاد ءُ ھشتمی سیشن ءِ نیاد ءَ بھر زورگ ءِ واستا یویارک ءَ اَنت-
نیاد ءَ ھپتاد ڈیھ ءُ میان اُستمانی گلانی نمائندگ ھوار اَنت – ایشانی توک ءَ جتا جتائیں ڈیھاں پنجاہ اگدو داراں گپ کتگ-
میانجی ءِ ڈیھانی ایمنی ءِ واستا گامگیج زورگ ءِ سر ءَ جتا جتائیں گپانی سر ءَ باوست بیتگ-
ایشی ءَ ابید ایمنی ءِ سر ءَ ستک کنگ ءِ سر ءَ گامگیجی ءَ سیاسی لیکہ، زرکاری ءُ انسانی کار کنوکیں باسکانی سر ءَ دارگ ءِ گپ ءِ سر ءَ باوست بیتگ-
الاخباریہ ءِ رد ءَ سعودی ءِ وزیر ھارجہ ءَ گوشتگ فلسطین ءِ آجوئی ءَ ابید فلسطین ءُ اسرائیل ءِ جیڑہ ءِ ھلاس بوگ ءِ دگہ ھچ راہ نیست اِنت-
نیاد ءَ گوشگ بیتگ کہ اے جیڑہ ءِ سر ءَ گیش ءُ گیواری ءَ ھردوک ریاستانی جیڑہ ءِ ھلاس بوگ ءَ دیم ءَ آیگی اِنت-
سعودی وزیر ھارجہ ءَ گوشتگ ما نی زیردستیں جاھاں گیش بوگ ءَ گندگ ءَ ایں-
آئی ءَ گوشتگ کہ انیگیں ڈیھاں جیڑہ ءِ گیش ءُ گیواری ءَ راستی ءَ دیم ءَ ارگ ءُ پلامرزی کنگی اِنت-
نیاد ءَ سعودی ءِ وزیر ھارجہ ءِ کارگس ءِ ڈائریکٹر جنرل عبدالرحمان الداود ءُ مشیر کارگش ھارجہ ڈاکٹر منال رضوان ءَ ھم بھر زرتگ-
مبارک کازی ءِ پنجاہ سال ءِ شائری ءِ سپر بلوچ ءِ رنگاں رج اتگ پمیشکا مروچی آئی ءِ بیرانی ءَ سرجمیں بلوچ راج پرسیگ اِنت۔
اے گپ بلوچ نیشنل مومنٹ ( بی این ایم ) ءِ نیمگ ءَ برجم دارگ بیتگیں ’جھدکارانی پتر‘ ( ایکٹیوسٹ اسمبلی ) ءِ نیاد ءَ تْران کنان ءَ گل ءِ سرکماش ڈاکٹرنسیم ءَ گوشتگ اَنت۔
گل ءِ کمک سرکارگشاد چیئرمین کمال ءِ چیردستی ءَ بیتگیں اے مراگش مبارک کازی ءِ منگہ دیگ ءَ دو دمان ءِ بے تواری ءَ بنا بیتگ ،مراگش ءَ بی این ایم ءُ باسک ءُ اگدہ داراں مبارک کازی ءِ کرد ءُ ندانکی ( ادبی) کارانی سر ءَ آ ستک ءُ ستا نْدر کرتگ۔
ڈاکٹر نسیم ءَ گْوشتگ ھشتاد ءِ دھک ءَ بہ گر داں مروچی ، مبارک کازی ءِ نزیک ء پنجاہ سال ءِ شائری ءِ سپر ءَ آئی ءِ شائری گوں آشوب ، گھگیری ءُ بلوچ ءِ رنگاں بندوکیں شائری یے اَت۔کازی چہ ھما مردمان اَت کہ وت ھم راجی سیاست ءَ گون بیتگ ، جیل ءَ بند بیتگ ، آزار سگ اتگ ئِے ۔ آئی ءِ گوں جھد ءَ ھمگرنچ بیگ ءِ نشانی یے آئی ءِ تنگوئیں بچ ڈاکٹرکمبر کازی اَت کہ آئی ءِ ھم گھگیری ءِ راہ زرتگ اَت ءُ شائری ءِ پڑ ءَ ھم وتی توان چکاس اتگ۔آئی ءَ چہ مبارک کازی ءِ نیمگ ءَ سکین ءُ دلبڈی ءُ ھیلکاری بیتگ۔اے ھم کازی ءِ گھیگیری ءِ تہ ءَ ھوار بیگ ءِ درور اِنت۔
آئی ءَ گْوشتگ مروچی کہ چاگردی رسانک ءِ زمانگ اِنت کہ ما گندگ ءَ ایں بلوچ پہ کازی ءِ بیرانی ءَ پریشان اَنت۔ھما کازی کہ جتا جتائیں کرد ءِ واھند بیتگ ، آ کہ دیم گْوشیں کردے ءِ واھند اَت۔آئی ءَ مدام وتی گپ گوں دل ءَ ءُ دپ ءِ پر ءَ جتگ۔ریا رو کنگ ، دروگ بندگ ءُ پشت گْوشی کنگ چہ کازی ءَ سک سک دور بیتگ اَنت۔آئی ءِ ھمے شری بیتگ اَنت کہ مردماں دوست داشتگ ءُ آ دگہ کار کہ مردماں گْوشتگ کہ ایشی ءَ مدام شراب ءِ بوتلے دست ءَ اِنت ءُ گرد ایت،مروچی اے درسیں چیزاں مردم بے ھیال کنگ ءَ اَنت۔پرچا کہ آئی ءِ تہ ءَ دگہ ھزاراں شری بیتگ کہ اے وڑیں چیز اش اندیم کرتگ اَنت۔
بی این ایم ءِ سرکماش ءَ گوں مبارک کازی ءَ بلوچ راج ءِ مھر ءِ درور ءَ درشانتگ مروچی شما دیستگ کہ پسنی ءِ انجمن تاجران ءَ ، آئی ءِ پہ منگہ ءَ وتی دکان بند کرتگ اَنت ، باید سجھیں بلوچستان ءَ ھمے کار بوتیں۔ درسیں تک ءُ پھنات ءِ مردماں پہ آئی ءِ بیرانی ءَ وتی دلپدردی درشان کرتگ۔آئی ءِ مزن شانیں کرد اَت کہ مروچی آ چوش یات کنگ بیت۔
بلوچ زبان ءِ نامدار ءُ بے دروریں شائر مبارک کازی ءِ سَے پاتیہ ءَ ھزارانی کچ ءَ مردماں پسنی ءَ شُتگ ءُ آئی ءِ مانش چار اِتگ وھدیکہ بلوچستان ءَ ھوار دری ڈیھاں آئی ءِ یات ءَ مراگش برجم دارگ بوگ ءَ انت –
دوشمبے ءِ روچ ءَ بلوچستان ءِ جتا جتائیں ھند ءُ دمگاں شائر، نودربر ءُ ھر تک ءُ پھناتاں سیادی داروکیں مردماں پسنی ءَ اتکگ ءُ واجہ ءِ پُرس سر ءَ دست داشتگ، وھدیکہ پدا رند ءَ مزنیں کچے ءَ مردماں مچی ءِ دروشم ءَ مانشجاہ ءَ شُتگ ءُ آئی ءِ مانش ءِ سر ءَ پُل ریتکگ ءُ دروت ندر کتگ –
چہ کیچ ءَ سربوتگیں ھالانی رِد ءَ تربت شھدربرجاہ ءِ نودربراں دوشمبے ءِ روچ ءَ مبارک کازی ءِ یات ءَ اوگام جتگ، روانک ءَ نودربراں مزنیں کچے ءَ بھر زرتگ ءُ ماسٹر ھم ھوار بوتگ انت –
روانک ءَ بھر زورکیں مردمانی دست ءَ بینر بوتگ انت کہ آیانی سر ءَ مبارک کازی ءِ شئیر نبشتہ بوتگ انت ءُ پہ آئی ءِ دروت ءَ نودربراں وتی ھیال درشان نبشتہ کتگ انت –
نودربراں ھوار پروفیسر ڈاکٹر عبدالصبور ، ڈاکٹر طاہر حکیم ، جمیل احمد بادینی، طارق رحیم ، گلاب مرزا ، سادق سبا ، باہدین احمد ، میر شریف ، میڈم شہناز ، میڈم فیروزہ ءُ ھوار دگہ بازیں مردمے اوگام جنگ ءَ ھوار بوتگ انت –
نودربراں لوٹ کتگ کہ مبارک کازی ءِ نام ءَ شھدربر جاہ ءِ تہ ءَ آئی ءِ یاتگیری چیزے جوڈ کنگ بہ بیت –
دومی نیمگ ءَ نودربر ءُ لبزانکی مردماں شال، ھزدار ءَ ھوار سرجمیں بلوچستان ءَ آئی ءِ یات ءَ چراگ روک کنگ بوتگ ءُ ھلیجی ڈیھاں آئی غائبانہ نماز جنازہ ءِ ھمراھی ءَ آ دروت ندر کتگ –
جتا جتائیں مراگشاں ھواریں مردماں آئی ءِ مرگ پہ بلوچ لبزانک ءُ زبان ءَ بلاھیں وئیلے گوشتگ کہ آئی ءِ وتی جتائیں شائری تہ ءَبلوچ راجی جھد ءُ زمین ءَ گوں مھر یک پدریچ ءَ دومی پدریچ ءَ سرکنگ ءَ وتی کرد پیلو کتگ –
مردماں گوشتگ کہ آئی ءِ بے دروریں شائری جھان ءِ ایردستیں راجانی رھشونی ءِ جوانیں بھرے بنت –
سربوتگیں ھالانی رِد ءَ بلوچستان ءِ دمگ پنجگور ءَ ناشناسیں سلاہ بندیں مردماں پاکستانی پوج ءِ پانگسے ءِ سر ءَ اُرش کتگ ءُ در شتگ انت –
گیشیں ھالانی رِد ءَ ناشناسیں سلاہ بندیً مردماں اے اُرش پنجگور ءِ دمگ رکشان پھل ءَ برجاھیں پاکستانی پوج ءِ پانگس ءِ سر ءَ کتگ، کہ سلاہ بندیں مردماں ٹوھیں سلاھاں گوں اُرش کتگ ءُ اُرش ءَ پاکستانی پوج ءَ جانی ءُ مالی تاوان ءِ گمان کنگ بیت –
اھوالکار ءِ رِد ءَ اُرش ءَ پد پاکستانی پوج ءَ سرجمیں راہ در بستگ انت، بلے تنی وھدی ھچ وڈیں دزگیری ءِ ھال نیست –
زانگ بہ بیت چدوپیسر ءَ پنجگور ءَ ھوار بلوچستان ءِ ایندگہ ھند ءُ دمگاں پاکستانی پوج ءِ سر ءَ بوتگیں اُرشانی زمہ واری گیشتر بلوچ آجوئی لوٹوکیں سلاہ بندیں گلاں منّ اِتگ انت بلے اُرش ءِ زمہ واری ھچ گل ءَ نہ منّ اِتگ، ءُ سرکار ءِ نیمگ ءَ ھم تنی وھدی اُرش ءِ درگت ءَ ھچ گوشگ نہ بوتگ –
سربوتگیں ھالانی رِد ءَ بلوچستان ءِ تیاب دپی دمگ گوادر ءَ پاکستانی پوج ءَ یک مردمے زورانسری آوار جتگ ءُ بیگواہ کتگ، دومی نیمگ ءَ ماں کراچی ءَ زورانسری آوار جنگ بوتگیں تاج محمد سرپرہ ءِ گِس ءِ سر ءَ کبزہ کنگ بوتگ –
گیشیں ھالانی رِد ءَ بلوچستان ءِ تیاب دپی دمگ گوادر ءَ پاکستانی پوج ءَ یک مردمے زورانسری آوار جتگ ءُ بیگواہ کتگ، آوار جنگ بوتگیں مردمے پجار کمالان ء گل محمد ءِ نام ءَ چہ بوتگ –
اھوالکارءِ رِد ءَ اے مرد پاکستانی پوج ءَ یک ستمبر ءَ آوار جتگ کہ ھما انت گار ءُ بیگواہ انت –
دومی نیمگ ءَ چہ کراچی ءَ ھمے ھال آیگ انت کہ زورانسری آوار جنگ بوتگیں باپاری مردم میر تاج محمد سرپرہ ءِ گِس ءِ سر ءَ کبزہ کنگ بوتگ –
تاج محمد سرپرہ ءِ لوگبانک ءَ اے ھبر راست کتگ ءُ چاگردی ترامجاہ ایکس ءَ وتی پوسٹ ءِ تہ ءَ نبشتگ کہ ڈی ایچ اے کراچی فیز ھپت ءَ منی گِس ءِ سر ءَ کبزہ گیریں ٹولی ءَ در کانودی کبزہ کتگ کہ آیاں علی رضا مگسی (زولفقار مگسی ءِ زھگ) ءُ ندیم جلبانی ءِ سروکی ءَ کتگ کہ ھچ وڈا منگ نہ بیت –
آئی ءَ گوشتگ کہ ما چہ سندھ سرکار ءَ لوٹ کن ایں کہ اے درکانودی کبزہ گیری ءَ بہ داریت –
آئی ءَ گوشتگ کہ گس ءِ سر ءَ کبزہ کنوک ءُ مئے مال ءُ مڈیانی سر ءَ کبزہ کنوکاں چہ مارا پھریز کنگ بہ بیت پرچا کہ اے وھدی کبزہ کنوکیں ٹولی مئے گس ءَ ساڑی انت، سندھ ءِ پولیس ھم اشانی گوم ءَ گون انت ءُ مئے پھریز ءِ بدل ءَ کبزہ گیرانی ھمراہ انت ـ من چہ درساں لوٹ کناں کہ منی گوم ءَ بوشتاں ءُ اے کبزہ گیریں ٹولیانی بگیری ءَ توار چست بکناں –
زانگ بہ بیت تاج محمد سرپرہ نوزدہ جولائی سال دوھزار بیست ءَ چہ کراچی ءَ پاکستان ءِ چیریں ادارھانی کارمنداں ھما وھد ءَ آوار جتگ وھدیکہ آ ترکی ءَ روگ ءَ در آیگ ءَ بوتگ –
آئی ءَ گوشتگ کہ سَے سالے ءِ گوزگ ءَ پد ھم آئی ءِ ھچ ھال نیست کہ کجا انت کجام جاورانی تہ ءَ انت –
بلوچستان ءِ دمگ کیچ ءَ ناشناسیں سلاہ بندیں مردماں یک مردمے تیرباران کتگ ءُ کشتگ وھدیکہ شال ءَ مساپرے ءَ رکشہ ڈرائیورے کُشتگ – دومی نیمگ ءَ ڈیرہ بگٹی ءَ تراک ناکیں شوروانی زد ءَ اتکگیں یک مردمے مُرتگ –
تربت ءَ بوتگیں تیرگواری آپسر ءَ بوتگ کُشگ بوتگیں مردمے نام رشید انت کہ کولواہ ءِ دمگ بلور ءِ نندوک انت –
اھوالکار ءِ گوشگ انت کہ اے مرد گوستگیں سوبائی وزیر ظہور بلیدئی ءِ نزیکیں مردمے بوتگ ءُ آئی ءِ کار نشہ ءِ باپاری بوتگ – بلے پدا وئیل ءِ درگت ءَ گیشیں سرپدی نہ رستگ کہ کجام سوب ءَ مرد کشگ بوتگ –
چہ شال ءَ ھمے ھال آیگ انت کہ علمدار دگ ناصرآباد ءِ نزیک ءَ رکشہ ءَ سواریں مساپر ءَ رکشہ ڈرائیور تیرباران کتگ ءُ کتگ ءُ وت وئیل جاہ ءَ تتکگ –
کُشگ بوتگیں مردمے پجار مری آباد ءِ جھمنند چِل سالی حسین ء یعقوب علی ہزارہ ءِ نام ءَ چہ بوتگ –
دومی نیمگ ءَ بلوچستان ءِ دمگ ڈیرہ بگٹی ءَ چیر کتگیں تراکناکیں شوروانی تراک ءَ یک مردمے مرتگ ءُ یکے زدگ بوتگ –
لیویز ءِ رِد ءَ ڈیرہ بگٹی ءِ ھند لوٹی بیھ ءَ پرپٹ ءِ تراکناکیں شوروانی زد ءَ اتکگ ءُ چریشی ءَ پرپٹ ءَ سواریں ساجن ء حسین شمبانی بگٹی ھما دمان ءَ مُرتگ وھدیکہ آئی ءِ ھمراہ سک باز زدگ بوتگ –
دمگی مردمانی رِد ءَ اے مرد ءِ سیادی گوں ریاستی کشندہ ٹولی انت – بلے تنی وھدی اے اُرش ءِ زمہ واری ھچ گل ءَ نہ من اتگ – بلے ریاستی کشندہ ٹولیانی کارمندانی سر ءَ پیش ءَ بوتگیں اُرشانی زمہ واری گیشتر بلوچ آجوئی لوٹوکیں سلاہ بندین گلاں منّ اِتگ انت –
