TBP Balochi

سربوتگیں ھالانی رِد ءَ بلوچستان ءِ بنجاھی شھر شال ءَ سلاہ بندیں مردماں رکشہ ڈرائیور آوار جنی ءَ پد کُشتگ، رکشہ گون وت برتگ، دومی نیمگءَ بلوچستان ءِ تیاب دپی دمگ گوادر ءَ ورنایے ءَوتکشی کتگ –

گیشیں ھالانی رِد ءَ رکشہ ڈرائیور شیر زمان گرگناڑی ءِ جون دشت ءَ دست کپتگ- کھول ءِ رِد ءَ سلاہ بندیں مردماں شیر زمان آوار جتگ ءُ کشتگ، آئی ءِ رکشہ گوں وت برتگ –

مروچی آئی ءِ کھول ءَشیر زمان ءِ جون چہ دشت ءَ دست کپتگ – کھول ءِ مردماں سرکار ءِ نادلگوشی ءُ واکدارانی بگیری ءَ سریاب کسٹم ءَ زھرشانی کنان ءَ دگ بند کرتگ –

دومی نیمگ ءَ بلوچستان ءِ تیاب دپی دمگ گوادر ءَ چہ ھمے ھال آیگ ءَ انت کہ یک ورنایے ءَ وت ءَ پاھو داتگ ءُ کُشتگ –

ھالانی رد ءَ بیران بوتگیں ورنایے پجار زاھد اِنت کہ آئی ءِ اُمر ھبدہ سال اِنت ءُ آ گوادر ءِ ھند کلانچ ءِ نندوک انت –

بیران بوتگیں ورنایے ءِ جون پہ ھژدری چار ءُ ٹپاس کنگ ءَ نادراھجاہ ءَ برگ ءَ بوتگ ءُ پدا رند ءَ کھول ءِ دست ءَ دیگ بوتگ- ورنایے وتکُشی ءِ سوب انگت زانگ نہ بوتگ کہ کجام سوب ءَ آئی ءَ وتکشی کتگ –

زانگ بہ بیت بلوچستان ءَ روچ پہ روچ وتکُشی کنوکانی درچ گیش بوان انت – کہ آیانی تہ ءَ گیشتریں کچ بلوچ ورنایانی انت –

بلوچ رھشون واحد کمبر ءَ وتی درشانے ءَ گْوشتگ کہ چوش بلوچستان ءِ آدگہ دمگاں ڈیرہ بگٹی ءَ ھم پاکستانی لشکر ءِ لشکرکشی برجاہ اِنت۔مردم پہ زور بیگواہ کنگ ءُ کُشگ بیگ ءَ اَنت۔

آئی ءَ گْوشتگ کہ چونائی ءَ چہ ھپتاد سالاں گیش اِنت کہ بلوچ سرڈگار پاکستان ءَ دستیگ کرتگ،بلوچ ءِ سر ءَ رستری زوراکی برجاہ اَنت۔ھزارانی کچ ءَ بلوچ بیگواہ ءُ شھید کنگ بیتگ۔

آئی ءَ گْوشتگ کہ زورگریں پاکستانی ریاست ءَ انیگیں وھد ءَ بلوچستان ءِ ھمک دمگاں وتی زوراکی گیش کرتگ اَنت۔ تچکی ءَ بلوچ ءِ چکچینی ءَ کنگ ءَ اِنت ءُ گیشتِر راجکار، نودربر ءُ بلوچ جنیناں ھوار راجی جھدکارانی کھول زوراکیانی آماچ کنگ بیگ ءَ اَنت۔اے میان ءَ بلوچ راجی سروکاں ھم گوں ھم سنتی ءَ پاکستانی ریاست ءِ زوراکیانی دیم پہ دیمی کنگ ءَ وتی کِرد پیلو کنگی اِنت۔ اگاں نہ گڑا گْوستانک مارا پھل نہ کنت۔

آئی ءَ گْوشتگ کہ جھان ءَ وتی چم نز کرتگ اَنت ءُ بلوچ ءِ چکچینی ءَ نیم چمی ءَ چارگ ءَ اِنت۔ باید اِنت کہ بلوچ راج ءَ ھوار راجی سروک گوں یک دومی ءَ ھمکوپگ بہ بہ اَنت۔ راجی آجوئی ءُ زوراکانی دیم ءِ دارگ ءَ ھم سنتی ءَ ابید دگہ راہ نیست۔

بلوچ رھشون ءَ وتی درشان ءِ گُڈی ءَ گوں جھان ءُ اقوامتحدہ لوٹ کرتگ کہ پاکستانی لشکر ءِ زوراکیانی گِر ءُ دار ءَ ترندیں گامگیجے بہ زور اَنت ءُ ڈیرہ بگٹی ءَ ھوار سرجمیں بلوچستان ءَ پہ پاکستانی زورگریں لشکر ءِ گِر ءُ دار ءَ وتی کِرد ءَ پیلو بہ کن اَنت ءُ بلوچ راج ءَ چہ زورگریں پاکستانی ریاست ءِ زوراکیاں بہ پھریز اَنت.

بلوچستان لبریشن پرنٹ ءِ جارکش میجر گھرام ءَ وتی شنگ کُتگیں درشانے تہءَ تربُت ءَ پاکستانی زِرلشکر ءِ سرءَ بیتگیں اُرش ءِ زمہ واری زُرتگ ءُ گُشتگ کہ مئے سرمچاراں زی 19 ستمبر ءَ شپ ءِ ھشت ءُ دہ ءَ کیچ ءِ بنجاھی شھر تربت ءَ زورگریں پاکستانی زِرلشکر ءِ پھازداری پانگس ءِ سر ءَ اُرش کُرتگ۔

جارکش ءَ گُشتگ کہ سرمچاراں ءَ چہ نزیک ءَ زِرلشکر ءِ بنجل ءِ گوریچانی نیمگ ءِ پانگس گوں ٹوھیں ءُ وتکاریں سلاھاں نشانگ کُرتگ، دہ دمان ءِ برجاھیں میڑ ءَ زِرلشکر ءِ یک کارمندے مُرتگ ءُ یکے ٹپی بیتگ ءُ پانگس ءَ تاوان بیتگ۔ آئی ءَ گُشتگ کہ اُرش ءَ پد داں دیر ءَ پروش وارتگیں لشکر ءَ لس آبادی ءِ سر ءَ تیرگْواری کُرتگ۔

میجر گھرام ءَ گُشتگ کہ دژمنیں پاکستانی زِرلشکر ءَ بلوچانی زمین دستیگ کُرتگ اَنت ءُ بلاھیں بُنجلے جوڑ کُرتگ ءُ ھمک روچ گیشتِر زمیناں دستیگ کنگ ءُ گوں تیزی ءَ بنجل ءَ مستر کنگ ءَ اِنت، زمینانی دستیگ کنگ ءَ لھتیں وتگڑیں راجدوست ءُ ھندی باڑھی تچکی ءَ پاکستانی لشکر ءِ ھمراھداری ءَ کنگ ءَ اَنت۔

چہ زِرلشکر ءِ ھمے بُنجل ءَ مکران ءَ ایوک ءَ کیچ ءُ گوادر ءَ لشکرکشی چہ ھمد ءَ کمانڈ کنگ بنت، جنگی بالیگ ءُ ڈرون ٹیکنالوجی ھم چہ ھمے بنجل ءَ آپریٹ کنگ بنت،ایشی ءَ ابید ھمے بنجل ءَ ھپتاد ءَ گیش کوٹیانی آزارجاھے زمین ءِ چیر ءَ ھست۔

بلوچستان لبریشن پرنٹ ءِ جارکش میجر گھرام ءَ گُڈسرءَ گُشتگ کہ بی ایل ایپ اے اُرش ءِ زمہ واری ءَ منّ ایت ءُ داں بلوچستان ءِ آجوئی ءَ زورگریں پاکستانی ریاست ءِ دُرسیں سیتانی سر ءَ بی ایل ایپ ءِ اُرش گوں تْرندے ءَ برجاہ بنت۔

شال ءَ دو ٹولیانی جنگ ءُ چوپ ءِ آسر ءَ کارچ جن کائی ءَ دو مردم کُشگ بیتگ اَنت-

گیشیں اھوالانی رد ءَ شال ءِ دمگ جوائنٹ دگ ءَ دو ٹولیانی میان ءَ جنگ ءُ چوپ بیتگ، کارچ جن کائی ءَ دو مردم کُشگ بیتگ اَنت-

پولیس ءِ رد ءَ وئیل ءِ ھال ءِ سر بوگ ءَ پولیس ءُ ریسکیو ءِ ٹیم وئیل جاہ ءَ سر بیتگ اَنت ءُ کمکی کارانی ھواری ءَ لاشانی پجار ءِ ھاتر ءَ لاش ھسپتال ءَ برگ بیتگ اَنت-

پولیس ءِ رد ءَ جرمکار وئیل ءِ کنگ ءَ پد وئیل جاہ ءَ تتکگ اَنت، ءُ آیانی شوھاز برجاہ اِنت-

سر بیتگیں اھوالانی رد ءَ روکپتی بلوچستان ءِ بنجاھی شھر زاھدان ءَ گوستگیں شپ ءَ یک تراکے ءَ کساس یک مردمے بیران بیتگ-

گیشیں اھوالانی رد ءَ زاھدان ءَ گوستگیں شپ ءَ نودربرانی بنجل فاطمہ الزھرا زاھدان ءِ نیمگ ءَ ترندیں تراکے ءَ توار کتگ بیتگ-

تراک ءَ دو کلومیٹر ءَ ماڑیانی شیشگ جنزیتگ اَنت ـ تراک ءَ پد پھزداراں زاھدان ءِ راہ ءُ در بند کتگ ءُ پٹ ءُ پول کتگ-

دومی نیمگ ءَ سرکاری رسانکدر ءِ رد ءَ تراک گیس ءِ لیکج ءِ سبب ءَ پیش اتکگ کہ چریشی ءَ چہ یک مردمے بیران بیتگ-

سرکاری رسانکدر ءَ گپ کنان ءَ آس کشیں سروک ابراھیم شھریاری ءَ گوشتگ تراک گیس ءِ لیکج ءِ سبب ءَ پیش اتکگ بیتگ بیتگ-

آئی ءَ گوشتگ اے وئیل زمینانی گر ءُ دار کنوکیں ادارہ ءِ یک گسے ءَ امام سجاد ءِ ھند ءَ پیش اتکگ بیتگ-

بلوچستان ءِ بنجاھی شھر شال ءِ پریس کلب ءِ دیم ءَ برجاھیں زھرشانی بنجل ءَ مروچی ایڈوکیٹ حسن مینگل ءُ وائس فار بلوچ مسنگ پرسنز ءِ کمک سرکماش ماما قدیر بلوچ ءَ وتی تامری درشان ءِ تہ ءَ گوشتگ کہ بلوچستان ءِ مزن آمدگس ءَ وتی دو جج منٹانی تہ ءَ ماما قدیر ءِ نام ای سی ایل ءِ تہ ءَ در کنگ ءِ ھکم داتگ، پدا رند ءَ ماما پاسپورٹ اتھارٹی گور ءَ شتگ گڈا آیاں گوشتگ کہ پاکستان نگران وزیر سرفراز بگٹی ءِ گوشگ پد ءَ تئی نام دوبر ای سی ایل ءَ مان کنگ بوتگ –

آئی ءَ گوشتگ کہ ماما منی موکل انت ءَ آئی ءِ گوشگ پد ءَ سرفراز بگٹی ءِ بگیری ءَ کیس جما کتگ ءُ چیزے روچ ءَ پد آئی ءِ سر ءَ نوٹس روت –

آئی ءَ گوشتگ کہ بلوچستان ءِ مزن آمدگس ءُ پاسٹورٹ اتھارٹے پاکستان ءِ ادارہ انت گڈا ریاست گوشگ انت آ کانود ءُ رھبندانی رِد ءَ وتی شھریانی گوم ءَ جوانی ءَ پیش کئیت ءُ آرٹیکل چار، نُھ، دھ ءُ پنجاہ ءِ تہ ءَ انسانی ھکانی اے شک نبشتہ انت ءُ مزن آمدگس ءَ ھمے شکانی رِد ءَ ماما ءِ نام چہ آئی سی ایل ءَ در کنگ ءِ ھکم داتگ بلے یکبرے پدا آمدگس ءِ رھبندانی لگتمالی کنگ بوتگ ءُ آئی نام دوبر مان کنگ بوتگ –

آئی ءَ گوشتگ کہ ریاست وتی ادارھاں نہ منیت ھمے پدردی یے –

ھمے وھد ءَ ماما قدیر بلوچ ءَ گوشتگ کہ منی نام یکبرے پدا ای سی ایل ءَ مان کنگ بوتگ ءُ مناں ھال سر بوتگ کہ اے کار نگران ءِ مزن وزیر ءُ وزیر داخلہ ءِ ھکم ءَ کنگ بوتگ –

آئی ءَ گوشتگ کہ اے اولی رند نہ انت چدوپیسر ھم اے ادارھاں باز رند ءَ اے کار کتگ –

بلوچ یکجھتی کمیٹی ءِ جارکش ءَ رسانکدراں وتی شنگ کرتگین درشانے ءِ تہ ءَ گوشتگ کہ منگچر ءَ زورانسری آوار جنگ بوتگیں اعجاز بلوچ ءِ سی ٹی ڈی ءِ دست ءَ ماں ھزدار کھٹان ءَ دروگیں میڑ ءَ کُوش ھما شکاں راست کنت کہ سی ٹی ڈی ھمے واست ءَ دیم ءَ آرتگ کہ پوج ءِ بدل ءَ سی ٹی ڈی ءِ نام ءَ لس بلوچاں بُکش ایت ءُ آیاں زورانسری آوار بہ جنت ءُ بیگواہ بہ کنت – اعجاز بلوچ ءَھوار بازیں مردمے سی ٹی ڈی ءَدروگیں میڑ ءَ جتگ انت کہ ایانی زورانسری آوار جنی ءِ چم دیستیں شاھد است انت بلے اے کشت ءُ کوش یک شوربندی ءِ رد ءَ کنگ بوگ ءَ انت کہ پدردی انت – اعجاز بلوچ بیست ءُ چار اگست ءَ چہ جند ءِ گس ءَ شپ ءِ ادار دو ءَ بیڑ برگ ءُ زورانسری آوار جنگ بوتگ کہ آئی ءِ زورانسری آوار جنی ءِ ھبر رسانک ءَ ھم شنگ بوتگ انت بلے آئی سر ءَ بے بنیں بھتام جنگ ءُ کشگ بوتگ –

جارکش ءَ گوشتگ کہ یک نیمگے سی ٹی ڈی بلوچستان ءَ اعجاز وڈیں ورنایاں دروگیں میڑاں نشانگ کنگ ءَ انت تو دومی نیمگ ءَ بلوچ چاگرد ءِ تہ ءَ بلوچ زالبولانی گوم ءَ کم شرپی ھم سنگینین جرمے تہ ءَ کئیت نوں ھمے چاگرد ءَ درکانودی دلپدردیں وئیل دیما آیگ ءَ انت کہ گمان ھم کنگ نہ بیت – کہ ھشت سالی حمیرہ بے دردی آوار جنگ ، اے پُل دروشمیں زھگے گوم ءَ بدکاری ءُ آئی کوش زوراکی ءِ گڈی سیمسر انت کہ ھچ وڈا منگ نہ بنت – مارا ترس انت کہ بلوچستان جاور ھما نیمگ ءَ برگ بوگ ءَ انت کہ پدا آ جاورانی تہ ءَ دریگ بوت ھم نہ کنت – بلوچستان ءِ تہ نوں کسانیں زھگ ھم پھریز نہ انت، کشندہ ٹولی مھار گٹ ءَ دیگ ءُ یل کنگ بوتگ وھدیکی ریاست ءَ سی ٹی ڈی پوج جوڈ کتگ ءُ زورانسری آوار جنگ بوتگیں مردمانی دروگیں میڑاں کوش ءِ زمہ داری دیگ بوتگ – چوش کہ چشیں جاورانی پیداک کنگ ءَ لھتے تاکت چیزے وھد ءَ پائدگ چست کن انت بلے مدامی مردم اے زوراکیاں ھچ وڈ اوپار کت نہ کناں –

جارکش ءَ دلگوش گوں بلوچ راج ءَ کتگ ءُ گوشتگ کہ بلوچاں پگر کنگی انت کہ نوں پہ یک راجے ءَ پہ ما چی پشت کپتگ کہ مروچی حمیرہ وڈیں زھگ پھریز نہ انت وھدیکہ استان ءِ زمہ واری انت مھلوک ءِ پھریز ءَ بہ کنت بلے آئی ءَ سی ٹی ڈی وڈیں پوج ءِ جوڈ کتگ پہ بلوچ ءِ چکچینی ءِ تہ ءَ گیشی ارگ ءَ – وھد ءُ جاورانی لوٹ ھمیش انت کہ بلوچ وتی ھک ءُ اگبالانی ھاتر ےَ سیاسی جھد ءِ بھر جوڈ بہ بنت ءُ اے ناھکیانی ءِ ھلاس کنگ ءَ جھد بہ کن انت پرچاکہ یک راجے تاں کدین ءَ اے زوراکیاں اوپار کنت آیانی ھلاس کنگ المی انت –

سے شمبے ءِ روچ ءَ بلوچستان ءِ بُنجاھی شھر شال ءَ بلوچ یکجھتی. کمیٹی ءِ برجم داشتگیں شائر آشوب مبارک قاضی ءِ یات ءَ روانک کشگ بیتگ ءُ غائبانہ نماز جنازہ ھم وانینگ بیتگ-

گیشیں ھالانی رِد ءَ بلوچ یکجھتی کمیٹی ءِ برجم داشتگیں گلزمین واجہ مبارک قاضی ءِ یات ءَ رونک کشگ بیتگ، چریشی ءَ مزنیں کچے ءَ جنک ءُ بچکیں نودربراں سول سوسائٹی ءَ بھر زرتگ-

روانک ءِ بندات بلوچستان یونیورسٹی ءَ چہ کنگ بیتگ ءُ بی ایم سی ءَ چہ آسر بیتگ-

روانک ءَ بھرزُرتگیں مردماں مبارک قاضی ءِ اکس چست کتگ ءُ آئی ءِ ستاشانی ءُ دروت ندر کتگ ءُ گْوشتگ کہ آئی ءَ شائری ءَ چہ راج ءِ دلانی تہ ءَ ڈیھ ءِ مھر تالان کتگ-

روانک ءِ بھرزرتگیں مردماں گْوشتگ کہ قاضی ءِ زندگی ءِ سکیانی دیمپان کنان ءَ وتی راہ ءُ راھبنداں چہ دزکش نہ بیتگ ءُ وتی شائری ءَ چہ راج ءِ دلاں ابدمان اِنت-

آیاں گوشتگ کہ آئی ءَ بلوچ راج ءَ وتی شائری ءِ سر ءَ یک گرانبھائیں سوگاتے داتگ-

اشی ءَ پد بی ایم سی ءَ سر بیتگ ءُ شائر آشوب مبارک قاضی ءِ غائبانہ نماز جنازہ ھم وانینگ بیتگ-

سرجمیں مکران ءَ چم دور نادراھی سک باز تالان بوتگ، تنی وھدی سدانی کچ ءَ مردم اے بادراھی ءِ آماچ بوتگ انت –

مکران ءِ سَے دمگ پنجگور، تربت ءُ گوادر ءِ ھند ءُ دمگاں چم دور گیشی ءِ گوم ءَ شنگ ءُ تالان بوگ ءَ انت –

دمگی مردمانی رِد ءَ گوادر ءِ مچی ءَ اتکگیں مردمانی تہ ءَ باز مردم چم دور ءِ نادراھی وائروس بوتگ –

دمگی مردمانی گوشگ انت کہ سرکاری نادراہ جاھاں آسراتی ھم نیست انت –

سربوتگیں ھالانی رِد ءَ بلوچستان ءِ دمگ کیچ ءِ بنجاھی شھر تربت ءَ ناشناسیں سلاہ بندیں مردماں پاکستان ءِ نیوی بنجل ءِ سر ءَ اُرش کتگ –

اھوالکار ءِ رِد ءَ سلاہ بندیں مردماں نیوی بنجل ءِ سر ءَ اُرش کتگ ءُ در شتگ انت وھدیکہ اُرش ءِ وھد ءَ ھردو نیمگاں سک باز تیرگواری کنگ بوتگ –

ھالانی رِد ءَ اُرش ءَ پوج ءَ جانی تاوان ءِ گمان انت بلے پدا ھم پوج ءِ نیمگ ءَ اے درگت ءَ ھچ گوشگ بوگ ءَ نہ انت –

زانگ بہ بیت تربت ءَ گوار بلوچستان ءِ ایندگہ ھند ءُ دمگاں پاکستانی پوج ءِ سر ءَ بوتگیں اُرشانی زمہ واری گیشتر بلوچ آجوئی لوٹوکیں سلاہ بندیں گلاں منّ اِتگ انت بلے اے اُرش ءِ زمہ واری تنی وھدی ھچ گل ءَ نہ منّ اِتگ –