TBP Balochi

چہ ڈیرہ بگٹی ءَ دگہ دو مردم پاکستانی پوج ءَ آوار جتگ ءُ بیگواہ کتگ اَنت وھدے کہ چہ تربت ءَ ھال اِنت گاڑی ءَ سوار سلاہ بندیں مردماں ورنایے آوار جتگ ءُ وتی ھمراھی ءَ برتگ گوں ءُ مند ءَ دو بیگواہ بیتگیں برات یل کنگ بیتگ اَنت-

چہ ڈیرہ بگٹی ءَ بیگواہ کنگ بیتگیں پت چُک ھوار اَنت، آیانی پجّار امام بخش ء پیر بخش بگٹی ءُ آئی ءِ چُک امام دین بگٹی نام ءَ چہ بیتگ اَنت-

اِھوالکارانی رِد ءَ اے مردم تھسیل سوئی ءَ چہ طوطا کالونی ءَ پوج دست ءَ بیگواہ کنگ بیتگ اَنت-

زانگ بہ بیت کہ ڈیرہ بگٹی ءَ لشکر کشی گوستگیں سیزدہ روچاں چہ یکشلہ برجاہ ءَ اِنت، لشکر کشی ءِ میان ءَ تنی وھدے پوج ءَ بیست ءُ شش ءَ گیش مردم زورانسری آوار جنی ءِ نشانگ کنگ بیتگ اَنت-

کیچ ءِ بُنجاھی شھر چہ تربت ءَ پشمبے ءِ روچ ءَ چہ آسکانی بازار آبسر ءَ میٹرک نودربر رازق بلوچ ء خالد بلوچ سرف گاڑی ءَ سوار سلاہ بندیں ناشناسیں مردماں وتی ھمراھی ءَ برتگ گوں-

ھمے وڑ گوستگیں روچ ءَ مند ھائی وانگجاہ چہ سورو ءَ بیگواھیں دوئیں برات آجو بیتگ اَنت- اے درگت ءَ کھول مردماں راست کُتگ ءُ گوشتگ کہ گوستگیں روچ ءَ چہ مند سورو ھائی وانگجاہ ءَ اے ٹی ایف پولیس ءِ دست ءَ بیگواھیں بیتگیں دوئیں برات عبدالحلیم ء محمد ءُ نور بخش ء محمد آجو بیتگ ءُ وتی لوگ ءَ سر بیتگ اَنت-

زورانسری آوار جنگ بوتگیں وانگجاہ ءِ ماسٹر ءُ بلوچی زبان ءِ شائر ءُ ازمکار رفیق اومان ءِ زھگ ءُ وارساں آئی ءِ آوار جنی ءَ نُھ سال سرجم بوگ ءَ تربت پریس کلب ءَ اھوالکاراں گوں تران کنان ءَ یکرندے پدا گوں سرکار، پوجی سروک، پاکستان ءِ چیف جسٹس ءُ چہ سیاسی پاٹیاں رفیق اومان ءِ یل کنگ ءں ھاتر ءَ کمک ءِ لوٹ کتگ –

اھوالکاراں گوں تران کنان ءَ رفیق اومان ءِ زھگ ءُ آئی ءِ وارساں گوشتگ کہ بیست ءُ یک ستمبر سال دوھزار چاردہ ءَ آ سرکاری کارے ءِ ھاتر ءَ محکمہ ایجوکیشن ءِ کارگس ءَ شُتگ ءُ کار سرجم کتگ ءُ واتر آیگ ءَ بوتگ کہ نیم راہ ءَ ناشناسیں مردماں ماں ڈنک ءِ نزیک ءَ آوار جتگ ءُ بیگواہ کتگ کہ پدا ھما انت مئے جھد کوشستاں ابید ھم یل کنگ نہ بوتگ –

آیانی گوشگ ات کہ رفیق اومان بل نگور ءَ سرکاری وانگجاھے ہیڈ ماسٹر بوتگ وھدیکہ اشی ءَ ھوار ا یک گشندھے بوتگ اے دوئیں کاراں ابید ناکہ آ ھچبر گس ءَ در اتکگ ءُ ناکہ دگہ گیرکانودی کاراں گوں آئی ءَ کار بوتگ، اگاں آوار جنوکانی نزیک اے دوئیں کاراں ابید دگہ درکانودی کاراں آئی دست مان بوتگ گڈا مارا سرپد کنگ بہ بیت تانکہ ما ھم بہ زانیں کہ ھئو آ کتکارے بلے اگاں آوار جنوکانی گور ءَ ھچ سبوت نیست گڈا پہ رب ءَ بہ چارے مئے اے نھیں سالانی ازیتاں بہ ترس ات آئی ءَ یل بہ کن ات تانکہ آئی یل کنگ ءِ وشی ءَ ما اے نھیں سالانی درداں بیھال بہ کنیں –

آیانی گوشگ ات رفیق اومان یل کنائینگ ءِ ھاتر ءَ وتی وس واس ءَ ھر ھما در ٹک اِتگ انت کہ مارا آئی ءِ یلا بوگ ءِ امیت بوتگ، ما گوں واکدارانی اپسراں دچار کپتگیں، وزیر ءُ گزیراں گند نند کتگ ھتاکہ انساپ رسگ ءِ گڈی دروازگ آمیدگس ءَ ھم وتی ارز سرکت بلے بدکسمتی ءَ اے ملک ءِ آمدگسی ترام ھم پہ بھا انت کہ اودا ھک رسگ ءِ امیت بس امیتے بلے ھئو ما لاچار ءُ بے وس انت چہ ھمے آمدگس ءَ انساپ ءِ لوٹ لاچار انت پرچاکہ ملکانی تہ ءَ آمدگس ھک دیگ ءِ چیدگ انت –

آیاں چہ پاکستان ءِ مزن وزیر، بلوچستان ءِ سروزیر ، پاکستان ءِ چیف جسٹس، پوجی سروک ءُ ملک ءِ درسیں سیاسی پاٹیاں چہ لوٹ کتگ کہ رفیق اومان ءِ یل کنائینگ ءَ مئے کمک ءَ بہ کن انت –

چہ شارجہ ءَ پاکستان ءِ چیریں ادارھانی کارمندانی دست ءَ زورانسری آوار جنگ بوتگیں راشد حسین بلوچ ءِ گھار فریدہ بلوچ ءَ وتی درشانے ءِ تہ ءَ گوشتگ کہ بلوچستان یک “برمودا ٹرائنگل ” ءِ جوڈ بوتگ کہ اودے جھمنند ھمک روچ بیگواہ بوگ ءَ انت ءُ جھان اشی ءَ چہ رب ءِ نیمگ ءَ آورتگینے پھمگ ءُ دلگوش دیگ ءَ نہ انت، جھان ءِ تہ ءَ ایمنی ءُ مردمگری منوگر ھم ھچ گوشگ ءَ نہ انت بلے ما وتی دوستیگیں مردماں بیھال کُت نہ کنیں، کہ آ کجام جاور ءُ ازیتانی تہ ءَ بنت –

آئی ءَ دیمتر ءَ گوشتگ کہ راشد حسین ءِ زورانسری آوار جنی ءَ پنچ سال سرجم بوگ ءَ انت اے پنچیں سال ما چوں ءُ گوں کجام درداں گوازینتگ انت کزا یکے بہ پہمیت بلے ھئو وتی دوستیگیں مردمانی یل کنائینگے ھاتر ءَ گڈی ساہ ءَ تاں وتی جھد ءَ برجاہ داریں ءُ ما امیت ءَ یل نہ دئیں اے جنگ ءِ تہ ءَ بلوچ ءِ ھمراہ بس بلوچ انت دگہ کس –

آئی ءَ گوشتگ کہ راشد حسین ءِ وش ءُ سلامتی یل کنائینگ ءِ ھاتر ءَ ما بیست ءُ چار ستمبر ءَ ایکس ءِ تہ ءَ کمپئن ءِ کنگ ءَ انت ءُ ما چہ درسیں انسان دوست ءُ انسانی ھکانی گلاں گوں لوٹ کنیں کہ منی برات یل کنائینگ ءَ وتی کرد ءَ پیلو بہ کن انت –

سندھ ءِ مزن شھر کراچی ءِ مزن شھدربرجاہ ءَ بلوچی زبان ءِ شائر مبارک کازی ءِ یات ءَ چراگ روک کنگ بوتگ –

بلوچ نودربرانی نیمگ ءَ گوستگیں روچاں نمیران بوتگیں بلوچی زبان ءِ نامداریں شائر “شائر ء آشوب” مبارک کازی ءِ یات ءَ ماں کراچی مزن شھدربرجاہ ءَ جنکانی ھاسٹل ءَ آئی ءِ اکس ایر کنگ بوتگ انت ءُ چراگ روک کنگ بوتگ ءُ آ دروت ندر کنگ بوتگ –

کراچی مزن شھدربرجاہ ءِ جنکانی ھاسٹل ءَ اے اولی رند انت کہ اے دابیں یاتگیری مراگش ءِ برجم دارگ بوتگ ءُ نودربراں بلوچی زبان ءِ نامداریں شائر دروت ندر کتگ –

زانگ بہ بیت بلوچی زبان ءِ نامداریں آشوبی ءُ مھری شائر نمیرانیں مبارک کازی شانزدہ ستمبر ءَ دوھزار بیست ءُ سَے ءَ اے جھان یل داتگ ءُ نمیران بوتگ – مبارک کازی ءِ یات ءَ بلوچستان ءَ ھوار دری ڈیھاں مراگشانی ایر کنگ ءِ درچ برجاہ انت ءُ پہ آئی ءَ بلوچ نودربر گل آزات ءَ شائر ء آشوب ءِ لقب پر کتگ –

بلوچستان ءِ دمگ پنجگور ءَ گوستگیں شپ ءَ ناشناسیں مردماں دگ جوڑ کنوکیں کمپنی ءِ مشینری مانداشتگ انت –

گیشیں ھالانی رِد ءَ وشبود ءِ ھند زنڈیں داز ءَ گوستگیں شپ ءَ ناشناسیں مردماں دگ جوڑ کنوکیں مشینری ءُ ایندگہ ازباب مانداشتگ ءُ در شتگ انت –

پولیس ءِ رِد ءَ ناشناسیں مردماں کہ آ کساس پنچ مردم بوتگ انت آیاں دوشی شپ اتکگ ءُ وشبود ءِ ھند زنڈیں داز ءَ دگ جوڑ کنوکیں کمپنی ءِ مشینری مانداشتگ انت –

ھال سربوگ ءَ پولیس ءَ وت ءَ ھما جاہ ءَ سر کتگ ءُ آس توسینتگ ءُ ناشناسیں مردمانی شوھاز بندات کتگ بلے تنی وھدی ناشناسیں مردم دزگیر کنگ نہ بوتگ انت ءُ ناکہ آیانی درگت ءَ گیشیں سرپدی رس اتگ –

گوریچانی امریکہ ءِ ڈیھ کینیڈا ءَ ناشناسیں مردماں چہ بھارت ءَ وارنٹ ایں سکھے کُشتگ ات –

گیشیں ھالانی رِد ءَ کینیڈا ءِ شھر ونیپیگ ءَ ناشناسیں مردمانی تیرگواری چہ بھارت ءَ پنجاپ ءِ جتائی ءِ لوٹوک ءُ بھارت ءِ سرکار ءِ وارنٹ ایں سکھ رھشون سکھ دیول سنگھ (سکھا دونیکے) کُشگ بوتگ –

در ملکی رسانکدرانی رِد ءَ سکھدول سنگھ ءِ نام بھارت ءَ وارنٹیں مردمانی لڑ ھوار بوتگ، بھارت ءِ ایجنسی این آئی اے ءَ ھم ایشی ءِ بگیری ءَ وارنٹ شنگ کتگ –

دومی نیمگ ءَ بھارتی رسانکدر ءَ دول سنگھ ءِ درگت ءَ گوشتگ کہ بھارت ءِ وارنٹیں گینگ وار ءِ باسک مرچی کینیڈا ءِ شھر ونیپنگ ءَ کشگ بوتگ –

درملکی رسانکدرانی رِد ءَ سکھدول سنگھ ءِ سیادی چہ بھارت ءِ دمگ پنجاپ ءَ بوتگ، کہ خالصتان تحریک ءِ منوگرے بوتگ، سکھدول سنگھ چہ سال دوھزار ھبدہ ءَ کینیڈہ اتکگ ءُ نشتگ –

اے وئیل انو ھنچیں وھدے ءَ دیم ءَ اتکگ وھدیکہ ماں کینیڈہ ءَ کشگ بوتگیں ھردیپ سنگھ نجر کوش ءِ درگت ءَ بھارت ءَ کینیڈا ءِ میان ءَ سپارتی گر ءُ چیل برجاہ انت –

چد ءُ پیسر کینیڈین سروزیر جسٹن ٹروڈو ءِ نیمگ ءَ درشان دیگ بوتگ اتگ کہ ماں کینیڈا ءَ کشگ بوتگیں سکھ رھشون ھردیپ سنگھ نجر ءِ کوش ءَ بھارت ءِ چیریں ادارہ (را )ءِ دست مان انت –

اے درشان ءَ پد کینیڈا ءِ بھارتی ایجنسی (را )ءِ سروک چہ ملک ءَ در کنگ بوتگ وھدیکہ بھارت ءَ کینیڈا ءِ بھتام رد کتگ انت ءُ پسوئی ءَ سنیٹر کینیڈین سفارت کار ملک ءَ در آیگ ءِ ھکم داتگ –

کینیڈا ءَ سکھ رھشون ھردیپ سنگھ نجر ءِ کوش ءَ پد بھارت ءُ کینیڈا ءِ میان ءَ پیداک بوتگیں گر ءُ چیلاں پد بھارت ءَ وتی دمگی مردمانی ھاتر ءَ ایڈوائزی شنگ کتگ کہ کینیڈا ءَ آ رد کتگ –

دومی نیمگ ءَ گوستگیں روچ ءَ کینیڈا ءَ سکھ ءُ مسلم رھشوناں چہ سرکار ءَ لوٹ کتگ ءُ گوشتگ کہ آ مئے مردمانی سر ءَ اے وڑیں وئیلانی گر ءُ دار ءَ گامگیج بہ زوریت –

زانگ بہ بیت ھردیپ سنگھ ھژدہ جون سال دوھزار ءُ بیست ءُ سَے ءَ ماں کینیڈا ءَ گوردوارے ءَ ڈن کشگ بوتگ –

ڈیرہ بگٹی ءَ لشکر کشی گوستگیں سیزدہ روچاں یکشلہ برجاہ ءَ اِنت، وھدے کہ نوکیں ھالانی رِد ءَ پاکستانی پوج ءَ اوچ ءِ نزیک ءَ دمگاں مرچی لشکر کشی ءِ میان ءَ دو براتاں ھوار سے مردم آوار جتگ ءُ بیگواہ کتگ اَنت-

بیگواہ کنگ بیتگیں مردمانی پجّار علی محمد ء دل مراد بگٹی، نور محمد ء دل مراد بگٹی ءُ یار خان ء شاہ علی بگٹی ءِ نام ءَ چہ بیتگ اَنت-

دومی نیمگ ءَ اوچ ءِ دمگ چہ لاغر داوان ءَ دمگی مردمانی سے ٹریکٹر ھم پوج ءَ برتگ اَنت-

اِھوالکارانی گْوشگ اِنت کہ ٹریکٹر واھننداں اے ھم گْوشتگ کہ پوج ءَ توژگ پُجارینگ ءِ ھاتر ءَ تیل ءُ ھرچ ھم وت بکن اِت-

دومی نیمگ ءَ سوئی ءِ نزیک ءَ سوناری مٹ ءِ دمگ ءَ یک وانگجاھے بُنجلے ءَ مَٹ کنگ ءِ ھال اِنت-

دمگی اِھوالکارانی رِد ءَ بالگرد ھم یکشلہ درینجن ، گنڈوئی ءُ آسرئی ءِ دمگاں گشت کنگ ءَ اَنت-

بلوچستان ءِ دمگ چہ مستونگ ءُ لھڑی ءَ پاکستانی پوج ءَ دو ورناہ آوار جنگ ءَ پد بیگواہ کتگ اَنت-

گیشیں ھالانی رِد ءَ گوستگیں بیگاہ ءِ ساھت پنچ ءَ پوج ءَ ابدالطیف ء حاجی بابو بنگلزئی آوار جتگ ءُ ناشناسیں جاھے ءَ برتگ- اے ورناہ رکشہ ڈرائیور گوشگ بوگ ءَ اِنت-

ھمے وڑ سبی ءِ دمگ چہ لھڑی ءَ ھال اِنت کہ شوکت ء ساتھی سی ٹی ڈی ءَ دزگیر کتگ ءُ ناشناسیں جاھے ءَ برتگ-

کھول رِد ءَ بیگواہ کنگ بیتگیں دوستناکانی درگت ءَ ھچ وڑیں سرپدی نیست – آیاں تُرس اِنت کہ آ دگہ بیگواھیں مردمانی وڑ ءَ دروگیں میرے آیانی دوستناکاں کُش اَنت-

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل آشوب ءَ شنگ کرتگیں درشان ءِ تہ ءَ رشید ء آدم ءُ اشرف ء گاجیان ءِ کوش زمہ واری منّ اِتگ ءُ گوشتگ کہ اے ھردو مردم ریاستی چاریگ بوتگ انت –

جارکش میجر گوھرام بلوچ ءِ رِد ءَ بلوچستان لبریشن پرنٹ ءِ سرمچاراں ھژدہ ستمبر ءَ آپسر تربت ءَ یک انٹلی جنس بیسڈ کارروائی یے ءَ زورگریں پوج ءِ یک چاریگ ءُ منشیات ءِ باپاری سیٹ عبدالرشید ء آدم جھمنند بلور کولواه تیرگْواری کُرتگ ءُ کُشتگ، گْوستگیں باز سال اِنت کہ پاکستانی پوج ءِ گْوشگ ءِ پَد ءَ تربت ءُ کولواه ءِ بازیں لشکرکشیاں پاکستانی پوج ءِ کمکارے ءِ کِرد ءَ پیلو کنگ ءَ بوتگ-

جارکش ءِ رِد ءَ ریاست ءِ چاریگ ءُ منشیات ءِ باپاری سیٹ عبدالرشید دوازدہ مئی ءَ گل ءِ ھمبل (میجر آسمی وپا ءُ ھمبلانی)سر ءَ ڈرون اُرش ءُ شھید کنائینگ ءِ مستریں کارست بوتگ- آئی جت کولواه ءِ جھمنند سیٹ شاکر ءِ کمک ءَ گل ءِ مڈیانی تہ ءَ ٹریکنگ ڈیوائس ئِے مان کُرتگ ءُ پاکستانی پوج ءَ آیانی نشون کنگ ءَ کمک کُرتگ – اے دُرسیں منّانک گل ءِ کِر ءَ پھریز اَنت ءُ وھدے کہ المی بہ بیت دُرسیں گْواچن راج ءِ دیم ءَ ایر کنگ بنت ءُ آیاں سرپد کن ایں –

میجر ءِ رِد ءَ ریاست ءِ چاریگ سیٹ عبدالرشید پہ وتی منشیات ءِ باپاری ءَ پاکستانی پوج ءِ کمک کنگ ءِ اوست ءَ بلوچ راجی سیتانی بگیری ءَ دُژمن ءِ کمکار جوڑ بوتگ ءُ بلوچ راجی زْرمبشت ءِ چاریگی ءَ کنگ ءَ بوتگ –

بی ایل ایف ءِ جارکش میجر گوھرام ءَ وتی درشان ءِ تہ ءَ دیمتر ءَ گوشتگ کہ سینزدہ ستمبر یک دگہ انٹلی جنس بیسڈ کارروائی ءَ بی ایل ایپ ءِ سرمچاراں پاکستانی پوج ءِ دگہ یک چاریگے اشرف ء گاجیان جھمنند ٹوبہ سکھن دزگیر کُرتگ ،دزگیری ءِ میان ءَ پٹ ءُ پول ءِ وھد ءَ راجی میاربار اشرف ء گاجیان منّ اِتگ کہ آئی گچک، سولیر ءُ راگے ءَ پاکستانی پوج ءِ لشکرکشیاں تچکی ءَ ھوار بوتگ ءُ ھمے جاھاں باز رند ءَ آئی ءَ گل ءِ ھمبلانی راھانی نشون داتگ ءُ راھانی بندگ ءَ ھم گون بوتگ- راجی میار بار ءِ وتی میارانی منّگ ءَ پد گل ءِ آمیدگس ءَ مرگ ءِ سزا داتگ ءُ کُشتگ –

جارکش ءِ رِد ءَ بلوچستان لبریشن فرنٹ چہ بلوچ راج ءَ دزبندی کنت کہ آ چہ ریاست ءِ چوشیں کمکارانی پندلانی بھر جوڑ بیگ ءَ وت ءَ پھریز بہ کن اَنت کہ مردمگری ءِ نام ءِ سر ءَ پہ کمو زرانی پُژدر ءَ ریاست ءِ لوٹ ءُ واھگانی سرجم کنگ ءَ کودکیں مردماں کارمرد کن اَنت –

ما ریاست ءِ ھما دُرسیں چاریگ ءُ کُشندہ ٹولی ءِ کارمنداں کڈن کن ایں کہ آ پہ ریاست ءِ گْوشگ ءِ پد ءَ بلوچ راجی زْرمبشت ءِ بگیری ءَ کہ ھما پندلانی بھر اَنت گل ءِ کِر ءَ آیانی دُرسیں کارپد ءُ کارستانیانی سرپدی ھست اَنت – بلوچستان لبریشن فرنٹ وھد وھد ءِ سر ءَ چوشیں مردمانی چیست ءُ ایرانی سر ءَ سَر بیتگیں ھالانی رِد ءَ آیانی بگیری ءَ گل ءِ راھبند ءِ رد ءَ نامینگ بنت ءُ پد ءَ آیانی بگیری ءَ ھر پیم کاروائی کنگ ءِ جُھد کنگ بیت –

میجر ءِ رِد ءَ بلوچستان لبریشن فرنٹ اے دوئیں راجی میاربارانی کوش ءِ زمہ واری ءَ منّ ایت ءُ بلوچ راج، چاگرد ءُ آجوئی زْرمبشت ءِ بگیری ءَ ریاست ءِ کار کنوکیں دُرسیں چاریگ ءُ چاریگاں کڈن کن ایں کہ سلکاری مہ کن اَنت – بی ایل ایپ بلوچ راجی سیتانی پھریزگ ءَ چوشیں مردمانی گِر ءُ دار کنگ ءَ برجاہ دار ایت ءُ آیاں پہ آیانی میارباریانی سر ءَ تُرندیں سزا دنت –