TBP Balochi

تیابدپی شھر گوادر ءَ پاکستانی پوج ءَ یک مردمے دزگیر کنگ ءَ پد بیگواہ کتگ-

بیگواہ کنگ بیتگیں مردم گوادر ءِ ھند پسنی ءَ آوار جنگ بیتگ کہ آئی ءِ پجار شھزاد ء اصغر ءِ نام ءَ زانگ بیتگ-

دمگی مردمانی رد ءَ بیگواہ کنگ بیتگیں مردم پسنی ءَ وارڈ نمبر ھپت ءِ جھمنند اِنت کہ گوستگیں دو روچ پیش 21 ستمبر ءَ مستانی ریک بازار ءَ چہ وانگ جاہ ءَ سھب ءِ ساھت یازدہ ءَ پوج ءَ دزگیر کتگ ءُ ناشناسیں جاھاں برتگ-

بیگواہ کنگ بیتگیں مردم گوستگیں سَے سالاں چہ ریک بازار ءَ وانگ جاہ ءِ چپراسی بیتگ کہ گوستگیں دو روچ پیش پوج ءَ دزگیر کتگ ءُ برتگ-

شائر ءِ آشوب: مبارک کازی

ٹی بی پی شونگال

بلوچی زبان ءِ نامداریں ءُ بے دروریں شائر مبارک کازی بلوچستان ءِ دمگ تُربت ءَ 16 ستمبر ءَ بیران بیتگ۔ کازی ءِ کَل ءُ کسارت آئی ءِ بنکی ھلک ءَ کنگ بیتگ۔

مبارک کازی راجدوستیں شائر یے ئِے بستار ءَ جتائیں جاھے ئے واھند اَت۔ آ 24 دسمبر 1956ء ءَ مکران ءِ پسنی ھنکین ءَ کھدہ امان اللہ ءِ لوگ ءَ ودی بیتگ۔

مبارک کازی بلوچی زبان ءِ تھنائیں شائر اِنت کہ آئی ءَ وتی زند ءِ تہ ءَ لس مھلوک ءِ نیمگ ءَ چہ بے کساس مھر ءُ شرپ رس اتگ، یک نیمگے کہ آئی ءِ اِشکی شئراں بے کساس دوست دارگ بیتگ اَنت دومی نیمگ ءَ آئی ءِ گھگیریں شئر ھم چاریں نیمگ ءَ گوشدارگ بیتگ اَنت ھاسیں پئیماں آئی ءِ گھگیریں شئر ھمک سَپِر ءَ گُشگ بیتگ اَنت۔

مبارک کازی ءِ شئر بلوچستان ءِ اَکس اَنت۔ کازی ءِ شئرانی تہ ءَ بلوچستان ءِ ابرمی براھداری، مھر ءُ دوستی، کماشانی چیدگ، راجی سرگُشتن، پہ ایردستاں درد، بلوچ ڈیھ ءِ آجوئی ءِ پرچار ءُ گھگیری ءِ درس بے کساس رس ایت۔

کازی ءِ شائری بلوچ لبزانک ءُ بلوچ گھگیریں جد ءُ جھد ءِ سر ءَ جھلانکیں نکش یل کُتگ، آئی ءَ وتی شائری بودناکی بلوچ مھلوک ءِ گھگیریں ءُ مکسد ءِ ھاتر ءَ ندر کُتگ بیتگ۔ کازی ءِ شئر تھنا ازم ءِ درشانی ءِ دروشم نہ اِنت بلکیں چاگردی بدلی ءِ تاکتوریں سرچمگ اَنت۔ آئی ءِ شائری ءَ بلوچ راجی آجوئی ءِ ھاتر ءَ جنگ کنوکانی دلانی تہ ءَ آس روک کُتگ ءُ گھگیری ءِ درس داتگ۔

کازی ءَ گوں دلیری ءَ جنگ زدگیں چاگرد ءِ تہ ءَ برجاھیں اوشت ءِ پروشوکیں لچہ نبشتگ کہ اِیشانی مُل آئی ءَ زندان ءَ بندیگ بیتگ ءُ داتگ۔

مبارک کازی ءَ وتی زند ءِ تہ ءَ ورنائیں بچ کمبر ءِ نمیرانی ءِ گم سگگ کپتگ، کہ اے پہ آئی ءَ چہ کیامت ءَ کمتر نہ بیتگ بلے کازی وتی ارادگانی تہ ءَ لرزگ نئیتکگ ءُ گھگیری ءِ راہ کپگ ءَ نیشتگ۔

مبارک کازی ءِ شائری ءَ بلوچ چاگرد ءِ ھمک تَک سانمند کُتگ ءُ آئی ءِ شائری راجی واھگانی جارکشی کنان اِنت۔ آئی ءِ شائری ءَ بلوچ وتن ءِ آجوئی ءِ پولکارانی ھاتر ءَ آدرش ءِ کار کُتگ ءُ بلوچ راجی جُنز ءَ مھکمیں بندوکی ءُ وتی شئرانی وسیلہ ءَ گوں آجوئی ءِ پرچار ءَ آ گھگیری ءِ بیرکدار جوڑ کُتگ۔

مبارک کازی ءِ لبزانکی بودناکیاں ابید، آئی ءِ شئر پہ یک جنگولے ءَ گھگیری ءِ درس اَنت، اِیشانی تہ ءَ تمردی ءِ رژنائی سرپوش اَنت ءُ ایردستانی ھاتر ءَ تاکت ءِ وسیلہ اَنت۔ مبارک کازی ءِ وراست، آجوئی ءِ جد ءُ جھد ءِ درس اِنت ءُ بلوچ راجدپتر ءِ تاکانی تہ ءَ آئی شائری (مشعل راہ) بلوکیں کِشک اِنت، کہ اے آیوکیں پدریچاں سانمند کنان بیت ءُ آئی ءِ شئر آجوئی ءُ گھگیری ءِ بیرکدار بنت اِنت۔

روکپتی بلوچستان ءِ بنجاھی شھر زاھدان ءَ ایرانی پولیس ءَ تیرگواری کنان ءَ پِت ءُ چُک زدگ ءُ کشتگ اَنت-

گیشیں اھوالانی رد ءَ پولیس ءَ تیرگواری کتگ ءُ چُک کُشتگ ءُ پت زدگ کتگ –

بیران بیتگیں مردم ءِ پجار ھبدہ سالی ئیں مھمد دار ناروئی ء مھمد رضا دار ناروئی ءِ نام ءَ زانگ بیتگ ءُ زدگ بیتگین ءِ پجار مھمد رضا دار ناروئی ء عبداللہ ءِ نام ءَ زانگ بیتگ-

اھوالانی رد ءَ مھمد رضا ءِ سرین ءَ سَے تیر لگ اتگ ءُ چریشی ءَ پد آ خانم الا نبیا زاھدان ءِ نادراہ جاہ ءَ برگ بیتگ کہ آ آئی سی یو روم ءَ تھتیگ کنگ بیتگ –

بلوچستان ءِ جتاجتائیں دمگ ڈیرہ بگٹی ، آواران ءُ کیچ شش مردم زورانسری آوار جنی ءِ نشانگ کنگ بیتگ اَنت

گیشیں ھالانی رِد ءَ مروچی ءِ بیگاہ ءِ وھد ءَ ڈیرہ بگٹی ءِ دمگ سوئی ءَ پاکستانی پوج ءَ یک ڈاکٹرے زورانسری آوار جتگ ءُ بیگواہ کتگ-

آوار جنگ بیتگیں مردم ءِ پجّار ڈاکٹر جامک ء وشو بگٹی نام ءَ اِنت ھما وھد ءَ پوج ءَ آوار جتگ وھدے کہ وتی کلینک ءَ ساڑی بیتگ، ھمے وڑ ڈیرہ بگٹی ءِ تھسیل سوئی ءِ ھند چہ ظفر کالونی ءَ لیاقت ء پارو بگٹی آوار جنگ ءَ پد بیگواہ کتگ-

ھمے وڑ مروچی آدینگ روچ ءَ آواران ءِ دمگ گیشکور ءِ ھند سنڈم ءَ پاکستانی پوج ءَ بیڑبرتگ عظیم ء داد محمد، حضور بخش ء میار ءُ سجاد ء گنج بخش آوار جتگ ءَ بیگواہ کتگ اَنت-

دومی نیمگ ءَ کیچ ءِ بُنجاھی شھر تربت ءَ دو روچ ءَ ساری بزانکہ بیست ستمبر ءَ پاکستانی پوج ءَ یک ورنایے زورانسری آوار جنی ءِ نشانک کتگ کہ آئی ءِ پجّار سمیع اللہ ء محمد طاھر جھمنند میری کلات-

زانگ بہ بیت ڈیرہ بگٹی ءِ جتاجتائیں دمگاں دو ھپتگ ءَ گیش اِنت کہ پاکستانی پوج ءِ زوراکی برجاہ ءَ اِنت ءُ ھمے لشکر کشی ءِ میان ءَ دو درزن ءَ گیش مردم زورانسری آوار جنی ءِ نشانگ کنگ بیتگ اَنت-

زورانسری آوار جنی ءِ نشانگ کنگ بیتگیں مردمانی ءَ تہ کماش ورناہ ھوار اَنت-

بلوچ لبریشن آرمی ءِ سرمچاراں آواران ءُ کیچ ءَ دو اُرشاں زورگریں پاکستانی پوج نشانگ کتگ کہ آیانی یک کارندھے مرتگ ءُ چار ٹپی کتگ اَنت-

بی ایل اے ءِ سرمچاراں مروچی کساس ساتھ شش ءَ آواران ءِ دمگ جھاؤ، بدرنگ ءَ زورگریں پاکستانی پوج ءِ یک بُنجلے نشانگ کتگ، سرمچاراں اسنائپر ءَ چہ یک کارندھے کُشگ ءَ پد راکٹ ءُ دگہ سلاھاں چہ اُرش کتگ- اُرش ءَ کم چہ کم دگہ دو کارندہ ٹپی بیتگ اَنت-

جارکش جیئند بلوچ ءَ دیمتر ءَ گْوشتگ کہ گوستگیں روچ ءَ مگرب وھد ءَ بلوچ لبریشن آرمی ءِ سرمچاراں یک دگہ اُرشے ءَ کیچ ءِ دمگ گورکوپ ءَ زورگریں پاکستانی پوج ءِ بُنجل نشانگ کتگ-

سرمچاراں دُژمنیں پوج ءِ بُنجل سر ءَ گرنیڈ لانچر ءَ چہ بازیں گولھے آس داتگ ءُ مزنیں سلاھاں چہ نشانگ کتگ چریشی ءِ آسر ءَ کم چہ کم دو دُژمنیں پوج ءِ کارندہ ٹپی بیتگ اَنت وھدے کہ دُژمن ءَ مالی تاوان چست کنگ کپتگ-

بلوچ لبریشن آرمی اے دوئیں اُرشانی زمہ واری ءَ منّ اِیت-

روکپتی بلوچستان ءِ بنجاھی شھر زاھدان (دزاپ) ءَ آدینگ ءِ نماز ءَ پد زھرشانی کنگ بیتگ-

زھرشانی کنوکاں روانک ءِ دروشم ءَ مھلوک مُچ بیتگ اَنت ءُ اود ءَ زھرشانی کنوکانی دست ءَ پلے کارڈ دست ءَ بیتگ اَنت –

زھرشانی کنوکاں مولانا نقشبندی ءِ ھک ءَ اوگام جتگ ءُ ایشی ءِ ھواری ءَ اود ءَ زھرشانی کنوکاں ایرانی لشکر ءِ دست ءَ کُشگ بیتگیں مردمانی انساپ ءِ ھاتر ءَ اوگام جنگ بیتگ اَنت-

زھرشانی شھر ءِ دگانی سر ءَ تران بیتگ ءُ خامنہ ای سرکار ءِ ھلاپ ءَ زھرشانی کنگ بیتگ اَنت ءُ اود ءَ آیاں گوشتگ ’شما مئے برات کُشتگ انت ما شمارا کُش ایں‘ –

آیاں گوشتگ کہ مئے برات ءُ سیاد ءُ وارس شما مُپت ءِ بے گناہ ءَ کُشتگ انت ایشانی ھساب دیگی اِنت ءُ سرکار مارا انساپ بہ دنت ءُ کشوکاں بہ گر ات ءُ سزا بہ دنت-

آدینگ ءِ نماز ءَ پد انٹرنیٹ ھم بند کنگ بیتگ اَنت ءُ پد ءَ نیم ادار ءَ پد پچ کنگ بیتگ اَنت ءُ راہ ءُ دگانی سر ءَ سیکورٹی ترند کنگ بیتگ اَنت-

زانگ بہ بیت گوستگیں سال ءِ سِی ستمبر ءَ ایرانی لشکر ءَ زاھدان ءِ مکی مسیت ءِ کَش ءُ گوراں زھرشانی کنوکانی سر ءَ تیرگواری کتگ ات کہ اود ءَ بازیں ھسابے ءَ مردم بیران ءُ زدگ بیتگ ات اَنت-

آ روچ ءَ پد ھمک آدینگ ءِ روچ ءَ سِی ستمبر ءَ جمعہ خونین ءِ نام ءَ یات کنگ ءَ اَنت-

بلوچستان ءِ دمگ چہ مستونگ ءَ پاکستانی پوج ءَ یک مردمے آوار جنگ ءَ پد بیگواہ کنگ بیتگ-

بیگواہ بیتگیں ورنا ئے پجّار نودربر ملک جنید ء بابو عرب جھمنند روینی پڑنگ آباد ءِ نام ءَ چہ بیتگ-

اے ورناہ پاکستانی پوج ءَ گوستگیں روچ ءَ بیگاہ ءِ وھد ءَ پڑنگ آباد بائی پاس نزیک ءَ رئیسانی پمپ ءَ چہ آوار جتگ ءُ چریشی ءَ پد آ دیم ءَ آرگ نہ بیتگ-

بلوچستان ءِ بنجاھی شھر شال ءَ ناشناسیں مردماں پولیس ءِ گاڑی نشانگ کتگ-

پولیس ءِ گوشگ اِنت شال ءِ کوچگی دمگ کچلاک ءَ گشت جنوکیں پولیس ءِ گاڑی ناشناسیں مردماں تیرگواری ءُ پد ءَ دزبمباں گوں اُرش کتگ-

پولیس ءِ رد ءَ اُرشانی تیرگواری ءَ پولیس ءِ یک کارندھے زدگ بیتگ کہ سول ھسپتال ءَ برگ بیتگ-

وئیل ءَ پد پولیس ءُ کمکی باسک وئیل جاہ ءَ سر بیتگ اَنت – پولیس ءِ نیمگ ءَ وئیل ءِ پٹ ءُ پول بوگ ءَ اِنت-

دومی نیمگ ءَ تحریک تالبان ءِ جارکش مھمد خراسانی ءَ اے اُرش ءِ زمہ واری من اتگ ءُ گوشتگ کہ گوستگیں شپ ءَ تحریک تالبان پاکستان ءِ مجاھدیناں پولیس ءِ گاڑی ءِ سر ءَ دزبمبے چگل داتگ ءُ پد ءَ پستول ءِ گون ءَ تیرگواری کتگ ءُ یک کارندھے کُشتگ ءُ دو زدگ کتگ انت-

روکپتی بلوچستان ءِ دمگ جاشک ءَ ناشناسیں مردماں ماھان کمپنی ءِ مشینری ساز ءُ سامان سوتکگ اَنت-

گیشیں اھوالانی رد ءَ جاشک ءَ دگ جوڑ کنوکیں ماھان کمپنی ءِ بلڈوزر ءُ گاڑی ءُ دگہ ساز ءُ سامان سوتکگ اَنت-

گاڑی جاشک ءِ ھند جگین ءَ ناشناسیں مردماں سپاہ ءَ بندوکیں کمپنی ماھان ءِ ساز ءُ سامان مانداشتگ انت-

اھوالانی رد ءَ ھمے کمپنی ءَ لس مردمانی بازیں زمینانی سر ءَ زورگری کتگ ءُ اود ءَ مھلوک ءَ ھم زھرشانی کتگ بیتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں گوستگیں روچ ءَ پنجگور ءَ دگ ءِ جوڑ کنوکیں یک شرکتے ءِ مشینری مانداشتگ انت-

جارکش ءَ گْوشتگ کہ بی ایل اے ءِ سرمچاراں میونسپل کمیٹی وشبود ءِ دمگ زنڈیں داز ءَ دگ جوڑ کنوکیں شرکت ءِ دو لوڈرز ءَ ھوار دگہ مشینری مانداشتگ ءُ ناکارہ کتگ اَنت-

جارکش ءَ گْوشتگ کہ بلوچ لبریشن آرمی اے اُرش ءِ زمہ واری ءَ منّ اِیت- بلوچستان ءِ وتواجھی ءَ تاں زورگریں پاکستانی پوج ءُ آئی ءِ ھمکارانی سر ءَ مئے اُرش برجاہ بنت-