TBP Balochi

بلوچستان ءِ دمگ بارکھان ءَ ھن ندی ءِ نزیک ءَ یک بمب تراکے ءَ دو مردم بیران بیتگ اَنت ھمے وڑ ءَ بلیدہ ءَ یک بمب تراکے ءَ دو مردم زدگ بیتگ –

سَے شمبے ءِ روچ ءَ لیویز ءِ واکدارانی راست کنان ءَ گوشتگ کہ بارکھان ءَ یک بمب تراکے بیتگ – ھن ندی ءِ نزیک ءَ بیوکیں بمب تراک ءُ دو مردم بیران بیتگ اَنت-

ریسکیو ءِ واکداراں سانمندیں مردن نادراہ جاہ ءَ سر کتگ انت ءُ ھمے وڑ پولیس ءُ سکیورٹی ٹیم ءَ جاہ انگیر کتگ –

دومی نیمگ ءَ چہ کیچ ءَ اھوال انت کہ بلیدہ کوشک ءَ بمب ءِ ترکگ ءَ دو مردم زدگ بیتگ اَنت-

تربت پولیس ءِ رد ءَ بلیدہ ءِ دمگ کوشک ءَ بمب ءِ ترکگ ءَ دو مردم زدگ بیتگ اَنت، زدگ بیتگیں مردمانی پجار حلیم ء کریم جان ءُ طارق ء یار مھمد جھمنند کوشک بلیدہ ءِ ناماں زانگ بیتگ اَنت –

زدگ بیتگیں مردم نادراہ جاہ ءَ سر کنگ بیتگ اَنت ءُ اود ءُ یکے ءِ جاور ناگیگی ءِ دیمپان اَنت ءُ دومی ءِ جاور گھتر اَنت-

دو سال ءَ پیش ناپجار گوشگ ءُ کل ءُ کسارت کنگ بیتگیں لاش ءِ پجار بیگواھیں ورنا ءِ نام ءَ زانگ بیتگ – کھول ءَ لاش ءِ پجار کتگ ءُ کل ءُ کسارت بنکی ھنکین ءَ کنگ بیت اِنت-

لاش ءِ پجار جنور دوھزار ءُ بیست ءُ یک ءَ ھزدار ءِ دمگ چہ زھری ءَ بیگواہ بیتگیں ناصر جان قمبرانی ءِ نام ءَ زانگ بیتگ –

دمگی مردمانی رد ءَ ات ورنا یک دروگیں دیم پہ دیمی جنگے ءِ نام ءَ کُشگ بیتگ، چریشی ءَ پد آئی ءِ لاش سول ھسپتال شال ءَ آرگ بیتگ-

لاش ءِ ناپجاری ءِ سبب ءَ آ ناپجار گوشگ ءُ شال ءَ ھواریں دمگ مستونگ ءِ ھند دشت تیرہ میل ءِ ادیرہ جاہ ءَ زمین ءِ باھوٹ کنگ بیتگ-

دمگی مردمانی رد ءَ ورنا ءِ کھول ءَ ھال ءِ رسگ ءَ آیاں مانش کونچتگ ءُ آئی ءِ لاش کش اتگ ءُ بنکی ھنکین زھری ءَ برگ بیتگ ءُ آئی ءِ کل ءُ کسارت ھمود ءَ بیت اِنت –

کاونٹر ٹیررازم ڈیپارٹمنٹ ءَ سی اگست دوھزار ءُ بیست ءُ یک ءَ ڈی سی ھزدار ءُ ڈی سی آواران ءَ یک نمدی یے روان داتگ کہ ناصر فاروق ء غلام فاروق جھمنند صادق آباد زھری جنگ بیتگ – سی ٹی ڈی ءَ کُشتگیں ورنا وتی نمدی ءِ توک ءَ ناشرے گوشتگ –

ھمے وڑ ھمے نمدی ءِ توک ءَ دگہ سَے مردم غلام جان ء باران جھمنند بائی پاس شال، عبدالقیوم ء زھری خان جھمنند زھر ھزدار، کمال خان ء باھوٹ جھمنند چکی آواران کُشگ ءِ گپ ھم نبشتگ کتگ بیتگ-

ھمے نمدی ءَ نبشتگ کنگ بیتگ اے مردم ناپجار گوشتگ ءُ ایدھی ءِ دست ءَ کل ءُ کسارات کنگ بیتگ اَنت-

بلے اے وئیل ءَ کُشگ بیتگیں مردمانی درگت ءَ دگہ گپ دیم ءَ نیتکگ اَنت-

ٹی بی پی ءِ یکجاہ کتگیں اھوالانی رد ءَ پنچ ستمبر دوھزار ءُ بیست ءُ یک ءَ دشت تیرہ میل ءِ ادیرہ جاہ ءَ سَے مردمانی لاش ناپجاری دوروشم ءَ کل کنگ بیتگ اَنت ھمے وڑ ھمے روچ ءَ سیزدہ مردمانی لاشانی ھال دیم ءَ اتکگ بیتگ اَنت-

بلوچستان ءِ دمگ ھزدار ءَ بیگواھیں مردم ءِ یل کنگ ءِ ھاتر ءَ شال کراچی ءِ شھدگ دَہ اداراں چہ بند اِنت، بازیں کچے ءَ گاڑیانی دراجیں لین لگ اتگ اَنت-

ھزدار ءِ ھند چہ وڈھ ءَ عبدالوحید ء عبدالحمید نامیں مردمے ءِ بیگواھی ءِ زھرشانی کنوکاں شال ءُ کراچی ءِ شھدگ بند کتگ –

چہ گوستگیں شپ ءَ بندی ءِ سبب ءَ بازیں کچے ءَ گاڑی مھتل اَنت ءُ گاڑیانی لین لگ اتگ ءُ بازیں کچے ءَ مساپر ھم ھمے میان ءَ مھتلی ءِ آماچ اَنت-

زھرشانی کنوکانی لوٹ اِنت کہ بیگواھیں مردم یل کنگ بہ بیت، داں انگت ءَ زھرشانی کنوکانی گپ ءُ تران ءَ سرکاری واکدار نیتکگ اَنت-

ایئرکنیکٹیویٹی ءِ نیاد ءَ سی ای او علی رجب ءَ گوشتگ کہ چین ءِ وزیٹرز ڈیھ ءِ میان اُستمانی تر ءُ تابی ءِ ھند ءَ وتی نگاھاں کنگ ءِ کمک ءَ وتی جوانیں کرد ءَ پیلو کنت اِنت-

عرب نیوز ءِ رد ےَ ریاض ءُ بیجنگ دمگ ءَ نوک ردودم زرتگیں نھادجاھ ءُ دنیا ءِ دسمی مستریں زرکاری ءِ میان ءَ برزی رھوتداری ءِ راھانی گیش ءُ گیوار کنگ ءِ جھد ترندتر کنگ بیتگ اَنت-

علی رجب ءَ گوشتگ کہ اے سی پی سعودی عرب ءَ یک نامی ئیں تر ءُ تاب جاھے ءِ نام ءَ جوڑ کنگ ےَ اسٹیک ھولڈر ایکو سسٹم ھوارینگ بنت اِنت – راستی ایش اِنت چینی وزیٹرز ایشی ءِ سر ءَ جزم اِنت وتی رھبندانی سر ءَ جوانیں کرد پیلو کنت-

ریاض ءَ دور روچاں عرب چین بزنس کانفرنس ءَ گوات بازی باپاری مھلوک ءُ زرکاراں تر ءُ تاب ءَ دیمروئی ءِ دیم ءَ جنزءن ءُ مھکمیں رھوتداری ءِ ھاتر ءَ وتی وتی لیکھ درشان کتگ اَنت-

ایئرکنیکٹیویٹی ءِ نیاد ءَ سی ای او ءَ گوشتگ کہ اے گپ ءَ ستکی کن آں مئے کسٹمر سروس ءُ اپریشنل ءِ چن ءُ لانچ ءَ چینی وزیٹرز دیم ءَ سرجم ءَ آیگ ءُ ایئرکنیکٹیویٹی نیاد ءَ چین ءُ ڈیھ ءِ میان ءَ کجام ھم اڑ ءُ جیڑہ ءَ سپر کنگ ءِ سنچ ءَ دار ایت –

سعودی عرب ءِ ٹریول ءِ ءُ تر ءُ تاب کنوکانی گیشتر رھشون اسٹیک ھولڈرز ءِ وڑیں اے سی پی ءِ وڑیں ڈیھ ایئرکنیکٹیویٹی ءِ ناوشیں جاھ ءِ مٹ کنگ ءَ پرکار اَنت-

گوستگیں سال ءَ بیست ءُ سَے نوکیں روٹساں سعودی عرب ءُ سَے مزنیں جاہ ھوارینتگ اَنت چریشی ءِ سبب ءَ نشستانی گنجائشاں ھپت لَک ءَ گیش بیتگ اَنت-

سعودی عرب ءَ ایئرکنیکٹیویٹی ءِ گیش کنگ ءِ واستا سرکاری ادارھانی گون ءِ ھواری ءَ انٹرنیشنل ادارھانی گون ءَ ھم ھمراھداری ءِ بازیں مسام بیتگ اَنت –

یک سرکاری پریس ریلیز ءِ رد ءَ اے پی سی ءِ رد ءَ دوھزار ءُ بیست ءُ سَے ھبدہ روٹس ھوار کنگ ءِ ارادگ ءَ دار ایت ءُ دیمروئی ءِ مارکیٹاں نشستانی گنجائشاں گیش کنگ ھپت لک ءُ سی ھزار ءَ داں ارادگ دار ایت اِنت –

ماما قدیر بلوچ ءَ جار پرینتگ کہ بلوچستان ءَ زورانسری آوار جنیانی بگیری ءَ تاں جنیوا ءَ پیادگ ءَ پند جنیں –

وائس فار بلوچ مسنگ پرسنز ءِ کمک سرکماش ماما قدیر بلوچ ءَ وتی شنگ کرتگیں تامری درشانے ءِ تہ ءَ گوشتگ کہ بلوچستان ءَبازیں زورانسری آوار جنیانی بگیری، ءُ بیگواھیں مردمانی یل کنائینگے ھاتر ءَ زورانسری آوار جنگ بوتگیں مردمانی کھولانی ھمراھی ءَ اقوام متحدہ ہیڈکوارٹر ءَ تاں پیادگ ءَ پند ءَ رویں –

ماما قدیر بلوچ ءَ گوشتگ کہ اے دراجیں پند بلوچستان ءَ بگر تاں یورپی ڈیھ سویزرلینڈ ءَ کنگ بیت کہ ھمودا جنیوا ءَ اقوام متحدہ ءِ کارگس ءِ دیم ءَ زھرشانی کن ایں –

ماما قدیر بلوچ ءَ دیمتر ءَ گوشتگ کہ آئی ءَ پانزدہ سال انت زھرشانی بنجل جتگ ءُ پُرایمنیں زھرشانی کنگ ءَ انت اے میان ءَ ناکہ سرکار ءُ ناکہ پاکستانی ادارھاں آئی ءِ گپ گوشداشتگ ھمے ھاتر مارا وتی پریات گون انت میان استمانی ادارھانی گور ءَ رؤگ ءَ انت تانکہ بلوچستان ءَ برجاھیں زوراکی دارگ بہ بیت انت –

آئی ءَ گوشتگ کہ آ چداں چہ ایران، ترکی پدا یورپ ءَ رؤ انت ءُ جنیوا ءَ سربنت ءُ وتی زھرشانی ءَ نبشتہ کنائیناں – اے میان ءَ زورانسری آوار جنگ بوتگیں مردمانی کھول ھم آئی ءِ ھمراہ بنت –

ماما قدیر بلوچ ءَ گوشتگ کہ اے درگت ءَ آ میان استمانی ادارھاں گوں ھال اھوال کنگ ءَ انت ءُ ماں زورانسری آوار جنگ بوتگیں مردمانی کھولاں گوں دزبندی کنیں کہ اے کار ءَ ھوار بہ بنت ءُ زھرشانی ءِ ھمراہ داری ءَ بہ کن انت –

روکپتی بلوچستان ءِ تیابدپی شھر چھبار ءَ ناشناسیں سلاہ بندیں مردمانی تیرگواری ءَ یک مردمے بیران –

گیشیں اھوالانی رد ءَ چھبار ءِ ھند عورکی ءَ ناشناسیں سلاہ بندیں مردماں تیرگواری کنان ءَ یک مردمے کُشتگ-

بیران بیتگیں مردم ءِ پجار اسلم جدگال ء داد مھمد جھمنند عورکی چھبار ءِ نام ءَ زانگ بیتگ-

اھوالانی رد ءَ اسلم وتی گس ءَ روگ ءَ بیتگ کہ ناشناسیں گاڑی سواریں مردماں تیرانی نشانگ کتگ ءُ کُشتگ-

زانگ بہ بیت روکپتی بلوچستان ءَ ھمے سال ءَ تنی وھدی جتا جتائیں تیرگواری وئیلانی آسر ءَ دو سد ءُ چل ءُ سَے مردم کُشگ بیتگ اَنت-