TBP Balochi

بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی پنچ ھزار ءُ یکسد ءُ ھشتاد ءُ یک روچ سرجم بوتگ انت، مروچی بی این پی ءِ دمگی سرکماش سی سی باسک گلام نبی مری، آغا صبور ءُ دگہ مردماں بنجل ءَ اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ انسانی ھک ءُ مڈیانی پھریزگ ءِ ھاتر ءَ چست بوتگیں توار ءِ ایرموش کنگ ءِ ھاتر ءَ زوراکیانی یک درچے بندات کنگ بوتگ کہ گوں ترندی ءَ برجاہ اِنت، چہ اے زوراکیاں یزید ھم لج کنت بلے ریاست پاکستان چہ وتی زوراکیاں میان استمانی راھبنداں لگتمال کنگ ءَ انت چوش کہ ریاست ءِ پاکستان ھچ وڈیں انسانی ھکانی پاسداری ءَ کنگ ءَ نہ انت –

آئی ءَ گوشتگ کہ چہ ستمبر ءِ بندات ءَ پاکستانی پوج پنجگور، ھاران ءُ تربت ءِ ھواری ءَ ڈیرہ بگٹی ءِ جتا جتائیں ھند ءُ دمگاں لشکرکشی کنگ ءَ اِنت – بلوچانی سر ءَ بمب ءُ تیرگواری زمینی ارشانی سوب ءَ چُک زالبولاں ھوار بازیں مردمے شھید کنگ بوتگ اَنت، پنجاہ ءَ گیش مردم زورانسری آوار جنگ ءُ بیگواہ کنگ بوتگ انت مردمانی گسانی دیم ءَ کشار ماندارگ بوتگ انت –

آئی ءَ گوشتگ کہ درکانودی آوار جنی، زوریں بیگواھی ءُ ژانگولیں جونانی چگل دیگ ءِ درچ یکشل ءَ گیشی ءَ گوں برجاہ انت – وھدیکہ بلوچستان ءِ جتا جتائیں ھند ءُ دمگاں بلوچ چکچینی ءُ ناشرکاری گوں ترندی ءَ برجاہ اَنت –

نوشکی ءَ بلوچستان یونیورسٹی ءِ نودربر سمیع مینگل ءِ کوش ءَ نام گپت کنگ بیتگیں جرمکار نوشکی پولیس ءِ گوستگیں کارمند مھمد یوسف شال ءَ پولیس ءِ تیرگواری ءِ میان ءَ دزگیر کتگ –

جرمکار کوش ءَ سَے سال پد کمبرانی دگ ءَ چہ شال ءَ دزگیر بیتگ- پولیس ءَ جرمکار ءِ گور ءَ سلاہ ھم دستیگ کتگ انت ءُ جرمکار کمبرانی دگ ءَ باڑوئی لوگے ءَ نندوک بیتگ-

زانگ بہ بیت سَے سال ءَ پیسر نوشکی کازی آباد ءَ جرمکار ءَ نودربر سمیع مینگل نشہ ھلاپ ءَ زھرشانی ءِ زرمبشت ءِ ھلائینگ ءَ جند ءِ لوگ ءَ مات ءِ دیم ءَ تیرگواری کنگ ءُ کُشگ بیتگ ات-

سمیع مینگل جامعہ بلوچستان ءِ بی ایس زولوجی ءِ نودربرے بیتگ – سمیع مینگل ءِ کوش ءِ ھلاپ ءَ نوشکی ءُ بلوچستان ءِ سرجمیں ھند ءُ دمگاں سیاسی ءُ چاگردی باسکانی نیمگ ءَ زھرشانی کنگ بیتگ انت-

سمیع مینگل ءِ کوش ءَ پد سرجمیں بلوچستان ءَ نشہ ءِ باپاری ءِ ھلاپ ءَ یک توارے چست بیتگ ءُ مردماں وتی کمک ءَ وت نشہ باپاریانی بنجلانی بند کنگ ءُ اود ءَ جاندراھی ءُ وانگی سنٹر جوڑینگ کنگ ءِ پرمان کتگ-

ایشی ءَ پیش سمیع مینگل ءِ کوش ءِ کیس ءَ ھواریں سَے جرمکار رھمت اللہ، سمیع اللہ ءُ مھمد علی اُمر ءِ زندانی کنگ بیتگ اَنت-

شال ءَ گمانی رنگ ءَ نشہ پروشانی گون ءَ جنگ ءُ چوپ ءَ اینٹی نارکوٹکس ءِ سَے کارندہ زدگ بیتگ اَنت-

اے این ایف ءِ رد ءَ روکپتی شھدگ ءَ شال ءَ دمگی مردمانی نیمگ ءَ نشہ پروشانی ھلاپ ءَ اے ایب ایف ءَ شکایت سر بوتگ اَنت آیانی دمگ ءِ ھوٹل ءَ نشہ بھا بوگ ءَ اِنت-

اینٹی نارکوٹکس انتزامیہ ءِ رد ءَ دمگی مردنانی شکایت ءِ پژدر ءَ کار کان ءَ اے این ایف ٹیم ءَ روکپتی شھدگ ءَ شال ءِ نزیک ءَ ھوٹل ءِ سر ءَ بیڑ برتگ ءُ اود ءَ پٹ ءُ پول کتگ ءُ ھمے وھد ءَ جرمکاراں اے این ایف ءِ کارمندانی سر ءَ تیرگواری کتگ اش-

آیاں رسانکدر ءَ گوشتگ جرمکارانی گون ءَ تیرگواری ءِ آسر ءَ اے این ایف ءِ سَے کارندہ زدگ بیتگ اَنت ءُ جرمکارانی تیرگواری ءَ ھمے جاہ ءَ گوزوکیں یک ٹرکے ءِ ڈرائیور زدگ بیتگ ءُ جرمکاراں نشہ ءِ بیگ چگل داتگ ءُ وت تتکگ اَنت-

اے این ایف ٹیم ءَ نشہ پروشانی بنجل ءَ چار کلو گران چرس دزکپتگ اَنت ءُ دگہ نشھانی پٹ ءُ پول برجاہ اِنت-

بالی وڈ ءِ نامداریں ازمکار شاہ رخ خان ءِ تامر “جوان ” باکس آفس ءَ وتی سوبمندی ءِ جوانی وڑے ءَ گرگ ءَ انت، سرجمیں جھان ءَ آئی ءَ یک ھزار کروڑ ھندوستانی کلدار کمائینتگ –

ھندوستان ءِ رسانکدر اے این آئی ءِ رِد ءَ جوان تامر ءِ سوبمندی ءِ درگت ءَ چاگردی ترامجاہ انسٹاگرام ءِ تہ ءَ ایکٹر سنجے ملھوترا ءَ نبشتگ کہ گوستانک نبیسگ بوگ ءَ انت –

جوان ءَ باکس آفس ءَ سوبمندی ءِ ستاہ مٹ کتگ، تامر ءِ جوانیں کسہ ءُ جوانیں ازمکاری ءَ گوستانک ءِ دوبر نبیسگ ءَ کرد ءِ پیلو کتگ – تامر جوان ءُ پھٹان ءِ ھزار کروڑ کمائی کنگ ءِ ھمرائی ءَ شاہ رخ خان بالی وڈ گوستانک ءِ یک ءُ تھنائیں ازمکار جوڑ بوتگ کہ آئی ءِ دو تامراں یک سالے ءِ میان ءَ یک یک ھزار کروڑ کلدار کمائینتگ –

تامر ءِ جوانیں سوبمندی ءَ پد تامرکاراں ھمے زوتاں ماں ممبئی ءِ تہ ءَ پریس کانفرنس ءِ کتگ کہ اودا شاہ رخ خان، دیپکا پاڈوکون، سانیہ ملہوترا، سنیل گروور ءُ ایٹلی ءَ بھر زرتگ –

تامر ءِ تہ ءَ نایاتھرا، دیپکا پاڈوکون، پریامانی، سانیہ ملھوترا، ریڈھی ڈوگر،لھر خان،گریجا اوک اور سنجیتا بھٹاچاریا وتی ازم جوانیں رنگے ءَ پیش داشتگ –

جوان تامر ھپت ستمبر ءَ شنگ کنگ بوتگ کہ اے شاہ رخ خان ءِ زرباری ھندوستان ءِ ڈائریکٹر ایٹلی ءِ اولی تامر انت – چاروکاں تامر ءِ شریں وڑے ءَ ستاہ کتگ ءُ اے ھندی تامرانی تہ ءَ چارمی تامر انت کہ درساں گیش کمائی کتگ –

اھوالکاراں گوں تران کنان ءَ شاہ رخ خان ءَ وتی آؤکیں تامر “ڈنکی” شنگ بوگ ءِ ھم جار جتگ، شاہ رخ خان ءَ گوشتگ ما بیست ءُ شش جنوری ءَ بزاں جمہوریہ روچ ءَ پھٹان شنگ کتگ ءُ بندات کتگ ءُ پدا ما جنمشتامی ءِ ربیدگی ءَ جوان شنگ کتگ ءُ نوں کرسمس ءُ نوکیں سال نزیک انت گڈا ما ڈنکی ءَ شنگ کنگ ءَ انت –

راجو ایرانی ہدایت کاری ءَ جوڈ بووکیں تامر ءِ تہ ءَ شاہ رخ خان ءِ دیم ءَ تاپسی پنو ہیروئن کرد ءَ.پیلو کنگ ءَ انت –

ایران ءِ دو جتا جتائیں زنداناں سَے بندیگیں بلوچ پاھو ءِ دار ءَ درنجگ بیتگ اَنت-

سر بیتگیں اھوالانی رد ءَ ایران ءِ استان مشھد ءَ وکیل آباد ءِ زندان ءَ دو بندیگیں بلوچ نشہ باپاری ءِ پژدر ءَ پاھو دیگ بیتگ اَنت-

پاھو دیگ بیتگیں مردمانی پجار سِی سالی ئیں مصطفیٰ ریگی ء رحیم جھمنند مشھد ءُ بیست ءُ شش سالی ئیں سعید براھوئی ء لال مھمد جھمنند زاھدان ءِ نام ءَ زانگ بیتگ-

اھوالانی رد ءَ مصطفیٰ ایرانی سال سیزدہ سد ءُ نود ءُ ھشت ءَ مشھد ءَ نشہ باپاری ءِ بھتام ءَ گرگ بیتگ ءُ پد ءَ آمیدگس ءَ آئی ءِ سر ءَ پاھو ءِ ھکم داتگ بیتگ-

ھمے سعید دو سال ءَ پیش ماں مشھد ءَ نشہ باپاری ءِ بھتام ءَ دزگیر کنگ بیتگ ءُ پد ءَ آمیدگس ءَ آئی ءِ سر ءَ پاھو ءِ ھکم داتگ بیتگ –

اے ھردوکانی پاھو گوستگیں روچ ءَ بیتگ ءُ ایشی ءِ ھواری ءَ سیستان و بلوچستان ءِ ھند میناب ءِ زندان ءَ ھم یک بندیگیں مردمے پاھو دیگ بیتگ کہ ایشی ءِ نام زانگ نہ بیتگ-

ویڈیو اسٹرمینگ پلیٹ فارم یوٹیوب ءَ وتی نوکیں ایڈیٹنگ ایپ ”یوٹیوب کریئیٹ“ ءِ نام ءَ پجار کتگ –

ویب سائٹ لائیو منٹ ءِ رد ءَ یوٹیوب ءِ نیمگ ءَ ات ایڈیٹنگ ایپ ءَ میڈ آن یوٹیوب ایونٹ ءَ پجار کنائینگ بیتگ کہ ایشی ءِ بیٹا ورژن انی-

انڈیا،امریکہ،جرمنی،فرانس،برطانیہ،انڈونیشیا،کوریا ءُ سنگاپور ءَ ٹیسٹ کنگ بوگ ءَ اِنت ھمے وڑ یوٹیوب کریئیٹ ءَ آئی او ایس ءَ چُشکہ آئی پون دوھزار ءُ بیست ءُ چار ءِ درایگ ءِ گمان اِنت-

یوٹیوب ءَ اے درگت ءَ گوشتگ کہ یوٹیوب کریئیٹ یک فری ایپے کہ ایشی ءِ زور ءَ ویڈیوز تچکیں رنگے ءَ پرووڈیوس کنگ بیت اِنت-

میڈ آن یوٹیوب ایونٹ کمپنی ءَ گیش گوشتگ کہ مارا سرپدی نیست اِنت نوکیں کریئیٹرز ءِ واستا ویڈیوز ایڈٹ کنگ مشکل بیت اِنت اے تک ءِ آسان کنگ ءِ ھاتر ءَ درستانی واستا یوٹیوب ءَ ویڈیو جوڑ کنگ ءُ شنگ کنگ ءِ واستا ما نوکیں اموبائل ایپ یوٹیوب کریئیٹ ءَ دیم ءَ آرگ ءَ ایں-

ات ایپ آرٹیفیشل انٹیلیجنس (اے آئی) ءِ فیچرز ءَ سرجم اِنت ایشی ءِ ایڈینٹگ ٹریمنگ، آٹومیٹک کیپشیننگ،وائس اوور ءُ ٹرانزیشن ءِ فیچر ھوار اَنت-

اے ایپ ءِ کمک ءَ کارمرد کنوک ٹک ٹاک ءِ رنگ ءَ بیٹ میچنگ میوزگ ھم ویڈیو ءَ ھوار گپت کن اَنت کہ کاپی رائٹس ءَ آجو بیت اِنت-

ایشی ءَ ابدد یوٹیوب ءَ اے گپ ءِ جار ھم جتگ کہ آئی ءِ نیمگ ءَ تجرباتی فیچر ڈریم اسکرین ءَ ھم ٹیسٹنگ کنگ ءِ واستا دیم ءَ ارگ ءَ انت ایشی ءِ کمک ءَ ویڈیو کریئیٹر وتی ویڈیو ءَ بیک گراؤنڈ ءَ اے آئی ءِ کمک ءَ جوڑ کتگیں ویڈیو یا اکس ءَ وتی شارٹ ویڈیو ءَ ھوار کنت اِنت-

یوٹیوب ءَ وتی بلاگ ءَ نبشتگ کہ ما ڈریم اسکرین ءَ گچین کریئیٹر ءَ.پجار کنگ ءَ اِنت ایشی ءَ پد آیوکیں دیم ءِ سال ءَ شنگ کنگ بیت اِنت-

دمگی مردمانی رِد ءَ بلوچستان ءِ دمگ ڈیرہ بگٹی ءَ پاکستانی پوج ءَ لشکر کشی ءِ تہ ءَ گیشی آرانءَ لنجہ، گنجہ، آشکانی ءُ شیشی ءِ دمگ سرجمی ءَ انگر کتگ اَنت ءُ لشکر کشی بندات کتگ-

ھالانی رِد ءَ اے دمگاں پوج ءَ لشکر کشی ءِ میان ءَ بازیں لوگانی سر ءَ بیڑبرتگ کہ اشانی تہءَ حاجی رضا محمد بگٹی، خان محمد بگٹی، بزدار بگٹی ءُ سھنڑا بگٹی ءِ لوگ ھوار اَنت وھدے کہ دمگی مردمانی رِد ءَ لوگاں ھستیں سرجمیں گرانبھائیں مڈی ھم پُل اِتگ ءُ برتگ اَنت ءُ ھمے میان ءَ زالبول ءُ چُکانی سر ءَ ھم زوراکی کتگ-

گُڈی ھالانی رِد ءَ پاکستانی پوج ءِ یک مزنیں کچے اے دمگانی تہءَ ساڑی بیتگ اَنت ءُ دمگ ءِ موباھل سروس بند کتگ اَنت چریشی ءِ سبب ءَ دزگیریانی ءُ تاوانانی دلجم ءُ سرجمیں ھال سر نہ بیتگ اَنت-

زانگ بہ بیت انوگاں بلوچ لبریشن ٹائیگر ءَ سوئی ءَ چہ سبی ءَ رؤکیں شش پُٹبال لیبی آوار جتگ اَت اَنت، چریشی ءَ پد ڈیرہ بگٹی ءَ مزنیں کچے ءَ لشکر کشی بندات بیتگ- پاکستانی پوج ءِ دوازدمی کور ءِ کماندار آصف غفور ءُ آئی جی فرنٹیئر کور بلوچستان ڈیرہ بگٹی ءِ تر ءُ تاب کُتگ اَت ءُ راجدوست ایں گل اے پدر کنگ اَنت کہ اے اپیسرانی تر ءُ تاب پوج ءِ لشکر کشی ءِ گیش کنگ ءِ سبب جوڑ بیتگ-

روکپتی بلوچستان ءِ نامی ئیں عالم دین مولانا فضل الرحمان کوھی ایرانی آمیدگس ءِ نیمگ ءَ یل کنگ ءِ جار جتگ بیتگ –

سر بیتگیں اھوالانی رد ءَ چار سال پیش دزگیر بیتگیں مولانا کوھی مروچی چہ مشھد وکیل آباد زندان ءِ نیمگ ءَ یک رھوتے اھوالے ءَ یل کنگ ءِ جار جنگ بیتگ-

مولانا کوھی ءِ سر ءَ پنچ سال پیش ایرانی سرکار ءَ ایراد گپتگ ءُ گوشتگ شما ڈیھ ءِ ھلاپ ءَ گپ جنگ ءَ ئے چرے گپانی پژدر ءَ مولانا کوھی چار سال پیش ایرانی علما آمیدگس ءَ دزگیر کتگ ءُ مشھد وکیل آباد زندان ءَ بندیگ کتگ بیتگ-

مولانا کوھی وتی زندان ءِ وھد ءَ چار ءُ پنچ رند ءَ موکلاں وتی گس ءَ اتکگ بیتگ ءُ ھمے وڑ ھمے زوتاں وتی مردمے ءِ بیرانی ءَ وتی ھلک پشامگ ءَ اتکگ بیتگ کہ آئی ءِ سر ءَ مروچی رھوتی اھوالے اتکگ کہ تو آجوئے –

زانگ بہ بیت مولانا کوھی ءِ آجو کنگ ءِ گپ ھما وھد ءَ دیم ءَ اتکگ کہ روکپتی بلوچستان ءَ گوستگیں سال سِی ستمبر ءَ زاھدان ءَ جعمہ ءِ خوانین ءِ یات ءَ مھلوک زھرشانیانی چن ءُ لانچ ءَ کنگ ءَ اَنت-

مولانا کوھی ءِ یل کنگ ءِ پژدر ءَ لس مردم ھمے گمان ءَ کنگ ءَ انت کہ سرکار ءَ زھرشانیانی ایرموش کنگ ءِ ھاتر ءَ مولانا کوھی آجو کتگ بیتگ کہ دانگہ مھلوک ءِ برانز کمتر بہ بنت-

مولانا کوھی ءِ دزگیری ءِ ھلاپ ءَ روکپتی بلوچستان ءِ دمگ پشامگ ءَ زھرشانی کنگ ھم بیتگ اَنت ءُ آ پشامگ امام جمعہ ءِ پیش امام اِنت-

روکپتی بلوچستان ءَ تیل کشانی دگ ءِ وئیل یک بیمناکیں رنگے ءَ ھمک روچ برجاہ اَنت ءُ چریشی ءَ چہ بازیں کچے ءَ مردم مرگ ءُ زدگی ءِ دیمپان اَنت-

سر بیتگیں اھوالانی رد ءَ روکپتی بلوچستان ءِ دمگ سراوان ءَ دو گاڑیانی ٹکر ورگ ءَ ھشت مردم زدگ ءُ بیران بیتگ اَنت-

دیم پہ جالق ءَ دراتکگیں گاڑی سراوان ءِ ھند کلگان ءَ وئیل ءِ آماچ بیتگ اَنت کہ چریشی ءَ دو مردم بیران ءُ ھشت زدگ بیتگ اَنت-

بیران بیتگیں مردمانی پجار بیست ءُ دو سالی ئیں جلیل سپاھی ء لشکر خان ءُ سِی ءُ پنچ سالی ئیں سعید نصرتی ء شیر مھمد جھمنند جالق ءِ ناماں زانگ بیتگ اَنت-

وئیل ءَ دگہ شش مردم زدگ بیتگ اَنت کہ آ سراوان ءِ نادراہ جاہ ءَ برگ بیتگ اَنت – وئیل یک تیل کشین ءُ دگہ گاڑی یے میان ءَ پیش اتکگ بیتگ-

زانگ بہ بیت روکپتی بلوچستان ءَ ھمک روچ تیل کشیں مردم وئیل آماچ بوگ ءُ زوال بوگ ءَ اَنت کہ اود ءَ مردمانی ھاتر ءَ گچینتریں کار ءُ روزگار ھمیش اِنت کہ آھاں پہ وت ءَ گچین کتگ بلے اے کار ءَ مردم بازیں کچے ءَ مرگ ءِ دیمپانی ءَ کنگ ءَ اَنت-

اود ءَ گیشتریں وئیل یا گاڑیانی ٹکر ءَ پیش کاینت یا ایرانی لشکر ءِ تیرگواریاں تیل کش وئیلانی آماچ بنت ءُ بیران بوگ ءَ اَنت-

گوستگیں شپ ءَ ھم دو گاڑی وئیل ءِ آماچ بوتگ ات اَنت کہ اود ءَ ھردوکانی مردم زدگ بیتگ اَنت ءُ گاڑی سرجم ءَ ستکگ ات اَنت-

قلعہ عبداللہ ءَ تیرگواری ءَ لیویز کارمندے بیران بیتگ،اُرش ءِ زمہ واری ٹی ٹی پی ءَ من اتگ-

بلوچستان ءِ دمگ قلعہ عبداللہ ءَ گوستگیں شپ ءَ شال چمن شھدگ ءَ میزئی اڈہ ءِ نزیک ءَ ناشناسیں مردمانی تیرگواری ءَ لیویز کارمند عبدالباری بیران بیتگ-

اُرش ءِ زمہ واری تھریک تالبان پاکستان ءَ من اتگ – جارکش مھمد ھراسانی ءَ وتی درشان ءَ گوشتگ میزئی اڈہ ءَ لیویز بنجل ءِ سر ءَ تھریک تالبان پاکستان ءِ مجاھدیناں اُرش کتگ ءُ چریشی ءَ بنجل ءِ انچارج عبدالباری ء ھاجی نصر اللہ ھما جاہ ءَ بیران بیتگ-