TBP Balochi

مصری جیل ءِ واکدارانی دزبندی ءِ رد کنگ ءِ سر ءَ یونیورسٹی ءِ آرٹس گیٹ ءِ دیم ءَ مصری نودربر نیرہ اشرف ءِ کوشکار مھمد عادل مرگ ءِ سزا دیگ بیتگ اَنت –

سبق ویب سائٹ ءِ رد ءَ نیرہ اشرف ءِ کلاس فیلو مھمد عادل ءَ الدقھلیہ کمشنری ءِ جاہ المنصوررہ یونیورسٹی فیکلٹی آف آرٹس گیٹ ءِ دیم کُشگ بیتگ اَنت –

آمیدگس ءَ مرگ ءِ سزا ءِ ھلاپ مھمد عادل ءِ رد کنگ ءِ رد کتگ –

مصری پبلک پراسیکیوشن ءَ بیست ءُ پنچ دیستگی ءَ قلمبند بند کتگ آمیدگس ءَ پیش کتگ- نودربر ءُ یونیورسٹی سیکورٹی گارڈز ءَ ابید نزیکیں دکاندار گواھی داتگ کہ آئی ءَ مھمد عادل ءَ چانکو ءَ گوں سراپ کتگ ءُ کشگ ءَ دیستگ –

نیرہ اشرپ ءِ کھول ءُ آئی ءِ سنگتاں اے گواھی ھم داتگ کہ مھمد عادل ءَ آئی ءَ تاوان دیگ ءِ بیھار داتگ بیتگ – کہ آئی ءِ زھر ءِ گپ اے بوتگ پرچا نیرہ ءَ گون آروس ءَ انکاری کتگ بیتگ-

پوجداری ءِ آمیدگس ءَ اے راستی کتگ کہ مھمد عادل ءَ پہ زانت شوربندی ءِ درچ ءَ کُشتگ –

زانگ بہ بیت مصری راجدپتر ءَ فوجداری ءِ آمیدگس ءِ کیس اینکس زوت گوشدارگ نہ بیتگ اَنت – پبلک پراسیکیوٹر حمادہ الصاوی ءَ مصری یونیورسٹی ءِ نودربر ءِ کوش ءِ کیس چل ءُ ھشت ادارانی توک ءَ فوجداری ءِ آمیدگس ءَ پیش کتگ بیتگ-

زانگ بہ بیت المنصورہ یونیورسٹی ءِ یک نودربرے ءِ ھم دروریں نودربرے ءَ چاکو ءَ گوں سراپ کتگ ءُ کُشتگ بیتگ – اے وئیل جامعہ المنصورہ ءِ فیکلٹی آف آرٹس ءِ دیم ءَ پیش اتکگ بیتگ-

چم دیستگیں مردمانی گوشگ ات کہ جرمکار آرٹ ءَ بندوکیں سیمی سال ءِ نودربر بیتگ – آئی ءَ نودربر ءِ سر ءَ ھما وھد ءَ اُرش کتگ کہ آ وتی لوگ ءَ روگ ءَ بیتگ ءُ بس ءِ اسٹاپ ءِ نیمگ ءَ جنزان بیتگ-

اود ءَ جاڑیگیں مردماں جرمکار ءِ دارگ ءِ جھد کتگ گڑا اود ءَ آئی ءَ جنک ءِ گُٹ بر اتگ ءُ پد ءَ سکیورٹی ءِ واکداراں دزگیر کتگ –

چم دیستگیں مردمانی رد ءَ اُرشکار ءَ جنک ءِ گون ءَ آروس کنگ ءِ واھگ بیتگ ءُ پد ءَ جنک ءَ انکاری کتگ بیتگ ءُ بچک ءَ بیر ءِ گرگ ءِ ھاتر ءَ کُشتگ ءُ ایشی ءَ پیش ھم آئی ءِ مرگ ءِ بیھار رس اتگ اَنت-

مصر ءُ میانجی ڈیھانی سوشل میڈیا ءَ اے کیس سرھال بیتگ ءُ اے کیس عرب میڈیا ءَ ھم مصری یونیورسٹی ءِ نودربر ءِ نام ءَ زانگ بیت اِنت-

روکپتی بلوچستان ءِ دو جتا جتائیں جاھاں تیرگواری وئیلاں دو ورنا بیران بیتگ اَنت –

سر بیتگیں اھوالانی رد ءَ روکپتی بلوچستان ءِ تیابدپی شھر چھبار ءَ ناشناسیں مردماں تیرگواری کنان ءَ یک ورنایے کُشتگ –

کُشگ بیتگیں ورنا ءِ پجار زاکر بلوچ ء مراد جان جھمنند ساندک زئی دشتیاری ءِ نام ءَ زانگ بیتگ-

اھوالانی تہ ءَ گوشگ بیتگ کہ ناشناسیں مردم یک دکانے ءَ پترتگ ءُ زاکر اش تیرگواری کتگ ءُ کُشتگ –

زاکر ءِ کُشگ ءَ پد آیاں پُشت مانداتگ ءُ شتگ اَنت ءُ اے کوش ءِ بارو ءَ دگہ سرپدی نہ بیتگ اَنت-

ھمے وڑ ءُ راسک ءَ ناشناساں تیرگواری کنان ءَ یک ورنایے کُشتگ-

کُشگ بیتگیں ورنا ءِ پجار لیاقت مزارزئی ء غلام جھمنند جکیگور راسک ءِ نام ءُ زانگ بیتگ –

اھوالانی رد ءَ لیاقت ھم دکانے ءَ تیرگواری کنگ کُشگ بیتگ کہ چد ءُ پیسر چھبار ءَ ھم ھمے دابیں وئیلے پیش اتکگ بیتگ-

بلوچستان ءِ دمگ چمن ءَ کاؤنٹر ٹیررزم ڈپارٹمنٹ (سی ٹی ڈی) ءَ گمانی میڑ ئے تہءَ چار مردمانی کُشگ ءِ ٹاہ داتگ۔

کاؤنٹر ٹیررزم ڈپارٹمنٹ بلوچستان ءِ نیمگ ءَ شنگ کُتگیں درشانے ردءَ سی ٹی ڈی ءَ چمن ءِ ھند گوری کاہل ءِ نزیک ءَ بیڑ بران ءَ میڑ ئے تہءَ چار سلاہ بندیں مردم کُشتگ اَنت۔

سی ٹی ڈی ءِ ردءَ بیڑ چیریں ھالانی رسگ ءَ اوگان سیمسر ءِ نزیکءَ کمپان ءِ سرءَ کنگ بیتگ، تیرگواری ءِ سوبءَ کمپان ءَ ھستیں سئے ناشرکار کُشگ بیتگ اَنت کہ اشانی گورءَ چہ وتکُشیں جیکٹاں ھوار تراکناکیں شورو ھم دزکپتگ اَنت۔

سی ٹی ڈی ءِ درشانے تہءَ گُشگ بیتگ کہ گوستگیں روچاں پولیس کارندھانی سرءَ تیرگواری ءِ تہءَ ھواریں بندش جتگیں نیکراھی گل تحریک جہاد ءِ یک باسک ءِ دزگیر کنگ بیتگ کہ آئی ءَ پَٹ ءُ پول ءِ نیام ءَ وتی دگہ سئے ھمراھانی ڈسانی بابت ءَ سرپدی داتگ، سی ٹی ڈی ءَ گوں میڑ ئے تہءَ تحریک جہاد پاکستان ءُ تحریک طالبان پاکستان ءَ گوں بندوکیں سئے ناشرکار ءُ سی ٹی ڈی ءِ دزگیری ءَ بوتگیں آیانی ھمراہ کُشگ بیتگ۔

کاؤنٹر ٹیررزم ڈپارٹمنٹ بلوچستان ءِ جارکش ءِ ردءَ کُشگ بیتگیں مردمانی تہءَ علی محمد پنام چھوٹا کاری، عبدالقدیر پنام قدیر، باچا پنام منصور، امداد اللہ پنام گران ءُ اختر جان پنام گڈ منصور ھوار اِنت۔

زانگ بہ بیت کہ سی ٹی ڈی ءَ گوست ءَ ھم انچائیں میڑانی ٹاہ داتگ البت رندترءَ کُشگ بیتگیں مردمانی پجار پیسرءَ چہ بیگواھیں مردمانی ردءَ بیتگ۔

سی ٹی ڈی ءِ جارکش ءِ ردءَ ناشرکارانی گورءَ چہ مسلم باغ اُرشءِ تہءَ ھواریں یک گاڑی ءِ ھم دزگپتگ وھدیکہ وہیل ءِ ارزی سی ٹی ڈی تھانہ شال ءَ نبشتہ کُتگ۔

بلوچ یکجھتی کمیٹی ءِ بنجاھی جارکش ءَ ماں رسانکدراں وتی شنگ کرتگیں درشانے ءِ تہ ءَ عبدالقیوم بلوچ، ناصر جان قمبرانی ءَ ھوار ایندگہ زورانسری آوار جنگ بوتگیں مردمانی دروگیں میڑ ءَ کوش، ءُ آھانی کھولاں سرپد نہ کنگ ءُ بے وارسی کل ءُ کسارت کنگ ءِ در انسانی کار ترندی ءَ گوں ایرجتگ ءُ گوشتگ کہ پھازگی لشکر ءُ سی ٹی ڈی بلوچستان ءِ انسانیت ءَ چہ کپتگیں کار یکشل ءَ برجاہ انت – پیش ءَ دروگیں میڑے نام دیگ بوتگ ءُ زورانسری آوار جنگ بوتگیں مردم کُشگ بوتگ انت نوں آھاں دروگیں میڑ ءَ کُشگ انت ءُ کھولاں سرپد کنگ ءَ نہ انت ءُ آھاں بے وارسی کل ءُ کسارت کنگ ءَ انت – چدوگنتریں درانسانی کار نیست –

جارکش ءَ گوشتگ کہ سی ٹی ڈی فورس بلوچستان ءِ تہ ءَ مردمانی کُشگ ءِ ھاتر ءَ جوڈ کنگ بوتگ – بلوچ راج ءَ لوٹیت کہ اے سنگین ءُ در انسانی کار ءِ بگیری ءَ در بیا انت پرچاکہ یک شوربندی ءِ رِد ءَ بلوچانی کُشت ءُ کوش برجاہ انت –

آئی ءَ گوشتگ کہ عبدالقیوم زھری سال دوھزار بیست ءِ نومبر ءِ ماہ ءَ بیڑے ءِ میان ءَ چہ ھب چوکی ءَ پھازگی لشکر ءَ زورانسری آوار جتگ ءُ بیگواہ کتگ کہ آئی ءِ وش ءُ سلامتی یل کنائینگے ھاتر ءَ آئی ءِ کسانکیں جنکو زنیرہ ءُ آئی ءِ کھول ءَ سَے سال انت کہ زھرشانی کنگ ءَ انت بلے عبدالقیوم زھری گوں ناصر جان قمبرانی ءُ کمال خان ء باہوٹ ھمراھی ءَ دروگیں میڑ ءَ کُشتگ ءُ آھانی جون کھول ءِ دست ءَ دیگے بدل ءَ بے وارس کُتگ ءُ مستونگ دشت ءَ کل کتگ انت – ناصر قمبرانی ھم سال دوھزار بیست ءُ یک ءِ جنوری ماہ ءَ چہ ھزدار زھری ءَ زورانسری آوار جنگ ءُ بیگواہ کنگ بوتگ – اے درانسانی ءُ گیر اخلاقی کار ءَ ھمنچو ایربجن کہ کم انت – بلوچستان ءِ تہ ءَ پھازگی لشکر اے وھدی سک باز انسانیت ءِ بگیری کنگ ءَ انت ادارہ اشی ءِ سر ءَ گامگیج بہ زور انت –

بنجاھی جارکش ءَ بلوچ راج دلگوش گور کتگ ءُ گوشتگ کہ اے ریاست ءِ پترت ءَ مان انت داں ھما وھد ءَ کہ راج در نئیت ءُ اشی ءِ بگیری ءَ توار چست نہ کنت اے کار برجاہ مان انت – – بلوچانی بگیری ءَ برجاھیں اے چکچینی ءَ درسیں ادارھانی وڈے ناں وڈی ءَ دست مان انت ءُ مین اسٹریم ءِ درسیں پاٹیانی اے کتکاریاں ھچ نگوشگ وت پلامرزی ءِ جار جنگ انت – اے درانسانی کارے دارگے ھاتر ءَ بلوچاں سیاسی گھگیری ءِ نیمگ ءَ روگی انت اگاں ناں زنیرہ ءِ وڈا ھر ھمک دومی روچ ءَ یک زھگے ءَ چہ آئی ءِ پت پُلگ بیت –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل ٹیلی گرام چینل “ھکل ” ءَ شنگ کرتگیں درشانے ءِ تہ ءَ کلات ءُ ھزدار ءَ پاکستانی پوج ءُ لٹ ءُ پُلی پراجیکٹ ءِ سر ءَ بوتگیں اُرشانی زمّہ واری منّ اِتگ انت –

جارکش جیئند بلوچ ءِ رِد ءَ سرمچاراں گوستگیں شپ ءَ کلات ہربوئی ءَ تیرک ءِ ھند ءَ ٹیل ءُ گیس درکنوکیں لٹ ءُ پُلی پراجیکٹ ءِ ھاتر ءَ راہ جوڈ کنوکیں مشین مانداشتگ انت –

جارکش رِد ءَ سرمچاراں ھزدار ءِ شھر ءَ نوک جوڈ بؤکیں سرکاری بلڈنگ ءِ پھازگی کارمندانی سر ءَ ھم دزبمب اُرش ءِ کُتگ، اُرش ءِ آسر ءَ دو پولیس کارمند محمد زاہد ءُ حمید زدگ بوتگ انت –

جیئند بلوچ ءَ گوشتگ کہ بلوچ لبریشن آرمی ھردو اُرشانی زمّہ واری ءَ منیت ءُ مئے اُرش بلوچستان آجوئی ءَ تاں زورگیریں پوج ءُ آئی ءِ کمک کارانی سر ءَ برجاہ بنت –

میان اُستمان ءَ گوشتگ کہ سرجمیں دنیا ءَ یازدہ کروڑ مھلوک ءَ زورانسری وتی لوگ یل کتگ ءُ لڈ ءُ بار ءَ لاچار بیتگ اَنت-

ھال سر کنوکیں ادارہ اے ایف پی ءِ رد ءَ میان اُستمان ءِ ادارہ برائے مھاجرین ( یو این ایچ سی آر) ءَ گوشتگ کہ یوکرین ءِ جنگ، اوگانستان ءُ درکپوکیں پناہگزین ءُ سودان ءَ برجاھیں جنگ ءَ پناھگزینانی کچ گیش بیتگ – ھمے وڑ وتی ڈیھاں ھم نندوکیں بے لوگیں مردمانی کچ گیش بیتگ اَنت-

یو این ایچ سی آر ءَ وتی رپورٹ ءِ تہ ءَ گوشتگ کہ سالگشتی اھوال ءِ توک ءَ گوستگیں سال ءِ گڈسر ءَ بے لوگ بوتگیں مردمانی کساس دَہ کروڑ ءُ ھشتاد ءُ چار لک بیتگ اَنت-

آئی ءَ گوشتگ کہ سال دوھزار ءُ بیست ءُ یک ءَ ایش کچ ءَ یک کروڑ ءُ نود ءُ یک لک گیش بیتگ اَنت نی سک باز گیش بیتگ اَنت-

سوڈان ءَ چست بیتگیں جیڑھاں بے لوگ بیتگیں مردمانی کساساں گیش بیتگ اَنت ءُ ایشی ءِ کساس ھمے سال ءِ مئی ءَ داں یازدہ کروڑ ءَ سر بیتگ اَنت-

یو این ایچ سی آر ءِ سروک فلیپو گرانڈی ءَ جنیوا پریس بریفنگ دیان ءَ گوشتگ کہ یازدہ کروڑ مردم جنگ، زُلم، کمتری ءِ رویش، لٹ ءُ کُٹ ءُ دگہ دگہ سبباں گیشتر موسمی جاورانی بدلی ءَ لڈ ءُ بار ءَ لاچار بیتگ اَنت-

آئی ءَ گوشتگ اے دنیا ءِ تچکیں اھوال اَنت، فلیپو گرانڈی ءَ گمان پدر کنان ءَ گوشتگ کہ اے کچ دیم ءَ گیشتر بیان بوگ ءِ گمان اِنت-

آئی ءَ ڈیھاں لڈ ءُ بار کرتگیں مردمانی گون ءَ بیوکیں رویشانی سر ءَ ٹپاسکاری کنان ءَ گوشتگ کہ اے ڈیھاں چیردستی ءَ پناھگزین ھک مھلوک ءِ پیم ءَ کنگ لوٹ اَنت ءُ گوشگ بہ بنت مھلوک میان اُستمانی پھزداری ءِ ھکداری ءَ اَنت-

یو این ایچ سی آر ءِ رد ءَ کساس ھپتاد ءُ شش درسد پناھگزین کم یا گیش کَٹوکاریں ڈیھاں لڈ ءُ بار اش کتگ ءُ ھپتاد درسد مردماں ھمساھگیں ڈیھاں گون دیم داتگ-

یو این ایچ سی ار ءِ سروک ءَ گوشتگ کہ پناھگزینانی واستا یورپی یونین، امریکہ ےُ برتانیہ ءِ دروازگ پچ بہ بیگ لوٹ اَنت، مھلوک اود ءَ پناہ زیرگ ءِ واک بہ بیت اِنت کہ ھمود ءَ وت ءَ مپوز سرپد بیت اِنت-

ھندوستان ءِ گوریچانی رودراتکی اُستان منی پور ءَ جنگ ءُ چوپانی وھد ءَ نُھ مردم بیران بیتگ اَنت ءُ دَہ زدگ بیتگ اَنت-

انڈین روتاک ھندوستان ٹائمز ءِ رد ءَ سَے شمبے ءِ شپ ءَ نسلی پساد ءِ آماچیں اُستان منی پور ءِ ھند امپھال ایسٹ ءُ کنگپورکی ءِ سیمسراں یک میتگے ءَ لھتے سلاہ بند مان رتگ اَنت ےُ چریشی ءَ پد جنگ ءُ چوپ بندات بیتگ اَنت-

پولیس ءِ گوشگ اِنت جنگ ءُ چوپانی بندات ھما وھد ءَ بیتگ کہ اُرشکارانی دارگ ءِ ھاتر ءَ سکیورٹی لشکر وئیل جاہ ءَ سر بیتگ اَنت-

زانگ بہ بیت منی پور ءَ سَے مئی ءَ ردوم زیروکیں نسلی پساد ءَ پد یک سد ءُ پانزدہ مردم ءُ چل ھزار ءِ کچ ءَ مردم وتی لوگانی یل کنگ ءَ لاچار بیتگ اَنت-

منی پور ءَ لٹ ءُ کُٹی وئیل ھما وھد ءَ بندات بیتگ کہ میٹی کمیونٹی ٹکی اسٹیٹس ءِ دیگ ءَ امیدگس ءَ پیسلہ ءِ ھلاپ ءَ دمگی ٹکی ٹولیاں زھرشانی کتگ بیتگ بلے اے زھرشانی زوت ءَ زوت دارگ بیتگ ءُ ھواریں مردماں لوگ، گاڑی ءُ ابادتتجاھانی سر ءَ اُرش بندات کتگ بیتگ –

امپھال ایسٹ پولیس ءِ سپرنٹنڈنٹ شیواکنتا سنگھ ءَ گوشتگ کہ سَے شمبے ءِ شپ ءِ ساھت دَہ یا دہ ءُ نیم ءَ گاڑی ء سر ءَ تیرگواری بیتگ ءُ چریشی ءَ نُھ مردم بیران بیتگ اَنت ءُ دَہ زدگ بیتگ اَنت-

آئی ءَ گوشتگ کہ زدگ بیتگیں مردم ھسپتال ءَ رسینگ بیتگ اَنت چریشانی توک ءَ یکے ءِ جاور ناگیگ اَنت –

پولیس ءِ رد ءَ دمگ ءَ سکیور-ی آسام رائفلز ءِ زمہ وار اِنت، بکء جاور گر ءُ
دار کنگ بیتگ اَنت – نسلی پساد ءِ وجہ ءَ جاورانی گر ءُ دار کنگ ءَ پوج آرگ بیتگ ءُ دارگ بیتگ –

امپھل ءِ نزیکیں ھندانی جھمنندیں مردم گیشتر ھندو اَنگ ھمگ وڑ کوکی ءِ گیشتر مردم کرسٹن اَنت کہ گیشتر کوھی دمگاں ً

یک جون ءَ وزیر داکلہ امت شاہ ءَ دمگ ءَ جاورانی گھتر کنگ ءَ یک کمیٹی جوڑ کنگ بیتگ ءُ آئی ءِ جار ھم جنگ بیتگ-

امت شاہ ءَ نسلی بنیاد ءَ جنگ ءَ ھواریں مردسں سلاہ ءِ چگل دیگ ءِ لوگ کتگ ءُ گپ ءِ مانیاؤروکانی ھلاپ ءَ ترندیں کاروائی کنگ گوشتگ –

بلوچستان ءِ دمگ خضدار ءَ گوستگیں شپ ءَ یک بمب تراکے ءَ پھازگی لشکر نشانگ ءُ کلات ءَ تیل ءُ گیس شوھاز کنوکیں شرکتی ءِ مشینری ماندارگ بیتگ اَنت۔

اھوالانی ردءَ گوستگیں شپ ءَ خضدار شھرءَ بلدیہ پارک ءِ نزیکءَ جوڑ بیوکیں سرکاری ماڑیءِ پھازگی ءَ برجاھیں کارندھانی سرءَ ناشناسیں مردماں گوں دستی بمب ءَ نشانگ کُتگ اَنت۔

تراکے تہءَ دو مردمانی ٹپی بئیگ ءِ اھوال اِنت وھدیکہ تراکے وھدءَ تیرگواری ءِ توار ھم اُش کُنگ بیتگ اَنت البت داں انگت واکدارانی نیمگءَ اے بابت ءَ گیشتریں اھوال دیگ نہ بیتگ اَنت۔

دومی نیمگ ءَ کلات ءِ ھند ھربوئی ءَ ناشناسیں مردماں تیل ءُ گیس شوھازکنوکیں شرکتے مشینری مانداشتگ اَنت۔

ھربوئی ءُ کش گوری دمگانی تہءَ چدوپیسر ھم بلوچ آجوئی لوٹوکیں گل بلوچ لبریشن آرمی ءِ نیمگ ءَ تیل ءُ گیس شوھازکنوکیں شرکتاں ھوار لشکری کارندہ ھم ارشانی تہءَ نشانگ کنگ بیتگ اَنت۔

البت داں انگت اے دودھیں ارشانی ذمہ واری ھچ گل ءَ پہ وت نہ من اِتگ۔