TBP Balochi

بلوچستان ءِ بنجاھی شھر شال ءَ ڈاکٹر تاج رئیسانی ءِ میان اُستمانی آزمانکانی براھوئی رجانک ءِ کتاب “وئیروئی بینٹ” دیمدرائی دیوان برجم دارگ بوت۔

براھوئی زُبان ءِ نامداریں لبزانت ڈاکٹر تاج رئیسانی ءِ نوکیں کتاب “وئیروئی بینٹ” کہ میان اُستمانی لبزانک ءِ آزمانکانی براھوئی رجانک اِنت، آئی ءِ دیمدرائی ءِ دیوان ماں بلوچستان یونیورسٹی ءِ براھوئی ڈیپارٹمنٹ ءِ تہ ءَ بوتگ۔

کتاب ءِ دیمدرائی ءَ براہھوئی ڈیپارٹمنٹ ءِ چئیرمین ڈاکٹر منظور بلوچ ءَ وتی ھیالاں درشان کنان ءَ گْوشت کہ براھوئی زُبان ءِ تہ ءَ ڈاکٹر تاج رئیسانی ءِ میان اُستمانی آزمانکانی رجانک علمی سرپدی ءِ تھر ءَ باز مزنیں کارے گْوشگ بیت اِنت۔ بلے ایشی ءِ ھواری ءَ بازیں جست ودی بیت اِنت کہ لبزانی رِد ءَ ڈاکٹر ءَ چُشیں کارے کُتگ۔ بلے جیڑہ ایش اِنت کہ آئی ءَ وتی اے علمی سرپدی ءِ کار ءِ تہ ءَ فکشن ءِ میدان ءَ رجانک گْچین کُتگ، گوشگ ءَ ما ایشرا ما یک آزمودھے گْوشت کن ایں، بلے آئی ءَ فکشن چُشیں تجربگے ءِ بھر ءَ زُرت کَنت-

آئی ءَ دیم ءَ گْوشت کہ ڈاکٹر رئیسانی فکشن ءِ مردُمے، آئی ءَ اے لبزانی واستا فکشن گْچین کُتگ، آئی ءِ زُبان اَبیدے لبزبلد ءَ وانگ نہ بیت ءُ فکشن یاں کہ لبزانک ءِ جیڑہ ایش اِنت کہ داں کہ وانوک آئی ءَ سرپد مہ بیت، آ ھما مزّہ ءَ گِپت نہ کنت اِنت۔

بلے ڈاکٹر ءِ کار ءِ علمی لوٹ ءَ چہ کسّے نا کُت نہ کنت، دومی نیمگ ءَ ڈاکٹر ءَ براھوئی زُبان ءِ تہ ءَ پَٹّ ءُ پول کنوکانی واستا یک مزنیں چیلنجے دیم ءَ آؤرتگ ، اے چیلنج، اے مزنیں جُست چہ آئی ءِ نیمگ ءَ شئوری ھم بوت کنت، ءُ لاشئوری ھم، آیوکیں وھد ءَ اے لبزانی سرا بوتگیں پٹّ ءُ پول، ایشی ءِ علمی اَرزشت ءُ علمی راستی ءَ نہ تھنا پدّر کن اَنت، بلکیں اے چیز ءِ کوشست ھم آھوکیں وھد ءِ علمی ءُ لبزانکانی کاراں گوں بندوک اِنت۔

ھمے وڑ ءَ اے دیمدرائی دیوان ءَ کتاب ءِ نبشتکار واجہ ڈاکٹر تاج رئیسانی ءُ کتاب ءِ شنگ کار قلات پبلشر ءِ واجہ نزر ھسین ءَ ھم وتی ھیال درشان کُتگ اَنت۔

اے دیوان ءِ تہ بلوچی تامُر “لولان” ءِ ٹیم ظھور فضل ءِ سر کماشی ءَ ھم ساڑی بوتگ ،ظھور فضل ءَ وتی ھیال درشان کنان ءَ گْوشت مرچی مارا سکّ وشّی بوت کہ مارا بلوچ راج ءِ دومی مستریں زُبان براھوئی ءِ اُستاد ءُ لبزانتانی گون ءَ نِندگ ءُ آھاں گوشدارگ ءِ موہ رَس اِت۔ ما اے گْوشگ لوٹ ایں کہ مئے واھگ اِنت کہ بلوچی ءِ تامُر براھوئی ءِ تہ ءَ رجانک ءُ ڈبنگ بہ بنت ھمے وڑا اگاں براہوئی تامُر ھست گُڑا ما آھاں بلوچی ءِ تہ ءَ بدل کنگ ءِ زمہ داری ءَ زورایں۔

دیوان ءَ نِشتگیں مردُماں ظھور فضل ءِ اے واھگ ءُ واھشت باز ساڑا اِت اَنت ءُ کمک کنگ ءِ ھم سدکی کنائینت۔

روکپتی بلوچستان ءِ بنجاھی شھر زاھدان ءَ ایرانی پولیس ءَ مکی مسیت ءَ مُچیں مردمانی سر ءَ آنسو گیس آس داتگ ءُ تیرگواری کتگ –

گیشیں اھوالانی رد ءَ زاھدان ءَ مکی مسیت ءَ مھلوک مُچ بیتگ ءُ گوستگیں سال ءَ خونین جمعہ ءِ یات ءَ زھرشانی روانک ءَ دلمانگ بیتگ اَنت کہ ھمے وھد ءَ پولیس ءَ آنسو گیس آس داتگ بیتگ-

اھوالانی رد ءَ زاھدان ءِ مکی میست ءِ کش ءُ گور پولیس ءَ انگیر کتگ اَنت ءُ اود ءَ آنسو گیس ءُ تیرگواری کتگ بیتگ کہ چریشی ءَ چہ بازین مردمانی زدگ بوگ ءِ ھال اِنت-

اھوالانی رد ءَ اود ءَ مسیت ءِ توک ءَ پولیس ءَ آنسو گیس آس داتگ ءُ چریشی ءَ لس مردم دم توس بیتگ اَنت-

زاھدان ءَ ھوار راسک ءَ ھم لس مھلوک ءَ جمعہ خونین ءِ یات ءَ زھرشانی ءُ بینر چست کتگ بیتگ-

زانگ بہ بیت گوستگیں سال ءِ سِی ستمبر ءَ مکی میست ءِ کش ءُ گوراں تیرگواری کتگ ات کہ چریشی ءَ سَد ءَ گیش مردم بیران ءُ سَے سد مردم زدگ بیتگ ات کہ اے وئیل ءَ پد مھلوک ھمک آدینگ زھرشانی کن اَنت ءُ وتی مردماں یات کن اَنت-

اھوالانی رد ءَ زاھدان ءَ گوستگین روچ ءَ چہ پولیس ءُ دگہ ادارھانی کارمند بازیں کچے ءَ سر بیتگ انت کہ اود ءَ شنگ بیتگیں تامراں گندگ بیت اِنت کارمند گوں گاڑیاں سر بوگ ءَ آں-

مستونگ ءَ عید میلاد النبی ءِ جلوس ءِ نزیک ءَ گمانی رنگ ءَ وتکش تراکے ءَ ڈی ایس پی مستونگ سٹی ءَ ھوار ھپت مردم بیران، چِل ءَ گیش زدگ بیتگ اَنت – بیرانیانی تہ ءَ گیشی ءِ گمان بوگ ءِ گمان بوگ ءَ اِنت-

تراک ءَ پد پولیس ءُ دگہ لشکر وئیل جاہ ءَ سر بیتگ ءُ راہ ءُ درش بند کتگ اَنت ءُ کمکی کار اش بندات کتگ اَنت-

ڈی ایچ او مستونگ ءِ گوشگ اِنت ھپت مردم بیران بیتگ اَنت ءُ چل ءَ گیش زدگ بیتگ اَنت، بیران بیتگینانی تہ ءَ پولیس آفیسر ھوار اِنت- زدگ بیتگیں مردم ڈی ایچ کیو ھسپتال ءَ برگ بوگ ءَ اَنت-

ایس ایچ او سٹی جاوید لھڑی ءِ گوشگ اِنت تراک الفلاح دگ ءَ بازار ءَ بیتگ – ھسپتال ایمرجنسی کنگ بیتگ – اسسٹنٹ کمشنر مستونگ ءِ گوشگ اِنت تراک مدینہ مسیت ءِ نزیک ءَ بیتگ کہ چریشی ءِ سبب ءَ بازیں مردم زدگ بیتگ اَنت-

تراک ءَ بیران بیتگیں مردماں ڈیوٹی ءَ جاڑیگیں ڈی ایس پی پولیس مستونگ نواز گشگوری ھم ھوار اِنت ءُ ترند زدگ بیتگیں مردم شال ءَ برگ بوگ ءَ اَنت-

مستونگ ءَ وتکش تراک ءَ پد شھر ءِ دراھیں ھسپتال ءَ جاڑیگ کنگ بیتگ اَنت ءُ سیکورٹی ادارہ پٹ ءُ پول کنگ ءَ اَنت-

شبیر بلوچ ءِ زورانسری اوار جنی ءَ چار اکتوبر ءَ ھپت سال سرجم بیت اِنت اے درگت ءَ کراچی پریس کلب ءَ یک روانکے کشگ بیت اِنت-

اے درگت ءَ بیگواھیں شبیر بلوچ ءِ گوھار سیما بلوچ ءَ وتی درشان ءَ گوشتگ منی برات شبیر بلوچ چار اکتوبر دوھزار ءُ شانزدہ ءَ تربت ءِ دمگ گورکوپ ءَ وتی لوگ بانہ زرینہ ءِ دیم ءَ آوار جنگ بیتگ – اے درگت ءَ مارا داں روچ ء مروچی کس ءَ سرپدی نہ داتگ کہ آ کجا اِنت چتور اِنت آ ھست اِنت یا نیست اِنت-

بلوچ اسٹوڈنٹس آرگنائزیشن (آزاد) ءِ رھشون شبیر بلوچ ءِ گوھار سیما بلوچ ءَ گوشتگ مئے زند چار اکتوبر دوھزار ءُ شانزدہ ءَ پد تباہ اِنت – منی مات شپانی نسپ ءَ پاد کیت ءُ نند ایت گمان کنت اِنت منی زھگ اتکگ ءُ دروازگ ءَ ٹک ایت ءُ اے وڑ مہ بیت من واب کپتگ آں-

سیما بلوچ ءَ گوشتگ منی گوھار کندگ ءُ مسکرائی ءَ بے ھیال بیتگ انت- زرینہ کہ آئی ءِ چمانی دیم ءَ مرد اش برتگ آ داں انگت ءَ کسان اِنت ھمود ءَ زرینہ ءِ وشیانی مولما بیتگ اَنت بلے زرینہ ءَ اے نزانت منی مرد زندگ اِنت یا ناں-

آئی ءَ گوشتگ کہ ھما روچ ءَ شبیر بیگواہ کنگ بیتگ ھما روچ ءَ داں روچ ء مروچی من کراچی، شال، اسلام آباد ءَ ٹکر وران اَنت بلے داں انگت ءَ مارا اے درگت ءَ ھچ اھوال دیگ نہ بیتگ اَنت-

سیما بلوچ ءَ گوشتگ کہ شبیر بلوچ چار اکتوبر دوھزار ءُ شانزدہ ءَ تربت ءِ دمگ گورکوپ ءَ دگہ بیست مردمانی ھمراھی ءَ بیگواہ کنگ بیتگ دو ھپتگ ءَ پد درستیں مردم یل بیتگ اَنت بلے شبیر داں انگت ءَ بیگواہ اِنت-

آئی ءَ گوشتگ کہ بلوچستان ءَ بازیں بیگواھیں مردمانی ڈول ءَ شبیر بلوچ ءِ کیس ھم وفاقی سرکار ءِ نیمگ ءَ جوڑ کرتگیں زورانسری آوار جنیانی پٹ ءُ پولکاری کمیشن ءِ گور ءَ نبشتگ اِنت-

آئی ءَ گوشتگ ما بازیں رنداں کمیشن ءِ دیم ءَ پیش بیتگ ایں بلے ھچ آسری نہ بیتگ – سیما بلوچ ءَ گوشتگ کہ چار اکتوبر دوھزار ءُ بیست ءُ سَے ءَ آرٹس کونسل داں کراچی پریس کلب ءَ یک روانکے کشگ بیت اِنت ءُ ھمے روچ ءَ چاگردی ترامجاھاں کمپینے برجم دارگ بیت اِنت-

چہ بلوچی لبزانکی گل چھبار ءِ نیمگ ءَ بلوچی زبان ءِ نامدار ءُ راجی لچہ کار مبارک کازی ءِ یاتگیری ءَ مزن ءُ شاھیگانیں دیوانے برجم دارگ بیت دیوان ءِ تہ ءَ چہ رو دراتکی بلوچستان ءُ رو برکتی بلوچستان ءِ بازیں ھَند ءُ دمگ ءُ چھبار ءِ شورا شھر ءِ باسکاں ءُ دگہ لَس مردماں بھر زُرتگ اے پنچ شمبے روچ 2023/9/28 ءِ بیگاہ ءِ ادار 4/30 ءَ بنگیج کنگ بیت ءُ اے دیوان ماں سئے بھرانی تہ ءَ برجم دارگ بیت :دیوان ءِ بندات ءَ ام ۔ شکاری ءَ ھاوند ءِ پھکیں کتاب کُران ءِ پھگپ پہ دیوان ءَ شکسات انت دیوان ءِ اولی بھر ءِ جارچین واجہ الی بکش دشتیاری ات-

مبارک کازی ءِ یات ءَ رودراتکی بلوچستان ءَ ھوار دگہ جاھاں یکشلیں یاتگیری دیوان آئی ءِ بیرانی ءَ دو ھپتگانی گوزگ ءَ پد ھم ھلاس نہ بیتگ اَنت- مبارک کازی بلوچستان ءِ اولی مردم گوشگ بوگ ءَ اِنت کہ آئی ءِ بیرانی ءَ بلوچ مھلوک اے کساس دردیگ بوگ ءَ گندگ بوگ ءَ اَنت-

گوشتانکی بھر ءِ تہ ءَ مولابکش رئیسی ءَ گوشتانک دیان ءَ گْوشت : کازی ھما کارست انت کہ آئی ءَ وتی زند ءَ شرپ رس اتگ ءُ آئی ءِ زند ءِ آئی ءِ بُت ٹاھینگ بیتگ ۔ دگہ پھناتے مردمانی بُت رند مرگ ءَ ٹاھینگ بنت
ابدالوھاب ایران نژاد ءَ گوشتانک دیان ءَ گْوشت : کازی اھد سازایں لچہ کارے بیتگ ءُ نمیران انت-

دیوان ءَ کریم باشندہ ءَ گْوشتانک دیان ءَ گْوشت : کازی ءَ ارزانیں گالانی کارمرزی ءَ گران ءُ جُھلانکیں لچہ پر بستگ مھندس باسد بھرامی ءَ گْوشتانک دیان ءَ گْوشت: کازی بلوچ ءِ راجی لچہ کارے بیتگ ءُ مروچیگیں دیوان کازی ءِ مزنی ءَ پیش دارایت-

بانُک زاھدء رئیسی ءَ وتی توار بند ءِ تہ ءَ گوشتانک دیان ءَ گْوشت : کازی ءِ نمیرانی ءِ دہ روچ گْوزگ ءَ پد ھم کازی ءِ یات ءَ دیوان برجم دارگ بیگ ءَ انت ۔ بلوچ وتی بامردانی بستار ءَ زانت ءُ آیاں شرپ دات جُنید بلوچ ءَ گوشتانک دیان ءَ گْوشت : کازی ءِ نمیرانی ءِ سَوَب کازی ءِ راجی لچہ کار بیگ انت بلوچی زبان ءِ جُھد کار ءُ ادارہ ارشاد اسلامی ءِ کارکُن واجہ سھیم بلیدہ ءَ دیوان ءَ گْوشتانک دیان ءَ گْوشت: چھبار ءِ منتکہ آزاد بایدانت مئی ازمگراں کمک بہ کن اَنت-

بلوچی لبزانکی گل چھبار ءِ کارگشاد ءُ بلوچی زبان ءِ استاد ءُ وانینوک میرجان میر ءَ دیوان ءِ اتکگیں مھمان وشاتک کُت انت نبشتانکی بھر :اے بھر ءِ تہ ءَ زُھیب جام ءُ سئید ساھیل ءَ وتی نبشتانک دیوان ءَ ندر کُتگ انت-

ساز ءُ زیملی بھر : اے بھر ءِ تہ ءَ استاد وھید بلوچ نسب ءُ استاد کامران نبی ءُ استاد شوکت سپر ءَ کازی ءِ پربند پیش کُت انت ءُ چہ دیوان ءَ چاپانی داد گپت-

سیمی بھر ءَ لچہ کاری بھرات اے بھر ءِ جارچین مولابکش رئیسی ات ءُ مولابکش رئیسی ءَ جھل ءِ مردمانی کہ دیوان ءِ برجم دارگ ءَ دستگیر بیتگ انت مِنّت گپت انت امام آزاد ، اسلم مھتاج زھی ، اسلم رئیسی ، مھمد اساک بلوچ نسب ، مھمد امین مھمدی کارمستر ارشاد اسلامی چھبار ، ابداللہ بھار ، سھیم بلیدہ ، بابل ھمراز ، ھامد جوھر ، تارک ھُسین ھوت ، ملک شھداد زھی ، میرجان میر ، شورا اسلامی باسکانی۔

دیوان ءَ بازیں کچے ءَ لچہ کار ءُ لس مردماں بھر زرتگ ءُ کازی ءِ ازم ءُ آئی ءِ یاتگیری ءَ وتی وتی لچہ گوشتگ اَنت-

روکپتی بلوچستان ءِ دمگ زاھدان ءَ ایرانی چیریں ادارھاں یک مردمے آوار جنگ ءَ پد بیگواہ کتگ-

گیشیں اھوالانی رد ءَ گوستگیں روچ ءَ زاھدان چمران ءَ ایرانی لشکر ءَ دکاندارے لٹ ءُ کُٹ کنگ ءَ پد دزگیر کتگ ءُ گون وت برتگ-

آوار جنگ بیتگیں مردم ءِ پجار اسماعیل ریکی ء نظر ءِ نام ءَ زانگ بیتگ ءُ آ زاھدان ءِ جھمنند اِنت-

اھوالانی رد ءَ اسماعیل گُد ءِ دکاندارے ءُ آ گوستگیں روچ ءَ وتی مات ءِ ھمراھی ءَ بازار ءَ سامان زیرگ ءَ روگ ءَ بیتگ کہ ایرانی لشکر ءَ لٹ ءُ کُٹانی نشانگ کتگ ءُ گوں وت برتگ –

زانگ بہ بیت روکپتی بلوچستان ءِ بنجاھی شھر زاھدان ءَ جمعہ خونین ءَ یک سالے پِر گوزگ ءَ پد اود ءَ مردم کُشگ بیتگیں مردمانی یات ءَ روانک کشگ ءُ زھرشانی کنگ ءَ دلمانگ اَنت ءُ چریشی ءِ سبب ءَ اود ءَ گیشتر مردماں ترسینگ ءُ روانک ءُ زھرشانیاں بھر نہ زورگ گوشگ ءَ اَنت-

زانگ بہ بیت گوستگیں روچ ءَ زاھدان ءَ بازیں کچے ءَ پھزداری ءَ پھزدار سر بیتگ اَنت کہ آیانی توک ءَ جتا جتائیں دگانی سر ءَ نگاھداری کنگ ءَ اَنت-

نوابشاہ، سکرنڈ ءِ میتگ ماڑی جلبانی ءَ پاکستانی پوج ءُ پولیس ءَ کماشیں سندھی راجدوست راھشون رجب جلبانی ءِ لوگ سر ءَ بیڑبرتگ، اے میان ءَ تیرگواری ءِ آسر ءَ پنچ زالبول ءُ دو مردین بیران بیتگ اَنت-

یات بہ بہ اِت اشی ءَ ساری ھم بازیں رند ءَ پاکستانی لشکر ءَ راجدوستیں راھشون رجب جلبانی لوگ سر ءَ بیڑبرتگ ءُ آ یکبرے زورانسری بیگواہ ھم کتگ-

ھمے درگت ءَ وائس فار مسنگ پرسنز آف سندھ ءَ درشان شنگ کتگ گْوشتگ کہ مروچی پاکستانی پوج ءَ سکرنڈ ءَ پنچ زالبول ءَ ھوار دو مردین کُشگ بیتگ ، اے انسانی ھکانی سرزاھر پادمالی اِنت، میان اُوستمانی ادارہ ءُ انسانی ھکانی گل زوت گامگیج بزور اَنت ءُ سرجمیں سندھ زھرشانی ءِ دزبندی کن ایں-

وھدے کہ اے وئیل سر ءَ جیئے سندھ قومی محاذ ( آریسر ) چیئرمین اسلم خیرپوری ءَ ھوار دگہ راجدوستیں پارٹی ءُ سیاسی چاگردی گلانی نیمگ ءَ گم ءَ زھری درشانگ ءَ اَنت-

بلوچستان ءِ دمگ ھُزدار ءِ ھند وڈھ ءِ جاور یکشلہ نگیگ اَنت- مروچی میڑے ءَ یک مردمے رحمت رخشانی بیران بیتگ-

اے مرد ھُزدار ءِ دمگ نال ءِ جھمنندیں- دمگی اِھوالکارانی رِد ءَ اے مرد ءِ سیادی پاکستان پوج ءُ چیریں ادارھانی پلامرزی کنوکیں ٹولی ڈیتھ اسکواڈ ءَ اِنت-

رحمت رخشانی ءِ درگت ءَ دمگی مردمانی گْوشگ اِنت کہ آ ھُزدار ءِ کش گور ءِ دمگاں راجدوستیں سیاسی باسکانی آوار جنگ، زورانسری آوار جنگ ءُ آیاں تیرانی نشانگ کنگ ءَ اَبید مردماں برگ ءُ پد ءَ زر گرگ ءُ دُزی ءَ ھم ھمگرنچ بیتگ-

اِھوالکارانی رِد ءَ مروچی وڈھ ءَ بیتگیں میڑاں رحمت رخشانی ءَ ھوار ڈیتھ اسکواڈ ءِ بازیں کارندھے کُشگ بیتگ، بلے آ دگہ مردمانی پجّار انگت نہ بیتگ اَنت-

گرلز ڈگری کالج ھزدار ءِ نودربراں ھزدار ءِ دمگدار ءِ گون ءَ کالج ءِ جیڑھانی زوت ھلاس کنگ ءِ پژدر ءَ گپ ءُ تران بیتگ ءُ زھرشانی ھلاسینگ بیتگ –

نودربراں گوشتگ کہ اگاں اے گوشتگیں لوٹ ءُ کالج ءَ نودربراں انتزامیہ ءُ پرنسپل ءِ نیمگ ءَ ترسینگ ھلاس کنگ نہ بیت اَنت گڑا دوبر ترندیں رنگے ءَ زھرشانی کنگ ءَ لاچار بہ ایں-

زانگ بہ بتت مروچی بیست ءُ ھشت اگست ءَ گرلز ڈگری کالج ھزدار ءِ نودربراں ٹرانسپورٹ، بی ایس ءُ ایف ایس سی ءِ کلاسانی پشکپتگین، استادانی کمی ءُ دگہ جیڑھانی گیش ءُ گیوار ءِ پژدر ءَ کالج انتزامیہ ءُ زمہ وارانی نیمگ ءَ گامگیج نہ زورگ ءِ پژدر ءَ زھرشانی کتگ ات-

نودربرانی رد ءَ زھرشانی وھد ءِ بازیں نودربر کالج ءَ بند کنگ ءُ ترسینگ بیتگ اَنت ءُ گڈسر ءَ انتزامیہ ءِ گون ءَ گپ ءُ تران ءَ جیڑھانی گیش ءُ گیواری ءُ کالج انتزامیہ ءِ نیمگ ءَ نودربرانی نہ ترسینگ ءِ سدکی دیگ ءَ پد زھرشانی مھتل کتگ-

روکپتی بلوچستان ءِ دمگ رودان ءَ دو زھگ آپ ءَ کپتگ ءُ بیران بیتگ اَنت-

گیشیں اھوالانی رد ءَ وئیل گوستگیں روچ ءَ پیش اتکگ کہ زھگ گوں مات ءُ پتانی ھمراھی ءَ باگ ءَ شتگ بیتگ انت ءُ اود ءَ ھردوک آپ ءَ کپتگ ءُ بڈ اتگ اَنت-

اھوالانی رد ءَ ھردوکیں زھگ باگ ءَ تالاب ءِ گور ءَ لیب ءَ بیتگ اَنت کہ ناگتی شترتگ ءُ آپ ءَ کپتگ ءُ بڈ اتگ اَنت-

زھگانی توک ءَ یک جنکوے ءُ یک بچکوئے ھوار اَنت –

زھگانی پجار ھشت سالی ئیں فاطمہ زھرا کوھی ءُ ھپت سالی ئیں مھمد حسین رھیمی جھمنند جگین رودان ءِ نام ءَ زانگ بیتگ اَنت-

زانگ روکپتی بلوچستان ءَ چوشین وئیل پیش اتکگ انت کہ اود ءَ زھگ کپگ ءُ بیران بوگ ءَ اَنت کہ آیانی گیشتریں سبب تالابی سر ءَ اوشتوکیں پھزداری نیست اِنت-