سعودی عرب ءَ دنیا ءِ دگہ ڈیھانی رنگ ءَ ھم پانزدہ جون ءَ کماشین مردمانی میان اُستمانی روچ دارگ بیتگ – ھمے وھد ءَ کماشیں مردمانی گون ءَ وشنودی ءِ پیش آیگ ءِ کرد پیلو کنگ بیتگ اَنت-

کماشیں مردمانی گون ءَ کمشرپی ءَ پیش آیگ ءِ تاوانانی بارو ءَ سرپدی مھم کنگ بیتگ ءُ آیانی ھکانی ءُ پھریزگ ءِ درگت ءَ ھم کڈنی کنگ بیتگ اَنت-

سبق ویب سائٹ ءِ رد ءَ سعودی عرب ءَ کماشیں مردمانی کساس شش دراد اِنت – اد ءَ ھر ھما مردم ءَ کماش سرپد بنت کہ آیانی اُمر شست سال اِنت یا ایشی ءَ چہ گیش اِنت – یک گمانے ءِ رد ءَ سال دوھزار ءُ سِی ءَ داں کماشین مردمانی کساس پانزدہ مردم ءَ سر بنت اِنت-

رپورٹ ءِ رد ءَ ھشتاد ءُ یک درسد سرکاری ادارھاں کماشانی آسراتی دیگ بنت ءُ سعودی ءِ کانون ءَ کماشانی ھک بندگ بیتگ اَنت-

رپورٹ ءِ رد ءَ اے درگت ءَ کماشیں مردماں وتی کھولانی گور ءَ نندگ ءِ ھم ھک دیگ بیتگ ءُ کماشانی منگ ءَ ابید آیانی کَٹ ءُ کمائی ءَ کس دست جت نہ کنت-

رپورٹ ءِ رد ءَ سعودی ءِ کانون ءَ کماشیں مردماں کمشرپی ءَ گوں پیش آیگ ءَ یک سالے بندیگ ءُ پنچ لک ریال ملام بندگ بیتگ اَنت-

بلوچ نیشنل مومنٹ ءِ جارکش ءَ رسانکدراں وتی شنگ کرتگیں درشانے ءِ تہ ءَ گل ءِ کلانیں رھشون ءُ سیاسی بندیگ ڈاکٹر دین محمد بلوچ ءِ زورانسری آوارجنی ءِ چاردہ سال سرجم بوگ ءَ مراگشانی برجم دارگ ءِ جار جتگ –

آئی ءَ گوشتگ کہ گل ءِ سرکماش ءَ درسیں ھنکین ءُ چیپٹرز گوشتگ انت کہ آ اے درگت ءَ بلوچستان ءَ زورانسری آوار جنیانی جیڑہ ءَ وتی کرد ءَ پیلو بہ کن انت –

بی این این ءِ بنجاھی رھشون ڈاکٹر دین محمد بلوچ سال دوھزار نُھ ءِ بیست ءُ ھشت جون ءَ چہ ھزدار ءِ دمگ ھورناچ ءَ پاکستان ءِ چیرین ادارھانی کارمنداں نادراھجاھے تہ ءَ زورانسری آوار جتگ ءُ بیگواہ کتگ – درسیں ھنکین ءُ چیپٹرز ڈاکٹر دین محمد بلوچ ءِ زورانسری آوار جنی ءَ چاردہ سال سرجم بوگ ءَ زھرشانی ءُ مراگش برجم بہ دار انت ءُ آئی ءِ جھد ءُ بازیں وھداں بیگواھی ءِ درگت ءَ بلوچ راج ءُ دنیا ءَ سرپدی بہ دئینت –

آئی ءَ گوشتگ کہ ڈاکٹر دین محمد بلوچ آجوئی لوٹوکیں رھشون، دلیریں انسانے ءَ ھوار بزگرانی ڈاکٹرے بوتگ کہ آ ھما وھد ءَ چہ نادراھجاہ ءَ آوار جنگ ءُ بیگواہ کنگ بوتگ کہ وتی پرز ءَ پیلو کنگ ءَ بوتگ – آئی ءَ آوارجنی ءِ بگیری ءَ سک باز گھگیری کتگ بلے آ لٹ شاپ کنگ ءُ زدگی جاوراں آوار جتگ – اے وئیلے چم دیستیں شاھد ھم است انت کہ آھاں پولیس ءُ آمیدگسان وتی درشان داتگ انت –

جارکش ءَ گوشتگ کہ ڈاکٹر دین محمد ءِ زھگ سمی ءُ مھلب دین گوستگیں چاردہ سالاں وتی پت ءِ وش ءُ سلامتی ءِ ھاتر ءَ زھرشانی کنگ ءَ انت کہ آھاں وتی پت ءِ یل کنائینگے ھاتر ءَ شال تاں کراچی ءُ پدا اسلام آباد ےَ دوھزار ءُ نیم کلومیٹر پیادگ پند بُراِتگ – آ آمیدگس، کمیشن ءُ پاکستان ءِ سر وزیر ءَ ھم دچار کپتگ انت بازیں باور کنائینگ ءَ ابید ھم آ وتی پت ءِ ھچ ھال ءَ سھیگ نہ انت – چہ ایشاں جھان ءِ دیم ءَ اے گپ پدر بیت کہ پاکستان ءِ آمیدگس ءُ کمیشن جھان ءِ دیم ءَ پیشدارگ ءَ پہ جوڈ کتگ انت بلکنہ اے کمیشنانی کار زورانسری آوار جنگ بوتگیں مردمانی ترسینگ ءُ بیھار دیگ انت کہ کھول ءِ مردماں مدامی اے گپ زاھر کتگ انت –

جارکش ءَ گوشتگ کہ بی این ایم ایندگہ مراگشاں ابید چاگردی ترامجاہ ٹویٹر

SaveDrDeenMohdBaloch

ءِ ھیش ٹیگ ءَ کارمرز بہ کن انت ءُ آن لائن مھم بہ چلائین انت – درسیں آجوئی لوٹوکیں ءُ انسان دوستاں لوٹ کن ایں کہ اشی ءِ تہ ءَ بھر بہ زور انت –

سربوتگیں ھالانی رِد ءَ بلوچستان ءِ دمگ کیچ ءِ بنجاھی شھر تربت ءَ ناشناسیں سلاہ بندیں مردماں کریش پلانٹے ءِ سر ءَ اُرش کتگ ءُ مشینری تاوان داتگ انت –

گیشیں ھالانی رِد ناشناسیں سلاہ بندیں مردماں تربت ءِ دمگ گوکدان ءَ کریش پلانٹے ءِ سر ءَ اُرش کتگ، اود ءَ ساڈی ئیں گاڈی تیرجتگ ءُ تاوان داتگ اَنت ءُ سرجمیں مشینری ھم تاوان داتگ اَنت –

دمگی مردمانی رِد ءَ اُرشکارانی کچ باز بوتگ آھاں کریش پلانٹ انگر کتگ دراھیں مردم یکجاہ مُچ کتگ اَنت سرجمیں مشینری تاوان داتگ اَنت ءُ مردم گُڈی بیھار داتگ ءُ یلہ داتگ اَنت-

زانگ بہ بیت کیچ ءَ ھوار بلوچستان ءِ ایندگہ ھند ءُ دمگاں کریش پلانٹ ءُ ایندگہ سرکاری لٹ پُل ءِ پراجکٹانی سر ءَ بوتگیں اُرشانی زمہ واری بلوچ آجوئی لوٹوکیں سلاہ بندیں گلاں منّ اِتگ انت بلے ایشی ءِ زمہ واری تنی وھدی ھچ گل ءَ نہ منّ اِتگ –

سربوتگیں ھالانی رِد ءَ بلوچستان ءِ دمگ پنجگور ءَ ناشناسیں مردماں پاکستانی پوج ءِ گاڑی ءِ تراکناکیں شوروانی نشانگ جوڈ کتگ –

پاکستانی پوج ءِ سر ءَ اُرش پنجگور ءَ گریڈ اسٹیشن ءِ نزیک ءَ سی پیک دگ ءِ سر ءَ کنگ بوتگ –

اُرش ءِ آسر ءَ پاکستانی پوج ءَ جانی ءُ مالی تاوان ءِ دیمپانی کنگ کپتگ – بلے تنی وھدی سرجمی ھال سر نہ بوتگ انت – تراک ءَ پد مزنیں کچے ءَ پوج ءِ کارمند ھما جاہ ءَ سربوتگ انت –

زانگ بہ بیت پنجگور ءُ کش گور ءِ ھند ءُ دمگاں پاکستانی پوج ءِ سر ءَ بوتگیں اُرشانی زمّہ واری گیشتر بلوچ آجوئی لوٹوکیں سلاہ بندیں گلاں منّ اِتگ انت بلے تنی وھدی اے اُرش ءِ زمّہ واری ھچ گل ءَ نہ منّ اِتگ –

سربوتگیں ھالانی رِد ءَ بیلہ ءِ نزیک ءَ مساپر کشیں کوچے ءَ گوں ٹرکے ءَ ڈیک وارتگ چریشی ءَ زالبولے ءَ ھوار دو مردم بیران ءُ دھ زدگ بوتگ انت –

کوچ کراچی تاں شال ءَ رؤگ ءَ بوتگ، تیز رؤگ ءِ سوب ءَ ماں بیلہ ءِ نزیک ءَ کوچ ءَ گوں ٹرکے ءَ ڈیک وارتگ –

وئیل ءَ بیران بوتگیں لاش ءُ زدگ بوتگیں مردم بیلہ ءِ سول نادراھجاہ ءُ ریسکیو سنٹر 1122ٹیارہ ءَ برگ بوتگ انت کہ اودا درمان کنگ ءَ پد زدگ بوتگیں مردم کراچی ءَ دیم دیگ بوتگ انت –

دومی نیمگ ءَ چہ کیچ ءَ ھال آیگ انت کہ تمپ ءَ پھلے ءِ چیر ءَ یک مردمے ءِ دیرگیں لاش ءِ دست کپتگ –

لاش دست گرگ بوتگ ءُ پہ پجار ءِ ھاتر ءَ نادراھجاہ ءَ برگ بوتگ –

بلوچستان ءِ دمگ کیچ ءَ گوستگیں روچ ءَ ناشناسیں مردماں پاکستانی پوج ءِ جوڑ بوھوکیں چوکی ءِ سر ءَ اُرش کرتگ ءُ سرجم ءَ تباہ کتگ-

چار شمبے ءِ بیگاہ ءَ مند ءِ ھند مبارک چات ءَ ناشناسیں مردماں بازیں کچے ءَ پاکستانی پوج ءِ جوڑ بوھوکیں چوکی ءِ سر ءَ اُرش کتگ-

دمگی مردمانی رد ءَ بنجل ءِ دیوال ءِ ڈروھینگ ءِ ھواری ءَ اود ءَ جاڑیگیں ساز ءُ سامان ءُ یک ٹرکے ھم مانداشتگ ات –

اے وئیل ءَ جانی تاوانانی اھوال نہ بیتگ اَنت بلے اُرش ءَ پد پوج بازیں کچے ءَ ھمے جاہ ءَ سر بیتگ ءُ اُرشکاراں چوکی ءِ ماندارگ ءَ پد پشت مانداتگ ءُ شتگ اَنت –