TBP Balochi

بلوچستان ءِ دمگ آواران ءَ اھوال اَنت کہ پاکستانی پوج ءَ یک وانگجاھے ءِ استاد ءَ ھوار سَے مردم زورانسری آوار جتگ ءُ ناشناسیں جاھاں برتگ اَنت-

گیشیں اھوالانی رد ءَ آواران ءِ دمے جاؤ ءِ ھند کورک ءَ مروچی سھب ءَ پاکستانی پوج ءَ وانگجاہ ءِ استاد مھمد اکبر، اسداللہ ءُ مھیم بلوچ دزگیر کتگ ءُ گون وت برتگ اَنت-

دمگی مردمانی رد ءَ ھرسئیں مردم وت ماں وت سیاد اَنت کہ آ پوج ءَ بیڑ وھد ءَ دزگیر کتگ ءُ برتگ اَنت-

دومی نیمگ ءَ جاؤ ءِ دمگ کوھڑو ءَ سید ھاجی زیارت ءُ کش ءُ گوری ھنداں جنگل مانداشتگ –

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کرتگیں درشان ءَ اُرش ءِ زمہ واری منان ءَ گوشتگ سرمچاراں کیچ ءِ ھند مند ءَ رِدیگ ءُ شند ءِ میانجی ءَ پیسر ءَ سنگر گیپتگ ءُ پاکستانی لشکر ءِ یک گاڑی یے ءِ سر ءَ اُرش کُرتگ ءُ دُژمن ءِ دو کارمند کُشتگ ءُ یکے ٹپی کُرتگ انت۔

آئی ءَ گوشتگ اے اُرش شمبے ءِ سُھب ءِ دہ ءَ بلوچستان لبریشن فرنٹ ءِ سرمچاراں ھما وھد ءَ کُتگ وھدے ویگو گاڑی ءَ سوار بیتگیں پاکستانی لشکر ءِ سَے کارمند چہ نزیکیں پانگس ءَ آپ ءِ رَند ءَ ’مرزا زو ‘ ءَ اَتکگ اَنت۔ دُژمن ءِ نشانگ کنگ ءَ سرمچاراں گوں وتکاریں سلاھاں اُرش کُرتگ کہ چہ ایشی ءَ دو کارمند جاھی مُرتگ ءُ یک کارمندے ٹپی بیتگ۔

جارکش ءَ گوشتگ اے اُرش دُژمن ءِ سُر ءُ پُرانی گِر ءُ دار کنگ ءَ گشینتگیں شوندات ءِ بھر اِنت۔بلوچ سرمچار دُژمن ءَ ھر پِڑ ءَ پروش دیگ ءَ مُھکم اَنت ءُ آئی ءِ سُر ءُ پُراں گوں ھُرتی ءَ چارگ ءَ اَنت۔داں کہ زورگیپتیں بلوچستان ءَ پاکستانی لشکر زورگِر اِنت آئی ءِ سر ءَ اُرش برجاہ بنت۔

آئی ءَ گوشتگ اے اُرش ءَ پد سرمچار پہ دْراھی چہ اود ءَ درکپگ ءَ سوبمند بیتگ اَنت۔

مجرگوھرام بلوچ ءَ گوشتگ بلوچستان لبریشن فرنٹ اے اُرش ءِ زمہ واری ءَ منّ ایت۔

امریکہ ءِ کانگریس ءَ شپ ءِ نسپ ءَ ڈیڈ لائن ءَ لھتیں ادار ءَ پیسر یک اداروکی فنڈنگ بلے ءِ منگ نامہ داتگ ءُ بنجاھی سرکار ءِ بندش یا شٹ ڈاؤن ءِ ترس ھلاس کتگ-

ھال سرکنوکیں ادارہ ایسوسی ایٹڈ پریس ءِ رد ءَ شمبے ءِ شپ ءَ منگ بیتگیں بِل ءِ ھاتر ءَ سروک جوبائیڈن دیم دیگ بیتگ-

منگ بیتگیں بل ءِ رد ءَ یوکرین ءِ کمک کنگ بہ بیت اِنت کہ وائس ھاوس ءَ داتگ بیتگ بلے ریپبلکن کانون سازی ءِ رد ءَ ترندیں ایراد گپت اِنت بلے اے درگت ءَ سروک جوبائیڈن ءَ منگ نامہ من اتگ-

ایشی ءِ توک ءَ فیڈرل ڈیزاسٹر اسسٹنس ءِ شانزدہ ارب ڈالر دیگ بیتگ اَنت ءُ اے منگ بیتگین بل ءِ توک ءَ داں بنجاھی سرکار آیوکیں ھبدہ نومبر ءَ کارمرد کت کنت اِنت ءُ اے درچ ءَ جوبائیڈن انتزامیہ ءُ چل ءُ پنچ روچ ءِ ریلیف رس اتگ-

بنجاھی پتر ءَ چست ءُ ایراں پد شمبے ءَ اسپیکر کیقب میکارتھی ءَ ناگتی وتی راستیں کش ءَ ھرچ ءُ درچانی کٹوتی ءِ لوٹ ءِ نیمگ ءَ چاران ءَ بل ءِ منگ ءَ ڈیموکریٹس ءِ سر ءَ بیسہ کتگ ءُ ایشی ءَ پد سینیٹ ءَ بل ءِ گڈسری منگ نامہ داتگ –

ری پبلکن پاٹی ءَ سیادی داروکیں اسپیکر میک کارتھی ءَ بنجاھی پتر ءَ ووٹنگ ءَ پیسر گوشتگ ما وتی کار ءَ برجاہ داریں اے جاہ ءَ ما درست زان ایں ءُ سرپدیں مردم جاڑیگ اَنت مارا سرکار ءِ دیم ءَ برگ ءَ دیگ ءَ اَنت-

کانگریس ءَ ریپبلکن ءِ کانون سازی ءِ نیمگ ءَ بل ءِ سر ءَ ایراد گرگ ءَ پد گوستگیں ھپتگ ءَ چست ءُ ایر بیتگ اَنت ءُ امریکہ ءِ بنجاھی سرکار ءِ مھکمھاں فنڈنگ ءِ نہ رسگ ءَ بند بوگ ءِ ترس پیش کتگ اَنت-

کانگریس ءِ ووٹنگ ءَ پد سینیٹ ءَ منگ نامہ ءِ سر ءَ داں نیم شپ ءَ بلپ رژن بالینگ بیتگ ءُ ایوان ءِ دیمپانی ءَ ھشت ءُ ھشت ووٹانی بل منگ بیتگ-

امریکہ ءِ سرؤک جوبائیڈن ءَ سرکار ءِ شٹ ڈاؤن ءِ دارگ ءِ ھاتر ءَ وش اتکی گوشتگ بلے کانگریس ءَ لوٹ کتگ کہ آ یوکرین ءِ یا آئی ءَ چہ ڈن بیگ ءَ ہد سرجمی ءَ کمک کنگ ءِ منگ نامہ دیگ بہ بیت اِنت-

بائیڈن ءَ گوشتگ کہ ما ھرچ ھالت ءُ جاور ءَ یوکرین ءِ واستا امریکہ ءِ پلامرزی ءِ دارگ ءِ اجازت ءَ نہ دے ایں-

مستونگ ءِ اندوھناکیں وئیل

ٹی بی پی شونگال

بیست ءُ نُھ ستمبر ءَ مستونگ ءَ یک اندوھناکیں (المناک) وئیلے ات، ائید میلاد النبی ءِ مُچی ءِ سر ءَ الفلاح مسیت ءِ نزیک ءَ یک وتکُشیں تراکے کنگ بیت کہ اِیشی ءِ تہ ءَ پنجاہ ءَ گیشتر مردم بیران بیتگ انت ءُ چِل مردم ءَ گیش ٹپیگ اَنت، بیرانیانی تہ ءَ گیشی ءِ تُرس ھست اِنت پرچاکہ اُرش ءَ ٹپی بیتگیں بازیں مردمانی جاور ھال باز نگیگ اَنت۔ بلوچ کواسانی گْوشگ اِنت کہ بلوچ آجوئی ءِ جُنز ءَ ھلاس کنگ ءِ ھاتر ءَ پاکستانی پوج ءَ بلوچستان ءِ تہ ءَ نیکراھی ناشرکاری ءِ توم کِشتگ ءُ ایشاں مھکم کنگ ءُ تالان کنگ ءِ کوشست کنگ ءَ اِنت۔

بلوچ کواس ءُ ناشرکاری ءِ بگیریں پریس کار یکشل ءَ گوں ھمے تُرس ءِ درشان ءَ کنگ ءَ اَنت کہ نیکراھی ناشرکارانی رودینگ ءَ چہ بلوچ جنگ ءِ راہ دارگ بیت نہ کنت بلے چہ اے پالیسیاں سرجمیں دمگ سانمند بیت اِنت۔

پاکستان گمانی دروشم ءَ نیکراھی ناشرکارانی ھما توم ءَ کہ بلوچستان ءُ پشتون سرڈگار ءِ سر ءَ کِشگ ءَ اِنت آئی ءِ سان پاکستان ءِ سر ءَ ھم کپ اَنت۔ پاکستانی ریاست ءِ نیمگ ءَ نیکراہ ءَ ایردستیں راجانی بگیر ءَ سلاہ ءِ پئیم ءَ کارمرز کنگ ءِ شوربندیاں انچیں جاور ودی کُتگ اَنت کہ چریشی ءَ بلوچستان ءِ تہ ءَ ترندیں نیکراھی ناشرکاری ودگ ءَ اَنت۔

مستونگ مزنیں وھدے ءَ چہ نیکراھی ناشرکارانی بنجاہ جوڑ بیان اِنت۔ چہ اے وئیل ءَ پیش دوھزار ءُ ھژدہ ءَ یک وتکُشیں تراکے ءِ تہ ءَ دو سد ءَ گیش مردم بیران بیتگ اِت اَنت۔ ھزارہ برادری ءِ سر ءَ یکشلی ءَ گوں اے دمگانی تہ ءَ اُرش کنگ بیتگ اَنت۔ ریاست اے ارشاں گوں دگہ ڈیھاں بندگ ءَ گوں چُشیں اندوھناکیں وئیلانی سان ءَ ھلاس کنگ ءِ کوشست کنت ءُ پد ءَ لھتیں وھد ءَ رند دروگیں پولیس میڑانی تہ ءَ زورانسری بیگواھیں کُش ایت ءُ اُرشانی بھتام ءَ آیانی سر ءَ لڈ اِیت۔

بلوچ جنگ ءِ ھلاس کنگ ءِ ھاتر ءَ ریاست ءِ برجاھیں شوربندیاں بلوچستان ءِ تہ ءَ سیاسی ادارگ نزور کُتگ اَنت، چریشی ءِ سوب ءَ نیکراھی ناشرکاری ءِ دارگ ءِ ھاتر ءَ مھکمیں سیاسی تاکتے نیست اِنت، اے جاورانی تہ ءَ راجدوست ءُ آجوئی لوٹوکیں ادارگانی زمہ واری گیشتر ود انت کہ آ سیاسی سنگر ءَ گھتریں دروشم ءَ کارمرز کنان ءَ شوربندی اڈ بہ دے اَنت کہ چرایاں بلوچ چاگرد ءِ تہ ءَ ترندیں دوستی ءِ دارگ ءَ پہ سیاسی جُنز مھکم کنگ بہ بیت اِنت۔

روکپتی بلوچستان ءِ بنجاھی شھر زاھدان ءَ گوستگیں دو روچاں جاور ھالانی گر ءُ دار کنگ ءِ ھاتر ءَ ایران ءِ دگہ اُستاناں چہ پوجی کارمند سر بیتگ ءُ اود ءَ دگ ءُ دمکاں سیکورٹی ءِ گیشیں نپر اوشتگ ءَ گندگ آیگ ءَ اَنت-

زاھدان جمعہ خونین ءِ یات ءَ گوستگیں شپ ءَ ھم دگانی سر ءَ ٹائر ماندارگ ءَ گندگ بیتگ اَنت-

گوستگیں شپ ءَ زاھدان ءِ دمگ کریم آباد ءَ لس مردماں دگ ءِ سر ءَ ٹائر مانداشتگ ءُ ایرانی سرکار خامنہ ای ءِ ھلاپ ءَ اوگام جتگ-

جتاجتائیں ھلکاں شنگ بیتگیں تامراں گندگ بیت اِنت مھلوک وتی زھر ء درشان ءَ کنگ ءَ اِنت-

گوستگیں روچ ءَ چھبار ءُ ایرانشھر ءَ ھوار گیجوکیں دگ ءِ سر ءَ مِکیں خامنہ ای ءِ مزنیں اکسے ناشناسیں مردماں مانداشتگ ات کہ اود ءَ گندگ بیت اِنت اکس بُن اِنت-

زاھدان ءَ ھوار گوستگیں روچ ءَ بازیں شھراں جمعہ خونین ءِ یات ءَ ھرتال کنگ بیتگ ءُ ایشی ءَ ھوار دری ملکاں روکپتی بلوچستان ءِ جھمنندین بلوچاں ھم زھرشانی کتگ ءُ اود ءَ جمعہ ء خونین ءَ کُشگ بیتگیں مردمانی انساپ ءِ ھاتر ءَ لوٹ کتگ-

بلوچستان ءِ شھر مستونگ ءَ الفلاح دگ ءَ عید میلادالنبی ءِ جلوس ءَ بیوکیں وتکش تراک ءَ پولیس ءِ ڈی ایس پی ءَ ھوار پنجاہ ءُ پنچ مردم بیران ءُ شست ءَ گیش زدگ بیتگ اَنت ءُ تراک ءَ دَہ سیر داں پانزدہ سیر ءِ کچ ءَ مواد ءُ بال بیرنگ کارمرد کنگ بیتگ اَنت-

وتکش تراک مستونگ بازار ءَ الفلاح دگ ءَ بیتگ کہ اود ءَ عاشقان رسول مدینہ مسیت ءِ ڈن ءَ عید میلادالنبی ءِ جلوس ءِ واستا مُچ بیتگ اَنت –

ھمے وھد ءَ جلوس رھادگ بیتگ کہ جلوس ءِ میان ءَ یک تراکے بیتگ ءُ چریشی ءَ بازیں کچے ءَ تاوان بیتگ اَنت-

اسسٹنٹ کمشنر مستونگ ءِ رد ءَ مدینہ مسیت ءِ نزیک ءَ میلاد ءِ واستا مردم مُچ بیتگ اَنت پد ءَ مھلوک روانک ءِ دروشم ءَ مُچی ءَ بھر زورگ ءَ بیتگ اَنت-

آئی جی پولیس عبدالخالق شیخ ءَ وتکش اُرش ءِ ھال راست کتگ ءُ گوشتگ کہ ڈی ایس پی سٹی نواز گشکوری ءَ وتکش اُرشکار ءِ دارگ ءِ جھد کتگ بلے ھمے وھد ءَ تراک بیتگ ءُ آ وت ھم بیران بیتگ ءُ تراک ءَ سَے پولیس کارمند زدگ بیتگ اَنت –

ڈسٹرکٹ ھیلتھ آپیسر عبدالرشید ءَ گوشتگ کہ تراک ءَ پد زدگ ءُ بیران بیتگیں مردمانی لاش نواب غوث بکش رئیسانی ھسپتال ءُ ڈی ایچ کیو مستونگ ءَ برگ بیتگ اَنت-

تراک ءَ بیران بیتگیں مردمانی تہ ءَ شانزدہ لاش ءُ بیست زدگ بیتگیں مردم ڈی ایچ کیو مستونگ ءَ ءُ ھمے وڑ سِی ءُ دو لاش بازیں کچے ءَ زدگ بیتگیں مردم نواب غوث بکش رئیسانی ھسپتال ءَ برگ بیتگ اَنت ءُ ھردوکیں ھسپتالاں بنداتی درمان ءَ پد زدگ بیتگیں شال ءَ برگ بیتگ انت کہ اود ءَ پنچ زدگ بیتگیں مردماں راہ ءَ ساہ داتگ اَنت –

راہ ءَ ساہ دیوکیں مردمانی لاش سول ھسپتاک شال ءَ برگ بیتگ اَنت ءُ گمانی رنگ ءَ بیران بیتگیں مردمانی کساس پنجاہ ءُ سَے اِنت ءُ شست ءَ گیش زدگ اِنت-

سول ھسپتال ءِ بنشون ءِ رد ءَ مستونگ تراک ءَ دگہ دو زدگیناں وتی ساہ داتگ اَنت چریشی ءَ پد بیران بیتگیں مردمانی کچ پنجاہ ءُ پنچ ءَ سر بیتگ اَنت –

اے دوئینانی تہ ءَ یکے ءَ ساہ ٹراما سینٹت سول ھسپتال ءُ دومی ءَ بی ایم سی ءَ درمانی ءِ وھد ءَ ساہ داتگ اَنت- سول ھسپتال ٹراما سینٹر ءَ ھشت زدگیں مردمانی جاور ناگیگ اَنت-

روکپتی بلوچستان ءَ ’جمعہ خونین‘ ءِ یاتگیری ءَ مروچی جتا جتائیں شھراں ھرتال کنگ ءُ دکان بند کنگ بیتگ اَنت-

ھرتال روکپتی بلوچستان ءِ بنجاھی شھر زاھدان، مھرستان،سراوان،چھبار،نوبندیان ءُ ایرانشھر ءَ جمعہ خونین ءِ یاتگیری ءَ ھرتال کنگ بیتگ-

اھوالانی رد ءَ گوستگیں شپ ءَ ھم زھرشانی کنگ بیتگ ءُ بازیں جاھاں زھرشانی کنوکاں ٹائر مانداشتگ اَنت-

ھمے وڑ گوستگیں روچ ءَ آدینگ ءِ نماز ءَ پد مکی مسیت ءَ ایرانی پولیس ءَ آنسو گیس جتگ ءُ بازیں مردم زدگ ءُ دمتوس بیتگ اَنت-

ھمے وڑ ءَ گوستگیں روچ ءَ ایرانی لشکر ءَ زاھدان ءَ ھوار دگہ دگہ جاھاں زھرشانی کنوکیں سِی مردم ءَ گیش آوار جتگ ءُ گون وت برتگ اَنت-

زاھدان ءِ شھر ءَ سیکورٹی ترند کنگ بیتگ ءُ اود ءَ دگانی سر ءَ پولیس ءُ پھزدارانی گیشیں گاڑی اوشتگ ءَ گندگ بیگ ءَ اَنت-

زانگ بہ بیت گوستگیں سال ءِ سِی ستمبر ءِ روچ ءَ زاھدان ءَ ماھو بلوچ ءِ انساپ ءِ ھاتر ءَ بیوکیں زھرشانی ءِ سر ءَ پولیس ءَ تیرگواری کتگ ات کہ چریشی ءَ سَد ءِ کچ ءَ مردم بیران ءُ سَے سد ءِ کچ ءَ زدگ بیتگ ات اَنت-

گوستگیں سال ءِ شانزدہ ستمبر ءَ ایران ءَ کرد جنک مھسا امینی ءِ بیرانی ءَ پد اود ءَ یک زھرشانی ءِ ود اتگ ات کہ چریشی ءَ بازیں کچے ءَ مردم کُشگ ءُ گرگ بیتگ ات اَنت-

انسانی ھکانی گل ایمنسٹی انٹرنیشنل ایران ءِ رد ءَ ایران ءَ درستاں گیشتر مردم سیستان ءُ بلوچستان ءَ جنگ بیتگ انت کہ آیانی توک ءَ کُشگ بیتگیں گیشتریں مردمانی کساس بیست سال ءَ داں شانزدہ ءِ سال ءِ اُمر ءِ مردم اَنت-

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءَ گوشتگ سرمچاراں بیست ءُ نُھ ستمبر ءَ آدینگ ءِ بیگاہ ءِ ھپت ءَ جاؤ آواران ءَ زورگریں پاکستانی لشکر ءِ پانگس ءِ سرءَ گوں ٹوھیں سلاھاں اُرش کُرتگ ءُ یک کارمندے کُشتگ ءُ دو ٹپی کُرتگ۔

آئی ءَ گوشتگ آواران ءِ ھند جاؤ ءِ کوھڑو ءَ ملاھاجی زیارت ءَ برجاھیں پاکستانی لشکر ءِ پانگس ءِ سر ءَ اُرش کنگ بیتگ۔پانگس ءِ سر ءَ دو راکٹ آس داتگ ءُ پد ءَ گوں وتکار ءُ ٹوھیں سلاھاں اُرش کُرتگ۔گوں دوئیں راکٹاں پانگس ءِ سنگر نشانگ کُرتگ کہ اے دمان ءَ سَے لشکری کارمند سنگر ءَ ساڑی بیتگ انت کہ ایشانی تہ ءَ یکے جاھی مُرتگ ءُ دو سَک ٹپی بیتگ انت۔

میجر گوھرام بلوچ ءَ گوشتگ بی ایل ایف اے اُرش ءِ زمہ واری ءَ منّ ایت ءُ مئے اُرش داں بلوچستان ءِ آجوئی ءَ زورگریں پاکستانی لشکر ءِ سر ءَ برجاہ بنت اِنت۔

بلوچستان ءِ نامداریں ندکار ءُ گوستانک نبیس ڈاکٹر فاروق بلوچ ءِ نوکتریں کتاب “بلوچ آریائی تعلقات” چاپ ءُ شنگ بوتگ – کتاب ءِ دیمدرائی ءَ مراگش ءِ برجم دارگ بوگ ءَ انت –

نامداریں گوستانک نبیس ڈاکٹر فاروق بلوچ نوکتریں کتاب “” بلوچ آریائی تعلقات ” چہ علم و ادب پبلشر کراچی ءِ نیمگ ءَ چاپ ءُ شنگ کنگ بوتگ ءُ اے کتاب ڈاکٹر ءِ گوستانک ءِ درگت ءَ ھشتمی کتاب انت –

زانگ بہ بیت گوستانک ءِ درگت ءَ ڈاکٹر ءِ چدوپیسر ھپت کتاب چاپ ءُ شنگ بوتگ انت کہ آیانی تہ ءَ مکران، بلوچ اور انکا وطن، بلوچ تاریخ کے قدیم شخصیات ،قدیم بلوچ قبائل اور بلوچستان کی قدیم تاریخ ،بلوچ سماج ، بلوچ و بلوچستان، بلوچوں کی رومانوی داستانیں ھوار انت ءُ اے ھشت ایں کتاب ماں اردو زبان تہ ءَ انت –

دومی نیمگ ءَ ڈاکٹر فاروق بلوچ ءِ نوکتریں کتاب بلوچ آریائی تعلقات ءِ دیمدرائی ءَ مراگش ءِ برجم دارگ بوگ ءَ انت ءُ دیمدرائی مراگش ءِ گچینی مھمان پروفیسر ڈاکٹر فاروق بلوچ انت –

کتاب دیمدرائی مراگش عصمت اللہ خان جمالدینی لائبریری کمیٹی ءِ چیردستی ءَ ماں عصمت اللہ خان لائبریری گورنمنٹ بوائز ہائی سکول جمالدینی نوشکی برجم دارگ بوگ ءَ انت –

بلوچستان ءُ کراچی ءَ دو ورناہ زورانسری آوار جنی ءِ نشانگ کنگ بیتگ اَنت-

دی بلوچستان پوسٹ ھال پترءَ سر بیتگیں ھالانی رِد ءَ کیچ ءِ بُنجاھی شھر چہ تربت ءَ پاکستانی پوج ءَ یک ورنایے زورانسری آوار جنی ءِ نشانگ کتگ-

اِھوالکارانی رِدءَ ورناہ پاکستانی پوج تربت ءِ دمگ اسٹار پلس ءَ چہ ھما وھد ءَ آوار جتگ ءُ بیگواہ کتگ وھدے آ وتی دکان ءَ نندوک بیتگ-

آوار جنگ بیتگیں ورنائے پجّار ھپدہ سالی ئیں یاسر نجم ء نجم نام ءَ چہ بیتگ، کھول ءَ یاسر ءَ یل کنائینگ ءِ ھاتر ءَ دزبندی کتگ ءُ کہ انسانی ھکانی ادارہ یاسر ءِ پہ سلامتی یل کنائینگ ءَ وتی کرد ءَ پیلو بکن اَنت-

ھمے وڑ چہ کراچی ءَ بلوچستان ءِ جھمنندے پاکستانی پوج ءَ زورانسری آوار جنی ءِ نشانگ کتگ-

کھول ءِ رِدءَ حمل یعقوب جھمنند بلنگور دشت پاکستانی پوج ءُ چیریں ادارھانی کارندھاں چہ کراچی فقیرکالونی ءَ سُھب ءَ سیادانی لوگ ءَ چہ آوار جتگ ءُ بیگواہ کتگ-

کھول ءَ حمل ءِ پہ سلامتی یل کنائینگ ءِ لوٹ کتگ-