TBP Balochi

روکپتی بلوچستان ءِ دمگ سراوان ءَ ایرانی لشکر ءَ تیرگواری کنان ءَ دو مردم کُشتگ اَنت –

اھوالانی رد ءَ سراوان ءِ ھند گشت ءَ اسپیت کوہ ءَ ایرانی لشکر ءَ یک گاڑی ءِ سر ءَ تیرگواری کرتگ ءُ دو مردم کُشتگ اَنت-

اھوالانی رد ءَ کُشگ بیتگیں مردمانی عمر مزار زئی جھنند دشت ھاش ءُ شھمراد زئی جھمنند ناھوک سراوان ءِ ناماں زانگ بیتگ اَنت-

اھوالانی رد ءَ ھردوک راہ ءَ روگ ءَ بیتگ اَنت سنگر گپتگیں ایرانی مرساد ءَ آیانی سر ءَ تیرگواری کرتگ ءُ چریشی ءَ چہ گاڑی ءَ آس کپتگ ءُ گاڑی ستکگ بیتگ –

متھد ارب امارات ءِ سروک شیخ مھمد بن زاید ال نھیان ءَ آدینگ ءَ سینٹ پیٹرز برگ ءَ روسی سروک ولادیمر پوتن ءَ گوں گند ءُ نند کتگ –

ھردوکیں رھشوناں امارات ءُ روس ءِ دو نیمگی سیادی، دمگی ءُ میان استمانی سیاسی جاورھال ءُ یکے دومی ءِ کمکانی سر ءَ چار ءُ ٹپاس کتگ –

امارت الیوم ءُ عرب نیوز ءِ رد ءَ امارات ءِ سروک شیخ مھمد بن زاید ءَ گوشتگ کہ امارات ءُ روس ءِ میان ءَ مھکمیں سیادی ھست اِنت ءُ ایشی ءِ گیش کنگ ءِ واھگ ءَ دارگ ءَ ایں-

جھلانکی تکاں میان اُستمانی ءُ دمگی جیڑھانی سر ءَ باوست بیتگ ءُ یوکرین ءِ جیڑہ ءِ سر ءَ سیاسی راہ ءِ گیش ءُ گیوار کنگ ءِ سر ءَ گپ بیتگ-

دنیا ءِ وشھالی ءُ ایمنی ءِ ھاتر ءَ گپ ءُ توان ءِ پُل ءِ کشگ ءَ متھدہ ارب امارات ءِ پالیسی ءِ سر ءَ ھم ٹپاسکاری بیتگ –

شیخ مھمد بن زاید ءَ ٹویٹ کتگ ءُ گوشتگ کہ مروچی سینٹ پیٹرز برگ ءَ سروک ولادیمر پوتن ءَ گوں گند ءُ نند کتگ دانکہ امارات ءُ روس ءِ دو نیمگی سیادی ءُ یوکرین ءِ جیڑھانء سر ءَ گپ ءُ تران بہ بیت اِنت-

متھدہ ارب امارات ءِ اے دراھیں جھدانی پلامرزی ءَ دار ایت ءُ آئی ءِ مول ءُ مراد ایش اِنت کہ گپ ءُ تران ءِ راھے گشینگ ءُ جھانی ایمنی ءُ سارتی ءِ سر ءَ سیاسی راھ ءِ پٹگ ءِ جھد اِنت-

ایشی ءَ ھوار روسی سروک پوتن ءَ روس ءُ یوکرین ءِ میان ءَ بندیگیں مردمانی یل کنگ ءِ واستا جھد کتگ – شیخ مھمد بن زاید ءِ منتے گپتگ اَنت-

چین ءِ سروک شی جن پنگ ءُ بل گیٹس سَے سال ءَ پد دو کوھنیں سنگت دُچار کپتگ اَنت-

ھال سر کنوکیں ادارہ اے ایف پی ءِ رد ءَ چین ءِ سروک شی جن پنگ ءَ ٹیکنالوجی کمپنی مائیکروسافٹ ءِ بنھشت ایر کنوک بِل گیٹس ءَ آدینگ ءِ روچ ءَ بیجنگ ءَ گند ءُ نند کتگ-

گند ءُ نند ءِ وھد ءَ چینی سروک ءَ گوشتگ کہ بِل گیٹس سَے سال ءَ پد دیستگ وشی بوتگ ءُ اے ھم گوشتگ کہ اے سال ءَ اولی رند ءَ امریکہ ءِ جھمنندیں سنگتے ءَ گوں دُچار کپگ اِنت-

چین ءِ سروک ءَ گوشتگ ما امیت کن ایں چین ءُ امریکہ ءِ دوستی برجاہ بیت اِنت – چین ءِ سروک ءَ بِل گیٹس ءَ ڈایوتقئی سٹیٹ گیٹس ھاؤس ءَ گند ءُ نند کتگ کہ اے جاہ ءَ سرکاری مھماناں گون گند ءُ نند کنت –

چین ءِ سروک شی جن پنگ ءُ بِل اینڈ ملینڈا گیٹس فاؤنڈیشن ءِ شریداریں چیئرپرسن بل گیٹس ءَ ھنچیں وھدی ءَ دُچاری بیتگ کہ امریکہ ءِ وزیر ھارجہ انٹونء بلنکن ھم چین ءِ تر ءُ تاب مھتل کتگ-

گوستگیں چار سالانی توک ءَ بل گیٹس ءِ اے اولی رند اِنت کہ آ چین ءَ تر ءُ تاب کنگ ءَ اِنت – بل گیٹس دنیا ءِ توک ءَ سِیر ترین مردمانی لڑاں ھوار اِنتٹ

آ اے روکپتی باپاری ھما مردماں گوں ھوار اِنت کہ آیاں کرونا وائرس ءِ بندشاں پد چین ءِ تر ءُ تاب کتگ بیتگ –

کساس سَے سالاں داں کورونا وائرس ءِ سبب ءَ چین ءَ ڈنی دنیا ءِ مردم نہ شتگ اَنت – پشمبے ءِ روچ ءَ بل اینڈ ملینڈا گیٹس فاؤنڈیشن ءَ ملیریا ءُ ٹی بی ءَ گوں جنگ کنوکی ءِ پژدر ءَ چینی مھلوک ءَ را پنچاہ ملین ڈالر دیگ ءِ جار جتگ بیتگ-

فاؤنڈیشن ءَ جار جنان ءَ گوشتگ کہ آ گلوبل ھیلتھ ڈرگ ڈسکوری انسٹی ٹیوٹ ( جی ایچ ڈی ڈی آئی) ءِ ھواری ءَ کمک ءَ برجاہ دار ات اِنت-

ھمے سال ءَ امریکہ ءِ بازین مزن نامیں باپاری مردماں چین ءِ تر ءُ تاب کتگ کہ ایانی توک ءَ جی پی مورگن ءِ سروک جیمی ڈائن ءُ ٹیسلا ءِ سروک ایلون مسک ھوار اَنت ءُ مارچ ءِ ماہ ءَ ایپل ءِ سروک ٹم کوک ءَ ھم چین ءِ تر ءُ تاب کتگ بیتگ –

براھوئی زبان ءِ گشندہ خالق فرہاد ءِ گھار کہ گوستگیں روچ ءَ شال ءِ نادراھجاہ ءَ بوتگ جانسلامتی ءِ آسراتی نہ دیگے سوب ءَ بیران بوتگ –

وئیل ءِ بگیری ءَ سول سوسائٹی، بلوچ گل ءُ بیران بوتگیں زالبول ءِ کھول ءِ نیمگ ءَ مروچی ماں شال ءِ پریس کلب ءِ دیم ءَ زھرشانی کنگ بوتگ –

شال ءِ پریس کلب ءِ دیم ءَ اھوالکاراں گوں تران کنان ءَ خالق فرہاد ءِ گوشگ ات کہ دو روچ ساری آئی ءِ گھار ءِ جاور نگیگ بوتگ انت گڈا ڈاکٹر سلیم بڑیج ءِ پرائیوٹ نادراھجاہ ءَ برتگ اش کہ اودے ڈاکٹراں ھمے گوشتگ کہ نادراہ بی ایم ایم ءِ وارڈ ءَ برگ بہ بیت وھدیکہ کھول ءَ نادراھ زرتگ ءُ بی ایم سی ءَ سر بوتگ انت گڈا ڈاکٹر اودا ساڑی نہ بوتگ –

آئی ءَ گوشتگ کہ ھمے وھد ءَ آئی گھار یک نرسے ءَ انجکشن ءِ جتگ کہ چریشی ءَ آ بازیں اداراں بےھوش بوتگ ءُ بیھوشی ءِ جاوراں آ بیران بوتگ وھدیکہ اے وھد ءَ نادراھجاھے تہ ءَ ھچ ڈاکٹر نہ بوتگ ءُ ناکہ سلیم بڑیج وت اتکگ –

وئیل ءِ بگیری ءَ مروچی شال ءِ پریس کلب ءِ دیم ءَ زھرشانی کنگ بوتگ ءُ کہ بی ایم سی نادراھجاہ ءُ ڈاکٹرانی بگیری ءَ ترندیں نارہ جنگ بوتگ –

ھمے وھد ءَ خالق فرہاد ءِ گوشگ ات کہ آئی ءِ گھار ءِ مرگے زمّہ دار بی ایم سی ءِ واکدار ءُ ڈاکٹر انت کہ نادراہ ءَ وتی بے پرواھی ءِ سوب ءَ کُش انت – اے زھرشانی ءَ منی گھار واتر نہ ایت بلے مئے لوٹ ھمیش انت کہ دگہ گھارے ءِ گوم ءَ چشیں ناھکی مہ بیت –

آئی ءَ دیمتر ءَ گوشتگ کہ منی گھارے مرگ ءِ زمہ دار سرجمیں نزام انت پرائیوٹ نادراھجاہ ءُ ڈاکٹر بندوک انت مھلوک اے ناھکیانی بگیری ءَ پاد بہ ایت –

شال ءِ درانگاز کنوکانی گوشگ ات کہ تاں ھما وھد ءَ زمہ دارانی بگیری ءَ گامگیج زورگ نہ بیت زھرشانی ءِ درچ برجاہ بیت انت –

بلوچ ورنا ءُ بلوچی زبان ءِ ندکار سکی ساوڑ ءِ زورانسری آوار جنی ءِ بگیری ءَ مروچی زھرشانی کنگ بوتگ –

ھب چوکی ءِ زھرشانی بلوچ اسٹوڈنٹس فرنٹ ءِ نیمگ ءَ کنگ کہ درنگاز کنوکاں چہ لسبیلہ پریس کلب ءَ تاں بنجاھی شھدگ ءَ روانک کش اِتگ ءُ واتر اتکگ انت پریس کلب ءِ دیم ءَ وتی زھرشانی ءِ نبشتہ کنائینتگ –

سخی بخش بلوچ پنام ءِ سکی ساوڑ ھزدار ءِ دمگ نال سریج ءِ جھمنند انت کہ ھمے ماھ ءِ پنچ جون ءَ کیچ ءِ بنجاھی شھر چہ تربت ءَ آوار جنگ بوتگ –

سخی بخش ءِ کھول ءِ رِد ءَ آھاں سکی ساوڑ ءِ بیگواھی ھال پولیس ءَ داتگ وھدیکہ پاکستانی پوج ءِ دست ءَ زورانسری اوار جنگ بوتگیں سخی بخش ھنگت زاھر کنگ نہ بوتگ –

ھب چوکی ءِ زھرشانی ءَ تران کنان ءَ بی ایس ایف ءِ رھشونانی گوشگ ات کہ سکی ساوڑ ءِ زورانسری آوار جنی راستی ءَ گوں زبان ءَ دژمنی ءِ درور ءَ دنت – ریاست ءَ گوں یک ندکارے ءَ چی ھترہ ھست بلے ادا جست کنوک نیست ھمے واست ءَ ھرکس ءَ دل بلوٹ آوار بہ جن ءُ سالاں سال بیگواہ بکن ءُ آئی ءِ کھول ءَ ازیت بہ دے –

آھانی گوشگ ات کہ سکی ساوڑ ءَ یک استادے ءِ دروشم ءَ بلوچ ءُ بلوچی زبان ءِ دیمروئی واھشت درشانی کتگ اے وڈیں ورنایانی آوارجنی ءَ بلوچستان ءِ جاور چدوگنتر بنت – جھندم پہ اشی ءَ کہ بلوچستان ءَ زورانسری آوار جنیانی درچ ھلاس کنگ بہ بیت گیشتر مردم آوارجنی ءِ نشانگ کنگ بوگ ءَ انت –

ترانکاراں سکی ساوڑ ءِ وش ءُ سلامتی یل کنگ ءُ سرجمیں بلوچستان ءَ زورانسری آوارجنیانی بند کنگ ءِ لوٹ کتگ –

سر بیتگیں ھالانی رد ءَ روکپتی بلوچستان ءِ دمگ سراوان ءَ یک ڈپوے ءَ آس کپتگ ءُ چریشی ءَ ڈیزل ءِ ڈپو ءَ آس کپتگ –

اھوالانی رد ءَ سراوان ءِ ھند گشت ءَ ناگتی ڈیزل ءِ ڈپوے ءَ آس کپتگ ءُ چریشی ءَ اود ءَ ڈپو ءَ مانیں پٹرول ءُ ڈیزلانی سبب ءَ آس برانز گپتگ ءُ ڈپو ءِ واھند ءَ بازیں مالی تاوان بیتگ اَنت-

اھوالانی رد ءَ آس کپگ ءِ سبب ءَ دگہ جانی تاوانانی اھوال نہ بیتگ اَنت بلے آس ءَ بازیں کساسے ءَ مالی تاوان بیتگ اَنت –

اھوالانی رد ءَ آس کپگ ءِ سبب زانگ نہ بیتگ بلے اود ءَ دیراں پد آس توسینگ بیتگ –

زری توپان بپر جوائے ءَ گوستگیں شپ ءُ کیٹی بندر ءَ یک سد ءُ پنجاہ کلو میٹر ءِ دوری ءَ گجرات ءَ لمبے داتگ چریشی ےِ سبب ءَ مالیا ءِ چل ءُ پنچ میتگاں بجلی نیست اِنت –

بپر جوئے گجرات ءَ لمبے داتگ کہ ھمے وھد ءَ توپان ءِ گوات ءَ ھمک چیز وتی جاہ ءَ سرینتگ اَنت-

ھندوستانی رسانکدر ءِ رد ءَ توپان ءَ گوات ءِ سبب ءَ سَے ھزار ءُ پنچ سد ءَ گیش بجلی ءِ کمھبہ کپتگ اَنت ءُ ھمے وڑ سدانی کچ ءَ درچک کپتگ اَنت-

رپورٹ ءِ رد ءَ بجلی ءِ کمھبیانی کپگ ءَ گجرات ءِ ھند مالیا ءَ چل ءُ پنچ میتگاں بجلی نیست اِنت ءُ جتا جتائیں وئیلاں بیست ءُ دو مردم ٹپیگ بیتگ اَنت-

ھندوستان ءِ گجرات ءَ گواتنی ترندی یک سد ءُ پانزدہ کم بیتگ ءُ یک سد ءُ پنچ کلومیٹر ءَ یک کلاکے ءَ بیتگ ھمے وڑ ءَ توپانی سبب ءُ رجستھان ءَ مروچی ھورانی گوارگ ءِ گمان ھست اِنت-

زری توپان بپر جوائے ءَ ھمدوستان ءِ ریاست گجرات ءَ سوروشتراکچھ زری ھنداں لمبے داتگ ءُ گوریچان ءُ رودراتکی زمینی ھند ءَ مانرتگ –

ھمے وڑ ءَ نیشنل ڈیزاسٹرمینجمنٹ اتھارٹی ءِ رد ءَ زری توپان ھندوستانی گجرات ءِ زری لمب پرلینڈ فال سرجم کتگ، توپان کیٹی بندر ءَ یک سد ءُ بیست ءُ پنچ مِل زرباری روکپت ءَ جاڑیگ اِنت، توپان نیزور بیتگ سائیکلون ءُ داں بیگاہ ءُ ڈپریشن ءِ مٹ بوگ ءِ گمان اِنت –

روکپتی بلوچستان ءِ بنجاھی شھر زاھدان ءَ ایرانی لشکر ءِ دست ءَ بیگواہ، گوستگیں سال ءِ ستمبر ءَ زاھدان ءَ ایرانی لشکر ءِ تیرگواری ءَ بیران بیتگیں مردمانی یات ءَ ھمک آدینگ ءِ وڑ ءَ اے آدینگ ءَ ھم ھزارانی ھساب ءَ مھلوک ءَ زھرشانی کتگ-

زھرشانی زاھدان ءِ مزنیں مسیت مکی مسیت ءَ آدینگ ءِ نماز ءَ پد بندات بیتگ کہ اود ءَ زھرشانی کنوکانی دست ءَ پلے کارڈ، بینر بیتگ اَنت کہ آیانی سر ءَ زُلم ءُ زوراکیانی سر ءَ لبز نبشتگ بیتگ اَنت –

زھرشانی کنوکاں ھزارانی ھساب ءَ مھلوک ءَ بھر زرتگ ءُ اود ءَ سرکار ءِ ھلاپ ءَ اوگام جتگ ءُ بیگواہ بیتگیں مردمانی یل کنگ ءِ لوٹ ءُ کشگ بیتگیں مردمانی یل کنگ ءِ لوٹ کتگ اَنت-

زانگ بہ بیت گوستگیں سال ءِ ستمبر ءَ زاھدان ءَ ماھو بلوچ ءِ انساپ ءِ ھاتر ءَ بیوکیں زھرشانی ءِ سر ءَ ایرانی لشکر ءَ بیڑ برتگ ات کہ چریشی ءَ سد ءَ گیش مردم کُشگ بیتگ ات اَنت ءُ بازیں کچے ءَ زدگ بیتگ ات اَنت-

چرے وئیل ءَ پد ھمک آدینگ ءَ اود ءَ مردم یاتگری ءِ ھاتر ءَ زھرشانی کن اَنت ءُ وتی مردمانی واستا انساپ لوٹ اَنت –