TBP Balochi

کویت ءَ شیخ احمد نواف الصباح ءِ سروکی ءَ نوکیں سرکار ءِ گچینکاری بیتگ-

اے سرکاری گچینکاری ءَ پانزدہ مزنیں وزیر ھوار بیتگ اَنت ءُ جتا جتائیں بنگپ ءُ لیکھانی سر ءَ گپ بیتگ اَنت-

عرب نیوز ءِ رد ءَ نوکیں سرکار ءَ پانزدی وزرا ھوار اَنت کہ ایشانی توک ءَ خالد الاحمد الصباح نائب وزیر اعظم ءُ وزیر داکلہ بیت اِنت-

ھمے وڑ ءَ سعد حمد ناصر البراک کویت ءِ وزرات پیٹرولیم ءِ واستا گچین کنگ بیتگ –

رپورٹ ءِ رد ءَ شیخ احمد فھد الاحمد الصباح نوکیں وزیر دفاع دارگ بیتگ، سالم عبداللہ الجابر الصباح وزیر ھارجہ دارگ بیتگ ءُ عثمان مھمد العیبان وزیر ءِ باپار دارگ بیتگ اَنت-

پنجگور ءُ ڈیرہ گازی خان ءَ اھوال اَنت کہ پاکستانی پوج ءَ دو مردم زورانسری آوار جتگ ءُ بیگواہ کرتگ اَنت-

بیگواہ بیتگینانی پجار قادر بخش ء واجداد جھمنند کلری گچک پنجگور ءُ راشد ڈیرہ گازی خان ءِ نام ءَ زانگ بیتگ اَنت-

دمگی مردمانی رد ءَ قادر بخش پوج ءَ ھمے ماہ ءِ پانزدہ جون ءَ گچک کھن ءَ پوجی بنجل ءَ لوٹائینتگ ءُ پد ءَ بیگواہ کتگ ءُ چریشی ءَ پد آئی ءِ ھچ ھال نیست اِنت-

دومی نیمگ ءَ راشد پوج ءَ گوستگیں آدینگ ءَ ڈیرہ گازی خان ءَ دزگیر کنگ ءَ پد بیگواہ کتگ کہ داں انگت ءَ بیگواہ اِنت –

ایلون مسک ءَ گوشتگ کہ اسمارٹ ٹی وی ءِ واستا ٹوئٹر ءِ ویڈیو ایپلہ کیشن آئی ءِ کمپنی ءِ شوربندیاں ھوار اِنت –

ھال سر کنوکیں ادارہ روئٹرز ءِ رد ءَ ٹوئٹر ءَ وتی پلیٹ پارم ءِ سر ءَ ویڈیوانی گیش کنگ ءِ ھاتر ءَ گامگیج زرتگ-

یک کارمرد کنوکے ءَ ٹویٹ کتگ کہ ٹوئٹر ءَ ویڈیو ءِ ایپلی کیشن ءِ درکاری اِنت – چریشی ءِ پسو ءَ ٹوئٹر ءِ سروک ایلون مسک ءَ گوشتگ کہ اے پیداک اِنت ٹوئٹر ءِ نوکہں سی ای او لنڈا یکرینو ءُ ایلون مسک ءَ پشمبے ءِ روچ ءَ ٹوئٹر انویسٹرز ءِ یک نیادے ءَ گوشتگ کہ آئی ءِ کمپنی ویڈیو ےِ سر ءَ دلگوش دیگ ءِ واھگ ءَ دار ایت-

گوستگیں ماہ ءَ فوکس نیوز ءِ گوستگیں سرھالکار ٹککر کارلسن ءَ ٹوئٹر ءَ ٹککر آن ٹوئٹر ءِ نام ءَ یک نیادے بندات کتگ بیتگ –

ویڈیو ءِ درگت ءَ کارمرد کنوکاں روئٹرز ءَ گوشت کہ ٹوئٹر اے گمان ءَ کنگ اِنت آ ٹککر کارلسن ءُ اے دابیں ویڈیوانی موادانی ھواری ءَ ھالتاکاں زرت کنت ءُ سپاسنرشپ ءَ گپت کنت-

مئی ءِ ماہ ءَ ایلون مسک ءَ جار جتگ ات کہ آ ٹوئٹر ءَ ویڈیو ءُ آڈیو کال ءِ پیچر ءَ ھوار کنت-

ایلون مسک ءَ نوکتریں گپانی توک ءَ گوشتگ باز زوت اے پلیٹ پارم ءَ شما ھینڈل ءَ وائس ءُ ویڈیو چیٹ ھم کُت کن ات- آئی ءَ گوشتگ ات کہ پون نمبر ءَ ابید شما دنیا ءِ کجام کنڈا کجام ھم مردم ءَ گون تران کت کن ات-

اسپین ءِ این جی او اوپن آرمز ءَ گوشتگ کہ بھیرہ روم ءَ بوجیگ ءَ سواریں یک سد ءُ ھبدہ مردم کہ آ درانڈیھی ءَ روگ ءَ بیتگ اَنت ءُ ریسکیور کتگ اَنت-

برتانیہ ءِ ھال سر کنوکیں روئٹرز ءِ رد ءَ شمبے ءِ روچ ءُ اوپن آرمز ءَ یک درشانے ءَ گوشتگ کہ آئی ءَ بیست ءُ پنچ زالبولاں ھوار یک سَے سالی زھگے ءَ ھوار یک سد ءُ ھبدہ مردم بچینتگ اَنت –

آئی ءَ گوشتگ کہ ایشانی سیادی سوڈان، اریٹیریا ءُ لیبیا ءَ اِنت، درشان ءِ رد ءَ بوجیگ لیبیا ءِ زر سبراتھا ءَ سپرے بندات کتگ ئے اے ریسکیو آپریشن لیبیا ءِ زر ءَ سِی کلو میٹر ءِ دور ءَ میان اُستمانی زربند ءَ کنگ بیتگ –

گیش گوشگ بیتگ کہ اوپن آرمز ءِ جھاز ءِ توک ءَ درستیں مساپرانی چِک ءُ تان بوگ ءَ اِنت- بلے اے گوشگ نہ بیتگ کہ مساپراں کجا برگ ءَ اَنت –

زانگ بہ بیت لھتے روچ ءَ پیش زرباری یونان ءِ زر ءِ نزیک ءَ درانڈیھاں روکیں یہ بوجیگے بڈ اتگ ار کہ چریشی ءَ ھپتاد ءُ ھشت مردم مرتگ ات اَنت ءُ یک سد ءُ چار مردم بچینگ بیتگ ات اَنت-

یونان ءِ کوسٹ گارڈز ءِ رد ءَ اے وئیل سَے شمبے ءُ پشمبے ءِ میانی شپ ءَ پیرلوس ءَ زرباری روکپت ءَ پیش اتکگ بیتگ-

یونان ءِ واکدارانی گوشگ ات کہ اے جھاز ءَ سدانی کچ ءَ مردم سوار بیتگ اَنت کہ آ بچینگ بیتگ اَنت، ایشانی توک ءَ پاکستانی، مسری، شامی ءُ اوگانی شھری ھوار بیتگ اَنت –

شمبے ءِ روچ ءَ پاکستان ءِ ڈنی کارانی کارگس ءَ گوشگ بیتگ کہ یونان ءِ زر ءَ بڈ اتگیں بوجیگ ءَ سواریں سلامتی ءَ بچیتگیں دوازدہ پاکستانی پجار بیتگ اَنت داں انگت ءَ مرتگیں پاکستانی کساس دیم ءَ نیتکگ اَنت-

روکپتی بلوچستان ءِ بنجاھی شھر زاھدان ءَ پنچ سالاں بندیگیں بلوچے پاھو دیگ بیتگ-

اھوالانی رد ءَ زاھدان ءِ بندیگ جاہ ءَ یک بندیگیں بلوچے نشہ باپاری ءِ بھتام ءَ پاھو دیگ بیتگ –

پاھو دیگ بیتگیں مردم ءِ پجار مھمود رخشانی ء ھمزہ رخشانی ءِ نام ءَ زانگ بیتگ کہ آ زاھدان ءِ جھمنند گوشگ بوگ ءَ اِنت –

اھوالانی رد ءَ مھمود دوھزار ءُ ھژدہ ءَ نشہ ءِ باپاری ءِ بھتام ءَ دزگیر کنگ بیتگ ءُ پد ءَ آئی ءِ سر ءَ پاھو ءِ ھکم اتکگ بیتگ-

اھولانی رد ءَ آئی ءِ کھول گوستگیں شپ ءَ گڈی گند ءُ گدار ءِ ھاتر ءَ پون کنگ بیتگ اَنت گڑا آ بس تھنا بیست مِنٹ ءَ اجازت دیگ بیتگ اَنت –

زانگ بہ بیت روکپتی بلوچستان ءَ بندوکیں مردم اے سال ءَ بازیں کچے ءَ پاھو دیگ بیتگ اَنت کہ آیانی سر ءَ گیشتری بھر نشہ باپاری ءِ بھتام جنگ ءُ پاھو دیگ بیتگ اَنت –

بلوچ نودربر گل بساک ءِ سیمی بنجاھی لس مجلس نیاد ءِ دومی روچ آسر، شبیر بلوچ سرکماش ءُ اظہر بلوچ سیکریٹری جنرل گچین کنگ بوتگ انت –

بلوچ اسٹوڈنس ایکشن کمیٹی ءِ سیمی بنجاھی لس مجلس ءِ نیاد بنجاھی سرکماش بانک ڈاکٹر صبیحہ بلوچ ءِ سروکی ءَ 17,16, 18, جون ءَ نمیرانیں صبا دشیاری یات ءُ بنام ءِ محمد علی تالپور ءُ صورت خان مری ماں شال ءَ برجاہ – مروچی ھبدہ جون ءَ بنجاھی لس مجلس ءِ دومی روچ آسر بوتگ –

دیوان ءِ دو روچی نیاد ءَ بازیں ایجنڈھانی سر ءَ گپ تران ءَ پد دیمتری کارانی ایجنڈہ ءَ گچین کاری کنگ بوتگ کہ بنجاہ ءِ نوکیں اگدہ دار گچین کنگ بوتگ انت – نوک گچین کنگ بوتگیں کابینہ ءَ شبیر بلوچ بید ءِ دیمے مردمے سرکماش ءُ اظہر بلوچ سیکریٹری جنرل گچین کنگ بوتگ انت –

گل ءِ جار ءِ تہ ءَ گوشگ بوتگ باند ءَ بزاں یکشمبے ءِ روچ ءَ ادار یازدہ ءَ بولان میڈیکل کالج شال ءَ سوگندی مراگش برجم دارگ بیت انت –

بلوچستان: جون شانوکیں سرڈگار

ٹی بی پی شونگال

بلوچستان ءِ پولیس ءِ کاونٹر ٹیررازم ڈیپارٹمنٹ ءَ 30 اگست 2021 ءَ ڈپٹی کمشنر ھزدار ءُ ڈپٹی کمشنر آواران ءَ یک نمدی یے دیم داتگ اَت، ایشی ءِ تہ ءَ گُشگ بیتگ اَت کہ ناصر فاروق ء غلام فاروق جھمنند صادق آباد زھری، غلام جان ءِ باران جھمنند بائی پاس شال، عبدالقیوم ءِ زھری خان جھمنند زھری ھزدار، کمال خان ءِ باھوٹ جھمنند چُکی آواران یک پولیس میڑئے ءِ تہ ءَ کُشگ بیتگ اَنت ءُ آ ناشرکار نامینگ بیتگ اَنت۔ کاونٹر ٹیررازم ڈیپارٹمنٹ ءَ گمانی پولیس میڑ ءِ تہ ءَ کُشگ بیتگیں بے وارس نامینتگ ءُ ایدھی ءِ کمک ءَ دشت تیرہ میل ءَ کل ءُ کسارت کُتگ اَنت۔

دشت تیرہ میل ءَ پجار نہ بیتگیں جونانی گورستان ءِ آبات اِنت۔ شال- سبی دگ ءِ سر ءَ برجاھیں گورستان ءِ تہ ءَ دو سد ءَ گیشتر گور اَنت، اے جون کوھی دمگ ءُ گیاباناں چہ بے وارسیں جاوراں دزکپتگ اَنت۔ بلوچ آجوئی تکانی گُشگ اِنت کہ اے دزکپتگیں جونانی تہ ءَ گیشتریں کچ چہ پیسر ءَ زورانسری بیگواھی ءِ آماچیں مردمانی اَنت کہ چہ ایشاں بازیں جون ژانگولیں جاورانی تہ ءَ نادراھجاہ ءَ آرگ بنت ءُ بازیں دروگیں میڑانی تہ ءَ کُشگ بیتگ اَنت۔

دو سال پیسر بے وارس نامینتگ ءُ کَڈ کُتگیں جون زورانسری بیگواھیں مردمانی اَنت، اے جونانی تہ ءَ چہ زھری ءَ زورانسری بیگواہ بیتگیں ناصر جان قمبرانی ءُ نومبر دو ھزار ءُ بیست ءَ چہ حب چوکی ءَ فرنٹیئر کور ءِ کارندھانی دست ءَ بیگواہ بیتگیں عبدالقیوم زھری ءِ نام چہ کھول ءَ پجار کُتگ ءُ وتی ھنداں کل ءُ کسارت کتگ اَنت۔

بیست ءُ یکمی کرن ءِ بندات ءَ چہ بلوچستان ءِ آجوئی ءِ جُنز ترندی ءَ گوں برجاہ اِنت ءُ بلوچ آجوئی ءِ جُنز ءِ راہ ءَ دارگ ءِ ھاتر ءَ زورانسری بیگواھیں مردمانی ٹپیگیں جونانی دروشم ءَ دزکپگ ءِ درچ 2008 ءَ بندات بیتگ اَت کہ داں انگت جتاھیں دروشماں برجاہ اِنت۔ پیپلز پارٹی ءُ مسلم لیگ ن ءِ اھداں ھزارانی کچ ءَ زورانسری بیگواھیں مردمانی جون جتاجتائیں دمگاں چہ ژانگولیں دروشماں دزکپتگ اَنت۔

عبدالقیوم زھری ءِ جِنک زنیرہ ءِ پئیمیں بازیں زھگ ھمے اوست ءَ نشتگ اَنت کہ آیانی بیگواھیں پِت یل بنت بلے آ جونانی دروشم ءَ بے نامیں مردمانی گورستان ءَ چہ دزکپگ ءَ اَنت۔

پاکستان ءِ واکداریں ادارگاں بلوچ نیشنلسٹ آرمی ءِ گمانی کماندار ءَ رسانکدر ءِ دیم ءَ آرتگ ءُ بلوچ جیڑہ ءِ گیوار کنگ ءِ ٹاہ دئیگ ءَ اَنت ءُ دومی نیمگ ءَ زنیرہ ءِ پئیمیں زھگاں چہ آیانی سرانی ساھگ پچ گِرگ بئیگ ءَ اَنت۔ زورانسری بیگواھیں مردمانی کُشگ ءَ چہ بلوچ آجوئی ءِ جُنز ءَ توانائی رس ایت ءُ لس مھلوک ءِ تہ ءَ برجاھیں زھر ءُ گم ءِ تہ ءَ گیشی کَئیت اِنت۔

روکپتی بلوچستان ءِ دمگ ھاش ءَ مزوری ءِ وھد ءَ یک ورنایے بیران بیتگ –

اھوالانی رد ءَ ھاش ءِ ھند گوھر کوہ ءَ یک لوگے ءِ بندگ ءِ وھد ءَ بلاکے کپتگ ءُ بلاک ورنا ءِ سر ءَ لگ اتگ چریشی ءَ چہ آ زدگ بوتگ ءُ زدگی ءَ رند آئی ءَ ٹپ نہ سگ اتگ ءُ بیران بیتگ-

اھوالانی رد ءُ بیران بیتگیں ورنا ءِ پجار ھامد ایسازئی ءِ نام ءَ زانگ بیتگ آ شاہ مھمد ءِ زھگ اِنت کہ آئی ءِ اُمر شانزدہ سال اِنت آ نُھ کلاس ءِ یک نودربرے –

اے وئیل گوستگیں روچ ءَ پیش اتکگ کہ اود ءَ برزیں دیوال ءَ بلاکے لگوشتگ ءُ ھامد ءِ سر ءَ لگ اتگ چریشی ءَ چہ ھامد زدگ بیتگ ءُ نادراہ جاہ ءَ برگ بیتگ کہ اود ءَ آئی ءَ وتی ٹپ نہ سگ اتگ ءُ بیران بیتگ-

ھندوستا ءَ گیش کپتگیں گرم ءَ ترندیں پاھاراں مانشان اتگ چریشی ءِ سبب ءَ شست سال ءَ برزی مردماں لوگانی تہ ءَ نندگ ءِ کڈنی کنگ بیتگ-

ھال سر کنوکیں ادارہ ایسوسی ایٹڈ پریس ءِ رد ءَ ھندوستان ءِ گوریچانی اُستان اتر پردیش ءَ ترندیں گرم ءِ سبب ءَ سی ءُ چار مردم بیران بیتگ اَنت-

رپورٹ ءِ رد ءَ بیران بیتگیں مردمانی اُمر ءِ کساس شست سال ءَ برز بیتگ ءُ جانی سلامتی ءَ پیش ناگیگ بیتگ اَنت ءُ اے درستیں مردمانی سیادی اترپردیش ءِ بنجاھی شھر لکھنو ءَ سَے سد کلو میٹر ءِ دوری ءَ بلیا ءَ اِنت-

بلیا ءِ چیف میڈیکل جاینت کمار ءَ گوشتگ کہ پشمبے ءِ روچ ءَ بیست ءُ سَے مردمانی بیرانی بیتگ اَنت ءُ دگہ یازدہ کس آدینگ ءِ روچ ءَ بیران بیتگ اَنت –

آئی ءَ گوشتگ کہ اے درستیں کجام نا کجام یک نادراھی ءِ آماچ بیتگ اَنت چریشی ءِ سبب ءَ ترندیں گرم ءَ آ بیران بیتگ اَنت –

میڈیکل آفیسر جاینت کمار ءِ گوشگ اِنت بیران بیتگیں مردمانی بیرانی دلپٹ بوگ، فالج ءُ ڈائریا دل ءُ لاپ ءِ سبباں پیش اتکگ اَنت-

یک دگہ میڈیکل آفیسر دیواکر سنگھ ءِ گوشگ اِنت اے مردم ناجوڑیں جاوراں بلیا ءِ مزنیں ھسپتال ءَ آرگ بیتگ اَنت –

آئی ءِ گوشگ اِنت اگاں گرم ءِ زور گیش بوت گڑا دگہ کماشیں مردمانی جان ءُ ساھانی واستا ترس اِنت –

ھندوستان ءِ میٹرولوجیکل ڈیپارٹمنٹ ءِ ڈیٹا ءِ رد ءَ آدینگ ءِ روچ ءَ بلیا ءَ گیش ءَ چہ گیش چل ءُ دو ٹک دو گرم ءِ زور بیتگ –

دومی نیمگ ءَ سرجمین استان ءَ لوڈشیڈنگ ءَ ھم مھلوک باز تکانسری ءِ دیمپان اِنت ءُ زھرشانی ھم بیتگ اَنت-

اترپردیش ءِ سروزیر یوگی ادتیانتھ ءَ مھلوک ءَ سدکی داتگ کہ سرکار بجلیانی گھتر کنگ ءِ جھد ءَ اِنت-

آئی ءَ آدینگ ءِ شپ ءَ آئی ءَ وتی درشان ءَ گوشتگ ھمک میتگ ءُ شھراں بجلی آسراتی سرجمی ءَ دیگ بہ بیت اگاں ھرابی پیش اتکگ گڑا زوت زوت ءَ شر کنگ بہ بنت-