TBP Balochi

امریکہ ءِ شھر شکاگو ءِ یکسد ءُ چار سالیگیں پیر زالے ءَ سینزدہ ھزار ءُ پنچ سد فُٹ برز پراھگ ءَ اسکائی ڈائیو کتگ –

درملکی رسانکدرانی رِد ءَ امریکہ ءِ شھر شکاگو ءِ جھمنند یکسد ءُ چار سالیگیں پیر زال ڈورتھی ہوفنر ءَ سینزدہ ھزار ءُ پنچ سد فُٹ زمین ءَ برز پراھگ ءَ سوبمندی ءَ گوں اسکائی ڈائیو کتگ زمین ءِ سر ءَ ایر اتکگ –

ڈورتھی ہوفنر وھدیکہ چہ پرآھگ ءَ ایر آیگ ءَ بوتگ گڈا مزنیں کچے ءَ مردم یکجاہ بوتگ ءُ آئی ءِ ستاہ ءِ کتگ –

ھمے میان ءَ پیر زال ءِ گوشگ ات کہ اے ھیرانی ءُ پُرسکونیں تجربہ ءِ بوتگ ، آئی ءَ امیت انت کہ میان استمانی اسکائی ڈائیو ءِ رکارڈ ءَ پروشیت ءُ وتی نام ءِ کنت –

زانگ بہ بیت سال دوھزار ءُ بیست ءُ دو ءَ یکسد ءُ سَے سالی پیر زالے ءَ میان استمان ریکارڈ وتی نام ءَ کتگ بوتگ –

بلوچستان ءِ دمگ پنجگور ءَ تراک ءُ تیرگواری ءِ توار اشکُنگ بوتگ انت –

گیشیں ھالانی رِد ءَ پنجگور ءِ دمگ چتکان ءَ تراکے ءَ پد سک باز تیرگواری کنگ بوتگ –

اھوالکار ءِ رِد ءَ سلاہ بندیں رخشان پھل ءِ نزیک ءَ پاکستانی پوج ءِ سر ءَ راکٹ گولہ ءِ آس داتگ، بلے تنی وھدی واکدارانی نیمگ ءَ اے درگت ءَ ھچ وڈیں ھبر شنگ کنگ نہ بوتگ –

وھدیکہ دومی نیمگ ءَ تربت پولیس ءِ رِد ءَ ناشناسیں مردماں دوشی شپ ادار دھ ءَ ایف سی بلوچستان ءِ ساؤتھ ہیڈکوارٹر تربت ءِ گیٹ نمبر سَے ءَ دز بمب ءِ چگل داتگ کہ نہ ترک اِتگ –

پولیس ءَ بمب ءِ ناکارہ کنگے ھاتر ءَ بمب ڈسپوزل ٹولی دیم داتگ انت –

بھارت ءُ نیپال ءَ ھوار بازیں ڈیھاں زمین چنڈ بوتگ ، زمین چنڈ ءِ ترندی 6.2 نبشتہ کنگ بوتگ –

بھارت ءِ بنجاہ ءُ اترپردیش ءَ ھوار بھارت ءِ بازیں ھند ءُ دمگاں زمین چنڈ بوتگ، بازیں ھند ءُ دمگانی مھلوک چہ وتی گِساں در اتکگ ءُ ڈن ءَ پچیں آزمان ءِ چیر ءَ نشتگ انت –

دومی نیمگ ءَ نیپال ءُ چین ءِ سیمسری دمگاں ھم زمین چنڈ بوتگ، ھمے گوشگ بوگ ءَ انت زمین چنڈ ءِ جھلی دھ کلومیٹر بوتگ کہ آئی ءِ بنجاہ نیپال بوتگ انت –

اوگانستان ءَ ھم زمین چند بوتگ ءُ آئی ءِ گیشی 4.7 نبشتہ کنگ بوتگ –

نیشنل سینٹر فار سیمولوجی ءِ رِد ءَ اوگانستان 4.7 زمین چنڈ اتکگ ، این سی ایس ءِ رِد ءَ زمین چنڈ ءِ جھلانکی 10 کلومیٹر زمین چیر بوتگ –

ھمے وڈ بلوچستان ءَ ھم زمین چنڈ ءِ پیش گُشی کنگ بوتگ، وکداراں ماں شال ءَ دو روچ ءَ کھن جنی ءَ مکن کتگ –

اسسٹنٹ کمشنر شال ءَ شنگ کتگیں جارے ءِ تہ ءَ گوشتگ کہ شال ءَ زمین چنڈ ءِ پیش گشی ءِ پدژدر ءَ دو روچ ءَ کھن جنگ ءِ سر ءَ بندش جنگ بوتگ –

ھمے گوشگ بوتگ تاں دو روچاں کھن جن مکن کنگ بنت، دو روچ ءِ میان ءَ کھن ءِ واھند یا ٹیکدار ھچ وڈیں تاوانانی زمہ وار نہ انت –

شال ءِ دمگ ماڈل ٹاون ءَ ڈاکٹر منوج اکیڈمی ءَ آس لگ اِتگ، ھمے گوشگ بوگ ءَ انت کہ آس چہ شارٹ سرکٹ ءِ سوب ءَ لگ اِتگ –

بُنگرگ ءَ پد آس کُشیں گاڑی ھما دمان ءَ سر بوتگ انت ءُ درسیں نودربر وش ءُ سلامتی چہ اکیڈمی ءَ درکنگ بوتگ انت ، بازیں دوتانء سوب ءَ بازیں جنک ءُ بچکیں نودربرے دمتوس بوتگ انت – بلے ھچ وڈیں جانی تاوان ءِ ھال نیست –

سول نادراھجاہ ءِ بنشون ءِ رِد ءَ تنی وھدی بیست ءُ شش سانمندیں نودربر آرگ بوتگ انت –

کیساک ءِ جنکانی وانگجاہ ءَ استادانی نہ بوگ ءِ بگیری ءَ نودربرانی زھرشانی، بُنجاھی شھدگ بند کنگ بیتگ-

کیچ ءِ دمگ کیساک ءِ جنکانی وانگجاہ ءَ استادانی ءِ نہ بوگ ءِ بگیری ءَ وانگجاہ ءِ جنکویں نودربر دگانی سر ءَ اَتکگ اَنت، زھرشانی تربت تاں پنجگور ءِ شھدگ بند کنگ. بیتگ،

زھرشانی کنوکیں نودربرانی گْوشگ اِنت کاگذانی وانگجاہ ءِ اپگریڈیشن ءَ اَبید وانگجاہ ءِ استاد سالانی سال ڈیوٹی ندے اَنت- آیاں بھتام جتگ کہ آیانی استاد تربت شھر ءَ لوگ زرتگ ءُ مُپت پگار گرگ ءَ اَنت ءُ جنکویانی وانگی سال زوال بیگ ءَ اَنت- ھمے درگت ءَ نودربراں لوٹ کتگ کہ بُرزی واکدار گامگیج بزور اَنت وانگجاھاں تباھی ءَ چہ بہ رکین اَنت-

مئے میتگ ءِ میر ءُ کماش

نبشتہ کار: لیاقت کے بی

دی بلوچستان پوسٹ

من یک ھنچیں پسماندگ ایں میتگے ءَ چہ نزدیکی داراں آ میتگ ( یونین کونسل گْوانی گْونکی) اود ءَ وانگجاہ(اسکول) وتی جاگہ ءَ اِنت۔ اودے مردم آں آپ پہ ورگ ءَ نیست انت ۔ ساری ءَ دستی چائے بیتگ مردم ءَ چامود ءَ آپ کُرتگ 2012 ءَ چائے آپ ھتم بیتگ۔

اے 13 سال سرجم اِنت کہ مئے میتگ ءِ مردم آپ چہ دو سئے کلومٹر ءَ چہ دور ریڑی ءُ ھَرانی سرا آپ بڈّا کن اَنت ءُ کار اَنت۔ چِنکس باریں زاہ ءُ بد وراَنت چہ دگرانی مِشین ءَ آپ ئے آرگ ءَ روچ ئے یکے زاہ ءُ بد اِیش کنت۔ مئے میتگ ءِ مردم سک ایں سادگ ءُ نرم دلیں مردم اَنت۔ وھدے ھرکس مئے میتگ ءِ مرومانی کِرا بیت آوانی گوم ءَ گپ بہ جنت ءُ بہ گَلائی گُڑا مئے میتگ ءِ مردم آئی گوں ءَ راھداری بنت چو نازان اَنت کہ مئے دیم ئِے سیاہ کنوک ھمیش بیت۔ ھمے ھساب ءَ مئے کِرا لھتیں میر(سرکاری میر) دْراتگ انت آ گریب ءُ بَزگ نہ زان اَنت کُج ءَ کہ گیگ اِش رس اِت گِڑا ھمودا وتی کارا کن اَنت۔ وھدے ووٹانی وھد نزیک بیت گڑا مئے سردار ءُ میر روچ ءِ تھ ءَ سدرندا کاینت کہ مارا ووٹ بہ دے اِت۔ ما شُمارا وانگجاہ (اسکول) بور دا ایں آ میر نہ روت آ کیت اِنت۔ مردم لاچار بنت ووٹ دے انت ئے۔ وھدے ووٹانی وھد گْوزایت اگاں کسے کِّرا ِاش بورو۔ جُست اِش بہ کن مئے وانگجاہ ءُ بور کُج اَنت شُما آ وھدا گُشتگ اَت کہ مارا ووٹ بہ دے اِت ما شُمارا بور ءُ وانگجاہ دا ایں ما شُمارا ووٹ داتگ مئے بور ءُ وانگجاہ کُج اَنت؟۔ آ تئی گپ ءَ گوش نہ دار ایت کہ گوں من یکے گپ ءَ اِنت۔ وھدے تو زیادہ گپ کُرت گوڑا بزاں آخری گپ ھمیش اِنت کہ سرپد بے یاکہ ترا وتئی ھسابءَ سرپد بہ کناں۔ بزاں کہ مئے میتگ ءِ گپ ءَ یکے دیما نہ یار اِیت آ چائے کُجام پارٹی بہ بیت۔ ھنچوکہ نونے ووٹ آں چہ پد مئے میتگے مردمانی بازیں جھدا یک بورئے JUI ئے نِیمگ ءَ اتکگ۔ وھدے بور اتکگ مئے میتگے تھا گڑا مئے میتگ ءِ واجہ ئے میر ءُ کماش اتکگ آں کہ ما ایدا بورےجنگ ءَ نئیل اَنت۔ایدا بور جت ما شُما گوں راھے را ایں کہ اے ڈگار مئے پِسو پیروکی جاگہ اَنت۔ مئے میتگے مردم AC۔ءُ DC ءَ شُتگ انت بلے ھچ وڑے نیست۔ واجہ آنی اکری گپ ایش اِنت کہ بور جنگ مہ بیت اگاں بیت گڑا مئے کِرا جنگ بہ بیت ما پَسل ءُ آبادی کن ایں۔ واجہ اے بُور پہ مُلک ءُ پَسل ئے واست ءَ جَنگ بُوگ ءَ نہ اِنت کہ شُما بورے جَنگ ءَ نئیل ئے۔ اے بور پہ میتگے گریب ءُ لاچارانی واست ءَ اِنت کہ 12 سال اِنت اِش کہ آپ اِش پہ ورگ ءَ نیست۔ چِہ دور آپ ئے بڈا کنگ ءُ آرگ ئے سبب ءَ چِنکس مردم نادُرہ (بیمار) اِنت اے واجہ ھمئے گریبانی واست ءَ اِنت اِیشا شپ ءُ روچ اِش کُرتگ تانکہ مئے بار سُبک بہ بیت۔ شُما مرچی اے بُورا بند ءَ کن ایں اے گریب کُوجا بہ رو اَنت۔اے میر ءُ واجہ ءَ وت بور ءُ وانگجاہ دات کُرت نہ کرت۔ اے گریباں وت وتی جھد ءِ پدا یک بُورے آورت ءَ اے ھم واجہ ءَ بند کُرتگ۔ اِشاں دگہ پروجکٹ ئے بندات نہ کُرت ءَ شُما بند کُرت ءَ بلکئے ایشاں یک بور ءِ پہ میتگے آپ ءِ واست ءَ آورتگ۔ ھمئے کماش ءُ میر ءَ ساری ءَ مئے میتگ ءِ مردم زاہ ءُ بد کُرتگ انت اگہ شُما دگہ روچ ءَ آپ ءِ واست ءَ مئے کَش ءُ گُوری در ءَ بوت ات شمئے ھیر نہ اِنت۔ مئے کماشانی ھال ایش اِنت۔ وھدے یکئے را کماشی دیگ بوت گڑا آ ھرچی بہ کن نام ئے گِرگی نہ اِنت کہ کماش اِنت۔ نام گِپت گڑا بزاں تو وتئی دیم سیاہ کُرت۔ اگاں ما وانگجاہ ءِ گپ بہ جَن اَنت۔ مئے واست ءَ وانگجاہ نیشتگ مئے میتگ ءَ پرائمری وانگجاہ ءِ ھست اَت آئی سامان ھر یکئے ءَ پہ وت بُرت اَنت وتئی واست ءَ۔ وانگجاہ ءِ دیوال کپت ءُ شت کس نازا ایدا وانگجاہ ئے بوتگ۔ وجہ شُمارا مرچی یکے میر ءُ یکے کماش ئے نام ءَ توار کنت ھمئے بزگے راج ءِ پُشت ءَ۔ وتئی گالامی اِش کبول کُرتگ شمئے ھبرانی سرا اَنت۔ ھرچی کہ شُما گُشتگ ھما وڑ ایِش کُرتگ۔ مرچی شُما اِشانی دشمنی ءَ کن اِت۔ بلوچی ءَ گپ ئے گُش اَنت “ھَر وھدے سیر ءَ بیت وتئی وھمدا لَگت ءَ جنت” ھمئے ھر ئے مثال اِنت۔ بلے اے شُمئے وھمد نہ اَنت۔ شُمارا آورتگ ھمئے راج ءَ اے جاگہ ءَ سرکُرتگ مرچی شُما راج ءَ لَگت ءَ جن اِت۔ من ءَ یاد اِنت کہ مئے میتگ ءَ سیرے ھست اَت من سیر ئے سر ءَ شُت اَنت۔ وھد سک شت اَت یے واھد اَت مردم ءَ نان وارت اَت ھتم کُرت اَت۔ دور لاھتے مردم در ءَ بوت من ھما مردمانی کِرا شت آں۔ تا مردم ءَ پَسے کُشت ءَ کُٹ ءَ گااَنت۔ من سوج کو۔ مردماں نان وارت ءَ شُما پَس چے ءَ کُشتگ۔ ھمود ئے نشتگے مردماں گُشت “مئے میر پیداک اَنت۔ اے ھماوانی واست ءَ اَنت”۔ اے ھمئے گریب اَنت شُمار ءَ اِیکہ عزت اِیش داتگ مرچی شُما اِیشانی بدی ءَ کن اِت۔ باھدے اے وڑے مردمانی ھلاپ ءَ توارچِست کنگ بہ بیت کہ تاکہ یک گریب ءِ وتی دو روچ ءِ زندگی ءَ شریں وڑے ءَ بہ گْوازینیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءِ بنجاھی شھر زاھدان ءَ زھرشانیانی وھد ءَ دزگیر بیتگیں پاھو ءِ سز ءِ بندگ ءَ بندیگیں ورنا زمانت ءِ سر ءَ یل کنگ بیتگ-

دو اکتوبر دوھزار ءُ بیست ءُ دو ءَ زاھدان ءِ دمگ کریم آباد ءَ ایرانی لشکر ءِ دست ءَ آوار جنگ ءُ پد ءَ پاھو ءِ سزا بندگ بیتگیں کامبیز حروت ء مھراللہ زمانت ءِ سر ءَ یل کنگ بیتگ-

زانگ بہ بیت کامبیز حروت زاھدان ءِ شھید نوری آمیدگس ءَ ڈیھ ءِ ھلاپ ءَ پرکاری ءِ پژدر ءَ پاھو ءِ سزا داتگ ات-

کامبیز حروت بیست سالی ئیں یک ورنایے آ زندان ءَ بندیگ کنگ بیتگ ءُ چریشی ءَ آئی ءِ یل کنگ ءَ انسانی ھکانی گل ءُ روکپتی بلوچستان ءِ سیاسی تکاں بندوکیں مردماں یل کنگ ءِ لوٹ کتگ ات-

زانگ بہ بیت کامبیز ءِ ھواری ءَ شعیب میر بلوچزئی ءُ منصور دھمردہ ءِ سر ءَ ھم پاھو ءِ سزا اتکگ بیتگ-

وائس فار بلوچ مسنگ پرسنز ءِ چیئرمین نصراللہ بلوچ ءَ گُشتگ کہ آصف مراد ءُ کاوش حسین ءِ زورانسری بیگواھیانی درستیں اھوال آیانی کھول ءَ گل ءَ داتگ اَنت۔

آئی گوں گل ءَ گُشتگ کہ ھمے سال ءَ 3 ستمبر ءَ لشکریاں آصف مراد ء مراد بلوچ ءُ کاوش حسین ء راشد حسین چہ پٹھان چوک، جام کالونی حب چوکی ءَ چہ دزگیر کنگ ءَ پد ناشناسیں ھنداں بُرتگ اَنت ءُ آیاں آیانی دوستیگیں بیگواھانی بابت ءَ ھچ پئیمیں سرپدی ءُ اھوال دئیگ بئیگ ءَ نہ اِنت۔

نصراللہ بلوچ ءَ چہ سرکار ءَ لوٹ کُتگ کہ آصف مراد ءُ کاوش حسین ءِ پھازیتگیں دروشم ءَ یل کنائنگ ءَ وتی کرد ءَ پیلو بہ کنت۔

امریکہ ءِ گوشگ اِنت جوبائیڈن انتزامیہ ءَ ھندوستان ءِ سرکار ءِ گون ءَ گپ کتگ ءُ کڈن کتگ آ ھالستان زرمبشت ءِ رھشون ھردیپ سنگھ ءِ کوش ءِ پٹ ءُ پول ءَ کینڈا ءِ کمک ءَ بہ کنت اِنت-

ھندوستان ءِ روتاک ھندوستان ٹائمز ءِ رد ءَ امریکہ ءِ مھکمہ ءِ ھارجہ ءِ جارکش میتھیق ملر ءَ رسانکدراں گوں گپ کنان ءَ گوشتگ وزیر ھارجہ انٹونی بلنکن ءَ گوستگیں ھپتگ ءَ وانشگٹن ءَ وتی ھم دروراں ایسے جت شنکر ءَ گوں گند ءُ نند کتگ ءُ اے جیڑہ ءِ سر ءَ گپ جتگ-

آئی ءَ گوشتگ کہ ھنچش اے ھما وھد ءَ اے تچک بیتگ کہ پد ءَ ھم گوشگ ءَ آں اے جیڑہ ء کینیڈن ءِ ھمراھانی گون ءَ کمک کنگ ءَ اں-

میتھیو ملر ءَ گوشتگ ما بازیں رنداں ھندوستان ءِ سرکار ءِ گون ءَ گپ ءُ تران کتگ آ پٹ ءُ پول ءَ کینیڈا ءِ کمک ءَ بہ کنت اِنت-

اے جست ءِ پسو ءَ ھندوستان ءَ کینیڈاءِ گون ءَ کمکی ءِ لیکہ پدر کتگ انت – اے درگت ءَ امریکہ ءِ مھکمہ ءِ ھارجہ ءَ گوشتگ اے پسو نیو دھلی ءَ دیگ لوٹ ایت – بیت کنت ھندوستان ءِ سرکار وت اے درگت ءَ پسو بہ دنت اِنت- ءُ امریکہ اے درگت ءَ گپ کنت ءُ کمک کنگ ءِ کڈنی ءَ کنت اِنت-

کینیڈا ءِ سروزیر جسٹن ٹروڈو ءَ گوستگیں ماہ ستمبر ءَ پارلیمنٹ ءَ گپ کنان ءَ گوشتگ کینیڈین انٹیلی جنس بھتامانی پٹ ءُ پول ءَ کنگ ءَ اِنت-

کینیڈا ءَ سکھ آجوئی لوٹوکیں رھشون ءِ گمانی رنگ ءَ کوش ءِ سر ءَ ھندوستان ءِ سرکار ءِ ھوار بوگ ءِ بھتامانی پٹ ءُ پول ءَ ھندوستان ءِ یک مزنیں واکدارے ءَ ڈیھ یل کنگ کپتگ-

ھندوستان ءَ اے گپ پندل سرپد بیتگ ءُ کینیڈین سپارت کار ءَ را ڈیھ ءَ درکپگ گوشتگ-

اے جیڑہ ءَ ھردوکیں ڈیھانی سپارتکاری ءِ سیادی ءِ سر ءَ سان کپتگ ءُ پرچاکہ گوست ءَ ھم اے ھردوکیں ڈیھ ناوش اَنت نیودھلی کینیڈا سکھ جتائی لوٹوکیں رھشونانی جاڑیگ بوگ ءَ وش نہ اِنت-

زانگ بہ بیت ھندوستان ءِ سکھانی ھالستان زرمبش ءِ باسک ھردیپ انگ نجار ھمے سال ءِ ھژدہ جون ءَ برٹش کولمبیا ءِ شھر ءَ ھما وھد ءَ تیرگواری کنگ ءُ کُشگ بیتگ کہ گوردوارے ءِ تہ ءَ جاڑیگ بیتگ-

جنیوا ءَ بلوچ نیشنل مومنٹ ءِ ( بی این ایم ) ءِ سرکماش ڈاکٹر نسیم ءَ 28 ستمبر ءَ راجانی سنت ءِ نیاد ءِ میان ءَ جاپانی این جی او ’انٹرنیشنل کیرئیر سپورٹ‘ ءِ نیمگ ءَ برجم دارگ بیتگیں ھمگْوریں نیادے ءَ تْران کرتگ۔ اے نیاد ءِ پاگواجہ شون پوجیکی اَت۔ اے نیاد ءَ چین پاکستان گزرانکی راھداری ( سی پیک ) ءِ سر ءَ دلگوش دیگ بیتگ کہ چین ءِ ’ ون بیلٹ اینڈ ون روڈ ‘ ءِ گامگیجانی تالانی ءِ رد ءَ بلین ڈلرانی کارشور اِنت۔ سرکماش ڈاکٹر نسیم ءَ بھر زیروک اے کارشور ءِ بلوچستان ءُ آئی ءِ مردمانی سر ءَ تباہ کنیں سانانی بارہ ءَ سھی کرتگ اَنت۔

آئی ءَ بلوچ راج ءِ اے باور ھم نیاد ءِ دیم ءَ پدر کرتگ کہ اے کارشور ’ امپریلیسٹ ‘ کوشستے کہ بلوچستان ءِ آبادیاں مٹ کنت۔گوں دودمانداریں جھان ءَ اشتاپیں دزبندی ءَ پد ھم ، بلوچانی لوٹ گوش دارگ نہ بوت ءُ آ گْوست ءِ مزنیں ڈاھے ءِ دیمپانی ءَ تیوک منتگ اَنت۔

سی پیک کارشور ءِ بنپد گوادر بندن اِنت ، اے راھداری چہ بلوچستان ءِ مزنیں دمگے ءَ گْوز ایت۔ ڈاکٹر نیسم بلوچ ءِ رد ءَ ، چینی سرکار بلوچستان ءِ پرارزشتیں ھنداں وتی لشکر ءَ نادینگ ءُ گوادر ءِ راہ ءَ تبریتی ( اسٹرٹیجک ) بنیاد ءَ پرارزشتیں ’ھرمز تنک‘ ءَ وتی دست ءَ آرگ لوٹ ایت۔بلوچ راج وتی پہ مردم ءُ ربیدگانی مانشت ءَ اے کارشور ءِ بگیری ءَ گھگیری کنگ ءَ اِنت۔

ڈاکٹر نسیم ءَ اے ھم نشاندھی کرتگ کہ پاکستانی لشکر گوادر ءِ مردماں چہ شھر ءَ در کنگ ءَ وڑ وڑیں پندل کنگ ءَ اِنت۔ سرکماش ءَ اے گپ ءِ سر ءَ ھم زور داتگ کہ جھان ءَ منگی اِنت کہ بلوچ وتی مانشت ءِ جنگ کنوکیں وپادار ، پرمڑاہ ءُ باورکرزین بائیوارے۔

آئی ءَ گْوشتگ بلوچ پہ وتی جند ءِ سیت ءُ مزد ءَ جنگ ءَ نہ اِنت۔ بلوچ راج ءَ چین ءَ وتی گھگیری توان ءِ پیش دارگ ءَ میان استمان ءِ پلہ مرزی ، پشتونواہ ءُ گلگت بلتستان ءِ مردمانی کمک پکار اِنت۔

ڈاکٹر نسیم ءَ اے گپ ءِ سر ءَ دلتپرکھی درشان کرتگ کہ انیگ ءَ دھلی ءَ جی بیست پلس ءِ سروکی نیاد ءَ ’ ھندوستان ، میان رودرتک ، یورپ راھداری‘ کار شور من اتگ ، آئی ءِ تہ ءَ بلوچستان ءِ نام نیست اَت۔

آئی ءَ گْوشتگ ھما سرڈگار کہ آ اود ءَ راج وت ماں جنگ اَنت سرمایہ کاری میان استمانی راھبندانی بگیر اِنت ، بلے وھدے زور ءُ زر ءِ گپ بہ بیت گڑا میان استمانی راھبنداں گیشتر ڈالچار کن اَنت۔

گڈی ءَ ڈاکٹر نسیم ءَ یک رندے پد ءَ تْرامکارنی تورو من اتگ کہ آیاں پہ بلوچستان ءِ جاورانی سر ءَ گپ جنگ ءَ اے پتر داتگ۔آئی ءَ اے اوست درشانتگ کہ میان استمان اے گپانی نیمگ ءَ دلگوش کنت ءُ بلوچ راج ءِ دیمونیاں من ایت۔