TBP Balochi

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل ٹلیگرام چینل “ھکل” ءِ تہ ءَ شنگ کرتگیں درشانے ءَ گوشتگ کہ بی ایل اے ءِ سرمچاراں ھاران ءُ پنجگور ءَ دو جتائیں اُرشاں پاکستانی پوج ءُ آئی جھلی پوج نشانگ کرتگ اَنت ارشانی آسر ءَ سَے کارمند زدگ بوتگ انت –

جارکش ءِ رِد ءَ بی ایل اے ءِ سرمچاراں گوستگیں شپ ءَ ھاران شھر ءَ پولیس بنجل ءِ بنجاھی گیٹ ءَ ھما وھد ءَ گوں دستی بمب ءَ اُرش کرتگ کہ پوج ءِ یک گاڑی یے ڈن ءَ در آیگ ءَ بوتگ، تراک ءِ آسر ءَ یک کارمندے زدگ بوتگ –

درشان ءِ تہ ءَ گوشگ بوتگ کہ بی ایل اے ءِ سرمچاراں دومی اُرش مروچی سھب ء پنجگور ءَ زورگریں پاکستانی پوج ءِ بنجل ءِ سر ءَ کنگ بوتگ کہ سرمچاراں بنجل ءِ پھازداریں پانگس ءَ گرنیڈ لانچر ءِ باز گولا آس داتگ کہ چریشی ءَ کم چہ کم دو کارمند زدگ بوتگ انت وھدے کہ بنجل ءِ تہ ءَ گولاھانی کپگ ءَ دُژمن ءَ گیشیں جانی ءُ مالی تاوان ھم بوتگ –

جارکش جیئند بلوچ ءِ رِد ءَ بی ایل اے ھردو اُرشانی زمہ واری منّیت ءُ مئے اُرش داں وتی مولانی گرگ ءَ برجاہ مان انت –

کینیڈا ءَ یکشمبے ءِ شپ ءَ دو ناشناسیں سلاہ بندیں مردماں ماں گوردوارے ءِ تہ ءَ تیرگواری کُتگ ءُ چل ءُ شش سالی خالصتان تحریک ءِ اگدہ دار ہردیپ سنگھ نجار کُشتگ –

بھارت ءِ رسانکدر ہندوستان ٹائمز ءِ رِد ءَ اے وئیل یکشمبے ءِ شپ ءَ کینیڈا سوبہ برٹش کولمبیا ءِ شھر سرے ءَ بوتگ کہ اودا مزنیں کچے ءَ پنجاپی نندوک انت –

بھارت ءِ میڈیا ءِ رِد ءَ ہردیپ سنگھ ھما وھد ءَ تیر جنگ ءُ کُشگ بوتگ وھدیکہ آ گوردوارے ءِ تہ ءَ ساڑی بوتگ –

ہردیپ سنگھ خالصتان ٹائیگر فورس ءِ سروک بوتگ –

ہردیپ سنگھ ءِ سر ءَ چہ نیشنل انویسٹی گیشن ایجنسی ءِ نیمگ ءَ کم چہ کم چار کیس جنگ بوتگ آئی ءِ سر ءَ ناشرکاری، ہندو پنڈتانی کوش ءَ سازش، سکھس فار جسٹس ءِ تحریک ءِ چلائینگ ءُ ناشرکاری کاراں دیما برگ ءِ بھتام جنگ بوتگ انت –

نیشنل انویسٹی گیشن ایجنسی ءَ آئی ءِ سر ءَ دھ لک انڈین کلدار ءِ انام ھم ایر کتگ بوتگ –

سربوتگیں ھالانی رِد ءَ بلوچستان ءِ دمگ پشین ءُ مشکے ءَ تیرگواری ءِ وئیل ءَ دو مردم بیران یک ءِ زدگ بوتگ وھدیکہ تیاب دپی دمگ گوادر ءُ تربت ءَ زالبولے ءَ ھوار دو مردماں وتکشی کُتگ –

گیشیں ھالانی رِد ءَ بلوچستان ءِ دمگ پشین ءَ زمینی جیڑھے ءِ سر ءَ تیرگواری ءِ وئیل ءَ یک مردمے بیران ءُ یکے زدگ بوتگ، بیران ءُ زدگ بوتگیں ھردو وت ماں وت برات انت –

بیران بوتگیں مردمے پجار صدیق اللہ ءِ نام ءَ بوتگ وھدیکہ آئی ءِ برات اسرار احمد زدگ بوتگ –

اھوالکار ءِ رِد ءَ تیرگواری وئیل بوستان ءَ زمینی جیڑھے ءِ سر ءَ بوتگ –

ھمے وڈ بلوچستان ءِ دمگ مشکے گجر بازار ءَ مروچی سھب ءَ ناشناسیں سلاہ بندیں مردماں یک مردمے تیرباران کُتگ کُشتگ کہ آئی پجار ماسٹر منظور احمد ءِ نام ءَ بوتگ کہ کچ ءِ نندوک انت –

تیرگواری ءَ پد اُرشکار تچگ ءُ رؤگ ءَ سوبمند بوتگ انت وھدیکہ وئیل ءِ درگت ءَ ھچ وڈیں سرپدی نہ رستگ کہ کجام سوب ءَ مرد جنگ بوتگ –

دومی نیمگ ءَ بلوچستان ءِ تیاپ دپی دمگ گوادر ءَ ورنایے ءَ وتکشی کُشتگ –

ھالانی رِد ءَ بسیمہ حال فقیر کالونی جھمنند بیست ءُ ھشت سالی خلیل ء عبدالواحد ءَ وتکشی کُتگ –

پولیس ءِ رِد ءَ گِس ءِ جیڑھے ءِ سر ءَ حلیل ءَ وتی گُٹ ساد لوپ کُتگ ءُ وتکشی کُتگ –

دومی نیمگ ءَ چہ تربت ءَ ھم ھمے ھال آیگ انت کہ آپسر آسکانی میتگ ءَ تلیان نامیں زالبولے ءَ وتکُشی کُتگ –

دمگی مردمانی گوشگ اِنت کہ تلیان سر ءَ وش نہ اِنت ءُ لھتے وھد ءَ پیش آئی ءَ وتی کسانیں زھگ ءِ سر بُرّ اِتگ ءُ کُشتگ –

زانگ بہ بیت بلوچستان ءَ گیشتر وتکشی ءِ ھال آیگ ءَ انت – ھمے سال ءَ زالبول ءُ مردینانی بازیں وتکشی ءِ ھال اتکگ انت –

ھاسکر گوستگیں لھتے ماھانی تہ ءَ وتکشی کنگ ءِ تہ ءَ گیشی اتکگ – بلے پدا ھم سرجمیں بلوچستان ءَ وتکشی ءِ گیش بوگ ءِ وئیلانی سر ءَ چہ سرکار ءِ نیمگ ءَ ھچ وڈیں گامگیج زورگ نہ بوتگ –

تیرماهیں تاپتگیں بدن

نبشتہ کار: سیپ بلوچ

دی بلوچستان پوسٹ

گْوستانک ءِ پتر ءَ چیر کپتگیں تاک ءِ لھتے گالانی زنداپ اَنت ، کہ زرد اِش نوْشگ لوٹ اِیت زرد لبزانی لیکهاں یاتانی مِهری ءَ سوار کنت ءُ تاچ ایت کہ زندگی ءِ اجب رنگیں گْوستانکے زرد یاتانی مهری ءِ سر مهار اِنت کہ کسهاں زور ایت ءُ سپر کنت سنج رنگیں کسهے ءِ گْوناپ ءَ گْوست ءِ لِزتانی تام ءَ نوجوانی ءِ ایدره ءَ مان ریچ ایت کہ شپ سارت ءُ وش اَت من چہ بازار ءَ دیراں اتک آں اوتاک ءِ دپ پچ کت اوتاک ءَ همبلے ءِ واب ات بجلی شتگ ات انت سک گرم ات داں من ءَ واب ءَ سک بے وار کتگ ات من وتی نپاد زُرت ءُ برز ءَ شت آں وپسگ ءَ ، شپ ءِ اجبیں لزتے اَت شهرے پرپٹ گاڑیانی توار ءُ هار کوش ءِ سان زرتگیں شیکگاں من واب ءِ دنیا ءِ جنت ءَ بُرت-

کوٹی ءِ سر ءِ ندارگ اوں اجبیں ندارگے اَت اے دیم ءُ آدیم ءَ درچکانی نهال ایر اِت اَنت ءُ آپ داتگ اِت اَنت وهد ءِ کوش ءَ کش ات دل ءَ تاهیر زرت من واب اِت آں ءُ من ءَ سهب ءَ زوت پاد آیگی اَت لھتے کار زلوری کپتگ اَت کہ مسیت ءِ بانگ ءَ من ءَ پاد کت من ءَ کوش ءَ هنچو ژند کتگ ءُ روچ ءِ تچ ءُ تاگ ءَ کہ پادانی درد ءَ زیمیگ اِت آں ، داں کہ ساپی ءَ دات من چم پچ کُت اَنت کہ دیم پہ دیم ءَ زندگی ءِ اَنا، اوشتاتگ ءُ بام ءَ رکس ءَ اِنت من گوں اے ندارگ ءَ دیم پہ دیم بوت اَنت ، سیاهیں پوشاکے ءَ سنج رنگیں کاڑے پوش اتگ ءُ روچ ءِ در آیگ ءِ ودار ءَ پیسر وتی پُچّاں چت ءِ سر ءِ چیلک ءَ تاپگ ءَ ات ، پہ من اجکهی گپے ءَ لگ اتاں کہ پرچا اے ساهت ءَ تنگی روچ ءَ وتی چادر پچ نہ کتگ ءُ اے ماه دروشم وتی پچاں تاپگ ءَ اِنت ، همے جیڑگانی ندارگ ءَ داں من کمبل پر دات ،ءُ پدا واب شت آں پاد آیگ ءَ رند مرچی سک جیڑگ ءَ ات آں کہ ، زندگی ءِ سپر ءَ بازیں پند ءِ آسری کتگ ات بلے اے روچ ءَ کہ من بام ءِ ترانگ ءَ کپت آں همے گوشت کہ شپ زوت واتر من تئی شپ در ءَ واب باںک کہ بام ءِ رولہ بَیت ءُ بہ شنگ ایت ، من زرد ءِ تہ ءَ اجب جیڑ اِت کہ اگاں بوت کنت کہ مرچی مئیت ، بلے دل تپرکہ نہ ات آں داں شپ ءَ وتی کسہ آسر کت ءُ بام ءَ دات ، مرچی من ءَ بانگ ءِ توار وش بوت کہ من سهب ءَ مهلہ بُست کت کہ رولہ ءِ ندارگ ءَ کن آں ، داں بام ءَ وتی رولہ شنگینت ءُ چو روچ ءِ بالاد ءَ ماه دروشم ءِ بالاد چہ پیدیانکاں درآیان بوت کہ چت ءِ آیگ ءَ اے ساهت ءَ اے چتانی دوری ءِ کیاس سک نزیک اَت کہ اے بادگیر یکیں کتار ءَ اِت انت ، من نپاد ءَ چہ دیم ءَ زاهر کت ءُ ما دوئیں دیم پہ دیم بوت ایں داں دیراں من آئی ءِ ابرمیں بالاد ندارگ کت ، برے چم ما گوربندان ءُ برے سرین ءِ اجگی ءِ ندارگ ، هزار جست زهن ءَ ود اِت کہ جست ئِے کن کہ تو کجام دنیا ءِ پری زادهے کہ تئی سیرت ءِ آدینک اے گنھگاریں چماں وتی سجدگ کتگ ، بلے نزاناں تو کئی راهن ءِ منی چمانی آدینک ترا بوسگ ءَ اِنت داں آئی ءَ پوشاک تاپ ات ءُ واتر اِت ، من زندگی ءِ زیبائی ءَ اشک ءِ دراهی ءُ کمار اِت آں آیاں اے پرلزتیں انا منی زندگی ءِ آدینک ءِ ندارگ بیت دائمی شپ ءِ آیگ ءِ ودار ءَ جیڑگ ءَ اِت آں بام ءِ رولہ ءِ سجدگ ءَ شپاں چمانی واب برگشتگ اَت کہ مرچی همےکہ بام شنگ اِت ، بلے آئی ءِ کهربائیں بالاد من ندیست ،ایدگی روچ ءَ داں من روچ ءِ ودار ءَ سهڑگ ءَ اِت آں کہ اگاں مرچی رولہ بہ شنگ ایت من اے جستانی لڑ ءَ دیم ءَ دے آن ءُ گوشان ئِے کہ من تئی بالاد ءِ ابرم ءَ کشار بوگ لوٹ آں گوشان ئِے کہ من ءَ تئی زیبائی ءَ گوں مهر اِنت سرجمیں شپ ءَ جستانی لڑ ءِ ٹاهینت ءُ داں بام شنگ ات ماه دروشم ءِ بالاد پدر بوت من پد کنزاں بوت ءُ نزیک ءِ شت آں ، درستاں ساری من همے گوشت کہ دو روچ اِنت روچ در نہ اتکگ ترا شپ زاناں دوست بیت؟ پر بچکندیں لزتے ءَ گوں گوشت ئِے من شپ ءِ انارکانی تهاریں کوٹی ءِ کیدی ئِے آں من روچ ءِ بالاد نہ دیستگ پمیشکا شپ ءَ شپ کرار دیاں بلے تئی نگاهانی پند من ونتگ ، همے جیڑ اتگ کہ تو منی بالاد ءِ رولہ کمارے بلے من لوٹ ات کت نہ کن آں ناکہ منی تلب بوت کنت، گپے زان ئے؟ من وتی زرد ءُ موجری ءِ سانکلاں هنچو کید آں کہ روچ ءِ سیرت بہ گوش ئے کسانی ءَ دیستگ چماں ، من اے بام ءَ وتی بالاد سیاهیں چادرے مانپوشگ پر مایگ بوتگاں کہ بالاد ءِ زیبائی ءَ روچ ءِ شهم مہ لگ اَنت ،
بلے من-

زندگی من وت ءَ تئی زیبائی ءِ ابرم ءَ مانش کتگ منی روه ءَ ایر بر وتی زرد ءِ هشیماں من ءَ بل وتی کدهانی نوشگ ءَ من همے کہ تئی بالاد ءِ زیبائی دیستگ تئی اکس منی میت ءَ وتی تابوت جوڑ کتگ ءُ وتا درپ کتگ ، اگاں من تئی واهشانی تلب مہ باں من امروزے دوزهی باں ، آئی ءَ گڈی ءَ درائینت ، من چارده سال ءِ امر ءَ اے مسیت ءِ بانگو ءِ امانت جوڑ کنگ بیتگ آں ، منی سیر بیتگ من وتی تہ ءَ یک زندگیں لاشے آں منی بالاد ءَ آس دے وتی آجوئی ءَ زیر ءُ واتر منی نگاهانی تن من ءَ بوس ایت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءِ بنجاھی شھر زاھدان ءَ ناشناسیں مردماں تیرگواری کنان ءَ یک مردمے کُشتگ –

گیشیں اھوالانی رد ءَ روکپتی بلوچستان ءِ بنجاھی شھر زاھدان ءِ ھند مھر ءَ ناشناسیں مردماں تیرگواری کرتگ ءُ حبیب سنجرانی کُشتگ-

اھولانی رد ءَ حبیب سنجرانی ناشناسیں مردماں کُشگ ءَ پد پشت مانداتگ ءُ شتگ اَنت –

تیرگواری ءُ کوش ءِ سبب زانگ نہ بیتگ بلے گوست ءَ روکپتی بلوچستان ءِ دگہ ھند ءُ دمگاں ھم اے دابیں وئیل پیش اتکگ بیتگ اَنت-

دُزی ءِ نیام ءَ گھگیری ءَ ٹپی بیتگیں ورناہ ءَ ٹپ نہ سگ اِتگ ءُ بیران بیتگ۔

بلوچستان ءِ زرکاری شھر حب چوکی ءَ ساکران تھانہ ءِ نزیک ءَ گوستگیں شپ ءَ دُزی ءِ نیام ءَ گھگیری ءِ پدءَ دُزانی تیرگواری ءَ چہ حب چوکی ءِ جھمنندیں ورناہ شعیب رند ٹپی بیتگ اَت۔

تیرگواری ءَ ٹپی بیتگیں ورناہ نزیکیں نادراھجاہ ءَ برگ بیتگ اَت کہ آودہ ترندیں ٹپانی نہ سگگ ءَ چہ بیران بیتگ۔

دُزانی تیرگواری ءَ چہ بیران بیتگیں ورناھے کھول ءَ وئیل ءِ بگیرءَ بھوانی ءِ نزیک ءَ شال کراچی راجی شھدگ ءِ سرءَ اڑاند ودی کُتگ ءُ دگ پہ گاڑیاں بستگ۔

زھرشانی کنوکانی گُشگ اَت کہ حب ءِ دُزانی دستءَ دیگ بیتگ، ھمک روچ شھری کُشگ بنت بلے اے درستیں وئیلاں ابید ھم ھندی پولیس بے سمائی ءِ واب ءِ تہءَ اِنت ءُ داں انگت یک ھم جرمکاریں دزگیر کنگ نہ بیتگ ءُ نانکہ حب پولیس اے بابت ءَ سنگینی پیش دارگ ءَ اِنت۔

ایران ءِ استان کرمان ءِ مزنیں زندان ءَ یک بندیگیں بلوچے پاھو دیگ بیتگ –

گوستگیں روچ ءَ ایران ءِ اُستان کرمان ءِ بندیگ جاہ ءَ فضل اھمد غفران نامی ئیں یک بلوچے پاھو دیگ بیتگ –

انسانی ھکانی گل ھینگاؤ ءَ سربیتگیں اھوالانی رد ءَ یک شمبے ءِ روچ ءَ بامسار ءِ وھد ءَ روکپتی بلوچستان ءِ بنجاھی شھر زاھدان ءَ بندوکیں یک مردمے ماں کرمان ءِ بندیگ جاہ ءَ پاھو دیگ بیتگ –

آئی ءَ گوشتگ کہ پاھو دیگ بیتگیں مردم ءِ فضل ءِ نام ءَ زانگ بیتگ ءُ آ نشہ باپاری ءِ بھتام ءَ ایرانی سرکار ءَ پاھو داتگ –

آئی ءِ رد ءَ فضل چار سال ءَ پیش ماں کرمان ءَ ایرانی سرکار ءَ دزگیر کتگ ءُ پد ءَ آمیدگس ءَ آئی ءِ سر ءَ نشہ باپاری ءِ بھتام ءَ ماں پاھو ءِ ھکم داتگ بیتگ-

گل ءِ رد ءَ ایران ءَ مئی ماہ ءَ ایرانی آمیدگس ءَ یک سد ءُ چل ءُ دو مردم پاھو داتگ اَنت کہ ایشانی توک ءَ سِی ءُ یک بلوچ ھوار اَنت –

متھدہ ارب امارات ءَ سھر ءِ نھادانی توک ءَ یکشلیں کمی گندگ ءَ آیگ ءَ اِنت ءُ دومی نیمگ ءَ موکلانی وھد ءَ سھر ءِ تلبگارانی کساس ھم گیشی ءِ توک ءَ گندگ ءَ آیگ ءَ اِنت-

امارات الیوم ءِ رد ءَ گوستگیں ھپتگ ءِ گُدسر ءِ دیمپانی ءَ ھمے ھپتگ ءِ توک ءَ اں داں یک گرام سُھرے ءِ نھاد ءِ توک ءَ دو درھم ءَ بہ گر داں سَے کساس ءَ کمی یاداشت کنگ بیتگ اَنت-

گوستگیں دو ھپتگانی توک ءَ سھر ءِ نھادانی توک ءَ کساسی کمی 5.75 درھم ءَ سر بیتگ اَنت-

امارات ءَ سھر ءِ شوروم واھندانی گوشگ اِنت کہ سھر ءِ تلبگاریانی توک ءَ گیشی اتکگ النت نھادانی کمی ءُ موکلانی سبب ءَ زیروک گیش بیتگ اَنت-

شوروم واھدانی گوشگ اِنت گیشتریں مردن بیست ءُ ھژدہ گریڈ ءِ سھراں زیرگ ءَ اَنت – امارات ءَ بیست ءُ چار گریڈ ءِ یک گرامے ءِ نھاد دو سد ءُ سی ءُ چار درھم ءُ بیست ءُ پنچ درسد اِنت اِنت کہ ایشی ءِ توک ءَ سَے ءُ ٹک بیست ءُ پنچ کمی اتکگ اَنت-

بیست ءُ دو گریڈ ءِ یک گرامے ءِ نھاد دو سد ءُ شانزدہ ٹک ھپتاد ءُ پنچ درھم اِنت کہ ایشی ءِ توک ءُ دو ٹک ھپتاد ءُ پنچ درسد کمی اتکگ اَنت، بیست ءُ یک گریڈ ےِ یک گرامے ءِ دو سد ءُ نُھ ٹک ھپتاد ءُ پنچ درھم اِنت کہ ات دو ٹک ھپتاد ءُ پنچ درسد کم بیتگ- ایشی ءَ ھوار ھوار ھژدہ گریڈ ءِ نھاد ءَ دو درھم بیتگ ءُ ایشی ءِ نھاد یک سد ءُ ھشتاد بیتگ –

کویت ءَ شیخ احمد نواف الصباح ءِ سروکی ءَ نوکیں سرکار ءِ گچینکاری بیتگ-

اے سرکاری گچینکاری ءَ پانزدہ مزنیں وزیر ھوار بیتگ اَنت ءُ جتا جتائیں بنگپ ءُ لیکھانی سر ءَ گپ بیتگ اَنت-

عرب نیوز ءِ رد ءَ نوکیں سرکار ءَ پانزدی وزرا ھوار اَنت کہ ایشانی توک ءَ خالد الاحمد الصباح نائب وزیر اعظم ءُ وزیر داکلہ بیت اِنت-

ھمے وڑ ءَ سعد حمد ناصر البراک کویت ءِ وزرات پیٹرولیم ءِ واستا گچین کنگ بیتگ –

رپورٹ ءِ رد ءَ شیخ احمد فھد الاحمد الصباح نوکیں وزیر دفاع دارگ بیتگ، سالم عبداللہ الجابر الصباح وزیر ھارجہ دارگ بیتگ ءُ عثمان مھمد العیبان وزیر ءِ باپار دارگ بیتگ اَنت-