TBP Balochi

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کرتگیں درشان ءِ تہ ءَ گوشتگ سرمچاراں چاگے ءَ پاکستانی لشکر ءِ یک گاڑی یے گوں چیرکُرتگیں شورھاں نشانگ کُرتگ۔

آئی ءَ گوشتگ سرمچاراں چاگے ءِ ڈرم بازار ءَ پاکستانی لشکر ءِ یک کاروانے گوں چیرکُرتگیں شورھاں نشانگ کُرتگ،چہ ایشی ءَ یک گاڑی یے سرجم ءَ تباہ بیتگ ءُ گاڑی ءَ سوار بیتگیں شش کارمند مُرتگ ءُ دو ٹپی بیتگ انت۔

گوھرام بلوچ ءَ گوشتگ چاگے ءَ پاکستان ءَ زھرناکیں سلاہ تراکینت ءُ بلوچ راجی پُسگ چہ زھرناکیں سلاھانی تابکاریانی ساناں یل کُرتگ اَنت ءُ مَڈیانی لُٹ ءُ پُل برجاہ اِنت۔ما چاگے ءَ ھوار سرجمیں بلوچستان ءَ لُٹ ءُ پُل ءَ برجاھیں ڈیھ ءُ شرکتاں کڈن کن ایں کہ آ پاکستان ءِ مانزمانی ءَ وتی جان ءُ مالاں زوال مہ کن اَنت۔بلوچ جنگی جاورانی تہ ءَ گْوزگ ءَ اِنت ءُ بلوچستان ءَ بلوچ راج ءِ وشی ءُ رازی بیگ ءَ ابید ھچ شوربندی منّگ نہ بیت۔

آئی ءَ گوشتگ اے اُرش داں بلوچستان ءِ آجوئی ءَ برجاہ بنت۔

جھانی بینک ءَ پاکستان ءَ را وام ءَ باریں نزگاریں ڈیھانی لڑ ءَ ھوار کنان ءَ گْوشتگ کہ پاکستان ءِ دوھزار بیست ھپت ءَ تاں وام جی ڈی پی ءِ 89.3 درسد ءَ تاں گیش بوت کنت-

جھانی بینک ءِ واکدار ءِ گْوشگ اِنت کہ پاکستان باسکی پارلیمنٹ کابینہ ءِ باسک وزیر مڈی کابینہ کمیٹی ءُ برجمیں کمیٹیانی باسکاں ٹیکس پالیسی شر کنگ ءَ جوانیں سرپدیاں کارمرز کن ایں تاوانیاں دار اِیت-

سبسڈیز ءِ کمی ءِ ھاتر ءَ یکجاھی ٹیکس بند ءَ بست کنگ بہ بیت ءُ ھمُک سال ءِ ھساب ءَ دو ھزار ھپت سد بیست سے ارب کلدار ءِ مڈی ھسارگ ءِ کمی آرگ ءِ ھاتر ءَ ھرچ ءُ درچاں کم کنگ بہ بنت-

جھانی بینک واکدار رِد ءَ پاکستان میکرو اکنامک آؤٹ لک بے باوری ءِ جاور ءِ تہ ءَ اِنت ءُ سلاہ ءِ چست ءُ ایر سر ءَ گر ءُ دار کنت، کم مدت ءِ ھاتر ءَ ھمے سال بجٹ ءُ آئی ایم ایف اسٹینڈ مھاد مارکیٹ ءِ ھساب ءِ سر ءَ زر “کرنسی” کیمت ایری ، مانیٹری ءُ مڈی یے پالیسی ءِ سر ءَ چست ءُ ایر ، میکرو ءُ سیاسی پالسیی ءِ ناپھتوئی ءِ کمی ءَ چہ زرکاری ءِ سر ءَ سان آتک کُت کنت-

جھانی بینک رِد ءَ پاکستانی ھائی لیکوڈیٹی ، رسک کم ادل ءُ بدلی ءِ مڈی، بے مھکمیں سیاسی ماھول ، دری اکاؤنٹس ءِ لرزینگ ءِ بازیں ھترّھانی دیمپانی بیتگ-

ڈائریکٹر آف کلچر بلوچستان ءِ چیردستی ءَ بلوچی زبان ءِ نامداری شائر مبارک کازی ءِ ستک شانی ندر کنگ ءِ ھاتر ءَ ماں نوری نصیر خان کلچر کمپلکس دیوان ءِ برجم دارگ بوتگ –

مراگش ءِ بندات گوں کران وانی ءَ بوتگ کہ ڈپٹی ڈائریکٹر خدا رحیم ءَ تلاوت کتگ ءُ عمر فاروق ءَ مبارک کازی ءُ مستونگ ءِ وئیل ءَ نمیران بوتگیں مردمانی روھ ءِ آسودگی ءَ دوا لوٹ اِتگ – اے دیوان ءَ بلوچی زبان ءُ لبزانک ءِ نامداریں مردماں ھوار فرہنگ ایران ءِ ڈائریکٹر ابولحسن میری ءَ ھم بھر زرتگ ءُ مبارک کازی ءِ پہ بلوچی زبان ءُ لبزانک ءَ داتگیں ھزمتانی ستاہ کتگ ءُ گوشتگ کہ آ تھنا بلوچستان ءَ ناکہ ایران ءِ تہ ءَ زانگ بیت انت –

آئی ءَ خانہ ءِ فرہنگ ءِ نیمگ ءَ مبارک کازی ءِ شئیرانی ماں بلوچی تہ ءَ رجانک کنگ ءُ ھمے زوتاں بلوچی، براہوئی ءُ پشتو زبان ءَ مراگشانی اڈ دیگ ءِ وش ھبری داتگ –

ایران ءِ تھئیر فیسٹیول ءَ ڈائریکٹوریٹ آف کلچر بلوچستان ءِ نیمگ ءَ تھیٹر ازمکارانی بھر زورگ وشی ءِ درانگاز اِتگ، سیکٹریری کلچر منظور حسین ءَ تران کنان ءَ مبارک کازی دروت ندر کتگ ءُ گوشتگ کہ ما اے گرانیں ساھتاں آئی ءِ کھول ءِ گمانی شریدار ایں – آئی ءَ گوشتگ کہ مبارک کازی ءِ پگر ءُ ھیال آئی ءَ بلاھیں شائرے کن انت –

مراگش ءَ ڈاکٹر رحیم بخش مہر، ڈاکٹر زینت ثنا بلوچ، ممتاز یوسف، افضل مراد، ڈاکٹر قیوم بیدار، ڈاکٹر زاہد دشتی، عبدالحکیم مینگل ءُ بانک صورت بلوچ ءَ مبارک کازی ءِ زند ءُ ازم ءِ سر ءَ وتی ھیال در شان اِتگ انت –

مراگش ءَ گوستگیں ڈائریکٹر داؤد ترین ھم ھوار بوتگ ءُ مراگش ءَ نودربراں گوں وشیں توار ءَ مبارک ءِ شئیر الھان کتگ انت –

رائل سوئیڈش اکیڈمی آف سائنس ءَ سال دوھزار بیست ءُ سَے ءِ فزکس نوبیل سوگات گریوکیں سائنس دانانی نامانی جار جتگ –

اے سال ءَ فزکس ءِ نوبیل سوگات ایٹو سیکنڈ پلسز آف لائٹ سر ءَ پٹ پول کنوکیں پیئری ایگوسٹنی (اوہائیو یونیورسٹی، امریکہ)، فیرینگ کروز (میکس پلینک انسٹیٹیوٹ، جرمنی) ءُ این ایلہوئیلر (لُند یونیورسٹی سوئیڈن) نام ءَ کنگ بوتگ انت –

ایٹو سیکنڈ فزکس ءِ یک ھنچیں تک ءِ کہ سائنسدان کسانیں وھدے ءَ کسان کسانیں چیزاں ٹپاس انت – ایٹو سیکنڈ نینو سیکنڈ ءِ یک ارب می ءِ بھر بیت –

نوبیل سوگات گروکیں سائنس داناں ھنچیں تجربگ کتگ کہ سک باز ترندیں لیزر ارتعاش پیداک کن انت ءُ جھان ءَ کسانیں چیزانی ٹپاسگ ءِ کمک ءَ کارمرز کنگ بنت – وھدیکہ طبعیات ءَ ھوار دگہ سائنسی تکاں ھم کارمرز کنگ بنت –

نوبیل سوگات گروکیں سائنس داناں دھ لک امریکی ڈالر ھم دیگ بیت انت –

اے ٹولی ءَ ھواریں این ایلہوئیلر پنچمی زالبول انت کہ آئی فزکس ءِ نوبیل سوگات دیگ بوتگ – چدوپیسر دوسد ءُ بیست ءُ یک سوگات گروکیں زالبولانی تہ ءَ نوزدہ سد ءُ سَے میری کیوری، سال نوزدہ سد ءُ شست ءُ سَے ءَ ماریہ جیوپرٹ مایر، دوھزار ھژدہ ءَ ڈونا اسٹرک لینڈ ءُ دوھزار بیست ءَ اینڈریا گھیز ءَ فزکس ءِ نوبیل سوگات گپتگ انت –

فیفا ورلڈ کپ دوھزار سِی ءِ مھمان دارانی جار جنگ بوتگ، فیفا ءِ گوستانک ءِ تہ ءَ اولی رند ءَ گوازی سَے مزن برّ یورپ، افریقہ ءُ زرباری امریکہ ءَ کنگ بنت اِنت –

فٹبال ءِ میان استمانی گل ءِ رِد ءَ ورلڈ کپ دوھزار ءُ سِی ءِ مھمان دار مراکش، اسپین ءُ پرتگال ءَ بنت اِنت وھدیکہ میگا ایونٹ ءِ اولی سَئیں گوازی یورا گوئے، ارجنٹینا، ءُ پیراگوئے ءَ کنگ بنت، فیفا ورلڈ کپ دوھزار ءُ سِی ءِ مھماندارانی جار گوستگیں روچ ءَ بزاں چارشمبے ءَ جتگ –

رپورٹ ءِ رِد ءَ یوروگوئے ءُ پیراگوئے ءُ ارجنٹینا ھمے واستا اولی سَئیں گوازی ءِ مھمانداری ءَ گچین کنگ بوتگ انت کہ نوزدہ سد ءُ سِی ءَ یوروگوئے برجم دارگ بوتگیں ٹورنمنٹ سدمی سالروچ انت پہ آئی ءَ ستک شانی ندر کنگ بیت اِنت –

فیفا ءِ رِد ءَ درسیں ششیں ڈیھ اے ٹورنمنٹ ءِ ھاتر وت ءِ وت کوالیفائی کن انت – اے افریقہ، زرباری امریکہ ءُ یورپ ءَ برجم دارگ بوکیں اولی ٹورنمنٹ انت –

اولی گوازی یوراگوے “ایستادیو سینتینارو ” فٹبال پٹ ءَ برجم دارگ بیت ءُ اے پٹ نوزدہ سد ءُ سِی ءِ ٹورنمنٹ ءِ ھاتر ءَ جوڈ کنگ بوتگ ءُ اشی ءَ گڈی (فائنل) ءِ مھمانداری کتگ –

رپورٹ ءِ رِد ءَ فٹبال ءِ میگا ایونٹ ءِ بنداتی مراگش پرتگال، مراکش یا اسپین ءَ بیت انت –

مراکش ءِ اولی رند انت کہ فٹبال ورلڈ کپ ءِ مھمانداری ءَ کنگ ءَ انت، گوست ءَ افریقی ڈیھ ءَ ٹورنمنٹ ءِ مھمانداری ءِ گرگ ءِ ھاتر ےَ پنچ بر ءَ بولی جتگ –

پرتگال ءِ ھم اولی رند انت کہ مھمانداری کنگ ءَ انت آئی ءَ اسپین ءِ ھمراھی ءَ سال دوھزار ھژدہ ءُ دوھزار بیست ءُ دو ءَ پہ ٹورنمنٹ ءِ مھمانداری ءَ بولی جتگ بلے بے سوب بوتگ وھدیکہ اسپین ءَ گڈی رند ءَ سال نوزدہ سد ءُ ھشتاد دو ءَ میان استمانی فٹبال ءِ مھمانداری کتگ بوتگ –

بلوچ نودربر رھشون شبیر بلوچ ءِ زورانسری آوار جنی ءَ ھپت سال سرجم بوتگ انت ، کھول ءِ نیمگ ءَ زھرشانی روانک ءِ کشگ بوتگ –

درنگاز کنوکاں آرٹس کونسل کراچی ءَ بگر تاں پریس کلب ءِ دیم ءَ روانک کش اِتگ – اے زھرشانی روانک ءَ زھگ ءُ زالبولاں ھوار مزنیں کچے ءَ مردماں بھر زرتگ –

شبیر بلوچ چار اکتوبر سال دوھزار شانزدہ ءَ ماں تربت ءِ دمگ گورکوپ ءَ پاکستانی پوج ءَ دگہ بیست مردمانی ھمراھی ءَ زورانسری آوار جتگ ءُ بیگواہ کتگ، دو ھپتگ ءَ پد آدگہ ھمراہ یل کنگ بوتگ انت بلے شبیر بلوچ ءِ ھنگت ھچ ھال اھوال نیست –

مروچی چار شمبے ءِ روچ ءَ کراچی پریس کلب ءِ دیم ءَ بوتگیں زھرشانی روانک ءَ شبیر بلوچ ءِ گھار سیما بلوچ ءَ تران کنان ءَ گوشتگ کہ ما شبیر بلوچ ءِ زورانسری آوار جنی ءُ آئی ءِ یل نہ کنگ ءِ بگیری ءَ یکشل ءَ زھرشانی کنگ ءَ ایں، روانک، شدکشیں زھرشانیاں ھوار شال ءُ اسلام آباد ءَ نندانک جتگ ءُ نشتگ انت ، سوبائی ءُ وفاقی وزیرانی باور کنائینگ ءَ پد ھم مئے برات ءِ ھچ ھال اھوال نیست، دو سال ساری ملک ءِ گوستگیں مزن وزیر عمران خان ءَ کول کتگ ءُ مارا باور کنائیں اِتگ کہ آ منی برات ءَ ھوار ایندگہ بیگواھیں مردمانی یل کنائینگے ھاتر ےَ ملک ءِ ادرھاں گوں گپ جنت –

” ما پہ انساپ ءِ ھاتر ءَ دراہ کتگ، وڈ وڈا زھرشانی کتگ بلے ھنچوش سما بیت کہ اے ملک ءِ تہ ءَ مئے گوشداروک نیست – شبیر بلوچ ءِ زورانسری آوار جنی ءب درگت ءَ ملکی ءُ میان استمانی انسانی ھکانی ادارھاں ھم چہ ریاستی ادارھاں جست گپتگ بلے ھچ وڈیں پسو نہ رستگ “

کھول ءِ زھرشانی ءَ بیگواھیں متدمانی پانکجنیں گل وائس فار بلوچ مسنگ پرسنز ءُ بلوچ یکجھتی کمیٹی کراچی ءِ پلامرزی ھم گون بوتگ –

ھمے وھد ءَ سمی دین بلوچ، آمنہ بلوچ، وہاب بلوچ، سعیدہ حمید زھری، سعید بلوچ ءَ ھوار دگہ مردماں تران کتگ ءُ گوشتگ کہ ما چہ ملک ءِ واکداراں یکرندے پدا لوٹ کن ایں کہ شبیر بلوچ ءَ زاھر بہ کن انت ءُ آئی ءَ انساپ بہ دئینت اگاں آئی ءِ سر ءَ الزام ءِ ھست گڈا ملک ءِ آمیدگس ءَ پیش کنگ بہ بیت اگاں آ کتکار بوت گڈا سزا دیگ بہ بیت، بلے اے وڈ بید جرم ءَ سالاں سال بیگواہ کنگ ءُ ازیت دیگ ءَ مئے سرا زوراکی کنگ مہ بیت – مئے مروچیگیں زھرشانی مول ملک ءِ ادارھاں چہ انساپ ءِ لوٹگ انت – ما اے ریاستءِ جھمنند آئین ءُ کانودانی رِد ھَ وتی دوستیگیں مردمانی وش ءُ سلامتی یل کنگ ءِ لوٹ کن ایں –

بلوچستان ءِ بنجاھی شھر شال ءَ مزن شھدربرجاہ بلوچستان ءِ زولوجی ڈپارٹمنٹ ءِ نیمگ ءَ مروچی چار اکتوبر ءَ جنگلی دلوتانی میان استمانی روچ ءِ درگت ءَ مراگش ءِ برجم دارگ بوتگ – مراگش ءِ گچینی مھمان فوریسٹ سیکریٹری نور محمد پرکانی ءُ زولوجی ڈیپارٹمنے سرکماش ڈاکٹر عاصم اقبال بوتگ انت –

اے مراگش ءَ زولوجی ڈیپارٹمنٹ ءِ نودربراں ھوار دگہ تکاں سیادی داروکیں نودربر ءُ مردماں مزنیں کچے ءَ بھر زرتگ –

مزن شھدربرجاہ بلوچستان ءِ زولوجی ڈیپارٹمنٹ ءِ اسسٹںٹ پروفیسر سعید اھوالکاراں گوں تران کنان ءَ گوشتگ کہ اے روچ ءِ دارگ ءِ بنکی مول بلوچستان ءِ تہ ءَ جنگلی دلوتانی پھریزگ ءِ درگت ءَ مردماں سرپد کنگ –

آئی ءَ گوشتگ کہ بلوچستان یک ھنچین دمگے کہ آئی ءِ ڈولداریں کوھانی تہ ءَ ھما دلوت ھست انت کہ ھچ جاہ ءَ دز نہ کپ انت بلے تُرس ایش انت کہ آیانی پدریچ بازیں سوباں چہ ھلاس کنگ بوگ ءَ انت نوں اے مئے زمہ واری انت کہ یکجاھی ءَ گامگیج بہ زور ایں –

جنگلی دلوتانی میان استمانی روچ ءَ بازیں کواس ءُ زانتکاراں اے مراگش ءَ تران کتگ مردم سرپدی داتگ انت وھدیکہ مراگش ءِ گڈسر ءَ بلوچستان ءِ جنگلی دلوتانی ھاتر ءَ کارکنوکیں نمائندگ سوگات داتگ انت –

زانگ بہ بیت بلوچستان ءِ بازیں کوھانی تہ ءَ ھما دلوت ھم دز کپ انت کہ جھان ءَ نیست انت چوش کہ سید، آسک، گرانڈ، دگہ بازیں جنگلی دلوت ھست بلے سرکار ءِ نیمگ ءَ جوانیں گامگیج نہ زورگ ءِ سوب ءَ اے کم کم ءَ ھلاس بوان انت –

یات بہ داریت کہ مزن شھدربرجاہ بلوچستان ءِ زولوجی ڈیپارٹمنٹ نیمگ ءَ ھم جنگلی دلوتانء پھازگ ءُ آیانی پدریچ ءَ گیش کنگ ءِ درگت ءَ بازیں گامگیج زورگ بوتگ انت کہ جونیں کارے ستاہ کرزیت –

بلیدہ میناز ءَ سنج وانگجاھ ءَ ھپت سال سرجم بوگ ءِ درگت ءَ دو روچی مراگش ءِ برجم دارگ بوتگ کہ اودا نودربراں ھوار مزنیں کچے ءَ مردماں بھر زرتگ –

اے مراگش ءُ دو ءُ سَے اکتوبر ءَ ماں بلیدہ میناز ءَ سنج وانگ جاہ ءَ برجم دارگ بوتگ کہ دو اکتوبر ءِ ادار ھشت ءَ بگر تاں دوازدہ ءَ پہ بچکاں ءُ سَے اکتوبر ءَ ھشت تاں دوازدہ ءَ پہ جنکانی ھاتر ءَ برجم دارگ بوتگ – مراگش ءَ نودربراں جتا جِتائیں سرھالانی سرا گُشتانک داتگ ایشی ءَ ھوار نودربراں وتی بودشتانی رد ءَ جِتائیں بھراں مراگش ڈولدار کتگ –

اے مراگش ءَ نودربرانی نیمگ ءَ ڈرامہ، ڈیبلو، دوچاپی، ٹیلینٹ شو، ٹاک شو، آرٹ کمپیٹیشن،کتاب مراگہ ءَ ھوار شئر ءُ وش الھانی ءَ سوت گوشتگ –

اے درگت ءَ سنج وانگ جاہ ءِ واکدارانی گوشگ ات کہ سنج ءِ مدام جھد انت کہ پہ نودربراں جوانیں وانگی ءُ بودشتی مراگش بہ ٹہینیت تانکہ نودربرانی زانشتی ءُ بودشتی رودوم مھکم بہ بیت –

بلوچستان ءِ دمگ پنجگور ھوار کراچی ءِ دمگ کاٹھور ءَ بلوچی زبان ءِ نامداریں آشوبی ءُ مھری شائر نمیرانیں مبارک کازی ءِ یات ءَ مراگش برجم دارگ ءُ روانک کشگ بوتگ ، دومی نیمگ ءَ بالیچہ ءَ مبارک کازی ءِ یات ءَ دیوانے ءِ برجم دارگ ءِ جار جنگ بوتگ –

ماں پنجگور بلوچ اسٹوڈنٹس ایکشن کمیٹی پنجگور ڈگری کالج ءِ بنزہ ءِ نیمگ ءَ نمیرانیں مبارک کازی ءِ یات ءَ مراگشے برجم دارگ بیتگ، کہ اودا مردماں نمیرانیں مبارک کازی ءِ زند ءُ ازم ءِ سر ءَ تران کُتگ-

اے مراگش چار بھرانی تہ ءَ بوتگ کہ گشتانک، شائری، کتاب، سازءُ زیملی دیوان ءُ کتاب میڑہ ھوار بوتگ اَنت-

مراگش نمیرانیں مبارک کازی ءِ یات ءَ دو دمان بے تواری ءَ پد بندات کنگ بوتگ ءُ چریشی ءَ پد مبارک ءِ زند، ازم، شائری تکانی سر ءَ مصدق بلوچ ،پیرجان بلوچ، گمشاد بلوچ ءُ ملا مراد ءَ تران کتگ –

مراگش ءِ دومی بھر شائری بوتگ کہ نودربراں مبارک کازی ءِ شئیر ونتگ اَنت ءُ آئی ءِ پگر ءُ پلپسہ دیم ءَ آورتگ-

مراگش ءَ بلوچستان کتاب کاروان ءِ نام ءَ کتاب میڑہ ھم اڈ دیگ بوتگ کہ اود ءَ بلوچستان، بندپتر، سیاست، لبزانک، سائنس ءُ ایدگہ سرھالاں بندوکیں کتاب ایر کنگ بوتگ اَنت – کتاب میڑہ ءَ گل ءِ تاکبند نوْشت، زھگانی تاک گام ءُ بلوچ لٹریسی کیمپئن ءِ کتابُک ھم ایر کنگ بوتگ انت –

کتابی میڑہ ءَ استاد ءُ نودربراں اسٹال سیل کرتگ ءُ وتی دوستیگیں کتاب پہ وانگءَ زُرتگ اَنت –

مراگش ءِ گڈی بھر ساز ءُ زیملی دیوان ءِ بوتگ کہ آئی ءِ تہ ءَ نادر بلوچ، مسرور بلوچ ءُ کلیم اللہ بلوچ ءَ مبارک کازی شئیر گوں وتی وشیں توار ءَ الھان کرتگ اَنت ءُ رند ءَ مراگش آسر کنگ بوتگ –

ھمے وڈ کراچی ءِ دمگ کاٹھور ءَ ھم مروچی سے شمبے ءِ روچ ءَ آشوبی لچہ کار نمیرانیں مبارک کازی ءِ یات ءَ روانکے کشگ بوتگ – روانک ءَ بلوچی زبان ءِ شائر، سیاسی ءُ چاگردی کارکن، زھگ ءُ جنیناں مزنیں کچے ءَ بھر زرتگ –

مردماں مبارک کازی ءِ اکس ءُ بلوچستان ءِ آدگہ نمیرانی مردمانی اکس ایر کرتگ اَنت ءُ اکسانی سر ءَ پل ریتکگ ءُ اکسانی دیم ءَ ڈیوا بالینتگ ءُآ ستک شانی ندر کرتگ انت –

دیوان ءَ کران وانگ ءُ پہ نمیرانیں مبارک کازی ءُ آدگہ شھیدانی ارواہ ءَ دوا لوٹگ بوتگ ءُ پدا رند ءَ مبارک کازی ءِ شئیر وشگٹی ءَ الھان کنگ بوتگ انت –

دیوان ءَ اسد مراد ءَ نمیرانیں مبارک کازی ءِ زند ءُ شائری ءِ کتابانی سر ءَ چمشانک داتگ۔

کادر بکش کلمتی ءُ اکبال ھاشمی ءَ نمیرانیں مبارک کازی ءِ زند ءُ آئی شائری ءِ سر ءَ شریں وڑے ءَ تران کرتگ ءُ وتی ھیال درشان کرتگ اَنت۔

رند ءَ سیپ کریم ءَ نمیرانیں مبارک کازی ءِ پربند ءُ شاھنواز کلمتی ءُ رھمت ءَ رزا ءَ وتی شئیر ونتگ اَنت –

دومی نیمگ ءَ باند ءَ بزاں پنچ اکتوبر ءِ بیگاھے ادار سَے ءَ ماں تمپ ءِ دمگ بالیچہ ءِ وانگجاہ ءَ مبارک کازی ءِ یات ءَ دیوانے برجم دارگءِ جار جنگ بوتگ-

جار ءِ تہ ءَ گوشگ بوتگ کہ دیوان ءَ ڈاکٹر غفور شار، ارشاد پرواز، فضل، خلیل تگرانی، عارف عزیز، مقبول ناسر، ظفر اکبر، ازگر مھرم، اھد الاھی، ابد ھلیم ءُ دگہ شائر ءُ ادیب بھر زور اَنت –

جار ءِ رِد ءَ اے دیوان ءَ کواس ءُ زانتکار نمیرانیں مبارک کازی ءِ زند ءُ ازم ءِ سر ءَ تران کن اَنت ءُ لچہ کار وتی شئیر وان اَنت – چہ مردماں لوٹ کنگ بوتگ کہ اے دیوان ءَ بھر بہ زور انت –