TBP Balochi

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں شنگ کتگیں درشان ءَ گوشتگ کہ بی ایل ایف ءِ سرمچاراں گوستگیں شپ ءِ ساھت دو ءَ گوادر ءِ دمگ پسنی ءِ ھند شادی کور کراس ءَ کوسٹل ھائی وے ءِ سر ءَ کبڑی ءَ پاکستانی پوج ءِ بنجل نشانگ کتگ-

آئی ءَ گوشتگ کہ سرمچارانی نیمگ ءَ راکٹ، اے ون گولہ ءُ وتکاریں سلاہ کارمرد کتگ اَنت – اُرش ءِ آسر ءَ دشمنین پوج ءَ جانی ءُ مالی تاوان بیتگ اَنت –

آئی ءَ گوشتگ کہ بلوچستان لبریشن فرنٹ اے اُرش ءِ زمہ واری ءَ من ات ءُ بلوچستان ءِ آجوئی ءَ داں برجاہ بیت اِنت –

بلوچ ءَ را نوکاز بیگ لوٹ اِیت

نبشتہ کار : داد شاشانی

دی بلوچستان پوسٹ

من ءَ باز بر ءَ سنگت ءُ دوست گَلہ کن اَنت ءُ گْوش اَنت تو نبشتہ کنگ ءَ نہ ئے مرچاں، ایشی ءِ سوب چے اِنت؟ سوب وَ باز ھست بلے چیزے سوب ایش اَنت ، بلوچ راج باز جاگہ ءَ بھر ءُ بانگ اِنت ، گپ اے ایش اِنت پیسر ءَ بلوچ بھر ءُ بانگ نہ بوتگ ، پیسر ءَ بوتگ بلے روچ پہ روچ ھمے نادْراھی چو شومُک ءِ نادراھی ءَ بلوچ ءِ جان ءَ مزن ءُ پراہ بوان اِنت ، اگاں کَسے گوں راجکاری گَلے ءَ بندُک اِنت آ تھنا وتی راجکاری گَل ءِ سنگتانی نبشتانکاں وان اَنت یا شنگ ءُ دلبڈی دے اَنت یا آئی ءِ گپ ءُ ھیالاں گوں تپاک کن اَنت ، اگاں کَسے گوں لبزانکی گَلے ءَ ھَوار اِنت آ اوں ھمے آس ءَ بُن اِنت ، یا کَسے گوں چیزے سنگت ءَ نزدینکیں دوستی ءُ ھست اِنت آ ھمے راہ ءَ سرجنان اِنت گوں-

اے گپ تچک ءُ راست اِنت کہ ھر کَس وتی ھیال ءُ پگر ءِ منوگِر ءَ گوں وت ءَ بند اِیت کَس وتی وھد ءَ انچو پہ دیم گْوازینگ نہ لوٹ اِیت ، من ھم اے ھیال ءُ لیکہ ءِ منّوگِر اَنت ، مُپت ء ھُدا دگرانی جیڑھانی تھ ءَ دست مانی کنگ شَر نہ اِنت بلے اگاں کَسے پٹ ءُ پول کنگ ءُ نزوری ءُ کمیاں زانگ لوٹ اِیت گُڑا پہ آئی ءَ المی اِنت اے گپ کہ آ ھر ھیال ءُ لیکہ ءِ منوگِر ءَ گوش بدار اِیت ءُ بِہ وان اِیت نوں پہ وت گچینیں راھے شوھاز کُت کنت-

انگت کسہ ھلاس نہ اِنت پد ءَ ھمے راجی گَل ءُ سنگتی ءُ ھم ھیالی لوٹیاں باز جاگہ ءَ بھر ءُ بانگ اَنت کسہ انچو روان اِنت دانکہ کسان کسانُکیں ٹولیاں سر بیت بزان چار سنگت ءُ دو سنگت ءُ دوست ءَ داں سر کَش اِیت-

دومی جیڑہ اِیش اِنت وانوک روچ پہ روچ کم بْیاں اَنت من وت اے چیز ھُورت چاری کُتگ تو اگاں نبشتانکے شِنگ بہ کن ئے ھر کَس سرگْوز کنت ءُ روت تو اگاں تامُرے اکسے شنگ کن مردُم دْرست الم یکے برے پچ کن اَنت ئِے-

سیمی ما ھر کار ءِ تھ ءَ وتی دست ماں کُتگ یک مردُمے انچو کار یکجاہ کُت نہ کنت پمشکا گڑ ءُ مُنج ءِ آماچ بیت ھر کار ءِ تھ ءَ دستمانی ھم بلوچ ءِ لاچاری اِنت آرا دْرست یکجاہ ءُ یک وھد ءَ وانگی ءُ زانگی اَنت سرپد بوگی اَنت بلے انگت پشت کَپ اِیت پرچاکہ ایردستیں راج ھر نیمگ ءَ مین کنگ بیت پہ وت دست ءُ پاد جنگی نہ بیت-

چُشیں کسہ سک باز اَنت بلے گپ کہ باز بوت اَنت نبشتہ مزن بیت گپ پد ءَ ھما اِنت وانوک تچ اَنت-

تپاکی ، تپاکی ، کنگ ءَ ما دمبُرتگ نوں اے نہ بوتگیں گپے اے وھد ءَ پہ بلوچ ءَ منی گپ ءِ مُراد اے نہ اِنت پہ تپاکی ءَ جُھد مہ کن بہ کن بلے چُشیں راہ ءُ در گندگ نہ بیت انوں کہ مردُم تھنا ھمے گپءِ سر ءَ بِہ گیت بہ نند اِیت دانکہ تپاکی نہ بوتگ ھچ نہ بیت ، بے تپاکی ءَ گیش تاوان ءُ گِران کَپ اَنت جیڑہ ءُ کار بلے مارا انگت دگہ راھے گوں شوھاز کنگی اِنت تھنا پہ تپاکی ءَ نندگ ءُ دزبندگ نہ لوٹ اِیت ،

کینگ ءُ زد ءِ آس ھم انوں پک ءَ نہ مِر اِیت مارا دلجمی ءَ گوں اے گپ منّگی اِنت پرچاکہ آشوب سک وھد زور اِیت انچو پہ ھلو ءُ ھالو نہ اِیت ،

انچو کہ بلوچ پولکار گْوش اَنت ارباں گوں بلوچان چار سد سال جنگ کُتگ تھنا اسلام ءِ منّگ ءَ پہ بلے بلوچ ءَ انگت نہ منّ اِتگ نیم ءُ نیم بُندگ بوتگ بزان بلوچ ءِ نیم ءَ منّ اِتگ نیم انگت لوڈ ءُ بُلوڈ اِنت چیزے انگت نہ زانت چے بیگ ءَ اِنت چَہ اے گپ ءَ ھمے پدر بیت آشوب ءُ بدلی آرگ بے کِساس وھد لوٹ اِیت ،

بلے مارا نوں انچو وھد نیست نوں آ وھد ءُ زمانگ نہ اِنت آ وھداں دُگنیا ءِ گام ءُ گامگیج نزور بوتگ اَنت مرچی دُگنیا بے کِساس گوں تیزی ءَ روگ ءَ اِنت دیمروی کنگ ءَ اَنت اگاں ما چو گوں نزوریں گاماں جُنزان بہ بہ اِیں ما پہ گاری دیر نہ کن اِیں زُرت چو سنسکِرت زُبان ءُ زِرتشت مزھب ءَ گار ءُ بیگواہ بہ ایں ،

نوں بلوچ ءَ را دو کار گوں تُرندی ءَ کنگی اِنت یکے گوں تیزی ءَ دیمروی دوھمی وت ءَ چَہ ایردستی ءَ آجو، اگاں ما گوں اے گاماں روگ ءَ اِیں ھمے گاماں بُرو اِنت گُڑا پشت کَپگ ءَ دیر نہ کن اِیں ، پرچاکہ زانت ءُ زانگ ءُ آجوئی دو انچیں کار اَنت اے وھد ءَ ھر راج ءُ مردُم ءَ پہ المی ءُ ھژدری اَنت پد ءَ دو زنڈیں کار یکجاہ کنگ انچو ارزان نہ اِنت پہ دپ ءِ گپ ءَ نہ بِہ اَنت بلے مارا ھمے ھیال گْور کنگی اِنت کہ اے گام مارا بوت کنت مِنزل ءَ سر مہ کن اَنت ،

بلوچانی کُجام گَل گوں کُجام لیکہ ءَ بندُک اِنت آرا اے ھیال الم گْور کنگی اِنت کہ مارا نوکاز بیگی اِنت مارا وتی پُشت ءُ دیم چارگی اَنت مارا شَر ءُ ھراب ءِ تھ ءَ ھم نوکازگی اِنت ھما پیسر ھراب بوتگ المی نہ اِنت مرچی ھراب بہ بیت ھما کہ پیسر شَر بوتگ المی نہ اِنت مرچی شَر بہ بیت بدلی ءُ سَدلی ھر وھد ءَ گوں ھر دود ءُ ربیدگ ءُ کار ءُ کِسب ءُ ھیال ءُ لیکہ ءَ المی ءُ ھژدری اِنت ،

اے کار ءُ رھبند آ وھداں پہ آ مردُماں المی بوتگ اَنت آیاں کُتگ اَنت بلے مرچی وَ مارا کار نہ دیگ ءَ اَنت گُڑا ما چیا وت ءَ کُشتگ ءُ ایر کُتگ گوں پیسری جیڑھاں مارا وتی جیڑہ گوں وتی دَور ءُ باریگ ءَ ھم دپ کنگی اَنت مارا زندگ بیگی اِنت ھمے زمین ءِ سر ءَ یا دگہ ماہ ءُ استالے ءِ سر ءَ گوں آدگہ راج ءُ زُبان ءِ مردُمانی ھوری ءَ ،

اگاں بِہ نند اِیں کرانانی لوٹ ءُ گُزرانی سر ءَ پُرس بدار اِیں مئے جند ھلاس بیت چَہ اے دُگنیا ءَ ،
مارا وتی ھرچیز ءِ تھ ءَ نوکازگی اِنت کسان کسانیں کار ءُ دود ءُ دودمانی تھ ءَ بدلی ءُ سَدلی آرگی اِنت نوں گُڑا دیمروی ءِ ھیال کنگی اِنت اگاں وت ءَ نوکاز مہ کن ایں گُڑا دیمروی ءِ واب ءَ ھم مہ گند اِیں ،

مئے راجکاری ءُ چاگردی ءُ لبزانگی ، نیکراھی کُجام نیمگ بہ بیت بدلی آرگ لوٹ اِیت وت ءَ وت تپاسگ لوٹ اِیت ھُورتچاری ءُ دیرگندی لوٹ اِیت شَر ءُ ھرابانی تھ ءَ کمی ءُ گیشی کنگی اِنت ،
بلوچ ءَ را یکبرے پد ءَ نوکاز بیگی اِنت اگاں نا وتی بیگواھی ءِ نپاداں بڈ ءَ بہ کن اِت چَہ دُگنیا ءَ ،

ھر کُجا اِت سبز ءُ مِیزران بات اِت زندگ بوت آں پد ءَ دوچار کَپ اِیں گوں نبشتانکے ءَ

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

اسرائیل ءِ لشکر ءَ گوشتگ کپ مصر ءِ سیمسر ءِ نزیک ءَ سے پوجی ءُ یک اُرشکارے کشتگ اَنت-

روئٹرز ءِ رد ءَ پوجی جارکش ءَ گوشتگ کہ شمبے ءِ روچ ءَ یک ٹولی ءَ تیرگواری کرتگ –

اسرائیل ءِ پوج ءِ رد ءَ شمبے ءِ سھب ءَ پوجی کارندہ سیمسر ءِ نزیک ءَ تیرگواری جنگ بیتگ اَنت- آئی ءَ گوشتگ بازیں اداراں پد ارشکارے جنگ بیتگ ءُ سیمی پوجی اسرائیل ءِ ھاک ءَ وئیل ءِ سبب ءَ ناگتی بیران بیتگ-

اسرائیل ءِ پوج ءَ پد ءَ یک درشانے ءَ گوشتگ کہ سئیں پوجیانی کوشکار ءِ سیادی مصری پولیس ءَ اِنت –

درشان ءِ رد ءَ مصری لشکر ءَ سرجم ءَ کمک ءِ گون ءَ وئیل ءِ پٹ ءُ پول ءَ کنگ ءَ اِنت – پوجی گیشی ءَ اُرشکارانی پٹ ءُ پول ءَ کنگ ءَ اِنت-

مصری پوج ءَ راست کنان ءَ گوشتگ کہ تیرگواری ءِ میان ءَ مصری سکیورٹی ءِ جنگ بیتگ – اے ھم گوشگ بوگ ءَ اِنت کہ سلاہ بندانی یک ٹولی ءَ ناگتی رنگ ءَ شَپکی کنوکاں اسرائیل سکیورٹی کارندھانی سر ءَ تیر آس داتگ چریشی ءِ سبب ءَ تیرگواری بندات بیتگ –

اسرائیل ءُ مصر ءَ سال نوزدہ سد ءُ ھپتاد ءُ نُھ ءَ ایمنی ءِ مسام ءِ سر ءَ دزنویس کتگ بیتگ ءُ نزیکی ءِ پھزداری ءِ ھیالداری کنان ءَ آیاں ھواریں سیمسر ءَ اے دابین ڈک دابیں وئیل ھم بیتگ اَنت-

بلوچ اسٹوڈنٹس ایکشن کمیٹی ءُ وتی شنگ کرتگیں درشانی ءُ گوشتگ کہ گل ءِ سیمی بنجاھی پتر ءِ نیاد ترانگیری ءِ شھید سباء دشتیاری، بہ نام ءِ سورت ھان مری ءُ میر مھمد علی تالپور 17،16 ءُ 18 جون ءَ ماں شال ءَ برجم دارگ بیت اِنت-

آئی ءَ گوشتگ گل جمھوری رھبندانی سرجم کنان ءَ یک رندے پد ءَ وتی بنپدیں نھال ءَ آپ دیگ ءِ ھاتر ءَ جنزگ ءِ دیم ءَ روگ ءَ اِنت –

آئی ءَ گوشتگ گل ءِ سیمی بنجاھی پتر ءِ دارگ نودربرانی واستا یک نوکتریں گامے ءِ دروشم ءَ دیم ءَ کیت اِنت –

آئی ءَ گوشتگ کہ گل ءِ سیمی بنجاھی پتر ءِ نیاد ءِ دارگ ءِ بنداتی دویں روچاں بندیں کوٹی ءَ بیت اِنت کہ اود ءَ گچینکاری ءُ جتا جتائیں بنگپانی سر ءَ باوست کنگ بیت اِنت ءُ سیمی روچ ءَ مسامداری ءُ گل ءِ ڈبہ ءِ زورگ ءِ ھاتر ءَ سوگند واری بیت اِنت –

زانگ بہ بیت گوستگیں روچ ءَ گل ءِ سیمی بنجاھی پتر ءِ نام ءَ ماں شال ءَ دیوالانی سر ءَ دزنویس کنگ بیتگ اَنت –

اے اولی رند اِنت بلوچ اسٹوڈنٹس ءِ ھک ءَ دیوالانی سر ءَ دیوال نبیسی گندگ ءَ آیگ ءَ بوگ ءَ اَنت کہ اود ءَ ورنا اے گل ءَ گوں ھبناکی ءِ دروشم ءَ چارگ ءُ گل ءِ ھاتر ءَ جد ءُ جھد ءَ گام جنان اَنت-

کیچ ءَ دگہ یک لاشے دزکپتگ ءُ آ دگہ دوئیں لاشانی پجّار ٰآیانی کھول ءَ کتگ اَنت-

سربوتگیں ھالانی رِد ءَ تربت ءَ کیچ کور پُھل چیر ءَ یک مردمے کوھنیں لاشے دزکپتگ- پہ پجّار ھاتر ءَ ٹیچنگ نادُراھجاہ برگ بیتگ-

دومی نیمگ ءَ مروچی کیچ ءِ دمگ ناصر آباد ءِ جنگل ءَ دزکپتگیں دوئیں لاشانی پجّار کنگ بیتگ اَنت

دوئیں لاشانی پجّار آیانی کھولاں کتگ اَنت کھول گوشگ رِد ءَ یکے جلال ء یعقوب دومی خادم ء شاکر جھمنند چہ نودز نام ءَ اَنت-

آیاں گْوشتگ کہ دوئیں چہ مسقط ءُ دبئی ءَ چیزے روچاں ساری چُٹیانی ھاتر ءَ لوگ ءَ اَتکگ اَنت، یک ھپتگے ءَ ساری دوئیں بیگواہ بیتگ اَنت ءُ مروچی آیانی لاش دزکپتگ اَنت-

تنی وھدے وئیل سوب انگت زانگ نہ بیتگ اَنت-

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ ماں رسانکدراں وتی شنگ کرتگیں درشان ءِ تہ ءَ پاکستانی پوج ءِ سر ءَ بوتگیں اُرشانی زمہ واری منّ اِتگ ءُ گوشتگ مشکے ءُ کیچ ءِ دمگ تربت ءُ مند ءَ پاکستانی پوج ءِ سر ءَ اُرش کُتگ ءُ اے اُرشاں دہ پوجی کارمند مُرتگ انت –

جارکش ءَ گوشتگ کہ سرمچاراں دو جون ءِ شپ ءِ ادار نھ ءَ مشکے ءَ پاکستانی پوج ایف سی ءِ ہیڈکوارٹر ءُ بنجاھی بُنجل ءِ سر ءَ راکٹ ،وتکار ءُ ٹوھیں سلاھانی گوما ءَ اُرش کُتگ، آئی ءَ گوشتگ کہ مشکے نلی ءَ برجاھیں پاکستانی پوج ءِ بُنجل ءِ سر ءَ سرمچاراں چہ دونیمگ ءَ اُرش کنگ ءَ پد چہ مزنیں گیٹ ءَ تہ ءَ گوستگ ءُ راکٹ ءِ بازیں گولائِے آس داتگ کہ دروازگ ءِ دپ ءَ اوشتوکیں پنچ کارمند پیسر ءَ چہ راکٹ اُرش ءَ مُرتگ اَنت ءُ ترندیں اُرش ءَ زورگریں پوج ءِ نھ کارمند مُرتگ ءُ بازینے زدگ بوتگ ءُ دو گاڑی ھم تباہ بوتگ انت – چہ مُرتگییں کارمنداں پاکستانی پوج ءِ ھندی چاریگ وزیر ھم گون بیتگ کہ ریاست ءِ کُشندہ ٹولی ءِ سروک سرور ءِ برازتک اِنت –

جارکش میجر ءَ گوشتگ کہ دو جون ءَ کیچ ءِ ھند مند ءِ چکاپ ءَ برجاھیں پاکستانی پوج ءِ پانگس ءِ سر ءَ سرمچاراں اسنائپر توپک ءِ سر ءَ یک کارمندے نشانگ کُرتگ ءُ کُشتگ –

جارکش میجر گوھرام بلوچ ءَدیمتر ءَ گوشتگ کہ گوستگیں روچ ءَ دو جون ءِ بیگاہ ءَ ادار نُھ ءَ ماں تربت ءَ غلام نبی چار راہ ءَ برجاھیں پانگسے سر ءَ دزبمب ءِ چگل داتگ، کہ دز بمب پانگس ءِ تہ ءَ کپتگ – چریشی ءَ یک کارمندے زدگ بوتگ – اُرش ءَ پد ترس آماچیں پوج ءَ ھرنیمگ ءَ کورکاؤ تیرگواری کتگ-

جارکش ءَ گوشتگ کہ گڈسر ءَ وتی درشان ءِ تہ ءَ گوشتگ کہ مئے اُرش بلوچستان ءِ آجوئی ءَ تاں برجاہ مان انت-

بلوچستان ءِ دمگ کیچ ءَ دو مردمانی لاش دزکپتگ اَنت-

لیویز بنشون ءِ رد ءَ لاش تربت ءِ دمگ ناسر آباد ءَ دزکپتگ اَنت کہ آ پجار ءِ ھاتر ءَ تربت ھسپتال ءَ برگ بیتگ اَنت-

لاشانی دزکپگ ءِ بارو ءَ دگہ اھوال دیم ءَ نیتکگ اَنت-

ھمے وڑ گوستگیں شپ ءَ مشکے ءِ ھند نلی ءَ ناشناسیں مردمانی تیرگواری ءَ وزیر ء کریم جان نامے مردمے بیران بیتگ ات –

دومی نیمگ ءَ وزیر ءِ کوش ءِ زمہ واری بلوچستان لبریشن فرنٹ ءِ جارکش میجر گوھرام بلوچ ءَ زرتگ اَت-

گوھرام بلوچ ءَ گوشتگ ات کہ وزیر ریاستی کارندھے بیتگ ءُ آ گوستگیں شپ ءَ نلی ءَ تیرگواری کرتگ ءُ کُشتگ-

شمبے ءِ روچ ءَ بنجاھی شھر شال ءِ ھند کلی کمبرانی ءِ جتا جتائیں وانگجاھاں زھگاں دگ ءِ سر ءَ پر ایمنیں پندی روانک کشان ءَ نشہ ءِ ھلاپ ءَ اوگام جتگ –

وانگ جاہ ءِ جنک ءُ بچکیں نودربراں گوشتگ کہ کلی کمبرانی ءَ ھوار جتا جتائیں جاھاں نشہ ھلاس کنگ بہ بیت اِنت – آیاں مردماں گوں دزبندی کتگ کہ بیا اَنت ھوار بہ یکجاہ بہ بنت وتی آیوکیں باندات ءِ پدریچ ءَ چہ نشہ ءَ بہ رکین اَنت-

آیاں نشہ ءِ ھلاپ ءَ پلے کارڈ چست کتگ ءُ آیانی سر ءَ جتا جتائیں اوگام نبشتگ بیتگ اَنت-

آیاں گوشتگ کہ چہ نشہ ءَ یک مردمے ناں سرجمیں کھول تباہ ءُ برباد اَنت – شھر ءِ دمک ءُ کوچگاں چو پپلی ءَ نشہ بھا بوگ ءَ اِنت ءُ سرکار ءِ دارہ ایشی ءَ تچک ءَ ھوار اَنت-

آیاں گوشتگ اے زھرناکیں چیز ءَ بہ دار ات ءُ وتی آیوکیں نسل ءَ بہ رکین ات-

8 جون : بلوچستان ءَ زورانسری بیگواھیانی روچ

ٹی بی پی شونگال

سال دو ھزار ءَ سردار خیربخش مری ءِ دزگیری ءَ پد بلوچستان ءَ بلوچ راجی آجوئی ءِ جُنز ءِ بندات بلوچ لبریشن آرمی ءِ پلیٹ فارم ءَ چہ کنگ بیت۔ بلوچستان ءَ برجاھیں آجوئی ءِ جُنز ءِ ھلاس کنگ ءِ ھاتر ءَ پاکستان ءِ پوجی سرکار جنرل پرویز مشرف ءِ مستری ءَ زورانسری بیگواھیاں یک سلاھی ءِ پئیم ءَ کارمرز کنت ءُ پاکستان ءِ چیریں ادارگ آجوئی ءِ جُنز ءَ بندوکیں ادارگانی باسکاں زورانسری بیگواہ کنگ بندات کن اَنت، کہ ایشی ءِ بندات نورا مری ءِ زورانسری بیگواھی ءَ چہ کنگ بیت اِنت۔

پوجی زورشاھیں جنرل مشرف ءِ پوجی واکداری ءِ ھلاسی ءَ پد اوست دارگ بئیگ ءَ اَت کہ چہ بلوچستان ءَ زورانسری بیگواھیانی تہ ءَ کمی اتک کنت بلے دو ھزار ءُ ھشت ءَ پیپلز پارٹی ءِ سرکار ءَ پد ءَ بلوچستان ءَ زورانسری بیگواھیانی تہ ءَ گیشی اتک، اپریل دو ھزار ءُ نھ ءَ چہ تربت ءَ بلوچ نیشنل موومنٹ ءِ چیئرمین، غلام محمد بلوچ ءَ ھوار شیر محمد ءُ لالا منیر ءَ بلوچستان اسمبلی ءِ پیسرگیں اپوزیشن رھشون کچکول ایڈوکیٹ ءِ چیمبر ءَ چہ زورانسری بیگواہ کنگ بنت، چریشی ءَ لھتے روچ ءَ پد آیانی جون چہ تُربت ءَ لھتے کلومیٹر دیر، مرگاپ ءَ ژانگولیں جاورانی تہ ءَ دزکپ اَنت۔

بی این ایم ءِ چیئرمین ءِ زورانسری بیگواھی ءُ زندانی کُوش ءَ پد بلوچ سیاسی رھشون ءُ باسکاں ھوار زند ءِ ھمک تک ءَ سیاسی داروکیں مردمانی مزنیں کچے ءَ زورانسری بیگواھیانی یک درچے بندات بیت، کہ داں روچ ء مروچی برجاہ اِنت۔ 8 جون دو ھزار ءُ نھ ءَ بی ایس او ءِ وائس چیئرمین زاکر مجید چہ مستونگ ءَ زورانسری بیگواہ کنگ بیتگ ءُ 28 جون ءَ بی این ایم ءِ سنٹرل کمیٹی ءِ باسک ڈاکٹر دین محمد بلوچ چہ آئی نادراھجاہ ءَ زورانسری بیگواھی ءِ نشانگ کنگ بیت۔ بی ایس او ءِ پیسرگیں وائس چیئرمین سنگت ثناء ءُ بلوچ ریپبلکن پارٹی ءِ بنجاھی انفارمیشن سیکرٹری جلیل ریکی ءَ زورانسری بیگواھی ءَ پد کُشگ بنت ءُ آیانی لاش گیابان ءَ دور دیگ بنت اِنت۔

زورانسری بیگواھی ءَ پد کُشگ بیتگیں جلیل ریکی ءِ پِت ءُ گوستگیں پانزدہ سالاں چہ زورانسری بیگواھیں مردمانی یل کنائنگ ءِ ھاتر ءَ برجاھیں جد ءُ جھد ءِ چیدگیں رھشون ماما قدیر بلوچ ءِ رد ءَ چہ بلوچستان ءَ ھزارانی کچ ءَ مردم پاکستانی پوج ءِ دست ءَ زورانسری بیگواھی کنگ بیتگ اَنت ءُ دو ھزار ءَ گیش زورانسری بیگواہ کنگ بیتگیں مردم کُشگ بیتگ اَنت ءُ آیانی لاش جنگل ءُ گیاباناں دور دیگ بیتگ اَنت ءُ نوں یکشلی ءَ گوں زورانسری بیگواہ کُتگیں مردماں دروگیں میڑانی تہ ءَ کُشگ بئیگ ءَ اَنت۔

بلوچستان ءَ زورانسری بیگواھی ءَ یک مردمانی ھلاس بوگ ءِ ترسے ودی بیتگ ءُ بلوچ چاگرد ءِ ھمک تک سانمند اِنت۔ ھزارانی کھول زورانسری بیگواھیانی سوب ءَ زرکاری، زھنی ءُ چاگردی جنجالانی آماچ اَنت ءُ بلوچ مات ءُ گوھار وتی دوستیگانی یل کنائنگ ءِ ھاتر ءَ زھرشانی نندانک ءُ پریس کلبانی دیم ءَ یکشل ءَ زھرشانی کنگ ءَ اَنت۔ بلوچستان ءَ کہ ھمود ءَ پیسر ءَ چہ زورانسری بیگواھیں مردمانی ھاتر ءَ زھرشانی برجاہ اَنت، ھمود ءَ ھمک گوزوکیں روچ ءِ پجیگ ءَ زورانسری بیگواھیں مردمانی کساس ءَ گیشی آیان اِنت۔

بی ایس او آزاد ءَ دو ھزار ءُ شانزدہ ءَ ھشت جون گوں زورانسری بیگواھیں مردماں بندوک کُتگ اَت ءُ ھمے روچ ءَ سرجمیں بلوچستان ءَ زورانسری بیگواھیں مردمانی کھول ءُ مردمی اگبالانی گل زورانسری بیگواھیں مردمانی یل کنائنگ ءِ ھاتر ءَ پریس کلبانی دیم ءَ زھرشانی کن اَنت ءُ واکدارایں پاٹیاں ءُ پاکستانی پوج ءَ چہ وتی بیگواھیں دوستیگانی یل کنگ ءِ لوٹ ءَ کن اَنت۔

سرکاری ٹاہ، آمید گسی کمیشنانی پرمان ءُ مردمانی اگبالانی ھاتر ءَ کارکنوکیں گلانی دزبندیاں پد ھم بلوچستان ءَ برجاھیں زورانسری بیگواھیانی تہ ءَ کمی آیگ اگاں اوشت ءِ جاہ ءَ روچ پہ روچ گیشی آیان اِنت، کہ اے مردمی اگبالانی ءُ جمھوری وڑ ءُ پئیمانی ھلاپ ورزی اِنت، اے وئیلانی گِر ءُ دار ھژدری اِنت اگاں ناں گڑا اے مردمانی ھلاسی ءِ ترس ءَ گیش ودین ایت-