TBP Balochi

بلوچستان ء دمگ تربت گوگدان ءُ دگہ دمگاں چار روچاں چہ لین بے سبب ءِ بندی ءِ بگیری ءَ مروچی آدینگ روچ ءَ گوکدان ءِ نندوکیں مردماں ڈی بلوچ پوائنٹ سر ءَ بُنجاھی شھدگ بند کتگ-

بُنجاھی شھدگ بند بیگ ءِ سبب ءَ تربت ءَ چہ گوادر، پسنی، اورماڈہ، ھب ءُ کراچی ءَ روگ ءُ آھگ مھتل بیتگ – وھدے کہ دگ سر ءَ گاڑیانی دْراجیں لین لگ اِتگ-

دومی نیمگ ءَ دشت ، مند، تمپ ءُ ناصرآباد ءَ چہ تربت ءِ ھاتر آؤکیں دمگی ٹرانسپورٹ ھم مھتل بیتگ اَنت-

ڈی بلوچ پوائنٹ سر ءَ بُنجاھی شھدگ بند بیگ ءِ سبب ءَ گوگدان ءُ دگہ دمگاں گوستگیں چار روچاں چہ کیسکو ءِ بے سبب ءَ لین دیگ ءَ نہ اِنت-

شال ءَ پاکستانی پوج ءِ بنجل ءِ سر ءَ سلاہ بندین مردماں اُرش کنگ ءَ پد دستیگ کتگ ءُ اُرشکاراں ساز ءُ سامان گون وت برتگ اَنت – اُرشکارانی اُرش ءَ بازین کارندھانی مرگ ءِ ھال اِنت ءُ پوج ءَ سَے اُرشکارانی کُشگ ءِ ٹاہ ھم داتگ بیتگ-

پاکستانی پوج ءِ بنجل ءِ سر ءَ شال ءِ دمگ ولی تنگی ءَ گوستگیں بیگاہ ءَ اُرش کنگ بیتگ-

دمگی مردماں ٹی بی پی ءَ گوں گوشتگ کہ سلاہ بندیں مردمانی کچ ءَ پوجی پوسٹ ءُ پھزداری ءِ چوکی دستیگ کتگ اَنت-

اُرشکاراں پوج ءِ ساز ءُ سامان دستیگ کتگ ءُ شپ ءِ وھد ءَ پُشت مانداتگ ءُ شتگ اَنت-

پاکستان ءِ لشکری بنشون ءَ اُرش ءِ ھال راست کنان ءَ گوشتگ کہ سوبیدار رھیم کشگ بیتگ ءُ سَے کارندہ زدگ بیتگ اَنت ءُ لس مردمانی گوشگ اِنت پوج ءَ بازیں کَچے ءَ جانی تاوانانی دیمپانی کنگ کپتگ-

پوجی واکداراں ٹاہ داتگ کہ اُرشکاراں توک ءَ سَے مردم جنک بیتگ اَنت-

ھمے وڑ ءَ سھب ءِ سر ءَ ولی تنگی ءُ کش ءُ گوری ھنداں پوجی گن شپ ھیلی کاپٹراں جتاجتائیں تیرگواری کتگ بلے اے درگت ءَ دگہ اھوال دیم ءَ نیتکگ اَنت-

گوست ءَ بلوچ سلاہ بندیں مردمانی نیمگ ءَ بلوچستان ءِ جتاجتائیں جاھاں پاکستان پوج ءِ بنجلانی ارش ءُ دستیگی بیتگ اَنت ءُ چریشی ءَ پوج ءَ بازیں کچے ءَ جانی تاوانانی دیمپانی کنگ کپتگ اَنت-

بلے داں انگت ءَ اے اُرش ءِ زمہ واری ھچ گل ءَ پہ وت ءَ نہ زرتگ –

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں ھُزدار ءِ دمگ زھری کھن ءَ زورگریں پاکستانی پوج ءِ یک ھاسیں کارندہ ظھور لوٹانی تیرگواری کتگ ءُ کُشتگ-

جارکش ءَ گْوشتگ کہ ظھور احمد ء عبدالسلام لوٹانی گوستگیں یک دراجیں مُدتے ءَ چہ زورگریں پاکستانی پوج ءِ سروکی ءَ راج ءِ دُژمنی پُرکاری ءَ ھمگرنچ بوتگ- اے کارندہ ھُزدار ءَ ھوار گوادر ءَ زورگریں پوج ءِ سروکی ءَ چاریگی ءِ کار ءَ کنگ ءَ بیتگ- زھری ءَ بلوچ ورناھانی ءِ زورانسری آوار جنی، لوگانی سر ءَ بیڑبرگ ءَ اے کارندہ ءَ تچکی ءَ ھوار بیتگ وھدے کہ اشی ء بدل ءَ زورگریں پوج ءَ اش نشہ باپاری ءَ موکل داتگ-

جارکش ءَ گْوشتگ کہ اے کارندہ ءَ 2019 ءَ سنگت گل ءِ یک باسک ایں سرمچارے ءِ چاریگی کتگ ءُ زھری بازار ءَ چہ لیویز ءِ دست ءَ آوار جنائینتگ- اے پیسر ءَ سے رند ءَ بی ایل اے ءَ کڈن کتگ کہ آ وتی سلّکاریاں یل بکنت بلے آ یکلشہ راج دُژمنی ءَ پُرکار بیتگ-

جیئند بلوچ ءَ گْوشتگ کہ ظھور لوٹانی راجدروھی ءُ ڈیھ ءِ دُژمنی ءِ سر زدگ بیگ سر ءَ بلوچ راجی آمیدگس ءَ مرگ ءِ پرمان داتگ چریشی ءِ سر ءَ گامگیج زوران ءَ بلوچ سرمچاراں آ وتی گُڈی آسر ءَ سر کتگ اے نیٹورک ءِ آ دگہ مردم ھم مئے نشانگ ءِ تہ ءَ اَنت-

جارکش ءَ گُڈی ءَ گْوشتگ کہ بلوچ لبریشن آرمی اے اُرش زمہ واری ءَ منّ اِیت – راجدروھی ءِ ھمگرنچ ھچ مردم پھل کنگ نہ بیتگ – زورگریں پاکستانی پوج ءُ آئی ءِ ھمکارانی سر ءَ مئے اُرش برجاہ بنت-

اوگانستان ءُ پاکستان ءِ میان ءَ ھستیں سیمسر طورخم آدینگ ءِ سھب ءَ پندی ءُ گاڑیانی واستا پچ کنگ بیتگ-

ھال سر کنوکیں ادارہ اے ایف پی ءِ رد ءَ سرکاری یک مزنیں آپیسرے ءَ سیمسر ءِ رھگوزی ءِ پچ بوگ ءِ ھال راست کتگ-

زانگ بہ بیت ھردوکیں ڈیھانی سیمسر ھما وھد ءَ بند کنگ بیتگ ات کہ ھردوکیں سیمسری لشکراں تیرگواری کتگ ات کہ چریشی ءَ چہ یک ھپتگے ءَ گیش روگ ءُ آیگی راہ ءُ در بند کنگ بیتگ اَنت-

پاکستان ءِ ھیبر ءِ اسسٹنٹ کمشنر ارشاد خان مھمد ءَ اے ایف پی ءَ گوں گوشتگ کہ ٹرکانی چار ءُ ٹپاس کنگ بندات بیتگ ءُ اوگانستان ءِ شھری ءأ کلیئرنس ءُ امیگریشن ءَ پد اوگانستان ءَ روگ ءَ اَنت-

اسلام آباد ءُ کابل ءِ میان ءَ جاور ھال شش ستمبر ءَ سپارتی ءِ مھتلانی دیمپان اَنت ءُ سیمسراں پھزداراں تیرگواری کتگ بیتگ-

طورخم سیمسر ھردوکیں ڈیھانی میان ءَ یک مزنیں گوزانی راھے کہ ایشی ءِ نزیک ءَ اوگان ءِ یک چوکی ءِ بندگ ءَ جیڑہ پاد اتکگ ات-

اے ھردوکیں ڈیھانی میان ءَ باپاری ءُ شھریانی روگ ءُ آیگ ءِ دزگٹتریں رھگوزی اِنت ءُ اے اوگانستان ءُ پاکستان ءِ ھدانی سیمسر ءِ دوھزار ءُ شش سد کلومیٹر ءَ دراج کشیں.کوھاں گوزان کنت ءُ یک راھوکیں بیت اِنت-

ھردوکیں نیمگانی تاجرانی گوشگ اِنت سیمسر ءِ بندش ءِ سبب ءَ ھزاراں ٹن ساز ءُ سامان زوال بیتگ انت- اوگان شھریانی رد ءَ آیاں پاکستان ءِ راہ ءَ درملک ءِ روگ ءِ بالیگاں ھم پشکپتگ اَنت ءُ بازینے ءَ نادراہ جاھاں نمبر گپتگ بیتگ آ ھم شتگ اَنت-

روکپتی بلوچستان ءِ سیمسری ھنداں تیل کشے ایرانی لشکر ءِ ٹکر جنگ ءَ یک مردمے بیران بیتگ –

اھوالانی سر ءَ روکپتی بلوچستان ءِ دمگ سراوان ءِ ھند کلگان ءِ سیمسراں ایرانی لشکر ءَ یک تیل کَشے ٹکر جتگ ءُ چریشی ءَ تیل کش بیران بیتگ-

اھوالانی رد ءَ بیران بیتگین مردم ءِ پجار رامین یاراھمد زئی ء ساھب داد جھمنند ھاش ءِ نام ءَ زانگ بیتگ-

اھوالانی رد ءَ رامین بیران بوگ ءَ پد آئی ءِ لاش لشکر ءَ گون وت ءَ برتگ ءُ لاش ءِ دیگ ءَ انکاری کتگ-

اھوالانی رد ءَ لشکر گوشگ اِنت کہ لاش شمارا ھما وھد ءَ دیگ بیت اِنت کہ شما اے گپ ءَ چِد ءُ دیم مہ بر ات ءُ بہ گوش ات کہ اے کزائے بیتگ-

زانگ بہ بیت رامین ھما وھد ءَ ٹکر جنگ بیتگ کہ آ وتی پرپٹ ءَ گوں روگ ءَ بیتگ کہ ایرانی مرساد ءَ آ ٹرک ءِ سر ءَ ٹکر جتگ ءُ دور داتگ –

بلوچستان ءِ دمگ چہ ڈیرہ بگٹی ءَ یک مردمے بیگواہ وھدے کہ چہ نوشکی ءَ یکے آجو بیتگ-

گیشیں ھالانی رِد ءَ پاکستانی پوج ءَ ڈیرہ بگٹی ءِ تھسیل سوئی ءِ دمگ دولی ءَ پوج ءِ چیک پوسٹ ءَ یک ورنایے دزگیر کنگ ءَ پد بیگواہ کتگ کہ آئی ءِ پجّار واحد بخش ء دین محمد بگٹی ءِ نام ءَ چہ بیتگ-

ھمے وڑ چہ نوشکی ءَ نُھ ماہ ءَ ساری بیگواہ کنگ بیتگیں ورناہ صفیان ء حنیف جمالدینی آجو بیتگ ءُ لوگ ءَ سر بیتگ-

زانگ بہ بیت ڈیرہ بگٹی ءَ چار روچ بیت کہ لشکر کشی برجاہ ءَ اِنت ھمے میان ءَ پاکستانی پوج ءَ بازیں مردمے آوار جنگ ءَ پد بیگواہ کتگ اَنت-

بلوچ لبریشن ٹائیگرز ءِ جارکش میران بلوچ رسانکدر ءَ شنگ کتگیں دو جتاجتائیں درشانانی تہ ءَ گْوشتگ کہ مئے سرمچاراں گوستگیں شپ ءَ ڈیرہ بگٹی ءِ دمگ پیرکوہ ءَ ڈل ءِ ھند ءَ چات نمبر 41 ءَ تراکناکیں شور ایر کتگ ءُ تراکینتگ ، چریشی ءَ پد چات ءَ چہ پلانٹ ءَ پُجارینگ بند بیتگ-

جارکش ءِ گْوشگ اِنت کہ ڈیرہ بگٹی ءِ دمگ زین ءَ جوڈیر ءِ ھند سر ءَ گوستگیں بیگاہ ءِ وھد ءُ مروچی سُھب ءَ پاکستانی پوج سر بستگ ءُ دو اُرش کتگ چریشی ءَ یکجاھی ھساب ءَ شش کارندہ مرتگ ءُ بازین ئِے ٹپی بیتگ-

آئی ءَ گْوشتگ کہ اے اُرشانی زمہ واری ءَ بلوچ لبریشن ٹائیگرز منّ اِیت-

دگہ یک درشانے ءِ تہ ءَ گوشتگ کہ مئے سرمچاراں سوئی ءَ چہ ڈیرہ بگٹی ءَ رؤکیں بُنجاھی شھدگ ٹلی مٹ ءِ ھند سر ءَ بستگ ءُ دو ریاستی کارندہ دزگیر کتگ کہ آیانی نام باز محمد ءُ نیاز علی ءَ اَنت-

جارکش ءَ گْوشتگ کہ چل ملٹ ءَ تاں شھدگ بی ایل ٹی ءِ سرمچاراں بند کتگ ءُ ڈیرہ بگٹی ءِ مردماں گوشگ لوٹ ایں کہ سرجمیں دمگ پاکستانی پوج نیمگ ءَ چہ زوراکی برجاہ ءَ اِنت دمگ مردم ھرچ وڑیں شھدگ ءَ تر ءُ گرد ءَ چہ پھریز بکن اِت-

آئی ءَ گْوشتگ کہ گل ءِ نیمگ ءَ چہ اُرشانی تہ ءَ تُرندی آرگ ءَ ایں- ما لَس مھلوک ءَ ھال دیگ لوٹ ایں اَبید زرورت ایں کاراں تر ءُ گرد مکن اَنت-

بلوچستان ءِ سے جتاجتائیں دمگ ھب چوکی ، شال ءُ پنجگور ءَ ناشناسیں سلاہ بندیں مردماں پاکستانی پوج ءِ سر ءَ اُرش کتگ یکے بیران ءُ سے ٹپی کنگ بیتگ اَنت-

گیشیں ھالانی رِد ءَ سلاہ بندیں مردماں بلوچستان ءِ دمگ پنجگور ءَ برجاھیں پاکستانی پوج ءِ بُنجاھی بُنجل سر ءَ اُرش کتگ- اُرش ءِ وھد ءَ تُرندیں تیرگواری ءُ تراکانی توار اش کنگ بیتگ-

ھمے وڑ مروچی ھب چوکی ءَ گیٹرون شرکت ءِ نزیک ءَ پاکستانی پوج ایف سی ءِ چوکی سر ءَ بمب اُرشے بیتگ-

اِھوالکارے ءِ رِد ءَ ناشناسیں مردماں پوج ءِ پانگس گوں دستی بمب ءَ نشانگ کتگ ءُ تتکگ اَنت- تراک ءَ پد پوج ءِ مزنیں کچے ءَ کارندہ وئیلجاہ ءَ سر بیتگ اَنت-

دوئیں اُرشاں لشکر ءَ جانی ءُ مالی تاوان ءِ گمان اِنت-

دومی نیمگ ءَ بلوچستان ءِ بُنجاھی شھر شال ءَ سلاہ بندیں مردماں پاکستانی پوج پوسٹ سر ءَ اُرش کتگ-

پوج ءِ پوسٹ شال ءِ دمگ ولی تنگ ءِ ھند ءَ نشانگ کنگ بیتگ، واکداراں اے اُرش راست کُتگ گْوشتگ کہ اُرش ءَ یک کارندھے مرتگ ءُ سے ٹپی بیتگ اَنت-

دمگی اِھوالکارے ءِ گْوشگ اِنت کہ اُرش ءِ وھد ءَ پوج ءُ اُرشکارانی میان ءَ تُرندیں تیرگواری ءِ رِد برجاہ بیتگ-

زانگ بہ بیت اے دمگاں بلوچ آجوئی لوٹوکیں سلاہ بندیں گل پُرکار اَنت، ساری ھم اے بُنجل سر ءَ اُرش بیتگ ءُ آئی ءِ زمہ واری بلوچ لبریشن آرمی ءَ منّ اِتگ-

بلے اے سئیں اُرشانی زمہ واری انگت ھچ ءَ گلاں نہ زرتگ اَنت-

بلوچستان ءِ دمگ ڈیرہ بگٹی ، سوئی ءَ سلاہ بندیں مردماں دو مردم آوار جتگ اَنت-

دمگی اِھوالکارانی رِد ءَ پشمبے ءِ روچ ءَ درزنے سلاہ بندیں مردماں سوئی ءَ تاں ڈیرہ بگٹی ءَ رؤکیں بُنجاھی شھدگ ءَ ٹلی مٹ ءِ ھند سر ءَ بند کتگ ءُ بازیں گاڑی یے پٹ ءُ پول کتگ دو مردم ءِ پجّار ءَ پد آوار جتگ اَنت-

اے مردمانی تہ ءَ یکے ءِ پجّار باز محمد ء توڈو مندوانی بگٹی نام ءَ چہ بیتگ ءُ دومی پجّار نہ بیتگ-

گْوشگ بوگ ءَ اِنت کہ اے دوئیں مردمانی سیادی سرکاری پلامرزی کنوکیں سلاہ بندیں ٹولی ءَ اِنت-

بلوچستان ءِ بنجاھی شھر شال ءِ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل برجاہ، زھرشانی بنجل ءَ مروچی پنچ ھزار ءُ یکسد ءُ شست ءُ نُھ روچ سرجم بوتگ انت – مروچی چہ ھزدار ءَ سیاسی ءُ چاگردی باسک رسول بخش بلوچ، دین محمد بلوچ ءُ دگہ مردماں بنجل ءَ اتکگ ءُ بیگواھیں مردمانی گھولاں گوں دلپدردی درشان اِتگ –

بنجل ءَ اتکگیں مردمانی میان ءَ وی بی ایم پی ءِ کمک سرکماش ماما قدیر بلوچ ءَ وتی ھیال درشان اِتگ ءُ گوشتگ کہ بلوچ سرڈگار ءِ سر ءَ بے کساس زلم زوراکیاں ابید ھم بلوچ ھلاس کنگ نہ بوتگ انت ءُ مروچیگیں دور ءَ کہ.جھان ءِ مپاد گوں ھمے ڈیھ ءَ بندوک انت بلوچ راج یک مھکمیں تاکتے جوڈ بوتگ ءُ بلوچ پرزندانی پُرایمنیں جھد مھکم کتگ –

ماما قدیر بلوچ ءَ گوشتگ کہ روچ مروچی بلوچ راج ءَ شریں وڈی ءَ جھد کتگ، پاکستان ءِ زورگیری ءِ بگیری ءَ بلوچ پرزندانی جھد برجاہ انت کہ آیاں ھر وڈیں زوراکیانی دیمپانی کتگ، بلوچ پرزندانی بے دروریں جھد ءُ دیمھونیاں بلوچستان ءِ تہ ءَ پاکستان ءِ درسیں ھُنر ھیلا پاشک کتگ انت –

ماما قدیر بلوچ ءَ گوشتگ کہ پاکستان ءِ داشتگیں چانیگ وار کہ بلوچ راج ءِ میان ءَ نشتگ ءُ وت ءَ بلوچانی ھمدرد زاھر کنگ انت ءُ ھک ءُ اگبال ءُ بلوچ راجی مڈیانی نام ءَ گپتگ ءُ بلوچ راج اسمبلیانی تہ ءَ برتگ انت تانکہ اودا نمیرانیں بلوچ، زورانسری آوار جنگ بوتگیں مردمانی دیمھونی ءُ بلوچ راجءِ ایردستی ءَ کیش کت بہ کناں –

ماما قدیر بلوچ ءَ گوشتگ بلوچستان ءِ بازیں ھند ءَ دمگاں بلوچ راج ءَ پُرایمنیں جھد کنان ءَ پاکستان چانیگ وارانی ھاتر ءَ وتی مراعات ءُ لالچ ءِ سیاست بے سوب کتگ ھمے دمگانی تہ ءَ ھمے چانیگ وارانی رھشونی ءَ پاکستان لشکر کشی کنگ ءُ بلوچ راج ءَ نشانگ کنگ ءَ انت آیاں زورانسری آوار جنگ ءُ بیگواہ کنگ ءَ انت –