TBP Balochi

کاؤنٹر ٹیررازم ڈیپارٹمنٹ ( سی ٹی ڈی) ءَ ھب چوکی ءَ پولیس ءِ دست ءَ زورانسری بیگواھی ءِ آماچیں ھب بھوانی ءِ جھمنند چاکر بگٹی دزگیر کنگ ءِ ھال راست ءُ ایف آئی آر درج کنگ بیتگ-

سی ٹی ڈی ءِ نیمگ ءَ کیس ءَ چاکر بگٹی ءِ سر ءَ بلوچ لبریشن آرمی ( بی ایل اے) ءِ سیادی ءُ پولیس ٹیم ءِ سر ءَ دزبمب اُرش ءِ بھتام جنگ بیتگ-

چاکر بگٹی ءِ کھول ءِ گوشگ انت 15 نومبر2024 ءَ ھب چوکی ءَ پولیس ایس ایچ او سعود ءُ پاکستانی چیریں ادارھانی کارندھاں آ دزگیر کتگ، چریشی ءَ پد آ بیگواہ انت-

چاکر بگٹی ءِ کھول ءِ نیمگ ءَ سَے روچاں ھب بھوانی ءِ نزیک ءَ دگر بیگواھیں مردمانی ھمراھی ءَ زھرشانی نندانک برجاہ بیتگ کہ آ گوستگیں شپ ءَ انتزامیہ ءِ گون ءَ گپ ءُ تران ءَ پد بیست روچ ءِ واستا مھتل کنگ بیتگ-

دومی نیمگ ءَ چاکر بگٹی ءِ کھول ےَ کاؤنٹر ٹیررزام ڈپارٹمنٹ ءِ اے ایف آئی آر ترندی ءَ رد کتگ ءُ بے بنیادین بھتام گوشتگ انت-

زھرشانی ءِ وھد ءَ کھول ءَ گوشتگ آیانی مردماں گیر کانونی گر انت ءُ بیگواہ کن انت ءُ پد آیاں ابید بھتام ءَ دزگیری کن انت ءُ آیاں ترس ءِ گمان درشان کتگ چش مہ بیت دروگیں میڑ ءَ مئے مردماں تاوان مہ دے اَنت-

کھولاں گوشتگ اگاں آیانی مردم یل نہ بیت انت آ بلوچ ہکجھتی کمیٹی ءِ ھواری ءَ ھوار بنت اِنت ءُ زھرشانی زرمبشت ھلائین اَنت آیانی زمہ واری ھب ءِ انتزامیہ ءِ سر ءَ بیت اِنت-

روکپتی بلوچستان ءِ تیابدپی شھر چھبار ءَ ناشناسیں مردماں تیرگواری کتگ ءُ بینک ءِ ملازمے کُشتگ-

اھوالانی رد ءَ چھبار ءَ یک لوگے ءِ سر ءَ ناشناسیں مردماں تیرگواری فلاھی ادارہ ءِ بینک ءِ ملازم کشتگ-

بیران بیتگیں مردم ءِ پجار امان اللہ رخشان ء ابراھیم ءِ نام ءَ زانگ بیتگ کہ آ گلشھر چھبار ءِ جھمنند انت-

اھوالانی رد ءَ امان اللہ چہ جند ءِ لوگ ءَ ناشناسیں مردماں تیرگواری کتگ ءُ کُشتگ-

وئیل ءِ سبب زانگ نہ بیتگ ءُ وئیل ءَ پد انتزامیہ ءَ لاش چِست کتگ ءُ ھستپال ءَ برتگ ءُ اود ءَ اژدری کاروائیاِن پد لاش کھول ءِ ھوالگ ءَ دیگ بیتگ-

پنجگور ءِ دمگ پروم ءَ سرکاری پلامرزی ٹولی ءَ یک لوگے ءِ سر ءَ بیڑبرتگ عظیم ء خاڑو نامیں مردمے آوار جتگ ءُ برتگ چریشی ءَ پد آئی ءِ درگت ءَ کھول ءَ ھال نہ رس اِتگ-

ھمے وڑ تربت چاہ سر جھمنندیں بیگواھیں ورنا ضمیر سرور یل بیتگ ءُ وتی لوگ ءَ سر بیتگ- آ گوستگیں ھپتگ ءَ لوگ ءَ چہ پاکستانی پوج ءَ آوار جتگ ءُ بیگواہ کتگ اَت-

بلوچستان ءَ سیاسی ءُ چاگردی مھلوک ءِ گوشگ انت کہ ریاست یک نیمگے کمے کساس ءَ مردماں یل دنت ءُ دومی نیمگ ءَ مردماں آوار جنت اِنت-

ھمے وڑ ھب چوکی ءَ بھوانی ءِ ھند ءَ بیگواھیں مردمانی کھولاں گوستگیں سَے روچ ءَ زھرشانی نندانک داتگ بیتگ ءُ آیاں وتی گاریں مردمانی یل دیگ ءِ لوٹ کتگ –

گوستگیں شپ ءَ ھب ءِ انتزامیہ ءَ گپ ءُ تران ءَ بیست روچ ءِ مُھلت لوٹ اتگ بیتگ ءُ کھولاں زھرشانی گوستگیں شپ ءَ ھلاس کتگ ءُ بیست روچانی ودار ءِ آسر زرتگ-

ھب ءَ بیگواھیں مردمانی کھول ءَ انتزامیہ ءَ چہ گپ دیوان ءَ پد سے روچ ءَ برجاھیں نندانک ھلاس کتگ-

سے روچ ءَ چہ ھب چوکی ءِ نزیک ءَ بھوانی ءَ شال کراچی ءِ بُنجاھی شھدگ سر ءَ برجاھیں اے نندانک ءَ زورانسری آوار جنگ بیتگیں کھول وتی دوستناکانی یل کنائینگ لوٹ کنگ ءَ اَنت، آئی ءِ گْوشگ اِنت کہ پاکستانی پوج ءُ سیکورٹی ادارھاں درکانودی ھساب ءَ آیانی دوستناک آوار جتگ ءُ بیگواہ کتگ اَنت-

ھب چوکی ءِ نندانک ءَ بیگواھیں چاکر بگٹی، جنید حمید، یاسر حمید، نوروز اسلام، نصیر بلوچ ءُ دگہ بیگواھیں مردمانی کھول نیمگ ءَ چہ گوستگیں سے روچ ءَ چہ برجاہ بیتگ چریشی ءَ پد شال ءَ چہ کراچی اھوال مھتل بیتگ-

نندانک ءَ بلوچ یکجھتی کمیٹی ءِ باسکاں ھم بھر زرتگ، کمیٹی ءِ راھشوناں ھکومت ءُ ریاستی ادارھاں چہ لوٹ کتگ کہ زورانسری آوار جنی ءِ دْرچ بند کنگ بہ بیت ءُ سرجمیں بیگواھیں مردماں یل بہ کن اِت-

انتزامیہ ءَ چہ گپ دیوان ءُ لوٹ

کھول ءُ انتزامیہ میان ءَ گپ دیوان بندات گوستگیں روچ ءَ بیتگ، اے میان ءَ انتزامیہ ءِ نیمگ ءَ دلجمی دیگ بیتگ اے جیڑہ گوں سنجیدگی ءَ زیرگ بیگ ءَ اِنت ءُ آیانی دوستناکانی یل کنائینگ گامگیج ءَ زیرگ ءَ اَنت-

سے روچ ءَ نندانک ءَ نشتگیں بیگواھیں مردمانی کھول مروچی ڈپٹی کمشنر ءِ دلجمی دیگ ءِ سر ءَ انتزامیہ ءَ بیست روچ وھد داتگ-

اے میان ءَ بیگواھیں مردمانی کھول ءُ بلوچ یکجھتی کمیٹی ءَ تچک کتگ کہ بیست روچ ءَ آیانی دوستناک دیم ءَ آرگ نی بیت اَنت گُڑا آ گیش زھرشانی کن اَنت ءُ اشی ءَ پد تُرندیں گامگیج ءِ جار جنگ بیت-

آیانی گْوشگ اِنت کہ آ انساپ ءِ ھاتر ءَ کجام ھد ءَ شت کن اَنت ءُ زورانسری آوار جنی ھلاپ ءَ وتی توار ءَ چست کن ایں-

اھوالانی رد ءَ تربت ءَ بندیگجاہ ءَ بالاچ مولابخش ءِ کوش ءَ نامینتگیں کوشکار دیمروئی دیگ بیتگ-

بلوچ اھوالکار کیا بلوچ ءَ گوشتگ وھدیکہ سی ٹی ڈی ءِ آفسر عادل عامر کہ آئی ءَ نومبر 2023 ءَ تربت ءَ بالاچ مولابخش ءِ کشگ ءِ ھکم داتگ بیتگ چریشی ءِ سبب ءَ اسلام آباد ءَ یک ماھے ءِ وھد ءَ نندانک دیگ بیتگ، آ گریڈ 18 ءَ دیمروئی دیگ بیتگ-

زانگ بہ بیت بلوچستان ھائی کورٹ ءَ نومبر 2023 ءَ عادل ءَ ھوار سی ٹی ڈی ءِ چار کارندھانی درکنگ ءِ ھکم داتگ بیتگ-

انسانی ھکانی باسک ءُ وکیل ایمان مزاری ءَ لیکہ دیان ءَ گوشتگ ھما کارندہ بلوچانی ھونریچی ءَ کنگ ءَ انت آئی ءَ اے ناشریں ریاست ھروھد ءَ دیمروئی ءُ پھریز ایت-

آئی ءَ گوشتگ اے ڈولیں کاتل اے وڑیں ناشریں ریاست ءِ گچینی مردم بنت انت ءُ بلوچ نسل کشی ءِ پالیسی انت-

بلوچستان لبریشن فرنٹ ءِ جارکش میجر گوھرام بلوچ ءَ رسانکدر ءَ وتی شنگ کتگیں درشان ءَ گوشتگ کہ مئے سرمچاراں یک فروری ءَ شپ ءِ ساھت ھپت ءُ چل ءُ پنچ ءَ کلات ءِ شھر ءَ وانگجاه ءِ چکاسانی ھال ءِ نزیک ءَ برجاھیں پولیس چوکی گوں دز بمب ءَ نشانگ کرتگ کہ چہ ایشی ءَ پولیس ءَ جانی ءُ مالی تاوانانی دیمپانی بیتگ-

آئی ءَ گوشتگ کہ ما پولیس ءَ کڈن کن اِیں کہ آ چہ ریاستی لشکر ءِ همدستی ءَ پھریز بہ کنت اگاں ناں گڑا ما آیاں دژمن سرپد بہ ایں-

میجر گوھرام بلوچ ءَ گوشتگ اے اُرش ءِ زمہ واری بلوچستان لبریشن فرنت من ایت ءُ داں بلوچستان ءِ آجوئی ءَ زورگریں لشکر ءُ آئی ءِ شریدارانی سر ءَ اُرش برجاہ بنت اِنت-

ھب چوکی ءَ زورانسری بیگواھیں مردمانی کھولانی نیمگ ءَ آیانی دوستیگیں مردمانی یل نہ کنگ ءِ ھلاپ ءَ زھرشانی برجاہ، چریشی ءِ سبب ءَ کراچی شال ءِ بنجاھی شھدگ گوستگیں سَے روچاں چہ بند انت ءُ ٹریفک ءِ روانی مھتل انت-

پاکستانی پوج ءِ دست ءَ زورانسری آوار جنگ بیتگیں دو برات جنید حمید ءُ یاسر حمید ءِ کھول ءِ ھواری ءَ چاکر بگٹی ءِ کھول گوستگیں سَے روچاں بھوانی ءِ ھند ءَ شھدگ ءِ سر ءَ نشتگ ءُ بند اش کتگ چریشی ءِ سبب ءَ کراچی شال، گوادر ءُ دگہ ھندانی زمینی راہ بند اَنت-

شھدگ ءِ بند بوگ ءِ سبب ءَ سدانی کچ ءَ گاڑی مھتل انت ءُ انتزامیہ ءِ گون ءَ گپ ءُ تران بے سوب بیتگ-

گوستگیں شپ ءَ دمگی انتزامیہ ءُ زھرشانی کنوکانی میان ءَ سیمی بر ءِ گپ ءُ تران بے سوب بیتگ ءُ انتزامیہ ءِ رد ءَ چاکر بگٹی ادارھانی گور ءَ بندیگ انت کھول ءِ گون ءَ گپ ءُ تران ءَ پرمایگ بیت اِنت-

گوستگیں شپ ءَ ایس پی ھب رانا پنام ءِ عثمان، اے ڈی سی ھب، چیئرمین ایم سی ھب بابو فیض شیخ، نامینتگیں وائس چیئرمین ایم سی ھب عظیم سیاں، ایس ایچ او ھب سٹی قادر شیخ، ایس ایچ او بیروٹ گل ھسن، ایس ایچ او عبدالجبار رونجھو ءُ دگراں زھرشانی کنوکانی گون ءَ گپ ءُ تران آسری ءَ نہ بیتگ-

گپ ءُ تران کنوک زھرشانی کنوکاں سدک کنگ ءَ بے سوب بیتگ انت زھرشانی کنوکاں گوشتگ چاکر بگٹی ءِ نام ءَ درج کتگیں ایف آئی آر ءَ آیاں پیش بہ کن ات بلے آیاں ایف آئی آر پیش نہ کتگ-

کھول ءَ گوشتگ اگاں آئی ءَ جرمے کتگ آمیدگساں پیش کنگ بہ بیت ءُ دیم ءَ آرگ بہ بیت اِنت-

زھرشانی کنوکانی لیکہ انت آیانی زھرشانی داں مردمانی یل کنگ ءَ برجاہ بیت اِنت-

بلوچستان ءِ جتا جتائیں جاھاں گوستگیں روچ ءَ پاکستانی پوج ءَ یکشلیں اُرشانی دیمپانی کنگ کپتگ کہ اود ءَ پوج ءَ جانی تاوانانی ھم دیمپانی بیتگ-

سال دوھزار ءُ بیست ءُ پنچ ءِ بندات ءَ بہ گر داں انیگ ءَ بلوچستان ءَ پاکستانی پوج ءِ سر ءَ سلاہ بندیں گلانی ھترناکیں اُرش ترندی ءَ گندگ ءَ آیگ ءَ اَنت کہ بلوچستان ءِ جتا جتائیں جاھاں سرکاری جاہ، پورسز، دگہ مڈی بروکیں گاڑی ءُ سرکاری ماڑیانی سر ءَ اُرشانی توک ءَ دو ماھانی توک ءَ یکشلیں ترندیں لڑے گندگ آیگ ءَ انت-

گوستگیں شپ ءَ شپ ءَ بلوچستان ءِ جتا جتائیں دمگ سبی، کلات ءُ چمن ءَ بمب تراک ءُ تیرگواری وئیل پیش اتکگ انت-

گیشیں اھوالانی رد ءَ کلات ءِ شھر ءَ پولیس ءِ لائن ءِ ھائی اسکول ءِ چکاسی ھال ءَ ھستیں پاکستانی پوج ءِ چوکی ءِ سر ءَ بمب تراکے بیتگ، تراک ءَ دگہ تاوانانی اھوال نہ بیتگ اَنت-

ھمے وڑ سبی ءَ ناشناسیں مردماں کریکر اُرشے کتگ-

پولیس ءِ رد ءَ کریکر تراک ءَ دگہ جانی تاوان نہ بیتگ ءُ پولیس دمان ءَ رس اتگ ءُ پٹ ءُ پولے بندات کتگ-

ھمے وڑ چمن ءَ ماسٹر پلان ءِ نزیک ءَ روکپت ءَ ناشناسیں مردمانی تیرگواری ءَ ایف سی ءِ کارندپ عبدالحکیم ء امیر محمد عیشزئی جھمنند پڈو کاریز مرتگ-

تربت ءَ ناشناسیں سلاہ بندیں مردماں ساچ وانگجاہ پرنسپل ءُ نامی ئیں مردم شریف زاکر ءِ لوگ سر ءَ بمب تراکے ءَ نشانگ کتگ-

گیشیں ھالانی رِد ءَ سنگانی سر ءَ ناشناسیں سلاہ بندیں مردماں نامی ئیں مردم شریف زاکر بلوچ ءِ لوگ سر ءَ پیسر ءَ بمب ءَ گوں نشانگ کتگ ءُ پد ءَ تیرگواری کتگ-

وئیل ءِ پدر کنان ءَ کھول ءَ گْوشتگ کہ اشا نماز ءَ پد ناشناسیں مردماں پیسر لوگ دیم ءَ دستی بم بے چگل داتگ کہ چار دیوال تہ ءَ کپتگ ءُ تُرندی ءَ ترکّ اِتگ اشی ءَ پد تیرگواری کتگ- بلے ھچ وڑیں جانی تاوان نہ بیتگ-

آیاں گْوشتگ کہ اے وئیل ءَ پد پولیس ھم ھال داتگ وھدے کہ کھول ءَ ناشناسیں مردمانی ھلاپ ءَ آئی ءِ ایف آئی آر ھم نکش کتگ-

دمگی اِھوالکار رِد ءَ اُرشکارانی سیادی سرکاری پلامرزی چہ سلاہ بندیں ٹولی ءَ اِنت-

زانگ بہ بیت اے اولی رند نہ اِنت کہ شریف زاکر یا آئی ءِ کھول نشانگ کنگ بیتگ اَنت اشی ءَ ساری ھم آئی ءِ سر ءَ اُرش کنگ بیتگ- اشی ءَ چہ ساری دوھزار بیست ءَ ھم زاکر شریف ءِ لوگ نشانگ کنگ بیتگ-

زانگ بہ بیت کہ دوھزار بیست ءَ شریف زاکر ءِ برات حنیف چمروک ھم سلاہ بندانی تیرگواری ءَ چہ کُشگ بیتگ آیانی درگت ءَ گوشگ بیت کہ سرکاری پلامرزی سلاہ بندیں ٹولی ( ڈیتھ اسکواڈ ) مردماں کُشتگ-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں تربت آبسر ءَ زورگریں پاکستانی پوج ءِ چیک پوسٹ نشانگ کتگ جانی ءُ مالی تاوان داتگ-

جارکش ءَ گوشتگ یک فروری ءَ بیگاہ ءِ شش ءُ بیست ملٹ ءَ گل ءِ اسنائپر ٹیکٹیکل ٹولی ءَ آبسر ڈاکی بازار ءَ برجاھیں زورگریں پوج ءِ چوکی سر ءَ پیسر ءَ اسنائپر ءَ چہ نشانگ کتگ دو پوجی کارمند کشتگ چریشی ءَ پد ءَ پانگس اے ون گولھاں گوں نشانگ کتگ ءُ دُژمن گیش جانی ءُ مالی تاوان دیمپان کتگ-

جارکش ءَ گْوشتگ بلوچستان لبریشن فرنٹ اے اُرش زمہ واری ءَ منّ اِیت ءُ سرڈگار ءِ وتواجھی ءَ تاں اُرشاں برجاہ دار اِیت-