TBP Balochi

سرکاری رِد ءَ جیل دگ شال ءَ ناشناسیں سلاہ بندیں مردماں تیرگواری کتگ جیل ءِ اسسٹنٹ سپرنٹنڈنٹ قاسم رئیسانی کُشتگ-

وئیل ءَ پد اُرشکار تتکگ اَنت وھدے کہ پولیس ءُ کانود ایر کنوکیں ادارھاں دمگ انگیر ءَ کتگ سلاہ بندیں مردمانی پٹ ءُ پول بندات کتگ، تنی وھدے ھچ وڑیں دزگیری دیم ءَ نیتکگ-

ھمے وڑ کیچ ءِ بُنجاھی شھر تربت ءَ ناشناسیں سلاہ بندیں مردمانی تیرگواری ءَ چہ یک مردمے بیران بیتگ- پولیس رِد ءَ وئیل گمشاد ھوٹل ءَ بیتگ، اود ءَ عشاء ءِ نماز ءَ پد اُرشکاراں تیرگواری کتگ اللہ داد ء عبدالواحد کُشتگ، کُشگ بیتگین ءِ سیادی سنگانی سر ءَ گوشگ بیگ ءَ اِنت-

پولیس ءَ واکدار گْوشگ اِنت کہ وئیل ءِ پٹ ءُ پول بندات کتگ، وھدے کہ کُتکار جاہ پہ جاھی تچگ ءَ سوبمند بیتگ- کُشگ ءِ سبب ءُ پٹ پول ءِ برجاہ ءَ اِنت-

عطاء اللہ ء نور بخش جھمنند شاھی تمپ ءُ یاسین حمید جھمنند بھمن ءِ گھاراں تربت پریس کلب ءَ پریس کانفرنس کنان ءَ گْوشتگ کہ وتی براتانی زورانسری آوار جنی ءَ سک دلپدردی درشان کتگ ءُ آیانی زوت یل کنائینگ لوٹ کتگ-

عطاء اللہ ءِ گْھار ءَ پریس کانفرنس ءَ چہ تران کنان ءَ گْوشتگ کہ آئی ءِ برات سیزدہ اکتوبر دوھزار بیست چار ءِ شپ ءَ ناشناسیں مردماں چست کتگ برتگ، چریشی ءِ ھلاپ ءَ آیاں فدا چوک سر ءَ زھرشانی ئیں نندانک داتگ – ھمے میان ءَ اسسٹنٹ کمشنر تربت ءَ گپ دیوان ءَ پد سے ھپتگ ءِ تہ ءَ آیانی یل کنائینگ دلجمی داتگ، چریشی ءَ زھرشانی مھتل داشتگ، بلے مروچی یک ماھے سرجم بیگ ءَ اَبید ھچ وڑیں گامگیج زیرگ نہ بیتگ- آیاں جار جتگ کہ اگاں سے روچ ءِ تہ ءَ یل کنگ نہ بیت اَنت گُڑا بے مدت ءِ واستا نندانک دیگ بیت، کہ داں ھما وھد ءَ برجاہ بیت دانکہ مردم دیم ءَ آرگ نہ بنت-

آئی ءَ دیمتر ءَ گْوشتگ کہ عطاءاللہ یک پوریاگرے بیتگ کہ گُد ئِے دورتکگ وتی لوگ ءِ دوژگ درگپتگ، ءُ آئی ءِ آوار جنی ءَ چار ماہ سرجم بیگ ءَ اِنت، بلے وکدار بے تواری ءِ ندارگ چارگ ءَ اَنت-

ھمے درگت ءَ یاسین حمید ءِ گْھار ءَ ھم تران کنان ءَ گْوشتگ کہ آئی ءِ برات ھم سیزدہ اکتوبر ءِ شپ ءَ لوگ ءَ چہ چست کتگ ءُ آ بے میارے- آئی ءَ کڈن کتگ اگاں آ یل کنگ نہ بیت گُڑا دوبر زھرشانی ئیں نندانک دیگ بیت ءُ ڈی بلوچ دگ بند کنگ بیت-

آئی ءَ ھکومت ءُ ھمگرنچیں ادارھاں چہ لوٹ کتگ اگاں آیانی براتانی سر ءَ چُشیں بھتام ھست گُڑا آیاں آمیدگس ءَ پیش بہ کن اِت، اگاں ناں گُڑا زوت یل بہ کن اِت – کھول ءَ گْوشتگ ک آیانی مات ءُ پت گم ءُ رنجانی تہ ءَ اَنت ءُ ھکومتی بے تواری آیانی واستا گیش دردناک اِنت-

بلوچ اسٹوڈنٹس ایکشن کمیٹی ءِ بنجاھی جارکش ءَ گوشتگ گل ءِ نیمگ ءَ بلوچستاب کتاب کاروان ءِ میڑھانی سر ءَ پولیس ءُ انتزامیہ ءِ نیمگ ءَ یکشل ءَ ترسینگانی درچ برجاہ انت-

آئی ءَ گوشتگ بلوچستان ءِ شھر ھب ءَ میڑہ ءِ جنگ ءِ واستا انتزامیہ ءُ ڈپٹی کمشنر ءِ گور ءَ دزبندی ءِ گرگ ءَ پد این او سی گپتگ- ڈپٹی کمشنر ءَ این او سی کانودی رنگ ءَ اجازت دیگ ءَ پد جتا جتائیں جاھاں کتاب میڑہ برجاہ کتگ انت ، ھمے ڈول ءَ ھب ءِ دمگ ساکران ءِ ھند ءَ کتاب میڑھے برجم داشتگ اود ءَ مئے سنگتانی سر ءَ بے بنیادیں کیس جوڑینتگ ءُ ایف آئی آر کنگ بیتگ انت نا ایوک ءَ ڈیھی رھبند ءِ ھلاپ انت بلکیں سک ءَ بژنیگ ءُ دلتپرکی گامگیجے-

جارکش ءَ گوشتگ کتاب میڑہ برجم کتگ ءُ ھمیشی ءِ زور ءَ علم ءِ تالان کنگ ءَ ایف آئی آر کنگ ءُ یکشل ءَ بلوچ ورنایاں ترسینگ ءِ دروشم اوپار کنگ نہ بنت اِنت زوت دارگ بہ بنت اِنت-

گوستگیں پنچ روچ ءَ پیش روکپتی بلوچستان ءِ دمگ سرباز ءَ ایرانی لشکر ءَ نیکراھی اھل سنت ءَ بندوکیں یک مردمے آوار جتگ ءُ برتگ-

آوار جنگ بیتگیں مردم ءِ پجار مولوی عمران سلامی ء علی جھمنند کمبیگ دپ سرباز ءِ نام ءَ زانگ بیتگ-

اھوالانی رد ءَ عمران سلامی ءَ وتی وانگ منبع العلوم کوھون ءَ سرجم کتگ ءُ وتی دمگ ءَ بیتگ-

اھوالانی رد ءَ عمران ھما وھد ءَ گرگ بیتگ کہ دیم پہ زاھدان ءَ دالعلوم مکی ءَ روگ ءَ بیتگ کہ لس پوشاکی کارندھاں ماں ایرانشھر ءِ نزیک ءَ دزگیر کتگ ءُ برتگ-

مروچی پنچ روچ ءِ گوزگ ءَ پد ھم آئی ءِ بارو ءَ دگہ سرپدی دیم ءَ آرگ نہ بیتگ اَنت-

سال دوھزار ءُ بیست ءُ چار ءَ روکپتی بلوچستان ءَ 400 مردم دزگیر ءُ آوار جنگ بیتگ انت کہ آیانی توک ءَ 5 زالبول، 30 زھگ ھوار انت کہ ایرانی لشکر ءَ آوار جتگ انت، ءُ 8 مردم ابید پجار کاڈ ءِ بنیاد ءَ دزگیر کنگ بیتگ انت-

بلوچستان ءِ ھمے سال جنوری ءَ یک ھزار ھشت سد سی یک دگ وئیل نکش کنگ بیتگ اَنت-

آیانی تہ ءَ سی نُھ مردم بیران ءُ دوھزار چار سد نُھ ٹپی بیتگ اَنت-

میڈیکل ایمرجنسی ریسپانس سینٹرز ( MERC) 1122 ءَ شنگ کتگیں رپورٹ رِد ءَ، بلوچستان ءِ جتاجتائیں دمگاں کہ لک پاس، مستونگ، کلات، لسبیلہ، چمن، قلعہ سیف اللہ، ژوب، سبی، لورالائی، جعفرآباد، کیچ، پنجگور ءُ ھُزدار ءَ اے وئیل بیتگ اَنت-

راجی پارٹیانی نیمگ ءَ سرجمیں بلوچستان ءَ وئیلانی گیشی ءِ سر ءَ دلپدردی درشان اِتگ شھدگ جاوراں شر جوڑ کنگ ءُ ٹریفک ء کانود ءِ شر کنگ گامگیج ءِ لوٹ کتگ- آیانی گْوشگ اِنت کہ دگانی پروشت ءُ پروش ءُ ٹریفک راھبندانی ھلا ورزی ءَ وئیلانی سبب اِنت-

اشی ءَ ساری دوھزار بیست چار میان ءَ بلوچستان ءَ دگ وئیل ءَ چار سد دو گرانبھائیں جان شتگ اَنت ءُ سی ھزار ءَ گیش مردم ٹپی بیتگ اَنت، کہ یک تُرسناکیں جاورے-

اے کچ ءُ کساساں چہ پدر بیت کہ دگ وئیلانی گر ءُ دار ھاتر ءَ زوت گامگیج زیرگ ءِ زرورت اِنت، کہ دگانی جوڑ کنگ، ٹریفک کانود ءِ تُرندیں پابندی، ءُ ڈرائیوراں ھیلکاری ھوار اَنت-

بلوچستان ءِ تیاب دپی شھر گوادر ءِ تھسیل چہ پسنی ءَ پاکستانی پوج ءَ مروچی سے فروری دوھزار بیست پنچ ءَ رازق ء ملنگ نامیں ورنایے آوار جتگ ءُ زورانسری بیگواہ کتگ –

کھول رِد ءَ پیسر ءَ رازق آوار جتگ ءُ پد ناشناسیں برتگ- آئی ءَ رازق ءِ پہ سلامتی یک کنگائیگ لوٹ کتگ-

بلوچستان لبریشن فرنٹ ءِ جارکش میجر گوھرام ءَ رسانکدر ءَ وتی شنگ کتگیں درشان ءَ گوشتگ کہ سرمچاراں سے فروری دوشمبے ءِ سھب ءِ دہ ءَ کیچ ءِ دمگ ھیرونک ءَ سی پیک دگ ءَ پاکستانی لشکر گوں چیر کرتگیں شورواں نشانگ کتگ۔ یک گاڑی یے اُرش ءِ زد ءَ اتکگ ءُ چہ ایشی ءَ سے کارندہ مرتگ انت ءُ گاڑی ءَ باز تاوان بیتگ۔

آئی ءَ گوشتگ کہ اُرش ءَ پد زوت ھمے جاہ ءَ جنگی بالیگ اتکگ ءُ تیرگواری اش کتگ، ھمے جاہ ءَ نُھ سد میٹر ءَ لشکر ءِ چوکی اِنت کہ آئی ءَ تیر گواری کتگ۔ بلے چہ جنگی رپکاں سوھوئیں سرمچار پہ سلامتی درکپتگ اَنت ءُ وتی مھکمیں بنجل ءَ شتگ اَنت۔

جارکش ءَ گوشتگ کہ بی ایل ایف ءِ مھکمیں کاروائی شھر ءُ کوچگاں گوں مھکمی ءَ برجاہ اَنت کہ گل ءِ گھتریں جنگی کارشونیاں پدر کن اَنت۔

میجر گوھرام ءَ اُرش ءِ زمہ واری منّ اتگ ءُ گوشتگ کہ ھمے کول ءَ کن ایں داں بلوچستان ءَ زورگریں لشکر ءِ سرجم ءَ درایگ ءَ زورگریں لشکر ءُ آئی ءِ کارجاھاں نشانگ کن ایں-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ بی ایل اے ءِ سرمچاراں مروچی کیچ ءِ دمگ ھیرونک ءَ سی پیک دگ ءَ زورگریں پاکستانی پوج یک اُرشے ءِ نشانگ کتگ-

آئی ءَ گوشتگ سرمچاراں ھیرونک ءَ گزین کور ءِ ھند ءَ زورگرین پاکستانی پوج ءِ کاروان ءَ پھریز دیوکیں کارندھانی سر بستگ ءُ اُرش ءِ نشانگ کتگ انت- اُرش ءَ یک کارندھے جاہ پہ جاہ ءَ مرتگ-

جارکش ءَ گوشتگ اُرش ءِ زمہ واری ءَ بلوچ لبریشن آرمی من ایت-

بلوچستان ءِ دمگ پنجگور ءَ ناشناسیں سلاہ بندین گاڑی سواریں مردمانی تیرگواری ءَ یک مردمے بیران-

اھوالانی رد ءَ پنجگور ءِ بنجاھی بازار چتکان تارا فیس ءَ ناشناسیں سلاہ بندیں مردماں تیرگواری کرتگ ءُ یک مردمے کشتگ کہ آئی ءِ پجار عبدالرحمان ء شوکت ءِ نام ءَ زانگ بیتگ-

پولیس ءِ رد ءَ پنجگور چتکان تارا فیس ءَ ناشناسیں سلاہ بند جمنی گاڑی ءَ سوار بیتگ انت کہ آیاں تیرگواری کرتگ ءُ یک مردمے کشتگ – کشگ بیتگیں مردم ٹیچنگ ھسپتال پنجگور ءَ برگ بیتگ-

پولیس ءِ رد ءَ کشگ بیتگیں مردم لینڈ کروزر گاڑی ءَ سوار بیتگ کہ آ چتکان تارا فیس ءَ وتی کھول ءِ ھمراھی ءَ سامان زیرگ ءَ بیتگ آ تیرانی نشانگ کنگ بیتگ-

وئیل ءِ سبب زانگ نہ بیتگ –

پنجگور پروم ءَ گوستگیں روچ ءَ ناشناسیں مردماں عظیم ء جاڑو آوار جتگ ءُ برتگ کہ مروچی آ زدگیں جاوراں یل داتگ-

دمگی مردمانی رد ءَ گوستگیں روچ اَچ پنجگور ءِ دمگ پروم ءَ ڈیتھ اسکواڈ ءِ کارندھاں پنجاہ سالی ئیں عظیم ء جاڑو آوار جتگ ءُ برتگ کہ مروچی آ زدگیں جاوراں یل دیگ بیتگ-

اھوالانی رد ءَ آ سک لٹ ءُ کٹ کنگ بیتگ ءُ آئی ءِ جان ٹپ ءُ ٹور کنگ ءُ یل دیگ بیتگ –

زانگ بہ بیت بلوچستان ءَ سیاسی مھلوک ءِ گوشگ اِنت کہ پاکستانی پوج ءُ چیریں ادارھاں ڈیتھ اسکواڈ پہ بلوچانی گرگ ءُ کُشت ءُ کوش ءَ جوڑ کتگ-

سیاسی مردمانی گوشگ انت کہ ڈیتھ اسکواڈ ءَ ھرچ وڑیں چوٹ دیگ بیتگ ءُ آ چریشی ءِ سبب ءَ دمگاں نا ایوک ءَ سلکاری ورنایانی آوار جنگ ءُ آیانی نشانگ کنگ ءُ لس مردمانی لوگانی سر ءَ پوج ءِ کمکاری ءَ بیڑ برگ ءُ اود ءَ شرپداریں مھلوک ءِ تنگ کنگ ءَ ھوار انت-

زانگ بہ بیت گوستگیں روچاں تمپ کنشکلات ءَ بلوچی زبان ءِ آشوبی گشندہ منھاج مکتار ءِ لوگ ءِ سر ءَ ڈیتھ اسکواڈ ءِ کارندھانی بیڑ ءُ اود ءَ آیاں بمب اُرش ءُ تیرگواری ءِ گپ دیم ءَ اتکگ ات-

چریشاں پیش بلوچستان ءِ دگہ جاھاں ھم ڈیتھ اسکواڈ ءِ ھرابکاری دیم ءَ اتکگ بیتگ انت-