TBP Balochi

بلوچستان ءِ دو جتاجتائیں دمگ ھُزدار ءُ مستونگ ءَ سلاہ بندیں مردماں بند ساچی شرکت سر ءَ اُرش کتگ سرجمیں مشینری مانداشتگ اَنت ءُ پوج سر ءَ دستی بمب اُرشے کتگ-

چہ ھُزدار ءَ ھالانی رِد ءَ ھُزدار ءِ تھسیل گریشہ جاورجی ءَ ناشناسیں سلاہ بندیں مردماں مروچی مگرب ءِ وھد ءَ بند ساچی شرکت ءِ سائٹ سر ءَ اُرش کتگ اود ءَ ساڑی ئیں مشینری مانداشتگ ءُ تباہ کتگ اَنت-

سلاہ بندیں مردماں بند ساچی شرکت مشینری، ٹریکٹر ءُ ایکسی ویٹر ھم مانداشتگ اَنت ءُ شتگ اَنت-

وئیل ءَ پد پولیس ءُ پوج ءِ مزنیں کچے ءَ وئیلجاہ ءَ سر بیتگ اَنت وئیل ءَ ھچ وڑیں جانی تاوان ھال دز نہ کپتگ-

ھمے وڑ پشمبے ءَ مستونگ کیڈٹ کالج نزیک ءَ پاکستانی پوج سر ءَ دستی بمب اُرشے بیتگ، پوج سر ءَ اُرش ھما وھد ءَ بیتگ وھدے آ شھدگ سر بستگ ءُ دلگوش بیتگ کہ پرپٹ سواراں آیانی سر ءَ دستی بمبے چگل داتگ-

زانگ بہ بیت اے دمگ ءَ بلوچ آجوئی لوٹوکیں سلاہ بندیں گل پُرکار اَنت ءُ گیشتریں وھداں اے وڑیں اُرش کتگ اِت بلے مرچی بیتگیں اُرش زمہ واری انگت ھچ گل ءَ نہ زرتگ-

چہ ھاران ءَ بیگواھیں مردمانی کھول گوستگیں روچ ءَ چہ نندانک دیگ ءَ اَنت-

سیاہ پاد ٹک ءُ کھول نیمگ ءَ چہ گوستگیں روچاں زورانسری آوار جنی ءِ نشانگ کنگ بیتگیں دوئیں براتاں حضرت علی سیاپاد ءُ مبارک سیاپاد ءِ یل کنائینگ ھاتر ءَ ھاران ءِ ریڈزون ءَ نندانک ءَ مروچی دومی روچ ءَ برجاہ، وھدے کہ زورانسری آوار جنی ءِ ھلاپ ءَ کھول جار پد ءَ شھر ءَ دکان بند اَنت-

ھاران ءِ جھمنند حضرت علی سیاپاد ءُ مبارک سیاپاد ءِ کھول ءِ رِد ءَ دوئیں برات گوستگیں روچاں چہ ھاران ءُ شال ءَ بیگواہ کنگ بیتگ اَنت-

کھول ءَ پاکستانی پوج سر ءَ آیانی دزگیری ءَ پد زورانسری آوار جنی ءِ بھتام جنان ءَ زوت یل کنائینگ لوٹ کتگ، وھدے کہ بلوچ یکجھتی کمیٹی ھاران زون نیمگ ءَ چہ نندانک ءَ جوانیں وڑے ءَ پلامرزی ھوار بیگ جار جتگ-

ھاران ریڈزون نندانک ءَ ھواریں مردماں ھاران انتزامیہ ءُ واکدار ءَ چہ لوٹ کتگ کہ آیانی دوستناکاں زوت دیم ءَ بیار اِت اگاں ناں آ تُرندیں زھرشانی جار ءَ جن اَنت ءُ سرجمیں شھدگاں بند کن ایں آئی ءِ سرجمیں زمہ وار انتزامیہ سر ءَ بیت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ سرمچاراں کیچ ءِ دمگ گورکوپ ءَ برجاھیں زورگریں پوج ءِ چوکی ءُ بلیدہ میناز ءَ راہ بستگ راج ءَ گوں تران کتگ-

جارکش ءَ گْوشتگ کہ سرمچاراں پنچ فروری سے شمبے ءِ بیگاہ شش ءَ گورکوپ ءِ دمگ ڈوکی ءَ برجاھیں زورگریں پاکستانی آرمی ءِ چوکی ءَ اوشتوکیں پوجی کارمند اسنائپر ءَ چہ نشانگ کتگ، چریشی ءِ آسر ءَ آ جاہ پہ جاھی مرتگ-

جارکش ءَ گْوشتگ اُرش ءَ پد زورگریں آرمی ءَ سر ءُ دیم تیرگواری کتگ ءُ مارٹر گولہ آس داتگ بلے سرمچاراں جوانیں جنگی رپکاں چہ پہ سلامتی مُھریں جاھاں سر بیتگ اَنت-

جارکش ءَ گْوشتگ کہ دومی کاروائی سرمچاراں گوستگیں روچ ءَ بلیدہ میناز ءَ راہ بستگ سرمچاراں بازیں کلاکاں تاں گشت کتگ، گشت میان ءَ سرمچاراں راج ءَ گوں گند ءُ نند ءَ آیاں چہ تران ھم کتگ-

جارکش ءَ گْوشتگ کہ بی ایل ایف راجی توانمندی اِنت، راجی توانمندی سر ءَ سِتک کنت ءُ راج ءِ توانمندی ءُ پلامرزی ءَ چہ زورگریں ریاست ءَ بلوچ ءِ سرڈگار ءَ چہ در کنت- اے راہ بندگ سرڈگار ءَ چہ زیبائی مھر ءَ پیشدار اِیت ءُ سرمچارانی توانمندی درشان اِنت-

جارکش ءَ گْوشتگ کہ بلوچستان لبریشن فرنٹ اے دوئیں کاروائیانی زمہ واری ءَ منّ اِیت ءُ زورگریں پوج سر ءَ اُرش بلوچستان ءِ وتواجھی ءَ تاں برجاہ دارگ اِھد ءَ کنت-

بلوچستان ءِ دمگ چہ ھاران ءُ کیچ ءَ دو مردم آجو بیتگ ءُ لوگاں سر بیتگ اَنت-

گیشیں ھالانی رِد ءَ چہ ھاران ءَ سرکاری پلامرزی ٹولی ءِ دست ءَ آوار جنگ بیتگیں مختیار احمد مینگل آجو بیتگ-

زانگ بہ بیت آ گوستگیں سال ءِ بیست ءُ پنچ جولائی ءَ چہ سراوان ءَ ھاران شھر ءَ پرپٹ ءِ سر ءَ آیگ ءَ بیتگ سلاہ بندیں مردماں آوار جتگ ءُ برتگ پد ءَ پرپٹ گروک ءِ ھند ءَ چہ دزکپتگ-

اِھوالکار رِد ءَ آوار جنگ بیتگین ءَ زر دیگ ءَ پد یل داتگ-

ھمے وڑ چہ تربت ءَ امام بخش بازار آبسر ءِ جھمنند وارث علی ء محمد سلیم دو ماہ ءُ پنچ روچ ءَ پد پاکستانی پوج ءِ دست ءَ یل کنگ بیتگ ءُ وتی لوگ ءَ سر بیتگ-

بلوچ یکجھتی کمیٹی ءِ سروک ڈاکٹر ماہ رنگ بلوچ ءَ گْوشتگ کہ بلوچستان ءَ ریاستی ڈیتھ اسکواڈ ءِ کارمنداں گوستگیں شپ ءَ چہ ھُزدار ءَ یک بلوچ زالبولے، عاصمہ بلوچ آئی ءِ لوگ ءَ چہ آوار جتگ-

آئی ءَ گْوشتگ کہ عاصمہ ءِ کھول ءَ ھُزدار ءَ دو جتاجتائیں ھندانی سر ءَ نندانک داتگ، اود ءَ آئی ءِ مات قرآن دست ءَ کتگ نشتگ-

ڈاکٹر ماہ رنگ بلوچ ءَ گْوشتگ کہ ریاستی سروکی ءَ برجاھیِں ڈیتھ اسکواڈ ءَ بلوچستان ءَ شھریانی زندمان جنجال کتگ – پوج ءُ چیریں ادارھانی سروکی ءَ اے مردم کجام ھما لوگ ءَ پُتر اَنت شرپمندیں شھریانی ننگ ءُ ناموس ءَ لگتمال کن اَنت-

آئی ءَ گْوشتگ کہ ھُزدار ءِ راج ءَ چہ دزبندی کن آں کہ آ اے زوراکی ءِ ھلاپ ءَ توار چست بہ کن اَنت ءُ عاصمہ ءِ کھول ءِ نندانک بھر بزیر اَنت ءُ ھمراھداری بہ کن اَنت-

بلوچستان ءِ دمگ ھزدار ءَ سرکاری ھستیں ٹولی ءَ یک زالبولے آوار جتگ کہ چریشی ءِ ھلاپ ءَ زھرشانی کنگ بوگ ءَ انت-

دمگی مردماں ٹی بی پی ءَ گوں گوشتگ گوستگیں شپ ءِ ساھت کساس یک ءَ سرکاری ٹولی ءَ پولیس لائن ءِ ھند ءَ یک لوگے ءِ سر ءَ بیڑ برتگ ءُ اود ءَ جاڑیگیں زالبول ءُ زھگ لٹ ءُ کٹانی نشانگ کتگ انت-

آیانی گوشگ انت کہ سلاہ بندیں مردماں یک زالبولے آوار جتگ ءُ برتگ-

وئیل ءِ ھلاپ ءَ بنجاھی شھدگ ءِ سر ءَ کھول ءُ دمگی مردماں نندانک داتگ چریشی ءِ سبب ءَ روسنی مھتل انت – دمگی مردمانی رد ءَ اے سلاہ بندیں ٹولیانی پشت ءُ پناھی ءَ بلوچستان ءِ گوستگیں سروزیر سناء اللہ زھری کنگ ءَ انت-

زانگ بہ بیت سرجمیں بلوچستان ءَ سرکاری پلامرزی ءَ سلاہ بندیں ٹولی جوڑینگ بیتگ انت کہ اے لس نام ءَ ڈیتھ اسکواڈ ءِ نام ءَ زانگ بیت اِنت- اے ٹولی سیاسی باسکاں ھوار دگراں نشانگ کنگ، آوار جنگ ءُ نشہ واپاری ءَ زانگ بیت انت-

ھزدار وئیل ءِ بارو ءَ تنی وھدی دمگدار ءِ گپ دیم ءَ نیتکگ انت-

روکپتی بلوچستان ءِ دمگ میرجاوہ ءَ ایرانی لشکر ءَ دو مردم آوار جنگ ءَ پد بیگواہ کرتگ انت-

گیشیں اھوالانی رد ءَ میرجاوہ ءِ سیمسری دمگ روتک ءَ ایرانی بسیج ءَ دو ورنا آوار جتگ ءُ گون وت برتگ اَنت-

آواران جنگ بیتگیں مردمانی پجار زبیح اللہ رھمت زئی ء ھاجی براتعلی جھمنند ھاش ، ءُ سعید جمالزئی جھمنند زاھدان ءِ ناماں زانگ بیتگ انت-

اھوالانی رد ءَ زبیح اللہ ءُ سعید سراوان ءِ سیمسر ءَ بیتگ ءُ روتک میرجاہ ءِ ھند ءَ آوار جنگ ءُ برگ بیتگ اَنت-

اھوالانی رد ءَ اے دویں مردم گوستگیں سَے روچ پیش گرگ برگ بیتگ انت ءُ پد ءَ ایشانی پدراھی زاھدان ءَ کنگ ءَ پد ءَ کرمان ءَ برگ بیتگ انت-

بلوچ یکجھتی کمیٹی ءِ سروک ڈاکٹر ماہ رنگ بلوچ ءَ گوشتگ کراچی یونیورسٹی ءِ گریجویٹ ءُ قائداعظیم یونیورسٹی ءِ ایم فل اسکالر اللہ داد بلوچ، بلوچ چاگرد ءِ رژنائیں چراگے بیتگ -آ بلوچ چاگرد ءِ یک وانندگیں بھرے بیتگ- ھما مردم کہ وانندگ، لکوک ءُ علم ءِ رھبندانی تپاک انت – راجدپتر آئی ءِ سوھوئی ءُ سیاست ےُ راجدپتری شونداتی ءَ بلوچی ءِ پریچگ ءَ آئی ءِ واب بیتگ بلوچ کمیونٹی ءِ میان ءَ زانشت ءَ لاچار کنگ ءُ رژنائیں چراگ ءِ بالینگ ءَ جوانیں کردارے بیتگ-

آئی ءَ گوشتگ بے تواریں گمنامی ءَ کار ءَ بیتگ- آ ھما لھتے مردماں ھوار بیتگ آیاں یکشل ءَ ونتگ،لکوک ءُ ایراد گری ءِ سوچ ءَ چاگرد ءَ گیش برتگ – بلے پاکستان بلوچ چاگرد ءِ وانندگیں مردماں یکشل ءَ نشانگ کنگ ءَ انت – ایشی ءِ مول ءُ مراد بلوچ شاگرد ءَ زانشت ءِ چیر ترینگ انت- اللہ داد ءَ رسترانی رنگ ءَ کشگ اے کوھن دابیں زوراکی ءِ یک دگہ تکے –

آئی ءَ گوشتگ اے دابیں زُلمانی دیم ءَ بے توار بوگی نہ انت – میان اُستمانی برادری ءَ لوٹ ایت کہ آ وتی توار ءَ چِست بہ کنت اِنت ءُ چہ پاکستان ءِ سیکورٹی ادارھاں بلوچ علماء ءُ استاداں زانت نشانگ کنگ ءِ پسہ داری ءِ لوٹ ءَ بہ کنت اِنت-

دشت میرانی ڈیم ءَ دِھکانکاری ءَ چہ ھمگرنچ رحمت خان مھکانی مری ءَ تربت پریس کلب ءَ پریس کانفرنس کنان ءَ گْوشتگ کہ آئی ءِ مستریں برات سانول خان مری ء احمد خان مھکانی مری سیزدہ فروری دوھزار سیزدہ نوتال نیشنل ھائی وے سبی چہ بختیار آباد ءَ بیگواہ کنگ بیتگ آئی ءَ چہ سندھ لڑ ءُ بار کتگ کوھلو ءَ روگ ءَ بیتگ کہ راہ نیم ءَ آئی ءِ گاڑی دارگ بیتگ ءُ دوئیں براتانی دیم ءَ سیاھیں گُدے بستگ ءُ ناشناسیں جاھے ءَ برتگ اَنت- سیزدہ ماہ ءَ آوار جنی ءَ پد من آں یل کتگ ءُ بلے منی برات انگت بیگواہ ءَ اِنت-

آئی ءَ گوشتگ کہ من میرانی ڈیم ءَ دِھکانکاری کنگ ءَ آں بلے یکو جتاجتائیں ادارہ ءُ تھاناں من آں لوٹارینگ بیگ ءَ اِنت- کمشنر سبی ءَ بیگواھیں مردماں سرپدی درگت ءَ کاگذ مُچ کنگ ھاتر ءَ جار جنگ بیتگ گُڑا من وتی برات ءِ کاگز برتگ ءُ اود ءَ داتگ اَنت اشی ءَ اَبید ڈیرہ مراد جمالی ءَ جے ای ٹی ءِ دیم ءَ ھم پیش بیتگ آں وھدے کہ تربت پولیس تھانہ ءَ ھم اے درگت ءَ من آں لوٹ اِتگ اِنت، بلے اے دُرستاں چہ اَبید من آں انساپ نہ رس اِتگ-

آئی ءَ گْوشتگ اگاں منی برات گناھگارے گُڑا آمیدگس ھساب ءَ سزا دیگ بہ بیت مارا ھچ اتراز نہ اِنت اگاں آ گناھگارے نہ اِنت گُڑا ھُدا ءَ بچار اِت آئی ءَ دیم ءَ بیار اِت – من نو چہ واماں ڈوبّتگ آں منی کسان کسانیں چُکاں کہ من آیانی یکیں اُمیتاں، من ھکومت ءُ پوج ءَ چہ انساپ ءِ لوٹوکاں منی برات ءَ یل بہ کن اِت دانکہ مئے درد ءُ دلسیاھی ھلاس بہ بنت-

تربت ءِ دمگ آپسر مولد ریک ءِ جھمنند صائمہ ملنگ ءِ سیادیں زالبولانی ھمراھی ءَ تربت پریس کلب ءَ پریس کانفرنس کنان ءَ گْوشتگ کہ آئی ءِ برات وسیم ملنگ جمعہ ءِ شپ ءَ ھشت ءَ گاڑیاں ھمگرنچیں کارمنداں چہ لوگ وپسوک وھد ءَ آوار جتگ ءُ بیگواہ کتگ-

کارمنداں چہ لھتے سیاھیں پوشاک ءُ لھتے سادھیں پوشاکانی تہ ءَ بیتگ اَنت- آیاں بیڑبرگ وھد ءَ زالبول ءُ چُکانی سر ءَ لَٹ ءُ کُٹ آیانی موباھل پون ءَ ھوار دگہ سامان زورانسری پچ گپتگ اَنت وھدے اے میان ءَ زالبولانی سر ءَ لَٹ ءُ کُٹ کتگ اَنت ءُ پیریں پِت دلسیاہ کتگ-

آیاں گْوشتگ کہ آ اردو ءُ آیانی تہ ءَ لھتے بلوچی گپ ءَ بیتگ اَنت، آیانی گور ءَ یک مزن میدیں مردمے ءِ اکس بیتگ ءُ آئی ءِ درگت ءَ جُست اش کتگ- آیاں مارا لوگ ءَ بند کتگ دروازگ بند کتگ وھدے کہ پت ءُ کستریں برات ڈن ءَ سارتی ءِ سر ءَ نندارینتگ اَنت ءُ آیاں ھچ نہ کنگ ءِ بیھار داتگ اَنت-

آیاں گوشتگ کہ وسیم مئے لوگ ءِ یکیں لاپ والینوک اِنت کہ آ زمیاد گاڑی سر ءَ سیمسر ءَ شتگ باپاری کتگ ئِے- اگاں آ شکی ئیں یا کہ آئی کجام پرکاری ءِ بھر بیتگ گُڑا آ چتو لوگ ءَ ساڑی بیتگ وھدے آ چست کتگ ءُ بیگواہ کتگ اِنت گُڑا ھمے وھد ءَ چہ سیمسر ءَ اَتکگ ورگ ورگ ءَ پد وپتگ-

آیاں آل پارٹیز کیچ، انجمن تاجران ءُ سول سوسائٹی ءَ چہ دزبندی کتگ کہ آ مئے توار جوڑ بہ بنت وسیم ملنگ ءِ یل کنائینگ ءَ مئے کمک ءَ بہ کن اَنت دانکہ آ پہ سلامتی یل بہ بیت ءُ لوگ ءَ سر بہ بیت-