TBP Balochi

بلوچ یکجھتی کمیٹی ءِ سروک ڈاکٹر ماہ رنگ بلوچ ءِ گوھار نادیہ بلوچ ءَ چلتن ءِ دامن ءَ گوستگیں روچ ءَ دھرنا گاہ ءَ تران کنان ءَ گوشتگ من وتی گوھار ڈاکٹر ماہ رنگ ءِ مقدمہ ءَ اے راج ءِ دیم ءَ ایر کتگ – مارا پاکستان ءِ آمیدگسی نزام ءُ میان اُستمانی ادارھاں ھچ اُمیت نیست اِنت پرچاکہ ایشی ءَ پیش مارا مئے پت ءِ لاش داتگ – پاکستان ءِ آمیدگسی نزام ءُ میان اُستمانی ادارھاں مارا انساپ دات کت نہ کتگ-

آئی ءَ گوشتگ ڈاکٹر ماہ رنگ بس یک نامے نہ انت بلکیں نزریہ، سوچ ءُ پکرے -مروچی آ نزریہ ءُ سوچ بندیگ کنگ بیتگ – بلے مارا وتی راج ءُ مردمانی سر ءَ پھر انت کہ ڈاکٹر ماہ رنگ بلوچ ءِ توار جوڑ بیتگ انت – شما بے توار نہ بوتگ ئے ڈاکٹر ماہ رنگ بلوچ ءِ واستا توار چِست بہ کن ات – پرچا کہ راج ءِ رھشونی کنوک انت- آئی ءَ زُلم ءِ ھلاپ ءَ توار چست کتگ ءُ زالمانی دیم ءَ چو کوہ ءَ مِک بیتگ – مروچی آئی ءَ شمئے توار ءِ درکاری انت – ڈاکٹر ماہ رنگ بلوچ، بیبگر بلوچ، شاہ جی ءُ بیبو ءِ واستا توار چِست بہ کن ات-

آئی ءَ گوشتگ ڈاکٹر ماہ رنگ نا ایوک ءَ مئے گوھار ءُ مئے مات ءِ چک انت بلکیں آ سرجمیں راج ءِ رھشونی کنوکیں رھشون انت- آئی ءَ اگاں ایوک ءَ وتی کھول ءِ پکر بوتیں ما گڑا داشت کتگ ات بلے آئی ءَ وتی واھشت ءُ زند وتی راج ءِ واستا ندر کتگ انت ءُ آ سرجمیں راج ءِ توار جوڑ بیتگ- مروچی ھم ریاست جیل ءَ آئی ءِ پروش دیگ ءَ جتا جتائیں پندل کنگ انت بلے آ سر ءِ جھل کنگ ءَ تیار نہ انت -آ گوش ایت ‘ منی راج منی گون ءَ اوشتاتگ شما ھم زُلم ءِ دیم ءَ سرجھل مہ بہ ئے’-

آئی ءَ گوشتگ داں مکران ءَ بہ گر سیستان ءَ دراھیں مردمانی منتواراں کہ آ دگانی سر ءَ درکپتگ انت – من سردار اختر مینگل ءِ منتواراں ھم وتی راج ءِ گون ءَ اوشتاتگ – مارا یکجاہ بوگی انت پرچاکہ مئے پجار یکجاھی ءَ گون انت-

ریاستی درشان ءُ راستی

ٹی بی پی شونگال

پاکستان ءِ واک ءَ ھستیں ٹولی ءِ رھشون ءُ مزن واکدار ءَ سرپد بیوکیں مردم اے درشان ءَ دیگ ءَ انت کہ بلوچ یکجھتی کمیٹی ءُ سردار اختر مینگل ءَ بلوچستان ءَ مھلوک ءِ پلامرزی گون نہ انت ءُ آیاں ناشری ءِ درچ ءَ ھوار کنگ ءِ جھد ءَ انت – بلے، عید ءِ روچ ءَ بلوچ یکجھتی کمیٹی ءِ گوانک ءِ پد ءَ کراچی ءُ سرجمیں بلوچستان ءَ لکانی ھساب ءَ مھلوک ءِ مُچیاں راستی ءِ پدراھی ءَ دیگ ءَ انت کہ مھلوک ریاستی زوراکی ءُ لٹ شاپیاں ابید مشکلیں وھد ءَ وتی رھشون ماہ رنگ بلوچ، سمی دین، بیبگر ءُ سبگت اللہ ءَ ھمکوپگ انت –

بلوچستان ءِ مانگش اتگیں سرکاری واکدارانی درشان ءَ پدر بیت اِنت آ بلوچستان ءِ تچکیں راستی ءَ سرپد نہ انت مھلوک ءِ گھگیری ءِ سیاست ءَ بندوکیں راجی ھکانی زمہ واریں رھشوناں ناشرکاری ءَ گوں بندوک کنگ ءَ انت، چُشکہ راستی ءِ لپاشگ انت – بلوچستان ءِ کسان ءُ مزنیں شھراں ماہ رنگ بلوچ ءُ سمی دین ءَ سانکلاں بندیگ کنگ ءِ ھلاپ ءَ یکشلیں زھرشانی اے چیز ءَ پدر کن انت بلوچ چاگرد ءِ ھمک پھنات ءِ پلامرزی یے گون انت –

پاکستان ءِ مزن واکدار بلوچستان ءِ جیڑہ ءَ گوستگیں پالیسیانی سبب ءَ زانگ ءِ مشکل نہ انت کہ آ بلوچستان ءَ ٹوھیں رنگے ءَ پوجی آپریشن کنگ ءِ ارادہ ءَ کنگ ءَ انت بلے اے ردین پیسلھانی سبب ءَ گوستانک ءِ گامگیجاں جتا نہ بیت اِنت – بلوچستان ءِ پارلیمانی ءُ گیر پارلیمانی سیاستی پاٹی یکشل ءَ اے وتی لیکھاں درشان کنگ ءَ انت کہ پوجی آپریشناں جاور شر نہ بنت بلکیں گیشتر بنت اِنت – مھلوک ءِ گھگیری زرمبشت ریاستی زوراکی ءُ نا انساپیانی ھلاپ ءَ برانز گپتگ ءُ بلوچستان ءَ پوجی آپریشناں بلوچ راج ءِ ٹپ گیشتر تاجگ بیتگ انت – پاکستان ءِ واکدار پوجی آپریشن ءِ درشان کتگ ءُ سیاسی جیڑہ گیش برانزی ءِ سبب بیت انت-

پوجی آپریشن ءُ ریاستی زوراکیاں بلوچ راجی زرمبشت نا پیش ءَ ھلاس بیتگ ءُ ناکہ نہ آئی ءِ ھلاس کنگ بیت اِنت- پرچاکہ بلوچ راجی زرمبشت ءَ راجی پلامرزی گون انت ءُ راجی ھمدردی راجی زرمبشت ءِ گون ءَ بندوک انت – بلوچ جیڑہ سیاسی انت ءُ بلوچستان ءَ پوجی آپریشن نہ انت بلکیں مول ءُ مراد راستی ءَ بندوک انت، راجی ھکانی سر ءَ دزرس ءُ ھک ءِ واتواجھی ءِ منگ ءَ گیش ءُ گیواری انت-

بلوچ یکجھتی کمیٹی چاگی ءَ وتی یک درشانے ءِ تہ ءَ گْوشتگ کہ عید روچ ءَ ماشکیل ءَ زھرشانی روانک ءَ پد راج ءَ را جتاجتائیں دروشم ءَ چہ پولیس نیمگ ءَ تُرسینگ بیگ ءَ اِنت، درزنانی مردمانی سر ءَ بے بُنیادیں ایف آئی آر ءُ لوگانی سر ءَ بیڑ جنگ بیگ ءَ اِنت ءُ ماشکیل پولیس تھانہ ءَ اے وھد ءَ درزنانی مردم بے جرم بند اَنت آیانی تہ ءَ کسانیں چُک ھم ھوار اَنت-

جارکش ءَ وتی شنگ کتگیں درشان ءِ تہ ءَ گْوشتگ کہ ماشکیل پولیس راج ءَ تُرسنیگ ءُ دروگیں ایف آئی آراں چہ بلوچانی ھلاپ ءَ برجاھیں چُکچینی ءَ ریاستی ادارھانی گوم ءَ تچکی ءَ ھوار اَنت، اے وھد ءَ سرجمیں بلوچستان ءَ بلوچ راج وتی راجدپتر بدتریں چُکچینی اوپار کنگ ءَ اِنت، ریاست پاکستان بلوچانی راجی زرمبشت ءُ آیانی پُرایمنیں زھرشانی دارگ واستا اے وھد ءَ ھرچ وڑیں کار کنگ ءَ اِنت-

آئی ءَ گْوشتگ کہ ریاست بلوچاں چہ ناں تھنا شرپیں زندمان ءَ پچگرگ ءَ اِنت بلکیں سرجمیں راج ءَ را بے توار کنگ واستا زوراکی ءِ سھارگ ءَ زیرگ ءَ اِنت، بلوچ بیگ ءَ پجّار دارگ سر ءَ اے وھد ءَ بلوچ راج وتی سرڈگار سر ءَ ریاست ءِ زوراکیاں چہ مُھر نہ اِنت، اے وھد ءَ ماشکیل کانون ایر کنوکیں ادارہ ءُ پولیس ماشکیل ءَ ورنایاں ءُ چُکاں نشانگ کنگ واستا سلاہ جوڑ کنگ بیگ ءَ اِنت چریشی ءَ چہ ماشکیل ءِ ھرچ نیمگ ءَ تُرس تالان اِنت-

جارکش ءَ دیمتر ءَ گْوشتگ کہ ما بلوچ یکجھتی کمیٹی ءِ نیمگ ءَ چہ تچکی ءَ ریاست ءَ گوشگ لوٹ ایں، بلوچ یکجھتی کمیٹی ءِ اے راجی زرمبشت تاکت ءَ چہ ھلاس کنگ ناممکن اِنت ماشکیل ءَ اے وھد ءَ ریاست تاکت کارمرز کنگ بلوچ راج ءَ را تُرسنیگ ءَ اِنت چریشی ءَ پد راجی پسّہ ءِ زمہ واری ریاست سر ءَ بیت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ یک اپریل ءِ بیگاہ شش چل پنچ ملٹ ءَ بی ایل ایف ءِ سرمچاراں بولان ءِ دمگ آب گم ءَ نیم پوجی پورس فرنٹیئر کور ءِ یک چیک پوسٹ ءِ سر ءَ راکٹ لانچراں، گرنیڈ لانچر ءُ دگہ سلاھاں چہ اُرش کتگ- اُرش ءِ میان ءَ سرمچاراں راکٹ ءُ گرنیڈ لانچر ءِ بازیں راؤنڈ آس داتگ کہ چیک پوسٹ تہ ءَ کپتگ اَنت-

جارکش ءَ گْوشتگ دُژمنیں پوج ءِ بُنجاھی بُنجل ءِ پھازی واستا برجاھیں چوکیانی سر ءَ سرمچاراں گوں تُرندی ءَ چہ اُرش کتگ ءُ اے چوکیاں سر بیگ ءَ سوبمند بیتگ اَنت- میڑ میان ءَ پوج کارندھاں وتی چوکی یل داتگ ءُ تتکگ اَنت-

جارکش ءَ گْوشتگ کہ اے اُرش ءَ دُژمنیں پوج ءَ مزنیں کچے ءَ جانی ءُ مالی تاوان چست کنگ کپتگ-

جارکش ءَ گْوشتگ مئے گل ءُ سرمچارانی توکل بُرز ءُ مھکم اَنت پرچاکہ راجی آجوئی ءِ جزبگ چہ مڑوکیں سرمچاراں ستک اِنت کہ اے جنگ ءَ پگار واستا جنگ کنوکیں دُژمنیں پوج ءِ توکل جھل کنگ ءُ آئی ءَ سسّائی دروشم ءَ پروش دیگ ءَ سوبمند بیتگ-

جارکش ءَ گْوشتگ کہ بی ایل ایف بلوچ راج ءَ چہ پیسر ءَ چہ گیش اُمیت دار اِیت کہ آ اے جنگ ءَ ھرچ پڑ ءَ بھر مان کنت پاکستانی دستیگ ءَ چہ آجوئی ءِ دزگرگ ءُ وتی راجی پجّار ءُ شرپ ءِ پچگرگ ءَ جوانیں وڑے ءَ کرد پیلو کنگ ءَ اِنت-

جارکش ءَ گْوشتگ کہ بی ایل ایف بولان ءَ دُژمنیں پوج سر ءَ بیتگیں اُرش زمہ واری ءَ منّ اِیت ءُ بلوچستان ءِ وتواجھی ءَ تاں زورگریں پوج ءُ آئی ءِ سِتّانی سر ءَ اُرشاں برجاہ دار اِیت-

بلوچستان ءِ دمگ آواران ءِ ھند جھاؤ ءَ بی وائی سی ءِ راھشون ڈاکٹر ماہ رنگ بلوچ ءَ ھوار دگہ مردمانی یل کنائینگ واستا عید روچ ءَ یک زھرشانی روانکے کش اِتگ – بلے زھرشانی یکروچے ءَ پد، اشی ءَ ھوار بازیں مردمے پوج ءَ آوار جنگ ءَ پد بیگواہ کتگ اَنت-

بیگواہ کنگ بیتگیں مردمانی تہ ءَ دو مردمانی پجّار محمد کریم ء محمد شریف، جھمنند جھاؤ ڈولیجی، ءُ شبیر ء اسماعیل، جھممند کیچ ءِ نام چہ زانگ بیتگ اَنت، کہ گوستگیں روچ ءَ پوج ءَ آوار جنگ ءَ پد بیگواہ کتگ اَنت-

اِھوالکار رِد ءَ پاکستانی پوج ءِ زوراکیانی ھلاپ ءُ مروچی یکرندے پد ءُ جھاؤ ءَ زھرشانی کنگ بیتگ-

بلوچ یکجھتی کمیٹی ءِ نیمگ ءَ چہ گل ءِ بُنجاھی سروک ڈاکٹر ماہ رنگ بلوچ، بیبو بلوچ، صبغت اللہ شاہ جی، بیبگر بلوچ ءَ ھوار دومی کارکنانی دزگیری ءِ ھلاپ ءَ پسنی ءَ یک زھرشانی روانکے کشگ بیتگ-

روانک پسنی ءِ نیادی سر ءَ چہ درتکگ کہ بُنجاھی بازار ءَ گشت کنان ءَ پسنی پریس کلب ءَ تاں ءَ شتگ اَنت اود ءَ زھرشانی کنوکاں ڈاکٹر ماہ رنگ بلوچ ءُ آ دگہ سیاسی کارکنانی یل کنائینگ ءِ لوٹ کتگ-

زھرشانی ءَ ھوار زالبول ءُ چُکاں وتی دست ءَ پلے کارڈ چست کتگ بیتگ اَنت ءُ ناراہ جتگ-

زھرشانی کنوکاں وتی تران ءِ تہ ءَ گْوشتگ سرفراز بگٹی ءِ سروکی ءَ برجاھیں بلوچستان ھکومت ءَ بلوچ راج ءُ زالبولانی سر ءَ زُلم ءُ زوراکی داشتگ ءُ ڈیھ کانون ءَ وتی زاتی زِد ءُ کینگ دروشم ءَ کارمرز کنگ ءَ اِنت ھمے سما بیت بلوچستان پارلیمنٹ ءَ بلوچ ءَ ننشتگ اَنت-

آیاں گْوشتگ کہ پسنی ءَ مئے روانک بے سوب کنگ واستا پولیس سروکی ءَ پسنی ءِ ایکوسسٹم والواں تُرسنیتگ ءُ بیھار داتگ کہ آ بی وائی سی والواں اسپیکر مدے اِت دانکہ آ تران کُت مہ کن اَنت ءُ ھکومت ءِ سیاہ کاریاں راج دیم ءَ میار اِنت بلے ما آیاں تچک کنگ لوٹ ایں کہ آ مئے توار ءَ ایرموش کُت نہ کن اَنت تو مارا جن ئے ءُ گیش ڈن ءَ در کا ایں-

آیاں گْوشتگ کہ بی وائی سی ءِ بُنجاھی سروکانی دزگیر کنگ ھکومت ءِ پروش اِنت ءُ بلوچ راج وتی یکجاھی ءَ چہ آیاں مدام پروش دنت-

زھرشانی ءَ چہ بی این پی پسنی ءِ شیخ احمد بلوچ ، ھک دے تھریک ءِ عزیز اسماعیل ءُ ناکو ناصر ءَ ھوار دگہ راھشوناں ھم تران کتگ-

ھمے وڑ ڈاکٹر ماہ رنگ بلوچ، شاہ جی صبغت اللہ، بیبو بلوچ، بیبگر بلوچ ءُ دگہ بیگواھیں مردمانی یل کنائینگ ھاتر ءَ سوردو ءِ ھند سر ءَ زھرشانی روانک ءُ زھرشانی کتگ چریشی ءَ زالبول ءُ چُکانی مزنیں کچے ءَ بھر زرتگ-

زھرشانی روانک سوردو ءَ چہ بندات بیتگ کلیم اللہ چار راہ سر ءَ یک زھرشانی دروشم زرتگ – زھرشانی ءَ چہ فھد آصف، محمد بلوچ، ادیبہ ظھیر، خدیجہ بلوچ، بیگواہ عبدالماجد ءِ کھول، امام الدین ءِ کھول، ضیانور ءِ کھول، زوھیہ زھیر، بانُک فاطمہ بلوچ، ماہ نور بلوچ ءُ دگراں تران کتگ-

ترانکاراں ڈاکٹر ماہ رنگ بلوچ ءُ دگہ بیگواھیں مردماں زوت یل کنگ لوٹ کتگ- زھرشانی پُرایمنی ءَ چہ آسر بیتگ-

شھید نقیب جان

نبشتہ کار: سنگت میرل بلوچ

دی بلوچستان پوسٹ

منی اولی رند اِنت کہ نَد دست ءَ کُتگ پہ یک مھروانیں سنگتے ءِ بابت ءَ لھتیں یات درشان کنگ ءَ آں۔ آ سنگت ءِ مکلسی، ایمانداری ءُ دلیری آئی ءِ پگر، لیکہ مھر ءُ دوستی ءِ بابت ءَ من ھمینچُک نبشتہ بہ کن آں کم اِنت، بلے مروچی بس لھتیں یات اَنت کہ من درشان اِش کنگ ءَ اَنت۔

آ سنگت شھید نقیب جان اَت نقیب جان پہ ھر کس ءَ مھروان اَت۔ پہ گریب ءُ بزگراں گیش مھروان اَت، ھر تب ءِ مردم ءَ گوں دیوان ءُ گپ ءَ اَت بچکندگ ءَ اَت۔ وتی زمہ داریاں گوں مھکمیں رنگے ءَ پیلو کنگ ءَ اَت، آ گوں وتی کِرد ءُ کاراں گوں پہ دائمی  بلوچ راج دپتر ءَ ابدمان بوت آ مدام بلوچ راج ءِ دل ءَ زندگ مان ایت۔

شھید نقیب جان ءِ کسانی ءَ شہ ھمے واھگ اَت گوں بلوچ راجی آجوئی ءِ جنگ ءَ ھوار بہ باں وتی پرز ءَ پیلو بہ کن آں۔ نقیب جان گوں سبر ءُ ایمانَدْری ءَ ھمے جُھد ءَ اَت کہ من گوں تنظیم ءِ سنگتاں ھال ءُ اھوال بہ کناں ءُ وت ءَ گوں آجوئی ءِ جھد ءَ ھمگرنچ بہ کن آں۔ گُڑا ھمے میان ءَ نقیب جان ءَ گوں سنگتاں ھال ءُ اھوال بوت۔ من ءَ یات اِنت آ سک باز گل اَت ءُ من ءَ گشت ئِے منی ھال ءُ اھوال گوں سنگتاں بوتگ نو بس مارا وت ءَ مھکم کنگی اِنت کار جْوانیں رنگے ءَ دیم ءَ برگی اَنت۔

ھمے وھد ءَ من ءَ گوں نقیب جان ءَ سک نزیکی بوت۔ ما ھر شپ داں سُھب ءَ نِشت ءُ دیوان کُت کارانی بابت ءَ ڈسکس کُت آ یک انچیں مھروانے اَت من وتی ھر وشی ءُ گم گوں آئی ءَ درشان کُت کُت اَنت آئی ءَ من ءَ ھر چیز ءِ بابت ءَ گوں بچکندگاں سرپدی داتگ، بلے آ کارانی ھوالہ سک گران اَت ءُ وت ھم ھچ ردی یے ئِے نہ کُت مارا ھم ھچ وڑیں ردیں کار ءَ نہ اِشت ئے۔

من ءَ یات اِنت یک شپے ما شُت ایں پہ یک کارے ءِ واستا آ کار گوں سوبمَندی ءَ بوت ما باز گل بوت ایں۔ چونیں ھم کارے بُہ بوتیں نقیب جان ءَ کدی ھم نا نہ کُرت آ مدام پہ کارانی واستا جاڑی اَت، جسمانی ءُ زھنی ھوالہ ءَ سک مھکم اَت۔مدام پہ دژمن ءِ پروش دیگ ءِ جھد ءَ اَت وتی توپک ءَ پھریزگ ءَ اَت ھر وھد ءَ وتی توپک ئِے ساپ کُت گوں وتی توپک ءَ باز مھر ئِے ھست اَت۔

ھمے میان ءَ منی زندمان ءَ یک انچیں روچے اتک کہ اے روچ ءَ کدی ھم من بے ھیال کُت نہ کناں من ءَ ھچ چوشیں گمانے ھم نیست اَت،
7 فروری 2025 ءَ من شہ پٹبال ءَ اتک آں گنداں بازار ءَ تیرانی توار اِنت من ءَ ھچ چوشیں سما یے نیست اَت کہ نقیب جان دژمن ءَ انگر ءَ کُتگ ءُ جنگ برجاہ اِنت پد ءَ من ءَ سنگتے ءَ ھال کُت کہ نقیب جان گوں دشمن ءَ دیم پہ دیم اِنت جنگ برجاہ اِنت۔ من ھمے دمان ءَ نقیب ءِ سر ءَ فون کُت گنداں نمبر ئِے بند اِنت۔ اے سرجمیں شپ پہ من کیامت اَت ساھتے ساھتے من وت ءَ وت تسلہ دات نقیب جان دشمن ءَ پروش دنت پہ سلامتی در کیت  ءُ جنگ ءِ کسھاں کنت۔

شپ ھمے رنگ ءَ گوست 8 فروری ءِ سُھب ءَ ما لھتیں سنگت نشتگ اِت ایں گُڑا یک سنگتے ءِ موبائل ءَ میسجے اتک ءُ سنگت ءَ میسج چار اِت ءُ گشت ئِے نقیب جان شھید بوتگ من ءَ اکس ئِے نشان دات من اکس چار اِت من ءَ ھچ باور بوگ ءَ نہ اَت من موبائل شہ آئی ءَ پچ گپت ءُ پد ءَ چار اِت ءُ گشت ھو یار نقیب جان اِنت۔ گُڑا من ءَ انچو سما بوت شہ منی پادانی جھل ءَ زمین زورگ بوت ءُ آزمان منی سر ءَ کپت آئی ءِ روگ ءِ درد سک گران اَت۔ آئی ءِ کمی کدی ھم پورہ نہ بیت آئی ءِ کنڈ ءَ کس گپت نہ کنت، بلے ھمد ءَ من ءَ آئی ءِ کول یات اتک یک شپے ما نشتگ اِت ایں ما دوئیناں کول کُت کہ ھر کس پیش ءَ شھید بوت گُڑا دومی ءَ سنگتانی زمہ واری زورگی اِنت وتی کوپگ ءَ کنگی اِنت۔ من گوں آئی ءَ کول کُرتگ اے کول ءَ سرجم کناں ھر زمہ واری کہ ھست اَنت من پورہ اِش کن آں۔ آ بس شہ ما جسمانی ھوالہ ءَ جتا بوتگ آ پگری ھوالہ ءَ مُدام مئے ھمراہ اِنت گوں مارا ھوار اِنت۔ منی راھشونی ءَ کنگ ءَ اِنت گوں وتی یات ءُ ترانگاں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ نیشنل پاٹی ءِ سروک سردار اختر مینگل ءَ گوشتگ پاکستان تھریک انساپ ءِ کلانیں باسک دھرنا جاہ ءَ ھوار بوگ ءَ روگ ءَ بیتگ انت آ دھرنا ءَ پیش دارگ بیتگ انت- راہ ءِ سر ءَ کنڈ کونچگ بیتگ انت ، گیش کنٹینرز ایر کنگ بیتگ انت، پورسز گیش دارگ بیتگ انت-

اختر مینگل ءَ گوشتگ سرکار داگانی شودگ ءِ جھد ءَ کنت بلے آ گیش داگدار بوگ ءَ انت-

زانگ بہ بیت کوہ چلتن ءِ دامن ءَ بی این پی ءِ دھرنا برجاہ انت – آئی ءِ لوٹ انت کہ دراھیں دزگیر بیتگیں زالبولاں یل بہ کن ات – بلوچستان ءِ سرکار ءَ دو آیانی گون ءَ گپ ءُ تران بے سوب بیتگ ءُ سرکار ءَ گیش کڈ کوبچتگ ءُ اڑانک کتگ انت-

بلوچ یکجھتی کمیٹی ءِ بنجاھی رھشون سمی دین بلوچ ءَ گوشتگ ھما دراھیں باسک ، وکیل ، اھوالکار، سیاستکار ءُ سول سوسائٹی ءِ باسکاں گوں سک باز شگر ءُ منت وار آں کہ آھاں منی کمک کتگ ءُ منی دزگیری ءِ بگیری ءَ وتی توار چست کتگ ۔

آئی ءَ وتی وکیل جبران ناصر، اھوالکار حامد میر، ندا کازمی ءُ دگہ بازیں مردمانی بے مٹیں جزم ءُ اگاں من کسے ءِ نام ءَ شموشاں گڑا ھاسیں منت واری درشان کت۔ من کراچی بار کونسل ءِ ھم سک باز ستا کناں کہ آ اے گرانیں وھد ءَ منی ءُ منی ھاندان ءِ ھمراھی ءَ اوشتاتگ اَنت۔

آئی ءَ گیش کرتگ کہ آ آن لائن ءُ آف لائن ءِ دوئیں رنگ ءَ آئی ءَ را رس اتگیں کمک ءِ منت وار آں ۔

آئی ءَ گوشت کہ سردار اختر مینگل ءِ بے مٹیں کمک ءُ بے مٹیں کوشستانی واستا دل ءِ تہ ءَ چہ منت وار آں۔ آ مئے ھمراھی ءَ گوں دلیری ءَ اوشتاتگ ءُ بی وائی سی ءِ درستیں دزگیریں سروک ءُ کارکنانی یلہ کنگ ءِ جھد ءَ سرجم ءَ پرازم اِنت۔

سمی دین ءَ گوشت کہ منی یلہ کنگ درستانی یکجھاھی ءَ ممکن بوتگ۔ البت مئے جھد ھما وھد ءَ برجاہ مان ایت داں بی وائی سی ءِ درستیں سروک ءُ جھدکار آجو نہ بنت۔

گڈسر ءَ آئی ءَ گوشت کہ مئے زرمبشت مدام پرامن بوتگ ءُ مان ایت۔ اے امنیں جھد ءِ دیمروئی بہ بیت کہ ما وتی ھک، انساپ ءُ ھما درستیں مردمانی یلہ کنگ ءِ جھد ءَ برجاہ بہ داریں کہ زوراکی ءَ بیگواہ کنگ بوتگ انت۔

نود ھورک اَنت میتگ ءِ رنگ

نبشتہ کار: مَرز بوم بلوچ

دی بلوچستان پوسٹ

زمین ایوک ءَ مردماں ایر نہ بارت، زمین ایوک ءَ بنی آدم ءَ وتی دل بند ءَ جاگہ نہ دنت بلکیں آئی ءَ چہ پیسر زمین وتی ھاتر ءَ بنی آدم ودی کنت آئی ءَ را پراہ ءُ شاھگانیں پَٹ ءُ میدانے دنت آئی ءِ لنکوکاں چہ درکسانی ءَ گپت ءُ وتی اندر ءِ رستگیں شھدیں زبان ءَ ھیل دنت بلکیں آئی ءَ را ھمے زبان ءِ ھوری ءَ یک پجارے بکش اِیت داں آ پجار ءَ پد ءَ وتی توک ءَ جاگہ دات بہ کنت۔

دگنیا ءِ تہ ءَ بازیں ڈیھ ھست اِنت ھمے ڈیھاں چہ یکے بلوچستان اِنت، ھمے بلوچستان ءِ زمین ءَ ودی بیتگیں ھما ورنا کہ آ مدام گوں وتی کسانیں بالاد ءُ پُرمڑاھیں بچکندگاں شال ءِ دانشگاہ (یونیورسٹی آف بلوچستان) ءَ گندگ بوت، آئی ءِ کسانیں بالاد ءُ پُرمڑاھیں بچکندگانی تہ ءَ پہ زمین ءَ اَجبیں مھرے مان اَت آئی ءَ بلوچستان ءِ درچک ءُ دار، کوہ ءُ کوچگ، دلوت، لد، زیبائی، بے وسی، زوراکی ءُ بلوچ ءِ چُکچینی وتی بالاد ءُ بچکندگانی تہ ءَ جاگہ داتگ اِت اَنت مدام آئی ءَ ھمے بنگپانی سر ءَ نبشتہ کُت، گال پِر بست شَیر پِر بست ءُ درشان ئِے کُت آ ورنا ءَ کے پجاہ بیار اِیت آئی ءَ را سرجمیں بلوچستان پجاہ کار اِیت کہ آ وتی مھکیں مات (بلوچستان)، ھاک، بلوچی زبان ءُ آئی ءَ چہ بندوکیں ھمک چیزانی شیدائی اَت۔ آئی ءِ پجار آئی ءِ شَیر اَنت انچوش کہ جاگھے گُش اِیت

یک روچے نبیل نود ءَ مھرانی تہ ءَ ماراں
یک روچے نبیل نود ءَ آدینک ءِ تہ ءَ چاراں

نود مھروانیں ورنایے اَت، یک تچک ءُ تواناھیں مردے اَت آ بلوچے اَت، بلکیں آ چہ ازل ءَ بلوچے اَت، آئی ءَ بلوچی سِکین وتی ھما درکسانی ءَ کوانزگ ءِ توک ءَ سرجاہ چہ پُریں ھاک در بُرتگ اَت، آئی ءَ گلامی ءُ ایردستی مارشت چہ وتی بندوکی بندر ءَ ھیل کتگ اَت آوتی زمین ءِ ھاک ءُ آئی ءِ بوہ ءُ باس ءَ چہ شری آشنا اَت ھمے ھاتر ءَ نود ءَ مدام گُلامی، ایردستی ءُ اُستانی زوراکی ءَ را شَیری دروشم ءَ وتی راج ءِ دیم ءَ آؤرت ءُ درنگاز کُت چوناھی ءَ اگاں گُلامی،ایردستیں ءُ اُستان زوراکی ءِ تہ ءَ وتارا پہ راج ءِ ھاتر ءَ زندگ دارگ ءُ راج ءِ سکی گم ءُ آئی ءِ سر ءَ بیوکیں زوراکی ءَ یک آدینکے دروشم ءَ وتی تہ ءَ چارگ ءُ جاگہ دیگ باز ڈُکی کارے بلے نود چہ اے درستیں چیزاں شَر سرپد اَت ءُ باج ئِے بُرتگ اَت، آ سرپد اَت کہ اے راہ ءِ مساپر آں زورگیریں اُستان داں دیر ءَ جلگ ءَ نیل اِیت، ھمے ھاتر ءَ زورگیریں اُستان چہ نود ترس اِت اَنت آئی ءِ توانمندی ءَ بیمے آؤرت ءُ نود ءِ زور آوارجنی ءَ مھتل نہ بوت۔

من ءَ یات اِنت شال ءِ سارتیں مولماں وھدے بلوچستان یونیورسٹی ءِ نودربر سھیل بلوچ ءُ پسی بلوچ ءِ زورانسری ءُ آوارجنی ءِ بگیری ءَ یونیورسٹی دیم ءَ زھرشانی ننداک ءَ جمبوریں آس ءِ کش ءَ نود مدام گوں سنگتان نشتگ اَت بچکندگ ءَ اَت مسکر کنگ ءَ اَت وتی شیر ءُ شائری گوں دیوان ئِے بز کتگ اَت برے برے دانشگاہ ءِ جنک نودربراں نود توار کُت کہ بیا مئے ھاتر ءَ شیرے بْوان نود مدام جاڑیگ اَت ڈولے ناں ڈولے ءَ بلوچی زبان ءِ سر ءَ کار کنگ ءَ اَت دیوان دیگ ءَ سر ءُ سوج کنگ ءَ اَت لبزانک بارو ءَ نوک باھندیں نودربراں سرپدی دیگ ءَ اَت آزمانک، شَیر، گدار رنگے ناں رنگے ءَ بلوچی زبان ءِ ھزمت ءَ گُلاھیش اَت۔ نود اے کسانیں وھد ءِ تہ ءَ بلاھیں نامے ءِ واھند اَت نود ءَ ھما رنگ ءَ شَیر پِربستگ کہ ھستیں وھد ءَ بلوچستان سرزمیں ءَ نوک باھندیں ورنا چُشیں شیر پِر بندگ باز کم گندگ کیت اگاں نود ءَ مارگ لوٹ اِت گراں آئی ءِ ھاتر ءَ نود ءِ شَیرانی تہ ءَ ایر روگی لوٹ اِیت انچوش کہ جاگھے ءَ نود گُش اِیت۔

تو منی مھرے سلاماں بر ھما ھاک ءَ بدے
کہ ھمود ءَ سمو ءِ ھونانی وشبو رتکگاں

نود ءِ شَیرانی تہ ءَ نازینک، آشوب، بگیری، مھری ءُ اے دگہ بنگپانی سر ءَ جتا جتائیں رنگ ءُ دروشم گندگ ءَ کیت نود منیر مومن ءِ بلاھیں منوگرے اَت بلکیں آ منیر ءِ ازم ءَ آشکے اَت، منیر ءِ گالانی تہ ءَ نود وتارا شوھاز ءَ اَت ءُ وتی پربندانی تہ ءَ بلوچ، بلوچستان ءُ بلوچی زبان ءَ پَرّیچان اَت نود ءِ زورانسری ءُ آوارجنی پہ بلوچی زبان ءُ بلوچستان ءِ ھاتر ءَ چہ یک مزنیں تاوانے ءَ کمتر نہ اِنت چے ءَ کہ داں ھما وھد ءَ دگنیا ءِ سر ءَ ھما ڈیھ پشت کپ اَنت دانکہ ھما ڈیھی مردماں وتی ماتی زبان رکینتگ نود ھمے جُھد ءَ پہ مھکمی کنگ ءَ اَت ھمے کاران گوں گیروشگ اَت نود ءِ ڈولیں ورنایانی زورانسری بیگواھی راج ءِ آواری ءَ زبان ءَ گیش تاوان دنت بلے من سرپداں کہ نود تھاریں کوٹی ءَ مھتل نہ بیت بلکیں ھما تھاریں کوٹی ءَ نود گوں نُگرھیں زبان ءَ رژنا کتگ، نود تو سرپدئے بے ترا میتگ ءِ رنگ ھورک اَنت واتر کن میتگ ءِ جلوانکی ءُ زیبائی تو گوں وت ءَ بُرتگ واتر کن کہ اے میتگ تی ھُنرانی وداریگ اِنت انچوشکہ جاگھے تو وت گُشتگ۔

چہ تو رند نود ھورک بنت رنگ میتگ ءِ
کے بکنت تئی وڑ ءَ چُش ھُنر میتگ ءَ

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت –