بلوچ راجی جنز ءَ ڈاکٹرانی زمہ واری
نبشتہ کار: ڈاکٹر شیراز شکیل
دی بلوچستان پوسٹ
بلوچستان ءِ سر ءَ پاکستان ءَ زورانسری کبزہ کُتگ، بلوچ ھمے کبزہ ءِ ھلاپ ءَ جنگ ءَ اَنت۔ اے جنگ چہ کبزہ ءِ اول روچاں بندات اِنت، جتائیں دروشم ءَ بلوچ جنز ءَ وتی پدر ءَ ھشت کنان کتگ بلے مروچیگیں ھستیں جنز ءِ دروشم جتا اِنت کہ ایشی ءِ بنکی سبب ادارہ سازی اِنت۔ گڑا پمیشکا ما گند ایں کہ اے جُنز چہ وتی گوستگیں بھر ءُ تھراں گیش مھکم ءُ توانا اِنت۔ بلے اد ءَ اے گپ پراموشگی نہ اِنت کہ مروچیگیں جُنز گوست ءِ جنزانی درچے پرچا کہ اگاں گوستگیں چاریں گھگیری ءُ جنز زورگیر ءِ ھلاپ ءَ مہ بوتین اَنت گڑا بوت کنت مروچیگیں جُنز ءِ ادارہ سازی ھم نہ بوتگیں گمانے بوتگ اَت۔
وھدے کہ ادارہ سازی ءِ بنھشت ایر کنگ بوت گڑا اد ءَ چہ ناں تھنا بلوچ ءِ لیکہ گیش اَت بلکیں چد ءُ پد بلوچ جُنز ءَ کلیں جنسی پرک ءُ درک کُٹ اَنت۔ ایشی ءِ تچکیں دروشم ءَ ھستیں وھد ءَ بلوچ جنگ ءِ پڑ ءَ دیست کت کنیں۔ چوشکہ جنسی پرک ءُ درک ءِ ھمرائی ءَ راجمان ءِ ھمک کار ءُ کسب، ھمک ٹک ءُ بولک، ھمک دین ءُ مذھب، ھمک کٹم ، زات ءُ زریات ءِ مردم ھوار اَنت۔ بلے نوں زلورت اے گپ ءِ سر ءَ اَنت کہ کجام تک ءُ پھناتاں بلوچ جُنز ءَ وتی تنظیمی ساخت ءِ شاھگانی ودینگی اِنت۔ھستیں وھد ءَ بازیں پڑاں بلوچ جُنزاں افرادی قوت درکار اِنت، ھرچ پڑ ءِ وتی ارزشت ءُ مکامے، بلے لھتیں زلورت ھست اِنت کہ آ بنکی اِنت چوشکہ میڈیکل اِنت۔ پرچا کہ جنگ ءِ پڑ ءَ بازیں سنگت نادراہ بنت، باز جنگ ءِ میدان ءَ ٹپی ءُ ٹوری بنت بلے بے الاجی ءِ سبب ءَ بیران بنت۔
پمیشکا نوں اے تران ءُ باوست گوں زلورت ءُ لوٹانی بنیاد ءَ بوگ ءَ اَنت کہ ما وھدے کہ نوکیں استان سازی ءِ گپ ءَ جنیں گڑا اود ءَ جتا جتائیں کارگل ءُ ادارگانی جوڑشت المی اَنت۔ پرچا کہ بید ء متبادلیں ادارہ سازی ءَ استان ءِ بنھشت نہ بوتگیں گپے۔ گڑا نوں وھدے کہ جنگ کم کم ءَ وتارا شاھگان کنان اَنت گڑا ادارہ سازی ءِ گامگیج ھژدری بوتگ۔ نوں اے رد ءَ زیک پرچا گامگیج چست کنگ نہ بوتگ، ادارھانی چونیں کمی بوتگ یا انگت ھست اِنت تاں اے بارو ءَ گپ ءُ تران نہ کنیں۔ بلکیں یک ھاسیں جیڑھے ءِ بابت ءَ گپ جنیں۔
مٹھا خان کہ میڈیکل ءِ نودربرے اَت، آ زورانسری چست کنگ ءَ رند 24 اگست 2026 ءَ آ گوں وتی برات ءِ ھمرائی ءَ لاش اِش ماں ویراندان ءَ چگل دیگ بوت۔ چوشکہ مِٹھا خان بولان میڈکل کالج کوئٹہ ءَ ایم بی بی ایس ءِ نودربرے اَت۔ اے میان ءَ ناں میڈیکل نودربرانی توارے گندگ بوت نیکہ سیاسی ادارھانی نیمگ ءَ چوشیں مزنیں گامگیجے۔ اے درگت ءَ بس راجمانی رسانکدر ءَ چندیں توار اَنت کہ مدامی زلم ءُ زوراکی ءَ ھلاپ ءَ توار چست اَنت۔ اد ءَ اے گپ ھم ھیال دارگی اِنت وھدے زورگیر ءَ سیاسی توار بندیگ کتگ اَنت، دومی سیمی راہ ءُ در کل بند کتگ اَنت بلے اگاں رسانکدر ھم سلاہ ءِ داب ءَ کارمرز کنگ بہ بیت ھم جوان اِنت۔ چوشکہ رسانکدر ءَ ھم چوشیں ھاسیں گامگیج گندگ بوگ ءَ اَنت کہ آ زوراک ءِ بیانیہ، زلم ءُ ناروائیانی ھلاپ ءَ مھکمیں توارے جوڑ بوت بہ کنت۔
چریشی ءَ ابید مِٹھا خان ءِ کوش ھاس میڈیکل نودربراں لھتیں جست ودی کنت کہ آ مدامی گُش اَنت کہ ما وَ میڈیکل پڑ ءَ گوں بندوکیں مردم ایں گڑا مارا جنز ءَ گوں ھاس کار نیست اِنت۔ دگہ انچیں وتگڑیں منانک اَنت کہ ما وتی پرز ءِ ھساب ءَ وتی راج ءَ الاج کنگ ءَ ایں، اے ھم راجدوستی ءِ بھرے۔ بلے نوں جست اِہش اِنت کہ مٹھا خان ھمے پڑ ءَ گوں بندوکیں نودربرے اَت، بلوچے اَت گڑا چے ءَ چست کنگ ءُ کُشگ بوت؟ باندا مٹھا خان ھم ڈاکٹرے بوتگ اَت آئی ءَ وتی مردمانی الاج کتگ اَت، بلے آیا زوراک میڈیکل کنت نہ جنت یا ایشی ءَ ابید چیزے ھست اِنت کہ ما وتی چم بند کتگ اَنت، چو کپودر ءِ داب ءَ کہ مارا پِشّو گندگ ءَ نہ اِنت۔۔ زوراک ءِ گور ءَ ناں جنس ءِ پرک ءُ درک ھست اِنت نیکہ ھاسیں پڑانی بلکیں آ تھنا بلوچ کنت، چست کنت ءُ کُش اِیت گڑا ما پرچا وتارا رد دیگ ءِ جھد ءَ کنگ ءَ اِنت؟ آیا ما راستی ءَ سرپد نئیں کہ بلوچ سرزمین مروچی جنگے ءِ دیمپان اِنت، گلام ءُ زورگیر ءِ ھلاپ ءَ آجوئی جنزے، گڑا ایشی ءَ چیر بوگ، وتارا بیگانگ کنگ کجام زانتکاری اِنت؟
دومی ھما کُل مردم ھم ھاموش اَنت کہ آیاں مٹھا خان ءَ گوں وھد گوازینتگ، یکجاہ بوتگ اَنت، یکیں جاہ ءَ ونتگ اِش ، بلے آ ھم ترک ءُ نک اَنت؟ پد ءَ آیانی دلیل ھمیش اِنت کہ اگاں ما گپ بہ جنیں گڑا مارا ریاست کُش اِیت، گار کنت۔ بلے زاناں مٹھا خان ءَ کجا دگ بست اَنت، کجام زھرشانی ءَ گون اَت، کجا سرکاری ادارھانی پروشگ ءَ گون اَت کہ آ اِش جت؟ بلے ما بیھال مہ بئیں کہ جیڑہ اینچو کسان نہ اِنت چوش کہ ما آئی ءَ چارگ ءَ ایں۔ گپ گلام ئیگ اَنت، مروچی یک تاکتے ھما گلامی ءِ ھلاپ ءَ جنگ ءَ اَنت، گڑا زوراک ءِ گور ءَ ریا نیست آئی ءَ بلوچ ھر ھساب ءَ گار ءُ گمسار کنگی اِنت۔ پمیشکا گلامی ءَ چہ تچگ، وت ءَ چیر دیگ، ھچ نہ کنگ، سر جھل کنگ، چمانی بندگ ھچ المی جوازے نہ اِنت بلکیں وتی مرگ ءَ گیش گردن ءَ سوار کنگ ءَ اِنت۔
نوں اد ءَ جُست سر کش اِیت گڑا مارا اے وڑیں جاوراں چونیں گامگیج چست کنگ لوٹ اِیت؟ اگاں ما مدامی ھساب ءَ ھاموش بوتیں گڑا ایشی ءِ تاوان چی اِنت؟ آیا اے تاوان پردی بنت؟ کٹمی بنت؟ کبائلی بنت یا راجی؟ پمیشکا نوں مارا اے ھبر یات دارگی اَنت کہ مروچی اگاں بلوچاں چیزے پشت کپتگ گڑا آ راجی جنز اَنت۔ گڑا اے درگت ءَ مارا وتی باریگ ءِ ودار کنگی نہ اَنت بلکیں ھر یکے ءَ وتی باریگ ءَ چہ پیش وتی کردے پیلو کنگی اَنت۔ وھدے کہ کرد ءِ باریگ کیت گڑا مارا اد ءَ ھم ابھام ءُ مانگیشگی ءِ آماچ بوگی نہ اِنت۔ چوشکہ یکرندے ءَ من ءَ یکے ءَ گشت کہ مئے مھلوک بزگ اِنت، جوانیں ڈاکٹر نیست اِنت پمیشکا ڈاکٹراں ھمد ءَ نندگی اِنت ءُ جوانیں ڈاکٹر بوگی اِنت، نیکہ جنگ ءُ راجی جنز ءَ گوں ھوار بوگی اِنت۔ بلے ما کہ نوں سما کنیں اے بزگی ھم گلامی ءِ برورد اَنت، اے بزگ ءَ ما پرچا پنجاپ ءُ ایدگہ جاھاں نہ گند ایں؟ بزگی بلوچ ءِ گٹ ءَ پرچا لوپ اَنت؟ مئے زمین ءَ زاناں چی ءِ کمی اِنت، مادن ءُ مڈی کل ھمد ءَ چہ درآیگ ءَ اَنت گڑا پرچا ما انگت مھتاج ایں؟ گڑا اے وڑیں جاوراں مارا پیسلہ زورگی اِنت وتارا گوں بلوچ جنز ءَ بندوک کنگی اِنت۔
چریشی ءَ ابید ھستیں وھد ءَ جنگی گلاں میڈیکل ءِ زلورت باز اَنت، اے پڑ ءَ گیش ءَ چہ گیش مردم درکار بیت۔ پرچا کہ شپ پاسے ءَ ٹپیگیں سنگت باز ھمے سبب ءَ شھید بنت کہ آیانی گور ءَ پروپیشنل میڈیکل ھیلتھ ورکر نیست۔ پد ءَ سنگتے ءِ جوڑ کنگ ءَ باریں چنت سال گوز اِیت بلے ھمے سنگت ءَ پرسٹ اینڈ ءِ نہ رسگ ءِ سوب ءَ شھید بیت گڑا باید اِنت ھما کُل سنگت کہ میڈیکل ءَ گوں بندوک اَنت آیاں وتی کردار پہ راجی آجوئی جھد ءَ پیلو کنگی اِنت۔ نوں اے ھبر ءِ سر ءَ نندگی اِنت کہ ما ھمد ءَ نند ایں کار کنیں۔ بلکیں مروچی ادارھانی گور ءَ جتائیں پڑ جوڑ بوتگ اَنت ءُ انگت ءَ جوڑ بوان اَنت۔ گڑا مارا ھستیں وھد ءَ ھما کلیں تک ءُ تھرانی بودناکیں مردم درکار بیت کہ آ جنز ءَ گوں متبادل ادارہ سازی ءِ کار ءَ گیش ءَ چہ گیش دیم ءَ بہ بر اَنت۔ پرچا کہ نوں جنگی ادارہ ھم وتی تنظیمی ساخت ءَ گیش ءَ چہ گیش شاھگان کنگ ءَ اِنت دانکہ ما نیشن بلڈینگ ءِ کلیں زلورتاں پیلو کنان بہ بئیں۔ گڑا اے گامگیج ءَ شمئے بھرشت المی اِنت، اگاں ناں ڈاکٹرانی ھمے روشت برجاہ منت گڑا آیاں بلوچ راجدپتر ھجبر درگز نہ کنت بلکیں آیانی نام مدام زوراک ءِ کارندگ ءِ ھساب ءَ چارگ بیت گوں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
