مستونگ ءِ دمگ کھڈ کوچہ ءَ گوستگیں شپ ءَ دیر ءَ چہ نامالومیں نیمگے ءَ تیرگواری بوتگیں مارٹر ءِ گولھے گوکانی یک واڑے ءِ توک ءَ کپتگ کہ ایشی ءِ آسر ءَ یک گوکے ٹپی بیتگ-
دمگی مردمانی رد ءَ شپ ءَ اناگت ءَ مارٹر ءِ گولھے گوکانی واڑ ءَ کپتگ ءُ چہ ایشی ءَ مزنیں تراکے بوتگ کہ ایشی ءَ چہ دمگ ءِ مردمانی تہ ءَ اجکھی بیتگ۔ مارٹر کپگ ءِ آسر ءَ واڑ ءِ تہ ءَ یک گوکے ٹپی بوتگ ءُ دگہ گوکانی بارو ءَ اھوال سر نہ بیتگ انت-
اے وئیل ءَ پد دمگی مردماں وتی جان سلامتی ءِ بابت ءَ سکیں دلپدردی درشان کتگ۔ دمگ ءِ نندوکیں مردم گش انت کہ دمگ ءِ پیسر ءَ چہ نگیگیں جاور ھالانی سبب ءَ مردم ترس ءُ بیمہ چاگرد ءَ زند گوازینگ ءَ انت، اے وڑیں جاور ھال ءَ شپ ءَ مارٹر ءِ گولہ ءِ کپگ ءِ وئیل ءَ شھریانی بے تاھیری گیش کتگ انت۔
اے وئیل ءِ بابت ءَ گیشتریں ھال ءُ اھوال دست نہ کپتگ اَنت۔