TBP Balochi

بلوچستان ءِ دمگ پنجگور ءِ ھند گومازین ءَ گوستگیں شپ ءَ ناشناسیں سلاہ بندیں مردمانی اُرش ءَ دو مردم بیران بوتگ انت۔

پولیس ءِ بنشون ءِ رد ءَ بیران بوتگیں مردمانی پجار ملا عامر ءُ امان اللہ ءِ ناماں بوتگ انت ءُ دوئیں پنجگور ءِ دمگ چہ چتکان ءَ سیادی دار اَنت۔ لاش پوسٹ مارٹم ءِ واستا ٹیچنگ ھسپتال پنجگور ءَ دیم دیگ بوتگ انت۔

چمدیستگیں مردمانی رد ءَ اُرش کنوک مزنیں کساسے ءَ بوتگ اَنت ءُ سک باز سلاہ بند بوتگ اَنت۔ دمگی اھوالانی رد ءَ اُرش کنوکاں وئیل جاہ ءَ چہ مزنیں کساسے ءَ سلاہ ھم دز گپتگ انت۔

دمگی اھوالانی رد ءَ کہ اے دوئیں مردم کہ کُشگ بوتگ انت آ سرکار ءِ پلامرزی ءَ ھستیں سلاہ بندیں گلے ءِ بوتگ انت کہ دمگی مردم اے گل ءَ “ ڈیتھ اسکواڈ” ءِ نام ءَ پدر کن انت۔

بلوچستان ءَ “ڈیتھ اسکواڈ” ھما اسپری ءِ رنگ ءَ سلاہ بندیں گلے ءِ دروشم ءَ کارمرد بوگ ءَ انت کہ آھاں ریاستی ادارھانی کمک گون انت-

اے گلانی سر ءَ بازیں چاگردی بدیں کارانی تہ ءَ ھوار بوھگ ءِ بھتام اِنت کہ آھانی تہ ءَ نشانگ جوڑ کنگ، آوار جنگ ءُ زوراکی ءَ بیگواہ کنگ ھوار اَنت کہ سرکار ءُ پاکستانی انٹیلی جنس ادارھانی نیمگ ءَ سرجمی ءَ مھار یل دیگ بیتگ انت-

بلوچستان ءِ دمگ مستونگ ءَ پاکستانی پورسز ءُ ناشرکاری ءِ گر ءُ دار کنوکیں سی ٹی ڈی ءَ نامداریں وکیل ایڈووکیٹ چیف عطا اللہ بلوچ ءِ گس ءِ سر ءَ بیڑ برتگ ءُ آ گوں وت برتگ-

اھوالدار ءِ رد ءَ گوستگیں شپ ءَ مستونگ ءِ کلی شادی خان ءِ دمگ ءَ آپریشن کنگ بوتگ کہ اود ءَ سی ٹی ڈی ءُ فورسز ءِ کارندھاں یک ءَ بگر داں سئے ءَ لوگ ءِ سر ءَ بیڑ برجاہ داشتگ ءُ ھمے وھد ءَ لوگ ءِ درائیں مردم لٹ ءُ کٹانی نشانگ کنگ ءُ ایڈووکیٹ چیف عطا اللہ بلوچ گوں وت برگ بیتگ۔

اے وئیل ءِ پد ءَ مستونگ بار ایسوسی ایشن ءَ اژدری دیوان ءِ جار جتگ کہ آؤکیں کارروائی ءِ سر ءَ ھیال ءُ لیکہ کنگ بہ بیت۔

بار ایسوسی ایشن ءَ لوٹ کتگ کہ بلوچستان بار کونسل ءُ اے دگہ بار ادارگ ایڈوکیٹ عطا اللہ بلوچ ءِ زوت یل دیگ ءِ ھاتر ءَ گامگیج زیرگ بہ بیت انت-

بار ءِ سروک گشتگ کہ کانونی چاگرد ءِ ھلاپ ءَ اے وڑیں کارروائی نہ ایوک ءَ کانود ءِ ھلاپ ورزی اِنت بلکیں ایشی ءَ چہ ادالت ءِ نزام ءُ انسانی ھکانی ھلاپ ورزی ءِ ھترہ ھم گیش بیت۔

بلوچستان لبریشن فرنٹ ءَ دو جتاجتائیں شنگ کتگیں درشانانی تہ ءَ جھاؤ ءَ پاکستانی پوج ءُ مستونگ ءَ ڈی سی سر ءَ بیتگیں اُرشانی زمہ واری منّ اِتگ اَنت-

جارکش میجر گْوھرام بلوچ ءَ وتی یک درشانے ءِ تہ ءَ گوشتگ شانزدہ مئی دوھزار بیست پنچ شپ کساس ھشت ءَ بلوچستان لبریشن فرنٹ ءِ سرمچاراں جھاؤ ءِ دمگ کوٹو ءَ زورگریں پاکستانی پوج ءِ بُنجل دو نیمگی ءَ چہ اُرش کتگ راکٹ ءُ مزنیں سلاھاں چہ نشانگ کتگ- سرمچاراں دُژمن ءِ بُنجل سر ءَ اُرش سک نزیک ءَ چہ کتگ اُرش داں دیراں برجاہ بیتگ- اُرش ءِ میان ءَ دُژمنیں پوج ءِ واو زاری توار بُنجل ءَ چہ ڈن اش کنگ بیتگ اَنت-

جارکش ءَ گْوشتگ اُرش ءِ آسر ءَ دُژمنیں پوج ءِ سے کارندہ مرتگ ءُ بازین ئِے ٹپی بیتگ اَنت-

جارکش ءَ وتی دگہ یک درشانے ءِ تہ ءَ گْوشتگ کہ مئے سرمچاراں شانزدہ مئی دوھزار بیست پنچ بیگاہ نزیک ءَ مستونگ شھر ڈپٹی کمشنر لوگ سر ءَ دستی بمب ءَ چہ اُرش کتگ- ڈپٹی کمشنر دمگی انتزامیہ ءِ سروک اِنت ھمے ھاتر ءَ بی ایل ایف ءَ ڈی سی لوگ، مستونگ سر ءَ دستی بمب اُرش آئی ءِ کڈن کنگ واستا کتگ آ سول انتظامیہ ءَ زورگریں پوج ءُ کُشکاریں انٹیلیجنس ادارھاں کمکاری ءَ چہ دارگ یا سنگین آسر واستا جاڑیگ بہ بیت-

جارکش ءَ گْوشتگ مستونگ ڈپٹی کمشنر ءِ لوگ سر ءَ دستی بمب اُرش زمہ واری ءَ منّ اِیت- بلوچستان ءِ وتواجھی ءَ تاں زورگریں پاکستان ءِ نوآبادیاتی پُلپانچیں شوربندی ءُ پوج ءُ انتزامیہ مشینری سر ءَ اُرش برجاہ بنت-

بلوچستان ءِ دمگ کلات ءَ کراچی شھدگ سر ءَ شمبے ءِ شپ ءَ مزنیں کچے ءَ سلاہ بندیں مردمانی نیمگ ءَ چہ ناکہ بندی کتگ گاڑی پٹ ءُ پول درچ بندات کتگ-

چمّگدانی رِد ءَ اے وئیل کلات ءَ چہ لھتے کلومیٹر ءَ گستائی سر مھلبی ءِ ھند سر ءَ بیتگ اود ءَ سلاہ بندیں مردماں شھدگ سر ءَ آؤکیں گاڑیانی دارگ بندات کتگ-

اِھوالکار رِد ءَ سلاہ بندیں مردماں نوکیں سلاہ اِش گون بیتگ ءُ آیاں گاڑی پٹ ءُ پول کتگ اَنت، بلے تنی وھدے ھچ وڑیں دزگیری ءُ جانی تاوان ھال دز نہ کپتگ-

بلوچستان ءَ اے وڑیں وئیل پیسر ءَ ھم بیتگ اَنت کہ آیانی زمہ واری بلوچ آجوئی لوٹوکیں سلاہ بندیں گلاں زرتگ اَنت-

زانتکارانی رِد ءَ بلوچستان ءَ شھدگانی سر ءَ آجوئی لوٹوکانی نیمگ ءَ چہ کنگ بیتگیں ناکہ بندی ءُ سلاہ بندیں پٹ ءُ پول بلوچستان ءِ زمینی راستی ءَ پدر کنت- بلوچستان ءَ بازیں جاھاں ریاستی رٹ سرجمی ءَ چیلنج جوڑ بیتگ ءُ آجوئی لوٹوک تاکت زور ءَ زوراور بیگ ءَ اَنت-

زانتکارانی گوشگ اِنت کہ آجوئی لوٹوکانی نیمگ ءَ چہ اے وڑیں ھاس کاروائی نہ اَنت بلکیں سیاسی ءُ پوجی سوبمندی اِنت وھدے کہ بلوچستان ءَ ھکومت زور نزور بوان اِنت-

بلوچ یکجھتی کمیٹی ءِ رھشون صبیحہ بلوچ ءَ وتی درشانے ءِ تہ ءَ تربت ءَ ھمے زوتاں بوتگیں میڑ ءَ نمیران بوتگیں مردمانی جونانی گوم ءَ در انسانی رویشت ترندی ءَ گوں ایر جتگ –

آئی ءَ گوشتگ کہ پاکستانی پوج ءَ آیانی جون ءَ ھپتگے ءَ تاں وتی گور ءَ داشتگ انت پدا رند ءَ بید کپن ءَ کل کُتگ انت کہ اے انسانی، اکلاکی ءُ اسلامی رھبنداں در ایں –

بی وائی سی ءِ رھشون ءَ گوشتگ کہ پاکستانی ریاست ھمے ھاتر ءَ مارا مدامی سلاھبندیں گلاں گوں بندوک کنگے جھد ءَ کنت کہ ما ھمے گپ ءَ جن ایں کہ نمیران کنگ بوتگیں مردمانی جون کھولانی دست ءَ دیگ بہ بنت تاکہ آ اسلامی دودانی رِد ءَ کل کنگ بہ بنت ـ زاناں اے لوٹ کانود ءِ بگیری ءِ یا بے اکلاکی یے –

رھشون ءَ ھمے جست ایر کتگ کہ اگاں ھمے ریاست اسلامی چاگرد ءِ ٹاہ ءَ دنت گڈا زاناں چہ جوناں بیر گرگ ءُ آیاں کپن نہ دیگ ءُ کھول ءَ کل ءُ.کسارت کنگ ءَ دارگ اسلامی رھبندانی رِد ءَ انت؟ زاناں شریعت بس مھلوک ءِ سرا انت ءُ ریاستی ادارھانی سرا نہ انت؟

آئی ءَ گوشتگ کہ تربت ءَ کھول ءِ مردماں بازیں روچے ءَ زھرشانی کتگ بس ھمے ھاتر ءَ کہ وتی دوستیگیں مردماں کل کسارت بہ کن انت – وھدیکہ کبرانی باروا سرپدی رس اِتگ گڈا زالبول ءَ کلونڈ اِتگ ءُ جون کش اِتگاں گڈا آ بے کپن ءپ.در انسانی جاوراں کل کتگ بوتگ انت وھدیکہ زالبولاں لوٹ اِتگ کہ آیاں اسلامی دودانی رِد ءَ کل بہ کن انت گڈا پولیس اتکگ ءُ دو بر کبر بار داتگ انت –

ڈاکٹر ءَ وتی درشانے تہ ءَ چہ مُلایاں لوٹ کتگ کہ آ اے کرتن ءِ بگیری ءَ توار چست بہ کن انت ءُ جونانی کم شرپی ءُ چہ جوناں بیر گرگ ءُ.کھولاں گڈی رسماں دارگ ایوک درانسانی رویشت ءُ بداکلاکی ءِ نہ ایں بلکیں گیر شرعی یے –

بلوچ رھشون ءَ گوشتگ کہ مھزبیں چاگردانی تہ ءَ جونانی اھترام کنگ انسانی کدر یے کہ ریاست اشی ءِ ھچ ھیال ءَ نہ دارگ ایں اے ناں اسلامی ءں گوشگ بیت ءُ ناکہ انسان یے –

بلوچ یکجھتی کمیٹی ءِ بُنجاھی جار پد ءَ مروچی مستونگ ءَ یک زھرشانی روانکے کشگ بیتگ، کہ آئی ءَ زھرشانی کنوکاں سرجمیں بلوچستان ءَ درکانودی کوش زورانسری آوار جنی ءُ ریاستی زوراکی گیشی ءِ ھلاپ ءَ زھرشانی کنگ بیتگ-

زھرشانی کنوکاں ڈاکٹر ماہ رنگ بلوچ ءَ ھوار بی وائ سی ءِ درکانودی ھساب ءَ بندیگیں رھشوناں زوت یل کنائینگ لوٹ کتگ-

روانک ءَ اے گپ تچک کتگ گْوشتگ کہ ریاستی زوراکی ءِ ھلاپ ءَ راجی گھگیری گوں تُرندی ءَ چہ تلان بیگ ءَ اِنت، ءُ انساپ ءُ شرپ ءِ ھاتر ءَ برجاھیں جُھد ایرموش کنگ نہ بیت-

زھرشانی کنوکاں گْوشتگ کہ ریاست ءَ بلوچ چُکچینی ءِ تُرند کتگ، وھدے کہ اے چُکچینی ءِ ھلاپ ءَ تاکت زور ءَ ایرموش کنگ بیگ ءَ اِنت، دومی نیمگ ءَ آمیدگس پریک جوڑ بیتگ ءُ درکانودی دزگیریانی سر ءَ بے توار اِنت-

آئی ءَ گْوشتگ کہ بلوچ یکجھتی کمیٹی راجی زرمبشتے، آئی ءِ ھُنڈال گوں راج ءَ ھوار اَنت، تاکت ءِ زور سر ءَ زرمبشت ھلاس کنگ نہ بیت-

بلوچستان ءِ دمگ کیچ ءِ بُنجاھی شھر تربت ءَ بیتگیں میڑ ءَ بیران بیتگیں مردمانی پجّار بیتگ اَنت-

بیران بیتگیں مردمانی پجّار صبر اللہ ء یار محمد جھمنند سنگانی سر ءُ امجد ء بشام جھمنند کولواھی بازار تربت نام ءَ چہ بیتگ اَنت-

واکدار گوشگ اِنت کہ تربت ءَ سلاہ بندیں مردماں شپ ءَ ایف سی ءِ یک چیک پوسٹے ءِ سر ءَ راکٹ آس داتگ چریشی ءَ پد پوج ءَ دمگ انگیر ءَ کتگ آپریشن بندات کتگ- اے میان ءَ سلاہ بندانی دیم پہ دیمی بیتگ- میڑ ءَ دوئیں سلاہ بند جنگ بیتگ اَنت وھدے کہ یک ایف سی ءِ کارندھے ٹپی بیتگ ءُ پہ الاج ھاتر ءَ نادُراھجاہ ءَ برگ بیتگ-

وئیل ءَ یک ڈرون تامُربندے دیم ءَ اتکگ کہ آئی ءِ تہ ءَ گندگ بیت پوج ءَ سلاہ بندیں مردم ڈرون سر ءَ رندگیری کتگ اَنت، کہ آ انچش تنکیں گلے ءِ تہ ءَ پُتر اَنت، دوئیں. نیمگ ءَ چہ تیرگواری ءِ رِد برجاہ بیتگ چریشی ءِ آسر ءَ دوئیں اُرشکار جاہ پہ جاھی جنگ بیتگ اَنت-

تنی وھدے سلاہ بندیں گل نیمگ ءَ اے میڑ درگت ءَ ھچ وڑیں درشان دیم ءَ نیتکگ-

چہ شال ءُ مشکے ءَ پاکستانی پوج ءَ سے ورنا آوار جتگ ءُ بیگواہ کتگ اَنت-

گیشیں ھالانی رِد ءَ ھپدہ مئی دوھزار بیست پنچ ءَ چہ شال کلی شاھنواز ءَ محمد یحیٰی آئی ءِ لوگ ءَ چہ سی ٹی ڈی کارندھاں دزگیر کتگ ءُ ناشناسیں جاھے ءَ برتگ، اشی ءَ اَبید دگہ یک ورنایے بشیر مری دو روچ ءَ ساری پانزدہ مئی دوھزار بیست پنچ ءَ آئی ءِ لوگ چہ ھزار گنجی ءَ چیریں ادارھاں آوار جتگ ءَ بیگواہ کتگ-

دوئیں ورنایانی کھول ءَ انسانی ھکانی گل ءُ سیاسی پارٹیاں چہ درکانودی آوار جنگ ءُ زورانسری آوار جنی ءِ ھلاپ ءَ توار چست کنگ دزبندی کتگ-

ھمے وڑ آواران ءِ دمگ مشکے ءَ پاکستانی پوج ءَ یک ورنایے آوار جتگ ءُ بیگواہ کتگ-

بیگواہ کنگ بیتگیں ورنا ءِ پجّار شاھنواز ء برفی نام ءَ چہ بیتگ-

اِھوالکار رِد ءَ پوج ءَ زی شاھنواز ءُ آئی ءِ پت ءَ ھوار دگہ مردم بُنجل ءَ لوٹائینتگ اَنت، چریشی ءَ پد آ دگہ سرجمیں مردم یل داتگ اَنت بلے شاھنواز آوار جتگ ءُ چریشی ءَ پد آئی ءِ درگت ءَ ھچ وڑیں ھال دز نہ۔کپتگ-

بلوچستان ءِ دو جاھاں پوج ءُ بند ءُ ساچی شرکت ءِ سر ءَ سلاہ بندانی اُرش، پوج ءُ شرکت ءِ پھازوکانی سلاہ برتگ ءُ تاوانانی دیمپانی کتگ انت-

بلوچستان ءَ یکشلیں اُرش برجاہ انت کہ ھمک روچ جتا جتائیں جاھاں پوج ءِ چیک پوسٹ ءُ دگہ سرکاری جاہ نشانگ کنگ بوگ ءَ انت کہ ایشانی توک ءَ بازیں جاھاں پوج ءَ جانی تاوانانی دیمپانی کنگ کپگ ءَ انت-

اھوالانی رد ءَ کلات ءِ ھند شیخڑی، مورگند ءَ ناشناسیں مردماں گوستگیں شپ ءَ پوج ءِ بنجل ٹوھیں کچے ءَ نشانگ کتگ بیتگ-

دمگی اھوالانی رد ءَ گوستگیں شپ ءِ یازدہ ءَ بہ گر داں ساھت چار ءَ پوجی بنجل ءِ نیمگ ءَ تیرگواری ءُ تراکانی توار اشکنگ بیتگ انت ءُ پد ءَ ھیلی کاپٹر ءُ ڈرونزانی بال ھم برجاہ بیتگ انت-

ھمے وڑ ءَ دگہ یک اُرشے کیچ ءِ دمگ بلیدہ سلو ءَ بند ءُ ساچی شرکت ءِ لیویز کارندھانی سر ءَ سلاہ بنداں اُرش کتگ-

اھوالانی رد ءَ سلاہ بنداں کارندھانی سلاہ پچگپتگ ءُ برتگ انت بلے دگہ جانی تاوان نہ بیتگ انت-

اے اُرشانی زمہ واری انگت ءَ کس ءَ نہ زرتگ انت ءُ سرکاری تکاں ھم دگہ اھوال دیم ءَ نیتکگ انت-

بلوچستان ءِ تیابدپی شھر گوادر ءِ دمگ جیونی ءَ ناشناسیں مردمانی نیمگ ءَ پاکستانی کوسٹ گارڈ ءِ گاڑی بمب تراکے ءِ نشانگ جوڑ کنگ بوتگ۔

گوادر ءِ دمگ جیوانی ءَ ناشناسیں مردماں پولیس چونگی تاک تیاب دپ ءَ کوسٹ گارڈ ءِ گاڑی ءِ سر ءَ دستی بمبے چگل داتگ۔

اے وئیل ءَ پد مزنیں کساسے ءَ لشکر ھمے جاہ ءُ مُچ بوتگ بلے تاں انوگ ءَ چہ پوج ءِ بنشون ءِ نیمگ ءَ ھچ وڑیں بیان شنگ نہ بوتگ۔

زانگ بہ بیت کہ پیش ءَ ھم ھمے دمگ ءَ پاکستانی لشکر ءِ سر ءَ اُرش بوتگ اَنت کہ ایشانی زمہ واری بلوچستان ءَ پرکاریں سلاہ بندیں آجوئی دوستیں گلاں زرتگ انت، بلے مرچیگیں اُرش ءِ زمہ واری انگت ءَ ھچ گل ءَ نہ زرتگ۔