TBP Balochi

بلوچستان ءِ دمگ خضدار زھری ءُ آئی کش ءُ گوراں چہ گوستگیں روچ ءَ پورسز ءِ آپریشن ءِ ھال ھست انت۔

دمگی بنشون ءِ رد ءَ بلوچ آجوئی لوٹوکاں سئے جتا جتائیں جاھاں مزنیں شھدگانی سر ءَ ناکہ بندی کتگ ءُ سنی ءُ نورگامہ ءِ راہ ءَ گوں ٹوھیں مشینری ءَ بلڈوزر ءُ تباہ کتگ۔

بنشون ءِ رد ءَ دیم ءَ آیوکیں پاکستانی لشکر ءِ کاروان گزان ءُ مشک ءِ ھنداں اُرشانی تہ ءَ نشانگ جوڑ کنگ بوتگ کہ ایشی ءِ تہ ءَ پورس ءِ کارندھانی بیرانی ءِ ھال ھست۔

ایشی ءَ چہ پیسر آجوئی لوٹوکاں 11 اگست ءَ بلوچستان ءِ روچ ءِ درگت ءَ زھری شھر ءَ لس مچی ءَ گوں تران کتگ ءُ شوربندی ءِ درچ ءَ شھدگ بستگ ءُ پورسز نشانگ کتگ-

چہ گوستگیں روچ ءَ ھیلی کاپٹر دمگ ءَ بال ءَ گندگ بوگ ءَ اَنت بلے انگت ءَ چہ واکداراں آپریشن ءُ ٹپیانی بابت ءَ سرکاری بیان شنگ نہ کتگ انت۔

دمگی مردمانی گشگ انت زھری، بُلبل ءُ گزان ءَ ھوار جتاجتائیں دمگاں جنگ ءُ چوپ برجاہ انت۔

بلوچستان ءِ دمگ کیچ ءِ ھند تمپ ءَ پاکستانی پوج ءِ تیرگواری ءَ چہ یک زالبولے ءَ ھوار چکے سک ٹپی بیتگ-

دمگی اِھوالکار ءِ رِد ءَ تمپ ءِ دمگ کلاھو ءَ پوج ءِ چوکی ءَ چہ یک لوگے ءِ سر ءَ سک تیرگواری کتگ چریشی ءِ آسر ءَ زلیخہ ء عیسیٰ سک ٹپی بیتگ وھدے کہ یک چکے ھم تیرگواری ءِ آسر ٹپی بیتگ کہ آئی ءِ دست ءَ تیرے لگ اِتگ-

وئیل ءِ ھلاپ ءَ دمگ ءِ مردم پوج ءِ بُنجل دیم ءَ زھرشانی کنگ ءَ اَنت- واکدار ءَ تنی وھدے ھچ وڑیں ھال شنگ نہ کتگ-

زانگ بہ بیت کہ اے وڑیں وئیل اشی ءَ ساری ھم دیم ءَ اَتکگ کہ اود ءَ راج ءَ جانی تاوان چست کنگ کپتگ-

گوستگیں شپ ءَ تربت ءِ دمگ بلوچی بازار ءَ ھکومتی پلامرزی ٹولی ڈیتھ اسکواڈ ءِ باسکاں یک لوگے ءِ سر ءَ دستی بمب اُرش ءِ نشانگ کتگ چریشی ءِ آسر ءَ صاحبہ ھاتون ءُ شاھدہ نامیں زالبولے سک ٹپی بیتگ اَنت-

بلوچستان ءِ سے جتاجتائیں شھراں دوشمبے ءِ روچ ءَ چہ دستی بمب اُرشانی وئیل ءَ بیتگ کہ آیانی تہ ءَ یک پولیس آپیسرے ٹپی بیتگ، وھدے کہ اُرشکاراں جاہ پہ جاھی تچگ ءَ سوبمند بیتگ اَنت-

اولی وئیل گوستگیں شپ ءَ سبی ءِ چاکر دگ سر ءَ گالرز کالج ءِ دیم ءَ بیتگ- پولیس ءِ رِد ءَ ھما وھد ءَ پٹ ءُ پول ءَ دلگوش بیتگ اَنت موٹر سائیکل ءَ سوار دو ناشناسیں اُرشکاراں پولیس کارندھانی سر ءَ دستی بم بے چگل داتگ کہ گوں تُرندی ءَ ترک اِتگ-

تراک ءَ اے ایس آئی محمد افضل ٹپی بیتگ کہ ٹیچنگ نادُراھجاہ سبی ءَ برگ بیتگ-

دومی وئیل مستونگ ءَ ڈپٹی کمشنر کمپلیکس ءِ نزیک ءَ بیتگ کہ اود ءَ ناشناسیں مردماں دستی بمبے چگل داتگ- پولیس ءِ رِد ءَ دستی بمب کمپلیکس ءِ نزیک ءَ کپتگ ءُ گوں تُرندی ءَ ترک اِتگ-

ھمے وڑ بلوچستان ءِ بُنجاھی شھر شال ءَ گوستگیں شپ ءَ ایریگیشن کارگس نزیک ءَ اوشتوکیں پولیس کارندہ دستی بمب اُرش ءَ نشانگ کتگ-

تراک ءَ پد پوج ءِ کارندھاں ھمے دمگ انگیر ءَ کتگ بلے تنی وھدے ھچ وڑیں تاوان ءِ ھال نیست-

ـبلوچستان ءِ دمگ واشک ءِ ھند بیسمہ ءَ اُرش ءَ پاکستان آرمی ءِ یک کپٹنے ءَ ھوار 9 کارندہ بیران ءُ 6 ٹپیگ بوتگ اَنت۔

گوستگیں شپ ءَ بسیمہ ءَ پاکستانی فوج ءِ بنجاھی کیمپ ءِ سر ءَ مزنیں کساسے ءَ سلاہ بنداں اُرش کتگ ۔ ھمے وھد ءَ مزنیں تیرگواری ءُ بازیں تراکانی توار بوتگ انت۔

اُرش ءِ وھد ءَ پاکستانی لشکر ءِ 328 بریگیڈ ءِ کوئک رسپانس فورس ءَ دیم ءَ آیگ ءِ جھد کتگ، گڑا ھمے کاروان ءِ سر ءَ اُرش کنوکاں سر بستگ نشانگ کتگ، ایشی ءِ آسر ءَ پاکستانی لشکر ءِ کیپٹن محمد آصف ءَ ھوار 9 کارندہ بیران ءُ 6 ٹپی بوتگ اَنت۔

اے ماہ ءَ پاکستانی لشکر ءِ سر ءَ اے سیمی مزنیں اُرش اِنت۔ ایشی ءَ چہ پیسر بلوچ لبریشن آرمی ءَ نوشکی ءِ ھواریں دمگ مستونگ ءِ گرگینہ ءِ دمگ ءَ آئی ای ڈی ءِ اُرش ءَ پاکستانی لشکر ءِ میجر رضوان بیران بیتگ ات۔

یک اگست ءَ بلوچ سلاہ بندیں گل ‘BRAS’ ءَ پنجگور ءِ دمگ گوران ءَ لشکر ءِ کیمپ ءِ اُرش کتگ ءُ دستیگ ءُ بیست ءَ چہ گیش کارمند کُشتگ اَنت۔

گوستگیں روچ ءَ سبی، تگران، جھل مگسی، گرگینہ، زامران، تربت، تمپ، مند ءُ زھری ءَ جتاجتائیں اُرشانی ھال اتکگ انت کہ ایشی ءِ تہ ءَ پاکستانی لشکر، فوجی سامان ءُ پولیس نشانگ جوڑ کنگ بوتگ اَنت۔

بسیمہ اُرش ءَ ھوار اے درستیں اُرشانی زمہ واری انگت ءَ کس ءَ نہ زرتگ انت-

دومی نیمگ ءَ سرجمیں بلوچستان ءَ سیکورٹی ءِ جیڑھانی سبب ءَ انٹرنیٹ سروس بند کنگ بوتگ ، وھدے کہ مساپر بس ءُ ریلانی روگ ءُ آیگ ھم سرجمی ءَ بند کنگ بوتگ اَنت ، ءُ بینک ھم بند کنگ بوتگ اَنت ۔

بلوچستان ءِ دمگ کیچ ءِ بنجاھی شھر تربت آپسر بلوچی بازار ءَ ناشناسیں مردماں خداد نامیں مردے ءِ لوگ ءَ دزبمبے چگل داتگ کہ چریشی ءَ چہ دو زالبول ٹپی بیتگ انت-

اھوالانی رد ءَ گوستگیں شپ ءِ ساھت یازدہ ءَ تربت آپسر بلوچی بازار ءَ یک لوگے ءَ سرکاری پلامرزی ءِ ٹولی کہ آئی ءَ لس نام ءَ “ ڈیتھ اسکواڈ ” ءِ نام ءَ زانگ بیت انت بمبے چگل داتگ ءُ چریشی ءَ دو زالبول سک ٹپی بیتگ انت-

اھوالانی رد ءَ ویل گوستگیں شپ ءِ ساھت یازدہ ءَ پیش اتکگ کہ اود ءَ خداد ءِ لوگ ءِ سر ءَ دزبمبے چگل دیگ بیتگ-

زانگ بہ بیت ڈیتھ اسکواڈ بلوچستان ءَ سیاسی باسکانی آوار جنگ ءُ کوشکاری ءَ ھوار اود ءَ لوگانی سر ءَ نشانگ کنگ ءَ ھوار انت- گوستگیں روچاں تمپ میر آباد ءَ ھم یک لوگے ءِ سر ءَ دزبمبے چگل دیگ بیتگ ات کہ اود ءَ تاوانانی ھال نہ بیتگ ات-

امریکا ءَ بی ایل اے ءِ فدائی یونٹ مجید بریگیڈ ناشرکاریں ٹولی یے کرار داتگ-

امریکہ مھمکہ ھارجہ ءِ گوشگ اِنت بلوچ لبریشن آرمی ءُ مجید بریگیڈ ناشرکارانی لڑ ءَ ھوار کتگ اَنت-

مھکمہ ھارجہ ءَ دیمتر ءَ گوشتگ کہ ٹرمپ انتزامیہ ءَ ناشرکاری ءِ گر ءُ دار ءِ ھاتر ءَ مھکمی برجاہ ءَ اِنت-

امریکی مھکمہ ھارجہ ءِ درشان ءِ تہ ءَ گوشتگ کہ بی ایل اے ءَ کراچی ایئرپورٹ ءُ گوادر پورٹ کمپلیکس ءِ سر ءَ بیتگیں اُرش زمہ واری منّ اِتگ اَت-

بی ایل اے ءَ جعفر ایکسپریس ریل سر ءَ ھم بیتگیں اُرش زمہ واری منّ اِتگ اَت، اُرش ءَ سی یک مردم کشتگ اَت کہ آیانی تہ ءَ لَس مردم ءُ پوج ءِ کارندہ ھوار بیتگ اَنت وھدے کہ سے سد یرگمال کتگ اَنت-

بلوچ شھیدانی پتر ءُ بلوچ سوشل میڈیا ایکٹوسٹس 11 اگست ءَ بلوچستان ءِ روچ ءُ پدائی ریحان ءِ ھپتمی سالروچ ءِ درگت ءَ یاتگاری دیوان ءُ سوشل میڈیا کمپینے برجم داشتگ۔

ھمے درچ ءَ گشتانک دیوکاں گوشتگ کہ مرچی یازدہ اگست اِنت بلوچ ھمک سال یازدہ اگست ءَ وتی بیگواہ بوتگیں آجوئی ءِ روچ ءَ دار اِیت ۔ بلے گْوستگیں ھپت سالانی تہ ءَ بلوچ چاگرد ءِ تہ ءَ یازدہ اگست ءِ بستار گیش بیتگ پرچا کہ بلوچستان ءِ مزن نامیں گوریلا جنگول اسلم بلوچ ءِ کہ استاد ءِ نام ءَ زانگ بیت کہ آئی ءِ ورنائیں بچ ریھان بلوچ ءَ بلوچستان ءِ دمگ دالبندین ءِ دمگ ءَ چینی انجینئرانی کاروان ءِ سر ءَ پدائی اُرشے کُتگ ءُ مجید ءُ درویش ءِ سنت زندگ کتگ ءُ پد ءَ پدائینانی یک درچے بنداتگ بیتگ ءُ چریشی ءَ چپ زورگر ءِ واستا یک سیاہ شپے جوڑ بوتگ-

گشتانک دیوکاں گْوشت کہ ریھان اسلم ءِ اے پیسلہ ءَ بلوچ راجی جنز ءَ نوکیں راھے جنزینتگ ءُ پیسلہ داریں جنگے ءِ راہ ءَ سر کتگ-

گشتانک دیوکاں گْوشت کہ بلوچستان ءِ شھیدانی مستریں کربانی آجوئیں بلوچستان ءِ رسگ انت۔ آھاں گشتگ کہ مرچی پاکستان ءِ ریاست بلوچ بیانیہ ءِ سر کنگ ءِ ھاتر ءَ زور ءِ کارمرز کنگ ءِ ھمراھی ءَ ارباں ڈالر ھرچ کنگ ءَ انت بلے اے زمینی گْواچناں بدل کُت نہ کنت۔ مرچی کلیں بلوچستان یک سرجمیں جنگی زونے جوڑ کنگ بوتگ بلے بلوچ راجی جنز ءِ ھلاس کنگ ءَ بے سوبی ءِ دیمپان انت۔

بلوچستان ءِ جتا جتائیں جاھاں بلوچ سلاہ بنداں دگ بندی کتگ ءُ مھلوک ءَ تران کنگ ءِ ھواری ءَ پٹ ءُ پول کتگ انت –

سر بیتگیں ھالانی رد ءَ نوشکی ءَ ھواریں دمگ گرگینہ ءَ شال ءُ تپتان ءِ دگ بستگ ءُ پٹ ءُ پول کتگ انت-

اھوالانی رد ءَ بازیں اداراں دگ بستگ ءُ اسنیپ چیکنگ کتگ انت- دگہ تاوانانی ھال سر نہ بیتگ انت-

ھمے وڑ مند ءِ بازار ءَ بلوچ سلاہ بنداں تر ءُ تاب کتگ ءُ مھلوک ءَ گوں تران کتگ انت-

زامران ءَ ساہ دیم ءَ پاکستانی پوج ءِ چوکی ءِ سر ءَ سلاہ بنداں اُرش کتگ ءُ چریشی ءَ پورسز ءَ تاوان ءِ ھال انت-

ھمے وڑ جھاؤ، آواران، تربت ھوت آباد جھل مگسی ءَ ھم پوج ءِ چوکیانی سر ءَ اُرشانی ھال انت-

ھمے وڑ زھری ءَ ھم پورسز ءِ آپریشن ءُ سلاہ بندانی میان ءَ جنگ ءُ چوپانی اھوال دیم ءَ آیگ ءَ انت-

زانگ بہ بیت دومی نیمگ ءَ بلوچستان سرکار ءَ سیکیورٹی ءِ بنیاد ءَ سرجمیں بلوچستان ءَ انٹرنیٹ سروس بند کتگ انت بلے ایشی ءَ ابید ھم اود ءَ جاور سرکار ءِ دست ءَ نیتکگ انت –

لس زانتکارانی گوشگ انت کہ سرکار ءَ انٹرنیٹ سروس ءِ بندش ءِ سبب تھنا واپاری مردماں تاوان انت ءُ چریشی ءَ چہ اود ءَ بازیں اونلائینی زورگار جھل شتگ انت-

ایشانی ھواری ءَ بلوچستان ءَ سیکیورٹی ءِ بنیاد ءَ ٹرانسپورٹانی سپر ءِ سر ءَ ھم بندش جنگ بیتگ انت- ءُ ایشی ءِ ھواری ءَ مستونگ ءِ دمگاں انتزامیہ ءَ داں پانزدہ اگست ءَ بینکانی بندش ءِ جار ھم جنگ بیتگ انت-

بلوچستان ءِ دمگ کیچ تمپ ءَ پورسز ءِ گولہ باری ءَ یک کسان سالیں زھگے بیران –

اھوالانی رد ءَ تمپ گومازی ءَ سلاہ بندیں مردمان پورسز ءِ چوکی ءِ سر ءَ اُرش کتگ ءُ پد ءَ پورسز ءَ لس لوگانی سر ءَ مارٹر آس داتگ ءُ چریشی ءِ آسر ءَ دہ سالی ئیں زھگے بیران بیتگ-

بیران بیتگیں زھگ ءِ پجار مھمود ء عبدالغفور ءِ نام ءَ زانگ بیتگ-

دمگی مردمانی رد ءَ پورسز ءَ لس آبادی ءِ سر ءَ کورکائی مارٹر آس داتگ ءُ چریشی ءَ چہ زھگ بیران بیتگ-

کراچی ءُ اسلام آباد ءَ بلوچ سیاسی رھشونانی دزگیری ءُ زورانسری بیگواھیانی ھلاپ ءَ زھرشانی نندانک برجاہ انت-

بلوچستان ءَ بلوچ یکجھتی کمیٹی ءِ رھشونانی دزگیری، انساپ ءِ نہ بیگ ءُ چہ کراچی ءُ بلوچستان ءَ زورانسری بیگواھیانی واستا کراچی ءُ اسلام آباد ءَ پریس کلبانی دیم ءَ زھرشانی نندانک دیان ءَ وتی دوستیں مردمانی یل دیگ ءُ انساپ ءِ لوٹ ءَ کنگ ءَ انت-

کراچی پریس کلب ءِ دپ ءَ بیگواھیں نودربر زاھد علی بلوچ ءِ یل کنگ ءِ واستا بنجل ءَ یک ھپتگے بیت کہ یک زھرشانی برجاہ اِنت۔ لیاری ءِ دمگ کلری ءِ 25 سالی زاھد ءِ ھاندان ءُ سیاد ءُ وارس ھمک روچ کلب ءِ دپ ءَ زھرشانی ءَ بھر زورگ ءَ اَنت۔

زاھد ءِ پت عبدالحمید بلوچ ءَ رسانکدر ءَ گوں تران کنان ءَ گْوشتگ کہ منی چک ءَ شپ ءُ روچ پہ لوگ ءِ ھرچ ءُ درچ ءِ پیلو کنگ ءَ کار کتگ ءُ مات ءُ پت ءِ الاج ءِ ھم زمہ واری آئی ءِ سر ءَ اِنت۔

آئی ءَ گوشت کہ اے سکیں گرم ءِ تہ ءَ مارا امیت انت کہ بوت کنت ریاستی ادارگ مئے جاورانی سر ءَ رھم بہ کن انت ءُ مئے چک ءَ سلامتی ءَ یل بہ دے انت۔

آئی ءَ گیش گوشت کہ ھمک شھری ءَ را آزاتیں زند گوازینگ ءِ ھک ھست بلے ریاست ءَ اے ھک مارا چہ پچ گپتگ۔ آئی ءَ چہ انسانی ھکانی گل، مزن آمیدگس، رسانکدر ءُ سرجمیں انسان دوستیں تبکاں گوں دزبندی کتگ کہ آ زاھد علی بلوچ ءِ یل کنگ ءِ واستا وتی کرد ءَ پیلو بہ کن اَنت۔

زانگ بہ بیت کہ زاھد علی بلوچ 17 جولائی 2025 ءَ سیکورٹی ادارھانی نیمگ ءَ دزگیر کنگ ءَ پد بیگواہ کنگ بوتگ کہ ایشی ءَ پد آئی ءِ لوگ ءِ مردماں زھرشانی بندات کتگ۔

دومی نیمگ ءَ اسلام آباد پریس کلب ءِ دیم ءَ بلوچ یکجھتی کمیٹی ءِ رھشون ءُ بیگواھیں مردمانی کھولانی نندانک بیست ءُ ھپتمی روچ ءَ سر بیتگ۔

زھرشانی کنوکیں مردمانی گْوشگ اِنت کہ اے روچ پہ بلوچ مات ءُ گْوھار ءُ ورنایاں یک دراجیں ءُ گرانیں جنزے ءِ چیدگ اِنت کہ ایشی ءِ تہ ءَ آیاں ریاستی بے پروائی چہ نزیک ءَ دیستگ۔ آیانی لیکہ انت کہ ریاست راستی ءَ پُشت ءَ کت نہ کنت ءُ بلوچ راج وتی ھکانی واستا آواز چست کنت داں کہ راستی منّگ بہ بیت-