بلوچستان ءِ دمگ نوشکی ءُ خاران ءَ پاکستانی لشکر ءَ سلاہ بندیں اُرشانی دیمپانی بوتگ ۔
گیشیں ھالانی رد ءَ نوشکی ءِ دمگ احمد وال ءَ سلاہ بندیں مردماں پاکستانی لشکر ءِ پیادگ ءُ گاڑی نشانگ جوڑ کتگ اَنت۔
اے اُرش ءِ آسر ءَ جانی تاوان ءِ ھال بیتگ انت۔ زانگ بہ بیت سئے روچ پیش سلاھبندیں اُرش ءَ اُرد ءِ کاروان ھم نشانگ جوڑ کنگ بیتگ۔
ایشی ءَ ابید خاران ءَ پاکستانی لشکر ءِ یک دگہ گاڑی یے تراک ءِ نشانگ کنگ بوتگ کہ ایشی ءِ آسر ءَ جانی تاوان ءِ ھال دیم ءَ اتکگ انت۔
دمگی مردمانی رد ءَ دمگ ءَ بارودی موادانی تراک ءِ سبب ءَ فورسز ءَ را رؤگ ءُ آیگ ءِ تہ ءَ مشکل بوھگ ءَ اِنت وھدے کہ گوستگیں روچ ءَ ھم بمب تراک ءُ سلاہ بندیں اُرشانی تہ ءَ فورسز ءَ جانی تاوانانی دیمپانی وتگ۔
بلے اے نوکیں اُرشانی بابت ءَ انگت ءَ فوجی واکدارانی نیمگ ءَ ھچ وڑیں درشان نیتکگ انت۔
زانگ بہ بیت کہ بلوچستان ءَ ھمروچ پاکستانی لشکر ءُ سرکاری مڈیانی سر ءَ اُرشانی ھال دیم ءَ آیگ انت ۔
بلوچ آجوئی لوٹوکیں سلاہ بندیں گل دمگاں پرکار اَنت ءُ پیسر ءَ ھم باز رند ءَ پاکستانی لشکر اش نشانگ جوڑ کتگ۔ بلے انگت ءَ ھچ گل ءَ نوکیں اُرشانی زمہ واری نہ زرتگ۔