TBP Balochi

پاکستانی لشکر کجام ھم شکی ئیں مردماں سَے ماہ ءِ واستا دزگیر کت کنت، پاکستانی راجی اسمبلی ءَ بِل منگ بیتگ-

پاکستان ءِ راجی اسمبلی ءَ سلاہ بد یا سول سلاہ بندیں پورسز ءَ سَے ماہ ءِ واستا شکی ئیں مردم ءِ دزگیر کنگ ءِ واک ءِ بِل منگ بیتگ-

قومی اسمبلی ءَ انسداد ناشرکاری ءِ ترمیم بل 2024ءِ شَ ءِ رد ءَ منگ نامہ داتگ۔ بل ءِ ھستیں کمیٹی ءِ رپورٹ ءِ رد ءَ سید نوید قمر ءَ پیش کتگ چریشی ءَ گیشتریناں من اتگ-

ترمیم بل ءِ رد ءَ سلاہ بندیں لشکر یا سول سلاہ بندیں لشکر ءَ را 3 ماہ ءِ واستا ھمک شھری ءِ دزگیر کنگ ءِ اجازت دیگ بیت ءُ ھرکس کہ تاوان ءُ ٹارگٹ کیلنگ ءِ واستا آوار جنگ ءَ ھوار اِنت آ ھم دزگیر کنگ ءِ وس ءَ بیت۔

ترمیمی بل ءِ رد ءَ آئین ءِ آرٹیکل 10 ءِ رد ءَ اے جرمانی تہ ءَ ھواریں مردم ءِ بندیگ جاہ ءِ وھد 3 ماہ ءَ چہ گیش کنگ بوت کنت۔ دزگیریں مردم ءِ ھلاپ ءَ پٹ ءُ پول یکجائی پٹ ءُ پولی ٹیم ءِ نیمگ ءَ کنگ بیت ءُ انسداد ناشرکاری ایکٹ ترمیم ءِ بل 3سال ءِ واستا بیت۔

اپوزیشن ءِ ایرادگرہ ءِ پسو ءَ وزیر مملکت طلال چوہدری ءَ گشتگ کہ 2012 ءِ وڑیں جاور پد ءَ اے ملک ءَ انت، یک ماھے ءِ تہ ءَ بلوچستان ءَ 4 میجر ھترناکیں اُرشاں بیران بوتگ انت، اے کانون ءِ جوڑ کنگ المی انت کہ ہورسز ءِ کمک ءَ بہ کنت۔

زانگ بہ بیت کہ اے بل اولی رند ءَ جون ءَ پیپلز پارٹی ءُ آئی ءِ اتھادی ھکومت ءَ بلوچستان ءَ پیش کتگ ات، اود ءَ اے منگ بوتگ ات، وھدیکہ نوں اے جار جنگ بوتگ کہ اے کانون ءِ سر یَ گیش ترمیم ءِ گوما سرجمیں پاکستان ءَ امل کنگ بیت۔

سَیمی گْورم (ایلون ٹوپلر)

رجانکار: شاھد اھمد

دی بلوچستان پوسٹ

مئے زندگی ءِ تہ ءَ یک نوکیں دودمانے پیداک بوگ ءَ اِنت ءُ اگل ءِ کورْ ، ھر جاہ ءَ ایشی ءِ راہ ءَ اُشتارینگ ءِ جُھد ءَ اَنت۔

نوکیں دودمان ءِ تہ ءَ وتی لوگ ءِ گْوازینگ ءِ وڑ ءُ پیم، کار ءُ بار، مھر ءُ مھبت ءُ نندگ ءُ پادایگ ءِ بدل بوتگیں اندازگ، نوکیں کار ءُ بار، نوکیں مُلکاری جنگ ءُ جیڑہ یک نوکیں بدل بوتگیں سُد ءُ سما اِش آرَگ ءَ اِنت۔ بازیں کساسے ءِ مھلوک وتی زندگی ءَ گْوست ءِ رِد ءَ وت ءَ یکجاہ گند اَنت پرچاکہ چَہ آیوک زمانگ ءَ ترس اَنت پمیشکا مھلوک وت ءَ گوں گْوست ءِ ھمگرنچ کن اَنت ءُ بے کاریں زندگی ءَ گْوازینگ ءِ جُھد ءَ اَنت ءُ لوٹ اَنت کہ ما اے دگنیا ءَ زندگ بہ بہ ایں۔

اولی گْورم ءِ بدلی ، گوں دہ ھزار سال ساری کشت ءُ کشار ءِ ودّان ءُ جوڑ بوت ءُ دومی گْورم ، انڈسٹریل ءِ آشوب ءَ کشت ءُ کشاری ءَ را پْروشت ءُ پْروش ءِ آماچ کُت ءُ دیم ءَ اَتک۔ یک مزنیں گْورمے بدل بوھان اِنت۔

سیمی گْورم ، ءِ چُک ءِ بازیں مردم تنیگتا سرپد نہ اَنت کہ اے سیمی گْورم زند ءِ کُجام دودمان اِنت کہ مردم پھم اَنت ئِے ، لھتیں مردم ایشی ءَ را گلوبل ولیج ءِ نام ءَ دے اَنت ءُ لھتیں مزنیں پْراہ ءُ شائیگانے ءِ زمانگ ءَ بندات بوگ ءَ اِنت۔ چہ ایشاں ابید: برزنسکی ءِ گْوشگ ءِ رِد ءَ دگنیا ٹینکی ٹرانک ءِ دیمپان اِنت۔

دومی گْورم: سے سد سال پیسر یک زوراوریں تَراکے اشکُنگ بوت ایشی ءِ چَولانی تراک تیوگیں دگنیا وتی نیمگ ءَ کُت ءُ کْوھنیں چاگرد ھلاس بوت ءُ نوکیں دودمانے ءِ تہ ءَ بدل بوت۔ اے تراک انڑسٹریل آشوب ءِ تراک اَت ءُ ایشی ءَ کروڑانی ھساب ءَ مردمانی کْوھنیں دودمان گار ءُ بیگْواہ کُت اَنت ءُ آیانی ورگ ءُ وپسگ ءُ نند ءُ پادایگ ءِ وڑ ءُ پیم بدل کُت اَنت اِش۔ اے آشوب ءِ اولی گْورم اَت کشت ءُ کشاری اَت کہ انڑسٹریل آشوب ءِ تہ ءَ بدل بوت۔

گْوستگیں اولی گْورم ءَ کساس ھزاراں سال وتی دودمان ءِ پاگواجی دَور ءِ تہ ءَ دگنیا ءِ آبادی ءَ را دو بھر کنگی اَت۔ ” گیر دودمان” ءُ ” دودمان “

گیر دودمان ٹولی ءَ کسان کسانیں ٹولی جوڑ کُت ءُ ایشانی کار ءُ روزگار پسانی چارینگ ، شکار کنگ، دریا ءَ ماھیگ گِرگ ءُ وتی زند ءَ پہ ارزانی ءَ گْوازین اَنت ءُ آیانی زند ءِ سر ءَ کشت ءُ کشاری ءِ آشوب ءِ دَور ءَ چوشیں ھاسیں سان دور نہ داتگ اَت۔

وھدے کہ میزان میزان ءَ کشت ءُ کشاری ایشانی سر ءَ سان وَ دور دنت پرچاکہ کشت ءُ کشاری ءِ آشوب زُوت ودّان کنان اَنت ءُ نوکیں دودمان ایشی ءِ ھمراھی ءَ ھم بدل بوان بوت۔

ھمے درگت ءَ چین ، ھندستان ، میکسیکو ، یونان ءُ روم ءَ کْوھنیں تھزیب ءِ زوالی بندات بوت اَنت گڑا ایشانی کار ءُ بار ، زندگی، دود ءُ ربیدگ، ٹَکّانی رھبند ءُ سیاست ءِ بنکی بس زمین اَت ءُ ھرجاہ ءَ بس زورانسری اَت ءُ اد ءَ ھر کس وتی چیزاں وت جوڑ کنگ ءَ اَت۔ ایشانی جوڑ کُتگیں چیز تیوگیں اولی گْورم ءِ دودمان ءِ کُتگیں کار بیتگ اَنت۔

نوکیں سسّا ءِ رِد ءُ بند( سَیمی گْورم )

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت- 

مھکمہ داخلہ بلوچستان ءِ رِد ءَ پانزدہ اگست ءَ شال ءِ جتاجتائیں دمگاں موباھل فون سروس بند کنگ بیت-

واکدار ءِ رِد ءَ شال ءِ دمگ دمگاں قائدآباد، گوالمنڈی ءُ بروری ءَ موباھل فون سروس ءِ سُھب نُھ ءَ تاں شپ ءِ ھشت ءَ بند کنگ بیت، مھکمہ داخلہ بلوچستان ءِ گوشگ اِنت کہ موٹر سائیکل ءِ ڈبل سواری سر ءَ پابندی پیسر ءَ چہ جنگ بیتگ-

زانگ بہ بیت کہ ھمے ماہ ءَ صوبائی ھکومت پرمان ءِ سر ءَ شال ءَ ھوار سرجمیں بلوچستان ءَ موباھل انٹرنیٹ سروسز پیسر ءَ چہ بند کنگ بیتگ ءُ نو موباھل فون ءِ سروسز ءِ بند کنگ ءِ جار ھم جنگ بیتگ-

سیکورٹی تُرس ءُ اُرشانی تُرس ءِ بلوچستان ءِ بازیں دمگاں کرفیو جنگ بیتگ، وھدے کہ چاردہ اگست ءِ درگت ءَ پبلک ٹرانسپورٹ، انٹرنیٹ، ریل ءُ بینکانی سسٹم ھم بند کنگ بیتگ اَنت-

ھکومتی پرمانانی رِد ءَ چاردہ اگست ءِ درگت ءَ شال ءَ بولان میڈیکل کمپلیکس ءَ ایمرجنسی جنگ بیتگ، وھدے کہ جتاجتائیں شھراں سیکیورٹی شیواری ءُ پولیس ءِ گشت برجاہ-

انتزامیہ ءِ نیمگ ءَ چہ زھرشانی نندانک ءَ ساڑی کُشگ بیتگیں احسان شاہ ءِ مات ءِ دزگیری کنگ ءِ بیھار دیگ بیتگ-

مستونگ ءَ پاکستانی پوج ءِ تیرگواری ءَ چہ بیران بیتگیں ھپدہ سالی ئیں ورنا احسان شاہ ءِ مات شال پریس کلب ءِ دیم ءَ نندانک مروچی نُھمی روچ ءَ پُترتگ-

احسان شاہ ءِ مات ءَ وئیل ءَ ھمگرنچیں ایف سی ءِ کارندھانی دزگیر نہ کنگ ءِ ھلاپ ءَ زھرشانی ءَ اِنت-

ھپدہ سالی ئیں احسان شاہ ھمے سال ءِ سے جون ءَ شال ءِ دمگ غنجہ ڈوری ءَ ایف سی ءِ کارندھانی تیرگواری ءَ چہ نشانگ بیتگ، چریشی ءِ آسر ءَ آ بیران وھدے کہ ھمراہ شعیب ٹپی بیتگ-

کھول ءَ بھتام جتگ کہ مستونگ ءَ ایف سی ءِ یک آفیسرے ءَ احسان شاہ دمگ ءَ چارگری ءَ نہ کنگ ءِ سر ءَ تیرگواری کتگ ءُ کُشتگ-

وئیل ءِ ایف آئی آر پوج ءِ کارندھانی ھلاپ ءَ نکش کنگ بیتگ بلے بازوں ماھانی گوزگ ءَ اَبید ھچ وڑیں دزگیری دیم ءَ نیتکگ-

احسان شاہ ءِ مات ءِ گوشگ اِنت کہ مروچی نندانک ءِ میان ءَ دمگی ڈپٹی سپرنٹنڈنٹ پولیس ( ڈی ایس پی ) اتکگ پوسٹرز درتگ اَنت ءُ زھرشانی ءِ ھلاس کنگ ءِ بیھار داتگ-

آیانی رِد ءَ ڈی ایس پی ءَ گوشتگ کہ اگاں نندانک ءَ برجاہ داشت گُڑا آ دزگیر کنگ بیت-

زانگ بہ بیت کہ احسان شاہ ءِ کوش کیس ءَ ایف آئی آر ءِ نبشتہ کنگ ءِ میان ءَ ھم کھول ءِ سر ءَ زور بیتگ-پولیس پوج ءِ کارندھانی تُرس ءَ اَتکگ ءُ ایف آئی آر نکش نہ کتگ بلے آمیدگسی پرمان رِد ءَ ناشناسیں کارندہ ایف آئی آر ءَ نامدپ کتگ اَنت-

احسان شاہ ءِ مات ءَ بلوچ سیاسی گل ءُ انسانی ھکانی ادارھاں چہ دزبندی کتگ کہ آ اے نا انساپی ءِ ھلاپ ءَ آئی ءِ توار جوڑ بہ بنت ءُ شال ءَ برجاھیں نندانک ءَ ھوار بہ بنت ءُ آیانی ھمراھداری ءَ بہ کن اَنت-

پاکستان ءِ آجوئی ءِ روچ ءِ درگت ءَ بلوچستان ءِ سرکار چہ اَرشانی ترس ءَ ترندیں گامگیج زرتگ کہ آیانی تہ ءَ شپ ءِ وھد ءَ پبلک ٹرانسپورٹ ، ریل گاڑی ، موبائیل انٹرنیٹ ءَ ھوار مزنیں شھرانی پترگ ءُ درآیگ ءِ راہ بند کتگ انت ۔

سرکار ءِ چہ اے بندشاں ھمے سما بیت کہ سرجمیں بلوچستان ءَ کرفیو جنگ بوتگ ءُ لس مھلوک بازیں اڈ ءُ جنجالانی دیمپان انت ۔

ٹرانسپورٹانی سر ءَ بندش

ٹرانسپورٹ واکدارانی رد ءَ بیگاہ ءِ پنچ ءَ بگر تاں شپ ءِ پنچ ءَ سرجمیں بلوچستان ٹرانسپورٹانی سر ءَ بندش جنگ بوتگ اگاں کسی ءَ بگیری کت گڑا واکدارانی نیمگ ءَ بیھار دیگ بوتگ انت گڑا اے کمپنی دگانی سر ءَ سپر کت نہ کناں ۔ اے بندش مزنیں شھدگاں ھوار درسیں دمگانی سر ءَ انت ۔

بلوچستان ءَ ھمک روچ ھزارانی کچ ءَ مردم ھمے ٹرانسپورٹاں شال تاں کراچی ، مکران ءَ ھوار پاکستان ءِ ایندگہ دمگاں سپر کن انت چریشی ءَ مھلوک سک باز دلسیاہ انت ۔

بلوچستان ءَ جاندراھی آسراتی نہ بوگ ءَ اے مردم کراچی ءَ رو انت گڑا کراچی رؤکیں نادراہ بازیں جنجالانی دیمپان انت ، چہ مھلوک ءِ نیمگ ءَ ٹرانسپورٹرانی بندش ءِ بگیری ءَنندانک جنگ بوگ ءَ انت ۔

دومی نیمگ ءَ شال ءِ ریل گاڑی ءَ مروچی چارمی روچ انت بند انت ءُ پاکستان ریل واکدارانی گوشگ انت کہ اے بندش داں چاردہ اگست ءَ برجاہ بیت ۔

ریل ءِ واکدارانی رد ءَ مستونگ ءِ دمگ دشت ءَ جعفر ایکسپریس ءِ سر ءَ اُرش ءَ پد اے شور کنگ بوتگ ۔

زانگ بہ بیت مارچ ءِ ماہ ءَ ھمے ریل بلوچ لبریشن آرمی ءَ ہائی جیک کتگ ات کہ اودا بازیں پاکستانی پوجی کارمندے کشتگ ات ۔

رپورٹ ءِ رد ءَ زمینی سپر ءِ بندش ءِ سوب ءَ مردم بالگرابانی سر ءَ سپر کنگ ءَ لاچار انت کہ بالگرابانی کرایہ ھم گیش کنگ بوتگ کہ اسلام آباد کرایہ پیسرا ھژدہ یا بیست ھزار بوتگ نوں پنجاہ ھزار ءَ سر انت ۔

موبائیل انٹرنیٹ ءِ بندش

شش اگست ءَ چہ سرجمیں بلوچستان ءَ موبائیل نیٹ بند کنگ بوتگ ءُ اے بندش سی ءُ یک اگست تاں برجاہ بیت انت ۔

زانگ بہ بلوچستان پیسرا ملک ءِ درساں پشت کپتگیں آنلائن انفراسٹرکچر ءِ بوتگ کہ اودا شست درسد دمگ چہ نیٹ ءَ زبھر انت ، بلوچستان ءِ کساس کروڈ ءِ نیم مردمانی تہ نیم مردم موبائیل ڈیٹا کارمرز کنگ ءَ بوتگ وھدیکہ لینڈ لائن کارمرزکنوکانی کچ بس ھپتاد ھزار انت ۔

چہ نیٹ بندش ءَ فری لانسر ، آنلائن کار کنوکیں زالبول ، ورگ بروک ، نودربر ءُ کارءُ باری مھلوک سانمند انت ۔

بلوچستان ءِ انسانی ھکانی کمیشن اے گامگیج بنکی انسانی ھکانی بگیری دارگ ءِ گوشتگ ءُ ترندی ءَ گو ں ایرجتگ ۔

گوادر سرجمی ءَ بند

چاردہ اگست ءِ مراگش ءُ پھازگی ترس ءِ پشدر ءَ گوادر ءَ گوستگیں سَے روچ ایں کہ پترگ ءُ درآیگ ءِ راہ بند کنگ بوتگ انت ، دگانی سراطھچ نیست مھلوک گسانی تہ ءَ بند انت ۔

سرکاری گامگیجاں ابید ارش برجاہ انت

ٹرانسپورٹ ، نیٹ ءُ بینکانی بند بوگ ءَ ابید بلوچستان ءِ بازیں ھند ءُ دمگاں ارش برجاہ انت کہ پاکستانی پوج ، پولیس ،دمگی کشندہ ٹولی ءُ ریل نشانگ کنگ بوگ ءَ انت ۔

گوستگیں روچ ءَ واشک ءِ دمگ بسیمہ ءَ یک ارشے ءَ پاکستانی پوج ءِ کپٹن ءَ ھوار نھ کارمند مرتگ ءُ شش زدگ بوتگ ات وھدیکہ شال ءَپولیس ءُسرکاری کارگس نشانگ کنگ بوتگ اتاں ۔

بلوچستان ءِ دمگ زیارت ءَ سلاہ بندیں مردماں ڈپٹی کمشنر گوں وتی چک ءَ دزگیر کتگ وھدیکہ زھری ءَ پہ لشکر کشی ءَ شتگیں پاکستانی پوج نشانگ کنگ بوتگ ۔

سول سوسائٹی ءُ مردمانی ایراد

دمگی مردم ءُ انسانی ھکانی باسکانی گوشگ انت کہ سرکار جھندم پھازگ ءَ بنکی زلورتانی سر ءَ بندش جنگ ءَ انت ءُ مھلوک ءَ سزا دیگ ءَ انت آیانی رد ءَ اے پھازگ ءِ نہ انت بلکیں مھلوک ءَ دلسیاہ ءُ لوگانی تہ ءَ بند کنگ ءَ انت ۔

کراچی ءِ دمگ لیاری ءِ ھند کلری یَ سیادی داروکیں بیست ءُ پنچ سالی ئیں نودبر زاھد علی بلوچ، یل کنگ ءِ ھاتر ءَ کراچی پریس کلب ءِ دیم ءَ زھرشانی نندانک نھمی روچ ءَ برجاہ –

زھرشانی نندانک ءَ ھواریں مردماں زاھد علی ءِ یل کنگ ءِ ھاتر ءَ لوٹ کتگ ءُ اوگام جتگ-

بیگواھیں زاھد علی ءِ پت عبدالحمید ءَ گوشتگ منی زھگ ءَ بیست ءُ پنچ روچ انت بیگواہ انت ءُ مارا تنی وھدی آئی ءِ بارو ءَ ھچ ھال دیگ نہ بیتگ انت کہ آ چتور انت ءُ کجا بندیگ انت-

آئی ءَ گوشتگ اگاں زاھد علی ءِ سر ءَ کجام ھم بھتامے ھست انت گڑا آ آمیدگس ءَ پیش کنگ بہ بیت ءُ ڈیھ ءِ کانونانی درچ ءُ سزا دیگ بہ بیت بلے چوش اے داب ءَ بیگواہ کنگ مئے سرجمیں کھول ءِ واستا دردناک انت-

آئی ءَ گوشتگ زاھد علی میان اُستمانی تک ءِ یک نودربرے ءُ آ ھبدہ جولائی دوھزار ءُ بیست ءُ پنچ ءَ وتی رکشہ ءِ ھواری ءَ سیکیورٹی کارندھاں دزگیر کتگ ءُ برتگ کہ چریشی ءَ پد آ بیگواہ انت-

آئی ءَ انسانی ھکانی گل، اھوالکار ءُ چاگردی مھلوک ءَ چہ دزبندی کتگ کہ آئی ءِ چک ءِ یل کنائینگ ءَ آئی ءِ توار جوڑ بہ بنت ءُ زاھد علی ءَ سلامتی ءَ یل کنگ ءَ وتی کرد ءَ پیلو بہ کن اَنت-

بلوچستان ءِ دمگ کیچ ءِ ھند بلیدہ گردانک ءَ چارشمبے ءِ روچ ءَ ناشناسیں مردمے ءِ لاش دزکپتگ کہ آ تیرگواری کنگ ءُ کشگ بوتگ۔

لیویز ءِ رد ءَ بنداتی پٹ ءُ پول ءَ پدر بوتگ کہ بیران بوتگیں مردم ءَ را نزیکیں دوری ءَ تیرگواری کنگ بوتگ۔ وئیل جاہ ءَ چارگ بوگ ءَ انت ءُ گیشیں پٹ ءُ پول برجاہ انت ۔

لاش دستیگ کنگ ءَ پد تربت ءِ ٹیچنگ ہسپتال ءَ سر کنگ بوھگ ءَ انت ۔ بنشون ءِ گشگ انت کہ اے وھد ءَ بیران بوتگیں مردم ءِ پجار پدر نہ بوتگ ءُ سیاد ءُ وارسانی درگیجگ ءِ جھد کنگ بوگ ءَ انت۔

پاکستانی پوج ءَ ھُزدار ءِ شھر چہ وحید شاہ چوک ءَ رحمت اللہ ء عبدالکریم بڈانی آوار جتگ، چریشی ءَ پد آ بیگواہ ءَ اِنت-

رحمت اللہ، کہ زھری ءِ جھمنند اِنت، وتی سیادانی گند ءُ نند ءَ ھُزدار ءَ اَتکگ بیتگ، دو گاڑی ءَ سوار کارندھاں آ آوار جتگ-

کھول ءِ گوشگ اِنت کہ وئیل ءَ پد دمگی تھانہ ءَ ایف آئی آر نکش کنگ جُھد کتگ بلے پولیس ءَ رد کتگ-

شال ءَ سَے شمبے ءِ روچ ءَ تراکے ءَ پولیس ءِ گشت ءِ گاڑی نشانگ جوڑ کنگ بوتگ چریشی ءِ آسرا آیاں تاوانانی دیمپانی کنگ کپتگ-

پولیس ءِ رد ءَ وئیل ھما وھد ءَ بوتگ کہ گشت ءِ کارندھانی گاڑی ءِ نزیک ءَ تراک بوتگ ۔

تراک ءِ آسر ءَ پولیس ءِ گاڑی ءَ ھوار گوزوکیں یک گاڑی ءَ ھم تاوان رس اتگ-

واکداراں انگت ءَ اے تاوان ءِ بابت ءَ ھچ وڑیں ھال ءُ اھوال نہ داتگ۔ پولیس ءُ بمب ڈسپوزل اسکواڈ ءَ ویلجاہ ءَ سر بیتگ ءُ چمدیستگیں مردمانی یکجاہ کنگ اش بندات کتگ-

پاکستانی لشکر ءَ چہ کراچی ءَ مکران ءَ رؤکیں بازیں مساپر کوچ اوتھل زیرو پوائنٹ ءَ داشتگ انت ۔ اے بس کیچ ءُ گوادر ءَ رؤکہں مردین، جنین ءُ چُک سوار انت۔

بنشون ءِ رد ءَ سرکاری وھد ءِ سر ءَ امل نہ کنگ ءِ سبب ءَ مساپر گاڑی دارگ بوتگ انت۔ ایشاں مکران ءَ روگ ءِ اجازت دیگ نہ بوھگ ءَ انت، وھدیکہ شال ءِ نیمگ ءَ روگ یَ ایوک ءَ اجازت دئیگ بوھگ ءَ انت۔

شجریانی گشگ انت کہ اوتھل زیرو پوائنٹ ءَ چہ کراچی ءَ مکران ءَ بازیں کچے ءَ مساپر کوچانی اوشتارینگ ءِ وئیل مکران ڈویژن ءِ زمینی بندوکی ءِ تہ ءَ مزنیں اڑاندے ءِ شون ءَ دنت۔ کیچ ءُ گوادر ءِ مساپراں زالبول ءُ زھگاں ھوار ”سرکاری ٹائمنگ“ ءِ ھلاپ ورزی ءِ تھنا بھتام ءِ سر ءَ بند کنگ ءَ راجمانی تکلیل گیش بیت۔ اے گامگیج ءَ چہ نہ ایوک ءَ دمگی زرکاری ءُ سفر ءِ روانی ءَ را تاوان رس ایت بلکیں مساپرانی تہ ءَ بے تاھیری ءُ بے ستکی ھم پیداک بیت۔

لس مھلوک ءِ گوشگ انت کہ مکران ءِ نیمگ ءَ سپر بند کنگ ءُ شال ءِ نیمگ ءَ پچ کنگ ءِ پیسلہ پرک ءُ جتائی گندگ ءَ کیت کہ ایشی ءَ چہ انتزامیہ پالیسی ءِ بابت ءَ ایراد گرگ بیت انت۔

مساپراں گشتگ کہ گزاراں مساپر پیریں مردماں، زھگاں، جنیناں ءُ نادراجاں ھوار چہ ترندیں گرم ءَ مھتل امت۔ آھاں وتی منزلاں سر کنگ ءِ راہ دیگ بہ بیت۔

مساپراں گشتگ کہ پیسرا چیکنگ ءِ نام ءَ بازیں چیک پوسٹاں ساھتانی ساھتاں اوشتارینتگ انت بلے نی سپری بندشانی سبب ءَ جاور گیشتر ناوش انت-