TBP Balochi

بلوچ لبریشن آرمی ءِ جارکش جیئند بلوچ ءَ وتی شنگ کرتگیں درشانے ءِ تہ ءَ گوشتگ کہ مئے سرمچاراں کیچ، مستونگ ءُ کچھی ءَ زورگریں پاکستانی پوج ءُ آئی ءِ ھمکارانی سر ءَ شش اُرش کُتگ انت – اے اُرشاں ریموٹ کنٹرول آئی اِی ڈی ھم مان بوتگ کہ زورگریں پاکستانی پوج، آئی ءِ وردن بروک ءُ موبائیل ٹاورانی سر ءَ کنگ بوتگ انت –

جارکش ءَ سرجمیں ھال داتگ ءُ گوشتگ کہ گوستگیں روچ ءَ بلوچ لبریشن آرمی ءِ سرمچاراں زامران ءِ دمگ دشتک ءَ زورگریں پاکستانی پوج ءِ بم ڈسپوزل ٹولی ءِ کارمند ھما وھد ءَ ریمورٹ کنٹرول بمب اُرش ءِ نشانگ کتگ انت کہ آ راہ ءِ پٹ ءُ پول ءُ کلئیر کنگ ءَ دلگوش بوتگ انت – اُرش ءَ زورگریں پوج ءِ یک کارمندے ھما دمان ءَ مُرتگ –

آئی ءَ گوشتگ کہ مئے سرمچاراں زامران ءِ دمگ کٹگان ءَ برجاھیں زورگریں پاکستانی پوج ءِ پانگسے ءِ سر ءَ وتکاریں سلاھاں گوں اُرش کتگ چریشی ءَ زورگریں پوج ءَ جانی تاوان رس اتگ –

ھمے وڑ بلوچ لبریشن آرمی ءِ سرمچاراں زامران ءِ دمگ ساہ دیم ءَ زوگریں پاکستانی پوج ءِ پانگسے ءِ سر ءَ وتکار ءُ مزنیں سلاھاں گوں اُرش کتگ – سرمچاراں زورگریں پوج ءِ پوزیشنانی سر ءَ بازیں گرنیڈ لانچرے آس داتگ کہ سوبمندی ءَ ھما جاہ ءَ شتگ ءُ لگ اِتگ انت چریشی ءَ کم چہ کم دو کارمند مُرتگ ءُ سَے زدگ بوتگ انت –

جارکش ءَ گوشتگ کہ مئے سرمچاراں گوستگیں روچ ءِ نیمروچ ءِ وھد ءَ زامران ءِ ھمے دمگ ءَ ساہ دیم ءَ زورگریں پاکستانی پوج ءِ بنجل ءَ وردن بروکیں یک ٹرک گاڑی ءِ بمب اُرش ءِ نشانگ کتگ چریشی ءَ گاڑی سرجم ءَ تباہ بوتگ –

جارکش جیئند بلوچ ءَ وتی درشان ءِ تہ ءَ گوشتگ کہ سرمچارانی پد ماں پدی اُرشاں پد زورگریں پوج چہ دگہ نیمگاں وتی زلورتاں سرجم کنگ ءِ کوشست ءَ کنگ ءَ انت – زورگریں پاکستانی پوج زامران ءُ تگران ءِ ھندی مردماں ٹوکن ءِ لالچ ءَ دیگ ءُ وتی واستا کارگرگ ءَ انت – بلوچ لبریشن آرمی ءَ پیش ءَ اے گپ تچک کتگ کہ دمگی مردم پاکستانی پوج ءِ ھاتر ءَ سامان یا دگہ ھچ وڈیں کمک مہ کن انت اگاں ناں آ وتی جان ءُ مال ءِ زمہ وار وت بہ انت –

جارکش ءَ وتی درشان ءِ دیمتر ءَ گوشتگ کہ سرمچاراں مستونگ ءِ دمگ جوتو ءَ بلوچ ءِ مڈیانی لُٹ ءُ پل ءَ ھواریں گاڑیانی سرا اُرش کتگ چریشی ءَ گاڑیاں سک باز تاوان رس اِتگ –

آئی ءَ گوشتگ کہ یک دگہ اُرش ءِ کچھی ءِ دمگ حاجی شار ءَ کنگ بوتگ کہ اود ءَ سرمچاراں یوفون کمپنی ءِ ٹاورے ءِ سر ءَ اُرش کتگ ءُ مشینری تباہ کتگ انت –

جارکش ءَ گڈسر ءَ گوشتگ کہ بلوچ راجی لشکر بی ایل اے درسیں اُرشانی زمہ واری ءَ من ایت –

بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءَ گوشتگ بی آر جی ءِ سرمچاراں ھپت مئی ءِ شپ ءَ ٹوبو ءَ تیل ءُ گیس ءِ کمپنی او جی ڈی سی ایل ءِ نیمگ ءَ گیس گار ءِ مین وال تراکناکیں شورواں گوں تباہ کتگ-

آئی ءَ گوشتگ بی آر جی اے اُرش ءِ زمہ واری ءَ من ایت ءُ مئے اے دابیں اُرش بلوچستان ءِ آجوئی ءَ داں برجاہ بنت اِنت-

بلوچستان ءِ دمگ بولان ءِ سنگان، جالڑی ءُ کش ءُ گوری دمگاں پاکستانی لشکر لشکر کشہ کنگ ءَ انت ءُ زمینی لشکر ءَ بالی کمک ھم گون انت۔

اے دمگاں بازیں کچے ءَ لشکر دیم ءَ روگ ءَ گندگ بیتگ اَنت۔

بولان ءِ آپریشن ءَ پاکستانی لشکر ءِ نیمگ ءَ تاں انوگ ءَ آجوئی لوٹوکاں ھچ وڑیں تاوان ءِ ھچ وڑیں ھال ءُ اھوال نہ بوتگ بلے اے ھپتگ ءِ سئے شمبے ءَ مچ ءِ نزیک ءَ پاکستانی لشکر ءِ کاروان بلوچ لبریشن آرمی ءِ آئی ای ڈی ءِ اُرش ءِ نشانگ جوڑ کتگ ات۔

دو روچ پیسر بلوچ لبریشن آرمی ءَ بولان ءِ دمگ مَچ ءَ آپریشن ءِ ھاترا روگ ءَ لشکر ءِ کاروان نشانگ جوڑ کتگ ءُ یک افسرے ءَ ھوار 12 کارندہ مرتگ ات اَنت۔ اے گل ءَ اے اُرش ءِ ویڈیو ھم شنگ کتگ اَنت۔

پاکستانی واکداراں بولان ءِ اُرش ءَ مردمانی بیرانی ءِ پدرائی کتگ بلے آپریشن ءِ ھوالگ ءَ انگت ءَ سرکاری بیان شنگ نہ بوتگ۔

بلوچستان ءِ دمگ کیچ ءِ ھند زامران ءَ پاکستانی پورسز ءِ پوسٹ ءِ سر ءَ ناشناسیں سلاہ بندیں مردماں اُرش کتگ ۔

اے اُرش زمران ءِ دمگ کٹگان ءَ بوتگ کہ اود ءَ سلاہ بندیں مردماں گوں مزنیں سلاھاں پورسز ءِ چیک پوسٹے نشانگ جوڑ کتگ۔

اُرش ءِ وھد ءَ دمگ ءَ ترندیں تیرگواری ءُ بازیں تراکانی توار اشکنگ بوتگ انت۔ وئیل ءَ پد اُرش کنوکاں پشت مانداتگ ءُ شتگ انت ۔

واکداراں انگت ءَ اے درگت ءَ ھچ اھوال دیم ءَ نیاؤرتگ ءُ دمگی مردمانی رد ءَ پوج ءَ تاوانانی دیمپانی کنگ کپتگ-

زانگ بہ بیت کہ گوستگیں روچ ءَ زمران ءَ دو جتا جتائیں جاھانی سر ءَ پاکستانی اُرد ءِ بمب ڈسپوزل اسکواڈ ءُ مڈی سپلائی کنوکیں گاڑی یے بمب تراک ءِ نشانگ جوڑ کنگ بیتگ ات۔

انگت ءَ اے اُرشانی زمہ واری کس ءَ نہ زرتگ انت۔

بلوچستان ءِ دمگ ڈیرہ بگٹی ءَ ناشناسیں مردماں گیس ءِ پائپ لائن تباہ کتگ ءُ کچھی ءَ کمیونیکیشن کمپنی ءِ ٹاور نشانگ جوڑ کنگ بوتگ۔

نامالومیں مردماں ڈیرہ بگٹی ءِ دمگ ٹویو ءَ تیل ءُ گیس کمپنی او جی ڈی سی ایل ءِ نیمگ ءَ ایر کنگ بوتگیں گیس ءِ پائپ لائن ءِ گار ءِ پیپ نشانگ جوڑ کتگ۔

گوستگیں شپ ءَ کچھی ءِ دمگ حاجی شار ءَ ناشناسیں سلاہ بندیں مردماں یوفون کمپنی ءِ کمیونیکیشن ٹاورے نشانگ جوڑ کتگ۔ اے اُرش ءَ ٹاور ءِ مشینری ءَ را تاوان رس اتگ۔

انگت ءَ اے اُرشانی زمہ واری کس ءَ نہ گپتگ، بلے بلوچ ءِ سلاھبندیں آجوئی ءِ گل پرکار اَنت –

بلوچستان ءَ بناہ بیتگیں جنگ ءِ سان دور دور گندگ ءَ پیداک انت کہ اود ءَ اے وھد ءَ بلوچ آجوئی لوٹوکیں سلاہ بندیں گلانی اُرشانی توک ءَ یک مزنیں ترندی یے گندگ ءَ آیگ ءَ انت-

گچینی رنگ ءَ بلوچستان ءَ دو سلاہ بندین گل گیشتر پُرکار گندگ ءَ آیگ ءَ انت کہ آیانی توک ءَ بلوچ لبریشن آرمی ءُ بلوچستان لبریشن فرنٹ کہ اے دوئیں سلاہ بندیں گل وتی اُرشانی وھد ءَ گیشتر ھاسیں ‘ گچینیں ’ رنگے ءَ تامر کَشی کنگ ءَ ھم گندگ بنت انت-

آیانی تامر بنداں ھمے پدر بیت انت کہ آیانی ساز ءُ سامان یک شریں رنگے ءَ جوڑینگ بیتگ انت چوشکہ کیمرہ ءِ کوالٹی ءِ ھواری ءَ آیانی گیشتریں چیز سُپٹ گندگ ءَ آیگ ءَ انت-

بلوچ لبریشن آرمی ءَ سَے شمبے ءِ روچ ءَ بولان ءِ دمگ مَچ ءَ پاکستانی پوج ءِ کاروان ءِ سر ءَ بیتگیں اُرش ءِ تامر وتی آفیشل چینل ھکّل ءَ شنگ کتگ-

بی ایل اے ءِ رد ءَ اے اُرش اسپیشل ٹیکٹیکل آپریشبز اسکواڈ ‘ ایس ٹی او ایس’ ءِ نیمگ ءَ کنگ بیتگ کہ چریشی ءَ شوُرکنڈ مچ ءِ ھند ءَ پاکستانی پوج ءِ یک گاڑی یے آئی ای ڈی اُرشے ءِ نشانگ کنگ بیتگ- بی ایل اے ءِ رد ءَ اُرش ءِ وھد ءَ گاڑی ءَ سواریں دوازدہ کارندہ جاہ پہ جاہ ءَ مرتگ انت-

تامر پنچ ءَ منٹ ءَ ھوار انت ویڈیو ءَ آئی ای ڈی تراک ءِ ندارگ ھم گندگ بیت اِنت-

گل ءِ نیمگ ءَ شنگ کتگیں تامر ءَ گندگ بیت اِنت کہ بی ایل اے ءِ جنگول یکدم نزیک ءَ پاکستانی پوج ءِ سُر ءُ پراں چارگ ءَ انت ءُ تامر ءَ کشگ ءَ انت – تامر ءَ گندگ بیت اِنت پاکستانی پوج ءِ بمب ڈسپوزل یونٹ ءِ کاروان ءِ آیگ ءَ پیش راہ ءَ ساپ کنگ ءَ دزبند انت دانکہ دگہ شورو ءُ تراکے مہ بیت اِنت بلے آ ایشی ءَ سرجم ءَ بے سوب بند اِنت-

گیشیں ودار ءَ پوج ءِ یک کاروانے سر بیت انت کہ بازیں کارندہ گاڑی ءَ سواری ءَ گندگ بنت ءُ ھمے جاہ ءَ جنزگ ءَ انت ھمے وھد ءَ بی ایل اے ءِ جنگول یک ترنداریں تراکے ءِ نشانگے کن انت- تامر ءَ گندگ بیت اِنت کہ گاڑی اَچ تراک ءَ سرجم ءَ تباہ بیت انت-

بی ایل اے ءَ وتی درشان ءَ گوشتگ کہ اے اُرش ءِ مول ءُ مراد ھمے بیتگ کہ پاکستانی پوج گمانی آپریشن ءِ دارگ بیتگ –

پاکستانی پوج ءِ جارکش آئی ایس پی آر ءَ گوستگیں روچ ءَ اے ھال ءِ راست کنان ءَ 7 کارندھانی مَرگ ءُ پنچ ءِ زدگ بوگ ءِ ھاپ راست کتگ-

زانگ بہ بیت بی ایل اے بلوچستان ءَ پاکستانی ءُ چینی منسوبہ ءُ سیکورٹی پورسز ءِ سر ءَ ھترناکیں اُرشانی نام ءَ زانگ بیت اِنت ءُ اے گل وتی گیشتریں اُرشانی تامراں کش ایت ءُ پد ءَ ترامجاھاں شنگ کنت اِنت-

بلوچ یکجھتی کمیٹی ءِ رھشون ڈاکٹر صبیحہ بلوچ ءِ پت ءَ زورانسری بیگواھی ءَ یک ماھے ءَ چہ گیش بیتگ، پاکستانی چیریں ادارھانی کارندھانی نیمگ ءَ چہ صبیحہ بلوچ ءِ دزگیری دیگ یا چہ بی وائی سی ءَ دزکشی ءِ شرت ایر کتگ اَنت-

بی وائی سی ءِ رھشون ءِ پت میر بیشر احمد چہ پنچ اپریل ءَ زورانسری بیگواہ کنگ بیتگ- رسانکدر ءَ شنگ کتگیں درشان ءِ تہ ءَ ڈاکٹر صبیحہ بلوچ ءَ گْوشتگ کہ منی پت ءَ ھچ چُشیں جرمے اناں بلکیں منی سیاسی گپانی بنیاد ءَ چست کتگ ءُ اے کانود ءِ ایر کنگ نہ اِنت بلکیں سیاسی چمپروشی اِنت-

اِھوالکار ءَ ٹی بی پی ءَ گْوشتگ کہ صبیحہ بلوچ ءِ پت پاکستانی چیریں ادارھانی کارندھانی دست ءَ اِنت – کارندھانی نیمگ ءَ چہ کھول ءِ نیمگ ءَ چہ گوشگ بیتگ صبیحہ بلوچ دزگیری بہ دنت یا چہ بلوچ یکجھتی کمیٹی ءَ دزکش بہ بیت-

پاکستانی چیریں ادارھانی نیمگ ءَ چہ میر بشیر احمد ءِ کشگ ءَ ھوار کھول ءِ آ دگہ مردماں زورانسری بیگواہ کنگ ءِ بیھار داتگ-

جنیوا ءِ اکوام متھدہ ءِ انسانی ھکانی پھازکاری ءِ ھاسیں نمائندگ میری لاولر ءَ ڈاکٹر صبیحہ بلوچ ءِ ھلاپ ءَ کاروائی ءِ سر ءَ دلپدردی درشان کتگ-

وتی یک درشانے ءِ تہ ءَ میری لاولر ءَ گْوشتگ کہ آئی ءَ ھال سر بیتگ کہ ڈاکٹر صبیحہ بلوچ ءَ پاکستان کجام وھد ءَ دزگیر کت کنت، وھدے کہ واکدار ءَ آئی ءِ انسانی ھکانی کار کنگ ءِ بدل ءَ آئی ءِ پت ھم انتکامی کاروائی ءِ دروشم ءَ دزگیر کتگ-

میری لاولر ءَ لوٹ کتگ کہ بلوچستان ءِ واکدار زوت صبیحہ بلوچ ءِ ھلاپ ریاستی انتکامی کاروائیاں بند بہ کنت ءُ آئی ءَ انسانی ھکانی پھاز ، رکینگ ءُ دیمروئی ءِ ھاتر ءَ آجوئیں ھساب ءَ کار کنگ ءِ موکل دیگ بہ بیت-

زانگ بہ بیت بلوچ یکجھتی کمیٹی ءِ رھشون ڈاکٹر ماہ رنگ بلوچ، بیبگر بلوچ بندیگجاہ ءَ بندیگ کتگ اَنت وھدے کہ سمی دین بلوچ کراچی ءَ لَٹ ءُ کُٹ کنگ ءَ پد دزگیر کتگ اَت-

بی وائی سی ءِ باسک بیبو بلوچ ءُ گل زادی بلوچ ھم بندیگجاہ ءَ بندیگ کتگ اَنت وھدے کہ کراچی ءُ ھب ءَ پُرکاریں باسک فوزیہ بلوچ ءُ ماہ زیب بلوچ زورانسری بیگواہ کنگ ءَ بیست ءُ چار ادار ءَ پد یل کتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ سوراب ءُ ھاران ءَ دو جتاجتائیں اُرشانی زمہ واری منّ اِتگ اَنت-

بی ایل ایف ءِ جارکش میجر گْوھرام بلوچ ءَ رسانکدر ءَ وتی شنگ کرتگیں درشان ءِ تہ ءَ گوشتگ کہ 6 مئی ءِ شپ ءِ ادار ھشت ءِ نزیک ءَ بی ایل ایف ءِ سرمچاراں ھاران شھر ءِ ریڈ زون ءَ ملٹری انٹیلی جنس ءِ کارگس چہ نزیک ءَ نشانگ کرتگ۔ چریشی ءِ آسر ءَ دژمن ءَ جانی ءُ مالی تاوان بوتگ۔

جارکش ءَ گوشتگ کہ شش مئی ءَ یک دگہ اُرشے ءَ بی ایل ایف ءِ سرمچاراں شپ ءِ ادار دہ ءِ نزیک ءَ سوراب ءِ ھند ماراپ ءَ یک بندساچی شرکتے ءِ سر ءَ اُرش کرتگ ءُ سرجمیں مشین ءُ سامان تاوان داتگ اَنت-

میجر گْوھرام بلوچ ءَ اُرشانی زمہ واری من اِتگ ءُ گوشتگ داں بلوچستان ءِ آجوئی ءَ زورگریں پاکستانی لشکر ءُ پہ دیمروئی ءِ نام ءَ لشکری سر ءُ پر ءُ بلوچ ءِ مڈیانی لٹ ءُ پل ءَ ارزان کنوکیں درسیں شوربندیاں نشانگ کن ایں۔

جارکش ءَ دگہ یک درشانے ءِ تہ ءَ گوشتگ کہ مرچی 7 مئی 2025 ءَ نیمروچ ءِ ادار دو ءُ نیم ءِ نزیک ءَ بی ایل ایف ءِ سرمچار ھاران ءِ شھر ءَ بابا ھاران ءِ نزیک ءَ ڈی آئی جی پولیس کمپلیکس ءِ جوڑ کنوکیں مشینری تباه کنگ ءِ نیت ءَ شتگ اَنت ، وھدے کہ اود ءَ سر بیتگ اَنت کمپلیکس ءِ پھازداریں پولیس کارندھاں سرمچار دیستگ اَنت ءُ آیانی سر ءَ اُرش کرتگ ، بلوچ سرمچاراں پولیس کارندھاں ده دمان وھد داتگ که آ وتی گھگیری ءَ بند بہ کن اَنت بلے پولیس کارندہ سرمچارانی نرمی ءَ آیانی نزوری سرپد بیتگ اَنت ءُ تیرگواری اِش برجاه داشتگ، چریشی ءَ سرمچاراں په ایمنی ءَ پھازداریں پولیس کارندھانی سر ءَ پسّھی اُرش کرتگ۔

آئی ءَ گوشتگ کہ سرمچارانی پسھی اُرش ءَ یک پولیس کارندھے عبدالقیوم جھمنند نوشکی ٹپی بیتگ ، چریشی ءَ پد آ دگہ پولیس کارندھاں وتی سلاه چگل داتگ اَنت ، سرمچاراں پولیس کارندہ دزگیر کرتگ اَنت ءُ آیانی سلاه دستیگ کتگ ءُ کڈن کنگ ءَ پد یل کرتگ اَنت۔

جارکش میجر گھرام بلوچ ءَ ھاران ءَ نوک جوڑ بوکیں ڈی آئی جی پولیس کمپلیکس پھازداریں پولیس کارمندانی سلاھانی دستیگ کنگ زمہ واری من اتگ ءُ گوشتگ کہ یکبرے پد ءَ چه رسانکدر ءَ پولیس ءِ تہ ءَ ساڑی ئیں بلوچیں کارندھاں کڈن کن اِیں کہ آجوئی ءِ جنگ ءَ زورگریں ریاست ءُ آئی ءِ رستریں پوج ءِ کمکار جوڑ مہ بنت ءُ چہ سرمچارانی بگیری ءَ پھریز بہ کن اَنت اگاں نہ گوں آیاں ھما وڑ کنگ بیت کہ گوں زورگریں پوج ءَ کنگ بیگ ءَ اِنت۔

ھوراں کہ گْوارگی نہ اِنت نام گوریچ ئیگ اِنت

نبشتہ کار: اُزیر بلوچ

دی بلوچستان پوسٹ

دشت ءِ کسانیں میتگے ءَ بیگاہ ءِ سھت اَت پیر ءُ کماش، جنین ءُ ورنایانی دیوان اَت ، چاہ ءُ چلیم ءُ کسہ جَنگ کائی اَت۔ شھر ءَ چہ اتکگیں ورنا شاھان نوک نوکیں گپ ءُ کسہ آرگ ءَ اَت، کماش ءُ پیریں آئی ءَ گوش دارگ ءَ اِت اَنت۔ شاھان ءَ ھمے زیتاں سی ایس ایس ءِ چکاس پاس کُتگ اَت ءُ گل ءَ بال اَت، بگلُک ءَ بگلُک اَت ءُ کس ءَ بھ کنگ ءَ نہ اَت۔ شھری زِند ءِ سر ءَ گپ ءَ اَت، چُکاں بہ وانین اِت ءُ گمراہ بیگ ءَ میل اِت ھمے ڈولیں گپاں گوں دیوان وتی نیمگ ءَ دلگوش گْور کُتگ اَت۔

پیریں کماشے ءَ گپ گپ ءِ تہ ءَ درائینت “ شما واجھیں مردم اِت، سرکار ءِ نوکر اِت ءُ شمارا مئے وڑیں بزگانی واستا ھچ مھر نیست۔” ھمے گپ ءِ اِشکنگ ءَ گوں سی ایس ایس ءِ پاس کُتگیں ورنا سُھر تر اِت ءُ درائینت ئِے” ھو، شمئے چُکاں نوکری نہ رس اِیت نی شمارا زھر کیت۔ ما انگت وتیگ ایں، ما کہ نوکری مہ کن ایں دری مردم کاینت ءُ نوکریاں بر اَنت۔” کش ءَ نشتگیں ناکو ھیاتان ءَ پسو دیان ءَ گوشت کہ“ اناں، منی پِت، مارا کسی سر ءَ زھر نئیت، مئے مردم ایمن بہ بنت ایشی ءَ چہ مستریں وشی نیست۔

بلے شمارا یات اِنت پاری ناکو گنگُزار ءِ بچ گار اَت گڑا مردماں راہ بستگ اَت کہ مئے چُک ءَ یلہ کن اِت، سرکار ءِ دری مردماں وَت اتک نہ کُت گڑا اسپیت پوشیں بلوچ مردے دیم دات اِش ءُ نشتگیں مردماں سوگند ءُ مسام کُت ءُ مردم پاد کُت اَنت کہ شمئے چُک سے روچ ءِ تہ ءَ در کیت۔ پد ءَ شما دیست کہ چار ماہ ءَ پد گنگُزار ءِ بچ چاکر ءِ تیر سُپتگیں جون دست کپت۔” ھمے میان ءَ دیوان ءَ نشتگیں دگہ ورنایے ءَ درائینت “ ناکو ایشاں بِل، ایشاں وشی ءُ زر دیستگ نی کوم ءُ راج ءَ چہ بے ھیال اَنت۔ جھندم ء مردمانی کمک کنگ ءَ اے مئے بزگ کنگ ءُ پُلگ ءُ ورگ ءَ ھوار اَنت۔ پد ءَ نامو کن اَنت کہ مئے گور ءَ دگہ راہ نیست۔”

سی ایس ایس ءِ چکاس ءَ پاس بیتگیں ورنا شاھان گْوات گِپتگ اَت گڑا درائینت ئِے“ ھو، گڑا بیار اِت شما انچیں معاشی نظامے کہ ما کار کُت بہ کن ایں، ھُشک ءَ نندگ ءُ بٹاک جنگ نہ اِنت۔ ما سرکار ءِ مزنیں نوکری مہ گریں دگرے گِر اِیت۔” ورنا ءَ گوں سُبکیں توار ءَ پسو دات “ تئی وانگ ھر ءِ تِر، تو انگت اے گپ ءَ سرپد نہ ئے کہ دانکہ ترا استان مہ بیت معاشی نظام بیت نہ کنت۔ استان ءِ مستریں بھراں چہ یکے معاشیت اِنت۔ ھمیش اِنت راج وتی استان ءِ جھد ءَ اِنت، بلے شمئے وڑیں بیوروکریٹس نشتگ ءُ ھمے استان ءِ ناں تھنا بھر جوڑ اَنت بلکیں آئی ءَ گیشتر مھکم کنگ ءَ اَنت۔” دیوان برجاہ اَت، گپ ءُ رپ اَت، کندگ ءُ مسکرا اَت۔ اے گپانی گوشدارگ ءَ چہ شاھان چہ دیوان ءَ پاد اَتک ءُ روگ ءَ لگ اِت۔

ھمد ءَ نشتگیں شیتانیں گونڈوے ءَ کُکار کُت “ ھاں، بہ دار پاداں، دارگ نہ بہ ئے تو، چمپلاں بر گوں۔”

اے گپ ءَ سالے گوستگ اَت میتگ ءَ ھال اَتک کہ ناکو ھیاتان ءِ بچ میران چہ شھر ءَ وانگ ءِ موکلاں لوگ ءَ پیداگ بیتگ ءُ نیم راہ ءَ چِست کنگ بیتگ۔

میتگ ءَ ورنا ءُ جنیناں ھمت کُت ءُ میتگ ءِ نزیکیں مزن دگ بند کُت ءُ نِشت اَنت۔ راہ ءِ بند بیگ ءِ چار کلاک ءَ رند مزنیں کچے ءَ پُولیس ءُ سپاھی اتک ءُ مُچ بیت اَنت کمو سھت ءَ پد یک اسپیت پوشیں بلوچ مردے پہ مزاکرات ءَ اَتک۔

مرد کہ زھرشانی ءِ سر ءَ سر بیت داں دیست ئِے ناکو ھیاتان ءَ وتی بچ ءِ پوسٹر دست ءَ اِنت ءُ مزن دگ ءِ چار راہ ءِ سر ءَ اوشتاتگ۔ ناکو ھیاتان ءِ چم شاھان ءَ کپت اَنت کہ اسپیتیں پوشاکے چاڑینتگ ئِے ءُ چار گاٹ ئِے پُشت ءَ گون اِنت ءُ مَلّان اِنت دیم پہ مردماں۔

ناکو ھیاتان ءِ دپ ءَ در آتک “ شاھان تو گوں وتی سپاھیگاں مئے لٹ دیگ ءَ پیداگ ئے!” پد ءَ ناکو ھیاتان اُوشتگی جاہ ءَ کپت۔۔۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ دمگ ھاران ءَ برجاہ باب ھاران ءِ نزیک ءَ ناشناسیں سلاہ بندیں مردماں ڈی آئی جی پولیس کارگس کمپلیکس سر ءَ اُرش کتگ-

ٹپی پولیس کارندہ ءِ پجّار عبدالقیوم ء محمد حنیف جھمنند نوشکی نام ءَ چہ بیتگ،کہ پہ الاج ھاتر ءَ نادُراھجاہ ءَ برگ بیتگ-

اُرش ءَ پد سلاہ بندں مردماں پولیس کارندھاں چہ سلاہ پچ گپتگ ءُ جاہ پہ جاھی تتکگ اَنت-

وئیل ءَ پد پوج ءَ دمگ انگیر ءَ کتگ اُرشکارانی پٹ ءُ پول بندات کتگ-